2003 年 3 月 14 日 星期五 【晴】

昨日已經慘情...今日更知道原來自己冇啦啦俾人小緊...明明冇得罪人...令人義憤填膺!!!

以人為鏡...可以照出一個人既得失...
我希望自己可以成為一塊好既鏡子之餘亦都可以找到一面可以照出我既得失既鏡...
所以...俾人話下都好...

希望可以成為一個好似石田三成或者大久保利通咁樣既人...

aoc再次俾martin打敗...只能怪自己戰術失當...

>>March 16, 2003 at 6:48:51 AM GMT+8

2003 年 3 月 13 日 星期四 【晴】

承接返呢幾日開心既心情...
朝早出門口仲趾高氣揚...只覺心情大佳...真係行步路都笑出聲咁滯...
但到左晏晝心情就即刻黎一個180度轉變...心情非常沈重...
我都唔知點解成日都要係我充滿希望或者係一d野上面下定決心之後先要俾我遇到呢d咁不幸既事...

次次情緒低落我都會進入一個"無"既境界...咩都唔諗...保持個腦一片空白咁感受呢種失落既感覺...呢d事其實已經唔係第一次...所以都唔會受太大既打擊...回復既速度仲比以往快左唔少...幾個鐘頭之後雖然個心仲係有條刺...唔多高興...但已經冇乜野...

不禁聯想到林燕妮寫的一段文字...
別要求這世界給你甚麼,也別要求自己給這世界甚麼...愛心只在你愛那個人時存在,別人對你的愛心也只是他在乎你那時存在...要把永恆當水喝的人注定是一個悲劇人物...

的確...又不是世界末日...無論甚麼事也好...也沒有甚麼值得好在乎的...
不想失望的話那做任何事之前便要先作最壞的打算...不想成功先想失敗...
例如考試前先抱著預左考得衰既心態...咁成績好時就會有雙重驚喜...衰左時也不會有太大打擊...
雖然好似係一堆歪理...

總之下午之後成日既心情都唔多好...同阿剛縵頭hehehaha一輪之後再上埋堂就去左阿dull房同佢傾左陣discussion d 野 同打左陣機(狂數佢^^...正廢柴)就去左同china預祝生日...
我唔敢食得太飽...因為我夜d又要再去同阿婆慶祝佢既96歲大籌...
所以飯我都係食左半碗就算...

婆婆擺籌例牌係太古海天皇宮...又係食果d瑤柱爬豆苗...翅同脆皮雞呢d油膩野...
我樣樣都係食左少少就算...始終精神不振加上心情麻麻...食呢d野突別唔開胃...
成台人個個都係食少少..連雞脾都剩返兩件係度...感覺好折墮...可惜雖然美食當前...但我真係冇乜胃口...只能望而輕嘆...

睇返個籌宴...一共開左6圍...每圍最少3,4千...
加加埋埋就萬幾兩萬...雖然唔係我俾錢...但我都覺得好奢侈...(食兩,三餐就可以用哂我既畢生積蓄...點可以話唔奢侈)不過阿婆生日一年先得一次...搞大d係應該既...希望婆婆長命百歲^^

食得...好飽...

雖然而家心情已經好返唔少...不過要振奮返個士氣...我諗都要兩,三日...相信廢柴兄會最明白我既慘況(件事只係講過俾佢聽)...可惜佢忙於做present...唔係真係想找佢訴下(雖然佢點努力都難逃一死^^...discussion我負責插佢...ccc)



>>March 15, 2003 at 1:05:17 PM GMT+8

2003 年 3 月 12 日 星期三 【晴】

同王dull係icq講起畢業既問題...
我話唔多想咁快畢業既時候...王dull竟然話希望快d畢業...
其實返學讀書真係開心過返工好多...起碼冇乜壓力...又可以日日同班fri一齊hehehaha...
日子相當逍遙...
好似而家咁上7個鐘堂已經鬼殺咁嘈...真係好難想像以後朝9晚5俾人奴役既日子...

好似上年暑假老豆介紹左我去佢間公司面試...而又好好彩咁取錄左我...
由於間公司大得離譜既關係...我老爸人微言輕...照我唔到...(而我亦都唔想佢照住跟住哂)
除左頭一個星期之外真係日日都辛苦到嘔...
朝朝5點9起身迫火車...搞到夜晚8點幾先返...
而且起始一個月咩都唔識又日日俾d同事插到飛起...真慘...
後尾雖然做到d成績出黎俾人贊但一樣覺得辛苦到嘔...
雖然係一個難得既經驗...
但已令我明白做野係幾咁辛苦...(相比以呢份工...以前果份真係嘆得多...)
真係唔多想咁快畢業出黎做野捱世界......

大家諗下...日日8,9個鐘...又唔可以偷懶...幾辛苦...

