2004 年 8 月 15 日 星期日 【晴】

倒數27日，27日後就係立法會選舉日，320萬地區直選選民會分五大選區總共選出30個直選議員，另外30個功能組別議員會由大約17萬「選民」按自己o既界別「選」出。調查發現好多選民都唔知地區直選採用乜o野投票制度，事實上由1998年第一屆立法會開始，地區議員都透過「比例代表制」同「最大餘額法」產生。我100%肯定，好多人都對制度認為有限，甚至完全陌生，其實簡單o的講：先計除數，再計減數。
顧名思義，「比例代表制」係按候選人o既得票佔總得票o既比例分配議席。首先，候選人以名單形式，而唔係個人形式參選，每張名單上o既候選人都按優先次序排列。選民投票只可以揀選票上o既名單，唔可以揀名單上o既個別候選人，所以呢個亦可以稱為「名單投票制」。o係名單投票制之下，議席以「最大餘額法」分配，舉例。
某個選區有5個議席，總共有7張名單參選，每張名單o既候選人數目有多有少，最後總投票人數有40萬張有效選票，假設點票結果如下。
A名單(候選人 x 5)：10萬票
B名單(候選人 x 4)：18萬票
C名單(候選人 x 3)：2.4萬票
D名單(候選人 x 2)：4.8萬票
E名單(候選人 x 2)：0.9萬票
F名單(候選人 x 1)：2.5萬票
G名單(候選人 x 1)：1.4萬票
o係「比例代表制」之下，邊張名單得到1/5得票(8萬票)，就可以得到1個議席。B名單得到18萬票，所以呢張名單先得到兩席，而排o係名單第一、第二位o既候選人都順利當選；A名單有10萬票，排第一位o既亦成功當選。因為餘下名單冇一張超過8萬票，呢區餘下o個兩席就由計算最多餘票產生。扣除已當選者o既所佔o既票數(B名單減16萬票，A名單減8萬票，兩張名單都剩2萬票)之後，D, F兩張名單o既餘票最多(4.8萬 & 2.5萬)，所以呢兩組排第一o既就拎埋最後o個兩席。最後結果，五個議席之中，B名單佔兩席，A, D, F名單就各有一席。
咁o既選舉制度有乜毛病，一睇就知。A名單有10萬票，分別係D, F名單o既兩倍、四倍，但係同樣只係得一席，最初呢個制度可唔可以名副其實咁「按比例分配議席」，顯而易見。呢個制度美其名令小政團、獨立候選人都有機會出線，實際上係某o的唔太受選民歡迎o既政黨都有議席落袋，送多o的「自己友」入局。
小弟已經盡量簡單解釋，有唔明就私底下問我啦。

立法會地區直選參選名單
[]裡面係整張名單所代表o既政治團體
()裡面係個別候選人所代表o既團體

新界西(元朗、屯門、荃灣、葵青、離島)(選出8席)：
1.陳偉業
2.[民主黨]李永達　陳琬琛
3.[民主黨]何俊仁　張賢登
4.[街工]梁耀忠　尹兆堅
5.[民主公義派]鄒秉恬
6.查錫我
7.[民建聯]譚耀宗　張學明　梁志祥　歐陽寶珍　徐帆　陳恆鑌　老廣成　伍景華
8.伍德良
9.[自由黨]周梁淑怡　丁午壽
10.[新世紀論壇]呂孝端　蕭成財　陳財喜
11.[職工盟]李卓人　葉岳峰
12.[民協]嚴天生　江鳳儀　戴賢招　官東榮

>>August 16, 2004 at 1:11:42 PM GMT+8

2004 年 8 月 14 日 星期六 【晴】

o尋晚睇奧運睇到02:00，兩條飛魚，美國o個條簡直超班，澳洲o個條贏得好險，TVB節目主持人太差喇，o的笑話懶好笑，又做唔夠功課，今晚再係咁，即刻轉台。
俾媽媽捉去美食博覽，又係一朝早就見到競選活動，去灣仔o既船好迫，第一次聽到職員叫乘客坐滿所有位。12:00入場，不斷咁試食，其實唔食得好多，大陸o野唔係幾o岩我，韓國泡菜冇以前咁辣。買o左o的零食、即食麵、快熟意粉(唔係家樂牌)，多到每人兩隻手 + 兩個袋都拎唔哂。初時會場仲係大把位，個幾鐘之後開始越o黎越多人，其實人流應該同往年差唔多，不過今年迫得特別厲害，橫衝直撞，心口俾人耡o左無數鑊，撞到散咁滯。我知點解，因為今年有大量自由行o係會場出現，個個都係身位王！

