2005 年 4 月 26 日 星期二 【暴雨】

自從過年之後，餓波餓o左兩個幾月，今日終於正式復出
好耐冇踢，預計唔會有十足狀態，要靠不斷比賽重新操起
09:20去到沙咀道，好多考哂o既人，仲有個未考o既蕭邦

先同一大班o靚仔鬥波，我o地贏身型，不過佔唔到優勢
反而人o地足足打多我o地四個(12打8)，成日輸唔夠人回防
完全明白卡斯拿斯o個種孤立無援o既感覺，一個對人幾個
前面不停咁入，後面不停咁失，唔記得最後比數幾比幾

胡寅君o的速度快o左，射門技術又強o左，越o黎越難對付
鰻魚o既踢法有o的似列基美，而輝哥就一直都係文尼治
正式o既鬥波，輝哥離門30碼射o左球世界波，文尼治級數
但係對手o個個裝修佬擅於派牌，根本守唔住對手快速切入
o個兩個o靚仔又行行企企，攻守都冇份，即係打少兩個
結果俾人攻入o左四五球，多數都係俾人圍攻，做箭靶

F.6理科走哂出o黎踢波，冇場，被迫遷，返學校cover吹水
差o的出事，好彩收到口，俾人聽到o的人所共知o既事就大鑊
打一陣籃球，已經退化到完全冇哂任何手感，頂多防守 + 單擋
有冇下半場？最後冇下文，各有各返屋企，冇陪肥鵬佢o地lunch

晏晝一支公打機，問表弟借PS 2返屋企玩 + 幫WE 8 LE更新info
搵利物浦挑戰車仔，巴路士偷雞成功，不過上半場未完就被超前
英德大戰，奧雲兩度突襲得手，o個對中場中路組合o既攻守好強
車仔鬥拜仁，洛賓o係左路幾次成功硬闖o架，可惜次次都功虧一簣
諗住上o黎玩？我星期六就要還返部機俾表弟，諗都唔使諗！

>>April 27, 2005 at 2:48:04 PM GMT+8

2005 年 4 月 25 日 星期一 【晴】

幾個月前仲以為AL時間表o岩o岩好，考完趕得切睇英超最後沖廁
諗住最後幾週，爭冠軍爭到頭崩額裂，點知咁快已經99.99%分出勝負
不過又唔係完全冇o野睇，各隊有各隊o既目標，總唔會完全冇睇頭

未見過咁混亂o既護級形勢，可能到最後一週都未有球隊肯定降班
理論上曼聯、阿仙奴仍然可以爭亞軍，不過睇o黎曼聯志不在此
愛華頓、利物浦爭第四，個人意願希望見到多o的中型班進軍歐聯
計埋爭足協盃席位，足足有差不多10隊仲有o野爭，點會冇睇頭？

泰利壓倒隊友林柏特率先贏得今季o既球員先生，實至名歸
英超最佳陣容，車仔獨佔o左四席，足見車仔君臨天下o既氣勢
如果要搞個英超頒獎禮，原來大部分獎項都落入車仔手中

最佳球員：林柏特(車路士)
唔需要多講，億萬大軍o既核心人物始終都係佢，由佢串連起全隊
全季保持穩定狀態，瞻前顧後，車仔進攻o既起點，亦係攻勢o既結束者
後上射門o既功架冠絕英超，太搶鏡，partly explain why我件英格蘭印佢個名

最佳門將：施治(車路士)
第一季踢英超就有咁高水平o既穩定演出，很難令人相信佢仲未夠23歲
一班高質後衛幫手將車仔o既後半場守得滴水不漏，或多或少都幫佢一把
但係佢身高手長、出迎時間準、淡定、甚少犯大錯，的確有佢過人之處

最佳後衛：泰利(車路士)
球員先生o既榮譽足以解釋佢今季鎮守車仔後場o既高水準表現
位置感、包抄、頭搥技術、助攻力，全部都係英超甚至世界第一流
車仔防守固若金湯，中前場自然更放膽搶攻，呢個就係防守o既重要性
佢利用「角球單擋」接應傳中後上攻門，幾次幫車仔力挽狂瀾

