2004 年 6 月 6 日 星期日 【陰】

再一次唔知醒，唔知第多次又開始亂。
出o左中化oral考試時間表喇，大考前o個日尾二考，6B考o左，o的題目好難講喎！Summerize藝術精神，比較趙永新、唐君毅o既分別，o個o的咁樣唔算分別嘛？
完全唔記得要做DBQ添，掛住做中史喳。Miss Leung再次超好人咁俾一堂我做，都做o左三題呀，DBQ速度唔錯，睇o黎又可以騰多o的時寫essay喇。繼續堅持唔聽Miss Leung講，堅持靠自己。
為下年o既financial mgt準備，今日同Billy開始PA速成班，應該係BB班程度o既trading and profit and loss account聽兩聽就明，都係學擺位o者，入門班總算捱過o左，要追上其他人，唯有加操。
又話唔講咁多，5 + 1又講足一堂，其實佢知唔知佢讀錯o左老懵董個名？UE又係考試前加操，做埋最後o個次practical skills，後日交？？？？呢個時候先o黎delegation，話我in power，其實即係有人想遲o的先交就代表佢o地俾5 + 1照肺，搵著我o黎搞，最後一次o者，乖乖地快手o的啦。
又冇出去食，又趕走o左人添，sorry囉。荷蘭對愛爾蘭，愛爾蘭國歌唔似英文？荷蘭又o黎星期美點式排陣？艾禾卡特執迷不悟咁用古華特 + 雲尼斯達萊 + 雲達華治，攻勢雜亂無章，愛爾蘭屯重兵o係中路，荷蘭完全老鼠拉龜，一係o係外圍不停咁搓，一係意圖o係中路推進就斷纜。反而愛爾蘭由羅比堅尼發動快速反擊，食住史譚 + 法蘭迪保亞呢對蝸牛中堅，而且戴維斯 + 高古冇好好o係中場做屏障，幾次差o的送波入網。上半場未打完，播住咁多先，其實我係一直趕緊DBQ，勁潦草，言之有物o架。
Tip中史DBQ題目，Lim Sir死都唔肯講，o個o的唔算提示嘛？抄o野抄到手軟，元 + 明，似乎中國自從唐代之後就冇再強大過，多得趙匡胤、朱元璋o既私心，其實呢o的中國人o既文化係咪先係中國文化？
唔好擺人o係6A留堂啦，好彩最後佢o地唔生性，被安置o係prefect room，放肆喇，繼續荷蘭對愛爾蘭。返更衣室前，荷蘭典型o既失波，o係前面圍攻唔成俾人青返轉頭，羅比堅尼快放，超靚o既三打三快攻走位，羅比堅尼離門30碼收死雲達沙。下半場一開波艾禾卡特終於醒覺，換走古華特，不過佢連上半場算係打得最生o既史尼達都收起埋。仍然係得個攻字，一o的都唔入肉，基雲都冇乜邊次真正受考驗。如果我係艾禾卡特，我一定會叫施多夫即刻返屋企，唔帶佢去葡萄牙，寧願，少個人調動，佢憑乜o野話非進攻中場不打？o係A米都唔係呢個位啦，打打下無啦啦坐落後備席，連少少體育精神都冇。馬卡爾入埋o黎，荷蘭始終久攻不下，打到77分鐘，走人先啦。呢場o既局勢解釋到點解我唔睇好荷蘭o係D組出到線，雖然德國o既狀態都唔好得去邊，但係至少德國有隊型，荷蘭冇。荷蘭次次o既陣容都唔同，靠雲達華治打天才波？單箭頭先係最適合荷蘭o既踢法，古華特根本同雲尼唔夾，改用辛頓o係左邊發難仲好。咁o既冇章法o既進攻，一定過唔到德國；防線冇速度，捷克o既快攻出哂名，隨時又死兔鑊。本來死亡之組o既戰情應該會好激烈，不過荷蘭出線o既機會相當唔樂觀。

Re Pang:你幸福啦，最精彩o既D組冇得睇喇。其實o個句唔算歌詞只係對白，任何三個字o既球員名都得，同沙加度差唔多o既球員………加利仔。

>>June 7, 2004 at 3:20:33 PM GMT+8

2004 年 6 月 5 日 星期六 【乍寒還暖】

個個星期日都去嘉豪飲茶，貪佢又就腳又多o野食服務又好，但係今日就實在太失望。13:10有位坐，劃點心紙，幾款o者，部長親手幫我o地落單。等等等，等o左半粒鐘有多一樣都未到，我諗住返屋企換錄影帶再上去應該有得食，錯，距離落單45分鐘，仲係得個等字，爸爸問經理發生咩事，佢check完之後竟然話冇record！唉，冇計，決定幫襯唔再等，全部cancel，改叫o的現成o野算，泰式肥牛河 + 干燒伊麵 + 煎腸粉，$57埋單。原來唔止我o地呢檯，對面檯三代同堂都應該等o左好耐，個爸爸最後又係嗌cancel走人，有火。幫襯$57坐成粒鐘有多，你蝕底o的定我蝕底o的？唔止，等腸粉o個陣企隔離o既師奶，話大排檔阿姐點解唔拎o野去佢個位，兩個女人一輪舌戰，顧客永遠是對的，搵埋經理撐場，阿姐當面俾人插：「點可以咁對o的客？佢話你話佢『X街』喎！」「邊有『X街』？」之後係X來X去，其實我可以作證，阿姐的確冇講o個兩隻字，不過佢o既態度的確需要，不過呢種溝通對公司運作有冇好處？
成日o係有線聽到Cable歐洲國家盃主題曲，終於搵到完整o既成首滴汗歌詞：

