2005 年 7 月 5 日 星期二 【晴】

正當泥漿摔角稍有緩和之跡，又有人煽風點火，挑起火頭
對o個個破壞者o既身份感到懷疑，決定整條係咁意試探佢
簡單o既一條問題已經成功"chalk"到佢，果然「老謀深算」

最初話誓死效忠，之後突然話想走，最後又話留低，果然峰迴路轉
如果佢真係走，相信佢唔係上車就係上馬，如果佢上車，就好大鑊
佢一返老家，江東父老實會好好招呼佢，o係佢個名中間加"JUDAS"
個人立場，如果真係要走，唔該行多兩步上馬，求神拜佛唔好上車

晏晝連續重複聽o左兩三次Eason大碟，你問我，我當然賣花讚花香
碟內o既呢首歌，最適合形容頭頂title所暗示o個條友，簡直襯到絕！

《浮誇》　陳奕迅
有人問我　我就會講　但是無人來
我期待到無奈　有話要講　得不到裝載
我的心情猶像樽蓋　等被揭開　咀巴卻在養青苔
人潮內　愈文靜　愈變得　不受理睬　自己要搞出意外
像突然　地高歌　 任何地方也像開四面台
著最閃的衫　扮十分感慨　有人來拍照要記住插袋

你當我是浮誇吧　誇張只因我很怕　似木頭似石頭的話
得到注意嗎　其實怕被忘記　至放大來演吧
很不安　怎去優雅　世上還讚頌沉默嗎
不夠爆炸　怎麼有話題　讓我誇　做大娛樂家

>>July 6, 2005 at 4:15:31 PM GMT+8

2005 年 7 月 4 日 星期一 【晴】

Graduation Dinner of F.7 Students of TWGSS (2005)
Venue : 荃灣綠楊美心大酒樓
我到呢刻都唔知點解Grad Din竟然要o係酒樓囉……

16:30開始可以入席，不過早去都冇o野做，差不多17:15先到酒樓
簽名報到就有$40退款落袋，咁我可唔可以簽多幾次，收多o的？
為免影響校譽，唔俾打麻雀，NGO成員當街用粗口對罵都試過啦
即刻去三聯，買o左兩副啤牌，即刻開兩檯dee局，乘機消磨時間

o的人陸陸續續差o黎齊哂，可以開始周圍影，左穿右插，搵靚位
Miss Leung到喇，原來真係唔多收貨，下星期五前一定要「色髮」

入席，每圍$2400 o既酒席，食過N咁多次o既菜單，早已經識得背
乳豬 + 蝦 + 帶子 + 海鮮卷 + 翅 + 鮑片 + 蒸魚 + 炸子雞 + 伊麵 + 楊枝甘露
咁普通o既菜式，$2400係咪稍嫌貴o左o的？咁睇都唔多似要咁貴

Grad Din主角係影相，話哂呢個係七年荃官生涯最後最後o既節目
唔少得o既係古靈精怪o既組合，最衰Lim Sir永遠都唔出席公開場合
o的人開始散席，開檯玩UNO，輸o左要同古靈精怪o既人話要影相
好彩我一局都冇輸，可憐Billy慘被李家盈請食檸檬，邊個提出o架？

玩到23:15就離開酒樓，唔想咁快返屋企，稻草人閂o左門，去友記
一行九人Eric + Billy + 小妹 + 龜 + Mina @ TWGSS + 蝦 + 肥 + Polly + 挺
其實根本唔肚餓，純粹想坐低傾計，開始為星期五o既慘劇提心吊膽
放榜前o個日／晚做乜o野好？根據以往經驗，永遠都唔會達成共識

差不多12:25先肯走，去地鐵站，「往中環沿線各站的尾班車已開出」
普通線o既尾班車已經全部開哂，唯有呆等00:10屯門開出o既通宵巴士
等等下，唔記得原來呢個世界上有種叫專線小巴o既交通工具，$10喳
01:00前已經返到屋企，睇埋《創世紀》最後o個節，01:20先至去沖涼

