2004 年 12 月 19 日 星期日 【晴】

今年最後一個上班日，哈！

今日，可算是我最耐以來，做野最多及最積極的一日，盡量清晒手頭的工作，記下有什麼需在放假後跟進。放工後就跟前度上司等，一行六人到尖咀食日式自助餐 ，慶祝聖誕。

原先以為是之前舅父帶我去食那間日本料理，原來完全不是！在尖東落巴士後，行了一段路，就行到去尖沙咀中心。入到商場入面，無乜生氣，上了兩層，就到達"松屋"。光看門口，都估佢 d 野一般，點知入到去，依~ 望到海景架！！二百幾蚊位，可以望到維港景色，實在不錯！d 野食都 ok 喎！唔差！sm 真係好介紹！！食到咁上下，又係時候交換禮物了。我們先用「畫鬼腳」的形式，之後再抽左三次名，d禮物先真係打均。Endup 我得到阿soo的靚靚月曆，而我果份就落在阿 may手。sy 算最有心機，因為佢親手織左條頸巾為禮物，而佢就得到阿may的叮噹磅，阿soo好幸運地抽到suki的頸巾，而安東尼同sm就交換禮物，安東尼的moment錢箱就落在sm手，sm的古古力就落在安東尼手。

本來諗住若早完的話，就去唱 k，點知一個二個都話唔去，最終取消了。算啦~ 我都唔係咁有米，唔去都好。橫豎若suki 唔放飛機的話，我明天又可以唱，hehe。點知番屋企時 call 佢，佢竟然話佢明天約左佢家姐！！唏~ 算啦~ 佢次次都係咁，再約囉~

>>January 8, 2005 at 6:04:34 AM GMT+8

2004 年 12 月 17 日 星期五 【晴】

星期六上班，是最無聊的。不是上網，便是做自己野。有幾多時間真係做公司野？哈！心照。

放工後，如常坐車入大埔。見麥記的開心樂園餐有可愛的白色狗仔送，我就買左個兒童餐食。唔知係咪太耐無飲過麥記的熱古力，覺得勁甜！

今晚周會由我負責--回顧及感恩。每到年終，有時回顧的時候，上周要求各位回想過去十一個月裡，搵一件感恩的事。其實我自己都唔係好記得，過去十一個月發生過乜事，翻看自己的網上日記，發覺多是唔開心的事。是的，寫日記是一個發洩的其中一個方法，開心的，通常因為太過高興，覺得遲先記低都無問題，不開心的，卻嚴不住要立時記下，好讓自己藉此減減壓。但又因為咁，日子一天一天的過，時間久了，回首時只發覺自己盡記下不快事，快樂的事件去了那裡呢？只怕攪盡腦汁也想不起。費盡心神，才每月找到一兩件感恩的事。

若不是這般回顧，也忘了原來在零四年裡，曾與團友們去過兩次旅行：年頭到中山及澳門玩，十一國慶到南Y島行山。雖然這兩次活動不是以團契名義出發，但有份參與的團友的關係，真的建立了不少。

團契開始，誠邀各人分享。想不到大家分享的事多是圍繞著"吃喝玩樂"。除了年頭去澳門玩外，還有暑假期間阿b & 阿樂去英德短宣等。當大家分享番英德前後的事，滿是笑聲。一向都知阿 b 唔捱得 & 愛食，當知到佢參加左去英德時，黃姑娘極其擔心，諗番都真係幾好笑。在過去一年，能一齊走，一齊經過，一齊經歷，實在是一件很美的事！

>>January 8, 2005 at 6:05:28 AM GMT+8

2004 年 12 月 16 日 星期四 【晴】

不知是因為昨晚與人傾訴過，還是靠著他們的代禱，今日，整個人輕散了不少。整個人就好像放下一切重担和憂慮，"鬆晒"一樣。如常地工作，一切順利。

>>January 8, 2005 at 6:06:02 AM GMT+8

2004 年 12 月 15 日 星期三 【乍雨乍晴】

好唔開心呀！！！

本來諗位訂書一事已告一段落，點知......

