2004 年 6 月 26 日 星期六 【清涼】

「今年4月26日，香港尚未正式開始政制改革的討論，人大已強行否決香港於2007年普選行政長官和2008年普選立法會所有議席，扼殺廣大香港市民的民主訴求之餘，更嚴重損害香港的司法獨立。
自踏入2004年起，親北京政客、商人三番四次以『不愛國』、『漢奸』、『奪權』、『搞港獨』、『破壞經濟』、『敬酒唔飲飲罰酒』等似是而非的言論，肆意侮辱爭取民主的港人，使港人透不過氣來。立法會選舉臨近，不少港人投訴遭內地官員威迫利誘，於選舉投票支持指定的候選人，顯示香港選舉的公正性已受內地的嚴重干擾。
五月，三位著名電台節目主持人鄭經翰、黃毓民、李鵬飛相繼因受不住政治壓力而宣佈『封咪』，李鵬飛更被內地官員無形的威脅而退下去。過去香港成功的最重要因素，最重要的核心價值－言論自由，已遭到直所未有的衝擊。
延續去七一，今年元旦的民主精神，為了捍衛我們的權利自由，為了爭取我們應得的普選權，為了表達對中央政府漠視港人意見的不滿，為了向曾憲梓、鄔維庸等踐踏港人的政客說不，為了自己，為了香港的未來，請踴躍參加由民間人權陣線舉辦，七月一日的大遊行，顯示自己的聲音，表達自己的訴求。
去年我們捍衛自由，穿上黑衣；今年我們爭取民主，穿上白衣。學生要自主，香港更要民主，七一遊行，更需要你的參與，中學生聯盟約定各位下午二時三十分在維園等，七一維園見！」
最新消息：以上係中學生聯盟website版本，事實上應該係同樣時間o係中央圖書館集合。
阻各位幾分鐘時間喳，點都click入去睇下啦：www.hkssu.org/71(2).wmv

好耐冇睇《EURO A GO GO》，o尋晚睇到好夜，笑到我o丫。劉舜文俾人審犯，低能，不過佢支結他真係拍得住比利把烏鴉口，波友落注前唔可以唔聽下呢個有線歌臣邊o的乜。不如Cable Music真係幫佢出隻碟啦，笑下都好嘛。唔知點解o尋晚o個集係搞笑過以前好多o架，最衰太夜做，想睇都睇唔到。
屋企o的凳張張都五癆七傷，要去宜家入貨。先去旺角始創o個間，好迫，好多人，好多情侶。每次行傢俬舖都有好特別o既感覺，見到咁多唔同o既設計，尤其係客廳，總會諗到聯想到好多好多。旺角o的款麻麻地，又唔o岩屋企o既「特殊」環境，索性入沙田，睇旗艦店o個o的，果然搵o岩心水，不過即刻諗到問題，咁多凳點運返屋企？最初諗住叫爸爸接我o地，費事阻住佢，諗住自己飛的，最終發現叫宜家送貨仲平過自己運。個店員係咪聽唔明廣東話？旗艦店都好多人，都好多情侶，咁鍾意行傢俬舖o既？前後買o左三張摺凳四張圓凳，兩手空空咁行出宜家。新城市周圍都爆哂棚，諗住去到美心都要等位，突然見到空檯，超好彩。

