2005 年 2 月 19 日 星期六 【晴】

今朝返崇拜時塞左一陣車,好耐都未試過跑返新堂,好在都俾我趕得到.
伍山河今日名為証道,實為呼召,有少少俾佢振奮到添.

跟住祈禱會我都冇釣魚,生理時鐘睇黎已經適應左青年團既生活.
但係最難過既一關我始終仲未克服到,食完飯查經真係好難唔釣魚啦......

食完飯行返新堂時,有人問我幾時到我做司事,咪即係問我幾時升家員.
最怕人咁問我,唔好玩我啦......

晏晝查完經,走左去配con,跟住冇野做過舊堂,見到生命競步頒緊獎.
老姜,發仔,光頭都黎左,又見返一堆熟悉既面孔.
同書蟲講左少少關於去台灣既野,佢話五千蚊已經好夠用,同我心目中既預算差唔多.
講完唔多留就走左,費事阻住佢地.

至於夜晚以裁對史提反,真係唔好提啦,俾人數,我既表現就更加不值一晒.

>>February 22, 2005 at 3:32:43 PM GMT+8

2005 年 2 月 16 日 星期三 【晴】

今日無無聊聊,拎返The Corrs隻In Blue出黎聽.


http://images.amazon.com/images/P/B00004U5AJ.01._SCLZZZZZZZ_.jpg

聽返先發覺,原來首首歌既旋律我都有印象.
易上口既歌係比較易記,但亦都容易忘記,所以我有印象係唔慣pop事.
最重要係我買呢隻碟時係二零零二年,正值我既青春最旺盛既時候(?).
記得o個年係自修會考,又冇返工,每日都好得閒.
唔係聽歌就上網,再唔係就打機,生活勁悠閒.
每日都有用唔完既精力咁,但又唔會做正經野,成日都半夜三更傾電話.

咁既生活維持左無幾耐就完左,之後就要搵工.
好懷念o個個青春既火紅時代,乜都好簡單,乜都唔洗點諗.

之後我既青春就好似一點一滴咁流失,開始否定以前既生活,越黎越追求所謂既"成熟".
到而家,一切俱往矣.
環境唔同左,心態唔同左,當時既人亦都唔同哂.

少年既"懷疑與摸索"要到少年時代既末期先出現,其實唔係好事.
以前有時間,有精力時冇去諗,而家好多疑問都因為要生活(工作)而不了了之.

忽然發覺,原來我都幾鍾意向後望.

>>February 17, 2005 at 3:11:43 PM GMT+8

2005 年 2 月 13 日 星期日 【晴】

今朝o係阿陶屋企訓到成十二點先起身,同郭立強操左兩鋪機就走.
噢......歡樂周末咁就完左,又要等成個禮拜先有得再聚埋一齊囉......

原來今日係情人節,直到臨訓一刻我都仲未記得.
不過記唔記得都一樣啦,都唔關我事.

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
我唔可以否認,我係幾鍾意多馬cell.

雖然我曾經講過我唔鍾意升團,但而家既環境比起少年團確實係較適合我.
新cell的確可以令我重新活躍起黎,我竟然真係搵得返初初返教會既感覺.
好想同cell員傾偈,好期待每個禮拜既聚會,唔再死氣沉沉.

我知咁講好似會對唔住伯利恆既弟兄姊妹,但我唔鍾意講大話.
或者我少年團時真係冇乜好好好深刻既經歷,亦因為咁我冇乜心理包袱.

年齡既障礙......

而家升左團原來咁快就個幾月,唔單止我,連郭立強都話唔覺時間過得咁快.
一個半推半就既決定,帶黎一班好cell員,係神既旨意?
所有野黎得太順利,黎得太理所當然,令我自己都唔敢肯定到底係唔係神既安排.

幸運?合該如此?

今年仲有十個幾月時間,黎到第四年,升家員仍然係我既首要目標.
到而家都未達成目標,會唔會太慢?
老實講,三年黎既折騰,我既信心剩返唔係幾多.
咩雄心壯志,已經講到我驚,都冇次得既.
忽然又諗返起"道",饑來即食,倦來即寐......唔好想得太多.

成熟?

唔係唔再在乎,只係怕再一次講完出黎又做唔到.

>>February 16, 2005 at 1:29:29 PM GMT+8

2005 年 2 月 12 日 星期六 【晴】

琴晚成一點先訓,今朝又要八點三出門口,好在俾我趕得到班車.