當晚o既相，如無意外，我應該會著返o個套衫去立法會
http://www.imagestation.com/member/?name=erictsui27
有人話我似區議員，有人話我似新巴司機，又有人話我似IT人……

Q : 我搭o既47S通宵小巴，由屯門碼頭開出，經荃灣、深水鶗X旺角
大家估下荃灣 --> 深水鶨O段25分鐘路程，小巴o既最高時速係幾多？
Hint : 小巴o係最高速o個陣，當時小巴已經超速

Re肥：倒數……執筆之時……離死期還有……不足43小時

>>July 6, 2005 at 11:52:16 AM GMT+8

2005 年 7 月 3 日 星期日 【晴】

不知不覺，仲有四日就AL放榜，感覺上好似考完冇幾耐
冇一科有十足把握，唔敢估最後乜o野成績，就係驚呢樣
可以話我懦弱，老實講，我冇膽面對，想永遠唔知結果

P.S.原來極度投入於公事，對私事o既影響真係可以好大……

>>July 4, 2005 at 3:18:41 PM GMT+8

2005 年 7 月 2 日 星期六 【晴】

要真真正正有料到，而唔係純粹博出風頭，最好係不斷學習
中央圖書館係學習o既好地方，面對維港，讀都讀得醒神o的
如果冇人理，我真係可以一直打書釘，打到圖書館閂門o架

好耐未試過討論區咁「熱鬧」，「熱辣辣咁狂鬧」，衝著某人而來
我都想講兩句，不過「不在其位，不謀其政」，都係唔好亂嗡廿三
不過我係好期待某人如何招待排山倒海o既疑問，食住花生等睇戲

＊－＊－＊－＊－＊－＊－＊－＊－＊－＊－＊－＊－＊－＊－＊

本週重要轉會

英格蘭球壇：
菲臘斯(英格蘭前鋒)　　　　from修咸頓　　　to阿士東維拉　　100萬鎊
史超活泰來(英格蘭門將)　　from阿仙奴　　　to阿士東維拉　　轉會費不詳
辛頓(荷蘭中場)　　　　　　from米杜士堡　　to利物浦　　　　自由轉會
卻克蘭(英格蘭門將)　　　　from利物浦　　　to西布朗　　　　借用
希比(白俄羅斯中場)　　　　from史特加　　　to阿仙奴　　　　1500萬歐元
基士文(塞黑前鋒)　　　　　from車路士　　　to馬德里體育會　900萬歐元
艾利亞迪里(法國前鋒)　　　from阿仙奴　　　to些路迪　　　　借用

世界球壇：
卡維(挪威前鋒)　　　　　　from比錫達斯　　to里昂　　　　　500萬鎊
柏保路加西亞(烏拉圭中場)　from奧沙辛拿　　to皇家馬德里　　400萬歐元
麥斯洛迪古斯(阿根廷中場)　from愛斯賓奴　　to馬德里體育會　350萬歐元
基亞連尼(意大利後衛)　　　from費倫天拿　　to祖雲達斯　　　以300萬鎊收回擁有權
彭迪安尼(烏拉圭前鋒)　　　from拉科魯尼亞　to薩拉戈薩　　　270萬鎊
阿羅斯(澳洲前鋒)　　　　　from奧沙辛拿　　to彭拿典奈高斯　自由轉會
米高利(意大利前鋒)　　　　from費倫天拿　　to祖雲達斯　　　外借回歸

