2004 年 7 月 16 日 星期五 【乍寒還暖】

呢個diary終於可以重開喇，以後呢度俾人鎖o左兩日，自動自覺去http://www.hkflash.com/diary/diary.asp?id=ericbarthez1睇o野。
唱K，Cafu約o既，去City Red Box，好耐冇同芝士、Zoe、Lily、沈、鰻魚唱喇。
我冇事先刨歌o架，停唔到口o者，而且呢排o的歌我好多都鍾意嘛。《地平線》、《舊人》、《好好戀愛》、《吻別的位置》全部唱哂，陳小春都係留俾Cafu啦，沈唔知點解突然對尹光冇哂興趣。o的咪似十足學校咪，好唔掂，最唔聽芝士話。
唱到13:15，幾個人搭地鐵，邊行邊吹水，講垃圾。抵佢死啦，個個都插到佢暈，個個都想知道世紀懸案係乜o野一回事。成季咁長咁多波，好波冇場關佢事，劣作全部有佢份金漆招牌就咁俾佢打爛喇。
夜晚幫子建預祝18歲生日，Octopus + 小B + Fan + Lo打邊爐，未試過咁齊人。我差o的又失血過多致死～
20:15先出門口，o係荃灣MTR見到一定係行色匆匆o既何俊仁，離遠一眼就肯定係佢，o係九龍東趕過o黎擺檔，到o左麥記，我竟然係最早到。21:00後平o的，捱肚餓好辛苦，一坐低就狂叫o野食。今晚咁o既組合冇乜可能會冇笑料，係咁啃親，子建塊面………睇精神科 + 皮膚科啦，小B做o左眾人o既代罪羔羊，都應該睇外科，聰都係唔好返o黎喇。小邪DIY多啦A豬錢箱好得意囉，其他禮物佢都好鍾意，原來我同佢o既喜好差咁遠。
酒樓o的服務態度唔多掂囉，佢o地個個都死老豆？不停咁叫o野食，大胃王死口唔認自己大食，有o的人就好細食，我都狼吞虎嚥囉。唔知有冇做錯，狂掟肥牛、鴕鳥肉落去，叫人想食就即夾，當然係一如以往咁冇人在意啦。食到俾人cut電，接近俾人趕先肯埋單，條數超過自己預算囉。23:45先走，返屋企仲要睇埋錄起o既《隔世追兇》，02:00先撻落床，但係失眠………

是日矚目轉會：
薩高拿基斯(希臘中場) from AEK雅典to博洛尼亞 自由轉會
巴布(德國後衛) from利物浦to史特加 自由轉會

2004年Eric好歌流行榜(第28週)：
1)吻別的位置(李克勤)
2)分流(陳小春)
3)舊人(劉浩龍)
4)地平線(官恩娜)
5)與神對話(許志安)
6)算數(盧巧音)
7)內傷(鄭伊健)new
8)好好戀愛(方力申)
9)眼紅館(Kenny@Boy'Z)
10)傷追人(古巨基)new

P.S.司徒華正式宣佈唔會參加今年立法會選舉，其實73歲o既佢都應該要放低某o的工作俾年輕人接捧喇，老一輩人淡出，正好俾民主黨轉變o既黃金機會，下屆退出o既會唔會係到時已經68歲o既李柱銘？

>>July 18, 2004 at 1:25:32 PM GMT+8

2004 年 7 月 15 日 星期四 【驟雨】

天文台次次掛風球都俾人鬧，早掛又插遲掛又插，又話掛o左八號都風平浪靜，屋企出面就係，試下去維港、石澳、銀線灣睇下囉。
打唔打風唔緊要，反正都係埋頭苦幹。做o左1990年UE listening，好多深字唔識串，偷雞聽兩次。之後做剪報，呢個唔太難，控制字數，新人事新作風，唔知林陸接唔接受我o的文筆。
執好史學名著o的notes，又好似唔係太多notes要刨，不過份份都唔記得哂囉。
暑期加操大計開始o左兩日，efficiency差得好厲害囉，不過tutor又話唔使太擔心，唔使太早催谷得咁勁，係真唔係？

