2003 年 3 月 31 日 星期一 【陰】

今日係４月１日，係我二家姐生日，講番聲生日快樂先！！

同時，今日亦都係愚人節！！真係完全唔知愚人節o既任何背景資料，更加唔知佢o既由來同埋佢o既一切！！過去o個十八個愚人節我都無乜印象，好大o既原因係我根本都唔將呢個所謂o既節日擺o係心︰我唔會去玩人；同時我都唔會被人玩！！但係今年好似要我感受下愚人節"濃厚o既節日氣氛"咁樣，全日都好似受o左好大o既沖擊一樣！原來----玩人同被人玩都唔係一件好受o既事！！

今朝好難得咁樣１０點４５左右就起身啦！睇完報紙就同阿媽出新城市行下街街，都算比我想像中"多人"，有一半人以上都係戴住口罩o既，攪到我同我阿媽呢o的無戴口罩o既人變得好怪？！我地行o左一陣，買o左個蛋糕(係用o黎同我姐夫慶祝生日o既！！)之後就行去西田啦，點知我大家姐打o黎話收到風香港會宣佈成為疫埠喎？！我諗︰唔係咁大件事呀？佢仲叫我地去超級市場入貨添！！

咁我陪我阿媽去打埋最後一支破傷風針之後先返屋企！但係o係我o係健康院對面馬路等緊阿媽之時，竟然俾我見到有兩、三個沙官人行過喎，著曬校服咁，咁勤力o既？之後仲俾我見到一個我良久無見過o既人--------佢就係「惡豬」啦！唔知各位朋友仔仲記唔記得佢呢？o個時佢同阿「勁豬」係成為我地經常o既笑柄！！竟然見到佢喎，我瞄o左佢一眼，見到佢用佢凌厲o既眼神望番我一眼，之後我就用常人唔係好見到o既方法用把咀"瞄"o左佢一下！！跟住.......佢就走o左啦！不過話時話，佢好似好樣o左o的喎，.......但係我諗都係因為佢帶o左個口罩，遮o左佢３／４塊面所致o既！！咁我行返屋企o個時仲見到沙官座新建築物都起得七七八八啦，仲懶係有ｓｔｙｌｅ咁整到佢唔係一座普通o既建築物添！！陌生而又熟悉o既感覺非常強烈！

之後返屋企，然後又再落去諗住行下超級市場啦，點知落到去個情況簡直慘不忍睹、滿目瘡痍咁呀！我直情以為又一個三年零八個月o既來臨，o的米完全無曬，油呀、鹽呀、公仔麵等等o既o野都掃清光呀！！有o的人仲買成四五袋米，食到生蛀米蟲都未食得曬啦！！最攪笑係我同阿媽行去隆亨街市買送啦，入去o個時檔豬肉檔都仲可以拎o的豬肉出o黎俾人揀，但係我同阿媽行o左一個圈返o黎，成"辣"o既豬肉檔都收曬舖啦，實在o的人買o野買到好似蝗蟲咁呀！！我返到o黎仲聽到有個師奶話某某人o係惠康買o左５００蚊肉呀！！～～～食過世咩？！最後政府咪又係話係流料？！愚人節送俾香港市民o既第一份禮物！

睇新聞，又話要將淘大o的人搬走喎，遲下唔知使唔使搬佢地去月球度住先得呢？食完飯，我家姐有個朋友打o黎話張國榮跳樓死o左喎？我地o個時仲諗呢個好似假o的喎，愚人節都唔使玩得咁盡呀？點知新聞就係報導o左出o黎，原來係千真萬確o架！！雖然都係離唔開感情事，但係實在太突然啦！？好地地一個名歌手走去跳樓？！點解o的唱得歌o既人o係呢幾年都死曬o既？！

愛情真係咁恐怖？珍惜生命真係咁難？愚人節就真係要愚人先開心？(或者先安心？o個名１４歲o既男童係應該拉去坐監o架！！)地球繼續轉、伊拉克同美國繼續打仗、感染非典型肺炎o既人繼續增加、空氣繼續流動......................所有事物表面上繼續不停活動之時，其實人o既心已經不停咁o係度轉變緊！！

一日之內受到太多o既沖擊啦............

>>April 1, 2003 at 6:47:57 PM GMT+8

2003 年 3 月 30 日 星期日 【晴】

哇！而家o的肺炎好似真係越o黎越厲害呀，好驚添！！

今朝１２：ｘｘ就起身，之後就上網，同埋睇下電視咁，其他o野好似乜都無做過咁！！有時真係覺得自己係淘ｘ花園o的人好過，係咪都唔會出街，但係又有得食有錢拎喎，１０日就有成６００蚊啦，好過做兼職呀！！～～～～

>>April 1, 2003 at 8:02:41 AM GMT+8

2003 年 3 月 29 日 星期六 【陰】

今朝１１：ｘｘ起身，之後就返屋企啦！！

返到屋企就剛剛食飯！！一邊睇報紙一邊食飯，我以前成日都會做o既一件事，今日終於都做得返啦！！哈哈！！之後４：ｘｘ關ｂ敏打o黎，我就出o左去搵去食糖水啦，好明顯佢溫書溫到眼都花埋啦，我都見到佢，佢竟然睇唔到我喎？！

