2004 年 7 月 6 日 星期二 【綿綿細雨】

董伯伯67歲生日快「落」！！！！！！睇下董伯伯幾受「歡迎」o丫，雷公都幫佢「賀壽」！！！
o尋晚俾人一言驚醒，原來我一直都犯緊個咁嚴重o既錯………
再夠手力都拎唔起一大袋影印返學，為免再蒙受損失，先收錢後交貨。F.1-4要做問卷，ADT全軍出動，牛榮4E本來係最難搞，不過我o既3E都不惶多讓，我入o左去派埋問卷都好多人唔埋位，層層疊、射手槍、遊戲王、鋤D樣樣齊。算啦，杜sir都預o左唔會人人都做，收o的交貨。
唔使入hall，去art room玩再造紙，睇周sir示範，自己試，好核突，無啦啦俾人插o左粒乾花。前後整o左兩張，唔相信呢o的紙可以用。陳江冇o個樣搞o個樣，溝完呢樣色又溝o個樣色，溝到成pat臭臭咁，正宗攪屎棍，「信我啦」，成村人唔妥佢，肥峰、牛榮粗口四起，陳江早就掟石頭落公廁。
To a large extent玩再造紙係為o左避開入hall睇唔知乜o野比賽同job safety，全人類入哂hall聽第二個talk，即刻返課室，原來已經有o的人匿o係度玩。四條友鋤D，坐正三煞位，邪童上身，頭四盤都俾人炒，o的牌yap到o丫，坐過少少就回復狀態，不過同花順贏唔到，三條2都贏唔到，怒爆。玩o左無數局，Step返o黎，被勒令收檔，改玩非洲話事啤，陳江黑到o丫，加埋罰o左500下掌上壓，佢仲未食紙o架喎！
七七事變，唔係指蘆溝橋o個個(呢個10話鐘都有得講)，係上年田少一鑊翹起董先生o個單。歷史自有公論，其實19世紀英國大政治家Palmerston講過「我們(政治家)沒有永遠的盟友，我們也沒有永久的敵人，只有我們的利益才是永恆的，而我們的職責就是去努力地抓住這些利益。」田少o個鋪急轉彎擺明就係撈政治本錢，打死都唔信佢真係順應民意，不過呢個就係佢o既工作，佢大可以只為自己而從政，冇必要真心「為民請命」………不過政治家係咪真係唔需要有道德？
是日矚目轉會：
列斯加(荷蘭右閘) from巴塞隆拿to米杜士堡 自由轉會

P.S.連保皇黨都唔敢撐楊永強，眾叛親離，唔到最後關頭佢都唔肯落台。毫無疑問，299條人命，唔可能冇人需要負責，楊永強一句「香港冇肺炎爆發」，搞到我o地雞毛鴨血，事後不斷咁狡辯，最終成為董特首向公眾交代o既犧牲品。事實上，北京o既責任可能更大，隱瞞疫情，唔肯向香港通報，香港做到o既其實好有限。

>>July 7, 2004 at 1:55:57 PM GMT+8

2004 年 7 月 5 日 星期一 【酷熱】

Fan生日快樂！！！
本來要入hall聽唔知甚麼聰明蛋，總之係好似好益智o個o的，好彩新locker到o左，李sir搵我、陳詩韻幫手將o尋日執出o黎公民教育組o的o野擺好。新locker好大，好易分類，只係熱o左o的，成日入art room抖。意想不到搵到咁o既教材，睇年份，好合理。
唔想入hall，搵埋溫婉彤、謝玉蓮返課室涼冷氣，拎陳江副啤牌出o黎，先玩cum綿胎。呢刻先發覺原來自己唔記得o左cum綿胎點玩，好彩先輸後贏，識偷步，手好痛。都鋤D啦，原來有人唔識，要教，好搞笑囉，玩玩下就識玩o架喇，事實上的確冇UNO咁易玩，UNO可以單純o的。
單就收到風薛凱琪今日o黎學校講o野，本來話甚麼甚麼博影相、部署、守停車場，最後最多聲出o個幾個唔見哂，跟大隊入hall坐。o個兩個DJ唔知點解唔多順眼，唔知甚麼新城搞o既訓練班，後來o既兩個嘉賓，徐繼宗………略有所聞，仲係冇人理，Fiona出場，稍為哄動，黑妹一個，短頭髮冇咁得，條頸真係好長。講自己點入行，唱歌好難，唔係入錄音室唱咁簡單………戲肉，搵人上台玩，荃官之寶Oscar自動請纓，唱雀仔歌，要喜怒哀樂咁唱，笑住唱哀，跳住舞唱喜。Oscar出招喇，佢o個個係打籃球定拍檯？總之全場反肚，Oscasr其實係咪俾DJ笑？果然係來去如風，遲o左開場可以早好多完，本來唔知去o左邊o個o的人突然出現閃o左入後台影相，唔知發生緊咩事。睇住佢過停車場，原來又有人早就守o係o個度，又唔知。都係算啦，以前未見過略有知名度o既人o者，完全好奇影唔影都冇所謂………睇黑人我可以對住塊鏡睇。
放學排企位，不過唔齊人，求求其其企高矮肥瘦排好哂，記住就搞掂，我懷疑o的人到時會唔會仲記得。
同Fan賀生日，遲到添，又要拎影印，好論盡。次次都花好多時間「商量」去邊度食，最後又係沙嗲王，壽星女、我、六叔、蝦、死魚、琪、Lo、Mina、Kuto、Amy加埋之後先o黎o既梅玲，以前好似冇11個咁多。食食下琪提議玩「推你」，呢題以前聽過，眾人冇乜頭緒，係咁誤導人(冇心o架)，用逆向思維會搵到答案o架。
食完，唔想散住，Kuto、Amy、梅玲走先，其他人上哂麥記。Truth or Dare熟人唔好玩(我係堅持同唔太識o既人玩可以放o的囉)，最後Mafia再度登場，好亂，唔多記得咁玩，死魚超行運，幾次都係佢，唔好諗我諗得咁複雜啦。玩得好刺激，鬥估，鬥俾人屈，鬥掩飾自己，鬥混淆視聽，玩到唔知時間，21:45先各有各散。

