2003 年 7 月 6 日 星期日 【晴】

耀目既陽光...微微帶點暖意的輕風...我就是在這樣的環境下...踏入了一個未知的國度...一個完全陌生的世界...與兩位漂亮的土著開展了一個既快樂又奇妙的出會...

落車...然之後就...食食食食食食食..........食左一大兜涼粉...以後真係見到涼粉都驚...
係食野既時候...聽女神講佢係校園好似連續劇咁樣既恩怨情仇...真係...人都顛...不過亦都好搞笑...
係超市周圍行既時候...竟然俾joey撞到佢既一個同鄉...見佢地傾得咁開心...我即時浮現出他鄉遇故知既感覺...

咁就冇離頭咁玩左4個鐘...
返歸既時候...唔知點解有d意興闌珊既感覺...亦感到一絲絲既失落同迷網...(亦可能由於太疲既關係...)

獲得物: 柯南劇場版...(正)...人工智能...
雞仔餅(勁硬..)同T- shirt 一件...

我不了解他...我更不了解自己到底在想什麼...
但願有一個神能夠指導我...帶領我...引領我走我要走的路...

過左幾日先打既後記...
唔記得買豆漿同影相呀!!!激死我!!!!


>>July 10, 2003 at 7:22:23 PM GMT+8

2003 年 7 月 4 日 星期五 【晴】

今日十分疲累, 便約左Terry, martin同阿東去大圍踏單，係e個炎熱地獄踩單車奮戰4小時。由大圍殺入大埔海濱公園，再回程返大圍...可以話係筋疲力竭...
單車技術仍然有待改善...只能夠係廣闊既單車徑上面一展所長...俾terry呢類無良既人迫一迫就即時炒車...真係可憐...
之後殺入觀塘食韓燒，洗左成80幾蚊,加加埋埋都用左成舊幾兩舊...不過玩足一日算係咁...

返歸已經成12點...成身散哂...

ps. 大姐話我肥返d會好少少...令我都覺得自己好似好瘦...
但東哥又話我d肌肉有d the...叫我keep 返 fit d...邊個講既先係0岩呢...
不過想肥我都冇辦法...已經食飽就訓...又成日座係度唔陏...都好似冇咩改變咁...個體形...奇怪...係0米已經多左個肚楠但係我未察覺呢...

>>July 8, 2003 at 4:17:30 AM GMT+8

2003 年 7 月 4 日 星期五 【晴】

係網上同gali講左3個笑話...結果...
Gali: 我要ignore 你一個月 !!!!!!!!

逗下佢開心0者...真係慘...

普通話愈來愈煩...冇咩心機練...太多韻母喇...
今日得到物品: 壽司一盒...(返屋企食哂之後令我飽到8點幾...)
建議加入卷蛋...

經常發生對身邊的事物過分樂觀的情況...
好像剛看到了像是通向城堡的道路...便會想到到達城堡的情況...
從沒有注意那條道路是不是真的能到達目的地...路上會有什麼困難等...
對這些不明朗的東西總是有一種莫明的恐懼...於是經常原地踏步...
雖然明白有些事情是須要走出第一步的...但卻常常擔憂叉錯腳怎麼辦???
唔...沒有辦法...



>>July 6, 2003 at 5:05:58 AM GMT+8

2003 年 7 月 3 日 星期四 【晴】

好充實既一日...(亦都係好疲既一日...)
一早(其實係兩點鐘...)返左屍會幫手...做左兩個幾鐘...

當係度幫人整緊襟章...剪剪貼貼既時候...
葉小姐(其中既一位研究員)同我講: 剪野最多用對眼同對手既0者...點解你個口要陏下陏下...眇嘴眇舌既...
我: 我做野向來好認真...要眼到...口到...先可以心到...
葉小姐: 唔....原來如此...

離開office返屋企抖左一輪又去赴中學舊同學之約...去到得唔夠十個人係度...之後一路等人...一路爭論去邊度食飯...咁就係個街市門口呆呆咁企左成9個字...

返到屋企...已經成12點...一上網...好友又有感情煩惱...一chat就chat左成3個鐘...
不過呢d野...局外人都好難俾到咩野實質既意見...不過有個人商量下應該有d幫助(不過講起上黎...我好少同人分享呢方面既煩惱呢...^^徹底既神秘主義^^)

對話當中...亦諗起我幾日前同sindy講既一句野(當然係網上喇...)
正確的東西並不一定得到所有人的認同...

正如我係一個超級天才(好似某同學既口頭蟬...)
不過認同既人並不多...而且少得可憐...
證明並不是每一個人可以看見真理的...