個麻煩學生今早打電話黎搵ac，佢過份到狂電話黎搵佢，仲叫我地 d 同事打佢手機搵佢！ac今日番下午，而我就係第二個負責人，counter 問我點，我就call ac，睇下佢點講先......我向 ac 講番個情況，ac 即刻話：唏~ 唔係呀化！佢做乜野呀~咪邯i左架囉！佢自己都話問同學借黎影印架！唏~ 你話搵唔到我啦~ 番黎先覆......

我都覺得自己有dd衰，明知同個學生傾，一定會扯火，但我都 call 個學生，話搵唔到 ac，ac 要下午先覆到佢。點知講下講下，個學生又開始無理取鬧，而我又一向底唔到頸，又開始同佢嘈......我隻手又開始震 (雖然無上次咁勁)，收線之後，我真係好激動，勁想喊！但我同我自己講，冷靜d，深呼吸......但，真係頂唔緊。邊做野邊諗起都想喊......本來我都忍得住，但點知 ww 入黎，又話果個麻煩友點點點的時候，佢睇我眼紅晒，拍一拍我膊頭....oh~~ 我d 眼淚真係忍唔住了.....但我仍然要叫自己忍住......同ww講，話我洗個臉就會無事之後，佢就行開了......

下午，ac 都比我學生煩左好耐，個學生又話ac幫住我......之後ac都攪佢唔掂，最終勞動都rc......我真係唔明點解個阿頭會咁是非不分！我覺得，rc覺得我地好麻煩，攪到件事咁大,仲話比番個差額(hk$40)學生......我的天呀！個hk$40邊個俾呀？d個唔係比唔比番四十蚊的問題，係規矩的問題！我地白紙黑字咁寫晒 d rules 出黎，唔係 d 學生靠惡就可以唔遵守！！一個係咁，兩個係咁，咁我日後點做野先！！好炆！！！！

因為 d 件事，攪到我今晚無心機番學！call cl，可惜係電話錄音。留了口訊，見放工都仲未覆，就照返學。

番學途中，cl 就 call 我。我問佢今晚得唔得閒，可惜佢要練敬拜隊，唔可以出黎......佢問我乜事，因為我唔想影響我番學的心情及唔想在街上喊，所以我話唔同佢講住，番完學先再講......

番學時，我盡量把專注力集中在課堂上。感謝神！課堂一切順利。放學後，因為心情勁差，故唔想咁快番屋企。

行緊 ocean center 時，收到黎老師電話，同佢分享番 d 件事，鬆左 d ，但仍未完全ok。天氣真係好凍，再加上病病地，故到PC買了杯熱咖啡，本諗住邊行邊飲，但實在太熱，故在pc出邊的坐位坐下，諗左好耐，endup 撥了個電話給 cl......

他耐心的聽我申訴，感覺上他也好像覺得，為了「釋事寧人」，也應同我阿頭的處理方法....講下講下，我終於忍唔住，流出眼淚來......跟他傾，慢慢釋懷。他提到，我持守公義......我從未想過的詞彙，公義。是嗎？但我想，要在這社會生存，有時是否要妥協呢？我覺得，若不妥協，就不能在這社會裡生存......

在271上，巧遇阿勤，因我仍跟 cl 傾緊電話，故他等左我一陣，之後我就比左我電話佢。

>>January 2, 2005 at 11:41:01 AM GMT+8

2004 年 12 月 13 日 星期一 【晴】

食早起身，好似仲有 d d 唔妥，都係睇醫生，羅一日假，比自己抖呀。

因為昨晚有發燒，所以睇醫生時再探熱......無燒喎！見到醫生時提到昨晚有燒，佢再幫我度多次。

睇完醫生，羅一日假。狂飲水......

>>January 2, 2005 at 11:37:09 AM GMT+8

2004 年 12 月 12 日 星期日 【晴】

死啦~ 好似病病地添~

今早都無乜野，lunch 同soo 去完yw食完野之後，就覺得成個人好唔妥。再加上下午無乜野做，我差 d 向公司閤著，好不容易先捱到放工。

食完飯，仲覺得成個人慶慶地，探熱先知自己燒到100oF！橫豎公司又無乜野做，不如明天睇醫生兼放病假......不過......我明晚要去西街派書喎......算啦~ 明天起身睇下點先啦~

