2007 年 2 月 16 日 星期五 【晴】

連自己都唔明點解，依幾日自己都總係成日喊，或者咁講啦！每一次男友唔係香港，唔係我身邊既時候的我，係最任性，最容易喊，因為每當男友出團工作時，個注意力，總是放左係工作上，所以自己就不其然就會係咁，希望得到男朋友既關注，更加覺得佢係愛我既~

>>February 16, 2007 at 10:16:27 AM GMT+8

2007 年 2 月 16 日 星期五 【晴】

今日岩岩過左我既農曆生日，有時我都幾鐘意依個日子生日，因為意思好特別，因為我係年廿八出世架！！

今晚打左電話俾身在澳洲既男友，知道佢係廿三號又出多一團九天澳洲，感覺係有少少愕然，咁咪即係有一段好長既時間見唔到囉！！到左依家既我，已經唔似細個時咁，走去日曆前面數下足足有幾多日無得見，果時覺得咁既日子好難捱。今時今日，每一日我都只係諗著等佢返黎之後，我要同佢一齊做d咩好咁呢？！

>>February 16, 2007 at 12:48:08 AM GMT+8

2007 年 1 月 28 日 星期日 【晴】

唔知點解依幾日返工，入親黎舖頭既人都有d問題，一入黎就問農曆新年去吳哥，跟住就開始話貴，係到鬧，又話自己以前去過都唔使咁多錢！講真我細過时一串魚蛋都都係一蚊串，唔係五蚊咁貴啦！d人真係.....

依家返工真係好瘀呀！！因為每一次男友搵唔到我，佢就唔知會係邊到搵到我d同事既手提電話號碼，跟住就會打俾我d同事叫我聽。今日仲要係我主管面前發生d咁既事，d同事又講左一句『阿姐點解唔會打俾你既？』搞到阿姐差d俾d奶茶''續''親.....唉...........

>>January 28, 2007 at 3:25:44 AM GMT+8

2007 年 1 月 28 日 星期日 【晴】

不經不覺我既生日又渡過左，係依度多謝送俾我既祝福，謝謝大家。

計下計下，原來自己老左好多，由出世到依家已經過左二十五個生日。以前細過生日點樣過？真係唔記得，但only記得幼稚園時最想收到既生日禮物係一個番皂盒，用黎放手巾仔既。小學嘛.....一個生日都記唔到點過。中學嘛，收到同學送既winne the poon既餐具，依套禮物義意都幾大，因為包含左一段唔係咁開心既事情係到。跟住係讀foundation dip時既十九歲生日，收得最多生日禮物既一年，亦都聽到最難忘既生日歌。到high dip時，係同第一個男朋友過，印象中都記得下係點過既~

重點係今年既生日，第一個同我慶祝既人，就係同學兼好同事既vivien，原本諗著兩個人去泰菜，點知覺得兩個人叫唔到幾多野食，所以就叫係旺角收工既男朋友一齊食。個晚仲收到一個好大隻既跳跳虎添~

第二日好難得咁同我家姐、細妹一齊食自助餐，我諗真係咁多年黎既第一次，好開心~~可以同屋企人過生日。

今個生日男友都送左一個難忘既生日，第一次係返工時間收花，束花好靚好鍾意。但亦都係第一次生日既時候，唔開心到咸。係食晚飯既時候，男友係好唔適合既日子，問d好唔洽當既問題，一d令人唔開心既野。依樣野真係永遠係我廿五歲既生日上留下污點。

前兩日終於都俾我搵到失蹤左好耐既阿芬，知道佢依家工作上順利，都好替佢高興。

最後為我慶祝生日既人係molly，兩個人去和民食飯。跟住就坐左係葵芳新都會廣場既噴水池果邊，諗著吹蠟燭唱歌仔。點知我地兩個唔食煙既女仔，又點會有火機係身呢！一直坐左好耐，兩個人係到估邊個經過既人身上有火機。最後都俾我地搵到一個路人甲有火機，路人甲仲唱左首生日歌俾我聽，我同molly兩個人當時真係又恗然，又係到傻笑呢！！好耐都無遇過d咁傻既事。但確實令人難忘。多謝molly為我送上既生日之夜~

>>January 28, 2007 at 3:13:51 AM GMT+8

2007 年 1 月 6 日 星期六 【晴】

2007年，一個新既開始，要同2006 say good bye，但有一樣係，唔知點解無見到小白最後一面，係心入面，永遠都有種遺憾既感覺，連小白既頭七，我都無係屋企，只有細妹見到小白返黎。

