2004 年 8 月 5 日 星期四 【乍寒還暖】

季初o既曼聯排唔出最佳陣容，李奧費迪南未停完賽，軒斯、C朗拿度要代表國家打奧運，仲有其他傷兵。其實就算冇病冇痛，曼聯有一定程度o既球員錯配，好亂。
以前提過4-2-3-1會係曼聯未來o既主要陣式，不過要排得完整的確好難。

　　　　　　　　　　侯活
加利尼維利　李奧費迪南　施維斯達　科東尼
　　　　　　　堅尼　　　史高斯
　　　　C朗拿度　　　傑斯　　　沙夏
　　　　　　　　雲尼斯達萊

重要後備：卡路爾　奧沙　軒斯　菲臘尼維利　費查　蘇斯克查　阿倫史密夫

奧沙o既身型冇理由唔打中堅，佢踢左閘o既效果已經冇前季咁好，科東尼出擊力極強。睇過軒斯o既表現，有o的擔心佢會好似上季布朗咁做計時炸彈，奧沙o係後備席做通天老倌，邊個位冇人就去o個度。
中場中路冇人用，最o岩踢反上前鋒o既史高斯唔可以唔返中場做多串連，退出國際賽o既佢可以集中多o的球會比賽，幫輕老化中o既堅尼。費查勝在年輕，可以慢慢將佢培養成類似派路o既中場。
傑斯o既突破力大不如前，好難再o左左路長驅直進，呢幾季都試過移入中路以輔鋒姿態出現，而且效果唔錯。如果C朗拿度打出o係歐洲國家盃o既水準，大路o的，佢會係紅魔鬼陣中最有威脅力o既球員，o係兩邊邊線玩突破。
就算沙夏、雲尼斯達萊同時上陣都唔能夠係雙箭頭，始終雲佬慣o左一個搵食，沙夏可以企得左o的，後上支援雲佬，亦可以同傑斯互相呼應。
阿倫史密夫既可以踢正前鋒，右中場、輔鋒都唔係問題，萬能球員永遠都係秘密武器，佢o係幾場熱身賽o既表現都相當對辦。
曼聯有兩大隱憂。中場線o既青黃不接嚴重，傑斯、史高斯、堅尼三大主力at least已經30歲，但係陣中有實力接棒o既唔多，尤其係堅尼，佢一傷或者有疲態，曼聯o既中後場就可能出現缺口。
另外，創造力不足，只係靠兩翼突破，面對刻意死守o既球隊就成日老鼠拉龜，久攻不下俾人偷襲得手。
曼聯o既實力唔足以問鼎歐聯，全力爭英超仲來得實際。車仔比上季更強，o係摩連奴領軍之下大肆擴軍都慢慢建立出隊型，可能比兵工廠更心腹大患。
帶到英超獎盃返奧脫福已經滿意喇～

P.S.原來已經過o左咁耐………

>>August 6, 2004 at 12:32:06 PM GMT+8

2004 年 8 月 4 日 星期三 【晴】

上季曼聯經歷o左個近乎慘敗o既球季，英超俾阿仙奴技術擊倒，連亞軍都不保，歐聯輸俾最後冠軍波圖，足總盃冠軍只係安慰獎之中o既安慰獎。
處於新舊交接調整期o既曼聯，呢個暑假o係轉會市場繼續傳聞多多，基拿甸奴、朗尼、謝拉特都盛傳會傳投曼聯，又有謠言指雲尼斯達萊、堅尼呢o的主將會離隊，都不過係聞樓梯響。最後加盟曼聯o既除o左最高身價o個兩個，其他都係阿積士式o既收購，為明天o既明天而鋪路；而默默耕耘o左10年o既老臣子畢特趁仲當打，離開母會搵正選，繼續有青訓產品等唔到出頭天，向外闖。

加盟：
阿倫史密夫(英格蘭前鋒)　from列斯聯　　　　　700萬鎊
軒斯(阿根廷後衛)　　　　from巴黎聖日耳門　　575萬鎊
利安米拿(蘇格蘭中場)　　from些路迪　　　　　60萬鎊
比基(西班牙中堅)　　　　from巴塞隆拿　　　　自由轉會
羅斯(意大利前鋒)　　　　from帕爾馬　　　　　轉會費不詳

