2004 年 5 月 24 日 星期一 【晴】

今朝去東海影相,D數多到阿媽都唔認得,計唔切.
老吳仲要玩野添,佢真係想提早退休.

好好彩,六點幾仲返到新堂排劇.
不過都係老毛病,投入唔到,可能因為大家都已經睇到冇咩反應啦.
其實唔應該排得熟就冇心機,應該更加精益求精,不過真係諗唔到有咩可以再突破......

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
小如:

你好似D昏君咁,不知民間疾苦.
你估個個好似你屋企咁大把首飾架咩?
你估我屋企好有錢咩?我屋企冇幾多粒鑽石架咋,仲話要戴大粒頭......
我阿媽平時落百佳戴鑽石把鬼咩?係出街先戴架咋嘛.

遲D暑假有錢我再黎買過啦,到時你教我睇多D石啦.

>>May 26, 2004 at 6:59:49 AM GMT+8

2004 年 5 月 23 日 星期日 【晴】

今日借頭借路四點幾就收左工,返左新堂排劇.

排左好多次,排到幾熟,已經笑唔出.
點樣可以令自己有返mood做呢?

>>May 26, 2004 at 4:25:05 AM GMT+8

2004 年 5 月 22 日 星期六 【晴】

琴晚發左癲咁打諾曼第打到成四點,訓到今朝十一點起身.
跟住又唔知做乜搞到返唔到崇拜,食埋飯返到去已經見到D人崇拜完出黎.

團聚完之後就落去資料組開會,俾阿嬋搞到我好樣衰......
今日資料組都係排open day個劇,今日做得都算滿意,都引到D人爆笑.
有人仲話我冷面笑匠添,我梗係唔會當真啦,我邊度得丫.
雖然俾人讚梗會有D開心架啦,但始終有少少唔太相信自己.

排完同阿亨等班導師助導食飯,無無聊聊咁等左大半個鐘.
終於等到佢地開完會,同源仔,緻盈,阿峰,阿亨去海龍打機.
成班人玩"百萬大問答"都真係幾好玩,有D問題又夠白痴.

打完機又去T-8食,阿肥姐姐身手的確幾好.
食完同阿峰一齊去等巴士,傾左少少野.
我開始相信阿包既說話,佢真係關心我既.

返到屋企都十一點幾,訓啦.

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
小如:

我都冇唔開心,放心啦~
對耳環?我阿媽都唔捨得戴,點會污糟丫?
不過你唔講我都唔知,原來用暖水就洗得甩D污漬.

>>May 24, 2004 at 1:17:40 PM GMT+8

2004 年 5 月 21 日 星期五 【晴】

今日收工走時撞到Clara,講起先知原來佢都返教會既(循道衛理).
做左成年有多先知,同事間既關係都真係幾疏離.

返到新堂團契,今日好多人,但好亂.
希望返到舊堂新翼之後地方大左,冇咁逼人會冇咁亂啦.

之後開cell係悅怡hold,今日玩得好開心,訊息都好清楚.
我真係要好好學習,汲收下人地既優點,改進自己hold cell時既不足之處.
跟住I團group埋一齊貼相,同團友玩下,傾下偈咁.

夜D同阿嬋去467,個劇發仔有份做.
呢個係我返黎永光咁耐睇到最pro既話劇,幾好睇.
跟住李淑儀有段講道,幾o岩我.
真係......會唔會青年團其實更適合我呢?
唔理啦,反正我暫時未想升團住.

完左落左旺角shopping,買左今期"香港文學",同埋黃碧雲既"十二女色".
紫羅蘭都算係幾多書,以後可以多D去行.
買完書落去Tough買左個腰袋,咁細個都成四舊水,搶咩?
跟住落尖沙咀HMV買左Modest Mouse既CD,之後食返碗雲吞麵就返屋企.
今日收穫都算豐富.

>>May 22, 2004 at 5:30:24 PM GMT+8

2004 年 5 月 20 日 星期四 【晴】

今日雖然有得出街收早,但都趕唔切返團契祈禱會.

完左祈禱會同阿嬋傾左陣,知道助導真係好多野做.
呀......咁我報家員點算呀?
就快截啦,邊個黎in我呀?
升唔到唔係最大問題,最怕係連好好報一次既機會都冇,會好唔甘心囉.

跟住入左40排open day個劇,我俾人揀左做舅父既角色.
點解會咁多對白?一多對白我就做得唔自然架啦......
雖然套劇唔係我編既,又俾人安排左個唔似我性格既角色做.
但為左事奉神既緣故,我一定要做好個角色.

