2004 年 3 月 14 日 星期日 【晴】

今日.........單身人士的一天~返朝八晚九啊.........

朝早當然係準時七點半醒返八點堂~
今日睇左片呢~但依然係訓左少少........
之後上電視廣告,都話全個sem得呢科我唔會訓覺架啦~~~

中午,因為大家都唔出,所以我係o係房食出前丁丁架~
上左陣網.....跟住又返實習堂~
今堂我地終於都拍左d似樣少少o既野出黎喇~
仲有個大四的師兄入左我地組,俾左唔少寶貴意見我地呢~

上完堂,搞完餅帶傾埋野都五點喇~
返房又上左陣網.....跟住又去返七點晚選課--->麻醉治療學
好似幾好玩咁喎,仲遇到今朝幫左我唔少的Vanessa~
第二堂 sa 都返埋黎~前面o係度玩鋤大d..幾開心呀......臨落堂點左名~

咁今晚本來又諗住約食宵夜的,但又係個個都唔出~
結果我自己一個出......因為太肚餓,同埋要拎錢買充值咭........
又咁o岩俾我撞到阿 Lui 阿桃 同 樂文 喎~咁就一齊出去食飯喇~牛丸呢~
返黎果陣去拎錢.........買完野就返黎喇~

仲要諗劇本..故事.......要拍短片啊~呵呵~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
知少一點,會對自己好一點嗎?
選擇沉默,可能令距離更加貼近?
沉默令我安心,安心的在一邊默默守護該守護的人......

有時候交談變得空洞,沉默卻像溝通......

>>March 15, 2004 at 4:25:06 PM GMT+8

2004 年 3 月 13 日 星期六 【微冷】

今日......係白色情人節啊~各位回左禮俾人未呢?
我今日又去左燒銀紙啊~~~

十一點半起身,十二點出去食飯.......去書城買左本書~
之後返黎,宜黎左我房上網~
跟住到七點就去左開體育部個會.......

俾我預想中多左人留低..........好事丫~
快快咁開完會~就同左家浩佢地出去食飯兼睇波~
去左實惠堅.....估唔到會駛咁多錢.....完全超出預算.........
佢地一路食飯一路鬧,因為八點半坐到十點至有波睇.........=_=

跟住睇左半場曼聯vs曼城...........全程粗口震天~哈~仲勁大聲~
十一點左右睇完半場就返黎沖涼喇~好在仲有熱水o者~

我要慳d駛錢......呢個星期一餐唔準過 $10 .......咁先平到條數.......

某人跟我說了一句話.........其實我現況和你也差不多,哈哈~
不要放棄,繼續努力啊~

一直都很喜歡鑽牛角尖~
看到甚麼,聽到甚麼,總會一直想想想~想當然的覺得自己已經了解事實~
也因此為自己帶來很多不必要的痛苦
幸好這個世界還有人肯把我從深淵中拉上來
謝謝你..........

>>March 14, 2004 at 4:38:24 PM GMT+8

2004 年 3 月 12 日 星期五 【微冷】

阿曹~生日快樂~雖然你唔會黎呢度........

今日凍返少少啊~~~今朝起身就 feel 到喇~~~
難得一日唔駛七點醒,梗係訓盡佢啦~十一點起身~
因為我記住左今朝要早少少起身洗大毛巾......洗完又覺眼訓,咁又去訓過~

再訓醒已經係兩點幾喇~食左兩個四洲麵當飯~
一路就上上網,聽聽歌咁又到夜晚喇~
我發現我d生活真係好易俾人估中........我只不過係今日online 時間長左 d o者~
就個個都問我 sa 係咪返左香港........哈~而家佢唔返香港我唔可以全日留o係房架咩?
去到七點左右,就出左去同家浩、妹、祺食飯~順手去左m記換 astro boy~

食完返黎,o係樓下玩左祺果架 "廣州電鋸大屠殺" 電單車~~~
今日終於敢開喇~真係幾好玩喎~
不過部車冇油.....如果唔係我會出去的.......呵呵~

條大毛巾到而家仲未乾........
我唔應該揀今日洗的...都冇太陽.....唉~失敗

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
哈~發現自己又陷入當初的情況~
一樣的反應,一樣的心情~
又是一種似曾相識的感覺........
怪不得我覺得結果都會是如此相同............
當時我不也像這樣傷害自己又傷害別人嗎?
而且一樣是自找煩惱的.....

