2005 年 9 月 15 日 星期四 【晴】

今日上八點半，好眼訓，訓著左好幾次，幾難先等到放 break ，放二十分鐘，諗住可以訓返覺好o既，點知放 break 佢一唔講野我就唔眼訓。

上哲學， group discussion d 人講野勁 lau 打，好似隨時準備開片咁，我o個組就坐埋一邊 "view from nowhere"，完全置身事外。

撞到 Edith ，好開心仲見到佢。

返工，勁白黐，早左半個鐘，好彩 Katherine 肯幫我改更表， Katherine 話阿靜成日都唔做野：「我留意左你好耐架喇。」

卿卿今日又放假，阿 Fan 代佢， Carol 同我抹櫃。
今日無乜方包剩，空左兩個櫃，跟住 Katherine o係第二個櫃拎 d 包過黎扮多包，我同 Carol 講：「乜包都無晒，好似就黎執粒咁，哈哈哈」點知比 Katherine 聽到，好彩佢只係笑下。由於唔係好多包剩，我地好快抹完櫃，又係作反o既時候喇~偷食左一個菠蘿包，幾件小紅莓批，仲有一個價值十三蚊o既芝士法國。跟住我地仲偷偷地入三文治房整 panini ，窮奢極侈，落左一千塊火腿同芝士，塞到個包哨牙，好笑~由於太滿，整到個烘三文治機污糟晒，我地手足無措，索性冤枉阿榮洗得唔乾淨，又將 d 碎掃落地...突然間比阿慈撞破我地o既好事，我地即刻四散，後來阿慈又發現我地偷食其他包：「開大食會呀？」
我為左紀念呢個造反o既日子，影左好多相，我地一共 hei 左半個鐘有多，完全遺忘左o係出面收錢o既阿靜，哈哈哈

今次可能係 Carol 離開之最後一次叛亂...真係...開心o既時間過得特別快

>>September 16, 2005 at 5:46:21 PM GMT+8

2005 年 9 月 14 日 星期三 【晴】

嘩，眼訓死人呀。三點訓，八點三起身.....洗頭，嘆杯咖啡，煮個烏冬，hei 下 hei 下咁"make up"，返學。又再o係地鐵打無聊機。一坐低見到個老伯上車，嘆左一口氣，唯有讓坐啦。我都係人黎架，我都會支力架......不過我都會老.....算啦

我突然覺得好辛苦，一堆 project要做，黎緊個星期已經要present，有三個meeting，要溫書，要做功課.....我又唔係等錢洗，做乜咁辛苦自己喎，所以我 resign 左

佢扮晒一陣比 form 我填，跟住問返三日好唔好....我話四日都可能得，結果我又o係返台度
今日一決定 resign 就收到 Acorn 打電話問我想唔想返去做，我未覆，不過睇怕唔會喇

放工撞到中五至中七o既同學 Winnie，我見有個迎面黎o既女仔望住我，我望一望佢都唔認得，但見佢同我笑，我就慢慢記得佢喇，佢而家靚左好多！真係完全認唔出係佢。佢話原來已經撞左我幾次，不過我見唔到佢.....撞返 d 同學仔真係開心呀

今日剩好多包，洗盤洗死人....抄包咁耐，今日第一次自己成功打得通 fax 去 office.....阿靜講得o岩， fax 機都怕左 Katherine

>>September 15, 2005 at 4:31:59 PM GMT+8

2005 年 9 月 13 日 星期二 【晴】

好眼訓呀，成兩點先訓，七點四就起身.....(我講左無數次我要十二點半前可以訓，無人理過我)以後一過十二點一於熄電話！

好躁呀！我憎死班 "四仔" ，憎死"五高"，我極度想你地個個好似未入宿咁！我三日唔講野都未必有人理我啦，四樓靜少少就日日話唔開心..............好 x 煩呀！xxxxxxx 啦！

CCIV 講座 add 唔到就算，我洗求你？！玩飽你個 o week 啦！一千個 piglet 幫你求情都無用呀！豬仔叫我唔好睬你呀....