排完之後同阿亨,阿嬋,冰仔一齊靈修.
靈完分享到一半,Carmen催家員聚要走,冇計啦,唯有散啦.
結束祈禱時阿亨仲記得我報家員,真係多謝佢一直既支持.

臨走幫班家員影左張相,一個人返屋企,今次冇乜覺得寂寞啦.

>>May 21, 2004 at 1:32:58 PM GMT+8

2004 年 5 月 19 日 星期三 【晴】

五月二十日，凌晨，我與他們分別後，獨自踏上歸途。

一個人在尖沙咀街頭漫步，一種難以形容的悵惘油然而生。

到底因為甚麼而感到惘然？
因為獨自歸家的孤寂感？
因為不捨得分別？
因為對看不清自己的靈命光境而惆悵？

我不知道，只知道，單為別人而努力，是靠不住的，最終只會感到空虛。

我的主，你可知道，這時候我最會想到你的存在？
我為何只在這種時候才想到你的存在？
我怎麼不能把開心也交給你？
你會原諒我嗎？

我也希望自己可以時時刻刻也記掛著你。
你會幫助我嗎？我相信你會的。

自知不應該，我還是忍不住在報攤買了包香煙，抽起來，作為一時的寄託。

主，原諒我不愛惜你賜給我的身體，總有一日我會把煙癮戒掉的。

我獨自在街頭走著走著，只想到自己，你，還有他。
他好像可以代替你，但他不可隨時陪伴著我。
只有你可以作我隨時的幫助，所以我多希望自己能夠把你放在第一位。

主，如果我會因為他而忘記你，你還會繼續在我身旁嗎？我相信你會。

看見一個露宿者睡在牆邊，我猶豫地舉起照相機拍下一張照片。
看見一個老人在街邊行乞，我怕被罵，這次我不敢拍下。

主，這個世界有太多需要幫助的人。
如果我不因為你而關心他們，你還會稱讚我嗎？

獨自登上巴士，心中的悵惘仍是揮之不去。
我茫然地看著窗外的景物，漸漸昏沉地睡著。

主，你還在嗎……

醒來時已經回到屯門，我下車，走上歸家的最後一段路途。
樓下的看更慣常地開門給我，我慣常地笑著向看更說聲「唔該」。
含著煙步進升降機，帶著少許罪惡感在裡面抽煙。

主，我對罪越來越麻木了嗎？

開門，步進屋內，二哥還未睡。
坐下來，開著電腦，摸摸小狗，一切還是這麼美好，只是我不好。

主，你還在嗎？

在鍵盤上打出一個又一個字，在電腦旁抽起一根又一根的煙。
耳邊的歌曲重覆又重覆地播放著，我卻不能專心地聽到底在唱甚麼。

主，你還在嗎？

凌晨三時二十分，累了。

主，我希望明天你還在我身旁，我希望明天就能做到時刻記掛著你。

睡吧，明早一覺醒來，一切都會重歸美好。

一切都會好的……

Batavic Der Lion

>>May 19, 2004 at 7:26:47 PM GMT+8

2004 年 5 月 18 日 星期二 【晴】

今日公司有三車野落左黎,好在阿杰早落到黎,未夠四點就埋到台做.
本來就幾好既,衰在約左雅各舊cell員食飯,梗係越早走越好架啦.
彭彭聲係咁落貨,七點幾就已經做左四份三野,即刻同阿杰申請放人.
好在佢好人,肯放我走,閃都閃唔切.

落到尖沙咀都成八點,入M記妝下身,換哂D臭衫,就去Fat Angelo同百成會合.
去到時百成,阿包同埋最估唔到出現既Anna都到左,書蟲有事就未到.
最衰思苑冇黎,總係覺得差D野咁.
食食下書蟲都到埋,大家難得坐埋一檯,都幾開心.
阿強好白痴咁俾我地發現左佢既秘密,梗係唔放過佢,係咁笑佢.

食完飯去左影貼紙相,我仲係唔肯放過阿強,繼續笑佢.
點知佢真係mind喎,見佢咁慘,冇辦法啦,唔放過佢都唔得.
真係唔好意思,我呢D喪人唔玩到殘都唔肯收手既.
所以有咩秘密唔可以輕易俾人知道,實會俾人尋仇.

