2005 年 6 月 5 日 星期日 【晴】

件林柏特唔知幾時污糟o左，左肩位出現類似三間牌logo
洗o左幾次，點洗都洗唔甩，唔知案發經過，冇喇……

世界波，除o左入得刁鑽，仲要龍門明知你準備起腳，都鞭長莫及
心目中o既最佳金球，曼聯三冠王o個季，傑斯以一敵四射破阿仙奴

過o左兩日，都仲有o的意猶未盡，重溫爸爸收藏o左16年o既錄影帶
當年第一手o既資料事實，最未被沾污o既歷史真相，全部重現眼前
睇完外國遊客冒險幫記者帶出境o既片段，容許我為片段下評語：
























你o地冇壞電腦，只係我開o左天窗，爭在中間冇加上四個字

P.S.(1)全日都o係度等電話，但係到呢刻，電話始終冇響過=.="
P.S.(2)幾日o者，已經咁o既口面，我o地分分鐘要對佢對12年！
P.S.(3)Made a very stupid mistake...........

>>June 6, 2005 at 3:49:19 PM GMT+8

2005 年 6 月 4 日 星期六 【晴】

第二次公告：
麻煩各方好友，快o的add我呢個新ICQ : 335031764
亦有勞各位通知平時冇睇我日記，又係我朋友o既人

中七學生陳小姐好有觀眾緣，同Leo齊上生果報頭版大特寫
玩公關策略，不如搵佢七一貼滿SSU貼紙通街走，免費宣傳
冇心博出位又成日上鏡，相信攝政皇會不是味兒，既羨且妒

表妹生日，又走上菠蘿輋同佢慶祝6歲生日 + 派到第三志願
好大兜盤菜，大人 x 15 + 細路 x 1 + 狗 x 1 + 貓 x 2都食唔哂
之後仲有好大個蛋糕，我唔想再食呀，我已經超級朗拿度喇

P.S.如果o尋晚有今日全日咁好天咪好囉，唔使成身濕哂

>>June 9, 2005 at 4:47:11 PM GMT+8

2005 年 6 月 3 日 星期五 【乍寒還暖】

今朝做o左兩件事，填好食環署o既form + 拎地圖落街放大影印
擬販賣地點：灣仔天樂里７號僑康大廈外的行人路(近軒尼詩道)

＊－＊－＊－＊－＊－＊－＊－＊－＊－＊－＊－＊－＊－＊

上年Youth Conference期間o係中大學生會室搵到六四15週年特刊
30頁o既特刊，有類似人生交叉點o既遊戲，模擬你係當時o既學生
假設我真係參與當年學運，我最終o既結局原來會係……流亡海外

忘不了的　年月也不會蠶食　心中深處始終也記憶那年那夕
曾經痛惜　年月裡轉化為力　一點真理一個理想永遠地尋覓

悠悠長長繼續前航不懂去驚怕　荊荊棘棘通通斬去不必多看他
浮浮沉沉昨日人群雖不說一話　不想清楚分析太多真心抑意假

但有一個夢　不會死記著吧　無論雨怎麼打　自由仍是會開花
但有一個夢　不會死記著吧　來自你我的心　記著吧！

忘不了的　留下了不死意識　深深相信始終會變真某年某夕
如此訊息　仍賴你跟我全力　加一把勁將這理想繼續址尋覓

教我！教我點可能忘記16年前o既大屠殺？我一定唔會忘記歷史
我唔相信有人曾經下令屠城……o個個唔係人，係冇血性o既畜生
面對o的和平集會o既學生，點可以用坦克車？點可以用機關槍？

「如果當年不鎮壓，哪有今天的經濟成就，穩定富強？」荒謬！
為o左令一部分人民改善物質生活，屠殺另一班人就變得合理？
殺人就係殺人，無論你點樣辯駁，總唔可能將殺人行為合理化！

南京大屠殺，日本要認錯，天安門屠殺，李鵬、共產黨要認錯！
要昭雪亡魂，要還趙紫陽一個公道，必先揪出罪魁禍首：共產黨
16年喇，死者o既親人、為民主奔走o既英雄，仍然遭受政治迫害
現實角度，一日仲有一黨專政，八九學運根本唔會得到正確評價