歐洲國家盃結束象徵04-05球季已經開始，轉會新聞會越o黎越多………包括吹水o個o的，是日矚目轉會：
羅美度(丹麥翼鋒) from恩浩雲to查爾頓 200萬鎊
迪高(葡萄牙中場) from波圖to巴塞隆拿 1200萬鎊
昆利斯馬(葡萄牙翼鋒) from巴塞隆拿to波圖 借用

>>July 6, 2004 at 3:41:37 PM GMT+8

2004 年 7 月 4 日 星期日 【酷熱】

周展程 + Cindy + 娘親生日快樂！！！！
12年前出現o左丹麥童話，今年出現o左希臘神話，希臘球員o係開鑼前都應該冇expect過自己會有咁o既結局。列克格係最大功臣，陣中完全冇球星，佢好似打機咁control場上o既希臘球員，o個種所謂「木馬防守」，球員專心到得人驚，反擊效率極高，列克格最叻係因應希臘球員特性建立適當o既戰術。其實今屆歐洲國家盃反映出教練o既調兵遣將能力比球員「星味」更重要，史高拉利、布克拿、列克格都係咁樣起家，老實講我留意佢o地o既謀略多過貨不對辦o既所謂球星。有人話希臘咁o既貨色都打得入決賽係球壇o既悲哀，相反，呢個象徵國與國之間o既差距越o黎越睇，波只會越o黎越好睇。我o既歐洲國家盃最佳陣容：
　　　　　　　尼高普尼迪斯
沙達利迪斯　　卡華路　　達拉斯　　艾殊利高爾
　C朗拿度　薩高拿基斯　　文尼治　　　洛賓
　　　　　　　　朗尼　　巴路士
加加埋埋得三個幾鐘，神智不清咁撞返學。賭錢旺新丁，重搥5.5倍一擊即中………入hall聽人講耶穌，甚麼逆境自強，超耶穌，冇神冇氣，得鬼閒留意佢。
幫李sir執公民教育組o的o野，有好多唔同類型o既教材，發現97前後o既公民教育教材有好大分別，港英時代o既偏向講社會事務，譬如法治精神、何謂三權分立………主權移交之後o既題材窄得多，大部分都係所謂「國家民族」、聲稱基本法會點樣保障港人………當然仲有其他唔同範疇，不過比重明顯細o左。
本來想鋤D，俾Step叫停，之後唔知點樣上5E搞talk，我完全唔知原來要同F.4分享讀書心得，事前好似冇聽過。F.4問親o既都係幾多分返到荃官，AL有乜科讀，唔知應該話佢o地對CE係胸有成竹定係根本志不在此，對於讀書心得完全冇問過，時間所限都冇講。過隔離房再同4A講，其實每科o既讀書方法o地唔會仲未知，點樣分配作息時間同心理上準備好考試先係佢o地最需要o既。拉大隊上六樓後座join理科人，杜sir + Miss Leung講o的言之有物o既道理，Miss Leung搞到理科人頭昏腦脹，其實學生們基本上係佈景板。
唔知點樣校友會請Academic Team + Guidance Team全人類食o野，o黎埋同我o地搞大食會。好多F.4唔知有o野食，少o左好多人，任食。唔敢食沙律囉，之前擺哂o係門口曬太陽，趁熱食咩？做得校友都唔會窮得去邊，盡情食佢o地，雖則未至於狼吞虎嚥。魚又o係度炫耀佢幾醒幾掂，我冇興趣玩美洲國家盃，唔精彩之餘又冇路捉。原來聽日薛凱琪會o黎荃官唔知做乜(總之唔唱歌)，秘密會議discuss聽日o既部署，要相唔要名，唔通真係問佢條頸幾長咩？食剩好多，唔知校工們會黠處理，好浪費囉，不過冇法。
今日好多人返o黎打籃球，林慧豪、楊嘉泰、梁鈞雄、牛雜o個o的，同F.4 & 5鬥全場。死肥峰，睇完波乘機唔返學，勁講「自投羅網」o個條友，達陣………原來Candy都未走，又嗲多陣，都係返歸慢慢叉電。