竟然見到阿 Roy，好似一千年無見咁....不過佢仲係一樣樣，仲竟然知道我去"賣麵包"，失敬失敬

我突然好厭份工....

今日話比 Carol 知我撞到個靚仔，Carol 又話我要修心養性....-_-

我暑假話要去ｏ既咁多個地方唔知去左邊個呢？我想要去沙灘訓個晏覺

如果飲酒唔會肥，我仲驚咩呀？

>>September 14, 2005 at 4:38:43 PM GMT+8

2005 年 9 月 12 日 星期一 【晴】

好無聊呀~

特登早半個鐘出門口去買飛，好彩咁早咋，前面o個 d 人都唔係路，連自己睇邊日concert 都未決定，有 d 連自己睇o個個 performance 個名都唔知，阻住個地球轉，攪到今日 有廿六個鐘....結果就o徒左半個鐘o係通利。最衰都係我啦，咁遲先去買飛，最前中間位去到 L，我一心諗住揀前 d ，揀左F456，比人質問左一大輪。「一行有幾多個位，邊個 hall，有幾側」車，我鬼知咩，我又唔係文娛中心...-_-咁遲先去，買到都好啦.....我已經好開心

哎呀！阿恆打過比我呀....我明明都袋住個電話開工，不過我都係聽唔到電話，想覆又無人聽。一鼓作氣，再而衰，三而竭.....打左兩次無人聽，算啦，都係無緣-_-

好野，我已經口頭向 Care Free 請左假~好期待呀，不過o個個禮拜會辛苦 d lu，星期六都要返工，不過值得o既

我又作反唔抄包.....清 coffee
有勁多野洗，不過我懶懶閒咁清，仲已經 pack 左合桃包，毀滅埋 d old 包，抹埋出面 d tray，偷食左個三文治....無聊左一輪，都搭八攪掂晒，唯有出去收錢啦。Emma 驚嘆：「清完拿？咁快o既？」我O 晒咀，(好想話 "係你慢O者"，忍住！ )：「下？通常個個都係咁上下時間，除非特別多野洗啦...」我同 Carol 同阿慈講，佢地個個同我o既諗法都一樣。

>>September 13, 2005 at 4:31:39 PM GMT+8

2005 年 9 月 11 日 星期日 【晴】

點解個電話 alarm 好似完全無響過咁o既？做 philo 功課，成個暑假無用過英文，寫一版都好辛苦。

噫，又買唔切飛喇，明明諗住早三個字出門口，點知換衫搽睫毛液就夠鐘，(最衰份功課啦)，(不過平時我都比預定時間遲十分鐘先出門口，唔驚)，點知等左好耐都無車.......頂，唔通連個天都唔鐘意我？如果我望仲未賣晒飛會唔會好衰呢？我寧願我無得去喇。不過錯過今次，唔知要幾時先再見...

返工，有人叫餐，Katherine 下令唔比 Carol 同阿 Fan 幫我 -_-，咁玩我....
而家大家睇定時機，要鬥快 resign，因為一個走左，唔夠人，第二個想走都好難，要等佢 train 一個新人....蚊訓

好野，Emma 放假，Carol，阿靜同我收夜，我終於唔洗抄包喇，清 coffee，真係好喇~收工倒包例牌抆開個腸仔包食條腸，含到落口feel 到條腸好似比人咬左啖，我以為自己meet 開個包o個時 meet 斷左，望一望個包，又無喎。我估係整包o個時已經斷左....無聊地大叫：「點解條腸仔好似比人咬左一啖咁o既？」阿靜：「係呀，我頭先咬架」-_-，頂，唔通連腸仔包都唔鐘意我？成盤包廿個都有，我咁都中？

>>September 13, 2005 at 3:57:32 PM GMT+8

2005 年 9 月 10 日 星期六 【晴】

我仲未去買飛呀，如果到時無得去我一定會發癲架！聽日，一定，一定要去！o個日唔知請唔請到假呢，好期待！

今日著新衫呀，豬仔 t-shirt 呀，好野。遲左出門口，無得o係 d 同事面前炫耀下添，(真係好無聊)。

自從知道 Emma 平日返學要六點半起身，放學返工做到十點半，開始體諒到佢做野點解咁慢，同埋成日死下死下咁樣。

今日好戆居，用英文同個菲傭講解點用張印花咭，點知佢用廣東話同我講：「我唔識聽英文」
-_- 好尷尬，我估佢可能係印尼人....

