2003 年 5 月 7 日 星期三 【晴】

寫慣左日記,凸然間無得寫,真係難以接受,亦都好唔慣,所以係login唔到既呢段日子裡面,我會係呢個"留言區"度寫住先,到遲D Login到我先再copy返啦~~~^^

世界上似乎無一件事係比考完A-Level更興奮喇,kakakaka~~~~考文學史,好早就同基哥去到恆商,又係坐低溫下書咁啦,最後衝刺嘛.開考個陣,見到份卷....好彩,都揀到四題去答~嘩,早前啤梨俾既tips原來都幾準呀,雖然係多,不過都中得七七八八....勁~~~

考完之後,真係好興奮Ga!!!真係好爽,話晒文學都折磨左我咁耐嘛~咁離開左恆商之後,就同秋玲,高妹,鼠欣,阿包同啤梨出左沙田食金河苑,仲係新城市撞到主席同阿舒添啵~食完之後,坐係個度傾左好耐...咁之後就陪左秋玲配Con,陪完佢之後又到佢地陪返我配眼鏡,哈哈~~~係呀,配副新眼鏡,又靚仔左DD喇~~攪掂晒之後,就大班人係沙田遊蕩,行行行,行左勁耐,後來阿舒仲join埋我地添~行左幾粒鐘之後好鬼累,就坐左係麥當當食shake shake薯條,正~^^

之後就散左水喇.咁又約左阿Bean,不過佢要考oral,又未考完,咁我本來就打算自己周圍兜下既,不過好彩(真係好好彩),撞到小學同學Karlie,又好好彩,佢又唔趕時間,咁我地就坐低吹左個幾鐘水喇,講起小學,中學既事,佢又講下佢既大學生活咁啦.原來大學都唔係我想像中咁好玩啵....不過算啦,我讀到先算啦~之後終於都等到阿Bean既電話喇....

咁就同左佢,同埋Connie去左德興食飯...真係估唔到生左日咁耐,仲收到生日禮物...哈哈~~^^多謝晒啦~~食完,終於都返屋企喇~

都係阿媽講得岩呀,"無事出街少破財",今日係沙田行左咁耐,我好唔小心咁係2%睇中左件衫,買唔買好呢???唔得啵,今日用左勁多錢呀....四舊水Grad. din.四舊水配眼鏡>_____< 勁大駛呀...點算好呀????

考完晒試,都係時候plan下可以做D咩喇,不過當務之急係執返自己個樣先,我誓要係一個月之內攪返靚自己塊面!!!所以如果大家知道有咩方法可以消除暗瘡,去印,控油...請幫下手,唔該晒~~^^


>>May 13, 2003 at 1:25:47 PM GMT+8

2003 年 5 月 6 日 星期二 【雨】

而家我個腦入面,係咁既....

詩經,楚辭,先秦散文,莊子,韓非子,漢樂府詩,漢賦,建安文學,文學批評,唐詩,杜甫,白居易,宋詞,柳永
李清照,江西詩派,黃庭堅,元散曲,元雜劇,關漢卿,馬致遠,王實甫,公安派,竟陵派,桐城派,章回小說
西遊記,聊齋誌異,儒林外史,胡適,陳獨秀,文學研究會,創造社,聞一多,卞之琳,魯迅,老舍

如果咁都揀唔到四條答既就.......喊!!!!>_____<
不過都算啦,淨係想快D考完快D去反咋~~~

回覆阿包:
唔....你梗係見唔到啦
我係話伯佢兩個有進步呀~~~
即係開頭真係麻麻,而家愈來愈好.....see??
至於呢個"豬籠",或者啦或者啦...
如果我傻左既話都應該會話佢好既~

>>May 7, 2003 at 12:41:45 AM GMT+8

2003 年 5 月 5 日 星期一 【雨】

今日個天落左好多狗屎......

有咩好講唧??咪又係溫書囉....
背左好多文學史入腦
一方面驚讀左唔記得
另一方面又驚讀左佢又唔出,咁就喊都無謂....

不如快D考左去算啦....好折磨呀!!!>.<


呢個係日本仔妻夫木聰
嘩....型到呢.....
如果我可以好似佢咁就好啦~~^^"

>>May 6, 2003 at 10:07:02 PM GMT+8

2003 年 5 月 4 日 星期日 【雨】

尋晚又係五點先訓,今日下晝點幾先起身
一起身出面狂風大驟雨
隔左一陣停左雨啦,再隔多一陣仲出太陽添啵~
跟住而家又係狂風雷暴,行雷閃電
而家D天氣真係呢.....

都唔知做咩樹,一齊係同一間屋生活
應該好和諧,好開心先係Ga嘛...
但有D人都唔知做乜,成日黑口黑面
而家我做錯乜野先....唔駛返學夜訓D又唔得既?!
我都咁大個仔啦,唔係幾點上床訓覺都要人管呀嘛....
都痴線Ga....唔好話我呢個做後輩既無大無細
總之我覺得自己無錯,唔駛刻意去遷就任何人!

