2003 年 7 月 17 日 星期四 【晴】

今天是開心的一天。

我們去了征萬里長城，二家姐本來有畏高的，但都同我一齊努力的向上爬，果然「不到長成非好漢」，我們不單做了好漢，更爬得更好，花了一個鐘，我們走上了第三個城塔。一望山下，嘩！正呀~~好舒服，風景又好，我和二家姐禁不住一齊向山下大嗌，啊~~~~~~~。本來團友劉生都怕高的，但在我和二家姐的鼓勵下，終於和我們一同走上第三個城塔了！哈哈，我同二家姐發覺原來時間都差不多，就預留時間下山了，點知劉生說要走得更高，便一下子往上走，身邊的劉太都無辦法，只好一齊向上走。結果，劉生同劉太成了最遲回旅遊車的團友了！哈哈~~噢！我記得當我走到第二城塔時，我打了個電話給媽媽打招呼的，「媽，我登上了長城呀！」

其後我們到了茶館品茶，有「馬騮搣」、「茉莉花茶」……等茶種。但品茶過程好開心，因為一些大人好幽默的令環境充滿笑聲。不知劉生何解突然變得十分精靈，開始說笑，也許是因為剛才做了好漢吧！呵呵~

可惜，今日發生了一件比較遺憾的事，團中有一團友潘姐姐遺失了價值約800元的藥物。經我「金田七」(二家姐改的)同二家姐的分析，最有可疑的只有一個人，一個在團中的人。可惜，我們找不到贓物，無憑無據，都無辦法。噢~ 旅行發生這種事真的好無奈。

>>July 21, 2003 at 4:36:36 PM GMT+8

2003 年 7 月 16 日 星期三 【晴】

昨晚於酒店睡得不好，張床太軟了！哈哈~

一早到了紫禁城，近二小時的參觀，我倒學了不少。走到乾清宮時，我和二家姐扮了一個宮女各皇上行禮的姿勢，搞笑~「皇上吉祥」！今天天氣好清爽，一點都不熱，雖然有點兒似陰天，多雲，但勝在有風，走起上來一點都不辛苦，傘？太陽油？NO WAY！

紫禁城又叫故宮，曾經好似有13個皇帝在此住過，看書看得多，真正近距離看都是第一次，真係宏偉，近距離看，橫樑上的花紋雕刻相當精細，屋頂角亦相當講究，不同的宮苑有著不同的裝橫，如屋頂上的角，有著不同的獅子，也有著不同的數量，最大的，也就是皇上的宮，每邊屋頂分別擁有九隻，九是奇數中最大的，亦即是人們所說「九五之尊」了！

去完故宮，我們到了北京地下城。別以為地下城是購物地方，其實北京地下城是一個防空洞。據當地導遊解釋，城下城是以前中國人民作為避難的地方。由地面至地下十多米深，已經感受到防空洞的涼風、寒意，原來這些全是天然的風，有天然的空氣，原理就似桂林山的鐘乳石般，防內是有水份的，亦有空氣。北京地下城，除冬暖夏涼外，還有更利害之處是其地下隧道可由北京通往天津、上海等地的，可謂四通八達。當然，現今有些地方己被禁出入了！

沿路走了二十多分鐘，發現當時中國人民十分聰明，地下城非一般防空洞。由於一旦遇上戰爭，人民起碼都要住上一年或以上，所以防空洞內建有醫療室、學校、工廠、炸藥庫、升降機……儘管現今沒有了戰爭，但國民為物儘其用，在地底位置下所建立的醫院，在地面上同樣是醫院，方便一旦有戰爭時予民走下地底繼續正常醫療運作，中國人實也有其可取之處。

之後我們到了王府井大街，聞說那兒有很多東西吃的，果然名不虛傳，王府井大街相當多檔口，但食物種類大致每檔都差不多，嘻嘻！我試了一串燒腎，味道還不錯哩！我們還試了煎餃子，五蚊十隻，完全是跳樓價啊！走著走著，看見了「星巴克」(STARBUCKS)，我馬上一個箭步走上前看價錢。噢~~我最愛的「焦糖咖啡」都要30蚊，太貴了，所以望望就走了！