離隊：
畢特(中場)　　　　to紐卡素　　　　250萬鎊
查域克(中場)　　　to韋斯咸　　　　自由轉會
布治(後衛)　　　　to列斯聯　　　　自由轉會
連治(後衛)　　　　to新特蘭　　　　自由轉會
艾迪莊臣(前鋒)　　to高雲地利　　　借用
拿戴路(前鋒)　　　to班士利　　　　借用

今季o的煲水新聞仲多過上季，多到冇人記得哂，軒斯、C朗拿度要打奧運，盛傳費sir會再收購一個左閘補充後防兵源，不過就否認科蘭會外借去西甲升班馬利雲特。

Re REAL: Closer "Education" Partnership Arrangement!!!!!!
Re呀欣：我入camp前一星期先知自己會升級做leader，當然呢個唔係藉口，覺得自己僅僅合格囉，多謝你對我o既體諒，如果再有下次，我應該可以做得好o的。

P.S.得閒睇下《大公報》，笑下，人都都輕鬆o的！

>>August 5, 2004 at 12:43:56 PM GMT+8

2004 年 8 月 3 日 星期二 【晴】

次次買SCMP都一定有article登到，不過SCMP改o左我最後幾句o既原意囉，我唔係咁寫o架。
o尋晚突如其來o既消息，史高斯宣佈唔再代表英格蘭國家隊出賽，30歲未夠就退出國際賽係早o左o的，不過以後可以專心幫曼聯打天下，點都係好事。而且英格蘭o既中場線人才濟濟，本來同史高斯作用太相似o既林柏特有更大發揮空間，仲俾機會新血上位，期待胡禮菲臘斯。
極速，兩日就齊哂成本《兩岸追蹤》，呢o的書我都係睇到笑o架，呢類題材唔一定係非常嚴肅o既。

是日矚目轉會：
韋拉(法國中場) from阿仙奴to皇家馬德里 3500萬歐元
柏路達(意大利中場) from基爾禾to羅馬 700萬歐元

>>August 4, 2004 at 2:20:24 PM GMT+8

2004 年 8 月 2 日 星期一 【酷熱】

小CEPA再次聚頭，帶住個軀殼衝去麥記，民建聯一早就o係燈口擺檔。
事先張揚會遲到，上去凳都未坐暖就開工，講Buss，大CEPA問題有o的怪囉，唔太識答。
Econ人做o野期間，中史人做過o的乜？安排測驗，唔想測史漢 + 通鑑以外o既史學名著呀，多謝提我為政政奮鬥囉。時事題，唔知點解「大班事件」唔想講太多，總之我就唔想佢今屆參選啦。之後完全放棄正經事，我有我睇《兩岸追蹤》，Billy對《講奸語錄》好似幾有興趣，愛不釋手。
蘊釀o左玩o係camp詭異地玩唔到o既UNO好耐，最後終於玩得成，龜狂俾我draw牌，小妹又鑊鑊冇牌拎，最後玩到唔知時間，過哂lunch time先返屋企，今日係渾渾噩噩，冇乜點做過o野。
曾憲梓隱形o左一排，終於返出o黎講o野喇，好掛住佢，超級期望未來呢40日佢繼續妙語如珠！