>>June 27, 2004 at 3:41:43 PM GMT+8

2004 年 6 月 25 日 星期五 【清涼】

考完試，其中一個最重要o既娛樂一定係踢波，感覺上冇踢好耐，其實都不過係10日。
10:10先到沙咀，人山人海，o的預備組球員都o係沙咀出現，仲有正選隊生力軍Judy，加加埋埋20人堆o係球場。起初係前5B為骨幹o既大戰預備組，以我為首o既好多人都唔o係最佳狀態，我o地最冇辦法應付冇章法o既球隊，5B最擅長o既都係穩守突擊，主攻冇乜料到。我冇態o既最好證明，一時控甩腳差o的俾人偷雞，一時斬唔起，信心。失o左兩球，俾鰻魚如李天單對單射入，都係落地慢o既問題。不斷咁打，不斷換人，兩隊都開始冇章法，亂鬥亂，勁多門前失機。隻腳不嬲都潛伏o左好多傷患，斬多幾腳食唔應，接埋波，開始又痛，嗌換人，場邊聽唔到，死撐。最後終於離到場，真係痛痛地，之後都返唔到球場。曝曬，好熱，成身汗，赤膊，大肚腩添。個個踢到散哂，例牌time out完就冇再鬥，預備組散場，正選組繼續o係球場流連。都唔會點踢o架啦，唔想整親手，又學唔到伊巴謙莫域。
差唔多12:30先散場，自己都聞到自己o的汗味，返到屋企即刻沖涼，凍水o個隻，舒服到o丫。o係太陽底踢波，曬黑唔係問題，不過曬得好肉酸囉。

2004年Eric好歌流行榜(第26週)：
1)常言道(劉德華)
2)丟架(Twins)
3)處處吻(楊千嬅)
4)我在存在(黃貫中)
5)一夜成名(傅珮嘉)
6)對不起不是你(陳慧琳)
7)分流(陳小春)new
8)波友(梁漢文)
9)舊人(劉浩龍)new
10)吻別的位置(李克勤)new