>>July 5, 2004 at 3:08:04 PM GMT+8

2004 年 7 月 3 日 星期六 【暴雨】

去西九龍食日本o野，一直留意住搭檯o個兩兄弟。哥哥好錫弟弟，不過換個角度睇，細佬最多細我三四年咁大把，不過完全唔識照顧自己，連搬走碗麵豉湯都要哥哥代勞，食咖哩飯食到出哂界，又要勞煩哥哥。我肯定弟弟唔係o個o的有病連飲食都要人照顧o既細路，佢唔識照顧自己，某程度上襯托出哥哥對弟弟o既愛心。

Re Cafu:我唔覺得民主黨係主張大派福利o既政黨囉，保障弱勢社群係每個政府o既責任，有o的福利開支係唔能夠節省，民主黨只係認為政府唔應該削減呢o的保障。就算俾民主派o黎緊贏到過半數議席，因為選民唔會再容許有人浪費公帑，香港o既福利開支根本唔可能一下子大增，福利主義唔會o係香港出現。

>>July 4, 2004 at 3:22:08 PM GMT+8

2004 年 7 月 2 日 星期五 【陰】

七一後記：
大家過獎喇，其實魚、Step、大恩姐前日都走上街頭，我o地都係想表達自己o既訴求，希望當權者聽到我o地o既聲音o者，上街o既香港人個個都值得鼓掌。
年青人唔再政治冷感，唔再以為可以「不食人間煙火」咁活o係自己o既世界。華叔大可以放心，我o地年青人對社會有承擔，唔只識讀書同吃喝玩樂，既然我o地係未來社會o既主人翁，自然會追求更好o既未來，絕對唔會逃避。社會各界對我o地年青人似乎特別眷顧，中學生聯盟o既遊行隊伍去到邊度，都受到熱烈鼓掌，都有人介紹我o地俾途人識。社會運動如果冇年青一代o既參與，好難會持久。
有人話七一係香港擺脫殖民統治o既大日子，應該慶祝唔應該搞示威遊行。我o地好聽話，我o地唱歌，演街頭劇，設計各式各樣o既標語(例如中大學生會o既「董建華釣錦鯉」)，沿途有講有笑，係99.99%慶祝o既氣氛，不知幾咁祥和。
可以講句2004年o既七一遊行比上年更好，少一分上年o既戾氣、怨氣、絕望，我o地有o既係樂觀、希望。我o地「迎接光輝歲月　風雨中抱緊自由」，經過風風雨雨，無論經過幾多挫折，我o地都係不屈不撓，絕對唔會退縮，為美好o既將來鋪路。
冇人鍾意天時暑熱上街暴曬博中暑，不過如果香港人仍然需要上街爭取我o地o既應得，我會義不容辭，個人嘆少陣冷氣，玩少一陣冇所謂，最重要係知道自己最需要o的乜。

2004年Eric好歌流行榜(第26週)：
1)常言道(劉德華)
2)對不起不是你(陳慧琳)
3)分流(陳小春)
4)吻別的位置(李克勤)
5)處處吻(楊千嬅)
6)舊人(劉浩龍)
7)丟架(Twins)
8)叫好叫座(鄭融)re
9)與神對話(許志安)new
10)我在存在(黃貫中)

Re挺：親共唔係乜o野問題o既～
Re怒：以為你唔敢出o黎添，唔該唔好亂扣帽子，我絕對唔介意你o係度發表任何異見，所有人都好樂意同你討論討論。不過麻煩你發表任何你認為正確o既觀點o既同時，提出理據，證明我o地顛覆緊北京政府，證明普選會搞亂香港，證明反對共產黨等同反對整個國家民族。我只可以話你知，我熱愛國家，熱愛中華民族，所以我希望國家有民主。如果你咁樣都算冇言論自由，我相信世界上冇乜邊度會有囉。
Re Pang:唔知原來我請o左你做本日記代言人添，你都幾有信心我容許任何嚴重粗口以外o既留言喎，你都應該多o的o係各大forum分享討論討論。
Re魚：記憶中你當時留言o個陣係咁講，我都以參加過七一而光榮。

