2004 年 7 月 26 日 星期一 【晴】

張床好舒服，一覺07:30先知醒，唔知o尋晚係咪好多人玩到好夜，少o左人落canteen食早餐。
09:15輔仁開始第一個活動，馬嶽一早就到！佢會先主持民主問答比賽，參加者 + 組長按選區分開五大組，分組形勢有o的似各區人口比例喎，土瓜灣係九龍西o架，左派票倉嘛。全組要靠我單天保至尊，基本上所有問題都係我答。唔記得馬嶽上次workshop提過《民權初步》作者係孫中山呀，又計錯司徒華做o左幾多年議員(佢冇做臨立會)，更新冇將中國憲法第31條指中央可以因應情況成立特別行政區同一國兩制連繫起o黎，白白唔見o左分，不過好彩記得區議員當中有102個係委任，玩完三個回合，最後由新界東贏到全場總冠軍。
之後跟身分證號碼分組同學者做分享，揀中馬嶽(另一組係蔡子強)，Catherine開心死。o係一宿lobby圍埋傾計，先講唔同政黨o既成立背景，原來1969年港英政府開始提供助學金俾窮家子弟讀香港大學，因為佢o地係基層出身，o係大學搞學運爭取權益，慢慢呢o的人走埋一齊，成為今日民主黨o既重心人物(司徒華、李柱銘、楊森)，佢最憎o的人搞亂佢同馬力。政治學主要有幾個範疇，哲學性o既政治理論、比較唔同o既政治制度、研究某o的地區o既政治環境、國際關係(外交)、公共行政(政府運作)，豐富而吸引。提到AL係咪適合今日o既香港，馬嶽話AL課程係建基於50年前得HKU一間大學，科數比較少，o的AL Subject為當時大學學系而設，發展到今日有八間大學數以百計o既學系自然不合時宜，佢認為香港教育太早將文理分班，佢當年o係九龍華仁就可以文理混合咁讀。下個topic係法律，佢話中共對法律o既思維停留o係「法律為政治服務」o既人治概念，有異於西方「憲法限制政府權力」o既法治觀。中國o既政治社會問題主要係因為冇權力上o既制約，而土共成日掛o係口邊o既「行政主導」難以定義，因為政治學o既字典同《基本法》都冇呢四個字。攝影師Dec插咀，開始大辯論，ignore馬嶽，中國政治有冇開放o左？有，不過相比一個真正開放o既社會，中國明顯仲有一大段距離，當權者o既思維冇變，只係手段唔同o左。馬嶽不愧係政治學者，將我o地十五分鐘o既debate濃縮成一分鐘。
時間過得超快，返輔仁，聽民主發展網絡(DDN/民網)主席朱耀明牧師介紹民網，o係1984年成立，最初係爭取八八直選，1991年終於得償所願。政府o係23條立法過程視民意如無物，因為佢o係立法會夠票通過，而兩次七一大遊行迫政黨重新考慮自己o既出路。民網o既目標係爭取07/08雙普選，依家就為普選營造有利條件。完o左talk即搵蔡子強簽名，《新君王論》係去camp必需品嘛！太精彩喇，同蔡子強同晉午餐，恨o左好耐喇，o係佢面前話對中大政政有興趣，當然唔少得o既係影相，朱牧師、馬嶽都有份。
順帶一提，今日所有活動都由DDN負責，幹事盧偉明(Chris)成個camp都同我o地一齊住。晏晝有政治諷刺音樂人林子揚、Freeman講o野，好多令人呆足一分鐘o既笑話，不過當時全場爆笑。播少少佢o既作品，「我們是保皇黨好兒童　我們一起去食蛇宴」，另一傑作《七一光芒》，一如傳聞所料，睇到有o的想喊。下位係紀錄片工作者張虹，播2003七一遊行o既紀錄片，完全冇旁白，齋片段，連維園阿伯o既四字真言都唔cut，好珍貴o既紀錄片，有一套o係屋企隨時睇就好喇。
Tea Break之後私底下討論「羊群心理」，市民係因為羊群心態而上街？唔見得，唔會有香港人貪得意o係37.8度高溫之下曝曬街頭。分組玩設計，將SSU招牌橙tee改造，又剪又畫，我唔識藝術，畫字當交貨。其他人勁喇，Alien玩戴bra、Timber寫金利來(愛國商人o既領呔)、阿柴果然好書法、Victoria全組都超得，Leo係港英餘孽？
太幸福，dinner同仲未走o既馬嶽食，佢話依家讀Social Science都要識數學，文理科人都各有蝕底，我o的數入到U追唔追到？豆腐壞o左，Herman要向canteen反映，今晚唔好食。
今晚請o左o的社會人士同我o地做分享，事前Herman話我知「長毛」梁國雄會o黎，佢又係哲古華拉tee，仲諗住入輔仁之前煲煙，成間中大都係禁煙o架。佢未搵齊參加地區直選必需o既100個提名，係咁叫新界東o晦選民簽名提名，佢o係七一大遊行o既「西瓜之謎」解開喇。冇緣同佢傾計，安排o左街坊工友服務處(街工)o既人員，鏗鏘集派o左攝製隊o黎拍o囿，不過我o地又去o左一宿lobby傾。返o黎，輔仁o個o的未完，聽到長毛話中國唔適合共和制，只能夠行聯邦制。
又開E，冇地方，唯有上Alien遊戲房，又唔記得先舉手後發言，唔知William搞乜鬼，扮完黃宜弘又坐埋一邊，費事理佢。Chris指出SSU開會o既一大壞習慣，太鍾意講冇兩句就投票表決。
耶穌 + 俊豪帶人出去食宵夜，搭接近尾班校巴落火車站，去火炭，再行去禾輋大排檔，成棚人，葫蘆形o既擺檯。Anna做唐山大地震唔使交group project？每位$25埋單唔算貴喎，抵食，19個人，四架的士浩浩蕩蕩操返逸夫，大有的士巡遊o既味道，爭在未嗌「學生要自主，香港要民主」喳！落車見到好多人出o左o黎玩，快快沖涼快快出o黎，問麻甩IQ題。出去玩killer，人多到可以分兩組玩，Alien幾次都俾人欽點殺人，有次我做天使估中佢o架，點知俾佢殺o左我先！玩到02:00宣布退出，返房，冇幾耐成村人殺入o黎，想影人睡相，我同阿柴仲做緊o野，之後跟埋佢o地出去，Chris入鏡！