有時都唔知係咁岩，定係公司有心，返左黎做三個月，每個月頭都總係去馬來西亞一轉，男友唔開心，唔通我又好開心咩？？但唯一個安慰係，公司都係錫我，先會派依個地方俾我，起碼都叫做有機會搵到錢，又唔辛苦，食得好，住得好既地方吖~最重要係唔使凍嘛~

仲有十七日~咁又一年啦！唔知今年會點渡過呢？

>>January 7, 2007 at 2:53:18 AM GMT+8

2006 年 12 月 19 日 星期二 【晴】

終於都係廈門返黎啦！！依四日真係過得好輕鬆，就係可惜無得去玩親親魚水療，不過唔緊，因為將來一定要華哥陪我去玩既！！

好耐都未試過可以咁早機，中午一點幾返到香港，不過呢！男友遲到，我出黎佢先到！！有少少失望咁啦！但唔緊要，去左意粉屋食左個好好味既聖誕節拼盆！！

今日係我老公，華哥既生日，係到講聲，『『 生 日 快 樂 』』
如果諗著兩個人係十二點鐘唱生日歌吹蠟燭，好可惜因為我醉左既關係......所以呢........
唔緊要啦！！補番就得啦！！HAHAHA

>>December 19, 2006 at 6:11:47 PM GMT+8

2006 年 12 月 7 日 星期四 【晴】

五日啦！又一個五日，今次既時間，過得好慢長咁，可能因為今次個行程有一半都係我未去過。金馬倫高原、怡保兩個地方，好特別，但車程真係好多，坐到pat pat痛....又唔敢飲咁多水喎！不過今次又可以見識多一個未去過既地方。

>>December 7, 2006 at 11:44:05 AM GMT+8

2006 年 11 月 29 日 星期三 【晴】

今日係我第一次煮飯，仲要係煮俾我最鐘意既人食，真真正正既一餐飯，講真，咁大個女，都未試一次過煮三個R出黎，梅菜蒸豬肉、蕃茄炒蛋、清炒菜心。平時係屋企，唔係爸爸、就係媽咪煮，點解唔使我煮？因為佢地嚴我手腳慢，阻住個地球轉，所以我從來都係遠離廚房，係間唔中煮個早餐or炒鳥冬or意粉。好彩今次煮得ok啦！男友仲食晒d菜添~haha~依家又開始諗定下次煮咩先....唔......

>>November 30, 2006 at 1:43:07 AM GMT+8

2006 年 11 月 29 日 星期三 【晴】

岩岩出完上海四天返黎，依家既上海好凍呀！又有毛毛雨，又有風，吹埋黎真係好辛苦。每一日都only 8-15 C。企係黃浦江外灘幫D客影相，手都震埋添。

今次係上海遇到兩個熟人，第一個係Carman Leung，第二個係daddy mattherw。依兩個人都好耐無見過，今次真係好巧呀！亦都好開心可以見到以前一齊返YL既同事。

尋晚返黎，男朋友係機場接機，好開心，因為一行出黎，就見到佢啦！而且仲有禮物收。多謝您呀！！而且由我落機到我出去接機大堂，佢都無打電話黎催趕，等我可以專心咁做好工作先，感覺好舒服，錫晒您呀！！

今次仲諗，點解落機無收到molly send俾我既短訊？有少少失望，但原來佢搞錯左，以為我29號先返黎，真係> . <

唔知meann今次日本之行係點既呢！用左成萬蚊，帶d咩返黎？？好期待！返到黎會唔會係非一般既meann呢？

今日收到消息，2號將會落馬來西亞，一個從來都無去過既地方，金馬倫高原。

>>November 29, 2006 at 8:03:06 PM GMT+8

2006 年 11 月 22 日 星期三 【晴】

我男友係一個好論盡既人，唔知點解坐係床到著鞋，咁就整親條腰，但佢初初死都唔肯講，話怕我擔心。但佢唔開心，係電話到，由佢既語氣、說話、感情，就已經feel到佢一定係有事，但我問左佢足足成日都唔肯講。搞到我要打俾steven，叫steven打俾佢，睇下佢咩事。但都係無功而回。我既傻豬老公....無論發生咩事都好，我都會留係你身邊照顧你架！但依家知道你整親，我真係好擔心，希望你快d好番啦！

今日終於都放假，但都仲要一早出觀塘打流感針，約左分行既nickcle一齊食早餐，食完諗著返公司時，係m記見到麗華，麗華個樣好病，咁既天氣真係好易乃野...

打完針隻手好痹呀！仲有少少痛添~唔知打完針會唔會發燒既呢？？

>>November 22, 2006 at 4:41:04 PM GMT+8