2007 年 2 月 10 日 星期六 【炎熱】



有話直說　　　　　　　　　　《未有民主，不要有善政？》

曾蔭權、梁家傑二人鬥落區，鬥玩親民，把本屬小圈子選舉的特首選舉當作真的一人一票直選
來打。民調所見，香港人大多希望特首選舉有競爭，想有人挑戰曾蔭權，但如果要在兩人選其
一，受訪者大多取煲呔而捨袋巾，最近當奴的支持度領先阿倫的幅度更有拋離之勢

如果某人的支持度明顯領先另一人，到小圈子投票卻慘敗而回，那就最能突顯小圈子選舉何其
荒謬。於是，有網民質疑梁家傑參選的意義，更指出梁家傑跟曾蔭權比政綱，煲呔必定勝算較
高，是否變相替煲呔抬轎，兼且造成「小圈子也會選出民心所向的人」的效果，倒過來美化了
小圈子選舉

這個講法的背後，隱含了一種思維：不要做任何可能幫助不民主政府改善形象和提升民望的措
舉。現政府管治不善，敗政頻仍，當然是追求更開放政制的動力之一，但如果香港的民主化進
程要寄望於政府的劣政，如斯消極被動，休矣！那麼，泛民主派政黨以後都不要做政策研究，
寫成研究報告後公開，因為假設泛民提出的多是好政策，提出來後被政府接納，政府豈不是變
相推行了良政？

如果不民主的封閉政府施行良政，贏得人民掌聲，泛民還怎樣借劣政推銷「民主才好」？如是
者，如果我們追求早日落實民主普選，豈不是要祈求政府不要推出良政，一日未有民主普選，
政府最好每日都激起公憤，每日都倒自己米？

煲呔打直選都打得贏，背後更深層的意義是，即使走進直選，非民主派也不一定必敗，非民主
派也有一定機會。換言之，讓現時封閉建制內的既得利益者知道，全面直選對他們不是洪水猛
獸，他們他朝自然教願意小試牛刀(自由黨就是這樣以工商黨身份打直選)，接受和嘗試這種陌
生的遊戲規則，有何不可？讓手握權力者都願意玩民主遊戲，是民主化成功與否的關鍵

>>February 11, 2007 at 1:57:15 AM GMT+8

2007 年 2 月 9 日 星期五 【炎熱】

應該唔算唱通頂，因為冬天o既06:00未天光，各自返宿返屋企
邊度搭到經大埔公路o既小巴？唯有搭頭班81入沙田，轉的士

返房已經天光，07:10先訓，校o左鬧鐘，預算訓個半鐘，唔想走馬嶽
點知三個鐘先知醒，照去上堂，餓住個肚上埋後半段，返宿先食o野
好耐未試過沖完涼o既感覺係咁爽，食飽飯沖完涼反而唔覺得太眼訓

NA送舊，為隊長Gap成送舊，Cutter講錯o野，家傑四寶伺候！想走？
乖乖地受刑啦，走返知行？最後俾我o地夾返圓廣，由暉暉負責踩油
噴香檳環節，King最濕屬正常，不過點解冇人攻Gap成？圍攻佢啦！

冇乜疲態地上MaMaSoc，到tuto先要啪咖啡，呢科原來都可以讀得SY
有排都未到我present，不過已經要開始諗大綱，要有新o既思考角度

P.S.全日身穿短袖衫游走2月o既中大校園

＊－＊－＊－＊－＊－＊－＊－＊－＊－＊－＊－＊－＊－＊－＊

有話直說　　　　　　　　　　　《鐵人、喪禮與政治》

歷來首位在奧運會贏得獎牌的中國(緊記當時的「中國」是中華民國)運動員，1960年羅馬奧運
十項全能銀牌得主楊傳廣上月底逝世，如果在其他地方，即使喪禮不以國葬形式進行，最低限
度都會協助家屬舉行體面的葬禮，以示對運動員作出的貢獻致敬。可是，民進黨政府卻以台灣
沒有合適土地為由，拒絕安排在美國加州撒手人寰的楊傳廣長眠台灣(據說這是楊傳廣的心願)

體育競技從來都是各國展現國力的舞台，體育亦常被用以維繫人民內部團結(看看法國)，當然
更可以是政治鬥爭(不論暴力與否)其中一方的宣傳工具。楊傳廣當運動員時，國共仍處於隔岸
對峙，隨時開火的狀態，碰巧台灣出了這個鐵人，自然被招攬作向大陸「省招牌」之用，因此
國民黨一直都很關照楊傳廣，甚至安排他參加立法委員選舉