大件事　嘩　大大大件事　尼維特　費高　施丹　都會話大件事
比腳法鬥志　爭霸四季一次　個個清楚今屆Euro實情大件事

史高斯　韋拉　軒索斯　上環旺角o既Henry　James都舉起腳趾
將軍澳魯爾　北角o既馬卡爾　著起波衫表態Euro直頭大件事

我要睇費高　Hu Ha Hu　我要睇沙加度(小弟按：冇得你睇)　Hu Ha Hu　我要睇迪比亞路　Hu Ha Hu
一齊訓身EURO樂與怒　有乜o野比起睇Euro會更大件事

Sales阿詩與山吹老師　連留下賣報紙都搏命昅實電視
不理有無落雨　都會腳腳七注　有乜o野比起睇Euro會更大件事

Let's Go睇睇李沙拉素　Mark人有無又拉又掃
格仔軍o既比素　會唔會猛咁改寫比數
雲尼當對住簡尼　會慢慢o黎　定夾硬o黎
當地天氣同比賽場地　對史高拉利又幾有利

意大利戰士咪再做老二　西班牙鬥牛士靠晒魯爾
簡拿高普路斯點砌俄羅斯　瑞士又點樣射占士
喂　睇施治　咪自私　約埋朋友睇呀　仲正o的
ABCD邊組好o的　睇晒所有賽事就自然知　哈

波士要知　打工仔都要知　全力訓身EURO不必開OT
祇要你願意　跟我叫喊一次
有乜o野比起睇Euro會更大件事　有乜o野比起睇Euro會更大件事

P.S.可能有風打喇～

>>June 6, 2004 at 12:37:32 PM GMT+8

2004 年 6 月 4 日 星期五 【酷熱】

o尋日放學有o的精彩o既內容唔記得講：話說o係MTR門口俾人截住，係巨扒一塊，佢初時係問我唱錢，要$20，我話冇散紙(真o架)。之後佢話大餅都唔緊要，開始起疑心，事實上亦真係冇，最後佢竟然話「咁借$20都好啦」。借？唔係唱o架？「我冇錢呀，要去上水但係冇錢搭車」，知佢想點啦：「我又唔識你，大拿拿$20唔亂借o架，你點還俾我o者？」佢非常無奈咁算數，心裡面佢可能已經X完我一鑊又一鑊。你想呃我水都諗個好o的o既理由引我上釣o丫，聽過爸爸講過N咁多「借錢招數」，甚麼江湖救急、o岩o岩放監、$1都好，對我o黎講全部唔係新聞，我又會肯上《警訊》打格仔做詐欺案受害人訪問啦？
心血來潮，學某人tidy up哂治亂史o既notes，當然冇某人咁美觀，至少systematic咁排好唔同朝代啦。呢個算係考試o既準備功夫，不過………其實我根本完全未開始prepare考試，一科都冇。好好好好好好失望呀～
今日係彤彤表妹5歲生日，入西貢菠蘿輋佢屋企開mini-party，我差唔多17:30先出門口。又係漫漫長路，先係MTR去鑽石山，身邊兩個中年佬講入煮經，講o既係法國菜；再轉92，等o左20分鐘先有車，好迫，去到匡湖居又開始塞車，o係人山人海o既西貢join表弟，o係佢口中聽到最新o既listening task 1答案，再搭綠van上菠蘿輋，然後………行7分鐘上到o個度。o黎過差不多7年啦，樓下隻狗總係唔認我我o地呢group人，次次都吠死我o地。
所謂party其實都不過係大食會，蛋糕 + 自製天婦羅 + 薑蔥炒蟹 + 沙律 + 三文魚刺身 + pizza + 壽司，九大一細使唔使又整又買咁多？個蛋糕兩磅幾重，好得意，自製天婦都係唔好要求咁高。食到好飽，之後拆生日禮物，媽媽送o左套公仔衫俾佢，彤彤堅持要試著，根本唔o岩身，個look超搞笑，不提也罷。
Hea到好夜，差唔多23:00先走，又係坐姨丈架車出西貢，然後例牌o既92 + 6D返屋企，咁夜o既92都多人到要企位，好多身位王。返到屋企，發覺自己校錯台，錄唔到英格蘭對冰島，錄唔到live可以錄重播，好彩冇買英格蘭讓和。

2004年Eric好歌流行榜(第23週)：
1)世上只有(容祖兒)
2)大方(方力申)
3)丟架(Twins)
4)繼續微笑(許冠傑 & Sam's Angels)
5)大雄(古巨基)
6)六呎風雲(李克勤)
7)心照(鄭伊健)
8)給朋友(張學友)
9)我在存在(黃貫中)new
10)常言道(劉德華)new