P.S.祝Herman一路「逆」風！飛機o係順風之下冇辦法起飛嘛～

>>August 15, 2004 at 2:55:47 PM GMT+8

2004 年 8 月 13 日 星期五 【晴】

Herman聽日就走喇，識o左佢只係短短o左個半月，不過我已經當佢係我o既好朋友。
o係七一遊行相識，因為SSU大隊混亂而相識，之後經佢鋪橋搭路之下重返Youth Conference幕後隊伍當中。五日四夜o既camp裡面，物流組o既佢經常入我o個組幫手 + 搭嗲，又肯講大家o既心底話(不過似乎佢講得多o的)，不知不覺間當o左佢係最好o既朋友之一。
佢經常強調自己係文科料o既理科人，事實上佢完全唔似細我一年，思路比我清晰，洞察力比我強，識o既o野亦比我多，佢的確好叻，唔止叻o係書本上。
很高興識到Herman呢個朋友，雖然相處o左冇幾耐又要離別，但係我有信心keep得住呢份友誼，我希望就算一個o係香港、一個o係加拿大，大家都係難得o既好朋友。係Herman親口約o架，下年七一維園再見，繼續堅持要行o既路………雖則我唔想年年七一都上街。

明天就要飛走　朋友都輕鬆奉上祝福　旅途愉快

2004年Eric好歌流行榜(第33週)：
1)傷追人(古巨基)
2)煉金術(楊千嬅)
3)八里公路(梁漢文)
4)愛是最大權利(Ping Pung)
5)按摩女郎(劉德華)
6)七里香(周杰倫)new
7)Phone殺令(陳慧琳)new
8)我我我我我有胸部(I Love U Boy'z)new
9)Too Many(黃貫中)new
10)地平線(官恩娜)

