2003 年 8 月 6 日 星期三 【晴】

昨日打完機...太精神...一直都訓唔著...於是起身睇書...
睇完本書...望下個鐘...已經6點了...恐怖...

一覺訓到成點鐘先起身(其實不過係訓左7個鐘...)食完lunch...睇埋亂馬...就即時為winning 7 開封...(雖然好想做野...但係無理由用$380買左隻game完全唔玩掛...)打左一鋪...仔仔就打電話黎話想上黎一齊打機...於是執企理少少之後就落左去接佢上黎...

仔仔成日都好乖...好聽爸爸話..無搞事...一齊打winning都打左成2粒幾鐘...佢走既時候已經成5點...
又就食晚飯了...明天又要返屍會開會...佢地對我前日趕工完成既小冊子好似都尚算滿意...聽日開會就係為我打既e份小冊子作修訂...之後就要出街了...希望佢地會滿意我打的內容吧...

最慘既就係...自己份research...始終未有時間做...慘...

希望明天開會順順利利吧...
老實說...我覺得自己的能力相當不錯...但在工作上就是沒有協調性...一看到一些不順眼...或討厭的東西便會大發雷霆...上次開會已經黑口黑面了...我認為...工作一定要認真才可以...大家都是為了達成一些目標才去工作...因為達成目標是最重要的...不一定要刻意表現自己...強化自己的貢獻才可以吧...完成了目標...便是完成了自己的責任...
一看到那些多多廢話...多多理由...態度輕浮的人我便火大了...e個壞習慣一定要改至得...
始終...在說服...鼓動別人按自己的方式和想法辦事的能力上...我仍然相當不夠...

>>August 7, 2003 at 11:27:54 AM GMT+8

2003 年 8 月 5 日 星期二 【晴】

今日唔知點解...成日都唔多精神...

本來妖丸話上來一齊食lunch的...但因事改期了...於是便去了中環和久違了的牛屎兄食lunch...
約左係馬莎門口等...等左一陣就見到文裝一度既牛屎出現...雖然感覺上好似怪怪地...不過佢個文裝look都唔算樣衰...

食完野返左屋企...之後就即刻著電腦諗住打屍會篇野...仲有好多未打...時間緊迫...為此仲推左幫女神錄音既工作...

不過唔知點解...個頭痛到好似想爆炸咁...個腦又昏昏沈沈...做左陣就頂唔順去左訓覺...
訓醒既時候已經係4點幾了...但仲係好唔精神...之後就要即刻出門口去幫大佬買野同赴朋友之約...

係架電車度登下登下...好想訓覺...去左188同大佬買winning 7...順手買左幾套戲同漫畫...咁就唔見左成5舊...

買完野...已經成6點十一...我得5分鐘時間衝過去銅鑼灣...結果...當然係遲到...
去到果陣..阿博...肥仔gali...迪比...viv等人已經一面不耐咁企哂係度等...累你地等咁耐...真係唔好意思...

一齊睇完戀上你的床之後就去左食韓燒...我仲係好唔舒服同頭痛...成日都冇咩點出聲...
個感覺就好似係格格不入咁...唔多舒服...不過鬼咩...兩男4女(將gali當作女生計算)...
大家講既唔係d明星就係d8掛野...或者係互相取笑...講真...對e d 話題...我既興趣真係十分有限...
不過既然人人都講...0米唯有埋堆講埋一份囉...

返到屋企都成11點幾...即刻開電腦等王dull仔仔一齊打機...等到仔仔上網...傾左一陣...佢話夜d先打..於是就入左房恰一陣...真係唔多精神...但又好想打機...
開game既時候...個身體狀況仲係極差...慘到好似就黎死咁...但打左一陣...奇蹟就突然發生...
頭痛消失左...個人仲愈來愈精神....連個腦都清醒埋...(真既...冇誇大...)
反而係王dull仔仔疲得滯...打機中途兩次訓左...(e d 事真係成日發生...)

後記...戀上你的床作為一套笑片...其實都算唔錯...
不過有時d笑料過於刻意...而且d對白仲有d低裕(e 樣唔多介意...不過最憎佢有d低級刻意得黎又唔搞笑既對白...)
好似劉青雲果條感情線...根本係好牽強...好刻意咁整出黎既...見到一個0靚妹...係度搞事同成日煩住哂...你會唔會哂成日去同佢顛?顛完之後仲帶埋佢返你屋企?更重要既就係...你係唔識佢嫁喎...
簡單黎講..就係得啖笑...入戲院睇就無唔多抵...買隻vcd返屋企得閒笑下都ok既...