從阿 Fan 口中得知 d full-time 話我抄包成日計錯數，好唔開心，無晒自信喇....不過後來睇返個 file，係我 d 字喎，無改過o既跡象，可能上次阿慈話完我我已經改邪歸正，又開心返，努力！

Carol 返早以黎第一次代卿卿，佢唔識儲水o係洗手盤，(收夜淨係識放水)，當佢好興奮咁同我地講佢成功儲到水，我同阿靜非常呆滯咁望住佢，好頹咁拍左幾下手，我仲同佢握手添，一齊好 hei 咁講：「恭喜你喎」，激死 Carol。我地之所以咁呆滯，係因為抹完櫃之後上左好多好多好多方包，有成起碼六底，可能更多.....好無奈。

阿靜話佢好努力幫我留起左一舊紅紅o既手信：鳳梨酥，好感動呀~其實我真係當佢係朋友架，只係我唔同意佢處理感情事o既方法，不過，朋友係可以和而不同家嘛。

我都算幾好彩，做過兩份工，兩間公司o既氣氛都好和諧，同事之間關係都算幾好。

原來有人會因為我唔開心而暗地裡幫我做 d 野架，雖然最後幫唔到我，但係我已經好開心。

>>September 11, 2005 at 4:40:41 PM GMT+8

2005 年 9 月 8 日 星期四 【晴】

0830 lesson, I can wake up as I planned, amazing!

A very boring lesson:Pension Planning. Someonme just arrived.... (0900@CSC-E)

Group discussion，講退休要儲定幾多錢....竟然係一千至二千萬，我成世人都唔知有無呀，我寧願短命。講政府點解決 aging problem，Connie竟然話 "encourage death rate"...-_-
Andy 離譜到爆，"childs" 都寫得出，仲話要考 IEOS(係咪咁串呢？)

去科技展行下，有張 POSTER show 左個 model 兩張相，一張笑一張唔笑。Andy 話：「你估係咪同一個人」我：「雖然好唔似，但係我估多數係」Andy 話：「咁叫佢以後唔好笑喇」

上 Meaning of Life，睇左套好正o既戲：Groundhog Day。一套有好多野值得思考o既戲，而且好睇，強烈推介

>>September 9, 2005 at 4:57:13 PM GMT+8

2005 年 9 月 7 日 星期三 【晴】

開學，未夠八點自動醒，不過我做人好有原則架，話八點起身就唔會早過八點起身。(好！有志氣！)無聊一大輪先出門口，搭四就到....開學係好日子，著件豬仔衫接受全人類o既豔羨目光。

條友 d 英文超唔掂。(望勾架)完全唔知佢想點，我懷疑佢都唔知自己講緊乜。又遲勁多先落堂，累我比 CCIV 個 Miss 話....正衰人，下次一夠鐘我自己放自己走。


o係 CCIV 見到個小學同學，仲係咁靚仔o既....又o係 Canteen 撞到表哥，我都係第一次o係城大見到佢。

等樂樂黎買 notebook，話明兩點半至三點先得閒，竟然三點先到。原來嘆埋碟飯仲沖埋涼先黎
-_-！呢d 就叫可惡喇，如果係 Tommy 已經比我打左一身“ )

返工，好趕，返四點，三點廿幾分先o係城大走-_-
遲左七分鐘，好彩 Katherine 幫我簽左名當無遲到。
一切都o係我掌握之中，因為我係先知；(講左先知)

阿珊真係唔做喎....我尋日用免費比佢問 Account 利誘都留唔住佢.....

