2005 年 6 月 15 日 星期三 【乍寒還暖】

朝早冇靈感寫稿，擺埋一邊，反正唔趕，聽Eason新碟
Lunch之後出銅鑼灣，冒雨趕去繁忙時間o既中央圖書館

Leo早就到o左，佢非常熱衷於進修英語，而我就似乎愛理不理
六樓有位，上八樓拎o左一大疊書落去，坐低邊嘆冷氣邊嘆書
o黎o左中圖好幾次，Leo觀察到一件事，而我就從來冇去觀察

Leo行開，職員o係佢個位貼o左張紙，15分鐘內唔返就收返個位
佢返o黎之後貪得意，o係紙背面寫o左五句，行過就見到o的字
o個五句o既首二字分別係：「平反，釋放，追究，結束，建設」

《董建華語錄》，明抄《毛主席語錄》，細細本，擺得落衫袋
林子揚《一國沒兩制就沒有新香港》，節錄佢o係蘋果o的專欄
《七一解讀》，集錄o左各人o係2003七一前後o係明報o既評論

打書釘打到16:00左右，同Leo搭112塞車去油麻地九龍中央郵局
通常搭車，話題始終不離o個幾條友，我都好想嚴詞譴責佢o地

去九龍中央郵局係要開SSU信箱，睇下有幾多學校交YC報名表
入到去，似演緊搞笑喜劇：我同Leo都唔記得o左SSU信箱號碼！
周圍打俾人，就係想搵人去SSU網頁，幫手搵SSU中央郵箱號碼
終於o係Karsum口中搵到正確號碼，原來係71731而唔係71737

開信箱，拎走唔相關o既信，我o既反應同電話中o既Karsum一樣
o下？？乜話？？得一封？？得一間學校寄o左報名表o黎？？？
十級大地震！我o地唔怕申請表多到要甄選，最怕報名人數太少

急急腳離開郵局，邊行邊商討對策，吉野家坐低安定落o黎食tea
食牛肉都冇味，只識諗點樣o係短時間內宣傳，其實辦法唔係冇
麻煩各位朋友留意小弟聽日o既日記，拜託各位幫小弟一個大忙

公告：
由於發生緊急事故，明日於旺角教協之會議將提前於16:00開始

>>June 16, 2005 at 1:40:37 PM GMT+8

2005 年 6 月 14 日 星期二 【乍寒還暖】

要趕四份稿(其實唔太趕)，一日之內搞掂o左兩份半
寫o既同時，自己諗過乜諗到乜，全部用文字紀錄低

同Leo玩牙骹，依家唔知誰勝誰負，唔知要計674抑或710
一早知情節結局o既爛片，懶得花時間睇，慳返啖氣暖胃

P.S(1).搞成咁，唔好意思唔湧去東亞銀行擠提o掛？
P.S(2).等電話等到頸都長，再唔打o黎，我唔響朵o架喇！

>>June 15, 2005 at 3:04:14 PM GMT+8

2005 年 6 月 13 日 星期一 【乍寒還暖】

強隊打多弱隊一兩個都還可以，每人走多步 + 高質素取勝
不過如果人o地打多我o地五六個，玩人海戰術，點夠打？

Directly copied from Leo's ICQ :
蒙上帝洪恩的中學生聯盟會員:
民陣恩准吾等在金鐘道高等法院對出設街站。
警方表示今年會嚴打「非法籌款」，民陣建議我們申請臨時小販牌，避免警方有口實。
(下略內部通訊)

夜晚臨急臨忙跑落街，將地圖上金鐘高等法院一帶o個part放大影印
終於o係deadline前o既最後一刻，將臨時小販牌申請表fax去食環署
攝政皇，爽手o的啦，你一個人o既懶懶閒，隨時累死我o地所有人！

>>June 14, 2005 at 3:45:59 PM GMT+8

2005 年 6 月 12 日 星期日 【晴】

今朝NBA總決賽Spurs vs Pistons第二場，戰況完全一面倒
Ginobili癲o架，Pistons冇人可以守得住佢o的直角假身埋籃
Pistons之後三場都主場，可唔可以憑主場之利追返上o黎？

網上激烈辯論，其實大家o既立場唔係差太遠，只係靈活性問題
原則當然唔可以唔守，但係做法上可以靈活o的，唔使次次硬碰

Re Leo :
《聯合國憲章》當中，五個安理會o既常任理事國o既正式名稱
美利堅合眾國
蘇維埃社會主義共和國聯邦
大不列顛及北愛爾蘭聯合王國
法蘭西共和國
中華民國