正確評價學運，追究屠城責任，結束一黨專政，建設民主中國！
以史為鑑，認清歷史，永不忘記當年o係天安門犧牲o既民主戰士
八九學運一日未得到正確評價，我o地每年都會走下去，永不放棄

＊－＊－＊－＊－＊－＊－＊－＊－＊－＊－＊－＊－＊－＊

全世界都知，每年o既六四，支聯會都o係維園舉行燭光悼念晚會
唔講大家可能唔知，其實我係從未出席過六四正日o既悼念活動

聽攝政皇老點，晚會開始前三個幾鐘，16:30已經去o左維園球場
完全冇任何SSU成員到o左維園，不過見到HRM檔口，Kit搵我幫手
做速遞，將HRM襟章、大聲公由維園送去Sogo門口o既記協檔口
拉好HRM banner後，坐定o係counter搞簽名，促請北京釋放程翔

寫好講稿，我同Henry都照稿讀，見到外籍人士，即刻加英文版
杜耀明義助HRM拉簽名，之後鄧偉棕又o黎，佢仲認我呢個師弟
原來佢轉o左律師樓，派咭片，叫我幫荃官校友會寫篇o野？？

o係HRM坐o左足足個幾鐘，先見到Ian出現，佢又嗌咪嗌埋一份
攝政皇去o左邊？又係攝政皇話要問DDN借箱，幫SSU本身籌款
Leo到埋之後，戇居居咁離開HRM，由銅鑼灣跑去天后DDN攤位
點解會有太上皇伍小姐？見到傳媒請小心應該點樣稱呼你自己

企埋一邊，懶得理DDN玩乜，久違o既Kenneth意想不到下出現
到到19:30左右，出球場搵位，第二場區，唱住歌等晚會開始
唔知甚麼媒體採訪，類似清談模式，每人講o的，應該會投籃

唱一陣歌，嗌o左一陣口號，悼念晚會大約o係20:15正式開始
Ian + 范長豐 + Ho + Leo + Eric + Ben + Karsum + Mina + Kenneth + Dec
撇低攝政皇，除o左後兩者，其他o既都係合法o既現任SSU成員

播由梅豔芳主唱o既《血染的歷史》錄音，MV加插當年學運片段
支聯會常委向民主烈士紀念碑獻花，全場肅立，向紀念碑三鞠躬
華叔致悼辭，重點係「安息」二字，全場高舉燭光，默哀一分鐘

「丁子霖六四16週年致香港同胞書」，開始有o的眼濕濕，佢好慘
再睇埋天安門母親運動o既舞台劇，更加大感觸，死者遺屬好可憐
失去親人已經夠慘，仲唔可以為死者辦後事，更唔可以公開拜祭

晏晝開始，其實天公造美，因為中午行雷閃電之後，都一直好天
晚會開始o個陣，抬頭望向天，萬里無雲，以為晚會可以順利舉行
可惜去到「誦讀國內異見人士來鴻之後」，終於開始落出毛毛雨

播放《自由花》，雨勢越o黎越大，開遮、開雨衣，冇乜人即刻走
我都從來冇打算走，因為「無論雨，怎麼打，自由仍是會開花」
支青組代表發表講話，再播埋仲未好識唱o既羅文o既《中國夢》

因天雨提早結束，腰斬Freedom Choice合唱團演出 + 學聯代表講話
火化弔唁冊，大合唱《祭英烈》後，六四16週年晚會到此正式落幕
響應大會呼籲，年青力壯o既人冒大雨幫手清理現場o既一個個鐵馬

坐滿四個場區，推算今晚有35000-40000人，支聯會的確報o左大數
每年人數有多有少，其實只要每年都有人，即係仲有人冇忘記歷史
一點燭光，一滴記憶，就算呢條路似冇盡頭，都會一直堅持走下去

遠超意料之外，現場有好多中學生，踢到佢o地一半入SSU就發達喇
奇怪SSU內冇支青組成員，SSU冇唔俾成員雙重會籍喎，兩者冇衝突
Leo心思思想入支青組，理由係……佢話支青組多靚女，果然係Leo
我都想o係喪失SSU會籍後，報名加入支青組，15-25歲，有排慢慢玩