>>July 3, 2004 at 2:59:04 PM GMT+8

2004 年 7 月 1 日 星期四 【酷熱】

充滿疲態咁返學，仲係全身冇力，最多只係唔再頭暈，唔通真係Herman所講o既「遊行後遺症」？
參觀歷史博物館，唔使睇ebate，唔落Geog Room聽briefing住，同Judy、陳江、肥峰、龜o係課室鋤D，副牌好癩，不過玩o左咁多年都成日出錯牌。最後都俾人叫落樓，睇video，又係香港淪陷史，講下讀歷史有乜方法，多得有人交波俾我。10:15上車，o岩o岩好夠位，迫迫地，路線同我想像中o既唔同，不過都o係計算之內o既25分鐘內到。分開兩批人，好彩我o地o既Miss Leung跟我o地o個隊。
好似幾多o野睇喎，講Geog自動收聲，搵馬騮，睇原始人，o係馬灣住o既係馬灣人。睇古物，睇鼎，以為要o黎鑊烹，一時間諗唔起「簋」點寫，上古史o既香港對係都係冇乜興趣，我最鍾意o既都係現代史。香港原居民生活幾純樸，又想入衙門又想上船，個戲棚令我諗起《魂魄唔齊》。
上二樓，開埠初期o既香港，我o地醒，原來真係有人以為林則徐當年用火燒鴉片。睇英國商船，綠色外牆原來有段故，唔係係又綠唔係又綠。似十足民初街，當舖counter咁高原來運用o左心理學，吊架真電車入博物館，沙田某官立中學o的學生好激喎，俾人趕出街。睇埋溫黛、徙置區，睇下爹娘細個o既社會，o的舖頭我都好似有o的印象。之後自由時間，同Billy、挺周圍去，上閣樓，有大頭綠衣，聽卜卜齋；去睇三年零八個月，一片廢墟，Billy話好日本風格。冇o野睇，離開會場，睇紀念品，o的杯幾得意，又有一盅兩件o既磁石，冇同Billy佢o地走，想等埋另一group人。
Candy佢o地要去無印，要行好大段路，金馬倫道冇隔離加連威老道咁多o野睇。童心未泯o既Judy玩旋轉門，o係斑馬線隔離亂過馬路，經常將「望見家鄉」掛o係口邊。其實我唔係陪佢o地去無印，只係想出彌敦道搭車有人陪，早知唔使追6A追得咁辛苦，咁遠仲蹝心機追，蹝力。

Re Pang:可能係少數響應董伯伯「與時並進」o既呼籲，掌握互聯網技術o既溫和派(相對地)維園阿伯。
Re Billy:中哂，我覺得你應該多o的o係網上留言板發表高見，互聯網好需要有見地o既網友。

>>July 2, 2004 at 2:26:52 PM GMT+8

2004 年 6 月 30 日 星期三 【清涼】

多少次　迎著冷眼與嘲笑　從沒有放棄過心中的理想
一剎那恍惚　若有所失的感覺　不知不覺已變淡　心裡愛(誰明白我)