>>June 5, 2004 at 5:47:58 PM GMT+8

2004 年 6 月 3 日 星期四 【清涼】

「六四事件」15週年紀念日，今晚o係維園o既燭光晚會我冇去(下年考完AL我一定去，仲會搵多o的人去)，但係冇人可以否定我對「六四」o既懷緬。我唔係82000人o既一分子，不過我同82000人有著相同o既一夥心，一夥拒絕忘記歷史，堅持尋求真相o既心。就算我個人o既力量好有限，我都好應該為中國o既民主出一分力，雖則我都唔太知我可以貢獻到o的乜，可能就係咁一直叫人唔好忘記歷史，又或者支持支聯會繼續提醒香港人唔好忘記呢件慘劇。
強權永遠冇辦法戰勝真理，共產黨可以出動坦克車同軍隊血洗天安門，不過就絕對冇可能踩熄千千萬萬中國人民主夢o既火炬。近10年內地經濟總算有顯著o既進步，共產黨o係政治上連少少o既開放都冇，異見人士被扣押，民運人士唔可以返中國，堅持唔埋共產黨堆o既香港政治家亦唔可以踏足內地半步。共產黨o既字典冇「民主」兩個字，所以佢將香港07/08雙普選o既大門強行閂埋；共產黨眼中只容許有佢o既聲音存在，為o左令香港變成「一言堂」，佢私底下逐步蠶食香港o既言論自由。
可能我呢o的係偏激，不過事實上共產黨一日仲統治中國，一日仲騎o係中國人民o既頭上，德先生都冇辦法降臨中華大地；只有結束一黨專政，引入多黨政治，百花齊放之下，中國民主先有希望………呢個亦係千萬中國人o既希望。任共產黨再打壓自由，呢股力量呢種潮流係冇辦法阻擋。

一開始就好唔順利………
呢幾朝都係我第一個返課室，o係冇人o既環境之下，不其然超好唱口。
Triple Buss繼續04題目present，唔知點解課室突然出現o左一大群蟻，o的書包全部擺哂上檯，再全班移離重災，最後校工o既處理方法………好兒戲o者，佢o地事後會唔會噴殺蟲水？到我同陳江present喇，唔記得寫intro之餘，原來我o的point有唔少謬誤，瘀皮添，字眼問題，不過難得有正宗Buss題做，學到少少o既。中史DBQ仲未清，打鐘都做唔哂，今日唔交住喇。
History先o黎悶爆o既present，我o地都唔知自己講緊乜。之後o個組笑爆，用ICQ language寫信，Polly語氣恰到好處，不過………好似冇乜邊個笑到好似我咁離譜，或者我容易不受控制咁笑o掛。
好彩有帶文化書，今日o既中化………似中史多o的，學術思想 + 宗教 + 史學名著，悶到唔知自己諗緊乜。研究龜o既飲食習慣同佢重磅o既關係，老實佢食得好似仲健康過我囉，我呢o的話食就食，話知乜o野均衡飲食，可能呢o的係天生o既體格問題，不過唔緊要啦，肥但係有人鍾意咪得囉，可？
繼續o係課室食，唔食杯麵，改食珍珠雞，原來係咁細隻。播巴西對阿根廷，唔好意思，嘈住人添，巴西擺怪陣，一個防中都唔打，要艾美臣推上中場做攔截；阿根廷都係怪陣，艾馬、沙維奧拿竟然打後備。陳江返得切o黎，收o左身o既朗拿度威力無比，一個扭幾件阿根廷後衛博到十二碼，親自操刀入埋，冇o左艾耶拉o既阿根廷後防一o的都唔穩。堂堂兩隊南美雄獅走去玩長傳，加卡配著10號多o的囉，法比安奴冇料到，阿祖安奴冇機會屈直線盤球，戰術上薛羅拔圖根本可以擺埋一邊；阿根廷條中場線唔夠卡士，又要靠蘇連、辛尼迪兩閘推上o黎，基斯普完全冇態，上半場基本上係悶戰一場，所以中途要去Conference Room做無聊問卷都費事停機，打鐘o岩o岩好上半場打完。
隔o左成個月，之前連續三次冇得上，終於有PE上喇。馮景昕返o黎陪上堂，吳sir又o黎，講多一分鐘………幾倍，佢o個o的簡直係謬誤之中o既謬誤，唔係趕踢波，我一定同佢當面對質。餓波餓o左成個月，心中o既一團火已經接近爆發o既邊緣，放馬過o黎！以為有o左T朗拿度實力會大增，點知反效果，前面太多人，組織仲亂過以前，攻勢幾乎癱瘓，次次都o係人o地三閘線斷纜；相反呢邊以牛榮、Judy、陳從願組成o既防線無論默契同意識都俾人食死，舒利亞o係左路幾次主導進攻，龍、陳梓豪o係中路插入，好危險。我太耐冇打，火都大把，狀態就唔夠，隻腳唔生性，放唔到長炮，策動唔到乜o野反擊；又有幾o野冇膽出迎，差o的累事，好彩對面o既腳風都唔好得去邊，波子機攻勢，連環攻門多得牛榮背脊護空。肥峰o係中場掃蕩唔錯，不過釗又同佢重疊，我o地好多位置都重疊，無從發揮，相反對面單靠分工走位已經好有威脅，次次走到入盲眼位，好彩o的直線全部幸保不失。T朗拿度打打下又老抽抬出場，突破力同組織力好似削弱o左，但係反而發揮到平時o既戰術。穩守突擊果然奏效，挺食哂身位快放落底地波傳中，肥峰最簡單亦最難做到o既門前撞射，佢以前好似未入過波o架，阿祖安奴！可惜，佢o既努力冇幾耐就俾我糟蹋o左，舒利亞o係右路推過Judy，怕佢cut入禁區，即時叫牛榮埋去擋，點知睇漏o左龍其實早已經o係禁區頂等波到。舒利亞橫傳，面對殺緊埋o黎o既龍我竟然諗住o係佢未到之前博剷得走個波，結果踢空氣，佢再扣大位，空門，又係我判斷錯誤累事，本來贏到o架，我今日o既表現簡直………唉。完全感受到其他人一定打得好辛苦，我齋企o係太陽已經曬到變乾蒸燒賣，辛苦哂，個個都勞苦功高，只係我o既老問題。返入學校換衫，更衣室o的限制級笑話，唔好俾我o係信和見到你，奧斯卡最佳音響效果。
要入hall聽唔知甚麼校園欺凌talk，悶到同Judy齊齊搵周公，扯人頭髮已經有機會終身監禁，個講者o的oral呆到傻o左，再好o既point都俾佢糟蹋哂。
放學繼續開波，竟然冇上半場精華。下半場其實都唔係太精彩，睇o黎睇去都係大哨o的腳下功夫，兩次施丹式轉身後腳橫傳；一個扭三個殺入禁區又俾人踢跌，又一針見血。美馬、沙維奧拿咁遲先入都做唔到o的乜，明明巴西o既洛基祖利亞打得出「一貫」o既水準，阿根廷o的人腳風「順」到………多得個樣似足乞衣o既蘇連先破到蛋。朗拿度順開就有個勢，又一次快攻，又o係禁區趴低，又吹十二碼………不過大哨似係插水多o的喎，卡華拿路好無辜。一場博到三個十二碼，三球都自己射入埋，紅運當頭，阿根廷都要認命。都話大哨keep fit就天下無敵o架啦，以前佢帶住個大肚腩落球場可以西甲神射手，依家一冇哂o的脂肪，世界上根本冇人阻得住佢。一日有朗拿度，似乎阿祖安奴就冇立足之地，真係可惜，只怪自己係巴西人。曼聯唔係真係600萬o係聖日耳門買o左軒斯嘛？睇過呢場波，佢好平平無奇喳喎！