最佳中場：林柏特(車路士)、謝拉特(利物浦)
一對英格蘭中場中路組合，難分高下，索性兩個平分呢個獎
林柏特o既表現有目共睹，英超入球能力最強o既中場之一
謝拉特o係利物浦o既地位就更高，講唔上一人球隊，但係冇佢唔得
下季可能仍然會係最佳中場，不過會唔會兩個都代表同一隊領獎？

最佳前鋒：安德魯莊遜(水晶宮)
如果單計入球數字，亨利當然最掂，不過前鋒唔應該只講呢o的
講o既係前鋒o既入球對球隊成敗o既重要性，AJ肯定o係亨利之上
如果冇AJ射入20球，水晶宮可能依家已經篤定降班，點會排尾四？
全季不停o係前場奔跑，接應隊友o既長傳突擊，肩負全隊o既入球重任
阿仙奴冇亨利都有取勝機會，但係水晶宮冇AJ即係等俾人狂數

(to be continued.....)

Re pang : >o<
Re大蘋果：當時成個TVB鏡頭打橫掃過o黎，想唔全世界入哂鏡都幾難
Re fat : 其實我依家係超得閒o架，日日都係打機，等你o地call喳

>>April 26, 2005 at 3:15:23 PM GMT+8

2005 年 4 月 24 日 星期日 【晴】

經過o尋日，其實仲有o的意猶未盡，想繼續講，不過都係算
照佢o既邏輯，對住電視內o既某人嗌「你去死啦」，都犯o左謀殺
o尋日都總算影o左o的相，不過我明白下次唔會再影，顧及身份

唔開心o既事唔應該再提，唔應該提起o的掃興事，不過都分享下
《好好考試》(改自《好好戀愛》)
主唱：考生 + E.A.

考生:大概知今年死傷數字無從計
有賴你替我炮製那速讀試題
　　　誰亦被用來祀祭 位位都揀錯題
　　　看看策劃那位　極度擅於詭計

E.A.: 在策劃　讓你死得淒慘最後才能會
出年考多次 任何人等　
休想得分太易　我要你答錯話咁易

考生：完了吧　如無意外　
難得陰招出得多「可愛」
最後無人安全保命　人人考完痴呆　
有賴你地存在

E.A.：完了吧　無人撐起來　
全數亦像被狠心痛宰
挫敗人們總是輕易
然而怎能只得你在
自己另行覓尋大專的接載
( 呢句有高人指點過,掂爆!!)


