2003 年 6 月 6 日 星期五 【雨】

Happy Birthday to Karmen
祝佢愈來愈正,成日都咁開心
最緊要係快D搵返D正經野做,唔好再浪費青春先得Ga!

係黃大仙訓到1200,起身睇下有線,睇下雙面伊人
又睇下都市閒情,再睇下卡拉屋企
跟住就換衫出左葵芳攪下個頭啦~
今次highlight金左個頭,當然係型啦!!
kakakakakaka~~~~~~
攪完之後又坐左一陣,跟住返左沙田喇~
係葵芳搭架Fucking 46P真係谷鬼氣呀!!!
足足要成粒鐘先到沙田,兜到我都吽吽地呀!!
竟然要入埋美城苑美松苑個邊,都痴線Ga!!
早知搭返地鐵轉火車好過!!

上左小肥度同張名,Kathy & Connie打牌
夜晚個餐係埋個度食添
食完就再打,卒之打到0130,唔三唔四咁,真係麻煩呀!!!
去邊都要飛的.....唉!!!

回覆阿包:
整"豬籠"個MTV??????
我覺得會引起公憤喎.....
到時攪到六四或者反廿三條大遊行咁就唔係幾好啦嘛....

回覆高妹:
我覺得你應該去房屋署投訴
等佢取消個家人既戶籍!!!
咁就少左D噪音喇~

回覆阿蓋:
都唔係好衰姐.....
咁真係麻麻地呀嘛套戲....
無理由咁都要睇Ga....right???

>>June 7, 2003 at 4:12:20 PM GMT+8

2003 年 6 月 5 日 星期四 【晴】

過左黃大仙,不過成個下晝都係得我一個人係屋企
差不多除左去廁所之外,都未離開過張梳化
係有線電影台睇左幾套戲囉~
個套"買兇拍人"好鬼攪野~~~係就係好低能好無稽
不過志在笑下都OK既...
又睇左套垃圾"旺角靚妹仔"
完全係一套狗屎,不值一提~
仲有睇左套陳年舊戲"飛虎精英之人間有情"
係張學友同鄭秀文做既
淨係睇鄭秀文咁多年前個樣都夠盞鬼啦~

夜晚媽媽返黎個陣買左包豉油王炒麵俾我食
仲有咖喱魚蛋添啵!!!!
再夜D睇"國際排球精英賽"
睇左場俄羅斯對巴西同埋一場中國對古巴
俄羅斯同中國都係連贏三局
自從中國女排轉左教練之後我都少睇左Lu~
不過中國女排都係咁勁喎!
犀利犀利.....都0430到就訓Lu~

>>June 7, 2003 at 4:20:44 AM GMT+8

2003 年 6 月 4 日 星期三 【晴】

今日係端午暨六四....
今年我好似無食過粽啵.....不過無緊要啦
唔駛端午都有得食啦~

原來六四係十四年前既事喇....想當年我仲係一個小朋友
其實直到而家我都唔係好知六四係咩事囉~~

今日下晝出左博康,上左Kathy屋企
同佢,Connie同張名打牌囉~
打左唔係好耐,打到1830到就走喇
因為我屋企要做節嘛~
今日又贏左D啵....

夜晚就係屋企做節啦,食到超~~~~~~飽呀!!!!

回覆阿蓋:
哈哈~~我諗我都係唔陪你睇喇~
因為套戲唔係咁好睇咋~
得個驚字囉~

回覆Paula:
祝你一路順風喎~
實等你返黎打牌,唔駛驚啵~~

回覆Yoyo:
呢層我都幫你唔到啵
大家幫到手既就幫下Yoyo啦~~

>>June 4, 2003 at 9:54:14 PM GMT+8

2003 年 6 月 3 日 星期二 【晴】

今日主要都係留係屋企啦...
俾自己休息下之餘,亦都俾我個荷包抖下~
呢幾日日日出街,用得太多錢喇!!!
唔得啦咁樣....要慳D駛先得呀!!!!