唉，同 Emma 抹櫃真係嘔血。講開又講，今日彎低身抹櫃o個時比人摸 pat pat -_- 死人卡路粟米條(下次再係咁我嗌架)

抄包都 ok 順利。
尋晚同阿慈講開我抄包仲拍住兩個新人....Emma又唔主動幫手....阿慈話：「我會好惡咁叫佢做野架喇」結果夜晚，我抄完包計緊數，聽到阿慈同 Emma 講：「想係想一拳打埋你度呀，個樣咁懶懶閒，精神 d 得唔得呀」笑死

抹法包櫃，佢乜包都無執過咁滯，我嘗試將 d "芝士千層"同"牛油千層"放埋一齊，佢就死死下咁話：「勉強無幸福呀」都o岩，好似真係滿過頭。我試下執合桃包，佢又咁講，今次好明顯夠位，我話：「乜都勉強無幸福咁唔洗做啦」(已經忟忟地)

我都幾衰，我實在忍唔住佢o既工作態度咁散漫，我發脾氣唔同佢一齊抹櫃，特登分開抹，一人抹兩個，等佢知道自己幾慢。佢都醒水，比平日快左唔少。但到上方包先激氣，我上左兩底佢先掃左半間舖o既地，真係火都黎埋！

Katherine 仲衰，換衫o個時：「Emma 你著校服好肥呀....可想而知件制服遮到幾多野丫」我同阿靜問點解仲未請人，佢話：「個個都崩口崩鼻....」佢話佢淨係請靚女.....哈哈哈，Joke of the Year

>>September 7, 2005 at 5:42:57 PM GMT+8

2005 年 9 月 5 日 星期一 【晴】

最近八到o既野：
1) 阿 Ming 大概三十歲
2) Emma 拎咁多包係分比 d 同學食-_- (洗唔洗呀？)

卡路粟米條今日生日
Yuki 今日 last day，好唔捨得，原來未有佢 contact
阿珊突然話做埋今日唔做
百佳 d 燈突然熄左大半，維持左好耐，真係浪漫~haha
影左大佬，阿良，卿卿，阿珊，Emma

今晚抄包好快，九點九洗埋盤 fax 埋，叻~(大佬叫阿 Fan 影印o個張野原來唔係我o個張，我估係賢仔整架，唔開心 -_-)

Tommy 買到豬仔限量 t-shirt，好野。原來仲買左豬仔橡筋，多謝晒。

>>September 6, 2005 at 4:41:17 PM GMT+8

2005 年 9 月 4 日 星期日 【晴】

抄包真係可怕，比 叫餐更可怕，因為無人幫。聽日死梗喇！拍兩個新人仲要抄包，Catherine 咁玩我？"唔通連個天都唔鍾意我？"

我知今日要抄包都醒水抹櫃抹快 d 架喇，點知 "大雄個朋友" 拎d tray 入左去就幾分鐘先出返黎，如是者攪到八點先開始抹第一個櫃，諗住阿榮走左可以順順利利啦，點知佢拎蛋糕比賢仔寫名都"咁好傾"-_-

蘭子又唔理 Emma，鬼咁長龍，我良心過意唔去....過去收左陣錢。抹完櫃又要上方包，就快高過我o既包......蘭子知道我抄包：「我好驚你呀，今晚唔洗收工喇....我咁樣講係咪好衰呀？」
我：「唔係~因為我都係咁諗自己，我都好驚...」

Emma 做野好 Q 慢(我已經抑制住架喇)，又懶到死，收夜從未見過佢幫手洗野，離晒譜，(掃完櫃自己執自己 d 包都唔黎幫手)我要鬧人喇！做新人做到佢咁，香港o既服務業無喇！旅遊業都無喇！開始幾唔鍾意佢喇。又白痴到死，做左大半個月，竟然個客問佢"意式蘑菇薄餅"有無蘑菇都要走入廚房問。

阿珊雖然慢，不過只係未熟o者，都好肯做o既，千祈唔好走呀

豬仔限量板，無希望喇。

>>September 5, 2005 at 5:28:53 PM GMT+8