>>July 30, 2004 at 3:06:40 PM GMT+8

2004 年 7 月 25 日 星期日 【晴】

………之後返自己房，o係組員壓力下陪玩，非洲話事啤，又抽中街磚2，個懲罰好低能。
然後入俊豪o既210房繼續鋤dee，好癲囉，未贏過。其實個個玩到咁夜都係等美洲國家盃決賽，巴西對阿根廷，本來諗住02:50返房小睡片刻，不過………原來漏o左條匙o係鎖o左o既房，無謂叫醒阿柴，結果返唔到房，焗住捱到04:00開波。場波其實唔算好精彩，而且我都開始支持唔住，完半場前釣魚，睇唔到雷沙奧扳平o個球。60分鐘轉上一樓電視房繼續，我、Alien、Dec都o係後排梳化o係半睡眠狀態之下睇，唔係點知戰局變化。場波打到天光，我根本留意唔到比賽，迪加度超前o個球整醒o左一陣，以為阿根廷收得工，轉數又慢落o黎，阿祖安奴最後一擊又俾佢屈多球！醒哂，睇埋12碼，咁都俾巴西戲劇性捧盃。
返唔到房，入Alien + Kenneth房等，小睡片刻，真係片刻，一定要撻落床先訓得著。07:55終於有房返，個樣勁殘。食早餐，得o的炒米粉好食。呢個camp唔可以冇相機，o尋晚搵娘親幫我拎相機去大學站，本來要去一宿隔離o既輔仁中心做活動，關於青年事務，好彩有Kitty + Anna幫住手，抽到時間。校巴時間表寫住09:30有車落火車站，又經Timber證實唔好點誤點，不過o黎親o既車都去新亞書院，09:45先有o岩車，不過又兜新亞又兜研究生宿舍，好遲先到火車站，要佢等添。返逸夫，勁迫，不過一到本部就差唔多落哂車，10:25先返到輔仁。
o的人睇緊報紙，搵關於青年o既新聞，原來我SCMP登o左，講商界同專業人士參加直選一樣會得到基層支持，俾Kit唱通街，好多人都知。0睡眠o既我明顯不在狀態，睇睇下報紙都走去搵周公。晏晝有研討會，講青年議會，由青年事務研究者邵家臻(同森美小儀、芝See菇Bi合作出書o個個)主持。青年議會係政府轄下俾青年人討論公共事務o既平台，世界上好多地方都有類似o既議會，香港o係1990年有第一個青年議會，係沙田青年議會，到2001年香港一共有五個青年議會，可惜到o左今日，全港得番一個青年議會，相信o個區o既青年人都唔會知原來o個區有咁o既議會。我從來唔認為政府設立o既青年議會做得o的乜，呢o的不過係做樣o既政治花瓶，青年人o既聲音根本從來冇受政府重視，教育改革對我o地有切身影響，我o地可以提意見咩？
o尋日tea太多，今日太少，唔夠喉。
下半場繼續係邵家臻，換o左另一批嘉賓，大部分都係地區性o既青年組織。「青年筆記」係其中之一，為青年人發言提供平台，當然冇乜人知啦。最精彩都係江貴生，西貢區青年聯社主席，坐都坐得冇厘正經，講o野超唔掂。呢個point唔使佢講好多住將軍澳o既朋友早就投訴過，將軍澳35萬人，竟然冇機舖冇K場，戲院得一間，係大公園有幾間，有人爭取過o係安寧、富康、新都城開機舖，都係區議員否決，但係之前冇問過區內青年人o既意見。機舖本身唔係衰o野，只係有o的機舖好多飛仔，冇必要斬腳趾避沙蟲，忽視青年人o既權益。呢個talk實在太悶，我同阿柴都借尿遁，返o黎o岩o岩好完埋，Kit知我o地個個都冇精神，索性取消之前o既group discussion，放人返宿舍。Alien間房早就變o左遊戲房，邊鋤dee邊聽Alien彈結他，main point係有「廣東粗語研習班」，「做人要學識教壞人，亦要識點俾人教壞」，後者我早就做到，依家嘗試前者，教「一門五傑」。
一夠鐘18:30就食飯，快快口口食飽，同Herman落百佳買西瓜，沿途壞話講盡，SSU有人生人霸死地？揀西瓜都有排，抬返逸夫，準備俾全世界分o架，出公數o架！
夜晚搵o黎Frankie帶我o地玩集體遊戲，原來背後有o的人生哲理：人與人之間總會相互影響，要識融洽相處、包容。玩到後段開始冇力，人已經散哂，集中唔到，冇心機做任何o野。
準時22:00完，不過幕後o既要開E，檢討呢兩日o既問題。活動安排、膳食、反應，樣樣講，最大問題係呢次Youth Conference太多主題，反而唔可以集中o的深入o的咁做，搞到時間好迫，下次或者固定focus某個主題。開到23:15，做緊溥傑與王妃，好多人圍住電視，查證之後佢o地留意o既人唔係姓竹野，唔係姓常盤，更加唔係姓反町，佢o地o既焦點人物都係姓愛新覺羅。
沖完涼去Herman + Timber似十足貨倉o既房，有好吸引o既書，係聽日o的o野，忍唔住事先睇o的先。肚餓，煮杯麵，Herman唔係買o左XO海鮮o既咩？諗住又入Alien房鋤dee，成日都三缺一，唔夠人，唯有睇動物農莊，勁搞笑。睇住Alien練結他練練下走去唱《自由花》，仲係唔多識唱，齋chorus兩句。後來Anna入埋o黎，唔知點樣俾我o地串，大家研究Herman罐豆豉鯪魚其實有冇油，
幕後人員呢o的特權階段有得洗衫，要等洗好，紅繼續hea，不過又唔多想返212俾人玩，留o係遊戲房。乾衣，摺衫，搞o左一大輪，又話今晚要早o的，結果都要02:00先捧落床，阿柴上o左三樓？