今晚晚飯相當不錯，真的如導遊所說的一樣，「八餚一湯，白飯任裝」。

>>July 21, 2003 at 4:33:41 PM GMT+8

2003 年 7 月 15 日 星期二 【晴】

今日是大日子，我和二家姐參加了五天北京團。拖住一個行李，背上背囊，等不到媽回來，就一個人出門去了。

今天天氣相當好，乘著E42機場巴士，沿路青馬大橋入東涌，風景真是美不勝收，多麼想拿出kimmy的數碼機拍下的，奈何我的膊頭被一個正在熟睡的陌生女士借用了，動彈不得，只好把風景留在腦海裡……

準時到達了機場，會合二家姐後，我們一同找尋我們的領隊鄺小姐。噢~~找到「永安」旗了，發現傳說中的鄺小姐，cool~~好後生哩，只有23歲。但可笑的是她只是一個大細路，因為我地後來發現佢行李上有好多零食及公仔，當中有哈姆太郎中的「詩詩」、百變小櫻中的「基路仔」...她說基路仔是她的仔仔，三歲大。嘻嘻~~~這個就是我們的領隊……

三小時的飛行，終於都到達了北京首都國際機場，我們正式出發了！第一站先要去的是食宵夜，呵呵！未到食店前，我們先由當地導遊先生(阿ben)，於車上介紹北京第一獨特之處，就是每一位從機場出發的人，都必會經過唯一的公路 --「國門」，因為北京是中國之首都，「國門」也就是代表著國家之門。

未來三日我們會住在柏麗酒店，到達酒店大堂時，我和二家姐拿了幾張明信片，打算寄給朋友。

>>July 21, 2003 at 8:26:18 AM GMT+8

2003 年 7 月 14 日 星期一 【晴】

感謝你對我說︰「你太了解我了！」
這是多麼令人心花奴放的一句美言！
但我卻不敢說︰「我太了解你了。」
害怕開了口的一刻，我就後悔。
請原諒我這一個凡人，
自大之時還是會衝口而出的說了出來。

>>July 15, 2003 at 3:39:16 AM GMT+8

2003 年 7 月 13 日 星期日 【晴】

今日一早出左西環同joey、杰少篤波，cool~~個部904巴士真係快到不得了！好！
之後阿杰送我去搭車返教會，上到車竟然撞到輝仔，佢算係我撞到最多次的朋友，哈哈~~由上車傾到落車，佢睇來大個左，講野斯文左好多，我哩~~hehe！都係咁啦！
返教會開會，一開就成兩個鐘了，呵呵~~~勁！(噢！我係遲左半小時的)
走時又見返班小學生，快放榜了，都有點兒為他們著緊。

之後杰少出左銅鑼灣，我就落機部搵佢啦，好搞笑，突然有個女人好客氣的同我講，「excuse me」(用英文的！)，我以為我阻左佢個位打機，想話唔好意思之際，點知佢話「我可以睇下你張身分證嗎？」，見慣場面的我當然非常合作笑笑口的話「無問題」，身旁的她再說「因為你個樣好細個呀！」，嘩！佢個笑容係我係機舖見過最好服務的一個，又或者當時佢見我係一個好女仔先咁客氣！呵呵~~
佢睇過後我張身分證後，就同我講「thankyou」，嘩！今時今日咁既服務態度點得架，收埋係機舖度就真係浪費人才LOR！可惜~~~

同杰少行左一陣，就join阿成同貴利團啦，三條友係條街行，好熱呀！仲去埋探winnie kwong班！就係咁行到八點鐘，整埋部機就食飯啦~~~呵呵！
食完就去左睇數碼相機，今晚我提左好多次阿ron個手提，好搞笑！因為佢太懶，死都唔肯抄低，不過我都係為佢好的，有咩事可以搵阿ron幫手嘛~~不過搞到我背熟哂阿ron個電話！呵呵~