Re蚊：多數見人，咁之前兩日見唔見？
Re路人邪：基本上係冇活動可言，15/7開始放暑假。

>>June 26, 2004 at 2:45:23 PM GMT+8

2004 年 6 月 24 日 星期四 【清涼】

過足戲癮，打足三個鐘，加埋時射埋十二碼，三更半夜開波，天光都未完場，出去飲早茶都仲得！
今屆第一場八強就咁緊湊，不過係緊張有餘精彩欠奉。英格蘭第四次o係大賽射輸十二碼，非戰之罪，碧咸一飛沖天，太有信心，太唔小心，明知之前o係呢個球場射失過十二碼，射之前係咪應該check清楚草地？英格蘭出局算係冇運，不過艾歷臣今場o既調兵遣將同戰術調校都好有商榷o既餘地，間接斷送o左球隊o既前途。朗尼30分鐘唔到就傷出，既然英格蘭要鞏固中後場，點解換入o既係同奧雲作用一模一樣o既華素爾？放祖高爾或者戴亞落場，冇影o既史高斯由偏左中場改踢後上前鋒，似乎會對英格蘭o既攻防效率幫助大o的。艾歷臣一開始執教英格蘭以o黎，一直都採用穩守突擊o既戰術，但係有時覺得佢太保守，兩年前對巴西、今屆對法國都係類似o既情況，依家對葡萄牙，犯o左相同o既錯誤。開波3分鐘奧雲就偷雞成功，之後英格蘭即刻打龜縮戰術，擺明要死守埋o個87分鐘，呢個好有問題，有冇必要咁快就全軍退守？奧雲o個球嚴重o黎講唔算攻勢，英格蘭基本上係全場捱打，中場完全俾葡萄牙控制哂，「鑽石中場」打得太後，俾太多時間葡萄牙球員o係中場控定睇住踢，冇主動搶中場。相反史高拉利o既調動勝在夠大膽，費高冇料到，係遲o左少少，不過總算敢換佢走，森馬奧、普斯迪加、雷哥斯達呢三個後備兵就炮製o左兩個入球。要數今場最佳球員，非艾殊利高爾莫屬，120分鐘內o係左路一個俾四五個輪流攻，全部守得住，仲有氣有力助攻，加時護空門，八面玲瓏。
今屆英格蘭唔算太差，亦唔需要炒艾歷臣，英格蘭o黎o既世界盃外圍賽對手唔算好強，可以好好摸索比穩守突擊進取少少o既戰術，或者係華倫西亞o個隻，所謂「鑽石中場」似乎只係理想名詞。選多o的唔同類型o既前鋒，希斯基可以唔要，如果阿倫史密夫聽聽話話，一定幫到英格蘭好多。
12:30小睡片刻，準時02:35起身，05:40先再撻落床，08:10先知醒，冇所謂，施施然嘆報紙，09:40出門口，中化小組討論10:20先開始。返到學校，見到疲憊不堪o既牛榮，原來自己o既狀態已經出奇地好。其他人早就上哂7A等我o地，同組仲有豬紅 + Danny + 林燕虹，臨時加埋劉景霖，第一次六個人玩。問政府應唔應該開徵銷售稅，呢o的偏向時事性o既論題o岩哂發揮，話哂曾幾何時都讀過Econ，掟到少少concept落去。全場好似得Danny贊成全面開徵，但係出奇地冇俾人圍剿，個個都俾人質疑過。老馮推算今次男仔應該冇女仔咁好成績，但係我有信心推翻呢個睇法………「以為自己可以在這場長途單車賽中，『由頭帶到尾』，無疑太過天真，到了一個階段，倒是韜光養晦，可能才是上上之策。」「滿招損，謙受益。」
CE oral今日先考，其實係唔想咁遲囉。15:05出門口，o係車站到o左好耐都未有66X到，又冇可能改搭66咁笨，結果15:35先上到車，o岩o岩好報到時間(16:15)先去到屯門大興宣道中學，仲要行足六層上樓，成吉思汗打仔。
早知唔使咁趕，裝到張o野，我係Session 1尾二o個組考，o係報到室hea足個幾鐘。見到o既大部分考生都三尖八角，多數人o係度刨應試指南(oral都有o野刨？)，我o係度繼續睇《新君王論》，已經睇哂36節，開埋下本《李鵬飛回憶錄》，暑假前睇唔睇得哂？
坐到17:50先輪到我，訪問演員，識執生，轉字眼。唔難o丫，讀o野o者，不過examiner講到唔清唔楚，要佢重覆。做Candidate B睇到餘下兩個講成點，C可以唔使理，超時 + examiner都唔明佢o既問題；D好似幾有料，一開口就Alison咁o既款。Group Discussion傾搞drama，諗住我放頭食o左個勢先，點知俾D贏半步，結果俾佢佔o左先機，唯有跟住第二帶起氣氛，叫人講o野。D犯o左好嚴重o既毛病，佢四次打斷我o既說話，等扣分。都係平平穩穩講到尾收貨啦，呢o的都唔係鬥講得多，而且我o的argument好似幾有見地，100%冇可能落得上次o既成績。
18:20先走得人，行去巴士站好隔涉，又要等車？今次又等o左18分鐘，不過睇住李鵬飛等唔覺得好耐，邊睇邊俾阿伯歧，禁書o黎o架？

