2005 年 3 月 24 日 星期四 【晴】

今朝準時返到受難節崇拜,地獄五日終於結束.
呢幾日朝朝未夠六點就要起身,偏偏有好多野想做(或被迫要做),晚晚都唔可以早訓.
之前時間唔夠,好想爭取多D時間做自己野.
而家終於捱過左,反而乜野都冇心機做......

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
中大之行,鍾錦文部機既相終於到手......


唔知點解淨係得呢張相show到出黎......

>>March 25, 2005 at 1:26:06 PM GMT+8

2005 年 3 月 23 日 星期三 【晴】


http://www.nyrock.com/images/jewel3.jpg



http://www.jeweljk.com/images/jewel-spirit.jpg

Jewel,唯一一個我長期支持既英文女歌手.
自從第一隻碟大賣之後,人氣就好似一直咁下跌.
又難怪,處女碟"Pieces Of You"實在太成功,之後既作品一直都無法再超越.

有D人既命運就係咁,苦苦等待,就係為左一個機會.
當成功左之後,就好似已經用盡左一生既心力與運氣,之後就無以為繼......

>>March 25, 2005 at 12:41:51 PM GMT+8

2005 年 3 月 21 日 星期一 【晴】

呢兩晚加埋都訓唔夠四粒鐘,居然兩日都俾我返到受難節晨更,果然有目標先可以燃起鬥志.

琴日多馬cell既弟兄可能因為踢波既關係-全滅,得我同阿Sue返到.
今日阿Sue返唔到,輪到阮仔同凌鈺欣補上.
唔知聽朝又到邊隊代表出席呢?

一個唔小心,又講錯野,但最應該負責既人唔係我,都唔知好彩定唔好彩......

>>March 23, 2005 at 4:23:56 PM GMT+8

2005 年 3 月 20 日 星期日 【晴】

中大之行後感三篇：

一、

人與人之間的感情，是否要經過歲月的沉澱才夠味道呢？

我已不太記得，我的中學同學從前是怎麼的模樣，有的只是灰濛濛的斷影殘片，總之並不美好。
今天重逢，就像跟一群新相識的朋友在一起，充滿新鮮感。
本應覺得陌生，內心卻又泛起一股在我們之間從來未曾有過的親切感，竟似現在的我們才是真正的中學同學。
原來時間流逝所產生的微妙作用，真可將記憶中的污點淡化。

人家說，正因為舊同學少見面，也就沒有衝突，反能一直保持著一種沒有芥蒂的關係。
我還年少，與舊同學的關係還未真正經過歲月的考驗，不知彼此能維繫多久。

不過，這種真摯的感情，我總算感受過了。


二、

五年時間，在少年人身上可以發生多大轉變呢？

重逢中學同學，他們經過兩年預科，三年大學的生活，就似是脫胎換骨般。
不是說，完全變成另一個人。
我並不相信人的本質會輕易隨年月而改變，最少大部份人不會。
大概是，少了稚氣，多添了一份世故，尤其在談吐及衣著打扮上。
這也是理所當然的事吧。

看著他們，我的心情有點矛盾。
人會長大，無可避免要負起更多責任，與面對殘酷的世俗。
若不變得成熟，還保持著從前的自我中心，就難以在社會中生存。

然而，所謂的成熟世故，又真是那麼好嗎？
為了能適應這世俗，難免要遷就別人，但自我又在哪裡？
若為了生存而喪失自我，那生存又是為了甚麼？
沒有人希望被淹沒在茫茫人海中，但又有幾多人真正知道最重要的是甚麼？

我是信任自然的人，但總不能叫別人的想法跟我一樣吧。
看見中學同學的轉變，我祝願他們不要因生存而埋沒自我。


三、

中學同學們要大學畢業了，終於要離開校園，投身社會，踏上人生最漫長的階段。

在我們這些同學當中，我幾乎是最早投身社會的一個。
或許其中有些人正想著盡快離開校園，而我，卻很想重返校園。

看見正穿著大學畢業袍，正興高采烈的舊同學，我內心卻是感慨萬千。
慶幸他們終將畢業，向著光明的前途邁進。
同時，也勾起我未讀過大學的遺憾。
當中並無酸溜溜的感覺，有的是後悔、羨慕，與及少許擔憂。
畢竟我想進大學的目的不為就業，而是單純為滿足求知慾和一個適宜與人交流的環境。

跟他們談起，大家在這幾年中都有各自不同的經歷，當中也有很多遺憾。
還好，我們還年青，對未來仍懷著無限憧憬。

真箇日月如梭，轉眼我們都真正長大，將要向各自的方向發展，正正式式的各奔前程。
祝福我的中學同學們都有美好的前景，而我，也要繼續為自己的理想加倍努力。


Batavic de Lion

>>March 23, 2005 at 4:09:28 PM GMT+8

2005 年 3 月 19 日 星期六 【晴】

今朝繼續返到第一堂,不過基於心情唔太好,投入唔到.