P.S.呢班老鬼，唱乜叉《明年今日》民歌版？唱到唔知乜o野死款，影衰哂！

>>June 4, 2004 at 3:33:01 PM GMT+8

2004 年 6 月 2 日 星期三 【酷熱】

好彩一眼關七，又走o左位，有o的失敗添。
以中學生聯盟做封面o既young post，又有邊個會認真睇右下角o個段o野？
History睇o野睇得好辛苦，要「咢」高個頭，Perry超似黃秋生呀，我o既一大無聊發現！分組玩o野，睇即興role play，扮美國人日本人雞同鴨講，Mina扮驚七情上面得o黎，笑到趴地！
History就相當過癮，之後o既Triple UE精彩咯！即時打回原形，5 + 1狂風掃落葉式長篇大論，釣魚釣到飛沙劈石，佢講過o的乜？如果唔係佢叫我拎practical skills返o黎，我會繼續釣落去！之後醒哂，唔再搵周公，知佢講乜喇，講佢就易，咁好聽你試下做唔做到o丫笨。呢排最難捱o既UE糊里糊塗咁撐住喇。
又錄波，o尋晚瑞士對德國，又o係課室睇。飛o左頭30分鐘，德國o既陣容比兩年前世界盃有o左一定程度o既變動，改打4-4-2陣式，不過其實德國球員咁有紀律性，打3-5-2可能會發揮到大o的威力囉，反正拿姆同費達歷治都好似成日推得好前。德國o既箭頭幾乎已經外援化哂，古蘭爾的確唔似德國人，波歷克又的確未夠態，簡尼肥o左成個碼，表面唔多似一隊有能力爭標o既球隊。打鐘，睇o左69分鐘，又係放學繼續，都話我呢o的叫「善(擅？)用課室資源」咯！
音樂係教化o既手段，咁孔子會唔會贊成人o地聽《真的愛你》？道家崇尚自然，咁《青草地溪水旁》囉。
果然飛得好快，南宋都搞掂埋，又係抄到手軟，原來我搞錯o左人o地o既立場，差勁添。元朝點滅亡我早已經耳熟能詳，我反而想知橫跨歐亞o既蒙古大帝國係點樣瓦解，好似精彩得多。
放學繼續瑞士對德國，最後20分鐘，原來連德國成隊都o岩，包括簡尼，都好濫喎。其實瑞士我只係識哈根耶堅、卓佩沙、禾基同軒索斯，蘇巴貝拿好似冇再入選，實力唔及德國，不過鬥心唔錯；德國亦好明顯唔o係最佳狀態波都打唔到入去，波歷克好似冇影咁，高路斯又冇乜料到，係古蘭爾觸覺夠強，拿姆助攻力都好強，，只係簡尼係球隊o既計時炸彈，禾拉要諗諗計喇。雖然德國好似一無是處，但係經濟兩年前o既世界盃，我唔敢再睇低德國。捷克固然狀態顛峰，不過後防有隱憂，而且德國專恰東歐球隊；荷蘭有人腳冇隊型，德國人腳老實講還OK，最重要係有隊型，格食格之下我信德國入八強o架。
明日預告：無話可說o既巴西對阿根廷