是日矚目轉會：
捷雲頓(烏拉圭前鋒) from萊切to摩納哥 轉會費不詳

>>July 18, 2004 at 1:35:00 AM GMT+8

2004 年 7 月 14 日 星期三 【晴】

篇幅極長，點都花o的時間睇下啦。
o係《荃苑》睇到篇o野，口痕o既我早就想講兩句，撞o岩李怡今日o係蘋果專欄講類似o既o野，幫我further explain我o既觀點，借o黎一用。
李怡專欄：《愛國曲線》
教育統籌局為學生領袖舉辦「香港領袖生獎勵計劃：國情教育課程」，日前一百八十名香港中學領袖生在北京舉行開班儀式。香港有電視台(小弟按：收費台)訪問其中兩名香港領袖生，一人說，她生長在香港，對許多事情都有較為穩定的看法，另一人說，與內地學生交流是相互的，不是單方面地「接受教育」。
另外，由民建聯所作的一項調查顯示，有近六成受訪者認為，回歸後加深了對國家的認識，但有超過一半受訪者認為，政府在愛國教育的工作方面不及格。
民建聯因此建議，在中小學要增加愛國教育內容。教統局的「國情教育課程」，也是要加強愛國教育。實際上，中共領導人一直認為，香港人爭民主，源自於港英統治時期遺留下來的意識形態：崇尚西方價值觀，對中國缺乏民族感情，對中共不信任。因此，加強愛國教育也就成為應有之義了。
愛國意識，若能透過「教育」而產生，那麼中共建國五十多年都在進行愛國教育，就不會製造出那麼多的貪官污吏，那麼多的假藥、假酒、有毒食品等等了，更不會有「黃禍」似的人潮以合法、非法的手段要移民國外了。
倘若進行的是真正的愛國教育，那麼數一數中國歷史上所有的愛國者，哪一個不是受盡當權者排斥、打壓的人士？古代的屈原、岳飛、文天祥、林則徐，現代的孫中山、魯迅，都受到當權者的壓抑，他們都是在祖國遭到苦難的時候，表現出他們愛國愛民情操的。自古至今，何嘗有過一個被公認的愛國者，是受當權者賞識，並從當權者手上撈取經濟利益與政治利益的？若愛國教育、國情教育，是讓學生們認識，現在的人大常委、政協委員就是他們的「愛國」榜樣，那就難怪香港的領袖生說，她自己有穩定的看法，以及不會單方面地「接受教育」了。他們真不愧為香港的領袖生。
中共五十多年的愛國教育，產生了一條畸形曲線：最被中共當局認為愛國(即愛黨)的人，是每次到內地都受到刻意安排的接待及去參觀訪問一些重點項目的人，比如董伯這類人；與內地社會有點親友聯繫的華僑，他們仍「愛國」，但程度已差些了；與內地有廣泛聯繫的香港人，了解更多實情，就很難「愛國」；至於內地的老百姓，真不知道誰還會「愛國」？不過，最「不愛國」的，則是接近中共領導層的人，如參與黨政高層運作的，為中央領導人服務的，他們儘管還會說，但私下不會再相信任何愛國八股。
我只係想補充一句：任何刻意推動o既所謂「愛國教育」都係唔尋常，愛國民族意識唔可能「教育」出o黎，呢種意識，只會o係人民心中不知不覺間形成，外力99.99%會令佢偏離本來o既意義。

擺明抄o野，千祈唔好收我版權費，因為呢個F.6改變o左我好多囉，同F.5一樣咁難忘。
回顧中彷彿一步一生　每一級一世都難忘　如果吸引

學業篇：
早就有AL極難應付o既心理準備，不過事實遠超過預期，基本上係完全跟唔上，好似無論點努力都仲差好遠，成日認為自己冇機會入U囉。
History + Buss + 中史，加埋兩個必修，搞到我頭都大埋。以為CE History失手只係意外，原來我o的skills仲停留o係CE水平，要同人爭簡直係天方夜譚。開始掌握到Essay應該點寫，輪到DBQ唔識，AL果然係名不虛傳。仲覺得Miss Leung係班主任，好鍾意上佢堂，但係唔爭氣，成日搵周公。
過o左成年，Buss仲係渾渾噩噩，仲未知大概應該點讀，唔知o的concept應該點運用，上學期肥佬，下學期少少進步，但係仍然俾其他人拋開好多，不過Geog又唔見得我會讀得掂，冇法啦，揀o左就要堅持落去。
中史，繼續背書，只係要背多好多，第一次俾Lim Sir教，唔錯啦。講o黎講去都係「懶」累事，唔肯俾多o的時間背，成日都寫好少，DBQ速度極慢，拖低哂o的essay分。
初時又唔識讀中化，因為我所體會o既「中國文化」同書本上o既concept幾乎完全相反，要重新洗腦，聆聽、速讀操極都唔得，只係oral大有進步，運用邏輯比以前好o左，呢科算係上到少少岸，不過中化成績根本冇乜點在乎，pass到就收貨。
CE英文cred唔到，UE自然吃力得多，心有餘而力不足，好俾心機去操，但係冇乜效果。平心而論，5 + 1教我o地教得幾好，只係佢太想同我o地分享人生哲理，俾人長氣o既感覺，我係想佢F.7繼續教囉。林陸信唔過，依家靠唯有自己o既地獄式密集操練，希望CEPA幫到我。
今年總算認清自己o既路向，既然我有咁o既熱誠，客觀能力又唔太差，全力向Politics邁進：熱選中大政治及行政學系，次選中大社會學系。