夜晚出左去食飯啦~主要係為左幫淑君慶祝生日^_____^
有好多人都出左黎啵....
麥希啦,大笪啦,Hoi Kei啦,七輝啦,Connie,河童
去左必勝客呀,食完仲坐左好耐添啵~
走個陣10點幾,因為大家都臨近考試既關係,所以都散水喇~
唔....開心開心~~^^

回覆阿包:
heehee~~點會煩呀,黎多D仲好呀!!!!
我唔覺得呢個係資質問題啵
講之嘛,我夠可以話我坐B望A啦!!!!
實得Ga咩??我唔信呀!!!!
哼~~~

回覆阿心:
你真係好了解我啵~~~Haha~~~
我下一首真係打算換Yumiko或者Edison Ga~~
密切留意啦....哈哈~~~

愈來愈覺得呢兩個男仔唔錯,有進步~~


曼谷瑪利亞

紅燈區 糢糊的一個她
拿年輕僅有的美色 粉飾繁華
漫畫裡 同時這一剎那
同齡的她正扣著我臂彎喝茶

身份既隔著千里 也似在命運兩極
當中有個有資格更高級嗎

同樣都叫瑪利亞 同樣都信瑪利亞
同樣得到恩寵一樣每天得我愛護嗎
為何一個每夜上街 應接著路人賣花
又有一個卻旁邊有我陪著喝杯茶

人間千個瑪利亞 同樣都有血肉嗎
無論愛侶或路人 我都愛愛吧
我真的 這麼多愛 分些給她

>>May 5, 2003 at 11:48:18 PM GMT+8

2003 年 5 月 3 日 星期六 【雨】

研習敝國文學之歷史,苦不堪言
溫亦愁,不溫亦愁
溫則億萬文字記之不盡
不溫則心緒不寧揮之不去
詩經之樸實無華,楚辭之浪漫虛無
漢賦之鋪張華麗,樂府之簡樸自然
皆總合無遺於文學卷三之中
然否止於此乎?非也
詩人風格各有其宜
李白之豪邁奔放,杜甫之憂國憂民
王維之深遠恬靜,居易之老嫗能解
莫不叫人嘔心瀝血,頭昏腦脹
悲不自勝,無言以對
四天過,煩擾之千絲萬縷亦過
是故現在愉悅擔憂之情,相互交織
可惡哉文學.....

回覆包包:
係呀!正唔正先??首領教我整Ga~~
首歌一定會定期轉啦,不過唔會日日囉^^
試問天下有邊一個讀文學既人唔係俾文學史折磨得好慘呢....
你都讀多我好多啦,我好多都係得個睇字
睇完又唔記得啵,勁煩呀~~>_______<
係啦,你要努力捱埋呢幾日呀,唔好衰呀!!!
至於Juno....我無佢既相啵....係囉,遲D先啦~^^

>>May 4, 2003 at 1:43:59 AM GMT+8

2003 年 5 月 2 日 星期五 【晴】

又係哺係屋企,出面既天氣都好似無咩點留意
係咪天晴呀今日??

即係咁...其實我都好想的起心肝去溫下文學史
不過要讀既野多到都唔知讀咩先好~
所以今日我睇左少少先秦散文,少少宋詞同少少元曲
不過到左而家呢個moment都已經好似唔多記得咁喇>______<
我想講既係我覺得自己好勁囉.....v.v.....

夜晚又係咁睇電視
好高興呀!個套"帝女花"終於都做晒喇^^
我覺得個結局都幾不知所謂...
本來世顯永伴長平合葬咪幾好囉
又要夾硬整個Happy ending出黎....
勁牽強呀!都唔make sense Ga!!=.="
"智勇新警界"個結局就好好多啦~
係就係Leung左D,不過易接受好多啵~~~

唔知按照我而家呢個讀書既進度
7號可以讀到幾多呢??
God knows!!!!

回覆阿包:
你咁勁既???讀左咁多既????
咁Edison點算呀?????>_______<
Edison今次大件事喇....
Sigh.......


>>May 3, 2003 at 3:24:12 AM GMT+8

2003 年 5 月 1 日 星期四 【晴】

又一個月....2003年第5個月喇.....時間過得好快~

尋晚(今朝?)5點先訓,起身就已經兩點...
而今日做過既野有食野,睇電視同玩電腦~
其實本來係想溫書Ga....不過又無乜衝勁
所以最後就睇左兩大頁漢樂府詩囉....
成兩大頁Ga!!!

