2003 年 1 月 3 日 星期五 【晴】

唉！其實我都唔係好清楚今日究竟係晴呀？陰呀？定係落雨？因為今日又要去返工啦！朝早晨咁早就去返工啦，到夜晚收工o個陣個天都黑曬ｌｕ！！所以都根本唔知個天氣係點o既？！

有時候都真係覺得自己返工都好浪費青春，話曬都係一個後生仔女嘛！！應該多o的出去玩先啱o既！！而家就成日都奉獻o左俾馬會啦！！唉！但係唔做o野又邊度有錢用呢？阿哥又去o左美國喎！都用o左唔少錢啦！！唔通仲要我攤大手"版"拎咩？？而家放假都好o的，遲下要返學就可能辛苦o的啦！！！無計啦！！好！我要下定決心做一個成功o既苦學生呀！..............^0^

呀！！係呀，我今日終於拎o左我第一張o既信用咭啦！！勁呀！！.....

>>January 5, 2003 at 7:15:36 AM GMT+8

2003 年 1 月 2 日 星期四 【晴】

哈哈！今日係o係失魂當中渡過呀！！

今朝阿真真o黎搵我喎！琴晚因為留言留得太開心啦，攪到成四點幾先訓，所以佢打俾我o個時我都未起身呀！！俾佢叫醒o左之後，我就開始執房啦！我廢事太整齊阿真會唔慣嘛，咪特登整亂佢o羅！！哈哈！跟住我又整下呢樣o個樣，佢就已經o黎到啦！！好彩佢都幾循規蹈矩，唔會四圍摸，唔係我全間房o的o野都粗曬o架啦！！但係好明顯佢o黎到就剩係同慧雅icq啦！！不過慧雅又真係好攪笑o既！你唔鐘意阿真，你唔好咁坦白呀嘛！！之後阿真又同關耀東傾電話喎，點知人地返o左屋企，無得去佢o個度！！攪攪下都成個鐘lu！！咁我地就出發去銅鑼灣搵羅韻詩啦！

不過........好明顯我仲係一個沙田友o羅！我係唔識o係香港o個邊行o架！！我地搭o左架23號，我以為佢過o左崇光之後仲會有站o架嘛，點知原來要去到中央圖書館先有喎！攪到我地行o左一段仔路添！！早知返沙田睇啦！咁又唔使搵路，又唔使麻煩羅韻詩特登出o黎同埋幫我地買飛啦！！真係唔好意思呀！！

講番套《無間道》，又真係唔錯喎！做得幾好，個情節又夠緊湊！不過呢，有o的人話呢套戲有o的深度，我又發現唔到喎！可能我太有深度啦！呢o的o野對我o黎講都只不過係一o的膚淺o既o野！！哈哈哈哈！..............值得推介！！(雖然大部分人都睇過！！)

返屋企之時，我返到門口，就以為自己無帶鎖匙喎，就打俾老豆叫佢拎返俾我啦！點知到屋先發現原來自己係有帶鎖匙o架o羅！！唉！不禁都要話自己------"低能"！！\/__\/

>>January 3, 2003 at 3:08:45 PM GMT+8

2003 年 1 月 1 日 星期三 【陰】

哈！今日又係o係無乜o野做o既情形之下渡過呀！！！

今朝11點幾就俾阿媽個電話嘈醒o左啦！！之後再訓多一陣，未夠1點就起o左身啦！！起身之後都無做過o的乜，聽下收音機，睇下電視，食下飯，咁又過o左一日啦！！哈！好期待呀，聽日就可以見到阿真同lawrence(唔好意思呀！上次唔少心打錯o左你個名！不過而家已經改番啦！！)，又可以睇戲喎！！

P.S.阿真，你咁O既留言，無非係想我串你O者，我知你而家鐘意俾人串喎！我唔會上你檔O架！！同埋呢，我要O既係"牛郎"，唔係"牛朗"O羅！後者留番俾你要啦！！都唔知係乜O黎！？！

>>January 2, 2003 at 5:15:30 PM GMT+8

2002 年 12 月 31 日 星期二 【晴】

突然諗番起Murphy前兩日無意之間問我一句︰其實一年都真係做到好多o野o架喎？！我當時都唔覺得！但係諗番起，又真係喎！就過去o個一年，我又真係做過好多o野！

我仲記得我地一齊去卡啦ok度同炭炭、彤彤、敏儀一齊慶祝生日，仲o係o個度打乒乓波添！！我地又買o左樣好o岩雷可久用o既生日禮物俾佢！又一齊好無聊咁上堂，講笑、偷走唔上堂(大部分都係英文堂啦！)、留o係班房度食飯..............好多好多！！最攪笑係我地諗住最後一日點都要犯下校規、遲下到之時，發現原來係無人會理我地o架！！遲到半個鐘，o的人都當我地咁多個人係透明o架！！唉！想呃返張遲到紙都唔得添！！

