2003 年 9 月 4 日 星期四 【乍寒還暖】

開學一個星期 lu﹐係學校入面﹐有好多中五至中七既人都識得我
中六中七既當然唔駛講啦﹐而中五果D呢﹐就係上年唔好彩要repeat果D
但係奇就奇在中六﹑中五果D都係佢地識我﹐我唔識佢地架
後尾我先知﹐佢地識我﹐係因為聽人講我踢波勁~~~~~
WOW﹗﹗我今日先知﹐原來今日既名聲真係要平時日積月累架
佢地仲約我聽朝去踢波同入校隊添﹐有波踢﹐我梗係會奉陪啦

原來我都算係一個學校既大紅人﹐而最近亦都有人叫我選學生會
我諗如果用我既號召力﹐睇怕都可以得到唔少既選票
選學生會好唔好呢﹖
哈利路亞~~~




>>September 5, 2003 at 4:18:49 PM GMT+8

2003 年 9 月 3 日 星期三 【乍寒還暖】

開佐學四日喇﹐聽日先至正式上堂﹐好期待呀~~~~
聽日有好多既空堂﹐都唔知到時自修D乜野好

我今年學業上既目標首先就係要英文合格啦﹐如果唔係就講乜都假
神既恩典夠我用既﹐唔駛多架﹐好似上兩年都俾我可以僅僅達到pass既成績就夠喇
靈命上就希望係呢班新既朋友入面﹐帶到人信主啦

係呢班新同學入面﹐我對有幾個人特別留意﹕
坐我右邊斜對面既﹐佢成日扮晒班代表同班長﹐排親隊都排最頭﹐
最乞人憎既就係我係班房飲緊野果陣﹐佢走埋黎叫我唔好飲﹐仲話要記名添
佢真係唔識 do 呀﹐佢依家 form幾呀﹐同我黎呢一套﹗
呢個都唔緊要﹐最衰既係佢平時多多爹﹐同我講埋D一D都唔好笑既笑話。
好彩我除佐中﹑英文外﹐都唔同佢一齊上堂姐

我果班既基督徒得兩﹑三個﹐希望主用我將福音廣傳啦
哈利路亞~~~

>>September 4, 2003 at 1:35:21 PM GMT+8

2003 年 8 月 30 日 星期六 【晴】

今朝我既心情好好呀﹐終於好似脫離佐惡夢喇
而令一件事﹐就令到我好唔捨得﹐就係區生今日就離職喇
佢就好似我另一個爸爸咁﹐我都特別感受到佢對我特別好
講解聖經﹐陪我捉棋﹐傳授琴藝~~~~~
當中拉琴就真係最受用﹐佢就之後﹐我就擔正﹐雖然我而家都仲未成氣候
不過我相信憑住對神既心﹐加上自己既努力﹐一定會再有進步﹗
當然啦﹐係我進步既期間﹐要各位弟兄姊妹忍受一下﹐同俾D機會我喇
好彩﹐今日都無咩野傷感既出面姐