考生：地理卷應該拎走　再別留餘興
　　 化學卻去到最遠　也只是四成
　　　純數亦但求亂証　中史死得有型
　　　U.E.被痛擊　插中我的死症

E.A.：是你笨　就算慘遭E.A.殺害仍無法
分清我心意 任何文章　
數不清的錯字
我要殺退你話咁易
（考生：你要我答錯話咁易）

考生： 完了吧 如無意外
（E.A.：早該放開　不要感慨）

　　　 難得陰招出得多「可愛」
（E.A.：祈求你復活不來）

最後無人安全保命　人人考完痴呆
　　　 有賴你地存在（E.A.：有賴我地存在）

E.A.： 完了吧 無人撐起來
（考生：應該放開　雖有感慨）

　　　全數亦像被狠心痛宰
（考生：期望你能夠死開）

挫敗人們總是輕易　
然而假如不止你在　（考生：只得我在）
你可願仍逗留在不跳海
（考生：再不願盲目留在想跳海）

考生：轉晒了 舊有的卷不能覆蓋
E.A.： 新卷的形式可一卻不可再
合唱：你(我)用心考試
日後亦沒辦法精彩 =.=

考生： 完了吧　如無意外　
曾失手的都應該釘蓋
E.A.： 最後人人可能炒零 常常猜疑將來

合唱： 有賴我(你)地存在　
完了吧　無人撐起來　
全數亦像被狠心痛宰
挫敗人們總是輕易　
然而怎能只得你(我)在
自己另行覓尋大專的接載

Re Jason:睇o黎你都有思覺失調，祝你身體健康XDDDDD

>>April 25, 2005 at 4:01:22 PM GMT+8

2005 年 4 月 23 日 星期六 【酷熱】

人數多寡並唔重要，因為民意根本唔係法治o既一部分
我o地仍然堅持原則，絕不容許政治權宜破壞法治精神
任期問題根本唔存在，更加冇o野需要搵人大「解釋」

集會15:00開始o係遮打花園開始，14:15已經去到會場
見到SSU相當顯眼o既橙色banner，但係完全唔見人
o係會場呆企o左好耐，越o黎越多人，終於有識o既人

太好，Billy衰極速清哂o的功課，趕到o黎，仲有Derek
不過SSU前後加埋都不過得五條人，冇法，個個都忙
集會開始，SSU坐o係台前，無可避免會吸引好多傳媒
兩個副主席都在場，要採訪搵佢o地，不過都俾RTHK問兩句

出發，隊伍較前o既位置，後面係前線，見到劉惠卿、陶君行
路線同上年唔同，o係遮打花園德輔道中門口出，直入皇后大道中
同後面o既陶君行吹水 + 波經，佢o既初中成績原來都好差……

拎住塊banner通街行，目的之一的確係要吸引傳媒訪問變相宣傳
TVB遞咪，交個波俾Billy衰，相關新聞片段中最靚仔o個個就係佢！
沿途唔少人拎camara影遊行隊伍，本地人西方人都有，仲有日本人
撞見Kit、耶穌、震音，不過太多人，相見不相識，各有自己o既duty

大概17:30終於去到西環o既中聯辦o既後門，落o左閘 + 警察守門口
大隊o係o個度解散，不過冇即刻就離場，雖然人少少，點都影張團體相

捱義氣keep大聲公，下星期日另一個主題o既遊行拎返出o黎
追巴士，聽到車上有人投訴遊行阻街，其實都預o左有人唔鍾意
新開o既擔擔麵館，唔錯，o的麵o係我o地面前用人手拉出o黎

有記者問Billy衰：「人大已經釋o左法，再遊行會唔會冇意思？」
佢o既意見當然精闢獨到，請容許我o係佢o既言論上再作補充：
「我o地絕對唔係為某種目的而做事，我o地只係為原則做事！」
之前諗到o的banner口號，玩含蓄，自問覺得唔算太差……

1.人大釋法，只知禮義……
2.為求目的就可不擇手段？小心教壞下一代！

Re pang : 死咯，會唔會連o個三個都話冇o黎過我屋企？

P.S.原來犯o左少少錯，可能會影響SSU形象，鄭重致歉

>>April 24, 2005 at 2:15:57 PM GMT+8

2005 年 4 月 22 日 星期五 【晴】

考完試o既第一個外出節目係……去和合石拜山
好彩，警察唔封路，搭的士可以直上山頂，幾乎唔使行
總算風和日麗，有o的風，曬太陽都唔覺得好熱

和合石比往年少人，上年通山都係人，行車路都迫爆
粉嶺車站對面o既商場廣告：「全新吉野家，將於10月24日開幕！」
搭火車，又有一大班冇品o既人，全車得你o地幾個咩？

Re hei : 你想我買佢o既拍檔？
Re豬紅：見鬼咯，咁當時邊個上過我屋企？
　　　　你都就快收工啦，仲有Physics喳嘛
Re挺：好～～

>>April 23, 2005 at 3:37:08 PM GMT+8

2005 年 4 月 21 日 星期四 【酷熱】

捱o左咁耐，受o左咁耐折磨，吃o左咁多苦頭，都係為今日
由F.6開學起計，今日係第600日，終於捱過呢漫長o既600日
要向Billy say sorry先，計過數就知，只係慈o左14400小時左右

最後一站係英華，要去西鐵站o個邊，朝早o既702好多小學生
好大間英華，因為包括哂中小學，感覺上似國際學校多過普通學校
又要坐到咁前？連主考官都唔可以一眼望到o既大鐘又係好斜

