2003 年 3 月 3 日 星期一 【晴】

俾人呃左去既一日...

朝早起身仲好開心咁睇流星花園...
一路食飯一路睇正...

本來今日唔使返的...但為左開監委會...唯有局住返bu...
但搞左成半個鐘先發覺個會開唔成...
原因???因為唔夠開會既法定人數...(有幾條戊利冇黎又唔一早通知...)
下星期又要再開過...仲要有mid term...test...paper...present...放過我吧...

夜晚又同david sindy等人去左食晚飯...
一個人叫左kfc一桶燒雞翼黎食...
食左5隻已經好滿足...但仲有一隻...食唔落都唯有格硬食...><

回家...已是夜深了...時間??被騙掉了...


>>March 4, 2003 at 4:36:45 PM GMT+8

2003 年 3 月 1 日 星期六 【晴】

AOC再黎7人大戰...
爽...

又再一次多管別人的閒事了...雖然達不到目的(都估到會咁)...不過我覺得說那些話是我的責任...
起碼感覺上好似幫過忙...

不過有時少不免會想...做這些事...正確嗎??還是...

但很多事情都不是自己的控制範圍之內的...


>>March 3, 2003 at 4:05:36 PM GMT+8

2003 年 3 月 1 日 星期六 【晴】

朋友...走了...又要過一段時間才可以再見了...

最討厭的便是無義之人...
不遵守對別人的承諾...偷偷地搏人地唔記得或者唔理...
既然不想做便不要和別人立約...立約後不是全部遵守就不要立好了...

違反約定時又將責任推在受害的一方身上...甚至羅織罪名,,,
簡直真係賤人過賤人...

最討厭因財失義的那些人...

>>March 2, 2003 at 5:36:07 AM GMT+8

2003 年 2 月 27 日 星期四 【晴】

難以相信...我竟然可以食兩次宵夜...而且食完仲好餓...

呢兩年真係食多左好鬼死多野...(正餐時食少左...不過好快餓...)連帶我既體重亦都增加左唔少...
由兩年前既一百二十磅增加至一百三十幾磅...有d擔心咁食落去會變成一個肥仔....><

呢幾日冇啦啦羅返d流星花園黎睇(卡通板...真人板令我反胃)...套野真係非常之好睇...都可算係經典...d畫工又好...劇情亦鋪排得非常好...完全唔明個作者點度出黎...而且加埋d襯哂當時環境既配樂...真係一流...即使知道哂內容再睇亦一樣咁吸引...結果一訓覺d配樂同劇情就係咁係個腦入面湧出黎...實在太好睇喇...不過唔知點解每次睇完之後都有一種莫明的失落感和哀傷的感覺...總覺得好像失去了甚麼似的...

唔知點解...最近覺得同一d朋友同埋同學仔疏遠左...大家好似有左一層隔膜咁...感覺上畢左業之後大家就唔會再聯絡咁...><

今日下午再次同阿榮...阿婉等人去左九龍城大魚大肉...viv再次放我地飛機...真係令人失望...
雖然d野係好食...不過連埋來回車費加埋近一百紋...令我係月尾既經濟頻臨崩潰...><

食飽飽之後跟住就係同kalok先生同小柏奇一齊做既soc present...
個講師係我地講緊既時候不斷咁插我地...同我地 兵屎當明...
終於pre完...點知個discusssion一樣係得我地3個人講野...
最後演變成kalok先生同個講師既辯論...而我就係隔離進入半昏迷既 "無" 既境界...

今日真係累到想死...

ps. 英國堂tutorial真係無鬼聊...講左3個字唔夠就冇哂野講...最後大家唯有係度講我的志願...
不過都好...起碼可以抖下...

>>February 28, 2003 at 1:43:45 PM GMT+8

2003 年 2 月 26 日 星期三 【晴】

昨日得sindy提醒先省起原來自己要跟進監委既工作...雖然麻煩...不過唔難做..只係打幾個電話 0者(咁起碼自己都叫做有些少貢獻啦)...不過撈埋我其他未做既野就令我好麻煩...

丁偉d notes有成個星期未睇...英國又未備課..李連剛d野又未做...soc聽日仲要present...