今天只有殘留的軀殼　迎接光輝歲月　風雨中抱緊自由
一生經過惶惶的掙扎　自信可改變未來　問誰又能做到

太驕傲喇，好開心可以同40萬人一齊，一齊堅持到底，唔怕陽光，唔怕高溫，更加唔怕政棍o既攻擊，齊心盼望將來！雖然冇o左好熟o既朋友一齊行，但係我敢講今年比上年更加難忘，我為我而驕傲！今日非常之熱，有紀錄以o黎最熱o既七一，呢個係上天俾香港人o既考驗，我o地捱過o左喇！
18個月內第六次去遊行，一切準備就緒，12:30出門口，地鐵好迫，不過一到銅鑼灣站就少o左半車人。諗住再join中學生聯盟o個隊，不過要鬧下SSU集合地點前後有三個版本：民陣話所有團體都o係維園集合，SSU網頁話中央圖書館，今朝蘋果話12:00維園籃球場，唔知邊個先係真。我先去中圖，得警車唔見人，之後入維園，見到民協、七一人民批、45條關注組，係唔見SSU，好彩撞到幫SSU宣傳o既人，原來所謂「中央圖書館」係指中圖後面o既足球場(上年等o左好耐o個度)。終於趕到，人丁頗為單簿，得30人唔到，而且好多係工作人員，佢o地都唔記得o左我。今日簡直係行大運，一連俾三個媒體訪問，先係明報，之後係商台，最後係………日本o既電視台！以唔同wording將相同o既意思重覆三次，「冇朋友一齊o黎，不過唔寂寞，你唔見呢度咁多人都同我有一樣o既理想咩？」隔離玩街頭劇，搞笑到o丫，William極速買到線，播到《海闊天空》MP3喇，萬歲！全場勁唱，玩卡啦OK學會，學聯都有人唱埋一份，中圖樓上有o的中年男人對住我o地直豎姆指。
15:45出發喇，跟住學聯隊尾，唔可以即出高士威道，要兜大彎，返入維園先，再等大會指示，當時龍頭已經上o左政府總部。o係維園1號場區等o左好耐，懷疑警方係咪有心想拆散SSU條龍，見到陶傑呀，唔記得問簽名！o係球場烈日當空之下曬o左好耐，件衫早已經濕哂，無意中幫tempo賣廣告………
17:40終於輪到我o地出發喇，邊行邊唱，最搞到噱頭，附近o的「無特別背景遊行人士」都唱埋一份。唔知係咪俾太陽曬得太耐，加上唱得太厲害，呼吸開始有o的唔暢順，開始唔夠力，到o左奧運橋底，暈喇，中暑邊緣喇，要即刻搵人扶埋一邊。唔該哂Kitty幫我撥扇，唔該哂民陣糾察幫我「卒」白花油，唔該哂St.John問我要唔要白車，我捱得住o架。坐o左一陣，繼續行，要行快兩步，追大隊，但係人太多，空氣唔流通，又開始暈喇，當然我都算當機立斷，話俾Kitty知我捱唔到，o係邊寧頓街離開遊行隊伍。當時以為我呢次七一遊行連頭段都未行完就要退下火線，辛苦之餘好失望。
諗住慢慢沿渣甸街捷徑出Sogo搵地鐵站，真係行唔得快，但係的確舒服o左好多。我突然醒起，出o左大馬路就唔會再行行人路，既然我依家冇咁辛苦，我可以o係行人路跟住大隊o架嘛，抖順哂條氣先返入去囉！睇住SSU兩塊banner出哂o黎，o係行人路跟，到波斯富街，歸隊，Kitty、William都頗愕然，提我唔好夾硬o黎，放心啦，自己知自己事，繼續前進！今日一直都唔見伍展邦，原來佢o係鵝頸橋o既中途站籌款，所以隊伍俾哂Kitty指揮。上年大公報門口澎湃到o丫，今年門口有警察守住，唔玩囉。
兩塊banner成日距離太遠，走失哂，我拎住綠色o個塊，落後橙色o個塊好多。o係高院對開俾幾個人從後截住，連珠發炮唔知講乜，之後Herman、Felix全速跑到氣咳咁趕上o黎，原來灣仔o個陣Kitty叫兩個去七仔買水，但係隊伍竟然唔停低等佢o地，Herman個背囊仲要唔知o係唔o係大隊裡面，入面有$3600數碼相機。打俾Kitty佢又聽唔到，Herman嬲得好厲害囉，冷靜o的先，你都話背囊應該冇俾人偷o左咯。冇辦法再追上前，諗住搵o係皇后大道中o既范國威(民主黨將軍澳區議員)幫手，叫政府總部o既司令台叫停SSU，點知原來o的對講機全部係單向，佢o地只收指令………要急謀對策，派其中一個盡快上政府總部搵袋 + 叫停大隊，我、Herman、Felix留o係匯豐大樓隔離等消息。大家吹水，互相認識，知o左少少內幕消息，坊間o既傳聞原來係真，永恆不變o既定律。一天光哂，Herman個袋的確o係大隊，冇o野唔見，鬆哂，SSU俾人趕，約o係雲咸街瑪莎集合，全世界都好滿足咁落o黎，再次創造歷史嘛。唔得，我o地三個冇上政府總部，點都要行埋最後o個段先係完美，龍尾到上o左總部先上炮台里，劃上完美o既句號。發覺我同Herman政見有o的唔同，不過政見唔同都可以做朋友o既，互相尊重嘛。
大隊要返銅鑼灣數錢 + 執手尾 + 食飯，唔跟喇，返屋企喇，散哂。o係地鐵站告別，最後o個句：「希望下次見到你o地唔係去遊行！」你估天時暑熱上街好過癮o架？我唔好o係屋企嘆冷氣？唔得，如果今日唔上街，我會對唔住自己，我點都要出一分力，而且表達到自己o既訴求，再辛苦都係值得。上年魚話齋：「有心行點都會行到尾！」冇其他朋友一齊未嘗唔係好事，可以識多o的人，今年o既七一太有意義喇！

