2003 年 9 月 6 日 星期六 【綿綿細雨】
呢兩日既天氣都唔係咁OK
落下雨又出下太陽....係咪杜鵑兒既餘威呢??
不過無論任何天氣,都唔會影響到我出街既興致既~
好似今日咁,我就同左劉百樂既朋友們食飯喇~
有大笪,阿蓋,Yoyo,秋妹,Chisty,啤梨,高妹同阿舒喇~~
食飯之前,同大笪&河童出左好運
目的就係買波喇....我要幫麥希買,河童又要買
其實我都想買Ga,不過都係無乜心水
所以最後都係無買住喇,下場先繼續啦~
買完之後響新城市兜左一陣
之後就去join佢地食飯喇~~~~
我地去左必勝客食,都食左唔少野~
雖然係咁,不過食完之後我地都係意猶未盡
去左連城廣場新開個間"滿滿"食糖水
我覺得其實都無咩特別
係除左價錢貴D之外~~
我呢D充滿好奇心既後生仔
總係對自己未食過既野躍躍欲試Ga嘛~
所以我就叫左個合桃露食啦~
碗野黎左之後,我自己都未食
佢地就每人一啖輪流試食...
大笪食完之後個樣好衰....阿蓋又話好難食
秋妹仲激,食完一啖之後話想嘔....
我當堂覺得好大壓力呀!!!
但當我食左第一啖之後,都無佢地講得咁難食Jeh....
不過食食下就唔係咁對路喇...
原來係好漏Ga...係左一半已經覺得好滯~
之後仲真係想嘔添.......好在最後都無嘔到~~~
不過下次應該唔會再食Ga喇~
食完之後,走剩阿蓋,Yoyo,秋妹,Chisty同埋我~
咁就再吹多陣水,都差不多12點都走人喇~~~
今日出完街之感:
第一
Yoyo做左負離子,靚左啵!!!!
第二
秋妹原來有樣絕技-----頸夾紙巾!!!好勁呀!!!!
第三
我覺得都係同佢地出街開心D,要幾癲喪都可以~
再諗下而家返學.....唉~~~
第四
我發覺自己口齒好唔伶俐呀!!!
今日買波個陣,我想講"波蘭個場",點知講左"波場個蘭"....
係Pizza Hut個陣,我想講"3杯Jeh喱冰",點知又講左"Jeh喱杯".....
唔怪得之我中文oral F啦....
回覆阿心:
係啦,都幾耐無見喇....
如果夜晚既話我就日日都得閒啦
我星期一day off,星期五返上晝一個鐘
所以連續4日我D時間都好鬆動Ga!!!
我諗我應該得閒過你啦,你好似識左好多新朋友咁喎~
有無靚女介紹黎識呀??
hahahaha~~~~
回覆Paula:
你咁聽明呀?
綠茶糯米茲都識整???
係咪睇"總廚有請"學返黎Ga???
咁呀??tiramisu同綠茶糯米茲我都要食喎~~
kakakakaka.....得唔得呀??
回覆Bean:
喂~~好耐無見你喇啵~~~
撈緊咩呀????
薰衣草我無睇呀,我都出左街~~
而且有線都做過無限次啦~
要睇根本一D都唔難呀!!
>>September 7, 2003 at 2:16:33 AM GMT+8
2003 年 9 月 5 日 星期五 【晴】
Happy Birthday to 媽媽~~
祝生日快樂,身體健康,心想事成
我會繼續去學做一個乖仔既~~
今日無出街,留左係屋企睇電視
1415-1600咩都睇呀!!!!
跟住之後睇有線娛樂新聞台
見到阿梅姐開記者招待會
咁就聽下佢講乜啦....
點知原來係佢有Cancer.....不過好在係良性既~~~~
雖然我唔係佢既fan,不過佢唱歌都幾好聽呀
聽到之後個心都有D唔安樂....
希望佢可以大步檻過就好!!!