本明治維新史唔經唔覺就睇左大半(今個sem睇呢d書既速度慢左好多...往年睇書全部都係答車果陣睇...但今個sem日日返8:30仲有一日day off...又多數同其他人一齊放學...睇書既時間少左好多)
好多人對日本既發展都有一個誤解,就係以為日本係明治維新之後就掂哂,咩都一帆風順...其實果陣推挎左幕府之後日本仲面對住好多問題同危機...嚴格黎講果陣日本仲危殆過中國..地方勢力強盛,爭外國周身債...而且國內政治非常之動盪...維新果班人除左季小五郎同山縣有朋之外差唔多無一善終...所以我一直覺得日本係果陣可以成為世界列強之一真係神奇過神奇...奇蹟過奇蹟...

相對黎講中國既條件更好,只可惜開明既人才唔多...真係非常之可惜...

>>February 27, 2003 at 8:09:22 AM GMT+8

2003 年 2 月 25 日 星期二 【晴】

哈哈...今日真係過得非常之開心...

早上: 長期處於半睡半醒的狀態...
一大早要返8:30堂,但昨日就4點先訓...我使出左邊行邊睡大法...(簡單d黎講即係閉目行路...不過落樓梯果陣千祈唔好用...@@)
入到課室清醒左一堂就開始陷入半昏迷狀態,但個講師又係冇notes派,要自己抄佢d投影片果隻...
我仲可以點做?0米一路訓一路抄囉...(抬頭看投影片時清醒...一低頭寫就不自覺恰著)
到我落堂既時候本筆記已經俾自己劃到花哂)

下午同sindy,縵頭食飯...唔知點解覺得最近Sindy d 霸氣完全冇哂...

上香港史繼續訓覺...

到左6點半就同gali,hin爺一齊出發往銅鑼灣參加Dolly同Jade既歡送會...但係係往地鐵站途中竟然陸續撞到阿dull..女神...陳綜...gc等平日呢個鐘數好少撞到既人...

攤到阿dull之後,和女神等人對話就會知悉型男事件...件事保守估計應該可以笑足一年...

夜晚又食韓燒...而且又係韓和院(差唔多音...是但啦)......
又係百零紋任食,不過呢次就多左野飲同雪糕...仲有三文魚(雖然不太肥美)任食唔嬲...都算唔錯...(但阿gali就話貴喎...)

成晚真係成班人係咁係度笑(如果唔係係一間獨立既房入面肯定冇咁顛),真係講野講到喉嚨都痛埋...特別係肥峰果d高難度既iq題...勁到連條題目都係錯既...俾夠佢五個勁先得^^...到鳥獸散既時候又係成11點幾...返到屋企沖埋涼睇左兩頁報紙又陷於昏迷狀態...

睇返成日...真係由7點起身之後就0米停過...幾個星期以黎第一次未夠3點就訓左...^^

>>February 28, 2003 at 1:47:08 PM GMT+8

2003 年 2 月 21 日 星期五 【晴】

今日一起身...飯都未食...就俾一個神秘電話叫左出去...我話我未食飯喎... D先生 : 我都未, 咁快D出黎一齊食啦...
點知出左去都唔係大魚大肉...,而係10紋碗...餓左成日...

唔知中左咩野魔咒定係唔慣FINAL VERSION 既模式...對親dolly都俾佢大數...個球證又好似俾佢收買左咁...
佢一定係做左手腳...連winning高手既將軍都贏唔到佢...唔...十分之可疑...

後記: Dolly係屋企真係ma都唔做...連執台,煮飯..洗碗都係由佢阿爸一個搞掂...唉...真係不孝...
不過佢阿爸煮d野都ok喎...真係估唔到...

返到屋企已經12點,正係處於涼又未沖,報紙又未睇...咩都未做既悲慘境地...諗住開電腦check個email再搞埋d野就訓啦...但就俾martin叫左去打aoc...而且係久違了既6人大戰,仲要一打打兩鋪...
跟住仲要沖涼睇報紙...訓果陣望下個鐘...原來已經係5點鐘...><

>>February 23, 2003 at 6:55:31 AM GMT+8

2003 年 2 月 20 日 星期四 【晴】

今日過得非常之充實,,,
一早就返8:30堂...我discussion果組得一個人返...真係非常之無奈...

下午同左joey...科拿...自宮志剛同倩明一齊去左打壁球...
今次係我第二次打...不過我已經有超水準既發揮,成功打出左失傳已久既7色變幻魔球...
個波直飛雲霄...衝破天際...但代價就係我要用廿皮買個個波...><

所謂天生我才,必有所用...阿剛雖然係一條廢柴...不過佢打壁球真係有一手...所謂廢柴不露相...
露相不廢柴就係呢個道理...