那些空洞的談話.....我不想要
難道除了那些無聊的話語,我們沒有別的可做了嗎?
還不如一切歸於沉默來得親切....至少沉默會讓我覺得安心

>>March 13, 2004 at 4:31:39 PM GMT+8

2004 年 3 月 11 日 星期四 【晴】

好熱呀今日...........呵呵~

今朝七點起左身,諗住返八點架~但見到同房個樣訓得咁爽,我又要拎埋野返,就唔想起身喇~
結果都係訓返.......去到九點半至醒,跟住換衫去上 PE 堂~
今堂慘喇~~~因為體育館俾人book左,我地無得打波~
咁 miss 就叫我地做體能訓練.......跳樓梯、跑樓梯、仲有練定點波(向上打)
哇.......今堂運動量仲大過有波打果陣~件衫濕晒呀~

上完堂,返黎坐左陣,換左衫就同Fanny 地出去食飯喇~今日係牛丸呢~~~
食完返黎就o係房hea........一路hea到七點同青、祺、恆出去食飯~
今日去左西門間拌面......都ok啦~但超大食囉今日.......呵呵~
食完行左一陣又返黎喇~

今日都真係幾得閒.....得閒表示我又黎亂諗野喇~
哈..........聽日會做咩呢?
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
夜深人靜,本應是寫點甚麼的好時間
可我的腦袋卻又為著無聊事情而飛到不知甚麼地方~
看到的文字,聯想的情節畫面

看到你寫的字句,我想我應該沒有機會了~
既然預測到事件的結果,應該不要再繼續吧?
以前不是很好嗎? 那種感覺~只有我一個人知道就夠了~


看著你 盼望與你一起去飛
卻又怕 我這身世未配你
想一天 手拖手 共渡到老死

明知你喜愛自由 我怎敢妄想
捉著你的手 相戀到最後
怕你負擔不起 我所給的溫柔
不想讓自己成為你的束縛

比我好的人 或許你已見過太多
我也不期望 能得到甚麼結果
只希望 你會知道我的真心
我永遠為你 留著我的肩膀

>>March 12, 2004 at 5:36:14 PM GMT+8

2004 年 3 月 10 日 星期三 【晴】

2004-03-11

尋晚雖然冇去食宵夜,但都係搞到三點先訓~
因為又上左網選科呢~~~就係選左麻醉治療學~~~
本來想幫sa 選埋美容牙醫學架~
但用佢個acct再入已經俾人選左~~~sorry 呀~~~呵呵呵

今朝又係七點丫......八點返英文~~~
Miss 今日唔知發咩神經,一入課室就係咁鬧~
話我地無做功課喎......無理由咁快到更年期架佢~
成堂就o係唔多愉快的情況下上完~
本來我唔想返架喇~因為今日得呢堂咋~跟住無晒堂喇~

十點就返左房~返黎果陣見到sa~佢走得喇,返香港喇~真幸福~
返房上左陣網,十一點就去訓~十二點醒~
約左羽毛球隊班人今日十二點半食飯呢~~~
一路食一路吹吹水,講o下幾時有波打咁~食完又要去第二場~
今日立約左我地兩點三去華師打波呢~~~

最後都係成三點至去到~因為青遲到~呵呵~
今日戰況都幾激烈喎~我又受傷喇.......唉~
個場勁多落葉,我救波果陣一下唔覺踩左上去~
睇住自己隻腳跣出去呀~拉左個我平時一定做唔到的--->一字馬
嘩條筋突然間咁拉一拉,真係痛到爆燈呀~~~
之後佢地同教練朋友打比賽,我同阿欣過另一個場打~

又唔好意思話佢地唔識打,但又真係唔識喎~我都打得幾無奈~
之後出去買水...欣話我行路跛o下跛o下...係咩?
打到六點半天黑就返去喇~洗手果陣俾青睇左我大脾炒車的傷~
由最初紫紅變左紫黑,而家又變返紫紅,仲大塊左~呵~
行返學校,搵埋姨媽同恆就去食飯~祺都一齊啊~呵~

去左食冷麵~到九點左右就走喇~
同恆行去西門諗住買碟,但收晒檔喎~呵~
返到宿舍樓下玩左祺架電單車~即係我炒果部~又幾好玩喎~
玩完就返黎喇~

沒甚麼希望的事,是否應該讓它結束比較好?