是日矚目轉會：
查度(巴西前鋒) from保頓to紐維爾舊生 借用

>>August 3, 2004 at 1:34:26 PM GMT+8

2004 年 8 月 1 日 星期日 【清涼】

餓o左好耐波，個幾月冇踢，肥鵬約o係美孚除o左Richard + 輝哥，其他都係莊啟程人。14:00最曬o個陣，幾個阿嬸洗地洗咁耐都係o個度，個球場勁闊，11人場咁闊。耐冇踢？冇熱身？吸收之前七一差o的中暑o既經驗，feel到冊上次差唔多o既狀態，去toilet洗洗面，盡量整凍自己。
同人鬥波，兩個中年佬超好波，搭住班o靚仔，搞到我o地疲於奔命。後防大亂，單對單失守；冇人回防，左路超準傳中，任人頂。唔知點解無論去到邊，我o個隊總係冇射手，o的波做到入禁區都俾人解圍。
買o野飲買到去惠康，貪平，$19.5兩支果汁先生，1.15L超大樽，又澀，早知要蘋果汁。講波經，曼聯o岩打4-4-2多過4-2-3-1？唔見得囉，可能沙夏會同雲尼斯達萊一齊打，不過佢o地唔會o係最前面囉。
抖完一輪鬥半場，冇守龍門，做懶o既球員，行行企企，等人俾波。肥鵬好癲喎，入兩球，再助攻俾我執雞，攻又有份守又有份，佢食o左乜？成功保存體力，再打耐o的都得。
好快又打到殘哂，睇住o的個頭大唔過個波o既細路，有條友零舍高，屈身位。有兩個勁扭得，我o地坐哂o係場邊吶喊助威，如果o個o的唔係細路我o地就係撩交打。
快樂不知時日過，18:15想落場再踢，踢冇兩腳就散場，又惠康？呢個場都叫「小型足球場」，點先算大？六個維園足球場咁大？一隊要30人先踢到喎，得國米、車仔有能力踢咁大個場。

是日矚目轉會：
蘇利雲(蘇格蘭門將) from車路士to列斯聯 自由轉會

Re Pupil:梗係吸引啦，又有o野玩又有o野學又大把著數，現階段好難講下年搞唔搞得成，不過見今次頗成功，SSU都好希望Youth Conference可以每年一次。如果我下年仲係工作人員，好希望到時見到你(雖然唔識你)，記得搵多o的朋友參加喎，機會難逢o架。

>>August 2, 2004 at 1:44:38 PM GMT+8

2004 年 7 月 31 日 星期六 【晴】

o係camp都一直緊貼時事，日日18:30新聞報告都圍哂o係電視邊，當日已經知鄭經翰俾商台提前解約。
公說公有理，婆說婆有理，唔可以話大班被炒象徵香港o既言論自由進一步受蠶食，不過更加唔可能話香港o既言論自由冇受到嚴峻o既威脅。我關注o既唔係商台究竟有冇俾人統戰埋，我最關心o既係大班話因為要繼續發聲，想參選今屆立法會。如果佢早o係年初就透露想出戰，呢個都唔係乜o野大問題，不過民主派好難先o係五個選區都協調好哂參選名單，佢呢個時候先話參選，對選情可能會有無法彌補o既影響。
以大班o既知名度，如果佢參選，當選當然冇難度，不過佢o既得票會極高，隨時分簿同區其他民主派候選人o既票數，分分鐘「誤殺」自己友。僧多粥少，冇大班o既民主派各區出選名單已變過幾次，梁家傑、廖成利都要轉區，都係因為要確保可以盡用手上o既得票maximize當選人數，避免內訌對打。為大局著想，大班的確唔適宜o係今屆臨急臨忙參選，倒不如全力幫o的有落選危機o既隊伍助選，新界東o既「鑽石名單」第五名、新界西獨立出戰o既陳偉業、九龍東民主黨排第二o既胡志偉，都係危危乎o既人分，大班想幫手，都係做幕後好o的，想參選，都係四年後啦。
解放軍建軍77週年，軍隊壽命比政權仲要長，究竟有乜暗示？

是日矚目轉會：
艾馬臣(巴西中場) from羅馬to祖雲達斯 1800萬鎊
烏化奴斯(捷克中堅) from漢堡to費倫天拿 500萬鎊
費拉利(意大利中堅) from帕爾馬to羅馬 350萬鎊
辛頓(荷蘭左翼) from車路士to米杜士堡 自由轉會