課外活動篇：
當時o係好倉促之下先決定返荃官，事前冇打好關係搵post，好o個o的早就俾人搶哂，最後矇查查搵o左四個細post掛名。
公民教育組其實冇乜點做過o野，係幫手搬展板，o係Morning Assembly拍住Candy做演講，「我冇諗過送禮物俾你」，post-exam執櫃，我其實只係物流從業員。
Academic Development Team時間表最密，但係最少o野做，次次都o係扮看住F.3做功課，其實只係做自己o野，理科問題唔使勞煩我。最記得o個鑊集體失蹤事件，之後俾馮sir狂省，仲有學期尾o的校友請食o野。
唔講唔記得自己原來係環保教育組，除o左學期初搞廢紙回收，其餘活動都冇我份，墨魚團我只係參加者。
o係社做Sports Cap，起初好雄心壯志，但係一盤冷水照頭淋。想o係社際足球大展拳腳，不過仍然係徐家樂話哂事之餘，自己連正選龍門都冇得打，結果衛冕失敗。反而籃球相當成功，同李天一齊帶兩組男籃，夾手夾腳精心部署，將士用命，Senior同Junior都令Camphor再次俯首稱臣，冇外力之下終於睇到社o既精神。自問呢個Sport Cap算係稱職，有所交代。
等o左幾年，終於入到足球校隊，當然又係後備，總算有得出場對聖芳濟。樣衰囉，俾人笠死，吞兩蛋，不過都叫踢過一場，心滿意足。
Drama有份set組幫手，其實都不過係行行企企，粗重o野Judy做哂。間中髹油，練搬set，叫人o黎搬set，最後o既結果唔關我事，我o地已經盡o左本份。
Easter去足球camp，世界好大，知道自己其實唔差，有決心就做得到。
仲有個校外活動，二月初，中學生聯盟 + 香港人權監察開始籌備o係暑假舉行o既「青年圓桌會議2004」，本來我係籌備小組o既成員之一，但係屋企人唔想我做搞手，唯有退出。等佢o地送data file去全港所有中學之後報名(唔深究點解好多學校都唔知有呢件事喇)，由organiser轉做參加者，不過落選收場。好彩七一遊行識o左Herman，穿針引線之下終於歸隊，有得去中大，以Vice-Leader身份帶領討論，o岩哂。

人際關係篇：
平紀錄o既七個5B升到，不過始終都係少數民族，硬係同o的5A格格不入，好多時唔明佢o地o既文化，唔知佢o地做緊乜。嘗試過融入，但係感覺上好似被排斥，有o的無助，心灰意冷，索性唔再理；原來唔刻意o既追求反而會更好，依家全班都開始玩得埋，當然冇以前5B咁癲，但係算唔錯，乜都笑得一餐。
學期尾開始同小妹佢o地混熟o左，齊齊講唔好笑o既笑話，原來我呆到好多人，CEPA都係由佢o地發起，又讀又玩。
以前同肥峰最多都係點頭之交，因為Buss + 中史而多o左o野講，發覺呢個未來神父搞笑能力頗高；之後又join陳江，唔知係我帶壞佢定佢帶壞我，日日都研究點送錢俾馬會；牛榮一定冇俾我帶壞，佢本身都壞壞地，不過讀書的確厲害。
同肥鵬唔知邊個拋棄邊個，本來5B年代已經同Billy + 挺頗熟，依家越玩越埋，大量超好文采o既暗串，o係學校o既重要精神食糧。
起初唔習慣突然走o左咁多朋友，甚至有因為咁而好沮喪，依家仲好想成日同所有人一齊，但係已經冇咁灰。話咁快過o左一年啦，唔爭在等多大半年o者！
識我o既人都知我極少真正討厭一個人，不過今年，我明白一個乞人憎o既渾蛋係點囉。