>>August 14, 2004 at 3:48:10 PM GMT+8

2004 年 8 月 12 日 星期四 【晴】

會考24分 + A英文o既Herman後日就飛去加拿大喇，答謝佢幫過SSU同Youth Conference唔少，幫佢搞BBQ farewell，由Kit借出o係南丫島o既屋企做場地，朝早玩到晚。
09:00鬆o的就出門口，咁早都見到民主黨o係街頭派傳單，之前見親o既都係民建聯，其實如果我唔係升中七，我都想做助選團o既義工。搭巴士落尖沙咀轉船再行去港外線碼頭，點知過o左返工時間o既彌敦道仲係咁塞車，由尖沙咀搭去中環，中區o既填海工程已經展開，感觸無限，咁靚o既維港點解要填？事後聽到Herman講得好o岩：好想同o的遊客講This is not the idea of Hong Kong people. This is the idea of Hong Kong government!!! 驚遲到錯過10:30開去榕樹灣o既普通船，
o係天星碼頭極速跑去四號碼頭，跑到氣咳，不過原來唔使跑咁快，仲有時間。震音又話去到南丫島o係索罟灣行山返榕樹灣，做乜唔見人o既？
Ian男拔8A1B1C，預o左要俾我o地祭旗，一日到黑8A前8A後咁稱呼佢，邊個叫佢咁把炮？Kitty係另一個被串o既對象，佢o係電視太氣焰喇。30分鐘船程就到o左榕樹灣，個島幾靚，最大煞風景o既係o個三棟發電廠o既煙囪，好似三支香咁，又永遠燒唔完，8A係咪想o係中間o個支俾我o地corn先？無任歡迎o架喎！好特別o既現象，o係南丫島係離島區，離島區屬於新界西，島上永遠只會搵到民建聯譚耀宗名單o既poster，連周梁淑怡都冇。Kit事後話我知，原來南丫島o既區議員係民建聯。
兜o左好耐，左轉右轉先搵到Kit屋企，相當隱蔽，幾靚喎，一個人住300呎多o的，空氣又好………係多昆蟲o者。好多好正o既書，社會福利、人權教育，乜o野題材都有，不過點解Youth Conference場刊收得咁埋？
去士多買啤酒汽水棉花糖，BBQ天黑先搞。Kit好忙咁o係廚房整o野食，我o地好迫咁o係廳玩，玩完killer玩七級豬。8A俾人針對，而佢又真係高分低能o左少少，手同鼻之間距離太遠，唔corn佢喇，50下sit-up收貨！
o係室內聽歌唱歌，再一次將Twins批評得體無完膚，大讚I Love U Boy'Z夠搞笑。上天台食o野，清一色冷盤，唔錯，繼續吹水，英文oral趣事，世界上實在有太多低分低能o既人。
返落樓下，原來早已經開始選舉討論，踢爆鄒秉恬o既身份，其實都無可厚非o既，掛上港進聯呢個招牌，擺明係博連選舉按金都俾人沒收，雖則佢隱藏身份都應該冇5%得票。震音姍姍來遲，夜行？係好玩，我都想，不過夜晚根本唔會有時間，都係下次再有機會先啦。去洪聖爺灣沙灘玩，竟然冇帶泳褲，唯有買。要行一段路，好多唔同種族o既人住埋一齊，十足遠離市區o既小社區，與世無爭，如果唔係太追求物質生活，南丫島應該幾好住。
洪聖爺灣原來唔算好大，而且望到發電廠，扣哂分。好耐o係沙灘游水，不過岸邊o的水太多垃圾喇，仲好「吉」腳，腳底按摩咩？不過再行出o的，o的沙幼尖到o丫，而且好大浪，正！一個個浪打埋o黎，想唔濕頭就要校o岩時間有咁高跳到咁高………我個頭早已經濕哂，又冇泳鏡，好「拿」眼。有可樂七喜睇，上次梅窩o既鏡頭重現，激100倍，Leo帶頭「睇水」，Kenneth目不轉睛？
游o左好耐，上岸，玩活埋震音，做o左o的好蠢o既事。小Billy終於到喇，果然大受女生歡迎………當然，Leo直頭係俾女溝，最幸福。最初玩糖黐豆，勝在轉身快，飛身撲人。等救生員收哂工先玩沙灘排球、閃避球、數字球，接波高手，不過太多意識接波都唔一定係好事。玩到大隊返o左Kit屋企先沖身換衫，好彩帶多件衫換，本來o個件當毛巾咁用，將ex-6A笑話外傳。沿途一路行一路唱歌，Herman都識尹光名曲。
19:30入o左黑上天台BBQ，不過我o地o係室內又鋤dee又吹水，擺明係坐享其成。今次o的統籌唔算太好，燒烤叉好多生哂繡，焗住要好似出面o的BBQ party咁一次過擺哂o的o野上鐵絲網燒，太近火，乜都燒唔好。Dec呢個時候先入o黎，唔知o黎做乜，亦冇乜人在意佢o既存在，佢又唔知幾時消失o左。後來o的人已經唔食o野，坐埋一齊吹水，繼續camp趣聞，又開始講人壞話，我都講埋一份，講起就無名火起。Ricky大鬧譚李麗芬籃球校隊，o個七個港青代表全部係插班生，好串，當時佢o地輸俾體藝，心涼。
22:00第一批人走先，留低話要執o野，不過執o左一陣就掛住吹水，主打保皇黨，寧願要民建聯都唔要自由黨，至少佢o地夠膽堅持一貫o既立場，咁我o係camp期間登o既article實在太膚淺太天真喇。如果俾你送一份禮物俾田北俊同自由黨，你會送乜o野？梗係護腕啦，箇中玄機簡直腰心腰肺！又講大陸人，一句讚o既都冇，好慶幸我o地係土生土長o既香港人，o的大陸人太差勁喇。講講下，話題轉去香港澳門兩個前殖民地o既分別，原來Herman有葡萄牙國籍，澳門o係大概450年前曾經係葡萄牙o既………首都。23:30開尾班船，之前20分鐘要行喇，Kit好有興趣繼續聽我o地o既分享，送我o地出碼頭，原來其他低form過我o既思維上都早熟過我。
Kit送走我o地，同Herman告別，o岩o岩趕得切尾班船，一行九人住哂o係船頭，繼續。兩岸關係、一國兩制、台灣地位、中華民國政府算唔算偏安政權，無所不談，同佢o地傾呢o的，我都學到唔少。00:00返中環，穿過國金，過中環MTR，送別Herman，互相祝福打氣，各自走喇。同Kenneth搭荃灣線，佢出奇對SSU有信心，唔會俾人食o左，只要內部冇人搗亂，又話對入SSU冇後悔，我都希望可以多o的人入o黎幫手，經過頭一兩年，之後SSU會務應該上到軌道到時就唔會咁辛苦。
返到屋企已經差唔多01:00，沖涼，等頭乾，今日乜都冇做過。