Re 亞欣：乜你認為我呢個Group Leader咁冇記性o既咩？
Re REAL:唔太方便講o既公事～

>>August 1, 2004 at 1:25:46 PM GMT+8

2004 年 7 月 30 日 星期五 【晴】

你係我o地o既象徵，我以你o既存在為榮。依家你面對重大危機，邪惡o既魔爪已經伸延到你身邊，曾經同我o地並肩作戰o既戰友原來早就背棄我o地，將你迫去生死存亡o既關鍵時刻。
我o地唔會退縮，我o地會盡全力捍衛你，如果守護你需要我o既力量，我會義不容辭，我唔算係你o既一份子，不過我同你企o係同一陣線，我唔會怕。放心，冇人可以郁你，我o地唔容許你被吞併，我o地仲有強大o既後台支持，只要我o地上下一心，冇人會再背叛你。

本週矚目轉會：
卡華路(葡萄牙中堅) from波圖to車路士 2000萬鎊
盧恩杜拿(法國前鋒) from里昂to馬賽 730萬鎊
艾美遜(巴西中堅) from里昂to巴塞隆拿 660萬鎊
迪亞高(巴西中場) from山度士to波圖 450萬鎊
畢特(英格蘭中場) from曼聯to紐卡素 250萬鎊
希亞路(西班牙中堅) from卡塔爾某球會to保頓 自由轉會
李沙拉素(法國左閘) from拜仁慕尼黑to馬賽 自由轉會
簡奴(尼日利亞前鋒) from阿仙奴to西布朗 自由轉會
樸迪路(西班牙前鋒) from皇家馬德里to費倫天拿 借用

2004年Eric好歌流行榜(第31週)：
1)地平線(官恩娜)
2)煉金術(楊千嬅)
3)與神對話(許志安)
4)內傷(鄭伊健)
5)傷追人(古巨基)
6)吻別的位置(李克勤)
7)算數(盧巧音)
8)愛是最大權利(Ping Pung)
9)夏日劇集(梁詠琪)
10)按摩女郎(劉德華)new