夜晚同左祖祖同Kei Yiu係波記宵夜
仲傾左好耐添!!!
原來我好耐好耐無見過祖祖喇.....

p.s原來好e食係幾好食Ga!!!!可以一試~~~

>>June 4, 2003 at 2:34:34 AM GMT+8

2003 年 6 月 2 日 星期一 【晴】

今朝1230起身,刷完牙洗完面之後就打左個電話
個電話係大埔一間買VCD既鋪頭既office
因為尋日出大埔個陣見到間VCD鋪話請人喎....
咁就打個電話去book時間interview
我都唔明點解賣VCD都要interview....佢係咪要我諗計sell VCD呀?
不過都算啦,打左之後,個條友問我係咪今年畢業
咁我就不以為然,仲好誠實咁答左佢"係呀!!"
佢就話"咁我地唔考慮住喇~"......頂佢個肺~~
我下次會學精!唔會咁誠實Ga喇!!!!~~~~~~~>.<

過左一陣爺爺係樓下惠康買左D壽司上黎食
不過我趕住出門口呀,咁就食左兩舊就出左去喇~
今日本來我約左麥希,大面,歐佬,吉米,同阿蓋去睇戲既~
但係阿蓋又唔得閒啵,咁佢最後就無黎啦....哈哈!!!!!
不過阿心又出左黎喎,都好~
我地去左又一城AMC睇近期既話題之作"咒怨"
套野.....一般啦.....其實我地個個都唔係好明個劇情係點~
淨係知道成套戲D恐怖位都好密下....
恐怖指數我俾:★★★★★
有D位我都真係幾驚下.....
不過都唔夠阿心啦,成套戲有1/2時間都用件衫遮住自己隻眼
又尖叫左幾聲咁囉.....唉~~
真係頂佢唔順耶~~~~~

睇完之後去左food court食野啦,食左個下午茶餐
有一小碗雪菜肉絲麵,兩舊窩貼同一杯豆漿
食完之後我都唔知食左D乜~
不過都算啦.....之後就係又一城行下D名店咁啦~
又行下Log-On咁囉~
原來間Log-On都幾正啵,又大又多野睇~
又過多陣,大面就要返屋企,咁麥希就陪佢走埋~
咁我,阿心,歐佬同吉米見時候尚早,就打算坐下食下tea咁啦~
原先係去Pacific既....不過D野又唔岩食又貴
咁就走左去EXP啦~~個度D野飲都幾ok呀~~
阿心叫左杯Le juice,吉米叫左杯薑果汁
歐佬杯fruit juice都唔錯呀....係除左我個杯囉~
我叫左杯expresso咖啡....佢一黎到我已經打左個凸~
因為實在太大杯喇,我勁驚我飲唔晒呀~
就算飲得晒都一定勁急尿啦!!!我都未見過一杯咁大杯既咖啡Ga!!!
$20一杯真係抵到你唔信呀!!!!
好在最後我都飲得晒,不過飲左勁耐囉.....
睇到呢個日記既朋友下次記得要試下呀!!!!!

飲完個杯咁大杯既咖啡之後,都各自返屋企Lu~
咁我地四個就搭返火車走人喇~
去到火炭之後行返屋企,返到去岩岩1930食晚飯~
好似好耐無係屋企食過晚飯喎.....

夜晚睇TVB個B套新劇"黑夜彩虹",好似好好睇咁喎!!!
蔡少芬做戲好掂呀~~~呢套劇我諗同肥野一樣,都係追得過既!!!
再夜少少就上網睇"現在.來".....好耐無上去睇野喇~
有一度係森美訪問Edison,咁我就用左40分鐘時間去睇啦!!
佢話佢同佢以前讀書既朋友就好似Voltron咁,咩叫Voltron呢???
其實係五個機械人黎既,咁佢地五個本身都好勁,但就唔係最勁!
但當呢五個機械人合體左之後呢,咁就天下無敵,所向披靡喇....
睇完之後我諗,乜而家仲有呢D咁ideal既想法Ga???
我就唔信喇......

都係唔打落去喇,有人嫌太多字唔睇就唔係幾好啦......哈哈~

順帶一提,我岩岩轉左background music....
最快講得出係咩歌既有獎!!

回覆阿包:
唔好啦.....雖然我都係半熟男孩,不過著皮鞋型D同襯D嘛~
對唔對???

回覆鼠欣:
乜"豬二千"做緊特價呀??但我硬係覺得佢係唔係特價都係咁平Ga啵~~
所以買黎送俾親朋戚友都抵啦!!!
你有無送條俾蛙仔呢咁??

回覆主席:
真係兩粒都有???我好懷疑啵!!!!!
下次我要檢查下先得!!