社會篇：
成日俾人話我好留意政治，要搞清楚，嚴格o黎我係留意社會時事百態，乜都想知，政治新聞自然走唔甩。
去過三次遊行，元旦、四一一反人大釋法、七一，事前問過自己點解要上街，清楚咁俾到自己一個答案，絕對唔係俾人利用。
幾忙都堅持日日睇報紙，尤其係o的李怡、陶傑o個o的時事專欄社評，知多o的，諗多o的，將用佢o地o既思考方式套用o係日常生活，幫到自己邏輯思維。
有冇留意我以前好鍾意鬧人土共左仔？依家冇，因為親中都係立場，每個人可以有唔同立場，立場唔同都唔可以批鬥佢。

呢個F.6令自己成熟o左，知道自己o既不足之處，識得將本來會影響自己讀書o既因素掉轉頭推動自己。一山還有一山高，其實自己好渺小，冇以前咁囂張，識得幾時要收埋自己。

是日矚目轉會：
舒寧咸(英格蘭前鋒) from樸茨茅夫to韋斯咸 自由轉會

>>July 18, 2004 at 1:29:36 AM GMT+8

2004 年 7 月 13 日 星期二 【酷熱】

原來F.6生涯不知不覺已經劃上句號，老實講苦樂參半，書本上跟得好辛苦，但係下半年識多o左人，冇以前咁悶。
校長同5 + 1呢對冤家返埋今日就退休，搞歡送會。話就話幫哂兩個搞，其實成個run down超過九成半集中o係校長身上，除o左Step致辭之外冇乜o野關5 + 1事，睇唔到坐re隔離o既佢有冇黑面。狂睇片，有o的笑位，不過o係hall坐咁耐係唔多耐煩囉。經典o既一幕：5 + 1親手送紀念品俾校長！
搞o左差唔多兩個鐘先完，返課室，收成績表，俾Miss Fung讚有邏輯思維當然好啦，不過UE再唔改進就死路一條。其實咁多科得中化可以接受，我好懷疑自己有冇o係暑假開始一鼓作氣博殺落去o既感覺，暑假得六星期，而且中間足足六日唔o係屋企，我好驚追唔到囉。
收哂成績表，為farewell作最後準備，搬檯搬凳，排位，練歌。落去invite佢上o黎，佢早就準備好，唔使勞煩我o地。一開波佢就打斷我o地先，俾我o地7A今年AL成績，呆o左囉，History差唔多全部cred哂，中史居然有人A到，勁多人連UE都cred埋，戰績太彪炳喇，無形壓力。正式farewell喇，大恩姐、Alison演講，唱歌，邀請5 + 1講「幾句」，送伍子語錄，5 + 1繼續講，佢應該好開心我o地幫佢搞party。佢始終冇放棄句句有骨，串杜sir「前程似咁」，又祝我o地最終可以步向成功。平心而論，初時我好唔鍾意佢，佢o個句「冇19分返o黎做乜」撩起我把火。之後覺得佢的確有料，o的人生哲理有時係悶o左o的，亦談唔上畢生受用，不過聽下無妨。佢都算教得幾好啦，總好過布歐，至少我明佢想點教，只係我跟唔到o既問題。好多謝佢，佢o係我心中o既地位冇Miss Leung咁高，不過一定高過其他老師。
歡送完5 + 1，輪到Step + Alison兩隻尖子，寫紀念咭，影搞笑相，祝港大Law前程錦繡。
一個理所當然o既賽果，甚至覺得已經係行大運，一支好球隊一定會有個好隊長好教練，隊長唔一定要最好波，但係一定要最識凝聚隊友，令所有隊友都服佢，教練都差唔多。集中講隊長：如果個隊長冇料扮有料，根本唔識維繫球隊，但係又乜都攬上身，隊內一定有人唔妥佢，唔服佢，唔接受佢o既領導。Leader廢，隊友再叻都交唔到功課，全軍覆沒早就預期到；唔係隊隊都有好隊長，但係有o的隊長知自己能力所限，索性唔樣樣都理，做個掛名leader就得，minimize自己o既破壞力………可惜總有人不自量力。世界上唔會有太多垃圾可以亂打亂撞位高權重，如果新隊長打到八面玲瓏，舊o個個真係面目無光，為新隊長打氣。
我係唔收口o架喇，我係口沒遮攔o架，我有o個句講o個句o者。
夜晚一家三口出街食飯，去紅磡o既一本日本料理，好耐冇去。叫錯o野，海膽太腥，全家得我一個食得落。
應該係o尋日玩掌上壓整親，兩邊胸肌對上鎖骨對落o個組肌肉拉親，兩隻手都好難舉高過膊頭。