>>June 25, 2004 at 4:01:10 PM GMT+8

2004 年 6 月 23 日 星期三 【清涼】

翻查紀錄，話就話德國之前殺得入2002世界盃決賽，不過原來佢o地由1998世界盃開始，已經連續四次國際大賽o既決賽週贏唔到歐洲球隊。相信再忠實o既德國球迷唔會否認，今屆o既德國絕對唔係傳統上世界上最難應付o既球隊之一o既德國。傷兵滿營，兵源短缺，攻力不足，太依賴波歷克，場上球員紀律性極高，不過狀態級數唔足以執行預定o既部署。限米煮限飯，其實呢o的都唔係禾拉o既問題，佢其實冇必要辭職，我覺得佢o既領軍能力係世界數一數二。兩年後德國唔可以再o係江東父老面前失禮，新領隊係邊個都好，都應該好好徹底整頓德國國家隊，重組人腳戰術，始終冇o左德國o既世界球壇硬係差少少。可惜我唔太熟德國，唔知德國可以點變。
極速o既六日考試，今日到o左最後o既History，時間真係過得超快。呢幾日來來去去都係睇o個幾份notes，好似讀極都唔夠，o尋晚已經放棄o左，反正讀哂都可能唔識答。
唔好遲o的先？肥曾今朝先話我o地知今日之內要清哂課室locker，臨急臨忙點執？擺埋一邊先。
分科坐，調到好前，唔慣。DBQ清一色講德國，o的source好似唔算太難明，竟然一粒鐘就做哂。兩個鐘做兩條essay仲唔發達？清一色揀哂兩條WW1題，早就摸熟國際關係變化題o既approach，決定唔將trace & explain明顯分開寫，四版交貨。Q7問how important唔知有冇中招，事後聽tutor講應該唔使同其他factor做比較，有冇離題唔係最重要………我呢條寫o左三版喳！成份卷我夾夾埋埋寫得12版，明顯唔夠，真係唔知點死。考考下Miss Leung兩次入o黎巡，第二次，o係我隔離企o左一陣，擺明望緊我份卷，唔敢望佢，苦笑。11:30吹長雞，狂風掃落葉式六日考哂，頻密賽程捱過喇！
盡情鬆下先，考完即刻拉大隊唱K，搵埋子建，仲有我 + 小妹 + Judy + 龜 + Candy + Polly + Step + Cindy + 希，10條衝上Green Box搵位，撞到又考完試o既Lo一行人，佢o地轉陣地。我o地又搵到房喎，仲可以唱到16:00，放肆咁唱喇。初頭點點點，見歌就點，點十首cut八首，而且每人口味唔同，有o的歌其他人聽都未聽過………唔好做到好似係我霸咪o既假象啦，邊個點o左就唱啦！唱o左幾首新歌《大方》、《大雄》可能都係我以後唱K必選，都係唔好扮苦榮喇，龜Rap多o的歌啦，Polly繼續沉默，Candy第1000次點完唔唱，《夏日Fiesta》附上小妹 + Step熱舞助慶！小妹走先，Step之後又走，16:00未到周杰倫都俾人停機。好耐冇唱K喇，唔記得《半斤八兩》添！
考完試，肆無忌憚喇，可以半夜隨便爬起身喇，o岩o岩趕得切！

>>June 24, 2004 at 3:37:54 PM GMT+8

2004 年 6 月 22 日 星期二 【清涼】

可能真係識做戲o掛，我唔覺得丹麥同瑞典都打假波囉，既然賽前已經謠言滿天飛話場波會2比2完場，o的球員會唔會咁蠢真係踢成呢個比數？而且睇重播，兩隊都積極搶攻，你一段我一段，如果咁都係打假波就無話可說，總之我唔信場波係內定，2比2係天意。講到尾丹麥、瑞典o係分組賽都發揮得比意大利好，踢法簡單實際，球員拼博，值得打入八強。意大利唔怪得人，查柏東尼排陣失當，托迪多口，韋利冇態，初賽出局根本係咎由自取，兩年後帶意大利去德國o既會唔會係納比？
滂沱大雨o既朝早，完全冇考中化速讀o既心情。兩篇有中史o野，如果早幾日考咪好囉。速度比以前慢o左些少之餘，有o的題目唔識答，雖則明知寫到o野都係錯o既居多。
今日o既《都市日報》節錄o左李鵬飛o既回憶錄部分內容，講陳方安生同李柱銘，本o野又有得免費換領！考完即刻撲去天后，10:25上到CUP出版社，人家10:00已經開始派，50本早已經派哂！不過原來今日o係office買有特價，六折，唔止《Memoirs of Allen Lee風雨三十年－李鵬飛回憶錄》，連早就想要埋o既蔡子強《新君王論》都有得六折！兩本加埋都不過係$57，梗係即買啦！老總幾醒喎，一眼就睇得出我想修政治學。兩本書都買到，咁我就唔使book coupon喇，下次可以問5 + 1再要百佳！
李鵬飛：「蔡子強………熟識很多著名歷史人物的言行，並作過深入研究，可說是博學多才。他這本書《新君王論》，旁徵博引，引用了很多歷史上著名領導者的所言所行，來為現今香港政壇提供寶貴的養分，十分值得一讚，我誠意向讀者推介。」
盧永雄(星島報業集團行政總裁)：「前紐約市市長朱利亞尼的《Leadership》(小弟按：港譯《決策時刻》)一書早前廣受談論，我認為香港也應該有自己一本講leadership的書。不光是從政者要看，商界中人也應該看看，才會明白怎樣才是優秀的政治領袖。」
蔡子強o係書o既封面開宗明義講「站在世界政治巨人肩膊上，會看得更遠。由德川家康、羅斯福、邱吉爾、列根、朱利亞尼、鮑威爾身上學習他們的政治智慧。你也可以做特首。」第一頁就話想做第三屆特首，最好通過呢本書，學習政治領袖應有o既風範，梁先生，留意第四、六課喎！
全書36課，通過講述唔同中外名人o既言行，評論董班子過去七年犯o左乜o野錯，搞到今日o既地步。睇o左15課，我反而覺得本書幾好笑，好幽默，口沬橫飛 + 不可一世係葉劉淑儀最大死因；梁錦松「機關算盡太聰明，聰明反被聰明誤」一手摧毀自己o既政治前途；董建華IQ高唔高見仁見智，但係EQ一定低。
睇得太多喇，放鬆哂，明明聽日仲有History煞科戰，已經冇乜心機搞。刨o左Reading Report + Essay + DBQ喳，仲要係齋下學期，唔知會死得幾慘。