>>June 13, 2005 at 3:56:19 PM GMT+8

2005 年 6 月 11 日 星期六 【酷熱】

咦？今日好似有o的好重要o既事喎……究竟乜o野事呢？
記唔起添……完全冇印象呀……算啦……我唔理喇……

從某人口中得知o既事，簡直匪夷所思，點可能發生咁o既事？
站於我o既立場，我會覺得o個條粉腸應該犯o法，不過唔肯定
我梗係想知道條友係咪真係犯法，所以我會先請教一下鄧偉棕

>>June 12, 2005 at 3:44:55 PM GMT+8

2005 年 6 月 10 日 星期五 【酷熱】

為免進一步令家庭關係變僵，決定唔出去追債，追信箱鎖匙
如果星期一都冇最重要o既社團註冊證明，七一唔使旨意籌款

發夢，好邪，目睹兩年前州際國家盃o既慘劇，好似有人o係球場倒下
認得球員個樣，再翻查球員名單，佢真係有份踢今屆州際國家盃……

隨著歐洲球季主要賽事大致上完結，各球隊亦開始為下季組軍作準備
班霸要砌起星級陣容，中型班要留住主將，財困、降班隊就急急散貨
基拿甸奴、費蘭度托利斯、卡斯辛奴、艾斯恩，最後究竟情歸何處？

車仔事先張揚會搵左閘、中場、前鋒，阿祖安奴抑或費蘭度托利斯？
皇馬連續兩季食白果，除o左費高，仲會有邊個大牌球星冇得留低？
曼聯改革勢在必行，但係唔夠錢之餘，心中獵物仲要同人拗一輪手瓜

季尾至今重要轉會

英格蘭球壇：
耶古堡(尼日利亞前鋒)　　from樸茨茅夫　　to米杜士堡　　　700萬鎊
西蒙戴維斯(威爾斯中場)　from熱刺　　　　to愛華頓　　　　350萬鎊
科素(芬蘭前鋒)　　　　　from車路士　　　to伯明翰　　　　300萬鎊
雲達沙(荷蘭門將)　　　　from富咸　　　　to曼聯　　　　　250萬鎊
艾朗曉士(北愛爾蘭後衛)　from紐卡素　　　to阿士東維拉　　110萬鎊
貝加(捷克中場)　　　　　from樸茨茅夫　　to阿士東維拉　　自自轉會
拿夫迪(突尼西亞中場)　　from桑坦德　　　to伯明翰　　　　以100萬鎊正式買斷
希斯貝加(德國中場)　　　from阿士東維拉　to史特加　　　　自由轉會
伊度(巴西中場)　　　　　from阿仙奴　　　to華倫西亞　　　自由轉會
基斯普(阿根廷前鋒)　　　from車路士　　　to AC米蘭　　　 續借

世界球壇：
文尼治(葡萄牙中場)　　　from波圖　　　　to莫斯科戴拿模　1200萬鎊
哥斯甸拿(葡萄牙中場)　　from波圖　　　　to莫斯科戴拿模　300萬鎊
沙達列迪斯(希臘後衛)　　from波圖　　　　to莫斯科戴拿模　轉會費不詳
列基美(阿根廷中場)　　　from巴塞隆拿　　to維拉利爾　　　以500萬歐元正式買斷
謝拉特(西班牙中場)　　　from巴塞隆拿　　to摩納哥　　　　自由轉會
艾斯基路(西班牙前鋒)　　from畢爾包　　　to巴塞隆拿　　　自由轉會
雲保美(荷蘭中場)　　　　from燕豪芬　　　to巴塞隆拿　　　自由轉會
禾高(瑞士中場)　　　　　from燕豪芬　　　to AC米蘭　　　 自由轉會
贊古路夫斯基(捷克中場)　from烏甸尼斯　　to AC米蘭　　　 1000萬歐元
雲達華治(荷蘭中場)　　　from阿積士　　　to漢堡　　　　　500萬歐元
奧禾莫耶拉(德國後衛)　　from比勒費爾德　to雲達不來梅　　150萬鎊
簡尼捷達(意大利中場)　　from拉素　　　　to祖雲達斯　　　自由轉會
羅拔高華(克羅地亞中堅)　from拜仁慕尼黑　to祖雲達斯　　　自由轉會
古科(迦納中堅)　　　　　from拜仁慕尼黑　to羅馬　　　　　200萬歐元
芬寧斯(德國中場)　　　　from拜仁慕尼黑　to雲達不來梅　　球員交換
伊斯美爾(法國後衛)　　　from雲達不來梅　to拜仁慕尼黑　　球員交換
拿姆(德國後衛)　　　　　from史特加　　　to拜仁慕尼黑　　外借回歸