是日矚目轉會：
卡維(挪威前鋒) from華倫西亞to比錫達斯 轉會費不詳
基斯普(阿根廷前鋒) from車路士to AC米蘭 借用

>>July 18, 2004 at 1:27:09 AM GMT+8

2004 年 7 月 12 日 星期一 【晴】

個夢咁正，1000萬個唔想醒囉。
今日完全係鋤D日，一日到黑係咁鋤，余雪瑩叫入hall都唔理喇。閃落勁迫o既SA房，打開櫃桶，掟牌入去方便收埋，余雪瑩一次、肥曾兩次走入o黎，巧妙咁引開佢o地注意力，鋤o左個幾禮拜都冇俾人叉。肥曾第二次撞入o黎，見到衣衫不整o既龜………Hall未放人就上樓，繼續鋤，三煞位俾挺一o野破o左。
又俾人叫入hall，又巧妙咁轉去Geog Room打躉，鋤冇幾盤，周sir入o黎，趕哂o的人坎，返課室囉。牛榮漏低o左12隻牌o係樓下，冇得鋤喇，唯有改玩非洲話事啤，陳江始終唔肯做上鋪o個660次掌上壓！玩o黎玩去都係掌上壓，好抽唔抽抽著隻街磚2，好彩肥峰、牛榮有人性，20次算喇，不過我想話我不嬲都唔太擅長做掌上壓囉，手力尚算OK不過持久力麻麻，反而sit up都還可以。
聽幫5 + 1搞farewell，放學要綵排，第一次認真睇歌詞，牛榮彈結他，乜我要做帶路先生咩？唔係好識唱，好多melody都唔o岩，話哂5 + 1都教o左我o地好多，臨走前點都留個美好回憶俾佢啦。

是日矚目轉會：
基士文(塞爾維亞及黑山前鋒) from恩浩雲to車路士 500萬鎊(工作證獲批，交易成功)
施雲奴(巴西左閘) from切爾達to巴塞隆拿 130萬鎊
路亞路亞(剛果民主共和國前鋒) from紐卡素to樸茨茅夫 175萬鎊
安斯禾夫(英格蘭後衛) from愛華頓to樸茨茅夫 自由轉會
卡頓高爾(英格蘭前鋒) from車路士to阿士東維拉 借用
米斯(英格蘭右閘) from列斯聯to曼城 自由轉會

>>July 13, 2004 at 1:36:28 PM GMT+8

2004 年 7 月 11 日 星期日 【酷熱】

派o左成績表副本，Buss排名同之前o既有分別，唔理喇，最慘係PE飲恨俾龜！如果o的course work係我AL最後成績就發大達喇～
唔知係精定係笨咁冇去海下，o係學校無聊咁過。入hall聽法律講座，講者叫林嘉欣，懶好笑。講好多呢樣條例o個樣條例，統統關校園暴力事，謝霆鋒獲輕判o既理由好牽強。Q & A時間，唔太明Oscar想問乜，又有人爆響口，其實我都諗到問題囉，不過俾人禁止舉手，而且俾機會低form問啦：教唆自殺有罪，咁如果路人甲做o左某o的事，令路人乙產生自殺o既念頭，最後死o左，咁路人甲算唔算教唆自殺？世界上冇完美o既法律，如果法律係完美就唔需要法庭同司法制度。
搵5 + 1，你眼望我眼，連點樣開口叫佢出o黎都唔識，最後由我頂硬上，最好聽日收到o既係百佳coupon啦。
Hall有歌唱比賽，冇興趣，我堅持要學國語唔應該學普通話囉，呢個世界從來只係聽過「國語歌」。勁多人o係SA房hea，有o野食，各有各做o野，基本上係1 + 2 + 6組合，自己睇進攻足球，警覺性要好高。好多人都無端端衝入o黎，唔好理我喇。Billy繼續係被圍剿o既對象，今次佢又太激起公憤o既，我都想俾人圍揪。Hea到差唔多夠鐘，返課室，今日鋅係好無聊呀。
林嘉欣提過陳果幾年前拍o既《等候董建華發落》，睇過一次，撞正晏晝o係電影台又播。o係1980年代犯o左嚴重罪行o既18歲以下青年罪犯，因為唔可以判佢o地死刑，全部俾法官判「等候英女皇發落」，由佢決定刑期。但係直到主權移交前夕，呢班當年o既罪犯仍然未得到確實o既刑期，只能夠無了期咁等，後來董建華政府上台，佢o地好多都仲未得到判決。只係拍戲，不過o係螢光幕前都感受到佢o地o既痛苦，痛苦，唔係因為要坐監，而係佢o地根本唔知自己仲要坐幾耐監。毫無疑問，佢o地犯o左罪行好嚴重，應該要接受應得o既懲罰，但係最低限度應該俾佢o地知道自己要點樣對自己犯o既錯負責，唔應該令佢o地受盡心靈上o既折磨，我唔相信折磨係合理懲罰o既一種。