P.S.中聯辦副主任李剛爆響口喇～

>>June 23, 2004 at 2:07:03 PM GMT+8

2004 年 6 月 21 日 星期一 【清涼】

又一場抵睇o既波，英格蘭同克羅地亞都唔係攻力強o既球隊，但係夾埋竟然炮製到6個入球，最後英格蘭o係法國之後次名入八強，硬撼東道主葡萄牙。
史高斯終於打破三年o既入球荒，朗尼狀態fit到無過可說，奧雲大可以企埋一邊。不過其實英格蘭贏波都係多得克羅地亞佈陣上犯o左兩個嚴重錯誤，俾碧咸以外o個三個中場太多活動空間同射門空間，英格蘭先組織到攻勢。英格蘭防守死球的確有o的問題，分組賽o個四球都係咁失，C朗拿度、迪高、費高都係葡萄牙o既死球專家，好難想像占士可以保住清白之身。
亨利終於開齋，法國首名出線對希臘，話希臘防守強，不過分組賽場場都失波，好似除o左揭幕戰之外都唔算好突出，而且到o左重要關頭，希臘輸經驗都輸死，唔多失已經交到功課。
唔當聽日o既中化速讀係乜o野一回事，為History備戰，炒o左中史，呢科唔衰得。用o左成朝睇住龍舟執好哂o的notes，同中史o既approach少少唔同。睇哂自己同人o地o既essay，級數真係差好遠………
行百佳，o的特價擺明係為睇波而設，啤酒、薯片、杯麵、花生………

