2006 年 8 月 1 日 星期二 【晴】

今晚考試啦！！成朝都好緊張~
華哥一早打黎，一把勁無精神既聲音
原本緊張既心情，突然令成個人都更加DOWN，心入面諗，又想點呀？
成日都話我唔夠愛佢，要我表現下
自己感覺好難受，拍拖都好似俾人督促住，好似讀書考試咁
每一段時間都要做到某程度既表現，要交功課
期實心入面慢慢積聚左一D既壓力
點解拍拖唔可以輕鬆D
兩個人開開心心，簡簡單單唔係更好咩？

尋日同校長請左假，早左一個鐘收工返屯門同埋FIRST AID既同學一齊坐巴士出金鐘
準備食飯，考試既野，跟住就坐的士上去考試
點知去到試場門口竟然俾我見到一個熟人喎！！
果個人係邊個？咪係大家都好熟既 MANGO CHEUNG囉！
好開心呀！大家一齊考試，仲傾左一陣....

真係有點先擔心今次考試會唔合格.....
因為自己係CPR成日心肺復甦法到表現得好差

考完試同左MISS LO，善渝一班人坐叮叮過銅鑼灣食糖水
好耐都無一大班人坐叮叮啦！！中環一帶既夜景好靚呀！！

>>August 3, 2006 at 11:38:23 AM GMT+8

2006 年 7 月 31 日 星期一 【晴】

聽日就考試啦！除左溫書之外都無溫過包紮
係屋企一個掛著玩電腦，另一個出街.....都無得練

但點知返到學校做做下野，唐sir打黎(極唔想接呀！)
點知佢話有幾個學生會返黎學急救，叫埋我上去練
點知一去到課室，就發現陳慧琳係到，點解兩個我唔想係到既人都出現晒！！
算啦！話晒都有班學生係到，點知.....都係勁hi 油囉！！呀！！！！
好唔想對住佢呀！！！討厭！討厭！！！

下午出左去飲茶，haha成班TA，足足飲左兩個鐘！
但唔係食左好多野，依間酒樓太少點心啦~

>>August 3, 2006 at 11:18:25 AM GMT+8

2006 年 7 月 30 日 星期日 【晴】

又有成個禮拜無寫日記啦！！講番上個禮拜日，同左成班si si famiy聚舊，可惜 v v 出左團去台灣，所以唔係到。果日約左夜晚八點九係旺角mtr等，我都知佢地依班野一定遲，咪遲d出門口啦！點知我仍然係最早到達既一個，之後見到chester到左mtr，但我都唔知佢做咩，見唔到我，足足係mtr到好似條魚咁，係咁游，係咁游，跟著我就打俾eddie投訴，haha，eddie話佢可以想像到chester既情況！！

好開心，成班人一齊去左spaghettihouse食野，但係mandy就去左書展，仲話一個hall未行唔黎食，咁我地成班食完野之後，就去左搵cheese cake食，順便等埋mandy，點知去到果間cafe，一個惡號，一件cheese cake都無，搞到我地成班日落番地下，又最底個層續間問邊間有cake食，仲要環境ok先肯坐，最後搵左間有心太軟cake既地方，件cake好正，好好味，連番野飲都好正，見到mandy叫左個沙律都好新鮮，好得！！成晚係到傾偈，係到睇相，好耐都未試過嗱！希望下次 v v唔使出團，可以出席到 si si family既聚會，下次好次話會釣墨魚喎~唔知搞唔搞得成呢？？

星期三，難得華哥，同史提芬兩個人都收早，於時就約埋一齊食飯睇戲，仲可以一睹史提芬既新女友shirley，(唔知點解領隊搵對象都會向客人埋手咁既？？)果晚食飯時間真係好夜，好肚餓，未等shirley黎，我同華哥兩個人就叫左d前菜食住先。跟著就去左睇《反斗車王》，我覺得都幾好笑，幾好睇，不過估唔到套戲咁長，差唔多兩個鐘，而且仲有悶場，所以依排咁多套戲，我都係鐘意睇《冰河世紀2》多d！！

星期四，華哥出團執料，但係唔係佢自己執，所以收左工都係要等份料返分行，原本我約班書記一齊食日本野，但係又怕依個華哥自己一個人唔食野，所以甩底返左屯門同華哥食飯，順便陪佢等份料，食完飯返到屯門分行見到蘇經理，蘇生第一句就問我係咪想返黎做，我更係答係啦！但佢可以幫到我幾多吖...唉.....，同埋我越黎越對永安一種失望既感覺.....

>>July 30, 2006 at 2:35:23 PM GMT+8

2006 年 7 月 22 日 星期六 【晴】

今日出左尖沙咀美麗華見工，依間公司真係好細，連reception都可以無人係到，唔知去左邊。等左好耐先至有人返到黎，跟著就係等人事部，最後入房見左個女人，好nice，完全都好似傾下偈咁，跟著就講到正式返工既日期，同佢講左要九月份先至返到，但估唔到佢話無問題，咁我真係好開心囉！

今次見得成份工，我真係要好多謝moon哥哥，如果唔係佢幫我約人事，我諗都無機會見工，更加唔會話請我啦！真係好多謝佢呀！！係我出團既日子中，識到既人唔算好多，但係我生命中提點過我好多野既人，一個係美記既moon ，另一個就係 星晨既kelvin，不過都有成年無見過kelvin囉~

>>July 23, 2006 at 12:58:04 AM GMT+8

2006 年 7 月 20 日 星期四 【晴】

尋晚係molly依個壽星女既大日子，佢一班既中學同學仔真係為左佢，好早好早之前已經聯絡我，我相信有黎我依到睇日記既人都會見過佢地既message，要俾一個驚喜梁小姐！！