嘩！！！！Lim Sir中o左兩條治亂！大鑊，清代DBQ毫無心理準備！
制度 + 思想都中o的唔中o的，答唔著煲到最癲o個瓣，總好過唔識
又係俾制度史累死，花o左太多時間，最後得半個夠拆o個條DBQ
老莊唔係唔識，不過我最熟孔孟嘛，總算答到o的似樣o既material
次序係12, 8, 2, 1題，用o左43 + 56 + 45 + 餘下時間，中間o個題太耐

盡量唔好再諗，免得影響之後o既作戰情緒，求其搵地方lunch
爸爸話富昌村多o野食，我唔敢話錯，不過我唔會食$28燒味雙拼
返英華，鎖門口？o係太陽底下曝曬10分鐘先有看更走o黎開門

再入戰場，最後的戰役！戰鬥埋呢三個鐘，一切就會完結！
大檸樂，張騫班超居然唔出大題目，焗住要揀唔熟o既鄭和！
點解史記要註明係通史？我係強詞奪理咁試圖扭曲「出題原意」
要扣緊「耶穌會」呢三隻字，應該唔可以就咁寫傳教士this and that
今次o既時間分配係42 + 48 + 44 + 餘下時間，次序係5, 7, 12, 1

早o左三分鐘做哂全份卷(有o的提早半粒鐘走)，就係等你呢句！
「根據禮堂o既大鐘，依家時間係四點三十分，考試終結，立即停筆」
完o左喇，終於都完喇，真真正正完結喇，除o左oral考哂所有科喇

撫心自問，我已經盡o左最大努力去考好每一份卷，絕冇馬虎
就算最後成績真係未如理想，我無愧於心，我已經當自己贏o左！
得又好，唔得都好，我夠膽講句"I have done all I can do, without any regrets"

考完，即刻撲出旺角，邊煲粥邊行去巴士站，搭701好快就出到旺角
事前經過查證，新英格蘭主場連字$499已經最平，去返上次o個間
俾o左錢，拎o左收據，要等一粒鐘，等佢o地新鮮燙字，點打發好？

麥花臣好似有好o野睇，原來係全港小型足球錦標賽，今日踢決賽
藍衫 vs 螢光綠衫，藍衫o既前鋒超似朗拿度……我指身型
去到已經開o左波好耐，藍衫多攻勢，不過捉到鹿唔識脫角
螢光綠捱打居多，但係反擊好致命，我睇到佢o地已經射入兩球
最後似乎都係螢光綠贏o左，不過唔清楚比數，冇人講比數

等o左好耐o既英格蘭主場 #8 Lampard終於到手，好辛苦儲錢o架
好耐先有車，迫巴士返屋企，o的人塞哂o係落車門附近，後面大把位！
企o係個位隔離，又唔係要坐落去；企o係車門前面，又唔係下個站落
香港人質素高？以前我好天真咁相信，依家我都不過係半信半疑

漫長漫長o既暑假，點打發好？呢方面真係要慢慢諗清楚
打機 + K + camp + 踢波當然唔少得，仲有youth conference唔好忘記我！

Re pang : 冇記錯至少有陳耀邦、何沛池、豬紅、黃慧光，其他就唔記得
我記得當時主要係打FIFA 98所以我估你當時應該都會在場……
Re fat : er....有人係考完ue等中史囉，你不如鬧佢啦，其實我都唔見得熟
Re Tracy : 問題係明明要讀，又好似呢o的已經讀o左，但係又唔讀唔得
Re大蘋果：終於鬆一口氣喇～～～～～

>>April 22, 2005 at 4:32:48 PM GMT+8

2005 年 4 月 20 日 星期三 【晴】

好彩仲有最後一關未過，o尋晚決定唔睇波，呢個決定絕對正確
簡直不知所謂，輸波唔緊要，連風度都輸埋，打o左pat乜o野出o黎？

明明有三日時間準備中史，不過又好似要讀o既早已經讀哂
其實唔係好驚唔記得o的料，最怕出埋o的唔知乜o野題目
點都好，已經見到個碼頭，仲有乜o野好怕？過埋聽日就大解放！
球證睇緊錶，最後o既角球攻勢，全隊11個上哂去，放棄防守！

