2005 年 5 月 6 日 星期五 【酷熱】

頂班球星o既賽程，通常都係週中打一場，週末再打多場
如果只講把守獨木關，人人都守到龍門，不過仲有好多o架
指揮防線、控制比賽節奏、策動反攻，龍門可以做好多

無論一隊球隊用乜o野戰術，點都應該至少有一個正箭頭
如果個個都棟o係外圍或者邊線，邊會有最終o既傳送目標？
守得幾滴水不漏、搓得幾絲絲入扣，冇射手做最後o既工作都冇用

乜都係假，冇體能o既話，乜o野技巧都使唔出，行行企企
開始腳軟o既話，根本連開死球都控制唔到落點、孤度
射12碼永遠都係掃把腳最穩陣，唔使勁，最緊要擺入網

Re大蘋果：Derek Chan因乜事入廠？或者可以寫信去指正喎
登錯名唔出奇o丫，人o地家姐乜水先？一提SSU實諗到佢喎

P.S.(1) 依家先開波會唔會遲o左o的？上年呢個時候連poster都出埋
點都好，呢個我join硬，不過唔知會唔會因此犧牲搵暑期工o既機會
P.S.(2) 都話俾我講中啦，真係要鬥到最後一週先知道鹿死誰手
發覺《生還者》o既chorus可以送俾所有仲護緊級o既球隊，應景

>>May 7, 2005 at 4:13:29 PM GMT+8

2005 年 5 月 5 日 星期四 【晴】

所以話香港人有創意，以AL為題o既改編歌詞有如雨後春筍
改編《刻不容緩》o既唔係我，我只係再將某o的字眼略作修改

為何突然上進　人人讀暈　庸庸碌碌考生
連續幾科都無運　次次失手扣分
凌晨讀來讀去　研磨論文　明明溫書有靈感
無奈一開始o既實用文　發現原來手震

高考注定最不幸　只怪考試人太笨
現在還未訓　人人挨到震　落力去溫

埋頭三個鐘　誰人不會瘋　連場搏鬥性命斷送
難題的確兇　人人都說那速讀　題目好蝦人
如何地預備　每一句跣你　考生剔錯最後送終
最弊明明背過的仍然唔中　憑老作但無奈夠鐘

溫一科　炒一科　再多的溫習已是無用
溫一科　炒一科　入U的希望跌入裂縫

難題極其賤格　題題焗人　出卷招式創新
評核多艱辛　任你多夠運　也會驚慌發震
貼士最後也不問　優秀分數難靠近
現在還未訓　人人挨到震　落力去溫

埋頭三個鐘　誰人不會瘋　連場搏鬥性命斷送
難題的確兇　人人都說那速讀　題目好蝦人
如何地預備　每一句跣你　考生剔錯最後送終
最弊明明背過的仍然唔中　憑老作但無奈夠鐘

溫一科　炒一科　再多的溫習已是無用
溫一科　炒一科　入U的希望跌入裂縫　連提及亦會心痛

高考注定最不幸　優秀分數難靠近　現在還未瞓
唔願瞓　人人挨到震　落力去溫

埋頭三個鐘　難題不會懂　前途往往這樣斷送
埋頭三個鐘　難題總是留了白　難做到天地動容
明明是沒運　再屈我老襯　有心迫我這樣扣分
最弊明明讀過的完全唔中　還如果能重拾信心

溫一科　炒一科　再多的溫習最後無用
溫一科　炒一科　終於知慘敗刻不容緩

(後記：最後o個句唔知點改好，請教各位)

Re Tracy : 我係壞就會用"professional"而唔係"amateur"
我係壞就唔會堅持前晚o個球唔入(事實證明真係詐糊)
笑話講得太多會變得唔好笑o架，下次轉新笑話啦

Re大蘋果：皮蛋黃出哂名係「港版比利」，我指把口
而且如果你有睇第二回合，車仔係絕對唔值得贏波出線
其實SSU有必要增加傳媒曝光率，唔趁呢o的機會等幾時？
作為外務副主席，又最show off最活躍，理應接受傳媒訪問
早幾日Billy衰都上生果報，講學校限制學生搞校外o既ECA