>>March 11, 2004 at 4:33:46 PM GMT+8

2004 年 3 月 9 日 星期二 【晴】

是日........萬事不大吉~~~

朝早又八點邏輯學.......今堂開始編座位表囉........頂~
上堂老師叫我地睇李天命.....哈~我上學期都睇緊啦~呵呵~
返完就去返上個星期冇堂的--->英語報紙閱讀
個miss都幾可愛丫~~~但唔係好明佢講咩囉~呵呵~
其實四堂我都係o係度作緊歌詞,都無點聽書~如果唔係一定會訓~哈~

上完堂就約左出佰家樂食飯~今日得我、sa、立、南四個啊~
o係果度傾開玩挑戰盃d野....一傾就傾到兩點幾~
之後行左出百佳......再去返電腦城陪南買野~
之後就返房,sa 過左黎選科呢~
結果我又轉晚選喇~~~最後而家係返星期一--->麻醉治療學 ,呵~同sa 一齊返啊~~~
期間宜黎搵我,交低左d體育部野.........
到七點又再出去食飯~今次有我、sa、立、恆、浩、祺六個~
一時興起又去左中森名菜食喎~呵呵~
今次勁喇.........叫野叫到我地都食唔晒咁滯..........
食到九點左右就返黎喇........因為要趕開港分會呢~~~體育部變左我去開啊.......唉~

個會............我終於體會到喇........開會......開會........哈=_=
主要都係講返會內人事變動同埋跟住有咩做丫~
開到十一點至散........青請食宵夜,但我冇去............唔太想去~
果一個位忽然間覺得好無聊......好down,可能係終於睇到一d真相?
唔想記夜歸,要做功課......全部都係走o既藉口.......哈~
點解唔去,我自己心知就夠喇~

返到黎.......快快咁沖左個凍水涼.......真係勁凍~
沖之前出露台食左三個月黎第一枝煙.....咁o岩就俾某人撞到..........頂~
想出去諗o下野都俾人阻住.....唉~
沖完涼再出去就冇人喇~可以好好地諗o下我做乜野~
之後就成功咁 login 入黎打日記喇~yeah~~~

但尋日炒車著果條褲d油漬似乎洗唔甩.....有咩方法?

究竟我對你是怎樣的一種心情?
應該和不應該出現的反應我都出現了............
混亂.............

>>March 10, 2004 at 6:45:10 PM GMT+8

2004 年 3 月 8 日 星期一 【微冷】

是日...........都幾搞笑~又幾無奈~哈~~~受傷呢~~~

今朝七點半差d唔知醒~好在八點都趕到去經院返社會學概論.......但,真係勁悶~
訓左足足一堂呢~就夠鐘過教學樓上英文喇~~~
哈~今日俾miss話我答問題大聲~呵~不嬲都係咁架啦~不過唔答o者~呵~

上完堂~快快手咁返房放低野,就出去食飯喇~
因為今日約左佢地出去食日本菜呢~~~中森名菜~~~呵呵呵~~~
不過出去果陣個的士司機認真抵俾人打....唔識路就唔好亂行啦.......
我地好勁啊~~~今次七個人,每人一個飯,再加一盤壽司同一支sake都係 $148~
食完又拿拿聲趕返黎喇....因為大家都要上堂呢~~~跟住今日精彩野就黎喇~呵呵~

話說我返到黎,諗住出銀行入錢,咁就同祺一齊行~
咁佢去西門拎車嘛~我入完錢無理由唔撘車自己行返黎o者~~~咁就撘車返喇~
點知西門個閘封左~要繞路~~~一路都無問題架~我覺得好好玩架~~~
但去到建陽果陣.....呵呵~佢一上斜,冇收油喎~咁到頂時kick左一kick~
我一捉唔穩就跌左落黎喇~呵呵~o係正阿飛面前跌~呵呵~好瘀呀~~~
阿飛仲要撘祺架車去睇跌打~我咪會令佢有d不安呢?呵呵呵~