所以話,有錢又點,凸然彈個絕症出黎
咩都唔駛做啦....身體健康係最緊要呀真係~~~~~~`
不過....有錢始終好過無錢既.....kakakakaka~~~
所以我而家積極搵緊part time喇~~~~
回覆Paula:
當然啦...全世界都返晒學啦
係得HKU咁開心,8號先返學Ga Jeh~~~
你想玩呀?幾時都可以啦
不過你開學之後,應該都唔方得閒Ga喇
你又唔搵我???
回覆吉米:
係呀....真係好奇呀!!
得佢一個係度行,無人發覺呀!!!
我諗唔會係拍緊戲卦....
如果真係拍緊戲既話,我同大笪一定會被影到呀!!!
因為我地距離實在太近喇!!!
>>September 6, 2003 at 2:29:17 AM GMT+8
2003 年 9 月 4 日 星期四 【微雨】
今日1030返去上English skills
都ookk啦....個lecturer係個50零歲既男人,都幾nice既...
都唔算太悶啦~
由於佢迫我地認識隔離位既同學仔
所以我就同隔離位既男同學嗲左幾句啦....
都好既....總算識左一個新同學仔~
上完兩粒鐘之後,就即刻周圍打俾人
睇下有無人同我食Lunch啦...
Yoyo未上完堂,大笪又遺言信箱,歐佬又唔駛返....
都打算係食自己Ga喇
正當我準備行落尖沙咀既時候
竟然離遠係M門口見到一個熟識既身影
睇真D,原來係大笪呀!!!!
好喇,佢又得閒,可以一齊食Lunch喇~~
我地落左尖沙咀間別府食,都幾好食呀我覺得~~~
食食下既時候,我係玻璃窗見到出面有個人行過呀!!!
真係講都唔信呀!!!!我地見到劉德華呀!!
真係佢黎Ga!!!難得既係得佢自己一個,無人圍住佢呀嘛!!!
佢帶住頂帽,自己一個人係度行....佢都唔高既,不過真係好科!!
哈哈~~~~奇就奇在真係無人發現佢呀....
雖然我唔係鍾意劉德華既,不過咁近距離見到一個咁紅既明星
真係令我太震撼喇!!!!!!!我地隔左一堍玻璃咋!!!!!
食完之後,我就返去上I.T堂喇
返到去未夠鐘個陣,陪大笪去左圖書館,SU同ITS
個ITS真係幾正喎又....
跟住佢就係度print野同影印
我就去AG上堂喇~
嘩.....呢堂I.T真係"Lor你命三千"呀
又係難頂既.....個lecturer講野又細聲
講英文又唔流利...最重要既係悶呀嘛!!
上上下堂我都訓左一陣~
落堂之後,我同大笪落左尖沙咀行
因為佢要買褲喎....行左都ok耐,但係都睇唔岩~
我地行行下,要過馬路個陣,有車行就停一停啦
有架車經過,我見到入面有個女仔好靚,好sharp
開頭我都認唔出,跟住叫大笪睇下啦
原來係應采兒黎Ga!!!!真係得Ga!!
佢真人仲靚過上鏡~~~~
哈哈~~~得閒出尖沙咀行下,真係會撞到明星Ga喎!
行左好耐之後,卒之俾大笪係Update mall買左條褲
我見到個度有件褸都幾靚Ga!!
不過無理由而家買褸Ga?
佢話得返個一件咋喎...
如果兩個月之後都仲未有人買,我就買啦~~
之後跟住我地都返沙田喇...
係樓下商場見到D令我好開心既野...
攪到我食完飯仲出左新城市一轉添~
不過最後原來都係空歡喜一場...
都係算啦....呢D咁玄既事大家係唔會理解Ga喇...
回覆Autumn:
唔駛喇,你地個D唔同我個D Ga~~
你地讀jupas入面既course,我唔係
所以係唔同Ga~
你地係幸福D Ga!!!
>>September 5, 2003 at 2:23:47 AM GMT+8
2003 年 9 月 3 日 星期三 【颱風】
登登登凳~~~~~原來第一萬位光臨本日記既朋友係祖祖呀!!!