P.S.(1) 2005英格蘭足球先生：林柏特(車路士)
P.S.(2) 誠徵以下球員慶祝入球o既方式：
加卡　祖高爾　尼維特　謝拉特　古利　卡斯辛奴

>>May 6, 2005 at 2:54:47 PM GMT+8

2005 年 5 月 4 日 星期三 【酷熱】

足球就係咁，唔係你話發揮好就會贏，雖敗猶榮都係輸
PSV兩場都打得比AC好係一回事，AC把握到機會係另一回事
有o的擔心AC咁o既表現，會唔會間接連累愛華頓下季緣盡歐聯？

返學校中化oral practice，明明好早到，最後好遲先入課室
題目俾人一換再換，次次o的題目好短，多想像空間：八達通
可能係因為一段時間冇練，太多語助詞，可以再好o的o架

六人小組討論，我都唔想有o的咁o既題目：為政不在多言
最驚呢排淨係識鬧人，言詞極尖銳咁鬧，搞到唔記得點討論
好驚又一次俾人吹壟斷發言，又怕太禮讓冇位入，要把握機會

正規o既practice完o左，轉去麥記私下practise多幾次，理想計劃
開餐 + 傾計o既成份居多，o的past papr擺哂上檯面都好似透明咁
好難得先真真正正圍埋一齊，但係又呢題唔想做，o個題唔想做
人在心不在，早已經掛住衝出葵芳行街睇貨，為三日後作準備

新都會 + 葵涌廣場，又唔係全無目的咁行商場，其實都算好悶
不過我真係唔知點揀，因為冇得投其所好，唔知買乜最適合
thanks for the "amateur" advice from 希 + 龜 + Polly + Candy
行到差唔多20:00先返到屋企，難得媽媽冇問我買o左o的乜

JUPAS Statistics 2004:
http://histdept.hp.infoseek.co.jp/jupas2004.zip

Re Tracy:
個個睇報紙都會睇哂全份，個個都揭到o個版有乜出奇？

P.S.無線咁夠膽？「血染的風采」呢五個字唔可以亂用o架喎～

>>May 5, 2005 at 3:20:54 PM GMT+8

2005 年 5 月 3 日 星期二 【酷熱】

都話利物浦係歐聯神經刀，乜都做得出o架啦，爸爸又唔信
摩連奴o係首回合前仲牙屎擦擦話車仔一定砌得低紅軍
到o左次回合前，佢就話就算車仔輸波都係英雄，佢都餚底

又一次開o左波先俾鬧鐘整醒，係咪因為手機鬧鐘唔夠大聲？
我相當懷疑路斯加西亞o個球係過o左白界，最衰冇底線鏡頭
利物浦對任何球隊o既策略都係七個字：先入波，然後死守
不過毫無疑問，車仔抵輸，佢根本組織唔到有威脅o既埋門
賓尼迪斯真係有佢一手，三次輸俾車仔唔緊要，贏你呢次就夠！

知道車仔對紅軍呢個戲碼，就決定邊支英格蘭球隊入決賽就捧邊隊
而利物浦如果要確保下季唔使換隊長，下場一定要贏埋，捧盃而回
不過我又唔多想紅軍一搔21年之癢，因為我全力支持愛華頓踢歐聯
利物浦照計會鬥同樣擅守o既A米，難保唔會重演兩年前o既決賽戰況

如果要create埋我o地入WE裡面，相信有一欄數值一定要作大：體力
好o既後衛除o左要有包抄、位置感、速度之外，仲唔可以好易就冇氣
如果一個後衛打10分鐘就叉腰、跪低、捏心口，相信冇乜教練肯出佢

龍門俾人近距離勁射，食波餅、心口碎大石事小，俾人省中要害事大！
做球員要識得保護自己，但係又唔可以驚波，兩者點樣取得平衡？

可能我o的article次次都好長篇幅，要勞煩《都市日報》編輯安排版位
我覺得我原先o既title比較切合全文，唔太明編輯點解要幫我改title

Re大蘋果：我睇生果報都睇到o個幅相，我有必要講句公道說話
其實Anna係DDN執委，所以佢有份合照唔出奇，又冇話佢代表SSU
不過，我睇過今日《大紀元報》，我覺得呢個先至最反高潮！
「現時是一名大一學生的香港中學生聯盟發言人陳Ｘ……」
我依家竟然有o的見怪不怪，會唔會真係有「溫水煮蛙」o既效果？