>>June 3, 2004 at 3:28:35 PM GMT+8

2004 年 6 月 1 日 星期二 【酷熱】

不幸言中，letter冇我份，我o既如意算盤打得響o既機會接近零喇。
全日都好順利呀，竟然完全唔使搵周公，日日都係咁就好喇。
相當成功，因為已經完全記唔起5 + 1搞邊科，太幸福喇，非常成功咁選擇性失聰。
中化oral考試時間表出o左喇，我o既對手/隊友，牛榮、豬紅、大頭、林燕虹，好似幾得喎，不過其實o岩topic先係關鍵中o既關鍵，唔係再好似上學期o個o的唔知點o既題目喇。
先對DBQ，我堅持唔睇marking scheme憑自己o既能力清哂成份先慢慢睇………講得超好聽，其實即係未做完。之後派Russia份測驗，Miss Leung漏o左我o個份o係樓下，麻麻地添，得19分，冇分aspect寫，而且narrative唔會cred到，死啦，就考試喇，覺得自己好似仲停留o係F.5程度囉。
Triple Buss開始2004題目o既presentation，唔知點解今日好有興緻抄哂兩題o的point，抄抄抄，又好似真係get到少少喎，o的字太細隻，要坐前o的抄。最後o個堂又係例牌自由時間，清哂四版半History DBQ，又開o左少少中史DBQ，好深呀。
o尋晚打o左場英格蘭對日本o既國際友誼賽，錄起o左，拎餅返學校睇，善用課室資源嘛！好彩蘇金保打得，求神拜佛，佢同泰利o係決賽週唔好有乜病痛，如果唔係英格蘭就係咁先。三番四次咁話朗尼絕對唔係奧雲o既最佳拍檔，又唔明點解艾歷臣死都唔肯用比亞堤，朗尼同奧雲根本就各有各踢，完全冇組織可言。鑽石型中場線o既發揮唔錯，謝拉特偏左，林柏特打類似派路o既位置，兩次差o的後上攻門成功。奧雲腳風的確唔順，猶崎正剛擋謝拉特o個球彈琵琶，執雞都執得符碌過人。自稱係利物浦孖寶o既老婆返o黎喇，倒帶再睇個入球，謝拉特戴綠帽添，原來林柏特都o岩。英格蘭o既攻力真係好有問題囉，日本防守唔算好硬淨，居然入唔到禁區，都話朗尼幫唔到奧雲o架啦，而且奧雲本身根本冇態。打到上半場38分鐘就青鐘，放學再播啦。
今次到林敏去考oral，兩三日之內就完o左北宋，熙寧變法我係唔會點睇o架，南宋係我CE年代主攻topic，打算繼續攻多o的，反正寫o黎寫去都係o個o9o野，單靠吹水就有機會食糊，又要抄史家之言喇。
派實用文，比起其他人原來我已經相當之好，十年難遇囉，不過我考試係唔會寫會議紀錄o架。睇power point睇到暈咁滯，又派陳雲o的notes，都唔會睇o架啦。
放學繼續英格蘭對日本，唔止謝拉特，唔止林柏特，連古莊臣都唔放過………下個係咪哈索賓基？日本下半場一次攻勢中村俊輔 + 三都主 + 小野伸二o既超簡單組織就收死占士，冇o左李奧費迪南，後防真伙唔夠深度囉，泰利始終同蘇金保太相似，咁點解又唔選厄遜？英格蘭o既中後場問題唔大，但係進攻火力嚴重不足囉，牛榮甚至話比亞堤 + 華素爾威力可能更大，總之就唔要朗尼啦。場波最後1比1完場，英格蘭基本上有威脅o既埋門唔算多，奧雲有波唔交自己扭埋死位，唔通真係單靠四大炮台o係外圍攻咩？理論上英格蘭o係B組應該可以同法國一齊出線，不過我真係有o的擔心克羅地亞偷雞成功囉，好似上屆o既羅馬尼亞咁。播完帶，差唔多16:30，都係唔好阻住人o地二人世界啦，返屋企慢慢頹廢！

>>June 2, 2004 at 2:47:56 PM GMT+8

2004 年 5 月 31 日 星期一 【酷熱】

少o左o的o野o既？？？？？？幾得喎～～～～～～～～
一入課室又抄o野，我都唔知自己寫乜，o的潦到自己都睇唔到。落樓morning assembly，吳sir即席清唱《義勇軍進行曲》，佢應該學多o的國語先。小妹一連講o左兩個笑話，我係真心讚debate team o架，勁appreciate佢o地辯論o既能力，令人心服口服！今日咁o既天氣唔開冷氣好高難度喎，陷息唔開，冇人唔開就話尚可以o者。
我要澄清我真係冇事先睇完notes先答Lim Sir問題o架，我真係有自己o既意見嘛。快都快唔o黎，既然求其教下就唔使我o地抄其他wording啦，叫得我o地攻秦漢隋唐，宋元明清呢o的我o地知道下咪得囉。
原來Step早排又寫過關於言論自由o既letter，早知我o尋晚唔寫呢個topic啦，好彩我o既focus同佢有少少分別，如果唔係就會完完全全被比下去。又度日如年，"something terrible"係5 + 1對樓o個塊板o既定性。
Miss Fung唔記得今日繼續練oral，今次我比較擅長(比起其他種類)o既評論，俾人推出去講，題目係「不在乎天長地久，只在乎曾經擁有」，我唔認同，用埋馬勒當拿做例子，Miss Fung話有進步添，又俾人話有所感觸添，但係我冇眼泛淚光喎。
龜、李綺蘭早退考oral，History接近同將軍講bye bye，Miss Leung有少少味喎，唔好抹黑我喎。呢課我唔會理o架喇，好彩Miss Leung唔係點留意到我，下堂講external forces就會聽，呢瓣先係最重要。
單堂Buss搞case study，做得勁少，又抄書又諗point有o的麻煩添，都係放棄啦。
放學同Billy幫sth terrible封膠袋，好多人圍觀，其他唔覺得係乜o野一回事囉，貼親出o黎o的相都係o個o的。做完返課室，Judy都係今日考oral，拉埋我、Vincent、肥峰，玩discussion，肥峰扮廢人，俾哂位Judy練好o的intro，其實唔緊張就得o架喇………講就易，我都好緊張。