楊傳廣的葬禮在加州進行，靈柩蓋上國民黨的青天白日旗，試問一個要徹底「去中國化」，連
孫中山先生也保不住「國父」名銜的民進黨，怎可能親口允許一個協助省靚「中華民國」招牌
的人回國安葬？更何況，楊傳廣晚年支持北京申辦2008奧運，稱只是站在一個中國人的立場為
中國做點事，難道民進黨會把一個「中國人」風光大葬麼？

However, politics is not about the matter, but how you interpret it.民進黨稍稍動動腦袋，搞個葬禮都
可為自己帶來政治本錢。楊傳廣是台灣阿美族人，是中華民國未偏安到台灣前，已居於台灣的
原住民群體。經常把「本省人」掛在口邊的民進黨，何不以「本省人」之名力捧楊傳廣，說所
謂「中華民國」的光榮根本是「本省人」造就，以配合自己的去中國化政策？

>>February 10, 2007 at 12:26:37 AM GMT+8

2007 年 2 月 8 日 星期四 【晴】





經過呢兩星期o既1040，抗病、健康應該由自己負責抑或國家負責？
走堂，冇上大通，下星期1040有參觀，睇o黎應該會連續兩星期走堂

訓到過哂鐘，直接趕去佐敦道街站，附近o既公民黨九龍西支部撐場
擺明踩場，個站擺正o係裕華國貨門口，踩到室外街磚向途人派選票
其實人多手腳亂，今日太多人迫o係兩個檯附近，出入成日互有碰撞
o係度申明，我未決定係咪入公民黨，就算入，都唔會揀九龍西支部

要搵地方hea到22:00，最正路係去上環office坐一陣，冇o野要義工做
草聯鐵閘肥鵬即將步入21之齡，聽朝有馬嶽早堂都通K，唔話得啦？
Eric + R7 + Cafu + 拉登聯手賀壽，創興Green Box，瘋狂fly high到天光
唔玩逸唱，不過會玩社唱，初賽會揀《浮誇》，如果入到final，再揀

>>February 9, 2007 at 9:31:20 PM GMT+8

2007 年 2 月 7 日 星期三 【晴】

大通初次tuto，完全唔知要做乜，班中近半係內地生，冇可能跟到
俾o的內地生屈機，連tutor都機關槍式普通話發言，想屈我機咩？

馬嶽：……(前略教學內容)採用SNTV o既國家，通常都有黑幫介入選舉，睇戲都話，黑社會有
悠久o的選舉歷史……又因為黑社會旗下控制住好多女性、馬伕同艇仔，所有比任何組織都有能
力幫政黨數票

竟然有人放break o個陣好認真咁問乜o野係「艇仔」，今年o的Yr 1太純品
諗返SY上年o係1020講過，針冇兩頭利，越追求公平選舉，越要付出代價
所有人類諗到o既選舉制度，其實都有邪惡一面，究竟選舉o既目的係乜？

夜晚政政盃第二擊，WE複賽，夥拍立爺用車仔，再以一球淨勝Sam + 阿康
四強對Stanley，里昂o係WE超屈機喎，竟然俾Stanley隊紐卡素牽著鼻子走
下年都係唔好雙打，好拍檔難求，最後冠軍Mike都係憑一人之力首次奪標

之後係美版大富翁，Eric + Stanley + Jade + Curly(志在湊數)，一開始得$500
據講目的係唔想參賽者開波就掃哂o的地，果然冇乜人夠錢買最後o個排地
靠兩個地鐵站不斷刮錢，及時同Stanley交易，二人好快已經攜手玩兩黨制
憑較貴屋價贏o左Stanley，報返WE之仇，上年俾紅紅宰割，今年一雪前恥

P.S.快o的返香港啦，等緊同你再o係球場合作o架

>>February 7, 2007 at 11:51:16 PM GMT+8

2007 年 2 月 6 日 星期二 【炎熱】

先去上環office，掛住我？係真唔係？幫手做一陣paper work
中環咁o既舊式商廈，的確唔o岩做貨倉，次次物流都好麻煩

今日係旺角，快富街、西洋菜街交界，又有大批記者守候等梁家傑
o的記者企哂o係張檯前面，途人點埋o黎寫選票？對佢o地又愛又恨
Thomas跟住梁生洗街市，得Apple嗌咪，再次粉墨登場，嗌o左一陣

街站到19:00先收檔，不過18:35已經走o左，系會團年飯，自助火鍋
食o左咁耐都冇遊戲？家傑搵立爺玩四寶：con + 握手 + 踩油 + 碌咭
MC表現麻麻，完全搞唔起氣氛，如果唔係等抽獎，效法其他人早走