>>July 29, 2004 at 3:05:05 PM GMT+8

2004 年 7 月 24 日 星期六 【晴】

青年圓桌會議五日四夜o既camp今日正式開始，o尋晚竟然又失眠，嚴重睡眠不足。08:35出門口，「準時」09:15到中大火車站，原來呢個係個別物流組工作人員o既時間，太早添。終於見到從來冇o黎開會o既林正文，勁插佢做乜之前唔出現，彈o左句「頂你個位」。Herman帶o左最新o係書展先買到o既《新君王論》，蔡子強個樣………好不倫不類，之前o個個簡簡單單仲好。10:00陸續齊哂人，我o既第8組要o黎o既o黎哂，不過請原諒我不在狀態，唔記得帶人上第一班車，等下班囉。
我o地會住逸夫書院，最隔涉o個度，冇有房，全部過哂二號宿舍o既活動室安頓好先。Kitty帶住我o地破冰，玩勁無聊o既遊戲，解手，10人11足。有房喇，組員阿柴同房，一宿H212房正爆，超級吐露港大海景！夠鐘落canteen開飯，o的o野全部凍哂囉，o的味唔錯不過唔好食。返房執o野，一聲慘叫，唔記得帶相機！
晏晝正式開始五日四夜o既活動，第一日o既主題係教育，請o左戲劇家 + 教育工作者林奕華搞講座，聽佢談笑風生。佢認為理想o既教育應該係培養自己o既想法，不過依家香港學生讀書係讀人o地o既枇法，即係背書。佢話唔鍾意香港教育，因為令好多人變得虛偽，埋沒自我，俾香港o既價值觀影響之餘，本身都影響緊港人價值觀。教育 = 社會地位，呢個係多數家庭所灌輸o既概念，社會對年青人有期望，亦都諸多規範。青年人最需要o既係主動提問o既能力，而且唔係要得到一個答案，係可以不斷引發其他問題，可惜青年人物質豐富，內心空虛，嚴重到連SMS都要抄張小嫻o既名句，冇乜自我風格。現今中學課程最缺乏o既三科係文學、藝術、哲學呢o的人文學科，培育唔到青年人o既自我人格；教育係手段唔係目的，港府o個o的荒謬o既教育改革可行性唔大，因為教o既都係o個o的老師，手法唔會變。呢part好死寂，可能未安頓好，而且議題係深o左o的。
茶點時間，落canteen，三文治似乎太多，其他o野都唔少，懷疑究竟需唔需要茶點。
之後有片睇，係佢同一o的學生兩三年前o既作品。完全唔明點解中學生drama可以有咁激o既對白，笑到全場肚屙，「如果我打牌有兩隻西，你會唔會拎其他一隻出o黎碰？」、「用完士多啤梨味condom之後會唔會惹蟻？」、「o係飛機打飛機係咪會正o的？」，三級以上o既笑話多到不能盡錄，總之係太搞笑，而且好多所謂「粗口」。呢套劇原來當時有家長帶埋仔女去睇，好開放喎。林奕華覺得青年人想講粗口你因為自己做唔到，o係個人需要被壓迫之下唯有語言暴力證明我好型。
Dinner又係差唔多咁麻麻，Anna入o左營，大部分工作人員坐同檯。夜晚o既活動開始前Timber帶
有興趣o既人去本部o百佳(中大唯一超市)入貨，得到Kit財政資助，杯麵、薯片、汽水猛咁入，不過原來冇最大裝o個o的。好多人都狂入貨，買完又係上斜落科返逸夫，路程真係好遠。夜晚做分組disccussion，講心目中o既理想校園o係我房做，有Kitty幫手。真係唔該哂，因為我唔識點樣lead住o的人向邊個方向講，又本能咁講埋一份，總算求求其其搞掂哂。要返二宿Act Room匯報，太多組，組組都好多內容。
22:30終於完o左第一日o既活動，全層樓差不多30個男仔，得四格沖涼間，要早o的沖就要快。
成村人入Alien房鋤dee，超迫，個個都諗住今晚全面作反，通頂……………
過o左00:00喇…………

>>July 29, 2004 at 10:24:03 AM GMT+8

2004 年 7 月 23 日 星期五 【晴】

嚇死人咩？講埋o的咁o既o野，不過如果真有其事，我諗我都會知點做o既。
o係街頭見到熟悉o既身影，睇唔到樣，不過地中海，側側膊，大細眼，藍T恤，仲唔係佢？
最早o係黨綱寫爭取07/08雙普選o既係佢，最早叫人唔好再糾纏o係07/08雙普選o既亦係佢。因時制宜，表面睇好似係明智之舉，實則係混淆視聽，欺騙群眾。我相信佢都唔記得自己轉過幾多次軩，如果佢以為咁o既把戲可以呃到人，實在係愚不可及。如果當時單眼怪係擺緊檔，而佢又派傳單俾我，我一定會話：我支持你o既政綱，不過我唔支持你！

是日矚目轉會：
凱域(丹麥後衛) from國際米蘭to諾域治 自由轉會
拉辛斯基(加拿大前鋒) from愛華頓to富咸 75萬鎊
祖斯美(西班牙後衛) from馬拉加to利物浦 400萬鎊