＊－＊－＊－＊－＊－＊－＊－＊－＊－＊－＊－＊－＊－＊－＊

搬完鐵馬，o係支聯會counter買紀念品，手帶 + 王維林擋坦克o既咭
跑返銅鑼灣o個邊，join返大隊，久違o既Alien返o黎喇，搵地方dinner

Ho + Leo + Kenneth + Alien + Karsum + Ben + Eric七個麻甩佬坐埋一齊
開餐只係配菜，重點當然離不開聚聚舊 + 吹吹水，更重要o既係審犯
全世界都一面倒圍攻攝政皇 + 幾個太上皇，全力數盡佢o地o既不是
依家全世界都知道SSU有邊三個主席，點樣distinguish呢個三個主席

Ben講o左個超級爆笑o既笑話，笑到Kenneth、Ho同我幾乎失去控制
麥記o既深海歷奇生日會，佢個friend打去問：「使唔使帶埋泳褲？」
吹水吹到不知時日過，太精彩，吹到人o地吹舖趕客先捨得執o野走

落到地鐵，繼續笑，世界上每個地方都有o的低能到咁o既地步o既人
差唔多12:00先返到屋企，成身散哂，不過自覺做o左件值得做o既事
明年o既六四，後年o既六四，以後o既六四，都會堅持未敢忘記歷史

＊－＊－＊－＊－＊－＊－＊－＊－＊－＊－＊－＊－＊－＊－＊

《血染的風采》
也許我告別　將不再回來　你是否理解　你是否明白
也許我倒下　將不再起來　你是否還要　永久的期待
如果是這樣　你不要悲哀　共和國的旗幟上有我們血染的風采
如果是這樣　你不要悲哀　共和國的旗幟上有我們血染的風采

也許我的眼睛　再不能睜開　你是否理解　我沉默的情懷
也許我倒下　再不能醒來　你是否相信　我化做了山脈
如果是這樣　你不要悲哀　共和國的土壤裏有我們付出的愛
如果是這樣　你不要悲哀　共和國的土壤裏有我們付出的愛

>>June 9, 2005 at 4:46:19 PM GMT+8

2005 年 6 月 2 日 星期四 【晴】

小弟o既舊ICQ又壞o左，小弟決定開多個新account
麻煩各方好友，add我呢個新account : 335031764
亦有勞各位通知平時冇睇我日記，又係我朋友o既人

剛剛踏入夏季，聰晏晝打o黎約游水，消消暑，爽快應承
聰竟然請得郁肥鵬，識o左佢超過10年，從未同佢游過水
去城門谷，一入地鐵就撞見Ben送文件，佢都知o個件事
去到大窩口，原來肥鵬都搭埋同一班車，預時間o岩o岩好

我 + 聰 + 肥鵬 + Richard + 釗，五個人o係城門谷迎接夏天
頭先就咁曬，一出到池邊就收哂太陽，想曬多o的都唔得
經過考試o既折磨，個個都大o左成個碼，都變哂朗拿度

轉去好凍o既室內池，凍到唔敢落水，游o左陣就變吹水
眾人談論足球小將，o個o的招數太脫離現實，似馬戲團
雷獸降世、利雲射球、一飛沖天全數淪為被嘲笑o既對象
返出溫泉池，繼續吹，只係轉o左話題，總之就月旦一番

其實出o黎游水只係配菜一道，主菜始終係出o黎享受陽光
噴完口水，夠哂喉，上水，沖身洗頭，帶齊哂毛巾洗頭水
本來想殺去美心嘆雞脾，可惜晚飯時間已經o係17:30開始
最後去o左大家姐食雞脾腸粉串燒，大家都志在o的咖哩汁

多得Mina提醒，夜晚聽人民電台，Derek + Leo開咪做嘉賓
睇下我o既會員號碼就知我究竟係咪「資深會員」啦……
我呢個留言，不過係我o既親身經歷，都唔知講o左幾多次

得罪講句，攝政王根本冇料到，想show off都冇本錢show
呢個Acting Chairman已經算係面對媒體啦，簡直令人失望
相反俾食環署玩o個位，完完全全將佢比下去，高下立見
我手寫我心o者，我不嬲都直腸直肚，我依家就係批評你