>>July 3, 2005 at 4:15:25 PM GMT+8

2005 年 7 月 1 日 星期五 【晴】

Leo成功上o左明報，響埋SSU個朵，呢點先係最重要
邊個受訪，邊個出鏡其實冇所謂，大前提係幫手宣傳
就算成功吸引目光，內裡搞成咁，目標都可能達唔到

七一巡遊 vs 七一遊行

舉辦團體

七一巡遊：多個親中團體
七一遊行：民間人權陣線

活動目的

七一巡遊：慶祝回歸 ，和諧團結創明天
七一遊行：爭取全面普選，反對官商勾結

相關活動
七一巡遊：巡遊前於政府大球場舉行集會
七一遊行：於維園草地舉行模擬公投

動員方式
七一巡遊：大會安排專車接送部分參加者到會場
七一遊行：大會沒有安排專車接載參加者到會場
　　　　　參加者須自行安排交通，自付車費

活動參加者的統一性
七一巡遊：參加者參與活動的目的幾乎完全一致
七一遊行：除爭取普選外，不同團體各有不同的訴求
　　　　　中學生聯盟反對增加高中學費及公開考試費
　　　　　職工盟爭取最低工資及最高工時
　　　　　同性戀者權益組織爭取平等待遇

橫額種類
七一巡遊：團體間的口號變化不大，較統一
七一遊行：不同團體的橫額、口號種類繁多

活動期間的文藝表演
七一巡遊：舞獅、銀樂、飄色、變臉、扇舞………
七一遊行：東南亞籍人士表演民族音樂及舞蹈

飲食
七一巡遊：中華總商會宴請會員免費／低價享用高級午膳
　　　　　工聯會宴請會員低價品茗或享用韓國燒烤
　　　　　荃灣葵青婦女會向會員送出「一日遊」門票
七一遊行：部分團體向會員提供清水
　　　　　部分團體禁止會員以「公帑」購買有味飲品
　　　　　部分團體禁止會員吃晚飯時「食阿公」

為配合活動的交通安排
七一巡遊：警方封閉一條行車線讓參加者前進
七一遊行：警方封閉三條行車線讓參加者前進

>>July 2, 2005 at 4:06:30 PM GMT+8

2005 年 6 月 30 日 星期四 【微雨】

也許這段路荊棘滿途，也許這段路永無盡頭，卻從沒想過掉頭
也許旁人失去往日的熱情，卻從不感到灰心，更沒有想過放棄
我們的訴求一日未有得到正視，我們每年都會走上這條民主路

10:55出門口，搭112出銅鑼灣，o係九龍好暢順，過o左海就開始塞車
大家都知咩事，我當然唔會不滿，因為遊行／巡遊就一定會影響交通
我只係在意巡遊又舞獅，又銀樂，又飄色，事前一定綵排o左N咁多次
而且大部分都係團隊表演，少o左其中一個都唔得，o的人好難話唔去

去到維園，第一時間係先去草地，七一模擬公投，驚遲去會冇哂選票
要知邊個投o左票，除o左睇手背，仲可以睇鞋，沾滿泥濘就應該投o左
Alien做公投義工，佢搞乜鬼？明明18歲，仲o係我手背畫圈？打tick嘛！
有兩個議題，分別問是否贊成2007普選特首、2008普選立法會所有議席
不過挑剔o的講，公投o既安排有引導性，要搞就應該係全港性大型公投

o係民陣等人，買o野，想買o個件冇大碼，最後買o左件寫住「七一長征」
真係研究一個問題：點解民陣動員到咁多年青人，我o地就接近動唔到？
Mina最先到，不過好快就唔知去o左邊，之後Leo到，點算o的物資齊哂未
返銅鑼灣出口o個邊，其中四個執委已經到o左，可以開始準備白banner

12:30趕返場中心o既四面，民陣副召集人Bobo叫有份搞街站o既去briefing
去到，Bobo去o左邊？先搵梁議員，佢叫我o地去Sogo門口接收所需物資
民主黨有貨車幫手送物資去各街站，可惜我o地o的街站物資根本仲未到
去Sogo借o野，梁議員o的義工唔知咩事，好彩最後都借到三張凳一張檯