>>June 3, 2003 at 1:11:32 AM GMT+8

2003 年 6 月 2 日 星期一 【晴】

嘩.....累死人喇~~~~~~
今日去左做一件我好耐無做過既事,就係BBQ喇!!!

今朝1015起左身,約左麥希,大笪,河童,阿蓋,淑君,Connie,七輝及其女友Vivian去大尾督BBQ~
約左阿蓋1045係火炭火車站等
去到大埔火車站岩岩1100,個陣都差不多齊晒人喇~~
等齊晒人之後,我地就上左新達間PK買野
都買左好耐下呀,但都買唔齊要買既野
咁就再去大埔墟買啦~
終於都買齊喇啵!!!咁就搭75K上大尾督喇~
未上去個陣仲以為會好多人,但點知去到又唔係啵!!!!
可能個陣大約係1330,正係太陽伯伯最勁個陣啦.....
所以都好易就搵到爐~

攪掂晒之後,就開波燒野食啦!!!!
不過呢......真係太熱喇....個個都無乜心機燒~
個個都食左唔係好多之後就停晒手
我都係食左一塊牛扒,兩條腸同幾粒丸之後都唔想食~
既然係咁,就停下,休息下先啦~~~
咁我地就去左玩啤牌,玩左"七級Chu"啦...
玩左無耐我已經做左六級Chu喇....
不過好在,我死守成功,最後淑君仲爬埋我頭
做左七級Chu添~~佢既懲罰就係去問一個少女讀form幾...
Easy啦......人地一口就答左我地F.5喇~~
之後仲玩左"非洲話事啤",呢個先好玩呀~~
差不多個個都輸過乜滯~
阿蓋就問左一班白痴七頭form幾
河童就打左個斛斗
Connie就企係石凳度Shake Shake Shake
七輝就要扮痙攣來回走一轉
淑君就用鞋帶綁住對腳,圍住個燒烤爐行左個圈
最慘我都不能倖免呀....我要用膝頭哥夾住個銀仔圍住個燒烤爐行個圈
唉~~~~~~不過都好好玩既......

呀.....我地隔離有班傻仔,即係阿蓋問佢地form幾個班呢....
其中有個真係極品呀~~~~
個樣貌似大明星-------醬爆,著衫極度騎呢....
佢地班七姑碌見我地玩得咁開心,跟住佢地又玩喎
呢個都算啦,仲要罰埋D野又係同我地一樣...
即係聊D陌生人講野個D呢.....真係頂佢地唔順~~
自己成班又騎呢.....收埋D皮啦大佬......

再晏D就將頭先食剩個D野燒晒佢
又傾下計,影下相咁啦....個陣都差不多1830
跟住Vivian又要走喎,咁七輝就陪左佢走喇~
咁我地就繼續行左入水壩個邊...我都未去過呀!!
原來個度係好好好好好靚Ga!!!!!!
仲要個陣太陽岩岩落山,又有風吹....真係超爽!!
再過多陣大笪同河童唔得閒又走先
咁就得返我,麥希,Connie,淑君同阿蓋係個度傾計~
由於個度實在太舒服喇,所以傾到個個都唔想走
不過一傾起一個月之後大家都放榜就心都酸埋.....唉~
真係好無安全感呀!!!!
講下講下就講到差不多2200啦.....
咁就開始出返去,再去埋廁所就搭返75K返返大埔火車站喇~
個陣大家都覺得肚餓,咁就上返新達食野
食完都2330 Lu~跟住就走人喇~
搭返火車出沙田之後就搭85K.

所以而家真係超累耶........

回覆鼠欣:
其實我都覺你地係難買衫D既
買完靚衫又要買靚裙,跟住又要買靚鞋
仲要係襯啵....其實都幾晒心機Ga.....
不過其實我地男仔D恤衫西褲都唔算太貴啦!
講個秘密你知丫.....我件恤衫係"豬二千"買
都係$99蚊咋.....普通買件Tee都要過百啦!!!
條褲都唔係貴呀.....再講個秘密你知啦~
我條褲都係$199咋!!!!我覺得一D都唔貴呀~~~
D質地同cutting都ok呀.....
所以我覺得我套衫都幾抵......kakakkakakakaaaaa

>>June 2, 2003 at 12:54:01 AM GMT+8

2003 年 5 月 31 日 星期六 【晴】

今日又係打牌.....一個禮拜打左三日牌~
你都咪話唔激!!!