>>January 2, 2005 at 11:40:08 AM GMT+8

2004 年 12 月 11 日 星期六 【晴】

今日可算是節目豐富！
完了崇拜，吃過午飯，跟哥哥打了一個小時的壁球。哈！阿哥也出奇的為何我可以打那麼久的壁球。
打壁球，不多不少，原為他。可是，現在呢？為自己？有時，為自己作事，是無何指責的，但，那算不算是一種自己安慰？能為別人付出，是一件開心的事，能為自己喜歡的人而付出，更是開心快樂。一個人生活久了，慢慢學習獨立，有什麼事也自己解決。但願我能快點調較到一個適當的頻道，可與他調較到同一頻道，一齊拼肩同步走.....

打完球，就番教會開職員會。原來，今年的主題也是為了團友的靈命及建立關係。oh~ 團友的關係是好了，但靈命方面...... 自問自己也不是好得到那裡，我該怎麼做呢？定好了明年一至四月的周會，之後就祈禱結束。預備出發到牛池灣文娛中心，睇 月月心水。

很久沒看過福音劇了，今次求祈劇社的 「searching 月月心水」真係好正！全套劇有三個短故事。第一個故事，很深，不太明，雖知道她按照聖經而出，但......真的 get 唔到。
第二個故事，勁攪笑！有頭笑到尾。那故事的 opening 的編排一流。之後，足球小將、黃金戰士，高達......一段段的集體回憶，睇得全場觀眾開心不已。劇中其中一段，以一個風趣幽默的手法，道出天父對其中一位男演員的愛......
第三個故事，善用影像，音效，帶出一個不錯的故事。
散場後，雅欣主動的希望我日後能繼續介紹該劇社的話劇給她。哈！真估不到呢~ 或許我一直努力的推介話劇，終於有成果了！

>>December 29, 2004 at 8:14:17 AM GMT+8

2004 年 12 月 10 日 星期五 【晴】

再一次到赤柱監獄事奉，再次見到他。

我始終不明，為何天父按排他在這段時間中出現。

為要專心的為主工作，唯有暫時把自己的感情事放到一旁。

入到赤柱，見到他，扮作什麼也沒發生就，包括咱們的愛情故事。

多奇怪，或許是我自己的錯覺，我發覺他因我的矩動，感到有點點失落......哈！希望不是我一相情願吧！

事奉過程順利。感謝天父。



完了赤柱的事奉，為番大埔參加團契。今晚是讀書分享會。氣氛一流！除了分享自己的書本外，還即席互相交換。讀書分享會終於發揮它的作用！

>>December 29, 2004 at 8:13:51 AM GMT+8

2004 年 12 月 6 日 星期一 【乍雨乍晴】

今晚無端的被學生屈及臭罵，他連環的舌劍，不讓我有任何解釋的機會。掛線後，我感到全身抽搐。我終於明白到「怒到震」是如何的感覺。

回家後，再想起了這事，突然間，想起了范曉萱的「消失」。我真的想把自己藏起來，痛哭一場！

>>December 7, 2004 at 4:42:03 PM GMT+8

2004 年 12 月 3 日 星期五 【颳風】

感情事，總是一塌糊塗。

眼見好姊妹將披嫁衣；舊情人已另結新歡，自己卻一敗塗地......

今日完左赤柱的事奉，就趕入大埔團契。
不幸的時，隧巴太多人，轉乘307卻要由銅鑼灣企到入大埔......

團契時候又唱到<<誰像耶穌>>，不禁的，眼睛濕了......
完了團契之後，想了很多，煩團契來年方向，煩自己的感情事。與一位姊妹分享後，並未收到什麼意見，但他肯為我代禱，也該感恩。

之後約了好姊妹出來談談心，我倆真的很久沒傾過計了！萬萬估不到她肯出來！在等他的過程中，我獨個兒走到「他」的巴士站，坐著，想著，眼眶也跟著濕了....帶著淚，作了個禱告。這可算是我第一次為「他」而哭。

與好姊妹由接近十一時傾至接近深夜二時，很久沒試過傾得咁暢快......

但願我真的學懂放手，撒手不管，可能會活得更輕鬆自在。

今晚，胃部有點痛。

>>December 4, 2004 at 6:41:28 PM GMT+8