＊－＊－＊－＊－＊－＊－＊－＊－＊－＊－＊－＊－＊－＊－＊－＊

七一大遊行簡短資料

主題：反對官商勾結，爭取全面普選
日期：2005年7月1日(星期五)
時間：下午三時正
地點：維園集合，遊行至中環政府總部
備註：遊行前的中午，將於維園舉行公投
　　　請於當日穿著白衣，並歡迎自備橫額或示威牌

詳情可向民間人權陣線(www.civilhrfront.org)查詢

>>June 18, 2005 at 3:05:44 AM GMT+8

2005 年 6 月 9 日 星期四 【酷熱】

Leo介紹去中央圖書館尋寶，朝早決定殺上去狂打書釘
搭地鐵去銅鑼灣，再九曲十三彎咁去中圖，好麻煩囉

直上8樓o既參考書部，Leo已經開始搵料，Ian就溫書準備考試
明明o係search engine話「館內架上」，點解去到書架就冇？
o尋日Kit交帶落o既「功課」，搵關於小組遊戲o既書，好難搵
終於搵到兩三本，裡面o的遊戲比上年o個o的好何止千百倍？

正經o野做完，搵自己有興趣o既書，可惜呢層o的書唔借得走
另一本係六四前後o既專欄社論，原來楊森曾經做過匯點主席
八九學運期間中外報紙頭版，包括最惹火o既四二六社論全文
再一本係呢段時期o既珍貴圖片集，始終對呢張o既印象最深


搵埋Ian出去，其實圖書館隔離就有茶餐廳，點解要行咁遠？
o係銅鑼灣心臟地帶兜大圈，最後係大家樂，眼鏡盒霸位……
我都算幾幸福，學校附近乜都有得食，唔會日日食，食到厭

返中央圖書館，經過奧運橋，兩棵防間諜樹，的確睇唔到裡面
晏晝多o左人去中圖，難搵位，Karsum o黎o左都要坐唔到埋o黎
搵到《聯合國憲章》，Leo所言非虛，憲章竟然仲有呢兩個名稱

用scanning & skimming兩個鐘之內，掃哂成本《中共治國之道》
冇《九評共產黨》咁激，同樣係彈多於鑽，但係呢本相對地客觀
最衰八九樓呢兩層o既書都唔借得走，否則一定借返屋企慢慢嘆

差唔多16:00就全體撤退，抄低書名，搭巴士去西營盤o既攝政皇府
今日要拎返o既重要物資：信箱鎖匙(最重要) + 印章 + account........
搭車都講壞話，圍繞攝政皇 + 三個太上皇o既壞話，十日都講唔哂

最初去到攝政皇府樓下等，俾警察盤問做緊乜，唔係因為我o掛？
玩o野咩？之後點我o地跑去東邊街，佢自己就施施然企o係對面街
又係你叫我o地16:00打俾你o架喎，依家你又話我o地遲到，想點？
你講笑喳嘛？信箱鎖匙咁重要，你話o係家姐度都還可以，阿媽？

將一大箱o野抬去上環搵地方慢慢點算，唔算重，不過抬得唔舒服
Karsum走先，剩下三人兜到皇后大道中，終於搵到麥記可以坐低

拆箱，逐件拎出o黎……我o個陣超想%$!^#$@$^攝政皇 + 太上皇！
法國電影節宣傳單 + 匯豐單張 + 高爾夫球及休閒服裝 + 九評共產黨
最離譜o既竟然有我都做過o既會考MC Cloze練習，嚴重o既公器私用

o的信紙咁擺法，爛爛地，你唔係叫我o地寄咁樣o既信紙俾人睇o掛？
積藏o左大量可有可無o既物資，區議會選舉宣傳 + 記協2004年報……
唔清楚MUN係乜，不過肯定與SSU無關，點解又擺埋入呢個箱裡面？
數簿 + 會員名單 + 提款咭 + 部分單據 + 最重要o既社團註冊證明都冇！

中學生聯盟法定主席暨發起人伍先生，唔該快o的交返license出o黎啦
中學生聯盟前主席伍小姐，你到底仲收埋o的乜？唔該都交埋出o黎啦
中學生聯盟外務副主席陳先生，你屋企仲有乜o野？聽日交哂出o黎啦

Ian要抬呢箱o野返屯門，幫佢搬到去荃灣，餘下o既路程靠你自己喇
眾所周知，香港中學生聯盟總共有三個主席，各有唔同o既稱呼……

Legal Chairman :
SSU根據《社團條例》註冊，o係警局o既社團名冊內，主席一欄o個位
Elected Chairman :
一睇字眼都知，經SSU會員o係執委選舉一人一票選出o個位
Active Chairman :
實際運作好似好似主席，又或者當正自己係主席o個位