今日到郭立強失手返唔到啦,呵呵.
崇拜完到cell祈禱會,升團之後都好耐未試過大家一齊為其他cell員祈禱,感覺都OK.

晏晝成cell落左九龍城鋸扒,講起返大陸時好鬼興奮.
最搞笑係麗妍好似好熟咁話大陸夜晚"tum骨"可以包埋過夜,真係俾個位我串佢o者.

食完飯幾條仔就上阮仔屋企打Winning 8,玩到冇野好玩四條友fix死一個球員黎玩,勁搞野.
打到六點鐘又返聯合道踢波,今日表現叫好左D,但都仲係踢得唔好,仲失左兩球波.
唔識講,總之有冇我o係度以裁都唔會贏到以馬,真係要研究下到底有咩問題.
好在臨尾都叫黎過一次引球推進,又參與策動左一次快攻,叫做加返0.5分啦.

踢完波已經好累,郭立強竟然仲叫我同阮仔上常瀚陶屋企繼續打機.
阮仔要返一返屋企,所以我同郭立強行先.
同佢o係車度傾左陣偈,佢叫我快D報家員,可能因為我係cell入邊表現最活躍既新人卦.
都唔係唔想報,但......戒甩條煙癮先啦......

上到阿陶屋企又打機,經過連續兩日既操勞,我條能源真係渣到盡哂.
打左幾場,實在太眼訓,一路神智不清咁捱住黎打.
到零晨五點終於宣佈投降,撻落床就訓......

>>February 15, 2005 at 8:40:35 AM GMT+8

2005 年 2 月 11 日 星期五 【晴】

原來新年假都唔係想像中咁過癮,日子好似好漫長咁.
冇乜野做,每日都好早訓.

今日多馬cell約左出黎踩單車,十二點半落到大圍火車站,見到Glover,Ronnie同佢細佬阿峰三個咁大把.
Ronnie話阮仔十二點四先o係屋企起身,無言.
執埋文浩同凌鈺欣,跟住去M記等埋郭立強同常瀚陶.
本來話阿Sue會黎,最後都係冇黎.

食完野過去租單車,三十蚊日,咁鬼平.
試車時阮仔終於到左,終於齊人出發.
今日既目標係大尾篤,但未出到沙田已經唔妥,原來Ronnie既體力唔係好得.
踩下停下咁,成三點先到馬料水,Glover話要放棄大尾篤,失望,仲諗住o係大壩飛馳一次添.
俾班友仔又迫又界,我避人就得o者,咁玩就真係俾佢地烚到,可惡......

最後踩到差唔多到大埔,Ronnie實在唔係咁得,要大抖.
我地幾條友踩遠少少到廣福,算係成功到達大埔,跟住就回頭返沙田囉.
臨到沙田既路邊有架船泊o係路邊,常瀚陶起左個幾頂癮既名,叫"補給船".
上船邊食野邊等大墮後既......都係唔講邊個啦,呵呵.
坐夠就繼續回程,今次取道第一城,好悠閒咁踩到返大圍.

等齊人就各自各返歸,得我一條友去坐火車.
咁大個仔先第一次踩沙田,感覺比想像中辛苦,但難度比想像中低.

一個人落左又一城,去fcuk買左件紅色外套,再去agnes b.買左個袋,最後去Godiva買左盒朱古力.
行完已經爆累,仲要上Katina屋企,真係唔多想去,但佢一年一次生日,算啦.

上到去都成十點,馮家穎,林敬偉,羅浩倫,鄺錦恩都o係度,無無聊聊咁傾左陣偈就返屋企.
累死,機都唔打就訓覺,聽朝仲要九點鐘崇拜......

>>February 15, 2005 at 1:43:26 AM GMT+8

2005 年 2 月 7 日 星期一 【晴】

今日睇左"天下無賊",唔算太悶,但亦講唔上精彩.
記得一句,大概係:
"就係因為佢單純,就可以唔受傷害?憑咩!"

就係呢句,更加堅定左我既諗法.
唔再保護你,係因為我重視你.
希望你可以獨立,學識獨自面對呢個世界.
其他人仍然要保護你,我唔可以阻止,但我就唔想你再困o係溫室入面.