P.S.本來諗住今晚出夜街，不過最後決定都係唔出，不過一個月後必出

>>May 4, 2005 at 1:47:23 PM GMT+8

2005 年 5 月 2 日 星期一 【酷熱】

住得低層，出入都方便o的，但係絕對唔見得乜都好
好彩係朝早屋企仲齊人o個陣發生，否則一定手忙腳亂

媽媽拆醒熟睡o既爸爸，連我都o係睡夢中驚醒，當時係07:45
嘩，成個toilet地板都係水，而且係有好濃異味o既水
媽媽博哂命咁將積水倒落浴缸，o的水就o係馬桶湧出o黎
差o的滿瀉流出廳，要攝多幾條毛巾，阻止「水災」蔓延
應該係鹹水渠塞o左，樓上o既廁所水倒流入屋，浴缸都唔去水
好彩toilet範圍內仲有條東隧：洗水盆仍然去水，交通暢順

爸爸即刻落樓搵看更上o黎睇，看更視察環境後話會急call師傅
每隔一段時間就有大量污水湧出，應該係撞正樓上有正沖廁
看更就跑足上面o個11層，盡可能叫人人暫時唔好用廁所水
叫齊樓上88戶，戶戶都唔沖廁係好難，不過做o左好過冇做

閂o左大廈o既鹹水總掣，總算暫時制止「災情」無限地惡化
看更搵o左兩個清潔工人入o黎幫手清理現場，盡量清走積水
原來樓下o個戶o的水直頭湧埋出廳，要知道o個o的水係……

師傅o黎o左，唔使佢講我o地都知係大廈外面o既鹹水渠塞o左
屋內大致上控制到形勢後，師傅走出大廈外牆o既水管搶修
我o地就盡快將污水經「東隧」運走，間中看更返o黎問最新情況
到o左10:00左右，基本上搞掂哂，外面條渠通o左，toilet亦再冇漏水
但係成個toilet都俾廁所水整污糟哂，要成個toilet重新洗一次

其實今次o的看更都算唔話得，o岩o岩換更冇耐，就整單咁o既o野
好爽手，好快就搵人上o黎幫手，最後不足三個鐘內一切回復正常

Re大蘋果：
影評話爾冬陛取材取得幾好，完全捉摸到現時年青人o既內心世界
其實兩個幾鐘K lunch都差唔多啦，我o個張檯面係兩張啤牌

>>May 3, 2005 at 3:01:56 PM GMT+8

2005 年 5 月 1 日 星期日 【酷熱】

o尋晚俾人言語上誤導o左，原來所謂"others"只係得咁少人，三個
本來預算朝早睇《早熟》，不過今日o係公眾假期，旺角百老匯爆o左
撲去UA朗豪坊，但係已經冇早場，中午睇會貴o的，又唔知點打發時間

點算？改節目，既然咁方使，就由睇戲改為去百老匯樓上o既Neway
呢個服務員懶係風趣鬼馬，不過講o野又幾好笑o既，對佢幾有印象
耐冇唱K好多歌都唔識，又或者只係識少少，唱來唱去都以舊歌為主
其實唔使扮冇狀態喎，唱唔到唔緊要，「隨時隨地猶如呼吸空氣」
準時唱到13:15就俾人趕，搭乜都冇所謂啦，雖則唔太鍾意短程地鐵

下午先係正式o既節目o既開始：我 + 小妹 + Polly + 肥 + 希 + 蝦
之前plan定去太空館睇片，不過早就坐爆，要等到17:00先有下場
對調，先玩o左科學館，記憶中好多年冇去過，不過仲記得有o的乜
模擬駕駛過o左咁多年仲o係度，不過其他已經冇哂印象，感覺好新
對文科人o黎講，好多都「知其然而不知其所以然」，樣樣一知半解

爬上canteen歇下，鍾意就搣走拎走啦，我要唔要o個張都冇所謂o架
俾人迫o左去玩釘床，其實冇問題喎，o的釘卸哂我o地全身o既重量
玩到唔知時間，差唔多夠鐘要返太空館o架，未玩哂就要走返過去