咁之後又要開始溫書啦喎！！考mock、到真正考試都好似眨下眼就過o左啦！近排考番試，都差o的唔記得係點o架添！！考完試我又同lawrence、關b敏、阿檸同阿凱五個女仔去o左上海，難忘、攪笑、失魂、失散、重逄、玩到癲、笑到肚痛.......好多好多形容詞都形容唔曬o既一次旅行！！事後睇返相仲要繼續笑o既一次旅行！！好勇咁五個女仔拎住本"上海遊遊蕩蕩"四圍摸o既一次旅行！！第一次o係rbt偷o野o既一次旅行！！改花名改到震(sailornoon、水野美、火野阿麗、木野真"擒"同埋愛野"奈奈子")o既一次旅行！！希望今年再有機會同你地一齊再去過！！

旅行完又咁o岩有o野俾我做，等放榜、放完榜、諗揀科、放jupas、註冊、in hall、到hall o既O'camp直到而家返學、考試、放假.............都真係唔少o野！！好難估到自己o係3百幾日原來已經做過咁多o野啦！！記得o既永遠都係一o的開心o既o野！唔開心o個o的？！唔記得lu！！希望到下年，我都係剩係得o的開心o既o野出現o係我腦海度啦！！
/\_________________/\

>>January 2, 2003 at 2:35:50 PM GMT+8

2002 年 12 月 31 日 星期二 【陰】

各位親愛o既朋友仔︰新年快快樂樂啦！！舊年所有唔開心、唔好o既o野都走曬！！新o既一年人人都高高興興！！

哇！話咁快阿哥就去到美國啦！佢打電話返o黎o個時我都未起身呀！！一起身就發現自己o的傷風又再次發作啦！唔！2003年第一日就病，可能係一個好兆頭呀！！(我話你自欺欺人就真！！)

今日都無咩特別o野做，食完o野大家姐就返啦！不過佢同以前無變呀，睇睇下報紙就會叫眼訓o架啦！唉！！跟住我地睇番琴日o個集戇夫成龍，真係好攪鬼，好鐘意郭晉安呀！好好笑呀佢做得！！之後就諗住去買o的p野就返hall，點知佢賣曬啦！好失望添！！

之後8點度就聽商台o既頒獎禮，估唔到一開場就有人喊呀！！楊千fa都勁勁地喎，拎o左好多個大獎！商台年年都好勁，無乜邊個拎獎係唔喊o既！！

哈！諗返都攪笑！我今個假期就好似做緊名正言順o既"織女"呀！不停咁織！所以我諗我織埋手頭上o既呢兩條，我就會停產啦！收過或者將會收到我織o既頸巾o既人，記得好好收藏啦，遲下可能好值錢o架！哈哈！！收唔到o既朋友仔，我諗你地都係死心啦！！

唔知做織女織得多，會唔會有個牛郎會出現下咁呢？？！不過諗落牛郎都係無乜可取之處︰牛精、牛脾氣、牛咁眼、牛咁樣都慘啦！！唯一一樣我覺得得o既︰就係佢會係一個男仔！！唉！緣份o既o野都係可遇不可求o架啦！！算啦！各位朋友仔，我希望大家都可以o係新o既一年度搵到自己心目中o既牛郎啦！！已經有牛郎一齊織布o個o的o羅，咪繼續織得開心o的！！大家都向前看啦！！！！！

嘻嘻！！以上當然唔係我o既新年願望啦！願望呢家o野，講o左就唔靈o架啦！！

>>January 1, 2003 at 7:10:46 PM GMT+8

2002 年 12 月 30 日 星期一 【晴】

哇哇哇！話咁快又到o左2002年o既最後一日啦！好快就到2003年lu！！

今日留o係屋企，所以都訓到成點先起身！真係覺得自己好懶呀！！今日o既重點所在，就係o係夜晚啦！因為阿哥今晚就飛去美國，所以我地就去o左送機，重見到傳說中o既阿嫂！！都幾好呀！我覺得佢地都幾襯，都唔錯呀！大時大節去美國果然係唔同o的o既！保安極嚴呀！！等到9點幾，阿哥就上機lu！！都有些少o既唔捨得o既！！

跟住就返屋企，夜晚諗住玩一陣icq，點知就越見越多人，咁我地就o係icq度一齊倒數啦！！都真係幾攪笑呀！！

>>January 1, 2003 at 11:45:17 AM GMT+8

2002 年 12 月 29 日 星期日 【晴】

今朝一早又要起身啦！因為慧雅約o左我同佢去睇下trendyland開倉有乜o野買下咁，所以就早o左出門口！不過由hall去荔枝角都唔使九個"字"時間，都算快！！不過最衰係無乜o野睇！

之後我地就早o左入去太和，仲幫八婆雯拎o野，我都話我記得點行去佢屋企o架啦！！其他話自己識o個o的都只不過係冒牌貨！！哈哈！！由於未使咁早燒住，所以我地就睇o左三更(剩係黎明o個部分o者！)，我地睇完都唔覺得恐怖，反而覺得好慘，唉！咁樣就無得o係番埋一齊啦！！！