今朝1130起身,梳洗完之後就同左大笪落美心食野
我食左個蜜汁肥野頸肉飯
麻麻地.....都話美心D野唔好食Ga啦!!!
食完之後就同左大笪一齊出馬鞍山麥希度
等左一陣阿蓋先黎......噓~~~~佢又遲到囉!!!!
我地約1300,佢居然1330先到.....我都早佢兩個字啦!太過份喇....

咁我地4條友就開始打啦.....
過左兩三個鐘到,大面又上埋黎~
不過我都唔知佢上去做乜....我淨係見佢行行企企咁.....好奇怪耶~~~
不過佢最有貢獻都係幫麥希輸左錢俾我~~kakakakakkaaaaaaa
係大面未黎之前,麥希仲力王前力王後咁叫自己
不過大面黎左之後....唉....呢個力王竟然去左幫大面"浪"衫~~~
你話丫....問世間情是何物呢........
堂堂劉百樂既A grade足球隊靈魂人物,今日去左幫條女浪衫!!
大面,你係得既!!!!!!!!!
至於今日個賽果,麥希就hurt左D喇~輸得最多
大笪又有贏喇......要挫下佢銳氣先得啦下次!!!!
不過最漂亮既都係我最後個鋪自摸13么.....
仲要攪到阿蓋即刻由正變負......kakakakakakakaaaaaa

打完之後我同阿蓋去左新港城薀莎食野
我食左個芝士雜菌焗意粉,都幾好食啵~~~~
食完之後麥希又出返黎,我地就轉移陣地去左哈迪B吹水
我仲覺得唔係好夠飽,仲食左個薯茸添~
最攪笑既係講起F.6個陣班際足球
S班既陳國權同學射左好漂亮既一腳
漂亮到........hahahahahhahahaha~~~好勁哦~~~~~~~
又係咁傾下傾下,又傾到2230人地打烊啦~
跟住就各自散band
我搭810走,返到屋企岩岩2300

很羨慕人地兩兄弟可以相處得咁friend咁融洽哦.......>.<

回覆索女kaa:
係呀....著老西都ok型啦~
hahahahahaaaaaaa
私家車結婚個陣咪可以見囉~得唔得呀??
個女sales.....ok啦
我估同你咁上下大啦,或者大你少少
把口真係"踉"過油咁~
不過人地職業所需姐.....你估真係溝我咩!!!
我買野佢分到佣Ga!!!!

回覆包包:
我諗我應該都係黑皮鞋多Ga喇
唔想扮周杰倫呀!!!
至於我地D恤衫同唔同色就真係我都唔知喎~
仲有人都未買~

>>June 1, 2003 at 12:40:18 AM GMT+8

2003 年 5 月 30 日 星期五 【晴】

Happy Birthday to 主席~
要祝佢快D生返粒丸,等佢可以做返個"男人"
同條女就更加甜蜜,更加恩愛!!!

嘩嘩嘩.....今日大出血......駛左好多錢呀!!!
約左歐佬1430係火炭火車站,跟住一齊出左旺角
要買恤衫西褲為兩個禮拜之後既謝師宴裝身...
一到旺角就行下新世紀先,貪佢入面有"豬二千"呀嘛~
但係唔知點解呢間"豬二千"得好少色揀
揀左一輪都唔岩feel既....咁就暫時撤退左喇~
繼續行下新世紀啦,行左入"雙重公園"同"izzue.來"兜左個round
D衫靚就靚呀,不過貴左D啦.....所以都係運下吉就走左~

離開左新世紀之後,就行左入花園街,再入聯合兜下
係聯合入面行行下,凸然見到有人係前面閃左一閃
以為咩事啦.....透過玻璃窗既反射(reflection)
見到有4個女仔,其中一個仲著劉百樂校服添
哈哈~~~原來係阿舒,啤梨,秋玲同高妹
咁都撞到喎??!!你地估下係邊個著校服????
係最膠個個高妹呀!!!!kakakakakakaaaaaaa
原來佢係咁愛劉百樂Ga喎!!!考晒A-Level仲著校服.....
應該叫劉群英俾個獎佢啦!!!
同佢地爹左一陣之後,就佢地有佢地行,我地有我地行啦~