下午又係同gali...仔仔等人食lunch...大家傾左成粒幾鐘直至gali上堂先作鳥獸散...
而我就去左我乖仔間房上網同打機...
winning比賽時...本來我領先一粒...形勢大好...可惜敵人兇狠陰險...用盡一切手段...
因而發生左下剋上以子弒父既慘劇...
雖然身處絕境...但我並沒有放棄我既氣節...一言不發...衝入敵陣之中以5:2既比數壯烈犧牲...
雖然乖仔成功打低左佢既父王...但係佢就要受盡良心既煎熬...今晚佢一定冇覺好訓...
可憐...><

打完機再上pe...成身散哂...

睇到阿婉既留言...亦都同意佢既講法...
不過冇可否認...一個人對其他人既睇法係會隨時間而改變既,而且好容易受到其他因素影響(例如壞話...小道消息之類)...所以我傾向於相信自己直覺同埋親身既感受同經歷去評價一個人多d...

>>February 21, 2003 at 10:21:31 AM GMT+8

2003 年 2 月 18 日 星期二 【晴】

今日返8:30堂...入到去先發覺點解會咁少人既???
而且個講師唔同左樣??唔通去左東瀛整容??
諗諗下先記起個阿蛇去左外國開會...今日根本可以唔返...

不過幸運地個講師講野非常之有趣,仲有趣過原本果個...
講全球化講得好好...令我識多好多新野...
好在有返咋...^^

上完Dr. 丁之後同縵頭一齊食飯...
出左LT7會見到Sindy,同佢談話後跟著便會出現到樂富食飯的任務...
而Sindy亦會加入隊伍中...
Sindy的level和攻擊力都很高...不過戰鬥時會暴走...戰鬥時要多給她補血...

去左樂富一間粥店度食野,d野都幾好食,食野既時候同Sindy傾計就可以得到跑步秘訣...

食飽就去上堂...但粥氣攻心...同縵頭...阿剛(佢lunch只係食左個三文治...但訓得更林)三個人陷入昏迷狀態...真係break之前都冇ma邊刻係清醒既...
放break既時候縵頭仲訓緊...真係唔知佢係0米香左,個頭軟弱冇力咁垂埋一邊,就好似俾人扭斷左條頸一樣...

上完香港史,又上RP...好累...

>>February 20, 2003 at 7:51:28 AM GMT+8

2003 年 2 月 17 日 星期一 【晴】

今日又上李連剛...真係悶到嘔咁滯...講10句廢話先有一句有用既...
等得黎都訓左囉...望下前面d人...有d睇緊新聞..有d send緊email(我個mail box就係咁俾人爆左)...仲有d人玩緊泡泡龍tim...而果陣我亦上網睇緊有關德川家康既史料...

jackey約我一齊星期六去食韓燒,因為事忙而拒絕了...其實我都好想同佢食...可惜因為要做兩個present>< (相隔只有3日...)

雖然同jackey冇咩野深交...但我覺得佢應該係班中最純品既人(感覺上)...而女既就應該係joey(我覺得...)可惜...因為成日撞時間...大家都幾難有機會一齊食飯...

落堂同gali...婉..女神...王dull等人去左舊can食tea...順手聽佢地吹水...不過唔知點解氣氛有d沈悶...

今日大事: 終於睇左catch me if u can...真係好鬼好睇...d劇情好有張力...湯漢斯不嬲好戲...估唔到迪仔都有咁好既演技...d人物刻畫得非常深刻...詳細既背景交代亦令d人物性格更有深度(但湯漢斯既背景交代得有d不足)...我俾佢4粒半星...

而我覺得5粒星既戲就只有月黑高飛同綠里奇緣...呢兩套戲冇靚仔..冇靚女...冇特技...亦冇動作場面...有既只係一流既劇情...兩套都差唔多有成3粒鐘...睇之前要有心理準備...而家呢類型既電影已經愈來愈少...近黎堆所謂既港產賀歲片真係睇到都想咸出黎...一堆笑完就算既低能笑料(我睇行運超人都有笑...但d戲真係太假...)即使係幾好睇既無間道...我都最多俾佢3粒半星...d劇情好似做出黎既咁...套野亦冇ma深度(或者佢想營造呢種深度...可惜唔成功)...除左黃sir俾人掟落街果幕震撼d之外...成套野都唔可以令我留下咩野深刻既印象...

000...我做咩無啦啦係度打影評嫁???

>>February 18, 2003 at 5:53:08 PM GMT+8