跌果陣右邊身先落地,所以我右手同右邊身都擦左落地架~
件衫變白左~條褲.....哈~中左幾片油漬~黑左~
隻手擦損左少少囉~皮就甩左好多~呵呵~但唔太痛喎~
反而大脾撞到果度超痛......瘀左一大條痕啊~(上完堂返黎至知咋~呵~)
返房換左條褲呢~我又去上返尋日堂實習喇~~~

今日好勁.......我地有兩組人黎左,拎左兩部機出去拍野~
o係科學館門口拍左d~跟住去左體育館拍啊~~~
去到四點左右我地就返課室睇片喇~哈~都........ok啦~第一次拍片係咁架喇~~~
一路拍時見到祺載住阿妹四圍去~呵呵~小心小心~

返到黎.......冇野做喎~咪上網囉~
今日個個都唔出,夜晚就自己搞掂喇~(即係而家我仲食緊囉~呵呵~)
一路上網.去左阿浩個 ftp.........呃....呵呵~幾時多左咁多野睇架?

天行~(靚女雯~!?)
多謝你呀~咁關心我~呵呵~
而家無乜人會好似你咁同我講野架喇~
呵呵~我以後都唔敢喇~
成日都話搵你結果都冇搵,係我o既錯~
不過........我下次都唔知自己幾時返香港.......

原來我都有令人擔心的本事...哈~
原來......仲有人會擔心我~

>>March 9, 2004 at 1:10:39 PM GMT+8

2004 年 3 月 7 日 星期日 【微冷】

又到星期一喇.........咁就過左一星期喇~~~
尋晚同房幫我o係香港拎左d野返黎~~~唔該晒呀~~~

今朝又要開始我o既八點生涯.........七點半醒,去到課室剛八點~
唔記得呢科要早d黎坐後排,結果被迫坐左第二排.........=_=
上堂只係訓左五分鐘........都算係咁喇掛~當代中國,我對得你住喇~

上完呢堂就過文學院上電視廣告~哈~冇訓,有興趣果然唔同~
但今日見到多左好多新聞班的人上堂啊~~~
上完miss話今日三八婦女節,下午唔駛上堂喎~呵呵~幾開心呀~
同sa 、南、姨媽、恆、祺、浩出左去食印尼炒飯,之後就返黎喇~

sa 上左我房改選科d野........最後搞到我都改埋~呵呵~星期四駛返喇~轉左一齊返星期三~
仲同佢傾左好耐偈........呵呵呵~~~期間佢去左體育館,返黎又上網~
我地仲發現 Juli 條毛巾有個位有好多蚊仔圍住...唔知點解,勁恐怖~
到六點九左右佢就去沖涼~約左七點食飯呢~~~

點知都係遲~呵~出去果陣見到祺同妹出去~買書啊~
今晚有我、sa、南、恆、姨媽,本來話想去食中森明菜,但sa要九點跳舞,冇去到~
改為聽日中午去食呢~~~呵呵呵~~~但聽日都有幾個返兩點半(我都係~)唔知夠唔夠時間呢~
食完南唔夠飽,我地又行左去麥記買野食........佢買左個餐,仲係加大~呵~
買完就行返黎喇~~~

返到黎,拿拿聲沖完涼就上網~
Beaker 個icq開唔到啊~~~中左毒???
病人而家有冇事呢???幫唔到你,sorry呀~

星期四約左港分羽毛球隊班fd食飯啊~12:30附小,老地方~期待中~

唔知做咩,而家勁眼訓........
不過....今日好開心,哈~
羽毛,露台,行車路...........

>>March 8, 2004 at 4:09:27 PM GMT+8

2004 年 3 月 6 日 星期六 【微冷】

好痴線呀我......呵呵呵~

尋晚一直都唔想訓.......同sa 傾完電話又去左上網玩game~
(原來我傾電話大聲到十樓都聽到囉~瘀爆呀~呵呵),仲一路keep住同佢send msg~
又同家姐傾啦~~~一路去到五點幾六點至訓~~~
今朝.........七點又要醒喇~因為今日有個香港校友會的參觀團上黎開座談會呢~~~

咁我最後七點半至醒到......一醒青就打黎話搵唔到宿舍俾人參觀~
哇嚇到我呀........即刻拿拿聲執房啦~驚佢地上我房啊~~~
八點三行過校友樓......得幾個人黎左~~~我就繼續不停咁打電話問人借房啦~~~
冇幾耐d校友們就到喇~~~上左三樓呢~~~我都係第一次上呢楝樓咋~~~