之後o個兩粒鐘，如果要講事實之全部，我相信每十個字，有一個係粗口
核心成員有Ian + Billy衰 + Kathleen + Ho + 范長豐 + Leo + Eric + Mina + Ben
出席o既非核心成員 & 非會員包括Kenneth + Herman + Felix + Ben女性網友
14:15左右，維園突然落起大雨，好狼狽，要即時保護一切紙造o既物資

Herman先去金鐘受氣，之後Eric + Leo + Kenneth + Kathleen都帶埋物資去
去到金鐘，無論如何，必須要面對一個現實：就算開o左檔，都籌唔到款
Join埋網友，開檯，攤開o的SSU傳單 + 民陣單張，呆坐兩個鐘等大隊o黎
期間不斷有外籍人士問遊行隊伍大約幾時會到，好彩o的英文尚算過得去

冇得籌款，擺街站多餘，當機立斷，叫SSU大隊放棄遊行，全體即到金鐘
不過大隊唔多想咁做，好彩佢o地位置比較前，行到金鐘先會join返我o地
隊頭到o左，開始派o尋晚漏夜趕起o既SSU傳單，留意手背上畫o左圈之人
SSU大隊終於趕到，舉起唯一o既白banner，邊派傳單，邊開始嗌咪宣傳

警方封哂三條行車線，可以走到出快線，派俾外圍o既人，慢慢越行越前
o的傳單分批派哂，全部返哂街站，輪流嗌咪，目的只係博傳媒報導SSU
個別人士出唔出鏡冇所謂，最重要係響SSU個朵，背後o既目的係收會員

一直企o係金鐘，差不多到龍尾，馬路會解封，即時收檔，全體重返大隊
上到政府總部，又開始落雨，不過其實今日天公造美，大部分時間都天晴
要將檯凳還返俾梁議員，不過打o左N次電話都搵唔到佢同佢o既議員助理
執委要開臨時會議，其他人統統要迴避，慣常o既「私人聚會」下次先算

莊耀洸，你同民陣究竟搞乜鬼？今年七一得21000人參加？肯定唔止咁少
我16:52睇住龍頭o黎到金鐘，開始做o野，直到18:02就join龍尾上政府總部
70分鐘，警方開哂三條行車線，你話我知得21000人？我打死都唔信咁少

警方報細數，民陣報大數，本來坊間有條方程式可以計算較可信o既人數
(警方公布人數 x 1.25 + 民陣公布人數 x 0.75) / 2
即係將兩個數字adjust完之後拉出平均數，不過依家呢條方程式已經冇用
其實exact人數唔太重要，不過據現場實地觀察，上街人數至少有45000

老實講，今年七一我唔多開心，唔係因為人少，呢個預o左，係其他問題
七一有佢本身o既意義，我唔會因為一小撮渾蛋，改變自己對七一o既觀感

＊－＊－＊－＊－＊－＊－＊－＊－＊－＊－＊－＊－＊－＊－＊－＊

本人特此感謝：
香港中學生聯盟准許本人為聯盟設計聯盟橫額之八字真言及其他示威口號
音公館各網友准許本人參考一眾網友之留言，為本人之口號設計提供藍本

致香港中學生聯盟執行委員會：
本人將盡快提交報告及建議，為日後聯盟申請小販牌之相關事項提供意見

＊－＊－＊－＊－＊－＊－＊－＊－＊－＊－＊－＊－＊－＊－＊－＊

《人民之歌》　(調：Do You Hear The People Sing)

看吧！人民在挽手　爭取正義和自由
歌聲裡群情似火　滿溢激昂震撼著四週

捍衛人權護眾生　不分社會還是個人
方可叫無限理想　每日每天漸近

人民意願求實踐　自由的風不怕遏止
每刻也願勇敢　背負這革命旗幟
忘記畏懼勇踏前　正面迎接歷史

＊－＊－＊－＊－＊－＊－＊－＊－＊－＊－＊－＊－＊－＊－＊－＊

P.S.(1)黑社會大佬都有「帶子經昏蟑」，咩世界o黎o架？
P.S.(2)強烈建議Kathleen擔任香港中學生聯盟公共關係科
P.S.(3)杜明寺、杉菜o個單，隨時連累我o地遭受無妄之災