>>March 14, 2003 at 8:08:32 PM GMT+8

2003 年 3 月 11 日 星期二 【晴】

通宵溫rp...不過由於一早決定左走左堂8:30既關係...一直用一個好輕鬆...行行企企既心態去溫...
到溫完既時候已經兩點幾...
突然間想上下網...

一上網就同王dull & 大姐係ic蕉雞喙唔斷...
估唔到一直好似好樂觀開朗既大姐原來都有咁多煩惱...一chat就chat到4點幾...
希望佢快d解決佢既問題啦...

雖然今個sem同大姐好少見面同傾計...不過我知道我會一直好喜歡佢的...
成日覺得如果有個咁既家姐就好了...^^

走左堂8:30令我可以毫無後顧只憂咁大覺訓...^^
上香港史唔知點解縵頭..阿ben都冇上...
只係得我同廢柴小剛一齊坐...
唔知係0米因為得返兩條gis友...搞到鬼死咁好傾...幾乎由上堂傾到落堂..不過就成堂都冇恰眼訓...

測rp...比想像中容易...45分鐘就完成左份卷...不過其實呢之準備得麻麻...溫得太輕鬆...
下次應該準備得好d...

夜已深...係夜深人靜之際...我羅左對波鞋出黎默默咁刷左半粒鐘...比起上年剛買時殘左好多...
暑假可能要買過對...記得舊果隊係著左5年著到鞋底穿埋救唔返先掉既...
始終都唔想花太多冇謂錢係呢D野度...

又到4點...


>>March 12, 2003 at 7:43:54 PM GMT+8

2003 年 3 月 10 日 星期一 【晴】

慢長既監委會最後一次會議終於玩完...雖然呢個會花去左我唔少時間...而且我亦都好似冇做過d乜...只係大家坐埋傾下計....討下論....不過都算係一個難得既經驗...

突然想打下一d關於義既野...即係作為一個人既價值本身既問題...

人既價值到底係在於咩?在於佢叻唔叻...對社會有冇貢獻?如果係咁呢d貢獻又應該點衡量呢?

我覺得一個人即使佢點叻點醒都好...如果無義既話咁呢個人既價值亦十分有限...

咁義到底係d咩呢...係一種由人既內心自發出黎既對自己既要求...而呢種義同社會既道德倫理唔同...係冇社會性既...每個人對義都有自己既一套標準...簡單而言...就係行事要對得住自己...問心無愧...心中所想的應該是你對其他人...對這個社會做了些甚麼...而不是要求其他人或社會對你做些甚麼...所做者不是批評別人的缺點和錯誤...而是去包容它們並從中作出反省...即使對著自己不大欣賞的人亦應以禮相待,大不了是交淺言深,而不應該對別人惡言相向或對其缺點或錯誤落井下石...克己和處事不亢不卑,對自己負責者為義人...

基於此一原則,我從來不同情那些弱勢社群...特別是正值壯而領綜援的那些人...他們出賣了自己的自尊,生活再苦也不應該依靠和自己無親無故的人蒙養(反之...若是親人朋友的照顧則可接受)
那根本和行乞沒有分別...失去了尊嚴就是失去了靈魂...即使是一條對社會毫無貢獻的廢柴但若他能活得頂天立地...貫徹自己的目標和心中的義...那他仍為一有義之人...反之...即使才高8斗,年薪千萬,若心中只有利或是以本傷人...那就...

總之...人生於世,當正其誼,不謀其利,明其道..不計其功...

其實打咁多野都只不過係想組織下自己一直以黎既道德價值觀...
但睇返自己打既野...仍然係頗為散亂...睇黎要多d時間思考下至得...

>>March 11, 2003 at 3:14:14 PM GMT+8

2003 年 3 月 9 日 星期日 【晴】

當我接收到呢個訊息,即時湧起一種很哀傷的感覺...

他思想超卓,博學多才,而且樂於助人...細小的身軀仿佛蘊藏著無限的才能...
我一直覺得認識他是我的榮幸,而且十分慶幸每天都可以跟他學習新的東西...

但到了今天,雖然他仍存在於世上,但在我心中的他卻已經死了...
能不難過嗎...唉...真係希望眼花睇錯或者係另有原因...難以相信...

今日小記: 英國唔使考mid term...即刻成個人鬆哂...一返屋企就打機...

同gali一齊答車返歸果陣...正談得興高采烈之時...竟然有一個唔識既傻佬插嘴...
gali俾佢講兩講即刻面都黑埋...呢個世界傻佬真多...偏偏係我地遇上...

溫RP溫到就黎顛...不過另一方面我覺得自己對對同錯既觀點清晰左好多...