恭喜恭喜~~~~遲D見到你就請你食野啦~~~
至於Yoyo....sorry喇....慢左半步喇你~~~
一係咁啦,你黎密D,多D上黎,做第二萬個黎睇既人啦~
一樣有獎!!!kakakakaka~~~
講返今日先,返0830,普通話堂呀~~~~
搭火車個陣,見到好多劉百樂既學生哥呀~~
好想衝埋去Dup佢地....硬係覺得佢地好un眼...唉~~
我返到poly都係0820,早左入去
就坐埋一邊做住自閉仔先啦....
D人黎晒之後,原來都幾多人啵~
其實佢都係教D好基本既野....
所以全班大約30人就係度"波,棵,魔,科"
好悶....好眼訓....好唔開心....
不過,好戲在後頭~
上完兩個鐘普通話之後,緊接1030既QM
開頭我都唔知QM係乜東東,一入到去....
一切謎底都解開晒喇.....嗚嗚~~~~~~~
我今次糟糕喇......原來QM係計數Ga!!!
仲要係好難既數呀.....響個刻,我既心情即刻直插落谷底...
佢教埋D"matrix"呀...唔係"22世紀殺人網絡"呀!!!
我真係未學過呀.....點算呀.....唔識呀......好Q難呀......
我唔想retake呀......救命呀......嗚嗚~~~~
天啊....係咪play我呀你....我好辛苦先擺脫所有數學
點解而家要咁樣呀.......why me........
上完兩個鐘之後,我拖住好沉重既心情離開W210....
我約左河清今日食Lunch既,不過佢就1330先放
咁我就仲有時間剩,所以就去左報輔學課程啦
點知.....Pork街....原來asso既人係唔讀得既....頂....
等我仲諗左好耐讀咩添.....唉~~~
之後去返Core R問佢拎grant loan form啦....點知又派晒....
真係想做咩都唔得.....
既然係咁,我都係乖乖地去圖書館睇報紙算喇....
睇到1330,河清打俾我喇,話係門口等~
係等佢個陣,撞到大笪,歐佬,Yoyo同Chisty
咁就嗲幾句啦諗住,點知嗲左幾百句之後
條豬腸粉都未出現.....咁就打俾佢啦
佢話佢係七仔,叫我去搵佢,去到七仔之後,又唔見佢啵!!!
原來佢排緊隊禁錢....條龍仲水蛇春咁長~
河清話Poly有個course,係專俾D想retake UE既人讀既
咁我就滿心歡喜咁去報啦.....點知....Pork街
又係asso既人唔讀得....我斬死你好唔好呀????
我好想去平機會求助呀.....有無人知道個電話呀????
之後我地就去左食野喇,仲同埋歐佬,大笪,河收添~
去左元祿呀....一D都唔好食呀!!!!
以後都唔會再食Ga喇!!!!
食完之後返返Poly,拎左張地鐵form
仲係SAO hea左好耐添~
跟住歐佬話去睇醫生喎,咁我同河清咪陪佢囉~
原來Poly個clinic都幾靚Ga!!!
入面仲有好多玩具添Ga!!!
我同河清係等歐佬個陣都玩左好耐
仲好嘈添~~~~哈哈~~~~~~~~~~~~
之後我地就返沙田喇,要買野呀嘛
我地去左"無印涼粉"買左幾本簿返學用啦
跟住兜左陣好運....都返屋企Lu~
同河清一齊搭83K個陣,個天自然落好好好大雨呀!!!
一向瀟灑既我,當然係無帶遮遮啦....
咁就出事喇....一落車之後,我即刻大暴走咁狂奔返屋企
雖知道我屋企同巴士站都有段距離
所以最後,濕晒.......
今日真係黑仔呀....真係激爆瑪莉喇!!!!
經過今日之後,我更加要發奮圖強!!!!
一年之後,我要做好漢!!!
一年之後,我唔要俾人歧視!!!!
一年之後,我要讀輔學課程!!!!!