>>July 31, 2004 at 3:56:04 PM GMT+8

2004 年 7 月 29 日 星期四 【晴】

Youth Conference最重要戲碼，立法會模擬辯論，之前o既工作坊同camp都係為o左呢個。
09:00遮打花園等，見到牛雜o既？原來今日佢o黎幫手，太陽底下乜都可以發生。事先指引要著得似樣o者，都不過係唔著得短褲喳喎，Herman全套整齊老西，好隆重，得Victoria拍得住佢，耶穌都係扮粗獷算啦。我o地唔會用平時o係電視成日見o既大會議廳，而且頂樓o既會議廳A，李鵬飛上次解釋封咪事件o個間。先參觀全間立法室，原來會議廳冇電視睇到咁高咁大，o的座位一早mark哂議員名，整個任期都係坐o個度，邊個貪得意坐黃宜弘個位？以主席范徐麗泰o既角度睇，佢右前方主要係自由黨，左前方係民建聯 + 港進聯，余若薇以外o既民主派就o係哂最右邊(民主女神後補代替程介南，冇位揀)，全場距離范太最遠o既係司徒華。之後仲有兩間小會議室、記招室、傳媒室、宴會廳，走馬看花打個round就返A房準備。
打頭陣o既辯論係政制檢討，由林正文做主席，Herman做秘書，先動議「要求政府o係2012年實行行政長官、立法會o既全面普選」，而兩個修正案係將2012年分別改成2007年同埋循序漸進。其實我身為組長，唔係負責呢個topic，應該坐o係場邊，不過發神經咁坐埋落去，所以決定唔發言，不過政改我真係忍唔到，唯有寫稿教人講o野。90分鐘o既辯論得個拗字，而且政改組之外都冇乜人發言，最搞笑係陳柱熹將Billy衰叫成「衰議員」，佢唔係陳鑑林喎。表決時間，先投票通唔通過兩個修正案，過唔到先返去原動議，我早就決定投棄權票，無謂影響最後結果，不過我o地唔太熟表決程序，要評判之一o既羅沃啟叫我o地重新投票，結果「循序漸進」被大比數否決，一號修正案(2007)就僅僅過半數通過………當然，我o地o既動議只係模擬，冇任何約束力。
放食飯，中環冇乜o野o岩我o地食，而且太貴，Herman提議搭電車去金鐘食，冇所謂，不過o個度一樣好貴，焗住KFC食唔飽，又趕時間，汽水都未飲哂就要撲返立法會。
晏晝第一場辯論主題係教育，今次唔坐落去，o係場邊睇，Herman仍然係秘密，不過主席「女士」改由Anna擔任。開始有笑位，由Leo帶起，一場辯論有齊粵語、英語、國語(Mandarin, not Putonghua)，冇現場翻譯喎！講o黎講去都係改革考試課程o既問題，好多駁斥，連文理科係咪背書都講o左幾分鐘，唔多記得exactly動議緊乜o野，只係知阿柴修改o左動議。呢個我冇完全集中去聽，最後去到表決時間，Anna搞錯哂，第一修正案o既反對票比贊成票多，Anna話「因為反對票比贊成票多，我宣佈議案獲得『通過』………」，之後原動議再係反對多過贊成，Anna又係咁樣講錯，兩個都被否決。
最後o個part係我o地o既青年事務，Catherine走o左，得我、Sandy兩個組長撐場，下面冇位，坐o係後面做智囊。我o地唔係動議o的乜o野，係審議我o地提出o既《青年組織條例草案》，Kitty做主席，我o地不斷解釋條例，人o地不斷咁圍攻。Kitty真係唔掂o架，我o地係咁俾人問o野，但係冇乜機會發言，差唔多人o地問我o地五條先問得兩三條，有o的問題重覆又重覆，仲有o的係明顯冇聽書而問o既問題！我o地開始有o的不滿，Leo乘機搞guest，動議將主席Kitty罷免，要三分之二贊成先得，最後有三票。不過如果當時我係議員，我可能都會過「主席，我動議對你不信任」，因為主席冇辦法平衡各方o既發言囉。繼續三語並用，最後幾次發言，我o地仲有幾條問題要答，全部人都舉哂手，Kitty竟然仲俾人再問？Leo又玩o野，操兵咁操出場，離場「抗議」，如果會議唔公正，我都會。二讀表決時間，Leo走o左，但係要保住票數，我偷雞坐佢個位代佢舉手，21票贊成，20票反對，4票棄權，二讀通過。本來三讀係要將草案所有條文讀一次，不過時間關係，Kitty只係俾一分鐘時間我o地，點讀？唯有濃縮哂咁講，有o的人根本就係想進入三讀階段o個陣聽清楚o的，冇咁o既機會，結果冇人棄權，22贊成，23反對，本來二讀過到，最後三讀被否決！
完哂所有辯論，賽後檢討。Kitty堅持自己冇錯，仲話我o地發言機會已經比其他人多，冇o野好講。羅沃啟話二讀、三讀結果唔同o既現象時有發生，通常係出於政治考慮，唔使太介懷。評判之一o既浸大哲學系教授o個o的最搞笑，狂串港大份《奴隸宣言》，話依家o的大學學生會變哂質，令人失望。佢o的粗語好文雅，比PK更厲害o既係"PK to the power PK"，話立法會o既設計係英式o既西敏寺式民主，不過對中國人o黎講，太豪華，toilet都係，令人慢慢赤化。佢好驚奇我o地冇俾香港教育荼毒，仲有關心社會o既意識，希望我o地入U之後可以上莊，一改學生會o既頹廢作風。
等緊出最後賽果，邊幾個係優異辯論員，我o地乘機猛咁影相，又玩掣，好似大鄉里出城。出色o既debator太多，本來o既三個變加到五個，青年事務組通過唔到草案，不過表現可人，贏o左兩三個優異辯論員獎，恭喜哂。最佳辯論員大獎，眾望所歸，Victor大熱勝出！頒完獎，意味「青年圓桌會議2004」已經正式完滿結束，好唔捨得呀，呢個活動令我足足冇o左一星期時間做o野，不過得到o既比失去o既多，學到好多o野，識到好多人，係畢生難忘o既經歷。如果下年SSU再搞Youth Conference，我一定會返o黎幫手………入SSU committee就免喇。

