2003 年 5 月 9 日 星期五 【晴】

今日返早呀...但十三又放假喎, 次次都係咁...><


不過今日十三都唔得閒, 佢搵左人返去幫佢屋企裝修,
所以佢都唔得閒今日都見唔到佢。


好彩十三尋日搵左Annie陪我返早, 唔使我一個人悶。
之後到左夜晚收工就同左狐狸&呀Shan去食飯飯, 食完飯飯就返屋企喇。
等得十三搞掂屋企Do野都成點幾兩點先打比我, 傾左陣就訓教教喇。


好"支力"呀!!!聽日係Mother's Day, 一朝早就要同婆婆去飲茶,
之後Annie話好耐無去鋸扒想去喎, 所以又約左Annie去鋸扒,
去完就要一齊返工工喇, 聽日實忙死人喇!

>>May 17, 2003 at 5:48:01 AM GMT+8

2003 年 5 月 8 日 星期四 【陰】

今日我四點就放工喇, 而十三就收五點,
所以今次輪都輪到我返P記接十三喇~


仲諗住有排等佢啦, 事關呢排做緊OPR, 佢都無得早走啦,
點知佢都唔理喎, 一陣果個Packy殺左落o黎都唔知佢點算呀,
我返到去咁o岩標標、Sammi同呀嬋都收工喎,
Sammi已經用手語笑人o地返o黎接十三去拍拖拖o架喇,
點知標標仲衰, 問我返o黎等邊個喎, 我梗係話等標標o架啦,
之後標標唔領情喎, 仲話人地等十三就真, 之後話自己同呀嬋都無人約,
咁就唯有等埋呀嬋陪自己...講到懶慘咁喎! 都係笑人地之嘛!


之後十三換好衫咪同埋標標一齊行囉, 行行下十三想搭住我喎,
標標見到又學佢喎, 走o黎搭住十三, 十三就一路"叔"一路避佢就行近我果面,
標標見佢"叔"自己又特登要搭到十三為止, 搭到喇又唔放喎,
搞到我地三個搭埋一齊行呀, 勁搞笑! 之後十三話想點呀你,
標標話同你去拍拖囉, 十三即刻啤左一聲無佢符, haha....
之後行行下又見到華叔, 行行下又見到呀青, 都唔知想點呀。


之後去左吉之島, 事關我之前買左件Chevignon衫衫比十三,
點知上次同十三行街果陣比十三發現有女裝喎, 但我死都話唔買,
咁果次就無買到喇。點知之後佢有次行開街就去左Chevignon買,
之後"nick"比我就發覺買細左咁今日咪順便"nick"去換囉,
點知又換唔到喎, 咁咪去左行街街囉, 佢話過左旺角咁咪搭車去啦,
到左喇落左車佢先話記得有個地方喎, 但就唔係旺角, 激死!
諗諗下先記得係想去德福, 之後又打的去最終目的地德福喇,
同埋就o係德福換到件衫衫喇, 但我都唔知夠唔夠膽著呀, 實笑死佢地呀!


>>May 17, 2003 at 5:46:50 AM GMT+8

2003 年 5 月 7 日 星期三 【晴】

今日佛誕放假假lor!


今日除左係佛誕仲係譚公誕呀, 咁我住果度附近又有間譚公廟架嘛,
每年譚公誕我屋企附近果條大街就好熱鬧架喇~
當然今年都唔會例外啦, 理鬼得佢非唔非典型丫條街真係迫到死呀。
今日同左Annie、Annie 老公、琪琪、雯雯仲有呀Shan去趁熱鬧喎,
呀Shan係大細路就人人都知架啦, 不過原來Annie都係喎,
賀誕就會有好多舞龍、舞獅啦, Annie一見到已經好興奮喇,
仲成日走埋去摸條龍, 摸完仲好似抽晒佢水好滿足咁喎, 勁搞笑!
琪琪同雯雯又o係度教我同呀Shan講英文喎, 古靈精怪~ haha...^^
之後睇完呀Shan走先, 因為佢今日要去Charles間舖(即鴨利洲)做Helper,
搭車去都要成粒鐘呀, 所以之後得返我同Annie去左shopping,
今日有好多收鑊呀, 不過戶口又少左千幾蚊喇...><
要慳D先得喇!!! 之後就齊齊返工。