>>July 15, 2003 at 3:33:08 AM GMT+8

2003 年 7 月 12 日 星期六 【晴】

可能係昨日飲左d酒，一訓就訓到10點半，仲以為自己會遲到添！
同爸媽去左食早餐，之後就赴ben哥既約會啦，哈哈~~~
之前我成日遲到，通常都係10分鐘，但今次到佢啦，就遲左半個鐘，太過份啦！
但估唔到連明叔都來埋，睇我地篤波，講到ben ben，可以話我地兩家係世交，所以我一出世就註定係識ben ben了！明叔睇住我大，當然無睇住我壞啦~~
四局既比賽，食哂蛋！
呵呵~~我睇到二家姐幫我整好既相呀~哈哈！唔該哂~

>>July 13, 2003 at 3:03:57 PM GMT+8

2003 年 7 月 11 日 星期五 【晴】

今日一早俾兩隻野嘈醒左，激死！
之後出左去約二家姐，哈哈！仲以為係自己去錯地方，原來係佢搞錯左。呵呵~~
去到目的地，個個服務小姐又搞錯左d野俾我地，搞到我地遲左成半個鐘。
不過真係太好啦，貴利打來，仲話可以借我數碼機，雖然要去狐狸個度拿，但我都好感動了。
食過午餐，去左二家姐度拿蛋糕，二家姐真係好人啦，整多左個蛋糕就送俾我，等我今晚同joey佢地開大食會可以食，仲係送個最靚的俾我，好開心呀~~多謝哂！

今晚大家都玩得幾開心，有麻雀打，同阿杰、justine、heidi、joey、kinski、優、秀，九個人食野，仲以為會食唔駛tim，點知都係淨左d，二家姐個蛋糕就只剩下一小格，哈哈，真係好大呀，但係大家都讚二家姐好利害呀！(我一d功都無邀的呀！哈哈)

同狐狸講電話時，佢話唔可以借我數碼相機，真係又激氣(因為佢無聊)，又無奈！之後打左去問kimmy借，真係好~佢肯借我！thanks~ 你就真對我好啦！嘻嘻~~

今晚在巴士回家途中作的︰

我是一個碼頭，靠近我身旁，你可以看到很多美好的事情。
寂寞時，請朝我來，讓我給你點滴的安慰，
歡喜時，願你把我介紹給你的好朋友，
疲倦時，請讓我背後的光輝助你舒壓……
抱歉！我還是給了你傷心的回憶，
你的背景越拉越長，直至消失於人群中，
但我會踏在原地，靜靜的等你回來。

>>July 12, 2003 at 5:47:46 PM GMT+8

2003 年 7 月 10 日 星期四 【晴】

議員說：屯門公路明顯已有老化跡象，為何還遲遲不做重建工程？

是次多人死傷的意外，是一個悲劇。
但我想並不是遲遲不重建的問題，反而倒想，議員大部分時間在做甚麼？
唇槍舌劍，斥責政府的不是。坐在局內等到對方行錯一步時，就勢要對方身敗名裂的攻個不停。
敢問：屯門公路明顯已有老化跡象，還遲遲不做重建工程，是甚麼原因？

學校是社會的縮影。儘管當中亦有好與壞的老師，聚首一堂時，仍不忘為學生、學校謀福利，段不會在會議中互相斥罵，段不會花上半個月的時間都討論不出結果，段不會因議論不出結果而擱置手上的工作。
學校作了榜樣，何以社會又是如此的不堪？
孩子，有著模仿的天性，但隨成長中，還會學懂是與非，反過來，更會成為大人的榜樣。
要成長，就得接納，承認錯誤。

>>July 11, 2003 at 8:38:43 AM GMT+8

2003 年 7 月 9 日 星期三 【晴】

一早起身，睇到新聞屯門有嚴重交通意外~
我睇到情景時真係嚇到出唔到聲，
那條係我每日返學都要必經的路，
我以前都好怕這條路的，
生怕巴士會滾下山，
誰知，慘劇還是發生。

我好擔心，打左個電話俾fanny，
cool~~最擔心就係d同學，
有d野真係控制唔到，
好無奈！

>>July 10, 2003 at 4:04:34 AM GMT+8

2003 年 7 月 8 日 星期二 【晴】

各位，我返來啦！

>>July 10, 2003 at 12:47:53 PM GMT+8