>>February 8, 2005 at 4:19:49 PM GMT+8

2005 年 2 月 6 日 星期日 【晴】

琴晚踢完波,無限體力踢法既副作用發作,訓醒對腳勁酸痛,仲要返工,冇人性架......

晏晝出旺角入紙時買左兩隻碟,一隻係Love Psychedelico既精選.
自從買左呢隊組合既第一隻碟之後都冇再買,不過佢地俾我印象幾好,出左精選就買啦.
冇聽一排,風格仍然係咁爽,心情好時拎黎聽下都唔錯.

另一隻係"The Nunber One Jazz Album",好少聽Jazz,買隻精選當係入門啦.

對於音樂,我既接受能力都唔錯,好多種類都接受得到.
遺憾既係,到而家我仲未可以的起心肝學一種樂器.

>>February 8, 2005 at 6:32:03 AM GMT+8

2005 年 2 月 5 日 星期六 【晴】

一不離二,今朝又成功返到第一堂崇拜.
精神咁過左崇拜,但到祈禱會就即刻死哂.

食完飯就返新堂栽培,諗自己十個優點同十個缺點原來唔係咁易.
栽完之後成cell一齊玩細路女,都真係幾惡搞.
本來諗住五點鐘鬆人,俾班麻甩仔講幾講,決定夜晚去踢波.

未夠鐘五條仔又玩大話UNO,人少原來好難玩,俾郭立強連勝三場.
夜晚踢波,狀態唔好,加上適應唔到佢地既踢法,冇乜好表現.

踩到成十點鐘先散場,散哂,聽朝仲要返工......

>>February 7, 2005 at 2:45:59 PM GMT+8

2005 年 1 月 31 日 星期一 【晴】

正所謂讀萬卷書不如行萬里路,都唔明D人點解有錢都唔諗下去旅行.
今日公司出左成皮野獎金俾我,而家舊錢真係去歐洲都仲得.
不過都唔會去咁遠囉,籌算下點樣用呢筆錢仲好啦.

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
忽然發覺自己間唔中就會無意中走在潮流前頭:

牛仔褲興淺色之前我已經著緊,未興窄腳時我又係一早已經著緊.
未興迷彩同軍事feel時,我已經好鍾意軍look.
未興紅白配搭時,我已經鍾意咁樣配襯.
未興綠色時,我已經著到成身青BB.
抓毛衫未興,我已經成日著.
周杰倫未大紅時,我已經睇好佢,紅左之後反而唔鍾意.
全球hip hop熱潮未開始,LMF未組成,我已經開始留意hip hop.

經過咁耐就發覺,潮流係唔洗跟既.
你只要保持一貫自我,唔好理人點睇,總有一日潮流會自己"撞"埋黎.
品味既野最緊要係自己發掘,而唔係跟風.

潮流呢家野,搵笨既,傻仔先會趕潮流.

>>February 1, 2005 at 5:45:53 PM GMT+8

2005 年 1 月 29 日 星期六 【晴】

今日係以裁旅行,如果返唔到第一堂就要返晚堂.
七點鐘起身,上左陣網就拿拿臨沖涼換衫出門口.
終於俾我趕得切返第一堂崇拜,係踏入二零零五年既第一次.

今日旅行細佬,Glover,Ronnie,Aly,麗妍都唔去,文浩條死仔又遲到,好在中堅分子大部份都仲o係度.
好死氣沉沉既崇拜,無論主席,獻詩,會眾,就連証道都係.
連我自己想唱大聲D都有心無力,太早未開聲.
終於完左,成班去M記買個早餐,跟住就上車食.

車上面例牌又嘈生哂,為左杯朱古力都可以嘈一大餐,不過真係幾好笑.
同凌鈺欣講左陣學音樂既野,又燃起我想學樂器既衝動.
架車好快就到,原來去大欖涌BBQ.
個場冇乜野玩既,不過cell一齊燒野食同傾偈嘻嘻哈哈已經夠愉快.

晏晝大圍玩遊戲,又係意料中無無聊聊,不過大家夠癲,氣氛搭救.
玩完成班麻甩仔求其搭幾張凳做龍門黎踢波,哎呀,失機頻頻.

五點鐘就散band,冇理由出返樂富再返屯門,幾條友自己搭車返屯門.
呢D日子雖然o係信仰上冇乜造就,但好易過,個人唔會諗咁多野.

>>January 30, 2005 at 12:27:10 PM GMT+8