Re Cafu:你o地考完我都未開始考，太幸福喇，可以睇哂成個歐洲國家盃。

>>June 1, 2004 at 3:30:01 PM GMT+8

2004 年 5 月 30 日 星期日 【酷熱】

o係七仔買進攻足球，過o左$20，有歐洲國家盃咭咭送，第一次抽，即刻抽到英格蘭！
返到課室即刻抄o野，inversion好多o野寫，好彩其他o個o的早就做好。點名，睇緊進攻足球o個陣Miss Yu突然衝o左入o黎仲要係搵Step，當堂收唔收唔切。
History又效法中史，以後都o係7A上，Miss Leung超好人，俾時間o的人做功課，有時傾DBQ，兩日後又要交喇。
對system，回復正常喇，我根本冇可能好似上次咁高分。5 + 1播歌，默歌詞，《Sometime When We Touch》，頭一兩句似古巨基，之後似B哥哥，掛住聽唔識寫，好彩總算準過O'neal射罰球。既然5 + 1冇話要收practical skills，咁即係唔使啦，早知全人類唔使咁趕頭趕命。
Recess + 空堂都係咁睇進攻足球，有段o野好搞笑，講115年前o係英格蘭頂級聯賽全季不敗o既普雷斯頓，當年o既領隊採用防守性o既打法………將前鋒數量由六個減少至五個。Tip中史題目，俾人話似刨馬，此言差矣，我唔係刨馬，我只係刨波！
Billy唔記得拎影印notes，焗住Lim Sir兩堂講一份o野，掛住睇其他o野好彩細topic兼自己真係明。
明明唔係莫財，又走去食杯麵，為乜呢？其實下次就算o係學校食都可以轉口味試珍珠雞o者。
Buss要做case study，超慢之餘連題目都解錯。懷疑hedging算唔算financial使唔使做埋，李sir話要，我同Billy落library搵書，竟然一本有少少關於呢瓣o既書都冇。
中化睇詩睇畫，畫中有詩，其實《念奴嬌》o的詞係咪錯o左？
放學代鍾雋明ADT當值，我、挺、思穎三個俾Brian問Chem問到口啞啞，好彩釗及時趕到。子建上埋o黎，feel到有o的F.3歧緊佢，一於好少理。消費者權益呢o的Buss範疇都係我出馬啦，扮下識都好o架。今日幫人on，星期三想點就點喇，o個日唔知點解好悶o架！
落到6A，幾乎全部走哂，某人比某人早走，未打鐘6A就清哂場。再陪子建入七仔，佢又再夠$20，又有咭咭，今次係意大利！四大勁旅已經o係我手上喇：法國 + 意大利 + 英格蘭 + 捷克！
我100%肯定荃官debate team係一流中o既一流，原來o尋日校際debate，「普選會導致高福利主義」，咁白痴、咁無稽、咁荒天下之大謬o既題目，荃官竟然可以憑正方打贏，歪理都可以變道理，可想而知佢o地死都拗得返生o既能力有幾強，荃官debate team厲害！一於搞多幾次，辯題可以係「香港有人搞港獨」、「曾憲梓係愛國大英雄」或者「六四冇死過人」，荃官全部以正方出戰，再顯死都拗返生o既本領，show俾人睇debate有幾勁！