晏晝本來想帶埋十三去玩架, 唔係度度都有譚公廟,
更加唔係度度都有人賀誕架嘛, 尋日佢送我返屋企果陣行過都覺得好新奇喇,
可惜佢返早, 所以今日無佢份啦, 真係可惜可惜呀!

>>May 17, 2003 at 5:45:51 AM GMT+8

2003 年 5 月 6 日 星期二 【晴】

今日又要返兩邊呀, 不過諗起聽日放假就開心啦,
同埋捱過左又覺得唔係好辛苦咋喎。聽日又放假喇, yeah~


今日返完P記, 十三又過左o黎接我, 其實我又唔想佢咁辛苦,
所以都叫佢唔好過o黎佢又唔聽, 自己又返早喎, 辛苦死呀!
次次都要人聽佢講, 但次次佢都唔聽人講, 真係唔公平呀!


之後同左Johnny、狐狸一齊去食飯飯, 聽左Johnny講左好多傑仔o既o野,
雖然係一 面之詞, 但傑仔平時份人係點大家都有目共睹,
加埋呀棠就真係超級「麻籃煩」呀! 都唔知點算好, 得個煩字。
不過今日呀棠超搞笑呀, 平時野蠻又粗魯, 但今日態度一百八十度變,
我今晚拍Annie, 見到佢無啦啦咁有禮貌都真係有D驚呀, 轉死性呀?
之後講返, 原來公司請人, 麻煩友自己知自己事驚比人炒,
唔怪得今日咁有禮貌啦~haha... 快D請到個真係做得o野o既人就好喇,
公司又可以天下太平、開開心心喇。


>>May 17, 2003 at 5:44:57 AM GMT+8

2003 年 5 月 5 日 星期一 【晴】

今晚十三要去飲又無得早訓, 而音音就繼續努力返工, 仲連踩兩場。
放左工仲要返P記, 真係勤力力呀! hehe...^^


到左收工打比十三, 十三又o係度猛咁話人喎, 搞到音音又發佢脾四添,
都唔知話佢"螺"o黎衰定係話自己小氣好...><
之後佢send message比我話佢同我講笑喎, 但我覺得一D都唔好笑喎!
佢打緊message比我果陣咁o岩我又send左個message比佢,
不過佢都話我嬲左佢搞到佢又無教好訓!!! 好似又係我衰咁!

>>May 17, 2003 at 5:43:47 AM GMT+8

2003 年 5 月 4 日 星期日 【晴】

今日好『他條』喎~


今日學校停課呀, 我返到學校先知原來紅色暴雨係要停課架喎,
而且我老細返左公司半日咋, 下晝坐o係office勁得閒, 可以吞下pop! yeah~
雲姐又可以休息下唔使咁辛苦, 總之老細唔係度個個都開心好多啦。


不過都要坐到成六點半先收得工呀。
收工無啦啦又勁大雨喎, 但之後都陪左十三去睇傢俬,
我地D taste真係好差天拱地呀下! 我鐘意D modern style o既傢俬,
佢就一D都唔鐘意。我話果張sofa個款靚, 佢就話似棺材, 真係比佢激死呀!
行o黎行去咁都行左成粒幾鐘呀, 之後去食飯再去睇左場九點半,
去睇左《絕種好男人》, 好好笑架喎套戲!
睇果陣已經笑餐死, 睇完諗起都仲好好笑, 笑到死左!
但搞笑在唔係張柏芝囉, 呢套戲裡面最鍾意杜文澤就梗架啦,
另外就鍾意劉凱威同任賢齊囉, 貪佢地都夠頂癮丫嘛。hehe...^^

>>May 17, 2003 at 5:42:17 AM GMT+8

2003 年 5 月 3 日 星期六 【晴】

今日同十三入左長洲呀!