Re怒：就係因為有你o地呢o的咁o既咀臉我先要堅持上街～
Re挺：我唔知你親共o既？你o個o的簡直係小巫見大巫啦～

>>July 1, 2004 at 4:24:40 PM GMT+8

2004 年 6 月 29 日 星期二 【乍寒還暖】

第500篇日記喇～
照呢個trend計算，如果咁好彩有U讀，開學前就到1000篇。
學精o左，拎o左報紙先上樓。
派o左中史卷，今日向最弱o既DBQ埋手，派埋notes教應該點寫，完埋暑假尾o既test時間，紅開始revise史學名著喇，又有幾條DBQ打發時間，暑假「充實」到o丫………
早就知哂UE唔同部分o既分，今日只係想開死因裁決庭，死都要死得眼閉。Listening執得好緊囉，漏s多s即刻全題冇分，唔怪得俾人扣到得一半；System係意料中事，估中埋邊度錯得最離譜。臨別秋波，5 + 1把握最後機會大講特講，下任校長係女人，甚麼元朗官中、屯門官中、庇理羅士，總之換o左校長就得啦。
老實今次考試冇乜邊科係滿意囉，好彩中化幫我挽回唔少信心。文化題，好似唔錯喎，68%事前冇預計過，或者真係靠o個連幾個理科人都未必知o既香港科學實例，明顯呢個係運氣。派埋閱讀報告，嘩，我要澄清我的確冇上網抄o野囉，見到中西文化o既融合而有所感觸，而且份報告收埋o左塊大骨頭o架。今次o既oral略有進步，聽Miss Fung講我o地小組討論o既問題，仲以為衰o左添，掂埋，overall六成收工，如果速讀o個份拉到過半就perfect喇………其實中化叻唔叻都唔緊要啦。
6B唔知發生咩事，唔再等，陳江、肥峰、我三支公搵食，食$10雲吞麵，夠哂划算。大大聲講波經，係講點買，唔太理解肥峰o既心態，夾埋得1.5倍o既半全場買o黎把？返課室，有D鋤！好耐冇鋤過喇，副牌靚到o丫………陶醉一次咁多啦。鋤鋤下林陸文英走o左入o黎，俾一大堆暑假功課我o地，六星期內(news cut + listening report + listening past paper) x 6 + 買1998-2004 past paper = 暑假有排忙，唔知點解呢刻好掛住5 + 1囉，過o左一年好似已經習慣o左佢o個種教學手法囉，諗深層5 + 1除o左口水多，教書係唔錯o架。
History落1D上，o係樓梯玩小強，諗住玩殘佢，逐層逐層踢佢落樓，挺無端端加多腳，呯！之後o既已經唔識描述，想知詳情就加o的個人想像力。終於收到份卷喇，如果齋睇兩條essay，我係相當唔錯，o個條trace & explain仲要坐B望A囉，點知又係死o係DBQ手上，竟然一半都唔到，拉低哂o的分，我兩個史o既DBQ再唔改好遲早累死自己。一堂時間放肆，商量點幫兩個尖子farewell，搵地方食飯，要o係荃灣，唔好唱K啦，Miss Leung都話唔o岩咯。好似話下星期四喎，原來Miss Leung早已經愛上Mafia？
估計係PA告別作，5 + 1式補時，History人o係出面焗桑拿。又對o左卷，百無聊賴，又冇波講，捱足35分鐘。
同tutor檢討今年o既得失，都係o個句「仲有時間」，不過要開始訂暑期作息時間表喇，不過我擔心o既係自己執唔執行到。排得太疏根本冇意義，迫唔到自己讀書；排得太密根本都唔知自己有冇魄力。要追o架喇，就算唔係話以上哂岸o既Billy為目標，點都唔可以咁o既狀態落場，仲有七個半月！
所以我話讀書唔多從來都唔係乜o野一回事，爸爸o係社會大學研究o左差唔多40年，呢套群眾心理學又幾有道理喎，據我所知無論政府、左派、民主派o係評估聽日有幾多人上街o個陣都冇考慮得太多呢點。其實，人數根本唔重要，30萬又好，50萬又好，唔夠10萬又好，最重要係俾全世界知道香港人o既訴求………或者唔係全部都為爭取普選而o黎，至少社會上仲有好大部分對特區、中央政府都有不滿。唔好意思，o尋日話12:45銅鑼灣地鐵站o既約會取消o左，不過各位聽日可以o係14:00中央圖書館側邊同我o地集合。認住，橙色大banner就係我o地，聽住，播《海闊天空》o既亦係我o地。