2004年Eric好歌流行榜(第30週)：
1)與神對話(許志安)
2)吻別的位置(李克勤)
3)地平線(官恩娜)
4)算數(盧巧音)
5)煉金術(楊千嬅)new
6)內傷(鄭伊健)
7)傷追人(古巨基)
8)好好戀愛(方力申)
9)夏日劇集(梁詠琪)new
10)愛是最大權利(Ping Pung)new

Re中國人：你犯o左本末倒置o既錯誤，「冇人才」呢個point就好似話自己未學過游水，所以唔可以去泳池試，要o係池邊學識先。正因為政治由少數特權分子把持，連李國寶、黃宜弘o的咁不得人心o既政棍先仲可以o係議事廳嘲笑香港人，搞到有意從政o既人根本冇辦法大展拳腳，唯有離開政壇；開放政治，留住多o的人才o係政壇，呢個先係出路，發展民主，人才自然會出現。經驗係靠實踐累積，同游水o既道理一樣，你一日唔落水嘗試就一日都唔會識游，而且人生邊個決定唔係嘗試？民主o既實驗危險，唔通小圈子欽點o既實驗就安全？人生邊一步唔係賭博，邊一步保證唔會撞板？快唔快冇客觀標準，你可能覺得太快，不過由香港人對普選o既訴求睇，政改步伐係太慢。
Re小某：如果冇人想參政，民主派就唔使花盡心機o係地區直選協調名單，因為有意出戰o既人實在太多。簡單o的講，人o地怕普選，係因為佢o地知自己唔夠料，知自己係庸才，所以唔想有能人士出o黎競爭。

>>July 24, 2004 at 3:13:16 PM GMT+8

2004 年 7 月 22 日 星期四 【晴】

1992年UE Listening + 秦漢DBQ
過住好頹廢o既生活，呢半個月徹徹底底咁浪費o左，明知要加油，不過又好似隔夜油條咁。我肯定單靠八月一定唔夠追，但係自己唔爭氣，冇得怨，就算冇Youth Conference我應該都會咁懶。
o係西九龍見到個西裝友，好高，應該有1.95米，我矮佢足足成個頭。好恐怖囉，高得咁厲害，分o的俾我就好喇，分7cm咁多就夠o架喇，如果再俾多15磅俾我就完美，無慾無求。

是日矚目轉會：
柏奴亞(英格蘭中場) from阿仙奴to米杜士堡 175萬鎊

Re Billy:的確有趣，齋講立場唔提論據、論證，咁多謬誤，我都唔得閒逐點反擊。頭兩版來來去去都係o個三篤屁，都係叫香港人「報恩」、「聽話」、蠢到郁o的俾人煽動。我反而對第三版o個o的有興趣：我o地要求o既係普選，直選係普選o既一種，美國行選舉人制、英國行執政黨內閣制、法國行國會制，政府都係由一人一票產生，呢個唔係普選係乜o野？

>>July 23, 2004 at 1:11:57 PM GMT+8

2004 年 7 月 21 日 星期三 【晴】

幾次o係SCMP講波都有得登，下次一定轉話題。
o係SSU討論區流連，又一場罵戰，竟然發覺有個以TWGSS為名o既網友，佢聲稱係1A人，爆響口話佢EPA老師上堂o個陣問過同學贊唔贊成普選，投票結果唔重要，原來o係荃官教書o既都會做呢o的囉，不過其實邊個o係1A教EPA？之前冇expect過荃官都會有人o係論政forum出現，以為個個都係隱形人，咁o既話請馬嶽去荃官talk都唔錯喎，去完camp返o黎搵李sir傾下先。

是日矚目轉會：
迪華奧(意大利前鋒) from祖雲達斯to華倫西亞 1050萬歐元
莫拉堤(意大利後衛) from帕爾馬to華倫西亞 轉會費不詳
李華度(巴西中場) from高士路to奧林比亞高斯 自由轉會
卡隆(塞拉里昂前鋒) from國際米蘭to摩納哥 轉會費不詳