>>July 2, 2005 at 4:31:03 AM GMT+8

2005 年 6 月 29 日 星期三 【乍寒還暖】

本來打算晏晝先去上環食環署辦公室，搞掂臨時小販牌o既手續
點知一個電話打o黎，要先去上環拎通知書，再去灣仔交埋牌費
10:45出上環，出門口o個陣仲係陽光普照，去到上環就滂沱大雨

上環市政大廈10樓，中西區環境衛生辦事處，拎申請批准書，畫龜簽收
拎住批准書，去灣仔駱克道市政大廈，交$380牌費，領取正式小販牌照
去灣仔o既途中，發現本來行皇后大道東o既線，因遊行而改經軒尼詩道
終於拎到臨時小販牌照，牌照類別寫住「籌款活動」？呢鋪仲唔發達？

o係灣仔搞掂哂正經事，搭電車去銅鑼灣，join遊完車河o既Leo去食lunch
跑勻成條渣甸街，最後都係去返上次o個間大家樂，食相同o既日式烏冬

食完，行過唔見o左o的字o既奧運橋，再去中央圖書館，特登搵到海景位
Leo推介搞笑《大英百科全書》，有可能唔帶得入大陸，我就繼續蔡子強
其實都唔係點睇到書，成日有電話，座位距離toilet遠，要衝入toilet聽電話
聽日最重要o既物資大致上搞掂，唔該哂姓梁o既立法會議員 & 中間人Mina

只係睇o左一本書，坐到17:00左右，趁停雨快o的走人，臨走前去埋toilet先
排泄期間，電話響，原來Ian打o黎，超狼狽，唔知做得邊樣，Leo笑死o左
Brainstorm仲有乜o野未準備，好似冇，聽日運送物資去金鐘會有少少麻煩

唔打算再呼籲人出o黎，有心o既，落雨都照o黎，冇心o既，叫唔叫都一樣
七一o既象徵意義，只要願意付出努力，香港人的確可以掌握自己o既命運

＊－＊－＊－＊－＊－＊－＊－＊－＊－＊－＊－＊－＊－＊－＊－＊

各有意參與明日七一遊行的人士，請注意以下事項：
1)天氣不穩，請隨身帶備雨具
2)七一模擬公投於上午十一時起，在維園草地舉行，有興趣之人士可提早前往投票
3)主辦單位建議遊行人士穿著白色衣服
4)遊行隊伍可能被安排於行人路上行走，請忍讓，避免與行人發生衝突

另外，不論閣下是否香港中學生聯盟之成員，亦歡迎加入聯盟之遊行隊伍
請於銅鑼灣入口進入維園，聯盟將有指示，安排各位進入聯盟之集合地點

＊－＊－＊－＊－＊－＊－＊－＊－＊－＊－＊－＊－＊－＊－＊－＊

Re挺：咁淺，唔使俾提示都得

Re Mina :
Billy衰send俾鄧偉棕o既e-mail都未覆，應該唔關佢事，佢可以做乜o野？
我又覺得唔應該將o的凡係唔認同某理念o既人，簡單歸類為大公、文匯
佢o個種保守又唔係平時見開o個o的，佢認同年青人對事物有多o的接觸

Re小某：
你指劉太？唔敢妄下定論，佢其實唔反對學生參與社運，不過要先思考
唔覺得佢極端保守，其實香港的確唔少人對泛民主派o既理念仍有保留

>>June 30, 2005 at 1:59:16 PM GMT+8

2005 年 6 月 28 日 星期二 【晴】

下定決心返學校，搵老師贊助YC之餘，睇下究竟有冇貼o左海報
小息後返到，打算先搵劉太，但係佢上緊堂，cover有人排drama
呆等足足兩堂，o的drama人走哂，先至見到劉太返o黎副校長室

