2003 年 6 月 20 日 星期五 【陰】

今日又做左大懶豬喇! 尋晚打埋日記又唔開心所以訓唔著呀,
今朝一訓訓到十二點幾食完飯再訓就訓到五點鐘喇, 之後再返P記。


本來十三話今晚去食D特式架咋, 但後尾講講下就變左去唱K,
仲叫埋呀彬同Johnny添, 都玩得幾開心呀! 事關呀彬另外間房又有一班friends,
雖然唔識佢地但見呀彬就好忙咁同Johnny兩面走, 猛隊酒最後飲到貓貓地喇。
之後咪好好笑囉, 人地一唱歌呀彬就好似指揮家咁喎又打晒拍子,
猛同我講呀欣個Key就o岩喇, 不過要高音D, 跟住就我一路唱呀彬就一路嗌高D高D...
跟住見到佢我都笑到唔使唱喇, 十三都見怪不怪喇, HA!


但Johnny就慘D喇, 一醉左就思念成災, 灘左o係張sofa度死狗咁,
連歌都唔唱喇, 猛同我地講點解呀花要咁對佢、點解佢要咁絕,
之後就猛叫十三唱佢想唱果D失戀歌比佢聽, 又話一陣要烈火戰車返屋企,
佢又貓喎又要飛車喎, 真係幾驚佢呀!


之後十三成晚串下呀彬、Johnny呀, 咁就嘻嘻哈哈左成晚喇,
我地三點幾先走, 十三就送我返屋企喇。
聽日我同Johnny、呀彬都返早呀, 十三就返遲我地少少啦,
但今晚又顧住玩, 聽日返全日都唔知點頂喇!

今日又同呀Chim傾左陣電話, 我地好耐無見喇, 好多野都未話比佢知呀,
所以本來都好多野想講架, 可惜我又同佢地一齊都唔係咁方便傾,
唯有遲D先搵返呀Chim啦, 不過呢個衰妹好多人追呀下,
但佢又唔想拍拖喎, 真係好想知佢點諗呀!


>>June 28, 2003 at 4:44:59 AM GMT+8

2003 年 6 月 19 日 星期四 【雨】

今日下晝放工返左屋企恰左一陣間啦就又出左去返工喇,
本來下晝仲好地地, 仲計劃好夜晚同十三收工去睇《變型俠醫》添,
點知後尾搞到超級無敵勁唔開心...


我真係好想死左佢咩都唔理呀, 點解佢要我咩都聽佢講,
但佢自己就咩都唔聽人講架? 我對佢無信心佢淨係識話我點點點...
咁佢呢?佢咪又係一樣。我淨係想佢好, 佢永遠都會覺得我過份,
佢永遠都淨係識得話佢有分數, 叫我唔使理佢, 係咪我咩都唔理就咩事都無丫?
我話點解永遠都要我聽佢話, 而佢就唔會聽我講咩, 佢話佢自己大男人,
淨係想我o係佢身邊做受保護果一個, 其他我咩都唔好理佢,
仲話如果要佢聽晒我話咁咪即係好似我狗咁喎, 成日講埋都唔知咩道理的道理,
我都唔知點喇, 我都唔知我地點去解決我地之間的問題,
我又忍唔住、佢又唔會就我o既, 到最後結果會係點呢??


十三一直都有話我好地地做咩要搞到咁唔開心, 之後佢送到我返屋企,
我臨走就話你成日叫我諗清楚係唔係想同你一齊,
咁不如你諗清楚你自己想點仲好啦, 點知十三就嬲到走左去喇,
真係好辛苦, 我好驚呀! 唔知點算喇。

>>June 20, 2003 at 8:09:50 PM GMT+8

2003 年 6 月 18 日 星期三 【晴】

今日真係唔好意思呀! 返到公司唔記得"nick"返個電話出o黎喎,
搞到D朋友仔搵我我都唔知添, 之後見到miss call咪打返比Johnny囉,
點知佢就鬧人地喇, 佢話佢今朝九點搵過我, 但我到下晝六點先覆佢,
咁我都唔想架, 咁都要話人地, 仲叫我出返個call機把啦咁喎! ha~ ^^
原來Peggy 6月16號生日架, Johnny又唔知喎, Peggy 生日都過左喇Johnny先知,
但Johnny都有買野比佢, 仲心大心細所以先搵我幫佢手之嘛!
點知我又無覆佢, 我又真係抵比佢話o既, 我都好戥佢緊張呀,
可惜Peggy今日放假假, 唔可以親手交比佢、又見唔到面, 真可惜!
我覺得今次Johnny好激呀, 可能我都係第一次『參與』啦, haha...
唔知Peggy今日收到份咁貼心o地禮物會點呢??