跟住我地就開始燒o野食啦！不過個爐透得唔係咁好o羅！所以好細火，o的o野食燒o左好耐先食得，不過都好開心o既！阿真就遲o左入o黎，因為佢唔舒服呀！不過講真呀！佢個樣不嬲都係面青口唇白o架啦！真係佢唔講都唔知佢邊日真係病緊o架！有時可能病緊個面色仲會好o的添呀！
雖然今年比起舊年少o左好多人去，剩係得慧雅、慧妍、阿慈同埋"面青口唇白"真o者！(阿真個名越o黎就越長啦！！)不過都玩得好開心！！

P.S.慧雅呀！唔好諗啦，舊o既唔去，新o既係唔會o黎o架！無謂辛苦自己啦！！開心o的啦！你可以時不時就搵我o架！！

>>December 31, 2002 at 9:05:39 AM GMT+8

2002 年 12 月 28 日 星期六 【晴】

經過琴日一整日o既黑仔事件之後，今日總算有極大o既改善啦！梗係啦，我今日都無出過街咁滯，點黑都唔會黑過琴日o既！！

今日成點鐘先起身，攪下呢樣o個樣，兩點幾見無乜o野做又走o左去沖涼lu！！真係懷疑自己真係一個阿婆，怕凍親自己！！之後就同同房幫樓主還書，都唔問樓主點解可以睇咁多書o既！我地兩個人拎都覺得重呀！！跟住仲去o左百佳買o野！由於同房覺得留o係度太無聊啦，所以就決定返屋企，夜晚就剩我一個人食啦！！

之後就繼續織o個條送俾八婆雯o既頸巾，可能開得少針，好快就織得咁上下啦！仲一邊睇新城頒獎禮，一邊織添！不過話時話，新城個頒獎禮，就真係同以前無分別，做得太急啦！一o的都唔好睇！！

>>December 29, 2002 at 5:12:13 PM GMT+8

2002 年 12 月 27 日 星期五 【晴】

哇！今日真係支力到癲啦！簡直係筋疲力竭呀..... .. . . .. . .. . .. . .

今朝晨早8點半就起o左身啦，諗住早o的可以起行，咁我地9點幾就已經出o左門口，去麥當勞度食早餐啦，我都真係未識過o係樓下o個間食早餐呀！食完之後就去等車啦喎，等o左好耐、坐o左兩個站先發現唔記得帶大家姐屋企鎖匙，咁我就唯有落車，返去拎啦，仲叫二家姐拎定去巴士站，點知佢拎錯o左俾我o羅！要我跑返屋企拎！！

跟住拎完就坐返巴士去啦，點知俾我遇著個安全巴士司機喎，我度過啦！佢同前車o既距離係保持o係7架車位o架！！！行得慢過蝸牛！！好辛苦先去到青衣，跟住又好辛苦咁返到hall！搞o左好耐先攪掂！！之後就去o左二樓打o左一陣麻雀，再出銅鑼灣搵黃雪美，佢的確變o左好多呀！o的頭髮又長曬，仲做埋負離子添！！個人係唔同o左o既！不過今日出去都真係出得好唔開心，算啦，我都估到佢約我出去係做乜o既，各人有各人o既志向，我諗你會明白我講乜o既！！

唉！返o黎o個時撘23號，簡真係令到我自己覺得自己好蠢呀！！

P.S.有時就真係覺得自己話曬都讀o左兩年中六加埋中七，而家都算做讀o左一個sem大學，但係點解我都唔覺得自己做o野有任何o既改善o既？！好似仲差o左喎！！唉！都唔知自己學o左o的乜！！

>>December 28, 2002 at 6:10:30 PM GMT+8

2002 年 12 月 26 日 星期四 【雨】

今日都仲係好凍！！琴晚仲因為隻腳太凍，訓唔係好著呀！！

今日訓到成1點先起身，跟住就剪頭髮，又幫二家姐剪埋、染埋髮，所以攪到4點幾先得閒，出到新城市都幾唔多夠鐘ｌｕ！本來唸住可以９個人(因為阿大聲聯絡俾我讚壞o左，唔記得約雷可久！)都齊齊整整o架嘛，點知阿慈、敏儀同彤彤都臨時有事唔o黎，所以就剩番成日見o個6條友o係度啦！！最後仲因為有兩個病人o係度，所以我地去o左南風閣食o野，o的o野食真係唔係幾好食o羅，又少，攪到我地好似無錢食o野咁！！好"o拿西"！！

跟住我地就去o左打機同埋影貼紙相啦，出o左部新機，好攪笑呀！但係就俾死人大聲人攪到人地無o左半邊面o羅！！不過話時話，阿大聲人做o左負離子之後又真係表面上斯文o左o既！！之後我去仲去o左麥當勞食雪糕呀！！~~~~~~

P.S.炭炭呀，你唔好咁撻皮呀！寫o的咁o既o野俾我！唔收貨o架！！

>>December 27, 2002 at 4:46:55 PM GMT+8