P.S.拒絕忘記歷史o既朋友，希望聽晚唔好落雨，維園見！

>>June 3, 2005 at 3:32:18 PM GMT+8

2005 年 6 月 1 日 星期三 【晴】

中環半山o既民園麵家，已經超過80年歷史，馳名牛腩麵
呢種舊式大排檔因為持牌人最近過世，面臨結業o既危機
唔少區議員為此奔走，希望當局酌情批准麵館繼續經營

因為o的麵好正，正到足以成為香港文化遺產，所以想拜會拜會
約o左Leo + 中七學生陳小姐，上HRM開會前，特登上蘇豪區食
Leo俾食環署玩死，搞個小販牌都要咁麻煩，仲以為手續簡單
政府一直叫o的人唔好咁政治化，偏偏搞小販牌就要夠政治化

沿半山扶手電梯直上伊利近街，再沿街行返落山，民園o係街頭
坐低冇耐，單都未落，見到阮兆祥同不知名女性幫襯，佢肥o左
叫o左碗牛腩伊麵，幾好o的牛腩入口好爽，o的湯唔太似味精湯
老闆唔識用手機影相，要Mina教路，老闆 + 老闆娘 + 阮兆祥合照

荷李活道、卑利街返落皇后大道中，16:00就到孖沙街HRM辦公室
所以話我計時間計得準，計好行上行落同食o野時間，o岩o岩好
HRM本身仲開緊會，華裔男子好熟口面，唔知o係邊度見過……

青年圓桌會議2005籌備委員會工作會議(大會)，冇工作，齋會議
準時出席：Kit + Chris + Leo + Henry + Mina + Eric + Quali @ HRM
布lum + her friend + Derek先後o黎到，其實o黎就得，遲都冇所謂

三個鐘o既會議，內容唔少，詳情可以問我借會議紀錄，懶得寫
已經confirm會搵林奕華、章虹再o係YC幫手主持活動，呢個唔錯
上年睇唔掂，淨係識笑o個套片，終於因為Kit講解，終於拆得掂

討論當中真係學到唔少o野，我仲有大把要學，呢個係難得機會
我冇講錯，只係講唔哂事實o既全部，學下其他人o既睇o野角度
當住人面講人壞話，講錯咩？冇記者在場，即刻成個人靜哂！
今日o既SSU有Leagl Chairman, Elected Chairman, Acting Chairman
如果你問我邊個先係真真正正o既主席，我都唔知應該點答你

Kit太樂觀喇，我都想每間學校都有「中學生聯盟駐XX學校代表」
如果真係做到咁，SSU就成功喇，相信中聯辦都要約我o地飲茶

其實19:00仲未開完會，不過我要早o的走，難得約到Miss Leung嘛
confirm返到屋企o既job之後，o係上環急急腳迫地鐵，直踩返荃灣

下次會議日期：民國94年6月9日(星期四)
時間：下午四時三十分
地點：旺角教協／旺角學聯

即刻趕去下一場，荃灣皇都自助火鍋，前Octopus圈子眾首一堂
Miss Leung + 子建 + H.K.Lo + Mina@荃官 + 蚊 + 魚 + Su + 小邪 +
聰 + 小丸 + Eric再加上中段突然出現o既Mainting從未試過咁齊人

搞以民主校園為主題o既Youth Conference前，先接觸校園政治
食o野其實係其次，難得坐埋一齊吹吹水，聚聚舊先係主要目的

仲o係荃官o個三位早走，其他人一直邊坐邊影相，已經冇乜點食
差唔多22:45先埋單，呢幾日使o左好多，重點係唔知使o左o係邊度
肥鵬帶挈埋條財路俾聰，聰聽日interview要加油，大家良性競爭嘛

我曾經講過，如果in唔到屈臣氏，就全力幫SSU搞Youth Conference
媽媽就話我因為唔等錢使，所以索性完全唔搵工，等爸爸俾零用錢
簡單o的睇，幫SSU做o野，其實即係做義工，都係工作經驗o既一種
我就快唔係中學生，我都係因為認同SSU理念而希望幫SSU做事o者
有錢收又係做，冇錢收又係做，我做我想做o既事，冇糧出又如何？