之後今晚返工工, 狐狸見到十三成日『糟則』我喎,
又搣人、又猛"初"人地塊面, 狐狸都戥我可憐呀~
仲忍唔住話呀欣你真係慘呀! 比著我咁對西西佢已經兜巴扯埋o黎喇,
ha~ 十三你睇你幾幸福! 我唔打返你果時 ^^


>>June 20, 2003 at 7:54:13 PM GMT+8

2003 年 6 月 18 日 星期三 【晴】

收工同十三去左食飯飯, 講到工作上的問題, 真係幾麻煩呀!
我唔想續份contact但又驚搵唔到工, 十三問我想唔想讀返書, 我唔係唔想,
但我怕我唔夠恆心又成日走堂, 如果讀又要考慮到我o既經濟問題。


P記遲D又無得做喇, 如果話仲有P記的我都可以有D使用丫,
大不了咪好似以前咁淨係使P記果份糧囉。
但而家唔係喎, 到九月P記都無喇, 食屎麼, 就算我唔使理屋企呀,
我自己使用都無呀, 我唔想幫唔到屋企手不特止, 仲要問佢地"nick"呀!
十三叫我自己想點就點啦, 唔可以靠人幫我揀架喎,
但我自己梗係唔想繼續"shine"時間o係呢度啦, 日日咁坐真係浪費青春呀,
我知可能再搵唔返咁少野做o既工, 但我都唔想日日o係度無聊呀!


加上我都再頂唔順個老細喇, 呢排個衰人興叫我幫佢將D Quotation 格價,
"nick"晒之前供應商D Quotation 出o黎格, 格完佢又唔係用喎, 淨係叫你格價,
無野比野你做! 你做完喇佢就話filing左佢先啦有用先再用,
你份Quotation做到再好, 結果最後都係一樣, 明知佢玩緊你, 你又唔可以唔做喎。
真係好Q憎佢架! 我都唔知點再對住佢喇...人工又奀車錢都唔夠啦,
我都知我都有問題, 成日打的返工, 但我返兩份工架, 訓教時間都唔夠呀,
我都唔知朝點準時八點半返到公司, 我唔打的雖然唔係遠,
但都要轉車再轉車成粒鐘先返到公司呀, 我都唔知點頂,
我唔返P記咩, 我邊有錢使呀?? 有時我都唔知係唔係想迫死我呀!
人越大就越辛苦, 我真係覺得好慘呀! br>

成日見住我老細玩野, 我真係覺得D人好無辜, 成日都話做Proposal,
成班人上o黎公司幫佢搞、幫佢趕、幫佢做, 裝修、設計、晝績、報價... 做到最後喇,
佢總有佢o既理由停晒所有野, "shine"晒果班人o既時間去服侍佢,
佢有時間o者都唔好玩人丫嘛! 之前又玩D地產sale帶佢四圍去睇工場、樓盤,
睇完又講到好有意思喎, 叫人地fax個地政處o既圖比佢,
搞完一大輪又話唔o岩, 叫人地搵過個盤比佢, 都唔知咩人得佢咁無聊呀!
真係越睇越覺得佢可惡、乞人憎、討厭呀!


所以真係好唔想唔想唔想再對住佢呀, 仲有一個禮拜就完左份contact,
補多11日假比佢我就自由喇, 希望呢日即七月廿四日快D快D快D到啦。

>>June 20, 2003 at 7:53:16 PM GMT+8

2003 年 6 月 17 日 星期二 【晴】

今日我都唔使返P記, 十三仍然係返夜, 所以本應都見佢唔到架喇,
但尋日又應承左十三等佢放工之後去食糖水。
所以今日一放工咪返屋企訓陣先囉, 到十點半就返左公司搵十三,
一返到公司狐狸就話我喇, 狐狸話都無叫我o黎等佢(狐狸),
仲叫人地唔好咁痴纏添, 之後臨走佢仲同我講話我無叫你o黎接我架,
我走先唔理你喇咁喎, Ha~ 狐狸都係玩下o者, 比著佢平時又點會咁對西西丫。


之後就同左十三去食糖水喇, 食完就返屋企喇, 雖然好似好無謂咁,
但又唔會話覺得無聊喎, he~ 見到都好過無得見丫嘛,
雖然我地又真係見得超多, ha! 但見極都未厭喎!
之後返到屋企又睇左少少《我老婆唔夠秤》, 雖然之前都睇過,
但再睇都係覺得好好笑呀, 可能係我傻啦, haha......