之後去左狗仔cafe度飲野,一入門口就俾兩隻狗仔吠,唔可愛既.
入到去諗住玩下隻約瑟,拎舊玩具好細力咁拍下隻狗.
老細即刻阿支阿左,慌死我整死佢隻狗咁,冇癮.
家陣淨係你識養狗咩?我唔識養既.
識少少扮代表,咁簡單既野我真係唔識咩?養得耐就知邊有咁易出事丫.
我玩得既梗係唔會整傷佢架啦,我都養左十年狗架,我都熟D狗囉.
下下錫住隻狗,咁就唔好帶隻狗出黎拋頭露面啦.
快D收返隻狗返屋企啦,整下好易死架.
傻既,我同D狗玩都碌落地都係咁啦,咁錫身就唔係玩狗啦.
人地501玩到擒住隻貓仔都係咁啦,老細都冇所謂,就係知冇咁易死嘛.
我玩狗咋,唔係虐待你隻狗呀,桃桃係咁拖隻兔仔o個隻就叫虐待啦.
呢D人錫得隻狗咁緊要,唔怪得隻狗咁曳啦,呢D咪叫"俾狗玩"囉.
書蟲佢地成班都唔識玩狗既,難怪佢地覺得我既舉動好不可思議.
氣頂,費事掂隻狗啦!
唔講狗既野啦,我係唔識就人架啦,即管憎我啦!

估唔到為左狗既野可以打到咁長篇......

跟住唔理D狗,其實都仲有少少谷氣,不過都係專心傾偈啦.
大家講下自己既近況,阿強可能因為洩漏左機密,收哂水咁.
原來百成轉左工,希望佢新工作有好發展啦.
我都講下自己近況,百成叫我小心工作太就返聚會而失機會.
佢唔係冇道理,但我真係放唔低少年團既野.
將來既野將來先諗啦,現階段我都唔為前途而擔心.
我不嬲都唔會計劃未來架啦,我對自己好有信心,從來冇擔心過自己前途.

傾到十一點幾,怕Anna太夜返屋企,散啦.
佢地全部搭地鐵返黃大仙,我就自己一個走去搭巴士.
有錢想搬去黃大仙,咁以後咪可以一齊走囉.

>>May 19, 2004 at 6:43:03 PM GMT+8

2004 年 5 月 17 日 星期一 【晴】

今朝返晨更差D遲到,都OK投入到,因為夠精神兼心情靚.

晨更完例牌食早餐,今朝去Ann Taylor唔洗返公司,可以坐耐D.
同阿亨,阿包,阿屈傾偈傾到成九點幾先走.
我好享受呢D悠閒既光陰,可以同弟兄姊妹一齊傾下偈,分享下.
前年既我都仲可以好得閒既,而家就......發下夢好啦.

多謝阿包送俾我既Jack電話繩!好靚~

返到公司,收到風老吳又發脾四,話阿嘉芙蓮做乜叫我出街,冇人幫手,搬死佢咁話喎.
咁辛苦咪唔好做囉,下下都就哂你咩......

收工返到屋企,又冇飯食.
夜D阿嬋打黎,原來一,三,五要打俾cell員架?真係唔記得左......
同佢傾左陣,都幾好可以同佢傾下偈,話哂大家cell員,點可以冇乜溝通.

最親密既三位戰友:阿亨,阿包,阿嬋-三位我最信任既弟兄姊妹.
多謝你地既支持!
我知我唔係孤單架啦!
我真係會努力架啦!

今次域少真係回魂啦,我真係feel到自己既三魂七魄返緊黎.
老虎就老虎,去馬!

>>May 19, 2004 at 2:47:45 AM GMT+8

2004 年 5 月 16 日 星期日 【晴】

今晚阿包打黎,幾surprised,自從佢要考A-Level之後我地就好耐冇傾過電話啦.
同佢講下報家員,成長,事奉之類既野,傾左好耐.
其實我唔係咁鍾意講電話既人,但同好朋友就可以講好耐囉.

好多謝阿包俾我既支持,仲有阿亨.
得啦!我會努力架啦!

>>May 19, 2004 at 2:33:48 AM GMT+8

2004 年 5 月 15 日 星期六 【晴】

今朝主日學遲到,自己拎黎衰......

主日學都係講弟兄姊妹相交,特別係合作既問題.
跟住食飯,因為導師助導全部唔o係度,所以同"吉伯利"合cell食飯.
今次專特行去黃大仙五十嵐食,行到出哂汗.
不過可以一大班人食飯都幾好既,又唔洗成日食吉之島咁悶啦.
食完行返新堂崇拜,又再行到身水身汗......

崇拜瞌眼訓,唔好意思......
跟住返舊堂cell靈修,都係瞌眼訓,唔好意思......
Polly同阿關仲係唔太知咩係分享,要好好教育下.

我要好好休息下,早D返屋企.

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
小如:
有相,但未必拎到,但段片遲D就一定會到我手,你等下啦.

>>May 19, 2004 at 2:27:40 AM GMT+8