2004 年 11 月 27 日 星期六 【晴】

有兩個星期無活動過，今日終於下定決心，完左崇拜之後去打壁球。

今日係 David 最後一個主日在大埔堂，因為由 1/12 開始，佢就要過去廣福堂那邊侍奉。又因為咁，教會特地為他攪左個歡送會。那歡送會頗感人，分別搵左班少年人帶詩歌，佢地好利害架！組band 之餘，仲為左 David 走而創作了好幾首歌，仲自支出埋碟，送左隻佢 David 添！真係好感動呀~~ 之後，就分別搵左兩位姐妹分享，其中一位姐妹提到 David 是一個識補位的人，有乜唔掂佢都會幫人補位........諗番 David 做我地導師時的情景........他真是一個好有 heart 的人，人又 nice，個幾月前收到佢要走的消息，真係勁唔捨得......之後 David 都有 d 分享，跟住就到聚餐時間。

相信今次 d 野食都係鍚安團的團友預備的。食物十分豐富，因我不敢食得太飽，話晒之後要打球，食得太飽會好辛苦的。

Around 二點多，我就離開大埔堂，預備去打壁球。之前上網 check 過，知道大埔運動場有大把場任 book，而好耐好耐之前 (中學時代) 曾去過一次，我估應該都認得條路點行。我預計三點鐘開始打，打1/2 或一個鐘。經過左大埔運動場，游泳池......依~ 點解唔見既？我記得好似向 d 度附近架！繞左游泳池一個圈，行到大埔體育館。我諗：睇下體育館有無得打先。點知最快都要晚上七點！oh~~ 咁唯有問人知唔知大埔運動場的壁球館在那。d 服務員話沿著游泳池行就會見到架啦......真的嗎？那不就是我剛才行過的地方嗎？我沿著游泳池一直行一直行，行到大埔運動場，之後就問更亭內的工作人員......喔~~ 原來壁球場的位置正正是我無行過的一邊！

走到壁球場，check check 有無場先.........依~ 好似無喎~ 都係問問先......一問就知道原來我 check 的那張表是 for 網球的，壁球就幾點都有。yeah~~ 咁......打住半個鐘先啦！book 場之後仲要夠鐘，所以就呆等左一陣，跟住就開始單打。

原來一個人打波真係好悶架！再加上我球技麻麻地，一味開波 & 執波。我諗我都係買多個壁球先得。

打完波，慢慢行去大埔中心。打個電話比cl，相信他正與他的家人高高興興的拍畢業照，所以接唔到我電話吧！掛線不久，他來電，但我來不及接聽，已轉駁到傳呼台了。他留言中說若有需要就 call 佢......有需要？！言下次意是否無需要的話就以後不用找他！！想了好一陣子，send 了個短訊給他，道明我找他並無什麼特別事......

回到家裡，食火鍋！Yumme~

>>December 3, 2004 at 3:03:13 AM GMT+8

2004 年 11 月 27 日 星期六 【晴】

嗚~~~~~~~~~

憶蓮其中一只碟死左呀！嗚~~~~~~~~
唔制呀~~~~

本以為救得番，點知.................
嗚...都係救唔到呀！嗚~~~~

那張唱片好好聽架~~~

嗚....................

>>November 28, 2004 at 10:42:34 AM GMT+8

2004 年 11 月 24 日 星期三 【炎熱】

望穿秋水的出糧日，終於到了！

之前計過，份糧扣除 d 必要開支，所剩的，就只有一千多，即每星期可用不超過三百。

近日無乜 mood 番工，今日也不例外。幸好星期二晚番幕後製作時可以瘋狂地笑一下，輕鬆點。

今日，做什麼也好像提不起勁般，就連今晚食什麼，也沒勁去想。最怕是今晚沒精神上課，浪費了金錢之外，更浪費了時間。

到了尖沙咀，見尚有廿多分鐘才上課，故到學校附近的麥當奴食東西。今晚真係乜都唔想食，但係唔食又唔得。入到麥當奴，看著食牌很久，也想不到自己最想食是什麼。之後，點了一個烤雞包和一杯蜂蜜雪梨做今晚的晚餐。