其實依幾日我真係好忙，好攰，返學，學急救，溫書考試， 又要陪男朋友，每一日都好忙忙，但忙裏總要搵禮物，約好meann同周生傾好20號既安排。自己就日抖返急救，之後趕出銅鑼灣hktt考試，考完試又趕返元朗join番meann佢地，又要聯絡番molly既朋友安排一切。個人就黎癲！

不過見到molly開心既樣，我同meann不其然都喊左出黎！女朋友生日快樂呀！！

成晚brian同大b秋都同我傾左陣，佢地都好細心咁同我分析番依家旅遊業既發展，令到我真係唔知點打算好！究竟做領隊，定係做機票好呢？但我可以好肯定咁講，學校份工，我一定會唔做，因為我一早已經對依個地方，果到既人都好失望。

>>July 21, 2006 at 11:01:29 PM GMT+8

2006 年 7 月 15 日 星期六 【晴】

今日係我係IVE時最愛既老師TERENCE WONG結婚擺酒既大日子，一早就約好左MALY係九龍塘地鐵站等，跟著就出發去TERENCE既新屋啦！去到閘口好搞笑，俾個看更點，問我地係咪C座三樓，結婚果度，咁我我更係話係啦！因為我地唔係好清楚幾多樓，點知去到三樓，MALY又話唔係好對喎！打個電話俾TERENCE，先知係六樓，笨左~

計番都有三個月無見過TERENCE，HAHA，不過放心，佢真係十年如一日，個樣都無乜點變，都係我最鐘意既老師。但佢老婆嘛...HAHA不願置評，見到佢地既恩愛情度，非常之高，高到無可能咁高，就連D攝影師都話佢地既恩愛情度係 -2 %。但我真係好鐘意TERENCE既屋企人，佢地個個俾人既感覺都覺得好NICE，好好人！

等TERENCE佢地一班人化好晒裝，我地就攞住兩部DV同腳架出發去半島，六千幾蚊既半島套房，比我既感覺OK喎！但就無話驚喜囉！總括今日都玩得好開心，雖然我地係工作人員，就食都係同d攝影師一齊食抄飯、抄麵，無翅食，但都覺得值得，而且果兩位攝影師真係好好人呀！！

>>July 16, 2006 at 3:24:22 PM GMT+8

2006 年 7 月 13 日 星期四 【晴】

十世無寫過日記，明明就比以前多左工餘時間，但反且寫少左，可能因為工作上日日都係一樣，所以無咩好寫。每日見既人都係一樣，有時都會覺得幾悶，岩傾就話隉A唔岩傾，日日見到，仲要一齊做野，haha真係幾難頂。以前份工，同同一個同事見到既機會可能好少，但大家見到面，一齊返工，又好似好朋友重聚，就算好耐無見，但都好似昨天才見過一樣咁親切。

好掛念住以前返 YL既日子，好可惜，一齊都人面全非，WYO, I11, KWU, C66, G56, Z43, G68都無再係元朗LU~時間一直咁走著。

依排有時候都會諗起幾個人，一個係初戀男友，有時都會諗，唔知佢返左新工未，返工返成點呢？跟住又會諗起馬來西亞既KYO，做野順唔順利呢？有無好好咁把握機會去進修自己？有無好好去為自己搵幸福？之後就係好姊妹MOLLY，究竟佢既鯨魚幾時出現呢？大家既將來，又會點發展？好多好多未知既答案。

依家既男朋友係係永安既舊同事，由我入去做第一月就認識，果時仲好憎佢，一個SENIOR既同事，對D新人既語氣真係好惡囉！我仲好記得佢同我講既第一句說話，果時我真係好唔開心，有機會見到佢都盡量避開佢，即至到我帶左幾團，個人既自信心大左，亦都開始同D同事熟絡D，好貪玩咁跟住CHRISTY咁叫佢『華哥早晨！』『華哥！....』『華哥！你話點就點啦！』『係既！華哥』咁....先至可以話同依個同事熟D咋....果時仲諗，多個朋友好過多個敵人，俾一個SENIOR討厭無著數(依D野佢知唔晒架！大家睇完就算)，估唔到依家佢會做左我男友，而且可話錫到我~I添..但依家我都好憎佢既一句說話『我咁講希望你唔好介意』當佢一講依句說話，就一定係同你講D你最唔想聽既話，就好似想當年佢同我講既第一句說話！我會記住你既！！

>>July 13, 2006 at 4:19:36 AM GMT+8

2006 年 7 月 8 日 星期六 【晴】

真係有d討厭起依份工，見到d唔想見到既人，做d唔喜歡做既野，究竟依個暑假幾時先至會完結呀！！痛苦！

>>July 8, 2006 at 3:52:04 PM GMT+8

2006 年 7 月 1 日 星期六 【晴】

阿華出左韓國，今日周生就打黎，『華哥出左團，我地又係事候偷情啦！』hahahaha我確實俾佢依句說話笑到肚痛！偷咩情吖，想搵機會見到梁小姐咋掛！！

今日約左芬芬去見師傳，問左關於工作上既野，都幾開心，唔知幾時應驗到呢？

>>July 1, 2006 at 11:47:30 PM GMT+8

2006 年 6 月 27 日 星期二 【晴】

send左resume去美麗華，唔知會唔會有回覆呢？我點兒期待....

好耐無寫日記，好多野想寫，但又唔知又邊到講起好！haha

剛剛去完台灣三天，雖然唔係樣樣都咁順利，但係我都覺得好開心，好多謝vivien今次陪我去旅行，好彩到最後都無鬧交，但我記住你抓左我一把！haha

>>June 27, 2006 at 6:40:18 PM GMT+8