同歐佬係聯合又無野睇岩,又閃左喇~
之後行過始創,就入去睇下有無"豬二千"啦....點知真係有喎!
始創間"豬二千"竟然多色過新世紀
咁我係入面試左兩件衫同兩條褲之後
卒之都買到喇....."豬二千"即係"豬二千"....都幾平下D野~
恤衫連褲都係三舊水咋~~~都算抵啦!
買完之後,就過左百老匯個條街.....入左"兩巴仙"度睇左一陣
今期"兩巴仙"D衫麻麻地咋啵.....
咁就轉左個圈,入左潮流特區睇野喇~

原來而家夾糖係好平Ga!!!仲要學生有8折添!
我今日夾左好多都係$7.7咋!!!抵呀~~~~~
行行下見到有間鋪頭有"煎蛋帽"買喎
咁就諗住入去睇下啦.....點知一入到去,個女sales真係犀利!
我入到去咩都未做,個女sales就指住我條右手條珠鍊話:
"好靚呀!!!!!係邊度買Ga"
跟住我話:"係咩....係街邊買Ga之嘛"
轉個頭我問佢:"呢D帽有無分男女Ga?"
佢話:"無Ga!呢頂(我揀中個頂)我都覺得係咁多頂最靚個頂....
不如你埋鏡睇下丫,你gel左頭應該會幾好睇呀......"
哈哈~~~~呢D sales就真係勁呀....既然係咁.....唯有買左去啦....
跟住到歐佬睇衫,我揀左件我覺得幾靚既衫問歐佬好唔好睇~
個女sales又話:"呢件衫好靚好襯你呀....中碼就岩晒你啦"
哈哈!!!講到咁.....都無理由唔買喇卦.....
如是者,我同歐佬就係個度用左200幾蚊喇~
俾錢個陣,個女sales問我:"出左黎好耐喇?"
我話:"都唔係喇...行左一陣啦"
佢話:"哦.....陣間去邊呀?"
我話:"都係呢頭兜下先啦應該....."
找晒錢之後佢話:"有咩問題返黎搵我丫,我叫Ada呀"
我話:"好呀!!!"跟住佢又話"真係??你講一次我叫咩名先!"
我話:"Ada呀嘛~~"佢話:"下次買野我會問返你Ga..."
我話:"好呀,走先喇,byebye~"
哈哈~~~呢D sales就掂啦!!有前途呀!!!!犀利犀利!!!

離開左潮流特區之後,再返轉頭行左陣紅點
再去波鞋街買左杯唔好飲既香芋奶茶
之後就去匯合大面同吉米喇~
吉米又係買左好多野咁喎好似.....個陣都差不多1830
就返返沙田,因為叫埋麥希同阿蓋出黎食飯...
本來係諗住去和民既....點知一如所料....又係有幾萬人等位...shit!!!!
咁我地就去左1樣係食日本野既明將啦!
落到沙田廣場先知個間明將摺左喎!!!真係奇異耶~~~~
呢間都要摺????咁唯有行多幾公里去偉華個間明將啦.....
去到等左一陣就食得喇!!!食完又係坐下玩下就差不多2125喇~
返返新城市,大家去晒toilet屙晒之後都走Lu~
麥希同大面就搭86K走,我同阿蓋,歐佬,吉米就搭85K
哈哈~~返到禾輋我就再陪阿蓋等坐幾班80K先走
勁無聊耶~~~~不過無所謂啦!!!
因為我地真係好無聊.....

夜晚媽媽打俾我,同佢傾左一陣啦
我同佢講左話我用左幾舊水買左件恤衫西褲去謝師宴
佢話係人地既謝師宴,唔關我事喎
其實開頭我都係咁諗,不過諗諗下....我都讀過一年丫
D搣時阿蛇都識我呀!!!
而且呢個係一個好難得既機會同呢班同學去經歷一D大家都難忘既事
畢業之後就無呢D機會Ga喇嘛....我知我唔去我一定會後悔!!
所以.....算啦,我都唔理D人點諗喇!!!!

呀.....聽日又有牌打!!!!kakakakakkakaaaaaaaa

回覆yoyo:
鼠欣已經答得你好詳細啦~~~

回覆鼠欣:
黑頭真係好難攪呀!!用咩都唔係好得既!
黑頭貼我都用過呀,不過我覺得係廢既~
完全無用!!!至於收縮水我又真係無用過啵....
如果真係需要我都會買黎試試啦~

回覆阿包:
你而家考我咩....
呢D我又唔係咁清楚呀....鼠欣識唔識呀?