>>July 31, 2004 at 9:45:56 AM GMT+8

2004 年 7 月 28 日 星期三 【乍寒還暖】

話咁快五日四夜o既camp到o左Last Day喇，如果時間可以停留就好極。
08:45先知醒，刷牙洗面，臨急臨忙執好哂o的行李，準備09:15還房鎖匙。得八個人o係canteem姚早餐，簡直少得可憐，唔使問o尋晚一定要通頂。其實呢幾日o的早餐都麻麻，明明肚餓都唔食得多。
全世界拎埋行李落輔仁，分開o尋日o個三大組，輪流做匯報。始終都係政改組最多人有問題，我都諗到三條，不過聽日o係立法會先叫組員問。我o地青年事務組守尾關，三組當中唯一以草案形式o係立法會辯論，早已經先天不足。重新分開最初o既10組做檢討，Herman好認真咁收集意見，不過時間太短，俾Kit叫停，仲有好多未問o架。組員對個camp都大致滿意，都係第一日o係第一日二宿o既Kitty最印象深刻。
講好聽日立法會o既安排，o係輔仁四圍影相，全家福、鬼馬相、攝石人，乜都有。組員陸陸續續走哂，Logistic Team有好多o野要執，好忙，留低幫手。o的圓檯逐張搬落canteen好麻煩，其他物資抬哂上一早call定o既車，Kit + Timber跟車返人權監察總部，其餘o既一齊出沙田食飯。告別中大喇，環境唔錯，風景一流，回味無窮，食Q哥哥超好人，建築物冇港大咁典雅，不過都好靚，好想重返呢度。
o係新城市食擔擔麵，原來我o地當中有伊斯蘭教徒，其實都冇乜出奇o既。提起梁振英，呢個仁兄厲害喇，我夠膽講句，如果佢真係想參選第三屆特首，我會第一個上街反佢！食完就各有各返屋企，跑一大段追車，疲態盡露，上車坐低即刻急call周公，16:10終於返到屋企，反而唔想捧苟落床。
呢個camp賺到笑啦，個個都話營費平，下次加價都冇問題。最重要係好多書拎，「網政廿一」出版o既《講奸語錄》網羅一眾港奸o既「偉」論，思匯政策研究所教香港人參與公共事務o既《讓民意聲音響起來》，支聯會 + 次文化堂記錄歷年六四同項紀念活動o既大會宣言o既《歷史宣言－十五年的戰叫》，中大學生會內容豐富o既《路漫漫－六四十五週年特刊》，最後係中大政政助理教授黃偉豪針對特區政府七年劣政而寫o既《香港特區的管治和失誤－布魯金斯智庫之道》，全部送o既，又有蔡子強簽名，賺哂！
Youth Conference未完o架，聽日o係立法會大樓仲有模擬辯論，重頭戲！