之前有個朋友提到，電影 "不瘦降之迷"的內容實在太可怕了，嚇得他以後誓不再食快餐，特別是麥當奴這類的。看著了托盤上的餐紙，列出了她們的食物的熱量。原來我的烤雞包也有四百多卡路里！！就是她們的早晨全餐，也有足足六百多卡路里呢！我的天呀~ 難怪我的朋友會那麼怕了！看來，我也是少食麥當奴為妙。

番到課室，尚有少許時間，平伏一下心情，預備上課。Miss 教書的速度算是較快，但也趕得不太辛苦。也許是因為見到自己所食的烤雞包有四百多的卡路里，精神為之一震，就連睡魔也被嚇走了。

原來，我和他也可算是硬頸的人，誰也不讓誰，誰也不會先給誰電話。若要繼續走下去，必要有人先主動聯絡。掙扎了好一會，終於發了個短訊給他。不久，便收到他的來電。如果我不先動，他會動嗎？在整個傾談當中，大家若無其事的，甚至比之前談得更好......

一切，彷如從頭再學，一切也是未知數，
但願天父保守、帶領、看顧。誠心所願。

>>November 27, 2004 at 7:11:54 AM GMT+8

2004 年 11 月 23 日 星期二 【晴】

著名填詞人--黃霑，於今日零晨時份去世。

電台整朝在播放著他的作品。我聽歌有一個習慣，就是留心歌詞的內容。一邊聽著他的作品，一邊細味著歌中的歌詞，回看現今流行曲的歌詞，空空洞洞的，不禁驚嘆，他的詞真的寫得很好！

回想自己，若有一天離世，會否同樣也有著一些可讓你讚嘆的事呢？我的一生會否有些事情，可讓人專崇？可讓人感動呢？還是平凡得可憐，不堪一提？

>>November 24, 2004 at 4:37:29 PM GMT+8

2004 年 11 月 21 日 星期日 【颳風】

今晚難得媽媽不煮飯，又是可以找借口晚點回家的時候。但媽一早吩咐了今晚由爸代煮，那......

放工前，給了個電話風信子，原來他也跟我有相同的想法，但他總覺得掉下爸一人好像不太好，在猶疑之際，「就當我無打過黎啦」我說。

留過言給 CL，問他是否可以一齊食飯，或許是因為他工作太忙，或他不方便回覆，故直到大概六時多七時，他回覆。他問我是否不開心，其實，我只希望大家有多 D 相聚的時間，而且，我不太希望我倆建基「互相利用」的關係上。

晚飯後，咱們沿著河邊，向著海濱公園走去。說是走，不如說是各有各行。

面對著他，有時我真的不知怎應付。我深知天父安排他的出現，必有祂的目的/心意，但就現時情況來看，不熱也不冷，處於溫水的狀態，就如雞肋般，食之無味，棄之可惜，我該怎去應付？

溝通，是雙方面的。我道出了我的問題，他默不作聲，一粒「定心丸」也沒有。他究竟是在想些什麼，還是自己也不清楚呢？我也並非一個很善於表達的人，我也不太清楚如何去「攪關係」......

有時我真寧願他像WY般，反而我會懂得如何應付。不過，每個人也是不同的。

對於 CL，可算是「什麼都不知道」，雖然WY也是，但起碼WY有時也會向我訴苦......有次跟 SS 食飯，談到我與 CL的關係，他直說我並不是那麼喜歡CL，真的嗎？

或許正如 CL今晚所說的，我倆也是正在後退中......時間一天一天的過，誰也不願為誰踏前一步，試問又怎能一齊走下去呢？

是我走得太快，還是天父要我學懂什麼？

路，仍然要走，但願前面一片光明

>>November 24, 2004 at 4:34:45 PM GMT+8

2004 年 11 月 10 日 星期三 【晴】

好累！

今晚上完堂之後，勁累！不知是不是因為我坐在第一排，而且成晚好用神咁望住投射出來的 pps，上到一半時，我對眼已經唔係好得，到放學時都係......唔知係咪課室的冷氣大左，今晚上堂有 d 凍......