學期初同劉太提過搵馬嶽o黎演講，冇太大反彈，以為今次都可以好順利
點知我一開口，講o左有乜組織合辦，佢就即刻耍手兼擰頭，話唔會贊助
佢一聽到SSU有o的乜o野顧問，佢就認定SSU有政黨背景，唔想財政支援
如果你問SSU有冇政治立場，有；不過如果你問我o地有冇政黨聯繫，冇

佢唔太認同泛民主派o既理念，話佢o地冇建樹，甚至連o的大狀都唔放過
佢又覺得香港未夠條件發展民主，香港冇從政者代表到市民，都只係政客
不過就同意要向呢個方向走，o係唔受其他人影響下反思民主o既真正概念
又贊成青年人多o的獨立思考呢方面o既問題，從來冇講過反對我參加SSU

有o的估唔到o既係，佢甚至贊成我o係大學摸清自己o既理念後，將來從政
「從政者」o係香港好多，佢就希望我係講原則o既「政治家」(statesman)
最後sell唔掂劉太，不過佢答應幫我跟進海報o係邊，盡力貼出o黎俾同學知
本來想sell埋其他老師，不過呢個「孤獨的推銷員」已經冇o尋日o個種信心

＊－＊－＊－＊－＊－＊－＊－＊－＊－＊－＊－＊－＊－＊－＊－＊

致香港中學生聯盟各執委及成員：
食物環境衛生署已正式批出本人之臨時小販牌照申請
聯盟獲准於七月一日下午，於金鐘道高等法院外之行人路合法地設立街站
本人將於明天到上環之食環署辦公室，辦理領取牌照手續
並按照《香港中學生聯盟會章第51條》有關規定，墊支牌費

＊－＊－＊－＊－＊－＊－＊－＊－＊－＊－＊－＊－＊－＊－＊－＊

舒拉寶娃老公係姚明(猜一球星)

>>June 29, 2005 at 2:15:27 PM GMT+8

2005 年 6 月 27 日 星期一 【晴】

Lunch後跑去西九龍先施為Grad Din準備恤衫西褲，要盡量慳儉o的
淺藍色短袖恤衫 + 黑色西褲，Grad Din呢o的場合都要著得企理o的
14:30已經買完，仲有大把時間，返屋企睇多陣洲際國家盃先出去

青年圓桌會議2005籌備委員會(大會)會議
六個執委o黎：Ian + Billy衰 + Kathleen(遲到) + Ho + 范長豐 + 小Billy(遲到)
按抵達次序，其他人包括Chris + Henry + Eric + Kit + Leo + Plum & her friend

為星期五而特別訂造o既banner極速完工，o個間公司不足24小時內造起
Kit對開會中途先到o既Kathleen問「你係咪Kathleen呀？」，引起全場大笑
最鍾意邊開會邊食o野，果汁軟糖 + 迴轉曲奇，轉轉下順時針變成逆時針

講返會議內容，暫時收到o既14個申請當中，嚴重失衡o既2 : 12男女比例
想辦法拖數，盡全力拖到最近一刻先交數，睇下崇基會唔會逸夫咁好人
搵呢個人幫手，我持開放態度，不過如果佢唔o黎，對活動氣氛會比較好

搞呢類活動，經費最重要，面對融資問題，要快o的寄出邀請信，搵贊助
我係想聽日返學校，搵老師盡可能尋求贊助，兼夾check究竟有冇貼海報
商量送乜o野書作紀念品，我都好想要湯家驊o既《從人大釋法說起……》
鄧偉棕、余若薇、吳藹儀、蔡子強、黃偉豪o既書都可能有得送，超著數