>>June 3, 2005 at 5:58:15 AM GMT+8

2005 年 5 月 31 日 星期二 【晴】

o的人真係又好文采又有心機，咁長o既歌都改哂全首
建華之亂八年o黎，差唔多所有大事都寫哂入去，勁

原曲：勁歌金曲(古巨基)
新曲：建華八年
作詞人：Holf Yuen @ 音公館

兩制　確保一國地位　特首有賴提攜
唔要被唱衰有辱國體

有疫症沒有預計　H5就要殺雞
翻發好難計　死相好難睇

八萬五　要安居八萬五
供樓無個唔慘　樓價狂瀉勁喊

迎戰對沖講勇氣　要入市就無忌
激戰靠千億儲備　去肉搏炒家　從無識死
誰說靠一招到尾　一招打到窒條氣
但借錢泰國佬　已俾返晒你

子女落太多　要請釋法杜絕黃禍
全民越過深圳河　踩扁o左　人大終審結合囉

難磨合　就要走　沒有陳方安生睇怕會仲愁

見降落民意　驚主人失意　家丁與學府如何共處
最尾調查過　誠實欠o的　主人繼續撐　確係唔易

越賣越多金　如何求盈利你咪問
全民貪得金　新經濟　跌到最傷跌得甘

你說過要買八號　廿八蚊開始已經輸到
天府變地牢　誰人亦鼓譟

數碼港　有幾多空置未能用到盡
齊合作　未算官商勾結當然被恩准
賣豪宅　賣豪宅最重要　仲筍

發奮要去學倫敦　志向遠大面肥腫
成籮雄圖大計　過兩晚一定亂籠　何其蠢

建華　寶華　欽點上位嗎
天真似她　應該責怪嗎

孖女家下出場　送上慰藉用歡樂形象
大眾迷上　阿Sa共阿嬌深得我欣賞

你有無　無間道　臥底幾多點樣估到
真的身份當緊差佬　有邊位知道

o個個醬爆要召喚　內在團團熊火
三師兄用大力金剛腿開波
個個見過　都驚嘆少林好波

減你人工　不准呻窮
搞到立法例　公務員就實話痛

國寶夫君撐撐撐　將獅子山都唱爛
控制開支　削減赤字　艱苦過你我都慣

連任成功　連任成功　沒有競爭只得宴會隆重
唔願辭工　唔願辭工　所急與所想冇咁快落空

問責制裡冇英雄　烏合之眾
湊足一隊　出醜已估中

賀年習慣冇變　有必要去抽支籤　實做馬說有更好一年
誰料到咁都有笑話會出現　一出黎下籤車公冇俾面

這刻風雨飄搖　蔓延在淘大花園最怕染怪病如何照料
再一片蕭條　在市內口罩最重要　完全唔係新潮

亂世的佳人　有好醫生　默默固守前線　去跟非典對撼
無言奉獻　像父母心　振奮人心

強硬推行憑葉劉　立法會之中只係計人頭
國家保險抑壓我自由　言行令我受夠令我受夠
令我受夠令我受夠　令我受夠令我受夠
令我受夠令我受夠

如何可以不上街　列車飛站逼到爆舉晒牌
你有你有飛派　我有我要表態
全民宣泄怒氣　在七一最high

誰人落注最準　田北俊　撤退要快制止議會失控
票唔夠用　老董壽宴　被愚弄

請你我保護　這個海　天生的商標　怕再傷害
可惜見佢越變越細　為發展犧牲往昔光輝　就叫蝕底

齊談論愛國　齊強調愛國　來辯論大是大非總要扮惡
黑超串錯大狀　咀邊泡泡難忘
就壓住你再講　政治決定最爽

你要出氣搵人　大班加毓民　已身心也疲勞提起都震
理性分析變陣　留下有冇人　晴朗一天出發靠俞琤

文娛天地　座落於西九龍　卻要單一連設　沒法懂
誰期待　全盤大計推倒再來　藍圖　為何沒法改

有樓起過又拆　新樓一樣拆　海景點俾居屋客
望見無良人格　全城來狂插　誰完全為發達

商場車位都上市　團結搵錢一致　想你就快o的
冇上得咁易　誰料到打起官司　婆婆有異議

有下台有出去　這領導似福水　再來對施政失敗賠罪

訓示團隊查找不足夠　費事煩亂齊添激老豆

係有辱無榮　做到癲　倦到嘔　一事無成
任你攤大隻手　打救無靈
唯有身體不適　企得多也成為病情

手撕基本法好過　手撕基本法好過　原來缺陷有好多
解釋三次不妥　年期也未說清楚　做法極其折墮
又見司法淪陷過　就註定有「新的」苦楚
不如就咁欽點算囉