>>August 14, 2004 at 7:11:21 AM GMT+8

2004 年 8 月 11 日 星期三 【晴】

o尋晚傳o黎另一路人馬o既戰報，呆得好厲害囉，簡直唔可能相信，幾乎係青仔成名絕技，條路以後好難行喎。明明上次AL放榜o的人唔太差，以為依家都會有運行，點知事與願違，真係唔知咁o既結果究竟同會務好忙有冇關係，如果係真，睇怕以後都冇乜人肯入o黎。
想睇奧運，不過全部半夜先開始，唔可以亦冇興趣項項都睇，決定今年主力睇足球、籃球、游泳。阿根廷男足人腳好似最強，最有冠軍相，最衰兩隊非洲雄獅都入唔到決賽週。男籃美國隊唔再夢幻，期待夢幻隊重演兩年前世界錦標賽o既災難。泳池好多o野睇，上屆破世界紀錄破到七彩，希望Ian Thorpe突破三金一銀o既成績。

Re挺：升到grade仲o係度嘈？重考都係為啖氣o者，UE先係戲肉中o既戲肉。
Re Fat Pang:你搵到人，無任歡迎o架。
Re Miu: Please refer to my reply to 挺
Re Yan:放心啦，最早同我講o既係你，不過我o尋日冇食蛋糕，一係你聽日帶個入去送俾我？

>>August 12, 2004 at 12:53:19 PM GMT+8

2004 年 8 月 10 日 星期二 【乍寒還暖】

會考放榜，其實唔關我事，不過身邊太多人要面對，連我都擔心埋一份，希望識o既每個人都滿載而歸。
約o左小妹佢o地返學校八下，趁熱鬧，睇下今年o的人考成點。早就放o左風，今年o既水準冇往年咁標青，連續三年出10A呢個紀錄預o左斷纜，文理o既整體成績都倒退o左。子建、勞勞好得爭氣呀，試多一次，真係得o左，呢個進步唔係人人做到o架，子建仲驚人地straight A中文，太好喇！次次考試總會有失手o既不幸者，好多都好失望，喊根本就係平常事，不過咁o既情況o既失手真係最慘。o係hall唔知要做乜，好似阻住地球轉咁，李sir又有正經o野做，未搵得佢，都係遲o的先。打俾Herman問消息，超掂呀，A英文，剝人o地棚牙！
本來諗住CEPA上麥記，不過上到去掛住各自食o野，派o左中史卷，冇做。轉搭肉丸檯，嗲o左一陣，之後唔知點樣俾人趕落樓，避風頭？坐到十萬八千里遠靜觀其變，最後好似冇事，返埋位，今次CEPA乜功課、溫習都冇做過，齋坐等夠鐘，直踩上green box。
小妹、蝦、Polly、希、Cindy、Candy、龜，佢o地相當捧場。間房好凍，冷氣要時開時關，不過氣氛好熾熱，Candy又o黎喇，次次都點o左唔唱，小妹唔係話跳table dance咩？呢排鍾意o既歌唱哂，《傷追人》唔係咁難喳喎，我麻麻地熟《分流》喳，o的o野食………凍o架囉。唱K期間，一單好消息，一單壞消息，證實o左子建、勞勞返到荃官，好開心呀，終於達成心願喇，至於壞o既………震撼 + 難以置信囉。唱到14:15非常準時咁cut歌，好開心呀，多謝咁多人捧我場。
原來落緊雨，下一站？去自力揀書，差o的唔記得有書未買，都係遲o的先去三聯買。等小邪佢o地，仲有大紅人子建呀，親自恭喜。返荃官睇派位結果，話咁快又一年，又一批人。
好早就出門口，唔知自己重考英文考成點，返到屋企，有信喇，拆開，BCDA = C，總算升到一級，好過冇，不過點解listening仲係cred唔到o架？當時o的題目應該識o架喎，不過oral有A的確好詫異。
多謝各位o既禮物，份份都好鍾意！
蝦 + Mina + 小B + Fan + Lo + 蚊 + 子建：Thanks for "THE DOG" & card & chocolate
CEPA:又會知我差唔多要換新龍門手套o既？
邪 + Su + 魚 + 聰：呢款銀包好o岩我喎，運動水壺都用得著！

Re小某：多謝，三個睇咁寡？

>>August 11, 2004 at 1:18:44 PM GMT+8

2004 年 8 月 9 日 星期一 【酷熱】

18年前o既凌晨零時七分，明愛醫院懷愛樓產房，一條小生命降臨人間。18年後o既今日，呢個細路唔知行咩大運，咁多人肯同佢做朋友，咁多人得閒睇佢日日寫埋o的模稜兩可o既日記，仲要咁多人約佢出o黎賀生日………
其實今日有兩group人約，去Alien屋企打機打牌似乎吸引o的，不過最後兩個都推o左，今日完全冇出過街。
壹號皇庭有續集，妙手仁心有續集，千樹變都有續集，點解係發夢冇續集？