分配工作，我同Henry負責第三日o既細節，搞唔掂o既懲罰相當具阻嚇性
義工 + 參加者都要o係7月24日去旺角教協briefing，義工仲要睇埋《中學》

下次會議(大會)日期：民國94年7月11日(星期一)
時間：下午二時正
地點：香港人權監察上環辦公室

大約19:00已經開完會，可以散場，不過一段時間冇見，走o左去麥記吹水
「冗員」o既定義，由全SSU最搞笑o個位提出，仲有邊個？唔通係我咩？
月旦一番，不談政治，純粹吹水，足足吹o左大半粒鐘先肯走，各自散隊

>>June 29, 2005 at 5:49:14 AM GMT+8

2005 年 6 月 26 日 星期日 【酷熱】

08:25正想出門口之際，中區警署又打o黎，佢o地又有o野問
玩o野咩？咁都要問，問o的咁o既問題，多少有o的啼笑皆非

打籃球，荔景室內場，場內設計好怪，o的公公婆婆仲打緊乒乓球
呢個場超唔旺我，o的外圍、中距離死哂火，接應回馬槍全部唔掂
唔知邊度o黎o既人好勁，又高好快，阻唔到佢o係罰球線殺埋籃底
單靠雪 + 子鋒o既進攻有把握，根本唔足夠，結果大敗差不多10分

坐o係場邊睇第二場，雪 + 龜雙劍合壁，搶籃板o既外線高佬……
中區警署又打o黎，好麻煩，要我講精確位置，其實到時到會移動
龜做唔到Horry添，射唔到外圍，只係以普通o既運球上籃結束賽事

第三場落返場，對方加埋駱宏志，排出超高o既三塔陣式，屈內線
人o地射失o左都有第二機會，我o地唔入就冇，唔敢o係三分線起手
唯一得到o既兩分，o係葫蘆頂fake起，大步殺落籃板順勢上籃擦板
不過內線力量o既分野主宰一切，打o左兩場，兩場都輸，毫無表現

打到最後o個場，最初o個段都一切正常，有o的隊型，搵到進攻方法
到o左差不多夠鐘交場，鬥打快攻，唔防守，拎到波就衝去對方籃板
打o左不過兩粒鐘，已經搞到周身汗，唔想著返o個條超焗o既牛仔褲

o係度多謝肯借電話o既各位，俾我應付o個位死差佬，老婦o既纏腳布
拉大隊返荃灣Co Co Duck打躉 + 醫肚，冷氣壞就唔好俾o個個位我o地
頂唔順，轉上吧檯吹水，邊吹水，匪等電話，其實電話已經唔多夠電

散場，未約好o個邊幾時o係九龍灣會合，跑上聰o既名逸居會所打桌球
根本好難打波，成日都要接電話，不斷用鰻魚o既電話，冇時間埋檯邊
有時面對突發事件，唯有退而求其次，因為一定要o係星期五之前有貨
講返桌球，憑運氣一度連贏四場，的確係運氣，太耐冇打，冇o左球感

出唔出九龍灣，依家已經冇乜所謂，篤完波，身水身汗返屋企，沖涼
打波o既代價，右腳腳趾公有血泡(水泡含血版)，左腳腳掌全隻都好痛

＊－＊－＊－＊－＊－＊－＊－＊－＊－＊－＊－＊－＊－＊－＊

會議通知，青年圓桌會議2005籌備委員會(大會)會議
日期：民國94年6月28日(星期二，即明天)
時間：下午四時三十分
地點：專上學生聯會旺角會址
備註：歡迎從未出席之人士出席會議

＊－＊－＊－＊－＊－＊－＊－＊－＊－＊－＊－＊－＊－＊－＊

Re死硬派利物浦／謝四迷(我知係邊個)：
講真，利物浦根本唔係講華麗技術、充足人腳，你唔會唔同意o掛？
我係指利物浦o既個人技術明顯o係AC之下，但係靠無窮鬥志後來居上
本人絕無任何貶低應屆歐聯冠軍隊之意，本人深明明哲保身之道……

>>June 27, 2005 at 5:07:22 PM GMT+8