崇拜完食饑饉餐,一個包,想餓死人咩?
今朝仲要唔記得食定野打底,失策.

同樣係中大既芳芳今日帶左袍返黎,成cell上左天台影相.
我都係第一次上新堂天台,個view好靚,感覺亦好開揚,好舒服.
影完相返落去做栽培,跟住去聽建堂捐,悶到爆,又眼訓喎.
好辛苦先捱完,去左美心食tea,跟住返舊堂搵少年團既弟兄姊妹打個招呼.
晏D去大快活搵郭立強佢地,又食過.

食完野冇野做去左公園玩UNO等踢波,馮敬業同常生輸左.
阿業罰左o係條梯度做掌上壓,阿陶就要o係馬路中間做掌上壓.
兩個都被影低左,型爆啦.

今晚叫左大佬黎踢,條友又係老樣子,好多野講.
唉,隊波好既就唔會叫你黎踢啦,算吧啦,咁緊張做咩.
好在佢都叫有表現,總叫冇叫錯佢黎踢.
今日轉左打前鋒,表現都唔係好,又唔慣踢咁前,但都俾我頂入一粒,終於開齋啦.
可惜,入左波之後就幾次埋門失機.
不過,總算叫有個好開始啦.

>>March 20, 2005 at 7:23:29 PM GMT+8

2005 年 3 月 18 日 星期五 【晴】

今日老細個咩仁愛基金會開張,但撞正班中大畢業既譚伯羽同學影畢業相,唔俾面一夠鐘就走.

約左Gary一齊搭火車入去,成兩點先去到紅磡火車站.
入到中大都兩點幾,點知D人都未到,車......

成三點先等齊人,去左鍾錦文hall度擺低D野.
佢竟然住神學生宿舍(神院),真係搞笑.
拎左鍾錦文隻大毛毛狗出去影相,隻公仔實在太好攬啦,唔捨得唔帶佢去遊中大.
中大真係幾大,環境又唔錯,幾清幽既.

數返我離開譚伯羽都有五年啦,見返好多好耐冇見既同學,特別係女同學.
仲有區致強同歐兆聰,佢兩個總算smart左喎.
連好難見到既林曉麗同梁雅雯都有出現,簡直奇跡.
大個左識打扮左啦,個個都靚過以前.
五年既轉變真係大,我out啦......

落左神院樓下草地影相,跟住去荷花池影相.
白痴既,今次講起先發覺原來有少少似屯門公園個所謂人工湖.
例牌景點,留左一陣就搭巴士上山頂.

架巴士竟然冇冷氣,仲要鬼咁逼人,好在未到夏天,唔係熱死.
上到山頂新亞度食tea,都算抵食啦,最特別係三蚊紅豆冰,簡直平霸.
食完去天人合一池度影相,o個度真係幾特別.
個池好似一塊鏡咁,後面就係吐露港,望埋去有少少海同池連埋一齊既感覺.
仲有個水塔,平時搭火車時見得多,近望時先知原來纏左好多躝藤,仲靚.

又影左一炸相,趁天未黑哂落返去本部大樓影大合照.
死人Gary同迪利一路o係度調情,雖則我冇所謂,但對話內容確實係肉麻既.
跟住Gary條賤人仲講起我中學時代既情史,第一個例牌係講華華啦.
我超爆無奈囉,對華華冇哂feel九年啦,仲講黎做咩......
之後越講越大鑊,講埋何珮珊同曾一平.
唉,陳年舊事仲講,以前對兒女私情邊有諗得咁通透丫.
不過我都大方承認左係有鍾意過佢地,畢竟過左咁耐既事,怕咩講.

影埋本部,個個都走哂,剩返七個人去canteen食飯.
五個送加埋一人都唔洗廿皮,洗唔洗咁平.
鍾錦文仲開埋支所謂無酒精成份香檳既有氣蘋果汁黎飲,陣酒味又整得幾似喎.

食完飯各自走人,我自己一條友搭車返屯門.
有少少落寞,仲好累,一上車就訓著左......