去到清心箋，無人？！我地一邊食一邊好無聊咁傾偈，傾傾下俾關ｂ敏發現o左一個怪人︰戴住口罩o既黎海玲呀！！佢同阿媽阿哥一齊，但係男仔都係要型，唔戴口罩！！

食完我地就各自返屋企啦，夜晚我睇o左《暗戰》，又係一套難得咁好睇o既港產片！！

>>March 30, 2003 at 5:07:43 PM GMT+8

2003 年 3 月 28 日 星期五 【晴】

今日係星期六，但係今日間ｈａｌｌ比起平時就更加冷清啦！！我雖然係今朝早先訓，但係就訓到１２點就訓醒o左啦！！之後就起身睇下ｇｅｒｍａｎ，又睇下電視！仲睇埋《天線得得Ｂ》添！！發現o左原來呢套o野好捕捉到o的ＢＢ想要o既o野，所以佢地咁鐘意！！

夜晚就同樓主煮飯食，兩個人就食o左平時我地五、六個人食o既份量，咁當然食唔曬o既，但係就嚇親人啦！！之後菜菜仲煲o左o的夏枯草俾我地飲呀！！～～好好飲，乜o野熱氣都無曬ｌｕ！！～～～

>>March 30, 2003 at 4:43:56 PM GMT+8

2003 年 3 月 27 日 星期四 【晴】

今日又係一日ｄａｙ－ｏｆｆ啦！！

訓到１１點左右就俾同房個電話嘈醒o左啦！咁就起身無聊下啦！！

因為約o左炭炭同羅韻詩行街街，咁就諗住可以早少少自己出去行下先啦，但係又好不幸咁見到阿ｍａｙ喎，就同佢傾o左一陣偈啦！傾傾下就聽到ｂｅｔｔｙ話大學都停課喎！！當時就梗係開心啦，時間又差唔多，就換衫出去啦！同羅韻詩會同o左之後，我地就一齊搭９７０出去旺角！我地呢o的無戴口罩o既人突然間變得好古怪，因為成街成車o的人大部分都戴曬口罩啦！！

咁我地首先去幫細嘉拎番隻戒子，之後就去意粉屋食ｔｅａ啦！好抵呀，因為羅韻詩有優惠，所以都剩係食o左２０蚊左右咋！！o係我地食完o個時炭炭就到啦，我地就一齊出發啦！！我地先去瓊華睇o野，我買o左一支好得意o既邪留丸o既鉛芯筆！好開心呀！！跟住我地就去旺角中心，唔算好多o野睇，o的衫都係咁上下！無耐羅韻詩就走先，我同炭炭就繼續行啦！！因為炭炭覺得肚餓，我地就去o左旺角中心附近一間茶餐廳食o野，但係就好似一間黑店咁，o的人好污糟，講曬粗口，又食煙又咳曬咁喎！！我同炭炭都好驚！但係佢o的o野食又幾好食喎！我個芒果西米露，o的西米好得意o架，好似包o左o野o係入面咁o架！！而炭炭個炒一丁又好好食，又落足料喎！正呀！！

食飽飽，我地就行去聯合，原來夜晚o既聯合係無乜人o架，但係都仲有o的o野睇下！！我地行到９：ｘｘ就返去啦！！

返到ｈａｌｌ，大家就一齊洗樓啦！之後我地仲一齊睇o左我第一套o既三級片《台北晚九朝五》，都ｏｋ好睇，o係三級片o黎講都算係高水準之作，起碼有少少劇情！！跟住本來諗住訓覺o架啦，但係ｂｅｔｔｙ就話要開台喎，咪諗住打番幾鋪，點知一打就打到差唔多６點啦！！

ｐ．ｓ．對於停課呢樣o野，我就真係好恨o既，因為我成個ｒｅａｄｉｎｇ　ｗｅｅｋ都無做過o的乜，但係其實諗深一層，停課又真係幾難攪同埋作用就真係唔知有冇啦！一停課，又唔知道係咪４月就可以復課喎，一陣仲係不停有人中招，咁係咪就永遠都唔可以復課呢？而且中學同大學唔同，中學o的書教唔切，低ｆｏｒｍ可以飛o黎教，中四同中六o既咪留番下年教或者頂多補課；但係大學就唔同啦，個課程已經係ｓｅｔ到教唔切啦，咁唔通唔教咩？咪又係要我地上返，咁即係一樣啦！！但係講到尾，我都覺得停課好過唔停o既，話曬都係會死人o既不知名病毒o黎o架嘛！！好難講佢會唔會o係校園度傳開去o架喎！！…………