愛筵時﹐我地獻佐幾首歌俾區生﹐希望區生之後既日子都如歌詞咁﹕
‘耶和華都在保護你’
直到4點既﹐我地都依依不捨咁離別區生喇﹐唉~~~~~
‘好多野﹐當你有既時候都唔識珍惜﹔當失去既時候就知道可惜’

~~~~~~~~~~~~~~~~~~~~~~~~~~~~‘願耶和華永遠保護你’~~~~~~~~~~~~~~~~~~~~~~~~~~~~~~~


>>September 2, 2003 at 1:26:12 PM GMT+8

2003 年 8 月 28 日 星期四 【晴】

今日已經完成晒所有貞潔課程喇~~~
原來靠自己真係唔可以撫平心中既傷痛﹐而且一連幾日﹐我都俾同一個劇情既夢所驚醒
個夢每次都到我最唔想見到既位置先醒﹐唔知呢D又係唔迷 神對我既啟示呢﹖
希望救恩既 主可以盡早為我預備平坦既道路啦

今晚同區生食飯前收到一個小學同學既電話﹐我地仲可以傾好耐﹐傾到食飯為止先唔講添
佢搵我傾偈﹐係因為佢最近搵到份工做喇﹐我仲搵機會同佢講佐一D教會既野
咁耐都可以維持到呢分友誼﹐都係一件感恩既事黎既

唉~~~~~~好想快D開學﹐忘記晒所有所有唔開心既野﹗
我要專心讀書﹗大家可以有機會見識一下我盡全力讀書既機會喇﹐哈哈.......
哈利路亞~~

>>August 29, 2003 at 5:46:20 PM GMT+8

2003 年 8 月 26 日 星期二 【晴】

今日既‘貞潔’開始前搵佐個代禱者幫我代禱﹐佢講既野絕對準過D風水佬
我好記得佢係咁講既﹕
‘hinten﹐ 神睇得出你心中既傷痛﹐求神讓你心中既傷痛全部挪開。’
‘神亦都賜你一顆剛強既心﹐但係有時剛強並唔可以助你解決問題﹐
希望你凡事都能用溫柔既心對待。溫柔唔單止係女性身上先有﹐亦都讓hinten可以用溫柔去對待每件事。’
佢當時只不過講佐3﹑4樣事﹐但係其中你兩樣的確係我最需要解決既問題。

後尾我都有為人代禱﹐我都好感恩﹐因為我一黎就開口中喇。
哈利路亞~~~~

~~~~~~~~~‘hinten﹐ 神睇得出你心中既傷痛﹐求神讓你心中既傷痛全部挪開。’~~~~~~~~~~~

>>August 27, 2003 at 1:28:29 PM GMT+8

2003 年 8 月 25 日 星期一 【晴】

而家我既心情好番好多喇﹐真係好喇﹐平時無咁快回復到架
呢個星期我都要參加‘貞潔課程’﹐今日為止已經上佐兩堂lu
呢個課程主要都係教我地多D親近耶穌﹐好好咁對待身邊所有既人
我記得牧師琴日講過一番好好既說話﹐內容大概係咁﹕
神會好似羚羊﹑小鹿﹐時常會窺探我地所做既所有事﹐因為神愛我地.....
就好似我地愛一個人咁﹐如果唔愛果個人﹐就唔會千山萬水咁走黎窺探佢﹐睇佢個樣......

個課程已經過佐一半喇﹐好多人都有D特別同神既感受﹐而我就從未試過
可能我準備得仲唔夠啦﹐希望之後果幾日可以多D經歷到神
哈利路亞

>>August 26, 2003 at 3:55:33 PM GMT+8

2003 年 8 月 22 日 星期五 【陰】

今日一早就入camp﹐本來就應該好開心至係
不過個camp入面有好多既安排都令我好down﹐同好多野都估唔到
而有好多估到既壞事﹐就比我想像中更壞
入到camp樹﹐玩水水既時候先比較有番D真係camp既感覺
我玩既每樣事都俾我見到D衰野﹐就係咁最後做佐D對唔住大家既事----杯葛

夜晚有一個叫‘夜行’既時間﹐‘夜行’即係無光既情況下行山﹐本來都係一個好好既環節
但係點知就連夜行前既少少時間﹐都俾我見到衰野﹐俾我遇到個如同地獄一樣既痛苦
令到我心情直接跌落深淵﹐而夜行亦都有另一番體驗
恐懼﹐一秒都無出現過﹐我就趁住呢段路途中諗D我真係關注既所有事﹐個腦一直諗住兩樣野
一句歌詞﹐兩個問題
一句歌詞﹕神 願你來陶造我﹔
兩個問題﹕一﹑lewis問既﹐你camp想帶D咩野走﹖
二﹑行到大概一半﹐我應該行番轉頭當無事發生從頭黎過﹐抑或繼續行埋已經經過佐咁多崎嶇既路﹖
最後呢兩個問題到我去到終點都諗唔到結果