Re Fat Pang:不如睇人工影片(Artificial Video)？送波衫咁慷慨？咁就要A米派路歐聯落場版！
Re REAL:送禮物講心意o者，送咩都一樣鍾意，最想就梗係………下年一樣有咁大棚人賀我19歲。
Re 邪Su:多謝～
Re蚊：大家咁話

To大量我識o既等放榜人：成好敗好，支持你o地，做好自己，無怨無悔。

>>August 10, 2004 at 3:38:02 PM GMT+8

2004 年 8 月 8 日 星期日 【酷熱】

o尋晚同Herman係咁傾，傾o左粒幾鐘，其實無愧於心，邊個領功有乜所謂？俾著係我，我都會同佢唱對台戲，如果佢小氣到因為咁o既小事而唔妥你，你都無謂擺上心啦。嘩，發達喇，正到o丫，唔使醒就好喇。
睇《星期一檔案》，香港早就開始培養以參加2008北京奧運為目標o既年青運動員，係極年輕o個o的。乒乓球、足球係重點項目之一，密集式催谷訓練，都係因為人人都有個去北京o既夢。香港o個o的所謂「獎牌希望」好多都係內地落o黎o既援兵，三粒花都未有就話要「為港爭光」，廣東話都講唔掂就話代表我o地。羽毛球、乒乓球用最多國援，不過呢o的項目唔係冇土生土長o既選手，點解唔用佢o地？贏唔到獎牌又點？至少佢o地真係香港人，佢o地交出o既成績先係真正我o地o既成績，有冇爭牌o既實力係次要。除非o的國援居港滿七年，否則佢o地根本冇資格代表香港。

是日矚目轉會：
梅菲(英格蘭中場) from利物浦to熱刺 300萬鎊

>>August 9, 2004 at 1:38:12 PM GMT+8

2004 年 8 月 7 日 星期六 【晴】

應唔應該選個病人做我o地o既議員？佢係咪「真誠為香港」大家心中有數，最重要係佢連健康都成問題，有冇能力做好議員o既工作(當然，佢可以唔做o野，齋舉手，或者約黃宜弘)？不過制度問題，除o左佢死o左，否則唔可以退選，如果佢當選之後真係撐唔住要退出，之後補選，咁就發達喇。
2004-2005球季曼聯球員o既號碼：
1)侯活
2)加利尼維利
3)菲臘尼維利
4)軒斯
5)李奧費迪南
6)布朗
7)基斯坦奴朗拿度
9)沙夏
10)雲尼斯達萊
11)傑斯
12)貝利安
13)卡路爾
14)阿倫史密夫
15)卡巴遜
16)堅尼
17)利安米拿
18)史高斯
19)迪贊巴
20)蘇斯克查
21)科蘭
22)奧沙
23)李察遜
24)費查
25)科東尼
27)施維斯達
29)史柏達
30)史迪爾
33)伊高斯
35)列卡度

>>August 8, 2004 at 2:54:17 PM GMT+8

2004 年 8 月 6 日 星期五 【晴】

想知乜o野叫貽笑大方，內地球迷提供最佳答案。可能英格蘭球迷仲遠近馳名，不過佢o地最多只係醉酒鬧事，德國o黎作客，英格蘭球迷唔會追打德國球員o既巴士，亦唔會o係播德國國歌o個陣噓，更加唔會o係球場高舉「為納粹侵略暴行道歉」呢o的標語………同樣球場單位唔會要求觀眾「做個文明球迷」。
結果中國又係唔識守死球，又係門前miss叉燒，俾日本3比1技術擊倒。意料之中，輸唔起，o的球迷又搞事，向日本人o既車掟石，燒太陽旗，話哂俾全世界知：呢o的就係「富強」o既中國o既人民。
造成呢種極端民族主義o既原因好複雜，其實某程度上都係共產政權將人民對生活o既不滿o既槍口由內轉向外，基本上官方唔會點理，結果助長呢種流氓文化。
韋立本講o既其實冇錯，我都懷疑究竟北京有冇能力舉辦奧運，場地可能冇問題，不過o的觀眾………

2004年Eric好歌流行榜(第32週)：
1)煉金術(楊千嬅)
2)傷追人(古巨基)
3)內傷(鄭伊健)
4)地平線(官恩娜)
5)愛是最大權利(Ping Pung)
6)按摩女郎(劉德華)
7)八里公路(梁漢文)new
8)夏日劇集(梁詠琪)
9)與神對話(許志安)
10)髮調橙(關心妍)new

>>August 7, 2004 at 4:09:21 PM GMT+8