>>August 7, 2003 at 11:09:48 AM GMT+8

2003 年 8 月 4 日 星期一 【晴】

今日真係好疲啊...
昨日同王dull仔仔打機打到4點先訓..之後第二朝就要10點幾起身...
因為屍會的yanyan約了我12點回去食lunch...因此一定要早d起身整理下手頭上既工作先...以及諗下點講返篇文既進度...

好多人都以為屍會離我屋企超級近...其實快步行都要成3個字...而代價就係一定會成身汗...
次次一入office d 汗就係個頭度係咁滴落黎...真係樣衰...不過都冇計...鬼叫自己次次都咁遲出門口咩...

我既準備果然冇白費到...可以話係對答如流...連冇準備過既野都答得相當之流暢...
我覺得自己如果上左力就真係會好掂...如果未熱身就會口疾疾...講開左愈講愈順就真係一流...
之後zo雞都上埋黎一齊去食lunch...佢同往常一樣都係唔多出聲...鼓埋塊臉漲卜卜咁...好鬼搞笑...
去左一間好昂貴而又近似daily franc 既 物體食野...點餐係用英文...我同zo雞都唔識讀d好鬼死長既菜名...所以大家都叫左個最易讀既會所三文治黎食...點知鬼死咁大件...我同zo 雞share 一半都夠食...之後大家都要打包另外一半返屋企...

食飯果陣大家都有講有笑...傾得都幾開心...最開心既就係原來yanyan都好不滿上次班人開會既表現...終於有人同我一樣諗法了...果陣仲以為成日嬲爆爆唔出聲好少不更事tim...得到yanyan既認同(對e件事)真係非常之開心...^^

之後便回左去屍會幫手做牛頭角下村既野...睇左一輪資料之後...yanyan就叫我整一份計劃書出黎...幫手諗下搞d咩野活動...e d 野簡直濕濕碎...其實我覺得搞活動既野唔使諗太多...只要知道個活動既目的...同埋量力而為(即係可以有幾多人力物力去搞)就得...口號人人都識嗑...要咩都做哂...解決哂所有問題根本冇可能...
之後搞掂左就講過計劃俾yanyan聽...之後佢又俾其他人諗既idea我睇...大家互相腦震盪一番...
雖然我冇咩參與過牛頭角既家訪同其他活動...以致d idea可能唔多成熟...但係我都覺得我自己做得相當之唔錯...可以話係付出左貢獻...

之後yanyan又俾左一大堆資料...叫我返屋企諗埋d單章同proposal 既具體內容...話星期五之前搞掂...我一返到屋企抖左一陣就開始做...雖然話可以星期五先做起份野...但我想一日內搞掂佢...不過份野真係幾麻煩...又要分唔同既part...又要睇下會唔會累贅...我覺得自己都做得ok...11點左右就搞掂左份野...

做野有時雖然好悶..好難頂...但我最享受工作既就係...佢會帶俾你一種 "生存緊既感覺"...所以其實我好鐘意考試...雖然讀果陣好辛苦...但考完之後果種即時鬆哂既感覺就真係無得頂...
正如一個日日座係冷氣房發牛斗既人...佢既身體一定會有種唔多舒服...冇咩精神既感覺...
但係如果行到身水身汗先入一間冷氣房呢...你就會有一種好爽既感覺...

我想講既就係...有最苦...先可能有最樂...

ps...食飽飯...太疲小睡既時候....霸王丸又打電話黎擾人清夢...佢次次打黎都係我剛就快訓著既時候...唔通我前世成日搞到佢冇得訓...今世佢黎報復???

pps...由於屍會突然pat左堆野黎做既關係...搞到明天唔可以幫女神手綠音...真是對不起了...(雖然我對科雲既約人安排極為不滿...)

pps...本來今日約左terry哥踩單車...可惜因為驚落雨同突然事忙而告吹了...結果只有terry哥同martin兩個人踩...希望下星期可以再一齊踩過喇...

ppps...一路做野一路同女神chat...chat左好耐...真係傾得好開心呢...^^
期待下次再一起吃飯^^

>>August 5, 2003 at 7:06:53 PM GMT+8

2003 年 8 月 3 日 星期日 【晴】

昨日終於睇哂D柯南同最終兵器彼女...
柯南雖然係TV版...不過都算幾好睇...

最終兵器彼女雖然係人氣之作...不過...睇到中段都覺得OK既...不過最後果兩集就...
個故事根本完全無說服力...完全唔知點解會咁受歡迎...集集都係真情色既死人LUM樓...真係麻麻...個結局更加係不知所謂...唉...

今日唔知點解大佬又放假...本來想打文...不過佢用電腦DOWNLOAD緊歌...唯有入房睇昨日綠左既曼聯對巴塞...場波以熱身賽黎講真係相當之唔錯...一睇就睇左好耐...之後就同大佬打機...又用左一日了...