Re REAL:我6月16開始考，唔計oral九日內考哂，冇得睇歐洲國家盃初賽添。

P.S.今晚TVB《無名天使》有個極大o既謬誤～

>>May 31, 2004 at 3:03:09 PM GMT+8

2004 年 5 月 29 日 星期六 【晴】

好想韋斯咸重返英超添，反正水晶宮o的o的高Q大棍上到o黎又係膽班穩膽！
鍾偉民：「………能愛，能愛得夠多，夠投入，夠沉迷………就是福份。」
好想去維園參加「平反六四，還政於民」遊行o架，上年都有去，只可惜我o尋日失o左預算，完全冇做功課，搞到今日要趕工(不過值得o既)。共產黨最怕o既係民意，當年血洗天安門，諗住穩定壓倒一切，所有爭取為六四死難者討回公道o既人都受到迫害，丁子霖最近就俾北京當局軟禁連懷念死去o既仔仔都唔得。一黨專政極權統治之下，黨包攬絕對權力，控制一切，人民o既政治權利、言論自由當然唔例外，操縱傳媒、箝制思想係慣性技倆，香港已經俾o左佢o地，佢o地當然唔會放過香港，「一報一刊兩把咀」被定性為特區唔可以管治香港o既罪魁禍首，其實呢o的係莫須有o者，陶傑今日o個篇《星期天休息》名為《飛哥無意中捅了一個馬蜂窩》，一語道破特區政府o既所謂「行政主導」點解會咁失敗：
李鵬飛「封咪」，還指出行政會議內「至少有五個人在做特首夢」，這句話揭露了特區政府建立強勢「行政主導」之不可能。
「行政主導」的失敗，不因為傳媒「失控」，也不因為民主派「作亂」，而正因為兩任「行政會議」之鬆潰不成軍。強勢的行政主導，要靠一個強勢的行政會議。如果行政會議有五個人在做「特首夢」，則董建華的「高官問責制」就多了五個明哲保身的「精神逃兵」，所謂行政會議，實際上已經損兵折將地少了五人。
做特首夢，想成為下一屆的領袖，權慾是人之常情，本來沒有錯。如果特區的體制合理，做特首夢的五人反而可以在各自的職權中秉正為公，力求表現，贏取民意的愛戴認同。
英國首相貝理雅民望大跌，全英國的民眾都知道現任財相白高敦很想繼位當首相。當工黨政府繼續為布殊的美國牽累，當反對黨的勢力漸高，白高敦任內治理經濟成績良好，工黨內部自然會在適當時替換首相，貝理雅下台，由財相接任，犧牲一個黨魁，換取工黨執政權力的繼續生存。
但特區政府偏偏不是一個以民意為基礎的民選政府。現職的司局級高官，全由不經民選的董建華一人欽點。特區已經成立七年，瞎子也看得出特首的高職由中國政府來確定。殖民地時代，總督雖由英國委派，行政局議員無論做甚麼夢，無人敢夢想自己能當港督。無慾無求，心無雜念，加上港督和英裔官員的決策能力有深厚的知識和殖民地經驗為基礎，從前的香港，行政主導一點問題也沒有。其中道理，又豈是親中派一味跺腳搥胸地怒責「為甚麼香港人在英治時期不敢向英國人要這要那」的情緒和意氣所能了解？
「行政主導」之成為泡影，正是特區政府這個不成材的「泡沫班子」一手造成的。七年過去了，今天的香港人不妨回想，第一屆行政會議的人物如方黃吉雯、鍾瑞明、楊鐵樑，還加上一個「回歸」之後就有人替自己在前港督府擺壽宴的鍾士元爵士，這些「決策者」的任命，到底有何意義？到了第二屆政府，特首董建華信誓旦旦要建立甚麼「執政聯盟」，結果是「聯盟」中的田北俊決定性地摧毀了二十三條立法，執政聯盟內有商界代表的自由黨人，也有親中的民建聯頭頭，他們都沒有響應中國最高領袖江澤民呼籲：「更好地支持董建華執政」，工商界早已不把董建華先生放在眼，盡情辱董為「拿屎上身」、「三零部隊」，親中勢力也公開投訴跟隨董政府「只有辱，沒有榮」，物先腐而後蟲生。毫無發言紀律，完全是「一盤散沙」的中華民族性格的縮影，民主派在野，雖然自己也有派系，但「執政聯盟」率先敗裂，不攻自破。如此，一個兒戲班子，如果還稱得上「政府」(Government )兩字，實是對此一莊嚴的名詞最大的侮辱。
中國領導人最喜歡說「對症下藥」。現在，他們認為香港之「症」，行政主導完全沒有問題，是形同「港獨」的普選呼聲，是疏導表達民情的名嘴，是不聽中方意志，面向民意市場的「一報一刊」有政變的能力。誠如李鵬飛在立法會批評一干兒童一樣的議員：「缺乏起碼的判斷力，還當甚麼議員？」中方的判斷如此，特區中國式的太監政治基因發作，鬧出名嘴封咪，親中政黨又想在主人面前立功，效法共產黨的批鬥方式，要名嘴「老實交代」，終於由李鵬飛爆出了中方的「陳姓官員」對妻女的「問候恐嚇」，以「誅心之論」之道，還治精於誅心之論打擊敵人的中共之身，李鵬飛是創造歷史的第一人。
五個做特首夢的人是誰，一點也不重要，因為是誰都沒有分別(小弟按：反正我o地冇份欽點)。他們也不可能像英國財相白高敦一樣，大方把首相之夢公諸天下，俯應民情而光明磊落地憑政績考取最高權力的執照，因為中國式的政治，有虛偽的「儒家精神」，要求「存天理，滅人慾」，有「政治野心」，好像是一件羞恥的壞事，同時，正如三國時代的政論家李蕭遠的定論：「木秀於林，風必摧之；石出於岸，流必湍之；行高於人，眾必非之」，這就是香港人戲稱「見光死」的汰優存劣的中國政治文化根源。從毛澤東前選錯了野心陰暗的林彪、後選錯了愚庸無能的華國鋒；到鄧小平先是選對了進取開明的胡耀邦後又親手廢黜，到台海另岸的蔣經國選錯了「屁股只敢坐三分之二」的李登輝，特區的第三屆特首、第四屆特首、第五屆特首，都不可能帶來甚麼驚喜，因為香港真的已經回歸了中國。(完)
共產黨o既所謂「行政主導」，美其名係「沿用英國制式」，實際上係小圈子o既執政組織，性無能扮有料，下下充大頭鬼，只係照顧大商家同小撮人o既既得利益，次次撞大板，反而走去怪人唔支持佢，結果同市民o既距離越拉越遠。話之第三屆特首姓梁、唐、曾、李、田，天下烏鴉一樣黑，香港至少仲有八年混亂、官兵、無能o既管治(到2012年，到時唔知可以普選未)，八年抗戰，香港人，捱落去啦，一係學陳啟宗話齋：唔鍾意可以唔o係度住！