是日矚目轉會：
桑治(喀麥隆中堅) from朗斯to加拉塔沙雷 250萬歐元
干查(丹麥翼鋒) from車路士to伯明翰 220萬鎊

>>July 12, 2004 at 3:35:01 PM GMT+8

2004 年 7 月 10 日 星期六 【晴】

諗住o係屋企無無聊聊咁過，娘親失驚無神捉我出街，唔知乜o野風吹佢入將軍澳行吉之島，留意，係齋行超市。好迫，o的車橫衝直撞，痛到我o丫。好多試食，求其行下又掃o左好多貨，唔使再揀「波糧」，煙三文魚味芝士醬，紅到好似牛肉o既豬柳。
原來將軍澳吉之島早已經冇o左美食廣場，周圍搵o野食，搵到間睇落好似唔錯。A-P餐任揀，其中兩個餐娘親話o個o的o野太普通，好易整，叫我唔好叫，望見佢指o個兩個，當堂呆o左………八成熟o既牛柳十足半生熟咁o既？
搭98C返屋企，前後都俾粗口攻勢夾擊，後面個麻甩佬，話阿根廷輸波就係打假波，寧願買外圍；前面o個兩個飛女講仔，又粗口四起，扮聽唔到。好慢呀，如果唔係娘親話想有位坐，30分鐘就返到歸。

是日矚目轉會：
桑恩戴維斯(英格蘭中場) from富咸to熱刺 300萬鎊
戴維斯(荷蘭中場) from巴塞隆拿to國際米蘭 自由轉會

>>July 12, 2004 at 6:16:32 AM GMT+8

2004 年 7 月 9 日 星期五 【綿綿細雨】

有冇人聽過「校本管理條例草案」？幾日前o係保皇派o既護航下，呢條草案最後得到通過，最遲2010年，所有津貼學校一定要成立一個包括家長、教師、校友o既法團校董會，向政府負責。
教統局局長聲稱呢個係「校政民主化」o既第一步，又話唔明點解民主派把口支持民主，但係又反對條例實施。董政權會搞民主？太陽由西邊升起喇。當然，加大學校管理o既透明度冇乜可能會有人反對，不過校本條例真係為o左o係學校推行民主？
「民選」o既家長、教師、校友o係新校董會佔唔夠四成，談何民主？條例實施後，如果政府唔滿意辦學團體o既表現，有權隨時撤換舊校董，新o既由政府委任，好明顯，政府o既權力係過大，大到可以威脅辦學團體－特別係教會－o係學校o既影響力。政府搞校本條例，美其名係「民主」，背後最大o既動機係借助家長、教師、校友加入校董會，打擊教會學校o既力量，從而將教會學校控制o係手中。
香港周圍都係教會學校，唔太受政府教學指引o既直接影響，最明顯o既係公民教育環節。早排幫李sir執o野，睇到好多港英時期o既公民教育教材，大部分都牽涉民主、人權、司法獨立呢o的內容；主權移交之後，以前o個類topic冇哂，取而代之o既係「我的祖國」、「愛國」、「報國」呢o的世界上最抽象o既概念。所謂o既「愛國教育」o係官立同左派學校都進得如火如荼，唯獨教會學校冇完全照做，左派人士早已經唔妥教會學校唔全力灌輸「愛國」觀念，想郁教會好耐，依家機會終於o黎到。
只要政府「陰乾」教會o係教育界o既地位，當政府完全控制所有學校，就可以盡情推行「愛國教育」：o係專制社會，當權者最重視對教育事業o既控制。政府可能係留意到上年七一遊行開始，多o左好多熱衷社會事務－變相同政府對著幹o既年青人，證明未能夠完全將年青一輩「洗腦」，所以先要急於盡快通過校本條例。
絕對認同更透明o既校政，不過可以肯定o既係，校本條例100%唔係民主o既產物，相反，佢係政府進一步操控社會o既其中一步。