>>March 30, 2003 at 7:07:41 AM GMT+8

2003 年 3 月 26 日 星期三 【陰】

今朝本來唔使上中文個ｔｕｔｏｒｉａｌ，就可以剩係返下晝o個堂，但係因為要返o黎傾中文喎，所以又要晨咁早起身啦！！(因為我要準備好耐o架，所以就算我地約o左１２︰ｘｘ，我都要９：ｘｘ起身！！)

今日又搭到架“金寶湯”o既１０３啦，雖然有o的殘，但係都仲好靚！！一個鐘左右就返到去啦，咁我就返ｈａｌｌ放低我o的糧食先啦！！之後就去同佢地傾o野啦！我地一路傾緊點整個廣告，好攪笑，但係其中一個就好唔負責咁無o黎到o羅！！

之後就同羅韻詩去食o野，返o左ｈａｌｌ一陣，就去上我今個禮拜第一堂ｇｅｒｍａｎ啦！！好彩我上次個ｔｅｓｔ都唔係好差o者！但係阿ｆｒａｕ　ｆｕｎｇ把聲就變變地，不過我諗佢都係講得太多o野！！

終於上完堂啦，夜晚同阿ｍａｙ同ｂｅｔｔｙ去o左百佳買o野，買完返o黎就煮麵食啦，可能太耐無食麵，又幾好食喎！！


>>March 30, 2003 at 7:06:09 AM GMT+8

2003 年 3 月 25 日 星期二 【晴】

嘻嘻！！今日一走就走o左朝早o個三堂啦！！～～～～

之後就去上中文啦，個條友仔又幾攪笑o架喎！！之後就走o左堂ｌｉｎｇ，因為上o左我都唔知佢講乜o既？！跟住我就返ｈａｌｌ啦，到３：ｘｘ我就去上ｓｃｉｅｎｃｅ啦，但係因為羅韻詩唔上喎（係呀，係羅韻詩呀！！～～～佢唔上堂呀！），我又驚我會遲到，所以我就剩係去拎o左o的ｎｏｔｅｓ就走o左啦！！

出到沙田都未夠５點，諗住行下，就搵埋吳小姐一齊啦！！同佢行街，好似同一個剛剛由大陸落o黎o既無知少女一齊行咁，佢對所有明明已經存在o左好耐o既o野都好好奇、覺得好新鮮咁！！.........

跟住我地就一齊返工啦，去到又見到ｍａｙ　ｍａｙ喎，咁我地就一齊坐啦！今日多o左好多人戴口罩呀！馬會仲每人派o左一塊o既消毒棉花俾我地抹個講管添呀！！....(=.=有鬼用咩，不過都好過無啦！！)今日又遇到一個好搞笑o既賭仔啦，佢一打o黎乜都未講就問我個編號啦，咁我講o左之後佢即刻收線啦！！我諗又係迷信o個家o野啦！！..........

放工返屋企，又係好多人戴住口罩啦～～～～～

>>March 27, 2003 at 11:33:00 AM GMT+8

2003 年 3 月 24 日 星期一 【晴】

唔～～今朝起身都已經１：ｘｘ啦，所以又無上到ｇｅｒｍａｎ　ｔｕｔｏｒｉａｌ，但係今日就諗住做下功課o既！不過最後當然係.............

近排o的記憶都係比較差，唔記得o左自己呢一日做過o的乜啦？！！

>>March 27, 2003 at 11:20:17 AM GMT+8

2003 年 3 月 23 日 星期日 【晴】

今日就係ｒｅａｄｉｎｇ　ｗｅｅｋ之後第一個上學日，亦都係發現o個隻非典型肺炎四周以極速擴散之後o既第一個上學日！！好驚，但係我諗住做一個乖學生，就頂硬上咁返學啦！！本來都好地地，但係未開始上堂，竟然有個人咳得好勁喎，雖然佢坐我後幾排，但係我完全聽得出佢遮住自己個咀遮得好辛苦！！好似話俾人聽我係唔會俾我有一絲口水飛彈出o黎咁樣！！

上完呢兩堂好難過o既堂之後，我就決定去圖書館借書啦！因為要做中史份功課！！拎住成７本書去到櫃面，個帶住口罩o既哥哥就好好心咁介紹o左一本商務o既書，有齊咁多個年代o既一本書俾我！不過我心諗︰我讀３個ｃｒｅｄｉｔｓ咋喎？咁就要去買書，太浪費啦！！～～

借完書好明顯係過曬上ｇｅｒｍａｎo既時候啦，所以就返ｈａｌｌ！！因為今日要練ｄｒａｍａ呀，所以o的時間又係好唔見使！！話咁快又到４：３０，我就要去陸佑啦！！採到８點先走得！！返到去就煮飯食，食完之後仲有罐頭生果食添！！食完就睇o左一陣電視同傾o左一陣偈，無耐就去訓ｌｕ！！

>>March 26, 2003 at 5:00:42 PM GMT+8

2003 年 3 月 23 日 星期日 【晴】

ＢＥＴＴＹ蝦我呀！！

>>March 25, 2003 at 1:40:57 PM GMT+8