之後我呢埋佐去靜思未諗到既問題
眼望海浪起伏﹐衝上沙灘﹐但又消失得無影無蹤﹐唔知我又可唔可以衝破障礙﹐解決困難﹖
可惜兩﹑三個鐘都係諗唔到D乜﹐期間我都係不停禱告﹐求 神指引我方向
番到camp無幾耐﹐個天就開始落大雨﹐D水好似噴泉咁從下面冒起
我地知道個camp一定失守﹐於是就通知下週圍既營友﹐叫佢地注意下
當時只不過係3點幾﹐都唔知之後既時間點過
不過次次唔開心我都係淋雨架喇﹐呢次都係唔例外﹐反而有番D安慰﹐淋雨feel真係好正~~

其他同我一個camp既人都搵到安置既地方﹐而我仲係出面淋緊雨
最後好彩都有‘太空館’D人叫我入去避雨
令我最後都得番個‘安慰獎’

第二日打三號風﹐全部人都要撤退﹐我唔知應該開心定失望
總之全部都係 神為我地安排既﹐前路無論平坦定係崎嶇﹐都有 神分享既.......



>>August 25, 2003 at 2:13:41 PM GMT+8

2003 年 8 月 19 日 星期二 【晴】

琴日旺才終於係加拿大番黎呀﹐我地足足有4年無見喇
本來我地諗住今晚搵埋一大班舊同學一齊出黎食飯既﹐不過最後都泡湯佐lu
不過算啦﹐星期五再出過黎﹐況且仲有幾日時間淨

話時話﹐佢又話今晚會call我出黎﹐到最後都係泡湯

原先計劃今日又有件特別既事要做﹐點知.........又係泡湯﹗﹗﹗

今日已經飲佐三兜湯喇﹐乜都濟晒啦
但係我相信......明天會更好﹗

>>August 20, 2003 at 4:48:29 PM GMT+8

2003 年 8 月 16 日 星期六 【晴】

ACM最後一晚﹐第三晚
‘不要失望﹐只要盼望’
如果一個人活在失望中﹐又或是活在消失盼望既人生﹐咁樣﹐生存仲有咩意義﹖﹖
信靠神﹐就可以有永生既盼望﹐問題係你想唔想得到

有時﹐我地會埋怨神﹐點解要取去我地現在僅有既財產﹐
但係我地有無諗過﹐神會藉此去為我地安排令一條更好既路呢﹖
所以當我地落入失望入面時﹐要知道任何如何困難既時刻﹐
神都會看顧我地﹐為我地安排令一條更好既路﹐所以我地應該對神長存盼望

三晚既ACM都順利完結喇﹐我覺得今晚既氣氛比之前如何一日都好﹐
可能今晚特別多人決志﹐同有好多人願意作全時間奉獻啦

ACM~~下年一定要繼續搞落去呀

>>August 17, 2003 at 4:23:18 PM GMT+8

2003 年 8 月 15 日 星期五 【晴】

今晚係ACM第二晚﹐依然全場爆滿﹐再次感謝 主
但係比較少人決志咁又真係美中不足﹐可能因為已經太多基督徒參加喇
雖然係咁﹐D氣氛依然好強勁(我地)﹐其他就唔係好知得清楚

上完琴晚信心既一課﹐發覺真係好有用﹐我諗起一句話﹕
‘只要信﹐不要怕’
有好多野都係預計唔到既情況下發生﹐總之就盡在不言中啦
今晚既主題係﹕‘不要孤單﹐只要去愛’
‘我們愛﹐是因為基督先愛我們’
究竟我地點先可以做到---------‘去愛’呢﹖

>>August 16, 2003 at 4:46:27 PM GMT+8