>>July 5, 2003 at 10:46:17 AM GMT+8

2003 年 7 月 1 日 星期二 【晴】

最頹廢既一日...
2點起身...上網巧遇王兜...打機5小時...
晚飯...閱報...10時上網...再遇王兜...打機7小時...

打機既時間仲多過訓覺...頹...
4點既時候...循例阿爸走出黎訓話一輪...見難以動搖我打機既意志...因而知難而退...

結果...第二日嚴重睡眠不足...(仲要返屍會睇左4個鐘資料...睇左百幾二百頁...元氣再次大傷...)
同日接下制作沙屎年表既工作...有排煩...@@@

>>July 5, 2003 at 10:26:49 AM GMT+8

2003 年 6 月 30 日 星期一 【晴】

宵夜時份終於兜左孝女所贈既炒粉黎食...味道都唔錯...可惜太少同太多沖...真係兩淡食哂...
幸好屋企儲備充足...整多鑵鑵頭湯加堆薯片就搞掂...

7月1日...
回歸以來史冇前例既50萬大軍係維園誓師出發既時候...
我同小剛去左九龍公園游水...個無能政府係e個時候推出埋d小恩小惠...泳池免費...
搞到個池人頭湧湧...好在九龍公園個池都幾大...令我同小剛都未至於敗興而返...
係泳池度浸左3個鐘...大部分時間都係係度曬太陽...傾計同玩...可以話係玩得非常開心...
而真正游水既時間其實唔多...今日最多游左5,6個堂(加加埋埋)...
不過同小剛係咁係d深水區域度嬉戲...真係一件十分吃力既事...游黎游去既同時...
亦令我覺得自己既體能比以前差了...游兩個堂就索哂氣...

生平第一次進入daily franc食野...$30....係幾好味...不過si 牙縫都唔夠...食左好似冇食...(3舊3文治...3分鐘唔使搞掂)...反而最頂肚既係杯檸茶...

返到屋企即刻開新聞...見到遊行既人群真係嚇左一跳...而且身邊既好多朋友都有參與遊行...
本來我都想參加e個反政府示威...不過佢既主題係反對23條...還政於民...
非常之9唔答8...23條同還政於民有咩關係???我唔多認同23條有咩問題...要反對既只係政府快速立法果d咁既小動作...同不聽民意既態度...如果換左個政府掂d...得市民信任...根本就冇人會反對23條e樣野...試問果日參與遊行既人...又有邊個睇過23條既內容同up得出d條文0y...
未睇左d新聞同聽左d人講一論之後未上街囉...如果個遊行主題係倒董既話(雖然遊行d人希望既亦都係e樣野,,,)相信個效果會好d...

無論如何...睇下董伯伯點收科同死唔認衰既態度都係一件樂事...(樂得黎亦非常悲哀...)


>>July 3, 2003 at 7:01:34 PM GMT+8

2003 年 6 月 29 日 星期日 【晴】

終於要開始做intern 果份 research (實際上就係做paper...)...又要打文...最麻煩係唔想諗...
有d咩野慘得過要係咁用腦呢...記得以前返summer job...個阿頭咁同我講過...
要用腦既工係最辛苦既...唔使用腦既工(好似派傳單...聽人地吩咐做野...入 data入電腦...)係最舒服既...
的確...用腦諗野令人好疲...

睇左本( 高官廢話公式寶鑑) ...本書內容好正...最重要既就係可以應用係日常生活之中...
特別係0岩一位成日遲到既李姓朋友用...

如果佢當日遲到半個鐘識 up e d 野.......

怒: 仲咩遲到?
李: e 次 遲到純屬為一個別事件...我唔會就e d 個別事件發表評論同講話...
怒: 你上次已經遲到嫁喇喎...
李: 以往既遲到並唔構成任何可供參考既先例...我每一次既遲到都是非常特殊的...
怒: 咁如果你下次再遲到我係0米可以打獲你?
李: 我唔會回答任何假設性既問題...只可以話...一切要視當時既具體情況而定...
怒: 咁你唔再遲到0米唔使煩囉...
李: 作為一個負責任既人...我係唔會為搏取一小部分人既掌聲而特登早d到既...你要明白...我無可能取悅所有人...
怒: 你又有道理喎...

如果當日佢識咁講...我就唔會嬲佢半年咁耐喇...(因為已經即時同佢絕左交...)

點解我地個政府d人講野咁廢...




>>June 30, 2003 at 8:52:54 AM GMT+8

2003 年 6 月 27 日 星期五 【晴】

嚇密隆科爾出事...令人心傷...
睇返賽事重播時...親眼睇到事發經過...即刻有d想咸既感覺...