睇睇下片走o左去搵周公，人類點樣應付火山爆發、地震、龍捲風
咁o既角度向上望，感覺上好似真係置身現場，而且視野好廣闊
原先計劃dinner後仲有節目，不過最後都冇o左件事，最後原來返歸

迂迴o既地鐵之旅，旨在坐多陣涼多陣冷氣，大家見多陣講多陣
今日最終冇出夜街，留住o的quota遲o的用，不過照計後日應該會出去

Re Cafu:
都係depends on我o地用乜o野標準o者，冇理由真係將你同卡富比較o掛？
Re pang:
如果真係要寫，都係將沙咀道o既「波班」互相比較、評估o者
不過我會避重就輕，盡量唔會踩人踩得太盡，既得罪人，自己又唔見得勁

>>May 2, 2005 at 2:56:09 PM GMT+8

2005 年 4 月 30 日 星期六 【晴】

收到CU Sociology寄o黎o既信，5月14會有orientation talk
雖然明知自己既入唔到，亦唔會入，不過去聽下都無妨
事隔o左咁耐，斷估陳健民唔會仲認得我o掛？認得就見鬼！

經過一輪商議，達成以下結論：我唔會去中華民國台灣省旅行
冇經費問題，亦冇家人阻力，只係行程實在冇乜特別，唔吸引

Re大蘋果：各取所需o者，大家都不過係做緊戲，大龍鳳是也

>>May 1, 2005 at 12:40:40 PM GMT+8

2005 年 4 月 29 日 星期五 【暴雨】

相當遲，今日先至去將軍澳，拜婆婆，原來已經係第10年
先o係屋企樓下買粉果，我要o既係麻油，佢竟然幫我加麻醬

行落地鐵站月台想追車，右邊膊頭俾人從後大力撞開，條友冇望轉頭
好迫，o係深水埔站先落車俾人出，等車o個o的人一窩蜂攝埋我o地個位
唔好話我玩針對，通常o係公眾地方橫衝直撞o既人，多數有鄉音

去到油塘，等巴士o既人比想像中少好多，同上次和合石一樣，唔使點迫
好彩只係落微雨，不過好大風，放入化寶塔o既金銀衣紙都吹返出o黎
坐o左個幾鐘，搭巴士返油塘，個個都企o係車站範圍內等人，條隊好亂

個個都趕睇大長今，返出大角咀即刻搵地方食飯，18:30就問飯
我唔識食，不過都覺得呢間酒樓o的o野難食，相對於上星期o個間
睇完大長今睇護級大戰，修咸頓鬥諾域治，爸爸買o左50倍o既3比3波膽
上半場已經係呢個比數，之後一直冇入波，仲唔$500落袋？亨利卡馬拉！
榜尾形勢亂個亂葬崗，四隊分差只得1分，隊隊我都唔捨得佢降班……

Re挺：你估約人出o黎玩好容易咩？又要度期又要諗玩o的乜
Re大蘋果：醒目喎，你又知我想暗示乜？

>>April 30, 2005 at 4:02:46 PM GMT+8

2005 年 4 月 28 日 星期四 【晴】

唔好以為星期一至五，來來去去都係玩同一隻WE 8 LE好過癮
一星期內每日都做相同o既事，再好玩o既game都會變得好悶
所以認識o既球隊已經差唔多全部玩過哂，無論球會定國家隊

葡萄牙o既防守太廢，但係攻力的確好強，落後瑞典兩球都反敗為勝
愛華頓活力有餘，技術不足，越級挑戰國米失敗，淨吞兩隻光蛋
英格蘭克服射12碼的詛咒，先後射贏阿根廷、法國捧走世界盃

已經唔想再玩落去，下星期開始要搵o的新鮮o野，一於改玩FM
呢類game應該冇咁易玩悶，而且可以玩好耐，要盡快買返o黎

P.S.擦鞋使唔使擦到咁離譜？合乜o野作o丫？其實根本就係投誠！

>>April 29, 2005 at 2:58:57 PM GMT+8

2005 年 4 月 27 日 星期三 【晴】

o尋晚特登起身睇歐聯四強，英超內鬨，車路士大戰利物浦
可惜實在太累，邊睇邊釣魚，睇o左60分鐘終於都捱唔住，搵周公
都話利物浦歐聯神經刀啦，摩連奴唔好咁牙擦，小心陰溝裡翻船！