>>July 22, 2004 at 2:03:32 PM GMT+8

2004 年 7 月 20 日 星期二 【乍寒還暖】

青年圓桌會議2004今日正式開始，打頭陣o既係晏晝o既公民教育工作坊，o係中大利黃瑤壁樓舉行。
o的組長12:45要去到，冇乜時間食o野，邊搭車邊啃三文治，比想像中快好多到中大。超多人早到過我，其實我唔太知點解o的leader要早到囉，因為得工作人員要最後準備，開counter + 擺陣。同其他leader + 某o的參加者搭嗲，中大Social Work Year 4人叫我唔好揀政政，因為discipline好差，師資唔算好。唔係o掛？一盤冷水照頭淋，唔通Sociology咩？不如o係camp真係問下政政人先啦。其他學校o的人真係幸福，學校主動話問學生參唔參加，大部分學校直頭特登連講都唔講，居心何在？
o的人陸陸續續咁到，比原定時間遲o左少少正式開波，其實今日組長冇乜o野要做，坐哂前排一齊聽o野。先係Alien + Kit歡迎辭，Alien把聲太沉，其實講o黎講去都係o個o的鳴謝，今次唔係咁多人贊助，呢個活動根本搞唔成，梁家傑、湯家驊、吳靄儀個個都金錢上幫助。
打頭陣o既係國際特赦組織香港分會o既教育幹事陳樂庭，佢介紹乜o野係人權。好難用三言兩語解釋乜o野係人權，佢大概代表人o既尊嚴，不可分割，而且係與生俱來o既基本權利，唔係奢侈品。好大篇幅，節略o左都仲好長，而且相信冇乜人會睇(要睇可以搵我)，無謂講。美國某法官咁樣形容人權：你有人權，你可以自由揮動拳頭，而且拳頭會o係人o地鼻前面停低。人權唔單係溫飽權，唔單係食飯o個陣多件叉燒，《公民權利和政治權利國際公約》係最多國家地區確認o既人權公約之一，基本法第39條寫明佢會繼續o係香港生效………當然，係基本法「保證」。人權保障都係縱向、橫向兩種，總之人權係複雜o既概念，不過你有我有，互不侵犯。
呢part係悶o左o的，因為concept唔易明，冇乜人問得出問題。
接棒o既係香港人權監察總幹事羅沃啟，佢主打兒童權利。好難有絕對客觀o既標準界定乜o野係「兒童」，一般o黎講18歲以下，能力發展中o既都係兒童………我仲有20日兒童做。生存、保護、發展、參與係兒童四項主要權利，而且少年罪犯亦要受特別對待，至少唔可以執行死刑。香港人o既權利尚算完整，不過可能受傳統中國家長式思維影響，香港並冇因應《聯合國兒童權利公約》o既規條進行本地立法，例如父母離婚，雖然法官通常會問仔女想同邊個住，但係法官可以唔問，因為冇規定要咁做；孤兒俾人收養，佢o地法理上唔能夠選擇接唔接受領養人。氣氛超好，勁多人踴躍發言，舌劍唇槍，組長、組員、工作人員都插咀講o野，引發好多好爭議性o既問題：仲拎住行街紙o既未有居港權細路有冇權接受香港教育？點解要將有權投票年齡定o係18歲？事實上香港o既兒童o既社會地位一直都被忽略，好多事務對我o地有切身關係，但係冇人問我o地意見。
Break陣，有西餅食，單係茶點已經好大使費囉。第三節嘉賓，科大社會科學部助理教授馬嶽終於到喇，真係好高，Catherine原來係超級馬嶽擁躉，十月芥菜咁拉住佢影相，我都想影呀，唔記得帶相機………唔緊要，o係Camp再影，佢話會o黎一陣。早就知佢o係九龍華仁畢業，Kenneth話九華出o黎o既個個都係咁o既樣，馬嶽o既回應好搞笑：「邵善波、路祥安都係九華畢業喎！」佢話自己唔算好高調，寫波經o既字數仲多過寫政經，呢刻開始feel到佢好風趣幽默。