跟住我地開左個座談會,都係講返一d我地面對的問題~但我最關心的實習問題都係冇講到架~
期間我又要收發msg搵房,又要同坐隔離的校友傾~都真係幾搞笑~
一路傾到十點幾~我地就轉場去參觀宿舍喇~~~
搵左三間男仔房,但原來有老師一早安排左囉........=_=灰左~~~
睇完房就去左參觀飯堂.......仲有得入廚房啊~呵呵~~~

參觀完呢,十一點幾佢地就走喇~之後我地開左一陣會,十二點半就出左去食飯~
今日係m記啊~~~坐左三個幾鐘......吹水吹左好耐~
之後返左房~~~上左陣網,都係頂唔順,走左去訓~~~七點又去食飯~~~
哈~~~sa 居然早醒過我,仲沖埋涼........勁呀~~~
今日有暨南八傑加埋阿妹同阿浩呢~~~我地去左老地方食飯啊~~~
食完就返黎喇~~~大家都累了呢~呵呵呵~

星期四可以打波.......開心~呵呵~

細佬~
你果日個電話臨收線講果一句說話,我會記住架~
我返黎會搵你傾傾架喇~唉~都唔知自己咁緊你做咩.........
做你大佬真係麻煩......呵呵~
sa 都講得好o岩.........."駛唔駛咁擔心佢呀?" 我都唔知咁擔心你做咩~呵呵~唔想你媽擔心o者~哈~

冇晒作歌詞的心情~~~唉~~~

>>March 7, 2004 at 3:07:24 PM GMT+8

2004 年 3 月 5 日 星期五 【微冷】

哈~~~大汗~~~生日快樂~~~

今日終於都可以訓返夠本喇~~~
尋晚兩點左右訓~今朝十一點幾自然醒,幾爽呀~~~
但我都係訓o係度諗野,到十二點半左右姨媽 msg 黎至正式起身~~~
之後約左佢地一點出去食飯呢~~~牛丸啊~~~

食完兩點半~陪青去建陽樓下搵人,之後話打波,咪返黎換衫囉~
返到黎又要搵e-mail 俾bonbon~佢打黎我都俾唔到佢~sorry呀~~~
再出門口都差唔多四點喇~~~去排球場打呢~~~
打左一陣,褀都黎埋~青今日無狀態呢.........

今晚仲要出巴西燒烤同大汗慶祝生日呢~~~
恆他們約五點半,我地三個打到六點至走,當然係自己去喇~
我同褀先幫青出去拎卡,但原來仲未有囉........=_=
之後飛的過去.....但佢地已經食完第一輪喇~~~
食到中途.....間野播生日歌喎~仲有個超搞野的天使(??)頭飾.......哇哈哈~~~勁爆笑~~~
阿浩影左好多相啊~呵呵呵~~~

食完飯,吹完水,佢地仲想有下場喎~結果我地又去左打保齡球啊~呵呵呵~
用左超多錢呀今日.......過百呀.........但我都係有打喎~呵呵~
打左兩局.....哈~終於都俾我過百喇~~~110~~~但第二局簡直係垃圾........失敗呀~
條 link...........哈,又有問題喎~多左幾局打~yeah~~~
打完都十一點半喇~咁大家就返去喇~~~

返到黎......想打俾細佬,又係未返屋企囉......十一點半打到一點半,打左五次長途先搵到佢~
他媽的......未俾我鬧夠呀?打波都唔駛咁夜啦~~~
記住呀~我講過十一點後再有三次打俾你搵你唔到的,你以後都唔駛聽到我電話喇~
搞到我兩點幾~(即係而家~)都仲未沖到涼~
不過佢一聽就俾我係咁鬧,真係幾爽~呵呵呵~

搵人同時打過俾sa......佢今晚都出左去呢~呵~聽聲又飲左唔少喇~開始語無倫次喇~哇哈哈~
小心身體.......飲太多傷身呀~呵呵~同我玩仆街?你一定唔夠我講得多~

總之,大家自己保重啦~努力呀~~~

>>March 6, 2004 at 6:20:04 PM GMT+8