PS.大佬雖然話係搬左出去住...但因為發生左某D事情...而家幾乎晚晚都返黎訓...@@@
將D屋租俾個細佬好過喇... *v*""

>>August 4, 2003 at 11:07:20 AM GMT+8

2003 年 8 月 1 日 星期五 【晴】

今日終於都走堂了...無上到普通話...
實在係太悶喇...搞到我下sem都唔知take 唔 take 埋過中班好tim...
d練習雖然對提升普通話既level有幫助....但實在係太過無聊喇...

由於走堂既關係...所以變相就可以訓耐少少...又多左成日既時間用...
本來打算盡快搞掂屍會篇文...但點搞都係冇心機做...寧願係到睇柯南或者行行企企都唔去做...
記得以前返暑期工有個同事講過,,,要用腦去做既野係最辛苦既...早知我都走去返果d唔使點用腦既朝9晚5 intern喇...靠自發去做既野效果始終係差d既...

結果..全日屍會篇野只係陏左少少...都係學呀林燕尼話0者...定一個死線俾自己...然後起死線前一日一野搞掂佢...咁仲有效率tim...

>>August 3, 2003 at 8:42:20 AM GMT+8

2003 年 7 月 29 日 星期二 【晴】

今日過得非常充實...成日都用哂黎玩...好疲...

起身無幾耐...到左十二點幾...魔力大丸就殺左上黎...而且仲一次比一次進步...

第一次...我去地鐵站帶佢上黎...
第二次...識得行黎我屋企樓下...等我用對講機開門俾佢...
第三次...直接殺上黎我屋企門口禁鐘...

咁終有一日...佢會唔使我開門都可以殺入我間屋...搞到我條命而家危在旦夕...^^

之後就殺出灣仔同gc游水...都好耐無去過魔你神山游水了...d設備好左好多...沖涼間有一個獨立既間隔俾你擺野..locker又有密碼鎖...最衰就係個大池俾d xx泳會霸左一半...搞到游得冇咁暢快...
不過而家真係fit過暑假開始時好多了...可以一口氣游3,4個塘...

游完水...例牌食tea...之後去左188行...d反蛋終於出返黎喇...不過我都冇買...只係去左d卡通vcd鋪買左幾套柯南黎睇...
記得買果陣仲特登問個老細...
e 幾套係0米劇場版黎?
個老細話: 梗係喇...全部都一集完冇爛尾嫁...
於是買左4套...點知返到屋企睇...得一套係劇場版...其他都係TV版(最新既)...
激死我...又唔係睇唔到...所以好難羅去退錢...tv版劇情較短...始終睇得無咁開心...
下次真係要小心留意至得...

之後去書店睇左陣書就去同d中學舊同學食飯...
歐劍華..肥虫等人已經成4...5年冇見了...
大食一輪之後行左陣...飲下野..返到屋企已經成十一點幾...

不過始終都係唔明點解佢地班人咁鐘意鋪機鋪...><...~v~


>>August 1, 2003 at 8:36:58 AM GMT+8

2003 年 7 月 27 日 星期日 【晴】

e兩日都係遊手好閒...個暑假開始愈放愈頹...
雖然唔想承認...但我發覺自己係浪費緊自己既時間...玩0米玩囉...仲咩一定要成日打機??要參與多d戶外活動先得...買左既書又完全唔想睇...文...更加係唔想打喇...

套最終兵器彼女睇左大半...開始愈睇愈有feel...記得對e套野產生興趣係因為係人地d討論成日有人用呢套野既wallpaper做logo...開頭仲以為個男主角係個女主角既阿爸tim...

呢幾日咁無聊...都應該會睇哂佢...再加埋有線既亂馬...都可以消磨唔少時間...

對未來愈來愈灰...都唔知第時可以做d咩野...做d無聊工又驚悶死...太有挑戰性又驚會精神緊張...
愈來愈覺得雖然我地生活緊既社會好多自由...但實際上就係咩自由都冇...俾人困係一個籠入面...按住社會既既定模式跟住咁走...做d連自己都唔知有咩野意義既工作...(例如程式管理...或者係data entering...又有邊幾個知道自己係做緊咩野0y...好似一部機械咁跟住人地既指示做之麻...)
真係愈諗愈無隱...相信一個人真係要到左死果日佢先可以得到真正既解放...從工作...從生活...從社會既異化之中得到自由...



>>July 28, 2003 at 7:09:51 PM GMT+8

2003 年 7 月 26 日 星期六 【晴】

唔經唔覺...個暑假就過左大半...都唔知自己係e個暑假做過d咩野有意義既事...
感覺上好似浪費左個暑假咁...(不過做野又縑悶...)