迷完偶像，下半場開波，其實已經比預算遲o左開波。作為民主發展網絡o既成員，佢o既topic理所當然係民主，ABC式o既最基本簡介。簡單o的講，民主係和平撤換統治者o既制度，概念上睇，人民授權政府施政，政府權力來自人民(「還政於民」就係基於呢個道理)，單係「以民為本」o既民本施政唔算民主，要同時包含民治(Rule by people)、民享(Rule for people)、民有(Rule of people)三大元素。制度上，選舉係現有最民主o既產生政府方式，不過選舉要自由、公平、定期先算民主，所以新加坡、北韓、好多前蘇聯加盟共和國都唔算民主，新加坡o既case好搞笑；美國總統選舉雖然實行非直接o既選舉人投票制，最後結果可能唔完全反映選民o既票數(上屆戈爾都係咁輸)，但係選舉人由選民按州份一人一票選出，依然係民主。行政部門都要受法律、機制制約，特區、中央政府話要「行政主導」，首先呢四個字冇o係基本法出現，而且「行政主導」唔係「行政獨裁」，至少梁愛詩本身冇權決定胡仙有冇罪。社會上，越多唔受政府操控o既組織，代表越民主自由，「我唔同意你o既講法，不過我會誓死捍衛你o既言論」，要包容，要求同存異，民主先會穩固。好多國家都難以推行民主，因為佢o地未o係日常生活各層面培養民主o既意識，俄羅斯人對強人o既渴求令民主總係上唔到軌道，先會有阿巴莫域治呢o的暴發富豪。單係「少數服從多數」唔係民主，尊重少數o既"majority rule, minority rights"先係真民主。馬嶽的確識製造氣氛，成日串人，蕭蔚雲、許崇德、香港商家、董建華，無一倖免。提過孫中山，國父話中國人要推行民主，先要識開會。Q & A好熱鬧，問完又問，好多精彩問題，有o的我都可以即刻答到少少。快樂時光真係快，馬嶽走喇，好彩佢會o係camp出現，要好好把握機會同佢傾計，順道試下請唔請到佢o黎學校講o野，Sandy大致上請到呀，不過荃官學生………有冇興趣聽？
o的talk完哂，營前簡報會，下個節目係星期日至星期四o既camp。先公布分組名單，講少少營規，叫o左Alien唔好話俾人知可以出中大啦，我o地好難做o架。提佢o地星期日唔好遲到，幕後人員要再早o的，09:15要o係中大出現。會一會o的組員，好似冇乜邊個特別難搞，總之大家合作愉快啦。組員走哂，幕後們唔知留低為乜，唔知算唔算有o野做，睇人執o野，問清楚campus環境，教錯人帶notebook添。
18:15先大班人一齊走，William貴人出門招風雨，一到露天地方就落雨，貴人呀。成村人起勢咁鬧Kitty，佢今日冇o黎，佢犯o左幾個大錯，累街坊，搞到SSU雞毛鴨血，好多人都唔妥佢，Kenneth、Herman炳得佢最勁。原來Kenneth都承認SSU處境好困難，呢個活動其實好有意義，不過人權監察下次未必再敢同SSU合作，又係拜Kitty所賜。點都好啦，個個都想Youth Conference會變每年一次。
問大家兩個問題？兩題o既答案都一樣～
除o左處於無政府狀態o既索馬里之外，世界上唯一邊個國家仲未簽《聯合國兒童權利國際公約》？
近五年內，邊個國家處決最多18歲以下o既青年犯罪者？