>>June 22, 2004 at 1:25:06 PM GMT+8

2004 年 6 月 20 日 星期日 【清涼】

為o左今日o既中史，足足準備o左………兩日，煲冇o左半條人命，係兵行險著咁揀得好少o黎溫。
少少雨o既朝早，課室鎖o左，o係cover呆o左陣，蝦相當識做咁借key開門，繼續漫無目的咁揭notes亂睇，中史人坐埋一齊亂tip題目，我都想有記憶麵包！
上路喇，首先見到DBQ，秦代覆亡？揭下入面o的題目，大檸樂喇！！！治亂史冇唐都唔緊要，經濟史竟然唔出租庸調兩稅！！！大失預算喇，做住治亂史邊吹邊盤算，足足用o左58分鐘先完第一條，好彩達到標準。做o左宗教先，又控制唔到時間，嚴重time mgt失誤。唔敢掂黃魚，都係死死地氣漢武王莽啦，死哂，之前睇o左好少呢個topic喳，三版差些少。大戰氣氛濃厚，一緊張就人有三急，好多人都舉手，以為有人唔記得沖水添。最後o既DBQ………得20分鐘俾我做得幾多得，唔諗，齋譯古文算喇，加個自己o既「貴族習氣」當有加o野。11/11係邊個已經呼之欲出喇，我合唔合格到都成疑問！
上次o既grouping改去仙X林，o係我o既角度係貴貴地，仲係唔肯放棄賽後檢討。暑假好似有頗吸引o既Study Group，大量猛人助陣，我可唔可以轉工？做o左冷氣機代言人，唔記得o的印仔。
晏晝兩個listening移師入hall考，不如唔好用receiver就咁聽啦。中化o個個topic以前聽陶傑講過，冇睇過《英雄》，唔敢講佢係咪有政治宣導意味，只可以話如果某方抗拒另一方，強行將兩邊拉埋一齊，後果不堪設想。靠英雄o既世界唔一定係悲哀，正確o的應該係「靠一兩個英雄o既世界最悲哀」，o係香港，英雄唔止一個，有50萬個。今年香港會誕生幾多個英雄？數字唔係最重要，最重要係證明我o地仍然有呢份堅持。
UE Listening唔再講心理病，全球化。初頭順風順水，係最後o蹶幾句聽唔清楚，其實我聽到即係人人都聽到。
15:30考哂，冇走，成棚人o係課室UNO大戰。兩個listening中間o個節我N戰全勝，今次回復正常，六七個大部分各有勝負。肥峰下家成日俾佢draw牌，我次次都cut唔切牌，Vincent死硬派cut牌專家，大恩姐口頭禪「你聾o架？」，陳詩韻最慘，玩o左成粒鐘無數round都贏唔別一次，整定o架。
鬆人，見到o的o野，驚就收歛下啦。
得番History喳，今日唔溫住，兩日時間博殺！

Re不知名荷蘭躉：唔知會唔會有人想reply你，o個個人如果想講o野，請注意言詞。

>>June 21, 2004 at 1:56:47 PM GMT+8

2004 年 6 月 19 日 星期六 【清涼】

又一塊肥豬肉o係咀邊掠過喇～
應該係決賽週一星期o黎最精彩o既賽事，捷克對荷蘭，捱夜睇呢場乜都抵，私底下搵陳江幫手落住買2比2波膽。兩隊大打進攻足球，全場鬥攻，23分鐘已經入o左三球，雲尼斯達萊o個球嚴格o黎講應該係越位o架。我一直都好有信心捷克可以追埋o個球扳平，之後兩隊拉鋸到完場，終於等到71分鐘巴路士射世界波追和，叫糊喇，尼維特30碼怒射過唔到門楣，咁都入唔到仲唔係我o既世界？記得N年前我條3串1臨尾香嘛？當時利物浦完場前入12碼，最後o個關斷o左，今次又係利物浦仔破壞我o既大事，史米沙！尼維特o的波勁到o丫，以為雲達沙上哂身就唔使再身，時也命也。
呢場波講明一個事實：教練o既調動往往比球員o既臨場發揮更關鍵，其實荷蘭同捷克係五五波之中o既五五波，我估捷克球員都唔sure自己追唔追到。唔知艾禾卡特諗緊乜o野，仲有30分鐘兼唔係完全捱打，咁快就放棄最有威力o既洛賓，換保斯維特玩龜縮，唔使三個防中嘛？希汀加被逐，其實唔一定要收起雲達美迪，拉o的陣容，用列斯加入替另一個防中整體可能會更好。艾禾卡特棋差唔止一著，荷蘭因為佢而輸真係唔抵。相反捷克o既布克拿真係時來運到，兩個重要調動都係豪賭，哂冷o個隻。25分鐘就放史米沙入o黎代替佳基拿，明明人o地洛賓o係左邊勁活躍，竟然放棄右閘；捷克o係中場冇搶輸俾荷蘭，布克拿60分鐘賭多鋪，收起唯一o既防中加拉錫，擺七個攻擊球員落場，現代足球好難再見到呢o的場面。布克拿賭贏o左，愛拼才會贏，唔寫個服字都唔得，俾我做教練一定唔會咁夠薑。場波真係好燦爛，難得o係歐洲國家盃睇到對攻o既場面，兩分半鐘就一次射門，完全冇可能離開部電視，咁夜起身都抵睇！
全日不斷煲中史，煲到飛沙劈石，不過都好似乜都唔仕腦，呢樣又好似唔得，o個樣又好似未掂，聽日點死？我依家係驚tip錯題囉，成最驚唔夠時間，肯定o既係我會比上學期退步………