>>June 20, 2003 at 7:52:32 PM GMT+8

2003 年 6 月 16 日 星期一 【雨】

今日學校開始考試喇, 成間學校又成個死城咁喇, 好鬼悶~
今晚收工又唔係返P記, 十三又返夜喎, 我又唔想返屋企住,
放左工就算幾"支力"都好想去行一陣先返屋企呀。
返到屋企食完飯就睇左隻《一見鍾情》喇, 雖然本身對黎明無咩好惑,
但都幾好睇架, 幾touching!


隻VCD係十三借比我睇架, 睇完佢就問返我點解黎明成日煎"火農"蛋??
咁我咪答佢因為黎明做緊一樣野同時又去做另一樣野的話,
就會唔記得之前做緊果樣野囉。點知原來佢兜咁大個圈都係想話我,
如果佢顧住做野而唔記得左打比我呀、無理到我呀,
我都要好似張曼玉咁體諒佢、唔應該自己亂諗野仲要信佢喎。
但有時都唔係我想去亂諗架嘛, 我控制唔到嘛!


>>June 20, 2003 at 7:51:17 PM GMT+8

2003 年 6 月 15 日 星期日 【晴】

尋日同十三傾電話傾到三點, 我都驚佢今日唔知醒返工架喇,
所以晏晝點零鐘咪打比佢囉, 點知佢真係唔知醒!
打比佢叫佢起身佢都仲唔願起, 佢話佢尋晚訓唔著, 成五點先訓呀, 衰人!


今日十三終於放完大假要返工喇, 不過唔知係唔係無返幾日工啦,
今晚收左工之後我都要返工工呀, 所以又見到十三,
但唔知點解今日十三超級緊張喎, 個電話響多兩下又話要即刻call人返工、
廚房忙少少又鬼晒咁嘈, 但又唔係發脾四果隻喎, 我問佢做咩啦,
佢淨係話今日好多o野做咋, 見到佢無時停又覺得好好笑喎。


今日狐狸又好搞笑喎, 有個新車手叫Fung今日返工丫嘛,
咁十三咪叫狐狸帶佢囉, 狐狸平時玩玩下架嘛, 但今次教佢教得勁仔細喎,
我同Annie見到狐狸又忍唔話下佢教得好呀、撩下狐狸啦,
點知狐狸串返我地喎, 但個新車手唔識笑架, 超級木獨!
而Annie就覺得呀Fung D 眼神好惡喎, ha~都唔知佢份人係點o既呢。


之後同十三拍拖拖去食糖水, 一路行到去到糖水舖十三一路發傻、又畏食喎,
haha...比佢呢個傻佬笑死我喇! ^^

>>June 20, 2003 at 8:19:33 PM GMT+8

2003 年 6 月 14 日 星期六 【晴】

今日係父親節呀, 不過無買野比老豆, 淨係今朝同呀爸、呀媽、
細佬妹仲有大、細姑姐仲有呀麻飲左餐茶咋, 之後仲趕頭趕命返工添。


今日都好忙呀, 公司個sale拍得住Mother's Day果日呀, 都over五萬五架,
不枉我地咁辛苦由朝踩到晚捱到收舖呀。之後十三落左o黎接我,
佢又約左Johnny落尖咀買野, 咁仲叫埋家雄去添, 我就坐Johnny車尾,
十三就坐家雄車尾, 今次都算坐電單車坐得幾長途&幾耐下呀,
不過好好玩呀今次, 兩部車停埋一齊四個人可以傾下計、又可以鬥下快呀、
又可以趁停車果陣打下十三喎, ha~所以好好玩呀!