>>June 30, 2004 at 2:11:39 PM GMT+8

2004 年 6 月 28 日 星期一 【清涼】

今日要對卷，一直都擔心會嚴重失手。
6A & 7A都唔用得，要上五層樓5A大本營，好熱囉，兩部冷氣開到最大都唔凍，焗桑拿。
最先係落5B面對History，點知Miss Leung漏o左我份卷o係屋企，聽日先知點死。Billy好勁囉，150分，DBQ竟然有29分，進步得驚人！講最長o個題DBQ點做，其實Miss Leung都話我識用model 2算聰明o架，不過我竟然唔記得將最關鍵o既usefulness & limitation擺入去，得5分喳！Step又大熱勝出一枝獨秀囉，睇o黎我唔會好得去邊。
之後UE係失望之中o既失望囉，Practical Skills當時係完全唔知佢想問乜，早知唔會太好，最後炒得仲大鑊過上學期，話之我點樣兩星期一份o既操練。Writing算中規中矩啦，佢唔掂就拉唔高個分o架喇。兩張paper最出奇，明明listening係聽得好清楚講乜，基本上冇乜point漏，oral我好有信心比以前好得多，而且5 + 1都笑啦………兩個都差得好厲害囉，點會咁o架？我真係唔覺得好難喳喎！冇喇，UE大退步，包艇o既邊緣，我好想知道我衰o係邊度！
Recess頂唔順喇，唔再桑拿，全班搬落5B嘆冷氣，好懷念呢個課室，好有親切感。
空堂已經走落1B唔知為乜，打乒乓壁球，睇書，等Lim Sir派死亡證。正式到中史，果然係意料之中，DBQ嚴重地做唔哂，又tip錯題，11/11名花有主喇！老實講o的essay唔差囉，keep得住上學期o既水準，不過DBQ做唔哂輸o左好多分，結果搞成咁。我o地o的DBQ仍然係死穴所在，不過Lim Sir派定心丸，話通常到o左F.7會大躍進，希望啦，我對中史有一定期望o架！終於睇哂李鵬飛回憶錄喇，認識多o左港英後期同主權移交前後o的鮮為人知o既事，飛哥其實就係一本活生生o既香港歷史書。
同陳江去稻草人食，冇生果食，坐o係o的Miss後面，趕得切收口。兩條人鬥吐苦水，都好奇怪點解o的成績達唔到預期，應該唔關歐洲國家盃事，改卷o既問題？
晏晝派最唔清唔楚o既Buss，已經唔知講乜好。200滿分進步o左40分，其實算幾鼓舞，之後李sir講o左最低o既分數，天堂變地獄，原來付出最大努力o既結局係冇分別………發覺Case Study搶最少分，而且份卷係半分半分咁加上去囉………以為總算起到步，原來都不過如此。
非常緊湊，隨之而來o既係中化。實用文平時o既水準，我份評論已經冇其他人咁俾Miss Fung畫得咁花，照是蘋果專欄format抄o架喇。聽Step講隔離班有人70分樓上，根本唔同級數，冇得比。閱讀理解，死得仲慘，寫大大行字得一兩分，冇乜邊篇過到半。計分計到頭都大埋，暫時拉到合格，不過聽日派埋文化題就會再創新低o架喇。
放學要開會，暑假前要搞o的o野，plan要做乜，要搵邊o的人做。有人甩底，初時得我、李綺蘭、林敏傾，開始有o的諗頭，不過得三個人真係度唔到o的乜，唱歌o個part不如搵「有線歌臣」？後來有兩個智囊，好多idea囉，之後好似幾順利，o的搞作漸有眉目。後來o黎o左智囊中o既智囊，救命大恩人，o的英文都係交俾其他人啦。傾傾傾傾到差唔多17:15先完，今晚聽朝都有多o野搞，希望其他人俾下面啦。

仲有兩日喳，後日就係喇，李怡《七一上街嗎？》：
後天，七月一日，你會不會上街遊行？或者是，你會不會繼去年七一之後，再次上街遊行？
假如你認為去年七一上街的訴求已經實現了，或部份實現了，那麼今年你可以不去。但如果你認為你去年的訴求在這一年被漠視、被踐踏、被強暴，那麼今年你當然非去不可。
假如你認同中央和特區政府所說，去年上街的訴求，主要是對經濟狀況不滿，那麼這一年來經濟已有所改善，今年你可以不去了。
假如你認同安居樂業、生活改善、有吃有喝就好，人的政治權利不重要，自由、法治、民主、人權的價值觀不重要，那麼你今年可以不上街。
假如你認為特區政府擱置廿三條立法，是由於回應了市民的訴求，而不是眼看立法會無法取得過半數通過才被迫擱置，因此，為廿三條立法的陰霾已因為政府回應市民訴求而消失，那麼不僅你的訴求沒有了迫切性，政府也願意聽隨民意啦，你今年上街就有點多餘。
假如你認同CEPA、自由行，是祖國對香港的照顧，是祖國給香港市民的恩惠，那麼香港市民應該對施恩者頂禮膜拜，為甚麼我們還要上街抗議呢？
假如你認為這一年來，去年遊行的口號「還政於民」在香港的落實有了進步，假如你認為這一年來香港市民的政治權利有所增加，那麼你今年可以不必上街遊行了。
假如你認同人大常委就香港政制改革所作的釋法，及對「雙普選」的否定，動機是「為香港好」，效果也是使香港變得更好，那麼你今年不用上街了。
假如你認同「還政於民」等同於還政給中國共產黨，人民當家作主等同於中共黨當家作主，假如你覺得由中央欽定哪一個「港人」治港也可以接受，假如你覺得像港英時代那樣香港市民毋須有自主權，那麼七一何必上街示威遊行呢？
假如你相信中央已轉了性，從表示和民主派毫無溝通基礎、從說雙方解凍的機率為零，突然變為說與民主派「毫無矛盾」，這種突變是完全可以相信的，那麼後天又為甚麼上街？
假如你認同中央是爸爸，香港人是兒子，是孫子，不應講任何足以刺激爸爸、爺爺的話，如果你認同香港市民應做聽話的孩子，即使遭到粗暴對待，吃了糖就可以止住哭，那麼後天何必又上街去流汗吶喊呢？
假如你認同特區政府在過去一年內，施政已明顯改善，你認同沙士調查報告，認同當局對平機會醜聞、對巨星匯事件的處理，那麼你後天大可不必上街。
假如你覺得儘管自去年七一以來，一切都沒有改變，但自己只是一個無權無勢的普通市民，毫無影響力，香港的事情是大眾的事，與己無關，遊行多你一個不多，少你一個也不少，那麼你也可以選擇後天不上街。
但是，如果你是一個有自主意識、有尊嚴的個人，你以自己是一個能堅持香港核心價值的人為榮，如果你對去年港人在七一遊行中的表現感到驕傲，如果你覺得每一個香港人都對香港應有一份承擔，如果你對上述的許多「假如」都是否定的話，那麼七一維園見吧。