>>June 20, 2004 at 2:54:55 PM GMT+8

2004 年 6 月 18 日 星期五 【清涼】

今日熱到o丫，行兩步就成吉思汗打仔，我寧願o係球場打到滿身臭汗。
兩場C組第二輪，陳江問到，我tip丹麥贏保加利亞2比0，意大利和瑞典1比1，激氣，唔買先o黎中哂，我連丹麥o既半全膽都中埋！
心血來潮，想去自修室溫中史，戇戇居居咁衝o左入荃灣。見到蝦、朱基、Fan、琪，背住大隊坐，原來Brian就o係隔離。開行turbo快放中史，間中傳紙仔，Brian似係溝女多過溫書囉，同佢唔怕講有味o野。
宗教 + 經濟 + 少少秦一個朝早就清到，五條人商量去邊度食。破產喇，台灣又貴又麻麻地好食囉，睇下咁「多」人就知啦！唔知7分定9分o既笑話，想再幽默o的其實可以改做「ＸＸＸ去哂睇歐洲國家盃」，笑夠喇。講考試題目，以為答中化題一定唔可以踩中國文化踩得太厲害，原來甚至連中化concept都唔一定要套用o架？
差唔多14:00先返自修室，太舒服喇，又搵周公，索性停一陣搵完佢先專心博殺！主攻隋唐，讀朝代衰亡好似容易o的，不過o係自修室進度係唔及得o係屋企囉，明明屋企誘惑多o的！清埋唐亡，朝十晚五，都係走人啦。
做o左「傷膝」青年，左邊膝頭閃o左o野，郁o的就痛，老毛病。
有個的士司機爸爸真係幸福，香港原來有好多懵炳之中o既懵炳。

2004年Eric好歌流行榜(第25週)：
1)丟架(Twins)
2)常言道(劉德華)
3)一夜成名(傅珮嘉)new
4)我在存在(黃貫中)
5)世上只有(容祖兒)
6)繼續微笑(許冠傑 & Sam's Angels)
7)處處吻(楊千嬅)
8)波友(梁漢文)new
9)對不起不是你(陳慧琳)new
10)叫好叫座(鄭融)new

>>June 19, 2004 at 2:49:29 PM GMT+8

2004 年 6 月 17 日 星期四 【晴】

睇o左25分鐘英格蘭對瑞士先撻落床，睇住朗尼破紀錄，英格蘭o既老問題始終解決唔到。
緊隨Buss係System + 實用文，就冇得溫先至驚，做咁耐system好似未試過法定時間完工，又係等死o既一科。
份Summary Cloze真係………要揭o黎都算啦，Version 2好似仲長過Version 1喎，咪即係要作o野？Matching又好似好怪雞，係油麻地o個part唔算好難，睇o黎system都係炒o架喇，唔拉得太低已經有所交代。
全程o係六樓後座等實用文o既來臨，狂記格式，唔知有冇用。半個救命，睇o左評論 + 演講辭 + 會議紀錄喳，出得一題評論，焗揀，評論人o地o既觀點。人o地o既觀點我平時都評得多，呢個萬大偉o個o的生態旅遊搞到我差o的出事，好似離o左少少題，事後聽tutor講應該仲扣得住，抄《蘋果》format，又捱到900字喎，不過好驚自己真係離題呀，最好至少都eep得住上學期o的分啦。
6A有人，o個餅新鮮滾熱辣o既英格蘭對瑞士牛榮播唔到，都係算啦。
開工，下個難關，係中史，明知keep唔到上學期o個股運氣，保得幾多得幾多！

P.S.洪天明………如果要面對咁o既事實………我都唔知自己可以點做………

>>June 18, 2004 at 2:29:50 PM GMT+8