一年之後,我要用佢既Language Learning Centre!!!!!
睇住黎啦!!!!!!!!!
>>September 4, 2003 at 1:36:28 AM GMT+8
2003 年 9 月 2 日 星期二 【驟雨】
嘩嘩嘩~~~~~又有個波黎探香港喇!!!
呢個杜鵑兒好猛咁話喎....有兩隻眼Ga!!!
開頭仲來勢洶洶咁.....我真係以為會掛10號風球Ga~~
點知只係掛到9號....
其實出面都唔係好大雨,不過就好大風囉~~
係"Hum Hum"聲Ga!!!好勁呀!!!!
無啦啦,多日假....今日一起身知道唔駛返學
竟然有一種好莫名既失望....
可能因為未上過堂,好奇想知道係要做咩
原本今日有堂Creative & Critical Thinking既~
對於我呢個咁唔creative既人黎講
真係有D難度....所以都幾想上下堂~
而且我咩都未買,諗住放學去買野Ga嘛....
點知俾杜鵑兒打亂晒我個plan~
係屋企無所事事,所以就狂睇電視~
晏晝麥希打俾我,問我知唔知有錢收喎....
嘩卡卡卡卡~~~~~我已經收左錢喇!!!
不過最後都係回唔到本,輸左30幾蚊....
Call Lau Yeah!!!!!! .\~/.
唔得!!!我一定要再買過!!!!
我要贏!!!!我要贏呀~~~~~~~~
夜晚睇"還珠格格3"....我愈睇就好似愈唔對路咁啵...
明明係愛情小說黎Ga嘛,但係佢晚晚都開拖Ga喎....
仲要都幾激下.....呢套係咪其實應該叫"還拖格格"呀??
仲有呀.....套劇愈睇愈悶呀~~~
聽日要上普通話同QTM,唔知駛唔駛上呢?
原本諗住應該唔駛啦,但而家又未必喇啵....
真係要密切留意杜鵑兒既走勢喇~~~~
麻煩大家繼續留意個人氣指數啵~~
第一萬位朋友,請留言呀~~thanks~
>>September 2, 2003 at 11:25:49 PM GMT+8
2003 年 9 月 1 日 星期一 【清涼】
Happy Birthday to 爺爺~
最緊要身體健康,咁就開開心心喇~~~
九月一日------開學日呀~
不過我一D興奮既心情都無啵....
係Karmen屋企訓醒都1230喇~
仲有時間食幾塊麵包~
食威下唔覺唔覺已經1315....
我約左Helen 1345 Ga啵....如果而家先搭81K實趕唔切啦...
所以我就做左件好奢侈既事.....飛的~
返到屋企換過件衫,Gel個頭就出去喇~
我用左競步既步伐標去火炭火車站....
我去到已經係1355喇.....不過好在~
佢都未到,我早左佢15秒~~~
咁我地就一齊返Poly喇~
返到去個Welcoming Ceremony都仲未開始~
門口有萬幾人塞住晒....係stadium門口仲見到林振培....
原來佢都係Poly既同學....仲叫我入排球隊添.....咪玩啦!!!
我仲要做好漢Ga!!!邊有時間呀......
等多一陣先入得去....明顯地...又係廢Ga喇~
聽左一大堆野....都唔知做乜既~
聽完之後終於都可以拎student card喇....
有少少慶幸我係讀Arts,少D人讀
排隊拎student card都唔係排左好耐~
不過讀business個D就食屎喇....
烈日當空底下,條隊排到老鏈咁遠....好慘唷~
不過原來Bilingual未拎得住
所以就同Helen兜左一陣啦....周圍行黎行去~
等到Helen都拎埋之後,我地就去左圖書館行陣喇~
個圖書館真係好大呀.....我行行下都蕩失左路~
要慢慢搵先搵得返個門口....哈哈~
之後就去左舊can食野....其實都幾唔好食...