不過未入長洲之前就真係P晒街呀! 十三今日兩點零三點啦o黎左接音音,
之後咪去醫飽個肚先去搭車囉, 點知行經巴士總站就同以前個男朋友細Joe撞到應晒,
我唔知佢見唔見到我呀, 不過兜口兜面都無理由見唔到囉~he^^
我離遠見到咁o既情形已經忍唔住笑喇, 仲話左比十三知添。
佢拖住佢女朋友, 而我又同十三一齊, 佢都笑笑口咁...勁搞笑! 但又好驚喎!
我都唔明點解會撞得返架, 都咁耐無見啦, 做咩仲要撞到喎。
不過都唔緊要啦, 我又有十三咯, 十三又咁鍚我, 佢又咁開心咁咪好囉。
而且可能而家同十三一齊啦、又可能我鐘意十三多D啦、又或者同十三夾D啦,
我成日都覺得同十三一齊好過佢咁o既。


之後食完野就入左長洲喇, 但今日好人左好多呀, 可能係星期日o既關係啦。
上次同呀盈去果日係星期四o黎架嘛, 咁小人D、咪好玩D囉。
今次條街就鬼咁多人, 但D舖頭就死氣沉沉喎, 無咩吸引所以都無咩戰利品呀。
同十三行左陣就去左故鄉茶寮飲o野喇, 仲買左上次o黎食唔到o既豆沙餅添呀, 好食好食!
當然唔少得呀盈果份啦, 上次同佢o黎都食唔到丫嘛。之後十三order左一杯靈芝茶,
果個老闆事先都同十三講明杯茶有食療功效, 話飲左會好訓D呀, 又點又點...
十三聽完就算o架啦咪飲囉, 仲比我試左一啖添, 都唔識點形容都無咩味o既,
但點知十三一飲完無耐就頭痛喇, 之後又落起雨喎, 咪搭船走人囉。
上到船十三已經忍唔住訓左喇, 我就唔知係見十三訓得咁舒服定杯茶真係咁勁啦,
我又訓埋一份喎, 一直訓訓...訓到落船都唔想起身。結果齊齊做左懶訓豬添! ^^


出到中環就去左食十三想食果間別府喇, 銅鑼灣果間又摺左喎都好耐無食喇,
十三成日都話想去想去又唔順路, 無啦啦又點會去中環喎, 而我就最掛住果度o既蟹子沙律喇,
今日終於比佢食到啦, 食完飯就搭叮叮返屋企, 返到屋企即刻去訓喇, 而十三都係咁囉,
唔知係唔係杯茶真係咁work呢?? 玩左成日都仲咁精神, 但一飲完杯茶又會咁眼訓o既, 好神奇喎!


>>May 17, 2003 at 5:41:06 AM GMT+8

2003 年 5 月 2 日 星期五 【晴】

今日好鬼"支力"呀! 今朝九點又同左十三去食早餐,
唔知點解逢星期六我返早, 而十三就放假假o既, 不過都無咩所謂啦,
成日都見到佢架啦, 不過返早又唔係佢當更的話,
時間就更係會難過D、悶D架啦。


佢送左我返公司走左無幾耐就開始落雨喇, 佢又無帶遮, 仲諗緊唔知佢點啦,
佢就o係後門入返o黎喇, 佢一入到o黎就同我講佢浸親、濕晒。
之後留左一陣又"nick"左把遮就走左喇, 之後佢就一個人去左睇傢俬喇。
而我呢晏晝真係好似自閉仔咁囉, 坐埋一面猛咁"中", 好眼訓丫嘛!