放學時，本想買 d 野食，諗下諗下，算啦~ 今晚咁「支力」，不如早 d 番屋企，食下有無蘋果食仲好啦~

上左巴士之後，send 左個 msm 比朋友，之後就聽住mp3......

online 時收到朋友send 來的畢業相短片，好感動，心諗：唔知我有無機會著袍呢？
眼見身邊的朋友大學畢業，不禁羡慕又妒忌
距離自己大學畢業的日子，尚有慢慢長路，不知我真的可以堅持到底，「夢想成真」

剛到過一位朋友的網上日子
哈！我先前的估計並沒有錯，他，戀愛了......

一切漸漸明朗化，或許，今次我做對了。

>>November 11, 2004 at 3:59:19 PM GMT+8

2004 年 11 月 6 日 星期六 【颳風】

心情，自昨晚團契之後，已經好好多。並非跟團契內的姐妹傾過，只係在導師屋企睇完「吾妻十六歲」時諗到，或許對方為自己做左好多野，而自己睇唔到而已...... send 了個 msg 給對方，一切回復正常。

今個月我要到副堂幫手，嘩！今日副堂咁多人既......係喎！今日係聖餐，唔怪得咁多人啦。完左崇拜，呆等左一陣，就開始成人部的午餐會議。長青團有位八十多歲的伯伯，佢由1949年開始便番大埔堂，直到依家......嘩！我真係好難想像，當我到了他這樣的年幾會係點？

完左之後，就去尖沙咀搵書。

本來諗住先去 page one，再去商務，點知，我搵左好搵都搵唔到 page one，唯有去商務行啦~ 去到商務，搵左好耐都搵唔到我想要的參考書，唯有問 d 店員啦~ 感謝天父！佢地有 miss recomment 的書！而且仲係 miss 話首選那本！！見佢有三個 copy 咁多，而且時間尚早，唔買住，行下書局先...... 因為約左朋友食飯，為左打發時間，我在商務總共睇左四本書，全部都係勁多圖畫，勁少文字那種，除了幾米那書有點失望外，另外三本實不錯！

天黑了，收到朋友的電話後，我取回那參考書，逛多一會書局，之後就付款。原定一百九十多，喜料有折，一百六十多就成交，實在太好了！！

我與朋友去到尖咀某餐廳食晚飯，再由尖咀走到旺角，途中我們經過廟街，聽人唱曲，很有趣。

久遺了的感覺，雖仍未能完全回來，但，透過每一次的傾談，讓我對他的的感覺一點一點的加增。兩個太似的人走在一起，是好？是壞？我自己又是否真的預備好？

但願神能教我「如何去愛」。

>>November 8, 2004 at 4:56:26 PM GMT+8

2004 年 11 月 4 日 星期四 【乍雨乍晴】

今日都算黑仔！

幾經辛苦，昨晚終於 dl 到 d 歌到 mp3機，點知，今日番工時想 play 黎聽..........下！formating..！！ oh no~~~~~~~~~~~~~~~，我只係按個 play 制，點解會變左 format 架！！！算啦~ 番工唔聽歌都得。

食飯前 call 個朋友，問下佢寫劇本寫成點，講講下，佢因為唔同意我的諗法就發我脾氣.......喂！洗唔洗咁先，你唔同意咪算囉！我都講左好多次，我睇左個劇本先再比意見架啦！有時真係想佢第一時間 "cup" 我線，咁我會好過 d。其實咁都唔算d乜。之後收到佢道歉 call 先慶，佢話出剛才只係發少少脾氣.......少少？咁你真係發脾氣咪不得了！！我睇完個 msg 之後，真係好想喊.......哈，邊問人意見，邊又唔俾人發表意見.........我的心情漸漸不好。

黑仔的事總是接踵而至，我去完茶房 "jump" 水 (我一般都只係 "jump 熱水，除非熱水爐煲緊水，我先會 "jump" 暖水)，茶房雖然離我個位不遠，但今日不知為何，勁多人阻左向條勁窄的通道.....我見有同事向我迎面而來，我就企埋轉角位，讓佢行先，之後，當我正想轉番出黎時，突然有另一位男事以高速咁行過黎，若我唔退後的話，我杯熱水一定會淋去佢度，所以，我退後了一步....因為事出突然，所以我杯熱水因為這一 "chot" 就倒左 d 出黎，d 水真係好熱，當時我諗，我唔可以因為 d 水熱就放手，否則連隻杯都無埋，所以，我兩隻手雖然被滾水淥到，但我仍要同自己講：唔好放手住，快 d 放隻杯向食飯桌上，之後就拭番地下 d 水，之後就是自來水沖手................