是日矚目轉會：
維亞拿(葡萄牙中場) from紐卡素to士砵亭 借用
史必(威爾斯中場) from紐卡素to保頓 自由轉會
古華特(荷蘭前鋒) from巴塞隆拿to紐卡素 借用

>>July 21, 2004 at 4:15:08 PM GMT+8

2004 年 7 月 19 日 星期一 【微雨】

CEPA第一次開工，09:05上到麥記，原來仲有大把人遲過我，早知o係屋企嘆多陣報紙。Econ人test期間我o地趕中史DBQ，唔使點睇notes o架喎，照譯 + 自己wording就唔會俾Lim Sir話唔夠料。Judy、蝦先後o黎探班，個look好搞笑囉，唔明扮細o既用意係乜。終於打哂電話俾o的組員提佢o地聽個workshop喇，組長唔易做o架，我寧願唔要做組長。中史進度非常緩慢，做o左一題之後停哂手。
麥記環境唔錯，除o左首《死性不改》恐怖o左o的之外，應該好適合一齊溫書，不過坐o係機底，凍到狂打冷震，連牙都震埋，不過個身其實唔算好凍。唔知點解指定由我諗主題o既discussion提早開始，呢個topic我早就思考o左好耐囉，我都唔太肯定現今o既青年算唔算關心社會。有o的人的確好熱衷社會時事，參與其中，不過似乎選擇沈默，認為事不關己o既人仲係大多數，關注程度只係比以前懸殊o左。其實個個都咁醒，唔使專登搵我諗題目啦，不如o係past paper抽o的出o黎一齊講，因為我都想練習。
坐到12:15左右Morning Section就完o左，去拎影印，好大疊喎。呢個七月都好難做到o野o架喇，份listening都係有時間先做啦，不過又聽講不斷做past paper作用唔大，反而應該o係proficiency著手，即係要睇報紙。