決定今日做下屍會個research...但愈做愈覺得好無謂...做香港既野...真係發揮既空間並唔太多...(雖然唔使找太多資料就有好多野可以寫...)
我個題目係高官問責制...已經寫好左3分1...不過愈寫就愈覺得冇心機...
我寫既野...根本就係人都知喇...其實篇野雖然只係打好左3分1...但感覺上同做完冇咩分別...
d內容已經印哂係我個腦度...根本連書都唔使睇...就已經寫到一大堆野出黎...日日睇報紙...睇副刊...睇埋d料仲充實個睇書...但篇野做黎做去都脫不出既有既框框...好似有d拾人牙慧既感覺...
鬧董建華???人人都鬧緊...可以鬧既已經俾人鬧哂...再打d鬧佢既野有咩意思?
記得year1做左篇評董建華治港表現既文...諗左好耐先打得果少少佢對香港既貢獻...而家篇高官問責制都係差唔多...黎黎去去都係話d官冇諮詢...冇問責...沙士...仙股...買車...全部都係人盡皆知...
令我愈來愈懷疑做篇野出黎...有咩野意義...@@@總之就係三幅皮...認真冇隱...

>>July 27, 2003 at 6:02:52 AM GMT+8

2003 年 7 月 25 日 星期五 【晴】

星期六...又係普通話時間...加上今日係話劇(實際上得6,7分鐘)同口試...令我更加唔想返...

人...真係有惰性...閒散得愈耐...就愈唔想做野...寧願日日都冇所事事...訓飽就食...食飽就訓...
所以d調查報告話取得太耐綜援或者失業太耐...會令人喪失工作能力...係一d都冇錯既...

雖然係測普通話..但昨日都係冇咩心機溫..求求其其就算...朝早再複習一次就去搏殺...
測之前再同joey 及一眾組員排話劇同練下普通話...joey真係好鬼勁...可以一一紏正我地發音既錯誤...
雖然練左好耐...但到我考果陣我仲係講到一pet野咁...講左出口就知自己d發音錯...
又口震震咁...都唔知點解會咁緊張...合格都還神囉...

好在...個話劇都係冇驚冇險...雖然我知我有唔少發音都發錯左(個腦知個音係點...但讀出黎硬係差少少...)希望下次做得更好...相對黎講...我d普通話已經有好大既進步...我唔期望d發音0岩哂...但希望學成之後起碼講出黎既野清楚同人地聽得明先...


>>July 27, 2003 at 5:51:57 AM GMT+8

2003 年 7 月 22 日 星期二 【晴】

今日訓到9:30就熱醒左...大佬冇啦啦係度執野...(佢本來搬走左..但因為一d意外...要返黎屋企避難...)又出又入...順手熄左我個冷氣...一熱醒就訓唔返...
於是順手幫屋企吸下塵...同打下屍會份reserach...真係冇咩心機做了...

搞到11:30...就眼訓到頂唔順..但貓丸12:30會踩上黎...只可以恰一陣...冇計...


12:40...貓丸殺到...佢已經識得自己上黎...唔使再落去接...真係叻...
貓丸一入門口...態度囂張...旁若無人...東張西望...明顯心中有鬼...
佢竟然取左隻珍珠雞出黎話請我食...必定係另有所圖...非奸即盜...

戰戰兢兢之下...先係冇任何損失之下送左佢離開...^^
不過之後又要出街...所以...一樣冇得訓...

去觀塘取野...點知遇上橫風橫雨...令我e個向來唔帶遮出街既人受到慘痛教訓...
取完野之後竟然行錯路(只係照來既果條路返去...)本來要行左...行錯左去右...
行左一陣就覺唔對路...唯有將錯就錯行去觀塘地鐵站答車返屋企...(本來係牛頭角既...)
行左一陣...竟然發覺自己行錯路去左海邊...就係咁係橫風橫雨之下被困左半個鐘...

回到家人沖過涼就大覺訓...
訓醒搞埋普通話d野就同王dull仔仔打機...真係頹廢...

一路打機一路播隻人工智能黎睇....有人話套野好悶...
不過我覺得好好睇...我最鐘意睇e類電影...睇睇下有d想咸既感覺...好感動...
真係值得一睇...俾4粒星佢...
個天才童星真係識做戲...睇佢個樣會覺得好有feel...
(睇左大部既時候...一齊打機既王dull仔仔突然音訊全冇...相信已經進入左昏迷狀態...真係擔心我地是但一個有朝一日會死係部電腦前面...)
睇完套野...打埋日記....
已經5點...恐怖...


>>July 23, 2003 at 8:57:45 PM GMT+8