對住咁浩瀚既文學史
究竟應該點讀好呢??
我諗我需要一D determination喇~

呢首新歌好好聽

三角誌 盧巧音

沒有這件事 妨礙我們
難道我和你 又會一樣
就算不是她 也有問題吧
早該分開 不該怪她

即使跟蹤你 來臨案發現場
牢牢看守著你 提防你搭上這一個她
下個她 都會趁我看不到誘惑你
明白如你要這樣易變心 哪到我害怕

就算她 跟你有段情
我也為你高興 用第三者身份見證
最不可靠是愛情 我們無人能得勝 再溫馨
仍不夠耐性 捱得到第四者 煞風景

當初喜歡你 其時你有別人
完全都因為我 才完結過去拋低了她
下個她 不過接替我當天那位置
情外情 轉了對象 別要太驚訝

沒有她 都會有別人
你我避免不過 混亂間將彼此錯過
有幾多故事最後 愛人仍然同一個 看清楚
誰都背叛過 誰亦曾被騙過

不知道 伴侶再換就更好
還是越來越退步 能讓路還是再睹
就算再三上訴 你爭我奪投進誰懷抱
誰話愛你註定 好心好報

第四者 跟你有段情
我也為你高興 外遇萬千燦爛像繁星
可惜那併發症 我們無人能得勝 再溫馨
仍不夠耐性 捱得到第五者 煞風景

>>May 2, 2003 at 12:56:38 AM GMT+8

2003 年 4 月 30 日 星期三 【陰】

話說係小肥大戰左四百回合之後
就即係累到得返四分一至半條人命
朝早七點幾就返屋企喇~
最樣衰既係要帶住副眼鏡走
開頭諗住咁早,應該無乜人Ga嘛~
點知我唔記得左原來呢個時間係有好多學生哥學生妹返學Ga!
一落樓已經見到好多著校服既中學生....唉~~~
俾咁多人到我最樣衰既一面添~~~>______<

返到屋企,睇左陣報紙,二話不說即刻仆上床訓覺
訓到下晝四點幾先醒~
夜晚食飯個陣睇"帝女花",真係想打爆郭羨妮個頭!!!
唔係人黎Ga!勁奸呀~~~.\~/.
都係"智勇新警界"好睇得多!!!
仲有呀,麥當當個新廣告有Kelly份Ga!!
好靚呀佢!!好想食shake shake薯條呀!!!

聽日應該要睇下文學史喇...如果有心情既話兒^^

>>April 30, 2003 at 11:41:47 PM GMT+8

2003 年 4 月 29 日 星期二 【陰】

今日晴,陰,雨都有啵....

終於都到左考文學既呢一日
對我黎講真係大日子....
我讀左三年預科,最俾心機讀既就係文學
三年入面既effort就係用係呢一日
考之前真係好驚好緊張=.="

700起身,725就出左門口
約左基哥730係禾輋巴士站等
去到恆商都唔再溫喇,唔想再打亂自己
呢期考試真係好得煩呀!
又要人探熱,又迫人帶口罩先考得試
臨考之前又要填D體溫表,阻晒D時間
又要幫D係屋企無探熱既人探熱
攪到遲左兩個字先開考一.一
考完Paper 1之後,都OK啦~
作完篇文都幾滿意,不過D閱讀理解就真係唔識
特別係個首新詩,真係get唔到佢講咩...
估下估下咁做,不過原來好多人都唔識,咁先無咁驚~~

考完之後落左第一城食野,食完繼續準備Paper 2
一睇到份卷....好在....都揀到4題答~
不過試問大家又點估得到"物色"會連續出五年呢??
最識就係問"論小說與群治之關係"同"書"個條,答到過晒時間~
其他問"蜀道難","鈷鉧潭記","陟岵"個D都答得OK,不過真係寫得好亂
諗到咩就寫咩,無乜點組織過....最慘就係始終都係差少少時間
無做到8分呀!!!!>_____<
考完之後,真係一身都鬆晒,了左件心事喇終於都!!!!^^

考完之後,本來係諗住返屋企訓覺休息
不過Kathy叫我去打牌喎....都好啦,好耐無打過~
打左一陣,唔係好耐,就出沙田明將食飯
有Cathy,張名,Connie,Kathy同清清呀!
其實都好開心啦~過左生日都已經有幾日
佢地都仲肯攪下佢,都算係唔話得~
有生日蛋糕食,仲有禮物收添....^^
有件靚衫啦,有隻老鼠仔,仲有一枝大鉛筆
考Oral個陣可能用Ga!!!^_____^
總之就多謝晒啦~
夜晚去左小肥度打牌,當然係通頂個隻啦~
雖然係輸左D,不過都無緊要啦~

回覆阿包:
係呀,我一定會好好保護隻蛋蛋Ga!
真係好靚,好有心思,你咪畫到眼都矇埋???
至於Juno張相....算吧啦你...無可能Ga喇~~
哈哈~~~~~~~^^
一句到尾,thank you very much~

I just could hardly express my gratitude to all good friends of mine.
You are my valuable possession for sure!

>>April 30, 2003 at 11:02:31 PM GMT+8

2003 年 4 月 28 日 星期一 【晴】

繼續努力!
聽日,全力以赴
出擊!!

>>April 28, 2003 at 10:45:44 PM GMT+8