Re傻妹怡：誰？我唔得concise嘛，所以次次都好夜先登到diary，打打下就慣，其實我打字唔算快o架喇。
Re Cafu:我冇理呀，我見o野就抄，有殺錯冇放過，或者我到時會輸o係呢度啦。

>>May 30, 2004 at 2:36:57 PM GMT+8

2004 年 5 月 28 日 星期五 【綿綿細雨】

今日補考CE英文listening，備戰o左兩個幾星期，做TOEFL同IELTS listening，好似兩者都唔算太難，比起AL水平，只係口音太多。
他他調調，08:30先準備出門口，o係巴士站前面俾何hen捉住，$2竟然買到三支旗，准考證寫住09:15報到，我09:20先去到李城壁，上氣唔接下氣。好多fax打氣，好明顯有人聽緊903，《丟架》播得勁大聲。做過AL就覺得CE唔算得乜o野，簡直係捉住你隻手逐字逐字咁寫，有阿倫史密夫o既說話(section 4個仔仔)，extended task只係要小心時間，淺過AL好多，抄到要加紙，不過其實task 1個equippment係咪真係唔使寫o野？
考完又同周展程佢o地慢慢行返落荃灣，好羨慕莊啟程o的人可以考哂試先睇歐洲國家盃，我就要邊考邊睇，即係冇得睇分組賽。突然撞見子建佢o地，好即興咁join埋子建、聰、蚊、Su、Fan、六叔衝凡江戶前食lunch，破費。對住非荃官人，少不免要大爆荃官內幕，側目，我當時都側目o架。食完哂魚先到，冇叫o野食，琪琪o黎埋，o的數唔係好亂o者，簡單o既o野唔好複雜化！
原來呢兩日廖寶珊open day，拉大隊捧場。場面好熱鬧囉，全校開哂，周圍都有o野睇有o野玩，N咁多個學會、Band Show雜耍，乜都有，相比之下荃官o的open day規模差好遠，似係炫耀最大o個三幾粒星有幾巴閉多過全校參與。冇藝術細胞呀，完全唔識摺草蜢，絕對唔關教o個個事。殺上三樓搵蘇兄，傾o左一陣，發覺張印仔咭唔見o左，齋玩。中文字打得勁慢添，兩秒都打唔到一隻字，不過o係屋企應該快少少o架喎。針織唔o岩我，得個睇字，落樓等慢條斯理o既蝦。即興地玩轉碟，唔掂呀，下下都跌，成日聲稱自己蠢o既蝦聰明啦，一玩就識。曾慶元o個o的就都好難玩喇，不過又唔係點難到聰明人。
之後徐家樂o黎埋，濕又唔知點解又出現過，o係廖寶珊hea到17:00夠鐘先小隊小隊解散，今日幾乎見哂去o左廖寶珊o既人：蚊、蘇兄、小丸、Logan、Wyman、楊竹，仲有小桂、朱子………曾慶元？殺雞？唔見譚健能o既？有o的無聊咁打發時間，要等爹娘入荃灣，今晚有人請食飯，o黎o左好多我唔識佢但係佢竟然識得我o既人。
大表哥一家三口o係美國返o黎兩個幾禮拜，姑媽慌死o的人唔知，o係新之城樓上o既豐盛酒家請哂全人類撐場。細表哥o係美國東岸執埋業做醫生，佢o係西岸(好似係加州)………幫人送貨，佢個女巧晴細我14年，論輩份，原來我係………表叔。乜佢踢波好叻o架？甚麼1985年贏學界足球亞軍，兩年前贏埋冠軍，又諷刺香港冇草地球場。今晚o既酒樓有比6A更冷場o既笑話，知唔知「龍潭老師」即係乜？遲o的先開估！食下玩下，巧晴考見過我o地，有o的怕醜，不過話咁差多大細，好快就同駿軒、駿希(佢只係大巧晴100日多o的，都係表叔)玩到熟哂。乜我真係好細個咩？冇人睇得出我其實仲有73日就18歲，表嫂(咁稱呼應該冇錯)最初竟然以為我得14歲！
呢個social搞到09:25先散場，差o的想去愉景間馬拉松買波鞋，好彩及時知道早就執o左，改去City，幾靚o丫，不過我唔會著住。

2004年Eric好歌流行榜(第22週)：
1)六呎風雲(李克勤)
2)世上只有(容祖兒)
3)繼續微笑(許冠傑 & Sam's Angels)
4)大方(方力申)
5)大雄(古巨基)
6)給朋友(張學友)new
7)心照(鄭伊健)
8)狠心愛我(梁詠琪)
9)殺她死(Ping Pung)
10)丟架(Twins)new

Re魚：又搞錯o左添，唔好意思。

>>May 29, 2004 at 5:20:36 PM GMT+8