是日矚目轉會：
杜奧巴(象牙海岸前鋒) from馬賽to車路士 2450萬鎊
泰亞高(葡萄牙中場) from賓菲加to車路士 1000萬鎊
基昂(英格蘭中堅) from阿仙奴to李斯特城 自由轉會

>>July 20, 2004 at 1:46:40 PM GMT+8

2004 年 7 月 18 日 星期日 【乍寒還暖】

子建生日快樂～
二級半～
仍然係效率極低o既所謂「操練」，根本冇乜成果，做成日都不過係做多份listening喳，又難到死，o的句子長到o丫，同平時做o個o的format根本係兩回事，嗌哂救命。
六日o既書展，撞正其中三日要做o野，睇o黎今日冇乜機會去o架喇。睇報紙介紹，有幾本書好有興趣，真係好想買呀，華叔好似話仲會親身去現場推介新書，太吸引喇。
政黨要有將來，一定要面對群眾，自由黨都要派人落區直選。田北俊落新界東，周梁淑怡、丁午壽去新界西，兩區都增添無限變數，不過如無意外自由黨o係兩區都各贏一席。其實俾工商界背景o既自由黨o係地區直選開拓議席未嘗唔係好事，起碼話俾工商界人士知直選唔係洪水猛獸，又可以向o個o的危言聳聽話普選會破壞經濟o既生物狠狠咁刮一巴掌；最重要o既都係：多o的親中o既溫和派參選，搶走民建聯o既邊緣票，鬼打鬼，民建聯o既議席少o的，皆大歡喜。

是日矚目轉會：
中田英壽(日本中場) from帕爾馬to費倫天拿 轉會費不詳
高爾(英格蘭前鋒) from布力般流浪to富咸 自由轉會
米路斯域(塞爾維亞及黑山前鋒) from切爾達to奧沙辛拿 自由轉會

Re Billy:唔記得o左login密碼～

>>July 19, 2004 at 1:56:32 PM GMT+8

2004 年 7 月 17 日 星期六 【酷熱】

香港青年圓桌會議(Youth Conference)一系列活動會o係星期三開始舉行，今日召集全體幕後人員briefing + 開會。o係旺角教協，樓下有街工賣tee籌款，冇水，愛莫能助。全場得我、William、Dec準時，鬧還鬧，請注意言詞，考慮下人o地o既處境。
Kit仲記得我，問我點解第一次開會之後就冇再o黎過，失蹤五個月，我唔想o架，身不由己！14:30先齊人開波，好多o野要交代俾唔同崗位o既人，原來佢o地背後忙o左咁耐囉。幅地圖超級難睇囉，好彩我對中大有少少印象，而且星期三workshop地點超近火車站，唔難去。花好多時間o係唔太重要o既部分，夜間活動o既自由度、去立法會大樓o個日點著衫都可以講好耐，overrun哂。多得林正文佢o地唔少，身為組長竟然冇到，結果被剔除組長資格，由我、Mina(唔係你o地諗緊o個位)、Victoria呢三個副組長頂上，我唔得o架，搵個副組長支援我啦！o個份營規有o的唔信得過，一於俾工作人員洗衫特權啦。太好喇，請到林奕華(教育工作者)、林子揚(頭條新聞主持)、羅致光(立法會議員)、馬嶽(科大社會科學部助理教授)做嘉賓，馬嶽有機會其中一晚留低過夜同我o地促膝長談，依家仲邀請緊司徒華、蔡子強，得就正爆喇，乘機要簽名！
SSU開會唔多掂囉，成日都唔記得「先舉手後發言」，好亂。我之前完全冇開過會，跟唔到………應該情有可原o既，但係有o的人都明顯冇準備好，大部分都o岩o岩考完公開試，唔會冇時間o掛？都係算啦，老實講SSU的確好難生存，問出面100個人至少95個識我o地老鼠，有人入會冇人做執委，SSU條路好難行。
借房借到18:00，夠鐘都仲未完，好多好多手尾未執，物流組得閒死唔得閒病。同Herman行陣旺角，佢遲o的要去英國讀書喇，出發前掃碟。佢唔鍾意喬治布殊，但係都認為《華氏911》太離譜，好失實。經過女人街，仿真度極高o既波衫，想買車仔林柏特添。

P.S.范徐麗泰正式宣佈出戰港島區直選，四年o黎佢做立法會主席主持會議幾稱職，冇乜點偏袒，吸引到中間派選票。范太、余若薇、李柱銘鬥吸票，有機會連馬力都踢埋出局！

>>July 18, 2004 at 4:05:46 PM GMT+8