是日矚目轉會：
普斯迪加(葡萄牙前鋒) from熱刺to波圖 球員交換
文迪斯(葡萄牙中場) from波圖to熱刺 球員交換

2004年Eric好歌流行榜(第27週)：
1)吻別的位置(李克勤)
2)舊人(劉浩龍)
3)常言道(劉德華)
4)分流(陳小春)
5)與神對話(許志安)
6)地平線(官恩娜)new
7)對不起不是你(陳慧琳)
8)算數(盧巧音)new
9)眼紅館(Kenny@Boy'Z)new
10)好好戀愛(方力申)new

>>July 10, 2004 at 4:17:05 PM GMT+8

2004 年 7 月 8 日 星期四 【酷熱】

小妹一入課室就捉住我講呢樣講o個樣，暑假o既CEPA賽程緊密，肯定唔可能100%出席，博繼續SCMP喳。終於臨學期尾登埋最後一次letter，從歐洲國家盃看人生，又俾人成段cut哂，唔記得加廣告對白。
諗住博大霧齊齊o係課室Mafia，都係俾李sir叫哂落樓去1C聽ICAC talk，不過仲有人可以成功唔出現。o的講題唔知算唔算有用，只係發夢，睇帶，做人生交叉點，o的point搞笑成份居多。依家o的F.1串o左好多，遲少少還課室，敲門話夠鐘，等多陣唔使死o掛？
極速落5C影班相，返課室繼續大玩特玩，本來係UNO，後來又重返Mafia大隊。多新丁，不過超刺激，o的心理戰鬥到飛沙劈石，好想做killer添。一兩次成功捉到兇手，不過瞞天過海o既居多，越玩越大，又成功冒險o係中途先表露身份，殺哂兩個jack仔。玩afia上o左癮添，會唔會好似5B當年o既GBA咁做埋7A指定遊戲？
環境教育組搞墨魚團，放學返屋企食埋飯換埋衫先出門口。約o左小妹佢o地o係鑽石山等，唔夠早到，射下籃先嘛，等巴士，好蠢咁走去上層，返落o黎坐樓下，怪怪地o既座位配搭。架車去到邊度小妹都話似曾相識，好多冷場，扣分唔好扣到咁離譜喎。頗為早到，不過又蠢o左，遲o左落車，返轉頭去百佳。去碼頭，隔離o既露天茶座，拍緊《四葉草2》，冇乜邊個識。
差不多30人組團，周sir件衫………隻船幾靚，上船頂坐，太大風玩唔到牌，悶悶地返船艙玩UNO，唔暈船浪原來係最大優勢，不過玩唔到三局，上岸。去橋咀睇連島沙州，沙灘水清沙幼，有得露營就好喇，條路真係似腳底按摩嘛，其實幾好行。影完團體相，周sir帶路沿海邊爬石，之變o左我同Judy帶，爬上爬落幾好玩，不過始終冇辦法兜一個圈，見到燈塔就要返歸，成身濕哂。
返上船，去吊鐘州睇洞，好Geog書o既相，開始收太陽，吹住海風soft到o丫，o的o野都係俾Geog人睇，冒險o係船頂玩UNO，好彩吹唔走，肥峰撞聾。日落，開餐，o的消息好震撼，PA人Bio人個個拍爛手掌，下年o既荃官人面全非。
個天黑哂，釣墨魚時間到喇，不過始終同墨魚冇緣，o的初哥個個都釣到，我仲係零收穫，呢幾日o岩o岩好係釣墨魚季節最後o個幾日，撞正一流天氣，勁多墨魚上釣係我冇運o者，sorry囉，我行路冇聲嘛。船家搵蒜頭、辣椒炒o的墨魚，都係鍾意用蝦醬炒。準時21:30埋岸，唔俾o係上層跳上岸，得o架。
即場解散，早就口痕痕想食滿記o既香蕉pancake，一直都persuade小妹佢o地去食，唔知點樣差不多20條人操兵咁操去滿記，似班馬劈友多o的，好遠，差o的俾人劈，到喇，劈啦。冇想像中咁多客，坐出街，唔知榴槤忘返係乜，亦冇人叫。
食完集體散場，有人好蠢地返碼頭搭巴士囉，o係中途站等綠van，好耐冇飛車，不過個司機好安全，反而有o的唔習慣。唔使擰轉頭啦，有倒後鏡嘛，我o地唔理o架喇。17分鐘，巴士o既一半時間出到彩虹，轉地鐵，Judy繼續沉睡，龜龜牌枕頭唔係某人專利。個個都散哂咁滯，但係我OK精神囉，只係坐船o個陣冇事，上左岸返到屋企就有暈暈地o既感覺。
1000萬個驚嚇 + 無奈 + 放長雙眼，可能係我先入為主o既主觀情感，不過呢單o野我認自己黑心，吹咩？另一方面，1000萬個恭喜 + 期待 + 順眼，擺明大細超o架啦，呢個係人o既問題。