之後落到尖咀Johnny都有帶我地去Bossini搵Peggy架, 仲諗住可以大開眼界添,
點知Peggy又收左工, Johnny勁灰呀, 話同佢真係無緣喎,
咁我咪唯有話其實係我地同佢無緣見下面o者咁安慰Johnny囉,
如果唔係都唔知點安慰佢好。之後去左食飯, 食完飯又麻煩Johnny送我返屋企喇,
之後沖完涼又同十三傾左陣電話就想去訓啦, 點知又訓唔著喎,
點知十三又訓唔著又打比我睇下我訓左未啦, 我又未訓喎,
之後又傾電話傾到成三點先訓咋。^^

>>June 20, 2003 at 8:15:25 PM GMT+8

2003 年 6 月 13 日 星期五 【雨】

尋日又同十三有少少不歡而散呀, 之後佢send左個message話我,
我沖完涼睇到個message之後再打比佢, 佢已經熄左電話lu,
仲以為佢唔想聽我電話添, 但佢就話電話無電。


今日晏晝訓醒再打比佢啦, 佢又好似無咩野喇喎, 仲話過o黎搵我去街街添,
但又落雨喎我又邊度都唔想去, 之後佢就叫我去佢度啦, 咁都唔係唔好的,
橫掂都無地方去。之後佢話打的過o黎接我再打的返過去架,
但與其係咁不同我自己過去搵佢, 佢落樓下接我仲好啦,
咁同佢講完之後佢都同意, 咁我咪自己打的去搵佢囉,
佢就去買定"食送"之後就企定定o係樓下等我喇。


十三好西利架, 一個人整左四個"食送"比我食呀,
有西檸雞啦、蒜茸雞翼啦、鮮魷肉餅啦仲有蒜茸炒白菜添呀,
事關之前十三應承過會煮餐飯比我食架嘛, 佢今日走唔甩喇, hehe...
佢今日煮D野佢自己就唔係咁滿意囉, 但我又覺得OK喎,
第一次有男朋友仔煮野比我食咋, 感覺都幾得意&都幾warm丫! haha ^^


不過食完飯飯坐左陣又要出門喇, 事關今晚要返P記,
十三送我返工之餘佢今日都要返公司編更表呀,
雖然佢放緊大假, 但都要返去跟埋D手尾架嘛, 佢編完更表又等埋我收工,
之後去左食飯飯, haha...我地就o黎變連體嬰架喇! ^^


食完飯Johnny就去左我屋企整電腦, 所以十三就無送我返屋企喇,
Johnny又肯左部車比十三用, 等佢唔使搭咁耐車返屋企, 真係唔該晒佢呀!
而Johnny就玩到成點先走。


聽日係父親節呀, 唔知聽日會唔會同老豆飲茶呢??
不過係唔係早起身我都要早D訓喇, 聽日返早呀!

>>June 14, 2003 at 5:50:50 PM GMT+8

2003 年 6 月 12 日 星期四 【雨】

今日收四點, 之後約左呀珊去行街街shopping, 買左一對鞋、
一條褲同一件外套又使左成千蚊lu, 玩埋今日又要做慳妹喇,
下個月十三生日喇, 都唔知買咩禮物比佢好, 又唔知可以點同佢慶祝喎,
話晒都係我第一次陪佢過生日, 都想佢開開心心架嘛!


今日係我同十三好少有的分道揚鑣呀下, 我同呀珊行到七點到啦,
就join埋呀珊個朋友仔呀多、家雄仲有Johnny一齊去左唱K,
而十三今日就同佢D朋友仔遊船河, 所以無o黎到唱K呀。
之後唱完K就同呀珊、呀多、Johnny仲約埋呀航o係西灣河飯,
之後十三一落船就由西貢搭車返o黎接我喇, haha...十三有時都幾抵鍚架!


不過今日真係唔知咩日子呀, 又比我撞到細Joe, 仲要o係埋同一間餐廳食o野喎,
我地成班就"nick"佢o黎開玩笑, 雖然唔係幾好, 但佢地又講得好好笑喎,
笑到我鬼咁肚痛呀, 唔知佢聽唔聽到呢, 希望佢真係唔好介意啦,
不過我同佢都好耐無聯絡喇, 佢點諗都唔緊要喇。


今日識左呀多, 印象中佢應該係幾煩的人o黎o既, 不過今日相處落都OK丫,
佢都幾主動呀, 仲一齊傾得好開心添, 下次有機會再一齊玩啦。^^

>>June 14, 2003 at 5:28:36 PM GMT+8