＊－＊－＊－＊－＊－＊－＊－＊－＊－＊－＊－＊－＊－＊－＊

有話直說　　　　　　　　　　《冇大志！憑乜話自己有前途？》

曾蔭權昨天閉門約見民建聯，向民建聯推介其政綱，民建聯其後宣佈該黨共111名選委將全數提
名支持煲呔

喂，全港最大政黨，坐擁逾8000黨員，擁有過百名選委，如果真的號稱「一個有一個前途的政
黨」(A party with A future)，又「真誠為香港」，為何不自己推舉一人，打正「傳統愛國愛港」
的旗幟出選？雖然民建聯人馬大多無能，但總算有個港大數學系一級榮譽畢業生曾鈺成，亦是
公認(泛民主派私下亦認同曾鈺成的能力)的人才，應有足夠份量，為何不出來選，反而集體擁
戴一個擺明唔妥左派的港英餘孽？

派人參選，推銷民建聯怎樣「真誠為香港」，有贏取執政權的意向，這才是「有前途」；坐擁
百多票，反而提名其他人，叫煲呔加開副局長、政務助理，攤大手板拎著數，這是四十年來從
未進化的「死左仔」

去年年底，有線電視《時事寬頻》製作選委會選舉特輯，民建聯副主席譚耀宗稱，行政長官要
合乎三大條件(唔知排名有冇分先後)：中央支持、市民支持、具備優秀能力。全國人大、全國
政協、省人大、省政協等，民建聯一籮籮，數以百計，難道北大人不喜歡他們耶？三年前的立
法會選舉，民建聯在直選取得25%選票，是全港得票最多的政黨(泛民主派山頭多，票源不易集
中某黨)，難道民建聯不受港人支持？

或者，比較合理的，是他們並不具備治港能力，北大人寧願欽點港英餘孽都不眷顧長年服從黨
中央指示的左派，可見北大人也不太信任他們(人大政協等只係安慰獎)。治港能力都冇，仲敢
話自己有前途？呢班死左棍真係唔知醜字點寫

＊－＊－＊－＊－＊－＊－＊－＊－＊－＊－＊－＊－＊－＊－＊



>>February 7, 2007 at 12:19:30 AM GMT+8

2007 年 2 月 5 日 星期一 【晴】





奧沙為能當守門員感榮幸

曼聯的中場及後防球員奧沙對於自己能夠在客串守門員時保持不失感到榮幸。

由於三名換人名額已經用盡，當雲達沙受傷後，奧沙被迫充當守門員十分鐘。

李奧費迪南首先脫下球衣準備更換守門員球衣，但最終卻由奧沙充當此任。

「我感到非常驕傲﹗」奧沙笑說。

「我事後問雲達沙如果他力保不失會否有額外獎金，因為我希望分到一半﹗」

「當我準備當守門員的時候，領隊叫我向隊友說要確保不失球，最後我十分高興可以完成任
務。這是我職業生涯一次特別的經歷，我將來還會回看。」

「事實上我的確有一點膽怯，尤其熱刺獲得角球後。」

「每當熱刺的球員控得皮球，我便聽見他們的球迷不停叫『射門﹗』。而羅比堅尼單刀的時
候，我認為他會射我『大細龍門』，幸運地我化解了那個攻勢。」

「隊友們在上半場踢得不錯，而下半場很快便奠定勝局。」

而費格遜也讚賞奧沙︰「我們都叫他做貓﹗我想在我執教生涯都未遇過這種情況。我當球員時
試過一次，那次我要客串守門員但最終輸了零比四，不過我作出了兩次精彩的撲救。」

「約翰 (奧沙) 做得很好。開頭李奧想擔任守門員、加利 (尼維爾) 也想去。不過我卻希望留住一
條完整的後防線，因此最終叫了奧沙客串。」

「他第一句便向我說︰『我不能接到皮球的。』。那麼我就問拿臣，但他也不想。」

「事實上奧沙都預計了自己最終都要守龍門，他做得十分出色。出迎化解了羅比堅尼的單刀，
並且一次迎接角球將皮球打走。他保留了那件守門員球衣，所有隊友都簽上了名。」

＊－＊－＊－＊－＊－＊－＊－＊－＊－＊－＊－＊－＊－＊－＊

已經o黎到Week 5，完全唔知2130教乜，教好多o野，不過好散
首次正式3040 Tuto，未睇哂reading，發言甚少，完全俾人屈機
大家o既思維都跳脫唔到Modernization Theory，因為唔願否定？