唏！你話係咪黑仔！！！

>>November 5, 2004 at 5:21:25 PM GMT+8

2004 年 10 月 14 日 星期四 【晴】

沒拍拖已有一段時間，久遺了的愛情，近日好像再一次在我的生命中出現......
我應「繼續等待」，還是「重新開始」？

我等待著的他，我仍然掂著，但他的樣貌己模糊不清
至於那新的，偶爾也會想起他，雖然稱不上掛念，但我不用太用力就能想起他的樣貌....

這究竟是什麼的一會事？

我等待著的他，比我年長一點點，但給我成熟的感覺。待在他在身邊，我可以很安心....
至於那新的，看到他就如看到過往的自己，更正確的時看到了我自己。很想得到情人的寵愛......若跟他一齊，我覺得我們交換性別可能會好一點......

這究竟是什麼一會事？

我想，新的他的出現，就如告訴我別再一等一個未必等到的人
我想，新的他的出現，是天父再一次跟我講要愛主多一點
我想，若要跟新的他走在一齊，我就必需把舊的事全忘掉，一切由零開始
......

這事最是煩人。

我想要的，是一個疼我的男生，思想比我成熟一點，但別太古板，年幾最好比我一大點，大家有共同的信仰，共同的興趣就最好.....

這事最是煩人。

我一直禱告，尋求天父的心意....

關於這事，我能跟誰說？與誰傾訴？可向誰咨詢意見呢？
今晚，我想起了我仍等待的人，同時，也想起了這歌......

*********************
多盼望你在這裡
如果離開你 是最恰當的結局
後來的日子 也沒有機會說明
走在人群裡 或一個人看電影
寂寞的心情 也都只是小事情

也許 再遇見你 是否能不露痕跡
微笑著走到你面前去
如果 你遇見我 你的手放口袋裡
還是會把我擁在懷裡

我還是忘不了你 多盼望你在這裡
當我忍不住又想起你 只能在原地靜靜閉上眼睛

那一個夜裡 看著你沈沈睡去
均勻的呼吸 貼著我心跳聲音
枕頭還記得 你睡過深深痕跡
我們的愛情 怎麼會只是漣漪

當我忍不住又想起你 只能在原地靜靜閉上眼睛

>>October 25, 2004 at 4:50:59 AM GMT+8

2004 年 10 月 8 日 星期五 【晴】

較早前在劇社的演出中，結識了一個新朋友。

他，雖然年幾比我少，但已擁有 Master Degree......
不知是不是每個讀過預科的人，對周遭事物都有一套的看法，跟我這個只有中學畢業的人，有著天淵之別......
在他的身上，找到不少自己過去的幼稚天真思想，同時也找到不少另一個他的影子......

正如「赤裸的秘密(劇場版)」，感情的事，我從來都唔知應該點樣去解釋.......向我再一次受傷之前......我只可以離開。感情的事，我真的有點怕，舊傷未癒，我怕我再一次觸錯用神，令傷勢加深......

以前可以談心的朋友，一個一個的消失了。儘管我主動的去聯絡，也不必可以得到我想要的......人生是不是就是這樣的呢？難得找到了一兩個可以談心的朋友，卻在這一兩年的間，慢慢的在我的生命中消失得無影無蹤，彷彿就好像要我在這段時間裡，學會自己照顧自己，學會自己靠自己一樣。正如另一個他較早前的留言提過，人生是孤獨的。真的嗎？畢竟我是一個女生，總希望有個人可以給我依靠。當我不開心總希望找個朋友陪陪我，吐吐苦水，又或是給我一點點他的想法......但這人，並不容易找的，你同意嗎？以為自己找到了，但總敵不過時間的考驗，多無奈！

>>October 9, 2004 at 5:05:24 PM GMT+8