不過我地坐左好耐好耐....乜都講左一餐~~
大約1800到就返沙田喇~
由於今日係爺爺birthday既關係
所以會有好多人上屋企食飯,包括媽媽在內~
所以我就出左沙田join埋佢先一齊返屋企喇~
返到屋企.....果然係有好多人呀!!!
食完飯之後,佢地就走晒喇~
咁我就沖涼online喇.....
今日係Poly撞到好多好多人....除左Helen係約左之外
撞到Rain,Hoi Kei,大笪,Yoyo,Chisty,歐佬
仲有首領條女之一-----夫人呀!!
我係圖書館仲同佢搭埋同一部lift添呀....哈哈~~
無見咁耐,夫人都係咁......巨!!
讀Poly既朋友有眼福喇,不過眼看手勿動啵!!!
佢係首領Ga~~~~~~~
係呀!!!記得望下下面個人氣指數啵!!!
第一萬位朋友請留個言呀~~~please!
>>September 2, 2003 at 3:45:15 AM GMT+8
2003 年 8 月 31 日 星期日 【微雨】
而家我唔係屋企呀,而係係Karmen屋企~
佢岩岩搬左新屋,當然要上黎睇睇啦~
係呀....我個場三穿四波波呀....頂...
又炒左一半喇....又有咩奶油熱刺會輸Ga....
主場都要輸三粒....真係頂爆你個肺呀!!
又再一次印證到波波係圓Ga呢....
shit!!!
今日都無乜點做過D咩野...
下晝我姑姐同姑媽都上左黎
咁就同佢地傾下計咁啦....
唉....我地黃家發生左D唔係咁愉快既事...
其實我就覺得就無得好講既...
不過爺爺就好鬼激動...唉~
仲攪到成個人都瘦晒.....
我地呢D做細既,當然係咩都幫唔到手啦
D大人既野真係難明....
夜晚食完飯之後,我就跟左姑姐過黎喇~
都係講住咁多先~
係呀!!!!麻煩有睇呢個日記既朋友
睇完之後,拉去最低睇下個人氣指數丫~
真係太興奮喇....一萬大關喇!!!
唔該大家留意下啦~
如果你係第一萬個貴客光臨,請留個言啦!!!
有獎呀!!!!我認真Ga!!!!!
>>September 2, 2003 at 3:09:10 AM GMT+8
2003 年 8 月 30 日 星期六 【清涼】
處男下海.....點知浸Q死左....
真係出師不利!!!
話說今日約左麥希去賭波波,咁我咩都唔識Ga嘛
當然要有個軍師會好D啦~~~
我約左麥希1430係新港城麥當當
咁我就1410出門口,應該無問題啦~~
落到去車站,岩岩走左架40X....算啦,仲有van仔~
點知架810van仔....一架.....兩架....三架.....四架......五架.....
連續五架都係full晒....$@%#%*!
我足足等左5個字呀....頂......
最後我都係上返40X....最後我當然係遲到啦~
好在我打左俾麥希叫佢遲D出門口咋.....
出到去,當然係要食野先啦...又係KFC喎~
食完之後就真係去落注喇!!!
我今晚買左一場,係樸茨茅夫對狼隊
識賭波波既朋友應該知道,狼隊係得個名Ga之嘛
其實係好豬頭Ga嘛,所以我咪買左樸茨茅夫贏囉~
好正路Jeh....我仲細細地買左10蚊波膽
買左樸茨茅夫贏2:0.....都好正路Jeh.....
仲有,跟麥希買左場三穿四....
其實我都唔係好知係乜傢伙黎既~
不過聽落就好似幾過癮咁.....哈哈~~
總之就一定要掂呀!!!!
之後就上左麥希屋企坐下咁啦
終於都睇到第一次上大陸D相喇....
好似係差不多兩個月之前既事喇啵......哈哈~~
坐到1800到就走喇~~
夜晚知道左個場波個結果之後.....頂.......
無奶油Ga啵.....點解會咁Ga.....
唉..個波波果然係圓Ga...世事真係無絕對....