完o左tuto即出中環，幫Apple物流，點解街站搬運由女仔負責？
今日深水埗，梁生會出現，記者老早在場守候，唔使咁早o掛？
記者出鏡只係照上半身，now記者又何必著對咁高o既高踭鞋？
有中大人幫手，聯經濟二，已經熟習街站運作，可以教人點做

長沙灣政府合署外，全區人流最多唔o係呢度(黃金)，業績麻麻
提早收隊，跟車返中環幫手落貨，捱義氣幫Apple點票，百幾票
幾鍾意「全職義工」呢個term，呢個全職義工將要付出day-off

P.S.包包面成個文尼治咁，唔制呀！！！！！！

>>February 5, 2007 at 11:29:23 PM GMT+8

2007 年 2 月 4 日 星期日 【晴】

草聯快馬射手馮景昕行將遠赴澳洲，暫別球隊，最後一次一齊踢波
佢o既進步o係眾人當中最明顯，當初淨係識跑，依家頗具大將之風

1.Eric　3.Richard　5.阿沈　8.肥鵬　11.輝哥　13.志勇　14.拉登　15.Cafu　18.肥龍　23.Sojar　35.主角

以前好唔鍾意佢，覺得佢脾氣太臭兼囂張，今日佢o既比以前成熟o左好多
另一個進步神速o既係肥鵬，純粹o既破壞型後衛，今日連引球出擊都做埋
好享受踢草聯o既日子，同o係政政隊一樣咁開心，始終真係全心享受足球

夜晚另一個活動，Alien + Ian回港放假，仁大代表發起樓上cafe小型SSU聚
Eric + Leo + Alien + Ian + Kenneth + Julie，實在要深思今晚係咪為難o左Julie
或者如果Sandy都o黎，我o地未必會咁放肆，總之覺得頭先Julie係活受罪

＊－＊－＊－＊－＊－＊－＊－＊－＊－＊－＊－＊－＊－＊－＊－＊

有話直說　　　　　　《曾特首？安安份份做返曾司長！》

起初係「務實領導」，然後說做特首要講執行、要「講得出做得到」，最後是競選口號「我會
做好呢份工」，曾蔭權清清楚楚給我們知道，他不是做特首的料子，頂多係稱職的政務司

兩年來的管治，曾蔭權的所謂「務實領導」不過是他只會做一定做得到的事，沒有十足把握的
事，他絕不會落足心機以求"get the job done"，因為他雖然自稱「政治家」，但做起來是徹頭徹
尾的政務官，心態上與一般官僚無異，不求有功，但求無過

可是，做特首，跟做公務員是兩回事，兩者怎可能以同一心態辦事？競選地方首長(國家首長亦
然)，最重要係講，講願景，講香港未來應該要怎樣。辦實事，是當選後五年的工作，把競選時
的支票兌現，由當選人的政府班子和政治中立的公務員將之兌現

有時支票無法兌現，可能客觀環境不利，亦可能自己能力不足，但總不能「唔肯定一定做到，
所以唔講」。民主選舉，根本是投願景一票，投講得最好、最能打動人心的人一票。事事只講
務實只講執行，請考政務官

他朝選舉論壇，如果煲呔一再迴避對香港的承擔，事事以「我們要睇係咪真係做到，負責任的
候選人不能唔好信口開河」等推搪，梁家傑可以說：「你咁識執行上頭指令，如果我當選，委
員會你做政務司司好，幫我將願景化為政策」

話說回頭，煲呔御用媒體無不抨擊梁家傑沒有公共行政經驗，沒資格做特首。那麼，北京找來
商人董建華做第一屆特首，應該係北京一大敗筆了

>>February 5, 2007 at 1:01:57 AM GMT+8

2007 年 2 月 3 日 星期六 【晴】

好難想像，讀過幾年常識o既小六學生，可以差到咁o既地步
唔知香港有幾多條海底隧道，亦唔知獅子山打通邊兩個地方

續有街站活動，先去上環競選辦，再過中環貨倉，今日目的地葵芳
上次o既燈口位，唔再收簽名，收選票，是否支持2012普選o既選票
需要更有技巧向途人講o野，又俾Apple要求交數？唔好咁為難我啦

繼續留守葵芳，前政政隊長Barry誠意邀請幫手把關，唔好意思拒絕
冇見一排，Barry依然瀟灑，o係中場又掃又傳，偶而從後殺上拉弓
如果佢今季仲o係陣中，出任中場指揮官，我o地絕對有力做攔路虎