返普通話...與孝女對話...會得到炒粉一盒...(+/- 200HP???)
上堂途中會發生俾人搣既事件...哇...好痛呀...即刻成隻手紅哂...
雖然如此...但仍改變唔到我成堂釣魚既事實...

百無聊賴...特然好想行街...
食埋晚飯...咁就唔見左成兩舊水...

獲得物...
最終兵器彼女入手...
肥佬教授1,2集...
同大量零食...@@@=_=

>>June 29, 2003 at 8:22:08 AM GMT+8

2003 年 6 月 26 日 星期四 【晴】

為什麼這麼貪吃篇

話說夜晚兩點食完宵夜...覺得個肚仲有唔少位剩...
於是諗緊黎唔黎都個ROUND2...選擇有:
1, 鑵頭湯
2, 未開既紫菜
3, 薯片

由於其時已經係兩點九...加上王dull仔仔話3點半收機既關係...(實際上又係打到4點幾...)
而且1 又須要煮..麻鬼煩...2又開左要日日係咁食...唔係d紫菜就會林左唔好味...3 又唔多想食...
係猶豫不決既時候...突然醒起好似有d奸妄妖邪勸過我唔好成日飽住肚訓...對身體唔多好...
於是我就諗住餓住肚咁訓都冇壞...點知就咁出事...@@@@

收機時間4點3...之後就睇左陣雜誌就上床zzzzz...果陣已經有d餓既感覺....
例牌典一輪先訓得著...但訓得並唔好...6點左右開始出現胃部不適...
6點半開始胃痛...頂唔順起身大飲大食...計有一包餅...一兜麥片..外加紫菜兩排...(終於開左)...
我阿爸起身仲以為我係度食緊早餐...佢一定估唔到我食完又會再訓...zzzzzzzz
食飽...個肚亦都隨之冇事...訓得非常舒服...

所以我食咁多野(不過下午極少...)...並非因為為食...而係確實有實際須要嫁...請某君0米再成日見我係咁食就對我眼超超...^^

今日係冇食午飯...空住肚既情況之下係屍會奴役左4個鐘...
亦都係我加盟屍會以來..為e個機構做左最多野既一日...
做野途中...zoey竟然話: 我地好似係庇護工場做緊野咁...睇返又真係幾似...(指做既工作...)

之後叫左我去送野...行左成個鐘...送完再行返返屋企...死亡狀態...回家時已經係6點...就食晚飯...
(多謝王兜仔仔教路...)

返家途中...無聊得滯..打左個電話俾孝女...
原本d天氣麻麻...已經唔多想游...(本來想改打壁球既...)
加上百行以孝為先...當然係話下次先喇...
真係唔緊要...莫忘情義...長存浩氣...來日他朝再游方未晚...

>>June 27, 2003 at 10:31:41 AM GMT+8

2003 年 6 月 25 日 星期三 【晴】

鬧鐘失靈...(其實係有人唔小心禁熄左)令我到左成兩點7先起身...
呢幾晚同某君通霄打機...令我精疲力竭...本來兩點7起身冇咩野大問題...
但慘在我3點鐘就要返屍會report我既工作進度...(大部分野都係取返屋企做嫁...)於是取左包馬仔同孝女所贈既花茶就衝出門口...

剛剛訓醒...野又只係食左少少...又冇準備...令我疾口疾舌...
人地講得頭頭是道...我唔係唔出聲就係廢話連篇...令我更加覺得自己係悶棍一名...
有時同朋友一齊都係咁...有時候多多野講...口若懸河...有時候又成舊木咁...0節都唔出句聲...

特別係對住d唔算太熟或者剛剛識既朋友...有冇共同話題就最緊要...

計落我識既同感興趣既只有幾樣....
1, 足球...
2, 時事...
3, 歷史...(可惜對歷史有認識而又感興趣既人唔多)
4, 打機...
5, 卡通...漫畫...小說...

見到d對5樣都冇興趣既人...心情好既時候就唯有虛與委蛇...廢話連篇...唔係就座埋一邊ei都唔ei..
特別係對住d高尚情操...就更加要係投其所好...亂up廿四亂咁吹...埋沒良心唔怕隊...
不過都係果句...友誼始終係建立係時間之上...識耐左就你知我程度...我知你深淺...慢慢就唔熟都變熟了...

夜晚執房...得垃圾數噸...其他發現物件包括...
1, 一直都搵唔到既糧單...
2, 一大堆city bank既宣傳郵件...
3, 未開過既信件數封...最久遠既一封可以追溯到2001年...
4, 數十本90年代既遊戲雜誌...
5, 兵器一堆...(作用不明...)


>>June 27, 2003 at 5:00:29 AM GMT+8