>>March 11, 2003 at 2:22:28 PM GMT+8

2003 年 3 月 7 日 星期五 【晴】

呢兩個星期超多野做...不過我一樣係玩既時間多...做野既時間少...
時不時都聽到有人怨點解冇啦啦會咁多野做...雖然我都好鐘意怨呢樣怨果樣...其實我幾鐘意咁多野迫埋黎要係好短時間做哂佢果種感覺...
不斷完成呢d沉重既工作我先可以感受到生活既意義...特別係做完哂果刻...果種解脫既感覺真係冇論試幾多次都咁爽...

其實睇下暑假既情況大家就會明我想講乜...
如果暑假冇返工既話,放多個零月大家一定會悶到飛起...因為要玩既已經玩哂...反而會好想搵d野做...

唔知係0米呢幾日成日用腦既關係(寫present稿...睇notes兼brain storming)...搞到今日個頭成日都好痛...但又冇理由訓覺浪費哂d時間嫁...不過後來真係累到連報紙都睇唔到先上床小休一陣...

小休半小時就即刻彈起身睇足總杯...場波超正...可惜我精神唔多好...睇得好辛苦...
到左上半場中段開始有d頂唔順...唯有係咁食野提神...甚至企起度睇...
好在場波都相當之精彩...唔係真係企係度都訓得著...

所以唔夠訓就睇波...與其話係享受不如話係折磨...

睇左王dull既daily...令我諗到西方既民主人權果d普世價值...
個人就相當之討厭民主同自由(特別係美式果隻)...
人權高漲更加係殊不可取(大家睇下香港果d古惑仔幾寸就知)

民主只會做成愚民政治...而自由就會令社會道德淪喪...(香港人更係成日濫用言論自由...言不及義)
政府一定要用強硬既措施打壓人民...將一眾愚民既活動限制於一定既範圍之內...咁社會先會安定...人民先可以將注意力集中係生產活動上面...咁樣人民先可以安居樂業...當然...個前提係個政府要勁啦...(好似董伯伯果個就.....)

>>March 9, 2003 at 6:55:28 AM GMT+8

2003 年 3 月 6 日 星期四 【晴】

無啦啦俾一d事情困擾住...搞到心情非常鬱悶...

其實我都知呢d野同其他人傾下或者會好d...可惜我並唔係一個慣於向其他人傾訴既人...

呢件事...我冇乜信心可以處理好...其實我知道應該點做...但我仲係猶豫不決...
到底點樣做先係正確呢...

煩惱真係搵人傾下就乜都掂哂...雖然解決唔到實質既問題...
但係心理上既作用就好大...成個人都鬆哂咁...
真係要多謝大D...佢不愧係我最好既朋友...^^

其實一個人成功定失敗根本就唔重要...失敗並沒有甚麼可恥...更可恥的是那些以卑鄙手段爭取成功的人...

>>March 7, 2003 at 5:06:46 PM GMT+8

2003 年 3 月 5 日 星期三 【晴】

今日發左個好奇怪既夢...
冇啦啦夢見一樣自己好想要既野俾個好友搶左...
而我就係度苦苦交戰到底應該制止佢..同佢搶埋一份...定係企埋一邊唔同佢爭呢...

都唔知點解連發夢都要我夢見d咁既野...搞到訓都訓得唔好...

今日夜晚出左去同大家姐食飯...其實細個果陣同佢冇咩野講...可能始終大家年紀相差幾年...
但中5之後同佢fri左好多...起碼大家會食下飯或者互送生日禮物...

今次佢帶左我去銅鑼灣,灣仔交界既一間餐廳食飯...
間野真係正到暈...d夜境超正...完全唔知點解佢可以發現到呢間野...
加上d野食都相當唔錯...但埋單4個人都係2百幾...即係一個人60紋唔到...好抵...

對話節錄
當大家談論偶像時...

姐: 你d同學仔鐘意開咩明星呀...

大(思考左一陣...): ummmumm....有個鐘意向海嵐...

姐: 痴線!!!

大: 我都覺得好難以置信...

由於受到事主(果位鐘意向海嵐既人兄)既強烈批判...所以澄清一點...
果位人兄話佢都好鐘意鄭秀文嫁...話佢都係一個正常人...有同其他正常人一樣鍾意既偶像喎...



>>March 6, 2003 at 3:01:06 PM GMT+8

2003 年 3 月 4 日 星期二 【晴】

今日返8:30堂...連續訓到4:30先開始進入清醒狀態...
一上堂就訓...慘...早知走soc訓多陣好過,,,

丁先生第8個topic d notes簡直廢話連篇...可惜我做discussion...唔睇唔得...希望阿dull醒d...照下我啦...(同乖仔一組...)

雖然好多野做...但都應承左好耐冇見既大家姐聽日一齊出去食飯...書幾時都可以溫...呢d見面機會就真係唔多...要珍惜...

夜晚上網鬆下時...竟然同久違既阿東chat左成粒鐘...平時多數講電話...咁樣chat咁耐都好似係第一次...^^


>>March 5, 2003 at 6:18:05 PM GMT+8