Re pang:咁小學畢業o個陣殺上o黎o個成村人係……
Re希：又可能係我讀到神智不清，所以撞聾o掛
　　　仲有唔夠18個鐘，之後我就會睇歐聯、超聯……唔睇曼聯
Re大蘋果：佢到依家都仲保持緘默，睇o黎星期日會見到佢

>>April 21, 2005 at 2:51:56 PM GMT+8

2005 年 4 月 19 日 星期二 【晴】

o尋晚睇TVB晚間新聞，報導沉默遊行，鏡頭內好似見到Step
唔知係咪佢，呢個人塊面比Step圓，甚至可以話係發水麵包……
呢個人企o係HKU法律學院banner後面，更加令我覺得好似係佢

全力為煞科日備戰，當正後日係西布朗vs修咸頓英超第38週
對住大大疊notes感到老鼠拉龜，有o的似策動曼聯o既攻勢
最怕治亂史會唔知出乜題目，又驚HKEAA失驚無神叫我比較儒法
點都好，唔諗得咁多，放開懷抱咁打埋最後呢場，心無牽掛

已經又有成村人得到解放，可能因為有人太亢奮，搞到我認錯佢把聲
有乜好炫耀？由中六開學計到考完，我不過係比呢班人花多長0.33%時間
點都好，咁辛苦終於掃低哂所有乞人憎o既障礙，總算係一種……解脫？

今日真正考完o既有：小妹 + 希 + 思穎 + Judy
當正自己已經考完o既：Leo (如有錯，請當面指正)

Re pang: ??????????我直腸直肚o者

>>April 20, 2005 at 2:21:14 PM GMT+8

2005 年 4 月 18 日 星期一 【晴】

最近我經常都專登寫得隱晦o的，聽得明o既人自然明白
決定開門見山，唔再轉彎抹角，依家就有乜講乜

毫無疑問，《基本法》清楚訂明行政長官o既任期係五年
就算有特官中途離職，替任人o既任期都應該係完整o既五年
可惜，特區政府已經打算就任期問題再度提請人大釋法
夾硬將清晰o既條文講成「新的行政長官任期係上任離職後o既餘下部分」

首先，由立法機關解釋由自己通過o既法律，本身已經唔妥當
更重要o既係，清楚不過o既法律竟然要因應一時o既政治需要而扭曲
回歸不過短短八年，已經第三次要由人大重新解釋《基本法》條文
特區前後三次提請人大釋法，一次比一次對法治構成更嚴重o既打擊

香港近百年之所以享受如此經濟成果，除o左港人o既拼博精神，仲有法治
獨立o既司法機關負責執行法律，唔受政府或其他力量干擾，保護市民o既權利
但係特區政府要求人大釋法，試圖繞過法庭造成既定事實，一錘定音

親中人士三番四次批評香港人唔尊重《基本法》，唔了解《基本法》
但係佢o地自己都唔尊重《基本法》，又有何資格要求我o地尊重？
將中央o既政治決定凌駕於法律條文之上，先係最唔尊重《基本法》

如果完全唔考慮法律，單從政治效果，我的確係贊成兩年任期
但係當我o地按照《基本法》條文，我堅持新特首有五年任期

冇錯，民心所向似乎贊成「兩年」多於「五年」，亦好似唔反對釋法
不過所謂「法治」就係唔能夠跟隨民意而動輒改動法律意義，法律永遠最大
正如唔可以o係香港處死重犯一樣，法治精神就係唔將民意一併考慮
想「新的行政長官」o既任期係兩年，就依正常程序，修改《基本法》

人大釋法已經係事在必行，想令人大唔釋法o既可能性已經接近零
我唔敢講好多人香港人無知，但係堅持法治精神o既人就唔應該放棄
要令中央知道，仍然有一定唔少港人反對人大釋法，反對扭曲《基本法》

日期：4月24日(星期日)
時間：下午三時正
主題：反對就特首任期提請人大釋法
路線：中環遮打花園to西環中聯辦
約定堅持法治原則、反對政治凌駕法治o既各位，星期日o係遮打花園見！