就係咁,我就輸左30蚊喇.....嗚~~~
之不過咁,聽日先係戲肉!!!
我要翻身!!!!!!!!!
呀.....係呀係呀!!!!都唔記得左講~
呢兩日咪好興睇火星既....
我都有睇呀!!!不過就係就咁昂高頭睇
其實都無咩特別之嘛....係真係光D紅D囉....
不過呢粒火星係漆黑既夜空入面
又真係幾靚既~~~
回覆吉米:
我得兩張飛咋~
唔通我同你兩個睇咩.....
我係個日上晝先知原來我本身份form唔齊
但個陣我已經約左人喇
所以先無搵你咋!!!
>>August 31, 2003 at 2:06:56 AM GMT+8
2003 年 8 月 29 日 星期五 【晴】
基本上,今日同尋日可以話係9成相同
除左晚飯個陣D"送"同尋日唔同....
所以都係無咩好記~~
呀...係呀!!
聽日我就處男下海喇!!!!
想知我做咩就留意聽日日記啦!
kakakakakaka~~~~~
>>August 30, 2003 at 2:15:31 AM GMT+8
2003 年 8 月 29 日 星期五 【酷熱】
今日無出過去,睇左好多電視....
一起身就睇左"金裝四大才子"
睇完玩左陣個腦.....好悶,無野好做~
連"都市閒情"我都睇左陣....
一路落去睇晒"廟街媽兄弟"同"婚前昏後"
呢兩套劇而家睇返都幾好睇啵~
跟住成個下晝就煲住Kelly隻碟喇~
真係正到暈.....
睇左幾晚"還珠格格3",好似麻麻地咁...
古巨基個古裝扮相唔係咁OK....
同埋都係頂唔順佢入面既肉麻對白...
再睇埋"美麗在望",個左慧琪都幾靚喎!
佢講英文好好聽呀!!
我目標係下年retake UE oral個陣會講到好似佢咁!!!!
之後睇埋"娛樂大飲茶",睇佢訪問周杰倫
真係.....一睇就諗起尋日個呃人情況!
佢講到好似好大件事咁...其實絕對唔係囉~
個show last左7個字咋,可以有幾多野睇呀????
今日出左返學個timetable喇....都幾好喎~
星期一day off,星期五返一個鐘....都ok多時間剩~~
希望搵到份part-time之餘,仲有時間讀書
一年一年!!!!我唔係發緊夢!!!
一年之後我要做好漢!!!
>>August 29, 2003 at 1:02:25 AM GMT+8
|
![]()
|
廣告 |
|
讀者留言 |
| 路人留言
|
彥生, 你好耐無Update h
>>April 16, 2018 at 1:43:42 PM GMT+8
Eddie, 你的blog有很多
>>June 30, 2007 at 7:40:15 PM GMT+8
好耐冇見喇彥生~有時間打個電話比
>>May 25, 2007 at 1:43:57 AM GMT+8
哈哈~我都無你電話,點打俾你喎~
>>April 15, 2007 at 9:34:18 PM GMT+8
你幾時放假呀Gap?
<br>我
>>April 12, 2007 at 11:18:18 AM GMT+8
好耐無睇你日記
<br>笑鬼死我
>>April 2, 2007 at 9:55:47 AM GMT+8
hello..long time
>>March 28, 2007 at 7:13:30 PM GMT+8
how come!?haha~
>>March 23, 2007 at 10:55:39 PM GMT+8
哈哈~我又留言了~
<br>
<
>>March 23, 2007 at 1:18:56 AM GMT+8
我5月有3個星期大假, 同你去邊
>>March 22, 2007 at 11:07:07 PM GMT+8
Woo..I also juz
>>March 20, 2007 at 4:17:41 PM GMT+8
我仲打算搵日要你幫我留意下見唔見
>>February 17, 2007 at 11:14:04 PM GMT+8
a very nice diar
>>February 12, 2007 at 11:09:43 PM GMT+8
well..咁你條眉又真係勁粗,
>>January 23, 2007 at 11:43:40 AM GMT+8
我勁enjoy同老朋友吹水食飯同
>>January 13, 2007 at 12:57:16 AM GMT+8
hihi 彥生~^^
<br>好
>>December 15, 2006 at 1:50:10 AM GMT+8
請問你會唔會離行畢業禮架?