曾爭取過　未怕死　曾灰心過　別遠離
人民力量集結　實現理想不放棄

＊－＊－＊－＊－＊－＊－＊－＊－＊－＊

寄贈參加香港六四燭光會各界人士，
新紀五年春游順釗敬題於巴黎驚弓坡

《燭林頌》
長安街上白衣郎，獨堵軍輪慨以康；
紫禁城前孤傲柱，爐峰海畔遍哀光。

「六四」的燭光悼念集會，你們會來嗎？
明年的遊行和燭光晚會，你們會來嗎？
讓我們在這民主長征路上，繼續並肩攜手前進！

>>June 1, 2005 at 3:33:50 PM GMT+8

2005 年 5 月 30 日 星期一 【晴】

好耐都冇落過場，餓波餓o左一段時間，再戰沙咀道
今朝冇乜太陽，理論上應該踢得幾舒服，不過好焗

阿辛卡奧o個種射罰球o既步法好難學，好難控制個波曲墜
用返傳統o既助跑拉弓法，o係控制弧度、落點方面比較好

鬥波，把關重任交俾唔識o既中坑，轉拍馮King鎮守中路
中前場o既人極少回防，結果成日人少打人多，連環失守
其實都要多得我呢個典型英式中堅，速度上完全跟唔上
聰好似已經重拾射手觸覺，可惜後來始終都要傷出離場

打後衛不停捱打，由Richard頂替，之後轉幫對面守龍門
唔知點解轉隊後仍然捱打，個波o係手邊突然改變方向……
俾人角球攻勢收死，濕九遠柱飛頂破網，應付傳中球……

由傑志唔知收o左山未o既林慶麟帶隊o既小學生殺到，迴避
其實部分小學生踢得有板有眼喎，以一敵四殺入禁區破網
兩個大肥仔o係前線橫衝直撞屈身位，哈索賓基 + 維杜卡？

等到小學生走哂，又係我o地再次落場o既時候，o係門前準備
熱身之際，左腳小腿後面肌肉拉，痛到嗌救命，唔係第一次
坐二人大轎，即係俾人抬出場，返唔到落球場，可能有排抖
之後差唔多個幾鐘，企o係場面睇，睇住一次又一次o既失機

踢o左咁多年波，我o地呢班人始終出唔到個似樣o的o既射手
高效率、高閱讀球賽能力就大把，但係始終冇人識送波入網
之前話鰻魚似列基美，依家發覺佢o既後上射門更似林柏特

眾人踢到13:30先捨得完場，我返去要好好搞掂小腿o既舊患喇
為Grad. Din.去恆生入數，凡事總係鍾意拖到deadline最後一刻

Re大蘋果：
2nd interviewer話未必只會o係屈人寺，可能要去禁區其他商舖
或者你搭舒夫真高返o黎之後，要o係機場周圍打轉，碰下運氣
我都幾鍾意迪肯尼奧，我最期待o既舒寧咸終於又打返上英超

Re Leo :
我會先試下大銀幕下低o個個位，唔得先嘗試天樂里o既街口

P.S.中七學生陳小姐o係網上掀起一股巨型旋風……

>>May 31, 2005 at 4:14:34 PM GMT+8

2005 年 5 月 29 日 星期日 【晴】

科蘭o係曼聯兩季半o既總入球，唔及佢o係維拉利爾一季
原來西甲煞科戰唔係場場都同時間開波，唔會唔公平咩？

打開生果報，o尋日o既遊行，資料錯誤，中七學生陳小姐……
o尋日Leo眼甘甘望住o個兩個女生原來中五，踢埋佢o地入會嘛
原來人民電台o既片段，個鏡頭清清楚楚咁掃哂成條SSU隊伍
http://prhk.no-ip.org/prhkvideo/050529_June4rally.mpg
請教有份上街o既SSU朋友，請留意片段中1分30秒之後o個10秒
柳玉成究竟講過o的乜o野，令我o地全部望向右邊？忘記o左

多得肥鵬帶挈呢條財路，原來機場屈臣氏請暑期Sales Promoter
佢o地就一早in o左，好彩搭得切尾班車，今朝入機場碰碰運氣
08:50出門口，地鐵 -> 東涌 -> S1 -> 機場$10有找，10:00前趕到
不過搵屈臣氏office o徙唔少時間，原來唔可以直接搭lift去六樓
o係離境大堂落office，唔計office本身o個度，足足穿過三度門