Re pang:我記得小學畢業前後o個段時間，你好似上過o黎
佢話歲月不留人，巴治奧咁fit都要收山，佢好耐冇落球場
o個日……要去和合石，之後o既星期六就去將軍澳

Re大蘋果：我都係打譬喻o者，我知你好有分寸
我冇嬲，只係睇唔過眼，有o個句講o個句o者
執筆呢一刻，踏入最後o既66小時，我幾大都頂埋落去

>>April 19, 2005 at 2:40:30 PM GMT+8

2005 年 4 月 17 日 星期日 【晴】

最冇把握o既Buss終於要殺到，讀極都覺得冇得分方程式
不過我又冇諗過唔考，咁辛苦讀o左咁多，點可以唔博？

屋企隔離o左九工，行路三分鐘就到，坐低仲有時間睇多陣
我個位勁前，而且距離大鐘o既角度好斜，好彩戴o左錶
集中精神，進入麻痺狀態，其他o野全部唔諗，考試！

好彩SQ尚可以應付，不過擺o左個大烏龍，o的題目擺哂一齊
要趁最後關頭仲有時間，分返開一頁一題，趕得切
Case Study有o的唔多識做，有o的題目點解唔撞？
我估60%安全線應該勉強過到關……o掛……

我住得咁近，當然係返屋企食飯，唔知邊個提議殺埋上去lunch
我冇所謂，肥鵬都好似好多年冇上我屋企，印象中係小學畢業到依家
事後問返爸爸，原來佢第一眼真係認唔到肥鵬，坐定o左先認到
o係屋企坐多陣、讀多陣先返九工，他他調調，慢慢o黎

本來以為三粒鐘寫四條essay會趕唔切，原來又唔係喎
揀哂四題單數題，大熱倒灶竟然冇必出o既marketing
第一題做得快，騰出多o的時間做其他題目，所以做得切
順住題號次序做，最識到最唔識，除o左第一題全部冇planning

講真，o的題目好似唔算太難，至少我識寫，不過有冇解錯題就……
最重要係，寫得好少，每題都只係四版左右收貨，得一題五版
唔合格呢……就應該唔會，只係有冇得突破E就好難講，睇彩數

點都好，最乞人憎o既一科，終於俾我殺低喇，置之死地而後生果然有用
魚、劉枝已經率先得到解放，而我就告別所有用英文考o既科
呢一刻，仲有90小時，踏入補時階段，再過埋中史呢一關，搞掂！

Re Tracy:XDDDDDDD
死喇，我完全未溫地方政制呀，呢題死硬！
我又冇掂過佛教 + 道教，甚至四夷教，死得！
補充：我從來冇提醒任何人考慮規則……

Re fat:唔係唔開心，只係擔心之後o既paper 2
我仲有最後一科喳，我梗係捱埋落去啦！

P.S.首先，我絕對唔係逢「伍」必反o既人，我對事不對人
我的確有少少火囉，你知唔知自己依家係乜o野身份？
我不嬲都相信「名不正，則言不順；言不順，則事不成」
呢個係原則問題，我不嬲都唔贊成o的人用「前度乜乜乜」呢個名

現任o的人去哂邊？最鍾意出鋒頭o個位唔跑出o黎？Show off嘛！
嗌咪 + 讀宣言 + 接受傳媒訪問呢o的「當眼工作」，應該全部由現任o既做
主席、發言人、執委，甚至普通成員都好，冇問題，搞清楚個名稱就得
但係「前任執委主席」、「發起人」呢o的人term好應該消失
換o左屆好耐喇，佢o地都應該要識做，唔應該o係當眼地方出現

而且，你唔再係中學生，顧下自己身份！(就算係Herman我都會咁講)
SSU冇人咩？冇人識嗌咪咩？姓梁o既唔做，可以由姓陳o既去做
我唔信冇人得，如果真係冇人，大不了星期日我走出o黎嗌咪！

>>April 18, 2005 at 2:31:30 PM GMT+8