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
去年十一月十四日寫過一篇隨筆，以下的是經修改過的版本。

我選用了自己最不熟悉的新詩形式去寫，簡直是獻醜之作……



繼續旅途



三年　我沒有抓緊這三年
它便輕輕溜走
生命的流動如此無聲無息　卻又如此實在

我並不以為自己要改變
但我也沒有堅持不變的理由

我選擇離開
這個容許我編織最後一個少年夢的莊園

連最後的憑証都捨棄
我的少年便離我而去

我沒多大感覺
心
如小草　微風輕拂　稍稍擺動
難不成我從此就要變得成熟吧

你說　只是短暫的離開
你引用別人的論調
離開　是為了回來

我如此軟弱
真會有堅強的可能嗎
你默然無語
你從不對我說　你一定可以

我們再沒說話　我們都太好人
寧願　不說話

我看著你
你稍微側頭　凝望別處
擺出一個不容我接近的姿勢

困惑的感覺　

如苦水　滲進心頭
如困在霧中　兩處茫茫
如身處孤舟　隨水漂流
天涯小島　可望而不可達

我不得不走　反正
你亦沒等我凱旋歸來的必要

我是雄獅　輕蔑百獸
但我不會飛
老鷹之傲視天下非我所能及

我遊遍草原　只求在地上
一個最終的歸宿

Batavic de Lion

>>March 20, 2005 at 6:27:47 PM GMT+8

2005 年 3 月 17 日 星期四 【晴】

今朝返工竟然漏左個銀包o係屋企,仲要上到車先知,俾人一野車左出九龍.
反正今晚春茗都唔想去,索性請日假唔洗煩.

去到美孚本來諗住問途人借錢返屋企,諗諗下又冇咁做.
反正好耐都未試過都市漫遊,索性漫步九龍.
一路上都揀人少既街黎行,比較輕鬆,唔洗同人逼,沿路環境又樸實D啦.
卒之由美孚行到去九龍塘,足足行過左五個地鐵站,前後都唔洗個半鐘.
今日天氣都清涼,所以行咁遠都唔覺得辛苦.

最後去City恆生搵百成,同佢借左少少錢搭車返屋企.
走時見到阿包一支箭咁行,怕且佢都係遲到,費事嗌佢.

下晝終於的起心肝去換回鄉証,影幾張相填張form就洗左我四舊水,仲要等三個禮拜先有得拎,搵笨既.

夜晚返培靈,俾凌鈺欣呃左,佢又話返培靈,都冇返到.
好在今次有阿Sue返,唔洗得我自己一個.
食埋飯返到屋企,好累囉......

>>March 20, 2005 at 5:07:13 PM GMT+8

2005 年 3 月 16 日 星期三 【晴】

域少又講女人:



http://www.vanilla-ninja.de/gallery/0616_b.jpg


最近因為打鼓機既關係,留意到一隊女子band,叫"Vanilla Ninja".
玩既都係普普通通既pop-rock,不過我偏偏又對全女班既band情有獨鍾喎,覺得好型.
如果問我,點解又唔鍾意Avril Lavigne?
咁我又答唔到喎,又真係唔知點解會唔多鍾意.
四個之中,我最鍾意既係keyboard既Katrin Siska.



http://www.vanilla-ninja.de/band/katrin_2.jpg


又係唔知點解會鍾意,可能個感覺比較cool卦.

>>March 18, 2005 at 4:05:00 AM GMT+8

2005 年 3 月 14 日 星期一 【晴】

今日開cell,玩圖畫版有口難言.
常生一個"黑肉斷腸歌之砌生豬肉",以為好難估,點知十秒唔夠就俾我破左,廢......
最癲係大家冇野做,o係45號房度踢波,玩到身水身汗.
完左去椰林閣食飯,附加節目就係睇大長今.

其實今晚係幾好,唯獨我心情唔好.
突然諗起自己咁大個人,好似都未試過好好咁做過一件事,好落寞.

到底,人生最重要係咩呢?
對父母黎講,最重要既事可能就係養大我地三兄弟,維持呢個家.
咁對我黎講,最重要又係咩呢?

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
再得不到更多,我便將會失去一切......

Batavic de Lion

>>March 15, 2005 at 5:44:02 PM GMT+8

2005 年 3 月 12 日 星期六 【晴】

今朝鬧鐘竟然唔響,好彩七點三識自動彈起身,返到第一堂.
今日又係伍山河講道,講以利沙同乃縵,叫我地唔好單純以個人喜好行事.

崇拜完cell唔上祈禱會,去左大滿貫食飯.
食完飯cell上祈禱房一齊祈禱,跪到腳痺......

跟住做栽培,勁俾人問,勁俾人challenge,激發起我既"自大小宇宙",本來沉寂既查經氣氛當堂醒哂.
不過話說回來,我既聖經知識又的確唔夠,否則點會俾人challenge到.
查完經去M記食野,遇著班紅十字會,搞到鬼咁難搵位.
本來支持去乞兒島既常生好唔高興,哈哈,算吧啦~

>>March 15, 2005 at 4:32:35 PM GMT+8