是日矚目轉會：
哈索賓基(荷蘭前鋒) from車路士to米杜士堡 自由轉會
米芝洛(荷蘭後衛) from車路士to伯明翰 自由轉會
高洛治(英格蘭前鋒) from阿士東維拉to修咸頓 200萬鎊
迪拿達利(意大利前鋒) from安玻里to費倫天拿 300萬鎊
夏迪(愛爾蘭左閘) from列斯聯to利雲特 轉會費不詳

>>July 10, 2004 at 4:36:12 AM GMT+8

2004 年 7 月 7 日 星期三 【酷熱】

豐富得好過份囉～
李sir俾o左一大疊notes叫我派，每16紙，暑假睇哂，Financial Mgt好多o野讀。
環保教育組要收番哂每班o既廢紙回收箱，我、肥峰、陳江做跑腿上F.3 & 4收，有得乘機搭lift，陳江講o個單料略有所聞，10個驚嚇。o的箱好yeah囉，乜都有，求其掟o係窗台由佢o地執手尾，o的箱好麻煩。o係Geog Room冇乜點幫手，係咁意執少少就掛住偷懶，謝玉蓮、溫婉彤黑面添。鋤D，邊鋤邊叫某某人向某某人認錯。最後唔知點樣搞o左一大輪，成棚人坐埋一齊，改玩UNO，不過玩o左冇耐，俾人叫走o左趕下場。
History Society搞drama，搵齊F.1玩中史。其實我都唔知自己要做o的乜，o係cover同後台之間走o黎走去，好似做緊o野，其實志在睇戲。F.1做戲唔要求得太高，荊軻刺秦王o既幾個劇情犯馱冇所謂啦，都係睇跳Nami Nami + 食饅頭o者，同埋水中漫步 + 插水式自刎。邊個贏都冇分別啦，都係玩下笑下o者，Oscar講o個o的好suggested answer風格。Miss Leung請後台飲汽水，俾Law Sir炳我惹蟻，睇Vincent彈琴，留意住小妹o既反祇，果然彈起。返課室，唔知o的人拎哂Buss notes未，都係聽日先俾李sir啦。
約o左Miss Leung幫Step + Alison搞farewell，但係Alison病o左冇返，得Step係主角。被安排殿後等Miss Leung，不過好快追到大隊。去客家好棧，大部分History人都到齊，V3房好迫，坐14丁人。機關槍式咁點o野食，狂風掃落葉，搶攻喇，話之甚至希臘式留前鬥後。俾人狂扣分，唔好係又扣唔係又扣喎，點可能半餐飯就扣o左1000分？叫甜品，可能我發音真係有問題，「生物(蔘蜜)燉蕃薯」，好遲先出世。好快就食飽，不過理所當然地唔散場住，Miss Leung走先，玩唔到佢話想玩o既Mafia添。又玩喇，而且十幾人會好好玩，規模好大，不過個個都收唔到聲，Step + Candy最厲害，玩o左等於冇玩。開始越玩越有味，Mina做o左邪神，估親都唔中，今次o的killer好快就被識穿，我行運，唯一一次抽到killer成功隱藏身份。玩得越耐越俾人歧，堅持繼續玩，話之waiter唔加水，自己搵。好似有o的阻住人做生意，但係下午茶時間應該唔會太多人，最後玩到16:30先肯走。
是日矚目轉會：
維度卡(澳洲前鋒) from列斯聯to米杜士堡 450萬鎊

Re Pang:成日都係咁o架啦，好多論政forum都有好多口水佬鬧完一大輪之後玩失蹤。
Re Cafu:民主黨就好難講，其實佢都受中產支持。民主黨只係泛民主派o既其中一個大黨，仲有民協、前線同獨立人士，你似乎將「民主黨」、「民主派」混淆，民主黨有陣時自視過高，當自己係泛民主派o既大哥大，某程度上o係我心目中失o左分，但係我100%支持民主普選，亦肯定自己係支持泛民主派，只係我唔完全認同民主黨。正係因為今日o既香港出色o既政治人才唔多，我o地更加要擴闊政治空間，開放政治環境，有能者先會肯投身政界………斷唔係先培養好人才，「提高」早已經非常之唔差o既公民質素，然後先「倒果為因」咁考慮可唔可以進一步開放民主。

>>July 8, 2004 at 4:09:39 PM GMT+8