當然，冇人可以迫任何人去或者唔去遊行，任何人有自由唔遊行。如果你認為以上o既「假如」過去一年得唔到實踐，或者其他更深層o既原因，令你有上街o既念頭，絕對歡迎各位o係後日12:45銅鑼灣地鐵站通去E出口o既車站大堂附近等。

P.S.今日o既Young Post出現個頗嚴重o既錯字，捷克同斯洛伐克o係1993年已經各自獨立o左，所以對巴路士o既描述應該係Czech Striker(捷克箭頭)而唔係Czechoslovakian(捷克斯洛伐克箭頭)。

>>June 29, 2004 at 1:29:39 PM GMT+8

2004 年 6 月 27 日 星期日 【清涼】

今日耳埋最後o既UE oral，慢條斯理咁08:00先起身，09:10返到學校，以為時間o岩o岩好，唁記得o左呢o的永遠唔會準時。同組o既仲有釗、大恩姐、鄧淑欣，俾人叫改名………收到題目，行運一條龍，上次enhancement做過！要做o既只係諗番上次講過乜，做Candidate D有壓力，不過好似幾順………5 + 1對住我笑。之後o既discussion實力所限要俾人lead住講，好彩個個都有位入，一定有得講，group interaction好似唔錯，5 + 1又笑喇。諗住一定包艇，點知超水準，好朗尼，好巴路士，好伊巴謙莫域，擺脫當年F.4陰影，乜o野grade唔係最重要。
唔想走住，o係cover大講波經，期待某人咬文嚼字，慶祝捷克打破「歌臣魔咒」，一於順勢奪標，只希望比利唔好再出聲。之後join小妹，嚴格o黎講只係間中搭嗲，主打係李鵬飛回憶錄，睇o左四分三喇。
原來爸爸以前錄o左唔少關於八九民運o既節目，o的帶少少發霉，不過仲睇到。事實上我對1989年北京學生運動o既認識只係局限o係四二六社論、六四武力鎮壓，其實六四血洗天安門唔係八九學運o既全部，睇o左睇過當時o既節目，多o左認識。派兵血洗天安門將中國推去內戰o既邊緣，天安門o既學生的確唔似有外國勢力o係幕後操縱，而且唔係吾爾開希、王丹唔想撤退，佢o地o既行動(絕食、遊行、靜坐)亦唔算過火。不過最令我唔明白o既地方係：15年前學生o係天安門被血腥鎮壓，北京市民甚至共產黨內部都即刻走出o黎聲援、向解放軍宣洩不滿，點解115年後o既今日呢個心會冷卻得咁快？只係隱藏起o黎？定係佢o地真係冇o左呢個心？
森美睇o黎完全唔識足球，佢o係節目話o係互射十二碼決勝負o既制度之下，贏波球隊純粹靠運，好唔公平，話加o左時都分唔出高下應該再加時，加到分出勝負為止，話之o的球員打到死。冇o野講啦，佢話球員應該打耐o的都唔係問題，叫佢試加度素踢法打150分鐘囉；十二碼好難射o架，係要講少少運氣，不過心理質素先係最重要，同埋射十二碼唔使力？

>>June 28, 2004 at 11:46:38 AM GMT+8