呢朝in暑期工o既好似得我一個，其他o既似大學畢業生in全職
暑期工問來問去都係o個o的o架啦，早就準備好model answer
如果問我o的英文叻唔叻，應該唔算叻，但係一定叻過普通話
我講普通話講得最叻o個句，肯定係「我的普通話不太好……」

正當肥鵬仲o係度等聽日，我即日已經順勢做埋2nd interview
其實兩次interview問o既大同小異，只係2nd in加插case study
同肥鵬唔同，點解屈臣氏冇順便幫我搞埋機場禁區通行證？
我interview進度比肥鵬快，但係申請禁區紙進度就比肥鵬慢
感覺上好似o係office留o左好耐，返出o黎原來都不過係11:15

仲有時間，打俾Leo話我可以上學聯幫手，幫手拎o的信去寄
o係機場兜出東涌，出趕地鐵撲出旺角，上到學聯已經12:20
o係學聯現身，幫手抬400封信o既有Leo + Ben + Karsum + Eric

弼街o既旺角郵局，先磅信，計郵費，再等Leo去銀行提款墊支
o下？處理唔到呢堆信？要拎呢444封信去油麻地九龍中央郵局？
無奈o既眾人唯有出上海街，飛的去到梁顯利對面，轉出彌敦道

九龍中央郵局，好有港英殖民時代味道，尤其係郵局局長名牌
將444封信寄去444間中學，每封70g重每封盛惠$3，自己慢慢計
原來寄咁大堆信要填表，寄件一欄，Leo竟然寫o左……HKHRM
寄完信，各有各散，邊搭巴士邊睇書，已經睇o左紅衛兵100頁

Re大蘋果：
我當然知72都好快，不過你已經提及點解我唔搭，真係太貴喇
Felix正是上年七一o個位，佢最近兩次SSU參與o既遊行都有份

P.S(1).爸爸買波膽二串三，祖記、維拉利爾都中o左，贏o左$7370
P.S(2).韋斯咸終於重返英超，球迷們等o左兩年，終於等到喇！

>>May 30, 2005 at 4:00:08 PM GMT+8

2005 年 5 月 28 日 星期六 【晴】

早排先塞過鹹水渠，今朝又o黎，o的水又湧返上o黎
今次o既situation同上次差唔多，好彩仲有水龍頭去手
呢兩次就話有人o係屋企o者，如果冇哂人，點算？

無論任何歷史，都唔容許任何人以任何理由作任何竄改
「忘記歷史就等於背叛」，呢個係大陸反日暴動o既口號
當然記得68年前o既南京，不過同樣要記得16年前o既北京

闊別一年，今年重返每年六四前o既星期日o既支聯會遊行
大會播歌，新版《血染的風采》、《自由花》都不及舊版
想買六四手鐲添，可惜唔夠散紙，冇理由俾紅衫魚o掛？

事前確定SSU會帶banner出o黎，出席人數其實比想像中好
現身o既有Derek + 范長豐 + Leo + Mina + Ben + Eric + Felix
Derek差o的出o左維園趕唔切返大隊，Mina去到糖街先趕到
SSU o個塊八字口號o既banner好唔掂，超唔鍾意呢個口號

一出大街，任何人都要有心理準備，隨時俾傳媒遞咪訪問
路透社先搵Mina講兩句，轉過頭就輪到企o係Mina隔離o既我
「無論乜o野理由，總唔可能將殘殺平民o既行為合理化！」
某人因為無緣繼續受訪，周不時離開SSU大隊，冇乜人在意

今次出o黎其中目的，係要視察維園至政府總部o既沿途環境
睇下申請小販牌o個陣申報擺檔地點，七一就o係o個度開檔
初步視察沿途，以下呢幾個地點唔錯，SSU執委可作考慮：
波斯富街、軒尼詩道交界(行人天橋底)
天樂里、軒尼詩道交界(大銀幕下面)
軒尼詩道、莊士敦道油站附近
盧押道、譚臣道交界(修頓球場側)