到左夜晚呢就真係完全唔掂喇, 忙左一大輪, 單就唔算多,
但落雨果下先辛苦又礙事丫嘛, 個個車手收十o既都諗住去埋呢轉收工啦,
點知返o黎仲有單要去, 又未食飯、又濕晒身, 個個都發晒脾四。
咁佢地又真係幾慘o既, 我地頂多聽下電話, 佢地就出晒去捱餐死。
佢地咁樣我都好明o既, 咪唯有快D幫佢地數定錢、埋定D數,
等佢地可以返到o黎收工囉。我本來收九點o架, 返早丫嘛,
十三八點幾已經返左o黎等我喇, 點知Elaine放飛機無返工喎,
咁我又點可以唔留低幫手喎, 辛苦晒十三等左我咁耐啦,
仲要唔該晒十三落手落腳幫手摺盒同cut餅呀!
雖然幫唔到咩大忙, 但我都唔想累左呀Shan同Annie架嘛。


到左十一點先收到工咋, 同左十三同林仔去食飯飯, 仲撞到狐狸同西西添,
狐狸食完仲坐左過我地度傾計, 反映下D不滿咁啦。
但講o黎講去都係離唔開呀棠、傑仔同呀Lam。其間狐狸同林仔講到幾"慶"呀,
最慘就係同十三講都無用, 事關十三都左右做人難, 佢地講果D野我都明呀,
情況正正好似我地果陣同果隻Grace一樣, 仲做埋同一個角色, 都係咁大冤屈氣。
但各有各難處嘛, 根本都唔知點解決o既, 所以我唯有同狐狸&林仔講唔好咁勞氣啦。


>>May 17, 2003 at 5:40:06 AM GMT+8

2003 年 4 月 30 日 星期三 【晴】

今日訓到成二點幾先起身呀, 都係因為肚仔餓囉,
之後老豆買左野食返o黎比我食, 食完就o係度睇《Harry Potter》喇,
睇到四點半先沖涼、換衫、返工。


雖然今日係公眾假期, 但今日都唔係好忙, 最慘就係麻煩多多。
有個麻煩客投訴多多搞到十三要做Manager Report,
加上個客又好無理取鬧、又鬧人喎~ 不知所謂!
度份Report點寫都度到十三炆喇, 自己匿埋o係房度匿左好耐呀,
加上自己個大佬都淨係識得"瀉"都唔撐自己, 十三都心淡啦, 佢真係幾慘o架。
佢講左好多o野比我聽呀, 十三話比著係以前跟果個Kenny,
Kenny一定會撐佢, 而且佢點都唔會咁"瀉"先喎, ha~唔怪得佢同Kenny咁friend啦!
但而家佢就覺得做好多野都唔值得囉, 所以十三以而跟住佢都幾唔開心!


收左工咪o係經理房幫十三寫份manager report囉, 佢就做其他野,
搞掂晒Do野都成十一點幾喇, 之後先去食飯飯, 今次十三真係好勞氣呀,
佢好少猛咁講埋同一樣o野講咁耐o架, 事關佢通常講完就無左件事o架啦,
但佢今次唔係喎, 佢一路講我一路聽, 除左聽之外我都唔識點安慰佢lu。
不過見佢講完開心返D, 我都安樂返D!

>>May 17, 2003 at 5:38:58 AM GMT+8

2003 年 4 月 29 日 星期二 【陰】

今日Kenny打比十三喎, 好凝重咁同十三講話自己有婚外情,
又話自己鐘意左個人喎, 咁十三又懷疑啦, 但都要認真咁聽佢講o架,
之後咪話唔係呀咁喎, 點知個衰野Kenny 話自己發覺鐘意左呀音喎,
講完又係咁顛左咁笑。原來佢打o黎就係串十三同音音之嘛!
十三咪唯有話返佢收風收得慢囉, 但Kenny真係好鬼衰架喎!
串完十三都唔夠呀, 仲自創左首詩FAX左過o黎我o地間舖串人地喎,
首詩好頂癮架, 睇完都唔知好嬲定好笑!


>>May 17, 2003 at 5:37:15 AM GMT+8