>>May 31, 2003 at 2:49:29 AM GMT+8

2003 年 5 月 29 日 星期四 【晴】

Happy Birthday to Rity~
唔知佢會唔會見到呢個日記呢??
係呢度祝佢.......祝佢咩好呢???
愈大愈正,想個樣掂個樣~~

今日終於一如所願,留左係屋企
不過今日只係訓得8個鐘咋
全日都無咩精神.....haha~~~

夜晚睇電視,原來亞視今晚台慶喎....
見到好多唔識既藝員唔知做緊乜野
最攪gag既係陳啟泰響樹扮Ricky Martin...
hahahahahahahahahaaaaaaaa
真係笑死無命賠呀!!!幾廿歲人仲咁活躍既???
我真係驚佢扭親條腰骨呀!!!!!!
仲要有好多女人係佢身邊攬頭攬頸.......哈哈~~~
好難頂呀!!!!佢知唔知自己做緊乜呀????

仲有啵....有一度見到原來亞視有個女藝員叫做"董南菲"
E???個名咁熟既????
咪係我F.1個陣隔離班個女同學????
點解會做左亞視既人既????
想當年佢讀完F.1之後就消失於人群之中
估唔到7年之後會係亞視見到佢....唉!!!
做咖喱啡都係無線做啦,點會係亞視做Ga!!!真係唔掂呀!!

回覆阿包:
早睡早起對我班實係難過登天....
不過我會記得既~~~

回覆阿蓋:
要打足48圈,你有無意見?

呀.....呢首新歌幾好聽啵....算係佢地一個新嘗試啦~

千金 Twins

難道賣我的靈魂 能換被愛的幸運
錢有時買得到快樂 但卻買不到愛人
窮極亦有些友人 圍著在我的附近
不見人客的鮑翅席 難道又會更開心

一切買完 不知怎麼算
如何用錢 才能實踐 畢生所有心願

給你十億元 肯不肯心軟
流著汗紅著臉 討厭的說喜愛
喜愛的說討厭 只為賺大錢

只有兩元 分享都溫暖
旁人太鈔 如何及你 真心給我一元

給我十億元 幾千卡火鑽
我本質 還未變 喜愛的 說喜愛
討厭的 說討厭 享受大冒險

無論賺過幾個零 還是沒太多用剩
只要月尾剛剛夠用 何用摘去滿天星

喜愛的說喜愛 討厭的說討厭
不理多說幾變 不會倒轉反轉
討厭的 說喜愛 喜愛的說討厭 錢用完就算


>>May 30, 2003 at 12:07:39 AM GMT+8

2003 年 5 月 28 日 星期三 【陰】

尋晚0300到就訓左,勁好訓呀!訓左10個鐘有多
今日1330先起身,超爽~kakakakaka~~~
原本今日真係諗住係屋企休養生息既
不過一訓醒無耐,Connie問我打唔打牌喎.....
是但啦,我都無野做~

1500到去到顯徑小肥度,一開始係同Kathy,小肥同Connie打既...
打左一陣,張名又上左黎,咁Kathy就走左Lu~
佢又係約左人打牌喎......而家D年青人真係.....
打左唔係好耐啦,張名條豬腸粉約左條女睇"廿二世紀插人兩鑊2"喎......
咁佢就賴低左我地喇.....
不過唔緊要,小肥個Daddy落場打喎!
打到2030到啦,小肥趕住去學車,咁我地就散水喇~
今日又贏左幾廿蚊啵~kakakkaka~~~~~

呢個網又好奇異唷.....之前話0500-1900先Login得到
不過而家又好似唔駛喇啵~
我而家都一樣寫到~kakakakak~~~~

聽日我諗都真係可以休養生息喇卦.....

回覆鼠欣&高妹:
鼠欣既意見好專業呀......乜原來唔可以成日洗面Ga??
我仲以為愈洗愈乾淨既添~
無錯呀~~~護膚真係幾煩下....不過唔理佢又唔得喎~
而家攪靚D自己塊面,第時個女朋友錫我都放心D啦~
kakakakakaaaaaaaaaaa
仲有乜原來維他命C係有用Ga???
咁係咪應該要買返D維多C食下會好D呢??


>>May 28, 2003 at 11:14:29 PM GMT+8