P.S.偶像冇得再彈琴添……

>>June 10, 2005 at 4:09:01 PM GMT+8

2005 年 6 月 8 日 星期三 【乍寒還暖】

今朝睇南美大戰，又錯過o左開波冇耐o既入波，卡富……
列基美癲o架，又射o的世界波，維拉利爾唔可以冇o左佢
阿根廷連同亞洲o既四支勁旅，都可以訂定機票飛去德國

晏晝兩項活動都o係旺角舉行，唔使周圍走咁麻煩，不過都好累
出旺角，join埋小妹，一支箭衝去潮特，拯救被大雨圍困o既災民
Eric + 小妹 + 肥 + 希 + Cindy走返去旺中，大家都知旺中賣o的乜
Polly話點都要o黎拜會拜會，叫我千祈唔好走，有乜好拜會o者？

o係旺中齋行，行到差唔多過鐘，搵地方食o野，其實遲都冇所謂
唔食得熱，要搵凍o野，最後決定又上朗豪坊，滿記香蕉pancake
收到有幸外遊者o既手信，多謝，我都好想有得大派手信o架……
已經遲哂大到喇，食完o野，即刻就告別大隊，全速跑上教協開會

青年圓桌會議2005籌備委員會會議(活動組)
出席者：Kit + Chris + Henry + Ian + Leo + Karsum + Eric

原來之前好多篇日記都有嚴重資料錯誤，唔想逐個改正咁麻煩添
上星期四o係HRM總部o既並非大會會議，同樣都只係活動組會議
正式o既籌委會名單，竟然有伍小姐……冇計o架喎，佢合法加入

我贊成用辯論方式喎，如果要炒得起氣氛，就一定要先擦出火花
營內Day 1 o既爆大鑊環節提前o係今日上演，四個中學生大吐苦水
開會o者，唔係真係做討論，我o地諗多o的案例到時用就得o架喇

關於Day 2活動內容o既可怕籌備暫時結束，講到Day 3個個精神哂
check-point內容溝埋《兒童權利國際公約》呢個主意唔錯，我支持
唔同o既遊戲睇落去好普通，原來玩o既過程可以收到咁樣o既效果

下次會議(活動組)通知
日期：民國94年6月17日(星期五)
時間：下午四時三十分
地點：旺角教協

下次會議(大會)通知
日期：民國94年6月26日(星期日)
時間：待定
地點：待定

>>June 9, 2005 at 4:40:07 PM GMT+8

2005 年 6 月 7 日 星期二 【晴】

寄信寄o左成個星期有多喇喎，仲未貼張海報出o黎o既？
以荃官為例，貼o左都冇人理o者，循例要知會學生o掛？

隊友博到12碼返o黎，射唔射得入都要靠劊子手自己o既造化
康熙年代o既「不露其長，恐其見棄；露其長，死其見疑！」
將中國傳統專制政治文化套用o係其他地方，原來係何其相似

明，乜都唔得嘛，總之呢樣又唔得，o個樣又唔得，全部唔得
簡單講，凡事只有你認可o既先可以做，其他o既一概唔准！

公告
明天之會議地點：旺角教協
更正：明天之會議為活動組會議，並非大會會議

Re小某：我用o左三次你先出聲？依家一個中國，各自表述o者
　　　　如果真係要玩o野o既話，今日係……平成16年6月8日

>>June 8, 2005 at 2:56:05 PM GMT+8

2005 年 6 月 6 日 星期一 【晴】

Pizza Hut寄o黎最新外賣速遞優惠，o的優惠套餐好似唔錯
不過優惠五月初開始，下星期三到期，依家先寄o黎？？

青年圓桌會議籌委會誠邀各位成為本活動之幕後工作人員
活動名稱：青年圓桌會議(Youth Conference) 2005
日期：民國94年8月1-4日, 20日
地點：中文大學崇基學院、立法會大樓
職位*：組長、物流、膳食等……
工作範圍：先聯絡，後詳談
薪酬：無，須支付不多於$250之營費
資格：年齡、性別、學歷、國籍、種族不拘
　　　不須為中學生聯盟會員，亦不須為中學生
　　　不必熟知社會時事，亦不須曾參與此類活動
注意事項：除活動舉行的日子外，還須出席工作會議
　　　　　組長及副組長須接受pre-camp training
聯絡：楊卓衡(Karsum)(ICQ : 177348110)
　　　亦可由我代為轉達

*只欲純粹參加活動(即普通組員)者，請向所屬學校報名

青年圓桌會議籌備委員會(人事組)啟

>>June 18, 2005 at 2:58:38 AM GMT+8