>>February 4, 2007 at 1:44:24 AM GMT+8

2007 年 2 月 2 日 星期五 【晴】

貪快，成村人o係Lib印3040 notes，技術錯誤，竟然印o左A3
一向唔想某階層因一時利益成為民主化動力，但歷史經驗…

缺席兩星期，終於上返MaMaSoc，睇帶，錄得超差o既《新聞透視》
每次傳媒踩過界，例必俾人插博銷量，點解o的人又唔敢炮轟讀者？

Sem 2首次賽會工作，Biochem對韓國生，韓國生三敗全敗老早出局
不過今場有板有眼，打到BCM全無招架之力，一早咁打就唔會咁啦

>>February 3, 2007 at 1:02:33 AM GMT+8

2007 年 2 月 1 日 星期四 【晴】

o尋日2145，今日輪到1040 Group Project分組，唔太熟識o的組員
3月交Term Paper？呢科完全未睇過readings，最低限度要睇五篇

大通，講歧義，次次都係講o個o的"Simon told Alan that he failed the test"
其實唔算好悶，不過個個星期都冇心機上，因為之前o既SY實在精彩？

＊－＊－＊－＊－＊－＊－＊－＊－＊－＊－＊－＊－＊－＊－＊－＊

Major mid-season transfer:

朗拿度(巴西前鋒)　　　　　from皇家馬德里　to AC米蘭 　　 　750萬歐元
厄遜(英格蘭後衛)　　　　　from伯明翰　　　to韋斯咸　　　　600萬鎊
艾加賀華(尼日利亞前鋒)　　from薩哈達　　　to韋根　　　　　210萬鎊
比列斯素利(意大利門將)　　from里賈納　　　to莫斯科火車頭　200萬鎊
馬隆尼(蘇格蘭前鋒)　　　　from些路迪　　　to阿士東維拉　　轉會費不詳
文尼路(巴西中場)　　　　　from聖保羅　　　to哈化柏林　　　轉會費不詳
米高波爾(英格蘭後衛)　　　from燕豪芬　　　to曼城　　　　　轉會費不詳
戴維斯(荷蘭中場)　　　　　from熱刺　　　　to阿積士　　　　自由轉會
馬卡朗尼(意大利前鋒)　　　from米杜士堡　　to錫耶納　　　　自由轉會
馬斯查蘭奴(阿根廷中場)　　from韋斯咸　　　to利物浦　　　　借用18個月
湯馬臣(丹麥前鋒)　　　　　from史特加　　　to維拉利爾　　　借用
費奧利(意大利中場)　　　　from拖連奴　　　to利禾奴　　　　借用
薛格拿(瑞士中場)　　　　　from熱刺　　　　to森多利亞　　　借用
基斯杜禾尼利(巴西後衛)　　from哥連泰斯　　to薩拉戈薩　　　借用
高高(意大利後衛)　　　　　from國際米蘭　　to拖連奴　　　　借用
安耶胡(美國後衛)　　　　　from標準烈治　　to紐卡素　　　　借用

Confirmed summer transactions:

碧咸(英格蘭中場)　　　　　from皇家馬德里　to洛杉磯銀河　自由轉會
費高(葡萄牙中場)　　　　　from國際米蘭　　to伊蒂哈德　　自由轉會
沙歷咸美斯(波斯尼亞中場)　from拜仁慕尼黑　to祖雲達斯　　自由轉會

＊－＊－＊－＊－＊－＊－＊－＊－＊－＊－＊－＊－＊－＊－＊－＊

《守護天使》　　　　　鄧健泓

日落大道　落日未到　美態也不老
沿途亦　盡是浪漫　沒因天陰失卻了分數
沒因風高　遺忘掉那　優美與構圖
少少失真　仍然是美　始終感覺到　當中的美好
你會讚嘆　太浪漫太好

靜待浪漫　浪漫未到　鬥志也不老
仍然願　日日夜夜　付出關心不計較分數
若彼此都　能磨練到　相愛似信徒
少少失真　仍然是美　始終感覺到　當中的美好
你會看到　你便是最高

＊毛衣　皮褸　樽領衫
多稱身都不暖身　我也發病全身抖震
沉默氣氛驅使我下沉
旁人受創撥動傷感

炎夏　冷冬　春與秋
多著衫都不暖身　我要靠旁人的親吻
成就我一生中的使命
長期做戀人身後忠誠守護的天使＊

用盡力量　用盡力氣　要愛要爭氣
無聊地　默默靜候　就此空等怎踫上福氣
用些姿色　來回贈那　雙眼埵n奇
加點體恤　遺忘任性　傷都不說悲　珍惜悲與喜
天光一刻你便學會飛

ｒｅｐｅａｔ＊

盼望可以

>>February 2, 2007 at 1:01:09 AM GMT+8