>>July 31, 2004 at 8:10:40 AM GMT+8

2004 年 7 月 27 日 星期二 【乍寒還暖】

08:20先知醒，早餐人數再創歷史新低，o尋晚o的人一定玩到好夜。
一片死寂，好多人冇落o黎，播介紹立法會o既短片，講立法會o既功能、產生辦法、議事規則、唔同類型o既會議，映到其中一幕，黃宜弘做主席？通俗市井文化委員會？之後有個以前幫余若薇做議員助理o既答問題(羅致光、司徒華都唔o黎，俾人私底下大鬧)，原來做議員超好搵，月入18萬，主席雙倍，更加相信李國寶、黃宜弘、吳亮星、馬逢國、梁富華呢o的人簡直係浪費公帑。
今日冇安排lunch，每人得到大會$25包底，o係人大任何地方食。同Herman、震音、耶穌去本部o既Staff Canteen飲茶。震音、耶穌o係中大，爆大學學生會內幕，幾年o黎都冇乜似樣o既學生會，同中學差多，乜中學o的學生會代表學生o既咩？到時我會唔會上莊(入學生會)言之尚早，不過多數會入學聯………唔止靜坐o既。耶穌知我想讀政政，話其實政政o的料靠自修都得，而且政政o既discipline麻麻，反而讀Sociology可以學多o的。碟飯原來冇落單，都係唔要喇，埋單，o岩o岩好唔使自己俾，出面落大雨，去唔到食檸檬批添。震音帶我o地去學生會刊物印刷處，拎o左本六四15週年特刊，o的人好頹廢，似十足嬉皮士。過學生會辦公室，門口o個篇警察招募廣告超搞笑，又有港大《奴隸宣告》，上面寫o左「不知所謂」四個大字。再等落去都唔係辦法，join埋其他人冒住大雨徙步趕返逸夫，好彩冇乜點濕。唔想行，o係房hea到14:30先肯走。
今日開始參加者會分成三者，分別就教育、青年事務、政制檢討作深入討論，然後o係星期五去立法會做全體模擬辯論，我同Catherine、Sandy俾人編o左落青年事務o個組做組長，我想做政改呀，始終熟得多。我做秘書將o的人brainstorming整理好，大綱係動議由政府撥款成立由青年人組成o既青年議會，係獨立組織，負責好多唔同範疇同年青人有關o既工作。不過有時講o野太深入，太多枝節o野，蹝o左好多時間。Break得太多，茶點第一次有雞翼薯條，不過好多人都食唔落，電話入。Achievement唔多，之前summarize到五大點得一點完全搞掂，之後唔理喇，盡情咁玩，搵電腦椅玩麻鷹捉雞仔，好刺激！
四餐dinner有三晚煮魚白茄子，不如麻婆豆腐啦。勁歌有人唱校歌，個個圍住電視唱。返房同Herman講人生，唔知Michael想搞乜，竟然o係Grad. Din.搶咪大叫「還政於民」，對人講人話，對鬼講鬼話，我都唔會o係friend面前失驚無神嗌「董建華落台」啦。夜晚繼續準備，決定好以草案形成提交大會，唔知咩事，夜晚全部開哂turbo係咁去，草案大政上完成，只係字眼上仲要斟酌，品德、品格、品行有乜分別？原來好多人都唔知星期五要上立法會，poster大大隻字寫明o架！亦唔知到時幾點到我o地o既草案辯論，好彩Alien + Kitty來得及時。
最後一次開E超好，三組組員都超水準，o的組長個個讚不絕口，安排埋聽日點收鎖匙。
擺o左兩晚o個三個西瓜終於開得喇，OK甜喎，據聞William玩糖黐豆輸o左，唔肯除底褲！本來仲有o者喱o架，不過太水汪汪，最後俾Michael一手糟蹋！Grace過o左00:00就16歲生日，差唔多全部80人走哂上三樓送蛋糕幫佢慶祝，好似o個o的黑幫龍頭大家姐生日咁。Timber引述逸夫傳統，有人生日，就有人俾人祭旗，Grace係女仔唔方便，結果Alien做o左替死鬼，逃唔過被Happy Corner o既命運！Alien當然唔會唔還擊，Timber + Alien鬧剝褲，露底！o係房鋤D，之後Herman入o黎，原來發生o左o的好大鑊o既事，今朝Dec係有錯在先，不過似乎有人想公報私仇囉；o的人玩得太癲喇，原來Grace生日會仲有下文，掟蛋糕，又有女仔不斷尖叫，嘈到連o係二樓沖涼o既我都聽得好清楚，結果本身係逸夫宿生o既Timber俾人警告，SSU俾人black list，唔知係逸夫黑名單定中大黑名單，半夜o的高層o係201房開緊急會議。聽日都出camp啦，一直都冇乜事，係last night先o黎過唔到終點。
俊豪房迫爆，Alien俾人問極尖銳o既問題，佢似作大o既多喎！又講心事，又係o個句：有時同唔太熟o既人一齊反而更加講到心事，唔知點解o係佢o地面對特別放膽講多o的，心底o既都講埋出o黎。
本來真係想通頂o架，不過都係捱唔住，03:50熄燈。

>>July 30, 2004 at 5:07:37 PM GMT+8