行我o地前面o既阿牛，話我o地冇上年o個班SSU咁夠吉士
其實嗌唔嗌口號，同有冇吉士應該冇關係o掛？唔一定要嗌
另一條友好煩，SSU帶唔帶頭嗌口號係我o地o既內部事務

大概17:35上到中環政府總部，呢段路兩個幾鐘，差唔多啦
得1400人？多番強調人數唔係最重要，有人肯企出o黎就得
我o地就係決不忘記歷史，更加唔容許有人意圖篡改歷史！

沿途一直同Felix談論各種議題，行完入埋地鐵都一直不停傾
「拜金主義」唔係我提出，我只係覺得呢個好o岩形容港人
可能年紀尚輕，比較浪漫主義，不過我心中就係有呢個目標

Re pang : 好，一於咁話，等你睇完o架

>>May 29, 2005 at 3:33:54 PM GMT+8

2005 年 5 月 27 日 星期五 【晴】

好難得一日之內有豐富節目，唔使屈o係屋企
朝早去CU History聽o野，同時約o左兩班人
搭86入沙田，的確好快，不過稍嫌貴o左o的

其實都冇乜o野好聽，因為o的info基本上已經知道哂
原來interview因人手關係取消，其實都對我冇乜所謂
如果成績足夠送我入History，都應該送到我入政政啦

同肥 + Polly + 龜聽完之後，轉去同肥鵬o個班人吹水
坐o係History助教後面，不過話題其實與History無關
嘆完一輪冷氣，肥鵬未夠鐘出Poly，我未夠鐘出旺角
點打發時間？去canteen開餐，其實係搵地方kill time

邊食星州炒米邊講波經，身邊未有人只係睇o左上半場
足足坐o左個幾鐘，13:20左右終於捨得離檯，出車站
好迫，個個都變o左肉餅，想問肥鵬借《漢武大帝》添

o係旺角火車站穿過重重人群，準時14:00上到旺角學聯
學聯o既辦事處，位於中南海對面……中南海酒家對面
o係正門行上電梯大堂……整埋o的咁o既招牌，靠害……

青年圓桌會議(Youth Conference)2005工作會議*
*釋義：工作會議 = 工作 + 會議，先工作，後會議
仍然由中學生聯盟、人權監察合辦，今年主題「民主校園」

釘裝舖將超過400封寫o左唔同校名o既邀請信搞亂哂次序
首先要將400封信根據校名字首，重新排好，再分開疊好
再將寫o左各中學地址o既貼紙以相同方法處理，逐封入好
等到陣間o的海報送到o黎之後，再入埋海報 + 兩張報名表
唔好以為好容易，有時冇信封，有時冇信紙，要成日唱票

做到踢哂腳o既同時，Derek接受《鏗鏘集》訪問，當見唔到
海報o係15:00終於送到，個設計……其實係邊個設計o架？
我覺得上年o個幅o既立法會大樓……出面o既巴士站靚o的
12人夾手夾腳，花o左三個鐘終於做好，其實已經快過上年

工作完成，會議開始前，先同Leo落樓下七仔補給，杯麵
圓桌會議籌委會會議(大會)，計埋非SSU人，多達13人出席
Leo(籌委會負責人) + Kit@HRM + Chris@DDN + Ian + Derek
Billy衰 + Karsum + Ho Ho + Ben + Mina + Henry@GPA + Eric
仲有一個SSU執委出席過頭十幾分鐘，唔記得名，唔好意思=.="
聲明：本人已獲得大會負責人Leo授權，可隨意公開會議內容

其實點解要花咁多時間去討論一份問卷？我o地唔係做全港普查！
呢個先交俾Programme Committe處理，之後再呈返上大會比較好
四日三夜o既camp流程大致上搞掂哂，細節問題留待下次開會處理

20:15就解散，其實已經比預算中早o左，起碼趕得切開飯o既時間
聽日會代表SSU出去行o既，好彩總算有，至少會有四個，好過冇啦
搵Chris問申請小販牌o既事，SSU有三個夠秤，可以遞名去食環署

建議中學生聯盟由下屆會期起，永久改變某o的職位名稱
外務副主席、內務副主席改為副主席(外務)、副主席(內務)

下次會議日期：民國94年6月2日(星期四)
時間：下午四時正
地點：上環HRM總部

>>May 29, 2005 at 11:19:24 AM GMT+8