<b
>>October 26, 2006 at 12:17:32 AM GMT+8
唔辛苦又點得世間財?? 但3點幾
>>July 31, 2006 at 7:42:58 PM GMT+8
我套制服成個月都未有~~~!!!
>>July 4, 2006 at 8:01:12 PM GMT+8
明天首日上班~~很緊張!!
<b
>>June 4, 2006 at 10:10:40 PM GMT+8
工作完有錢就可以再去旅行la~
>>May 28, 2006 at 2:06:28 AM GMT+8
多謝哂呀~黃彥生先生。
>>May 14, 2006 at 8:30:02 PM GMT+8
你做乜響我全檔呀...my na
>>May 5, 2006 at 6:40:52 PM GMT+8
一於轉過黎xanga la
<b
>>May 1, 2006 at 2:23:14 AM GMT+8
Thx!!
>>April 30, 2006 at 5:42:04 PM GMT+8
喜歡 生日禮物 嘛??
<br>
>>April 29, 2006 at 11:14:22 AM GMT+8
遲左添~ 生日快樂啊~
>>April 27, 2006 at 2:49:53 AM GMT+8
生日快樂呀~哈哈哈~祝你開開心心
>>April 26, 2006 at 9:00:41 PM GMT+8
1.請依照問題遂一回答哦
<br
>>April 21, 2006 at 6:29:05 PM GMT+8
今日追看你的日記才知道有個"卉婷
>>April 6, 2006 at 4:16:14 PM GMT+8
希望你唔好破大笪既記錄啦!
<b
>>April 3, 2006 at 10:14:33 PM GMT+8
FRI要加油啊~~~~
<br>
>>March 22, 2006 at 1:40:36 AM GMT+8
做咩咁激動
>>March 20, 2006 at 11:14:23 PM GMT+8
哎呀,早知今日勁眼訓都彈起身上易
>>February 15, 2006 at 12:59:55 AM GMT+8
我今天很悲哀呀...等我打o係日
>>January 24, 2006 at 12:41:33 AM GMT+8
我真是愛死你啊,還記得在日記祝賀
>>January 23, 2006 at 1:33:42 AM GMT+8
有無買佢隻碟呀咁?貴人你幾時得閒
>>December 31, 2005 at 1:34:12 PM GMT+8
乜我咁勁咩???
<br>竟然可
>>December 26, 2005 at 11:41:16 PM GMT+8
不要說是雜貨,起碼我遵守規則,我
>>December 25, 2005 at 5:20:20 AM GMT+8
52.3真係好難買..不過我一早
>>December 22, 2005 at 1:07:44 AM GMT+8
You're so mean t
>>December 13, 2005 at 11:40:17 AM GMT+8
車
<br>玩過啦~~~
<br
>>December 3, 2005 at 12:42:28 AM GMT+8
你個愛情測驗o甘好玩ge??!!
>>December 2, 2005 at 11:57:40 PM GMT+8
<br>
<br>我要你下次係
>>November 28, 2005 at 7:45:31 PM GMT+8
唔駛負數呀
<br>我liste
>>November 26, 2005 at 12:25:57 AM GMT+8
哈哈
<br>
<br>chea
>>November 19, 2005 at 12:46:58 AM GMT+8
哦!陳慧嫻的玩味呀,好舊嚕!
<
>>November 18, 2005 at 2:47:00 AM GMT+8
我決定了,以後每個星期六
<br
>>November 14, 2005 at 12:03:50 AM GMT+8
你洗咪講到咁攪笑呀!
<br>
>>November 9, 2005 at 10:21:24 PM GMT+8
死野!我何只做左一件好事呀??仲
>>November 9, 2005 at 12:46:33 AM GMT+8
|
|