(上接星期二之英超頒獎禮)

最佳教練：莫耶斯(愛華頓)
我係相當欣賞摩連奴o既創意，同時起用杜夫 + 洛賓兩隻左翼
不過佢太口臭，而且車仔財力豐厚，to a certain extent造就佢
講到限米煮限飯，莫耶斯o係有限資源之下幫拖肥糖殺入歐洲賽
睇睇佢手上可以用o既人馬，有邊幾個真係早就具備頂級卡士？
季初冇o左朗尼，佢買賓特、卡希爾；季中走加維臣，佢引入阿迪達
正如黃興桂所講，呢隊波「蔗渣價錢燒鵝味道」，最佳教練捨佢其誰

最佳第12人：鄧肯費格遜(愛華頓)
本來想選祖高爾，但係原來佢打正選o既次數比後備落場多好多
「蘇格蘭長人」鄧肯費格遜呢類柱躉式中鋒o係英倫球壇已經買少見少
佢o既194cm身高令佢佔盡高空優勢，球隊要改變戰術就大派用場
直接入球唔算多，但係接應兩翼傳中幫隊友做二傳掩護，撞散對手防線
防守上，佢棟o係禁區鎮守中路，等閒之輩休想高空轟炸攻破愛華頓城池
33歲o既佢唔可能踢足全場，但係佢落場踢廿幾分鐘，往往可以改變局勢

最佳進步球員：祖高爾(車路士)
摩連奴採用4-3-3陣式，前鋒 x 1 + 翼鋒 x 2 + 全能中場 x3
理論上祖高爾呢類球員完全唔會有發揮空間，只會長坐冷板
事實上佢的確有一段時間被雪藏，盛傳佢會外借去莫斯科火車頭
多得洛賓季中受傷，祖高爾乘時而起，頂替洛賓o既邊線攻擊位置
而且佢又加強防守意識，勤o的回防，處得摩連奴歡心，委以重任
佢先後幾次o係重要比賽一人之力帶領車仔取得優勢，越踢越順
半年前，佢幾乎俾車仔放棄；今日，佢係車仔爭取三冠王o既重要棋子

最佳新人：洛賓(車路士)
季初洛賓缺陣，車仔被諷刺為「1比0部隊」；佢復出之後，場場三四蛋
以為佢同杜夫「有你冇我」？雙翼齊飛，車仔o既攻力令英超球隊聞風喪膽
如果當初費sir肯出高o的價錢，唔俾車仔遲來先上岸，曼聯依家就唔使咁愁
想選唐寧、安德魯莊遜、胡禮菲臘斯，不過原來佢o地都唔係第一季踢英超

最具團隊精神大獎：愛華頓
隊中所有人都係英倫球員或者o係英倫球壇打滾o左一段時間，同聲同氣
莫耶斯又擅於激發球員士氣，老將帶住班新人，未聽過有乜內訌
愛華頓咁o既人腳打出咁o既成績，11個人球員聚埋一齊，威力大過11個人

殺人王大「獎」：布力般流浪
隊中個個都係茅躉王，鑊鑊都殺冇賠，年中唔知幾多人俾佢o地踢傷
利物浦o既施斯俾麥艾維利兜腳踢斷左腳小腿骨，抖o左半年先復出
季中買入o既沙華治唔使多講，另一個唔知o係邊度過檔o既莫高拿仲厲害
洛戴正值最巔峰狀態，都係莫高拿一下唔收腳，剷到要養傷兩個月
據統計，布力般o既球員平均每場領兩張黃牌，全季一共四個球員被逐

最悲情球隊：利物浦
利物浦今季o既表現唔算太好，唯一拍得住巴塞隆拿o既，應該係傷兵
紅軍除o左希比亞，差唔多所有球員都入過傷兵名單，好多都係長抖
今季利物浦幾乎冇一場可以排出完整o既陣容，場場都殘陣應戰
傷o左施斯，唔夠前鋒，即刻收購摩連迪斯，點知輪到洗拿馬收咧
今場呢個唔出得，下場o個個要抖，賓尼迪斯教波再好都束手無策

Re pang : 呢個……籌備需時喎，值得考慮考慮，不過怕得罪人

>>April 28, 2005 at 3:36:34 PM GMT+8