2005 年 5 月 26 日 星期四 【乍寒還暖】

由我頂上Derek Chan個位，再由Leo接替Billy衰o既崗位
果然可以好不雅，兩個o既職位拼埋一讀，足足笑o左幾分鐘

調寄：別怪她(吳卓羲)
新曲：任佢加
作詞人：Holf Yuen @ 音公館

返工要快上堂要早　今天轉去搭乘鐵路
行車　避免擠塞　更驚收費高

只需要　努力發展　隨便　落大眾面
榮智健　人至掂　佢有好多錢

＊任佢加　任佢加　大眾即管責罵
盈利必需足夠　就一於再加
話要加　就要加　廖秀冬不會罵
憑合約任佢加價(憑合約任佢猛加)

丟空晒佢冇人要炒　丟空晒佢冇人會鬧
仍可　用作賽跑　叫渣打再搞

公司有　責任「立」錢　唔加　就會冇面
榮智健　人至掂　還要更多錢

Repeat ＊＊

(原諒你 唔係下話)

啜核好歌陸續有來，再次多謝Holf Yuen @ 音公館

>>May 29, 2005 at 11:18:30 AM GMT+8

2005 年 5 月 25 日 星期三 【微雨】

o尋晚好肥咁睇波，三個鐘之內搞掂o左兩包薯片
好彩決定半場繼續睇落去，親眼目睹球迷奇遇記
足球之所以咁引人入勝，o尋晚俾o左我o地答案

單講上半場o既戰局，利物浦根本唔會有任何取勝o既可能
基本上AC控制整個中場，派路 + 加卡lead住利物浦o黎打
謝拉特隱o左形，無法o係中場同AC抗衡，利物浦唯有捱打
AC針對性地不停放直線，企圖扯開轉身慢o既利物浦中路
從上半場o既戰局發展，AC領先3比0係意料之中o既比數

唔明作為一支咁有經驗o既球隊，AC每次都只踢出半場好波
好難想像AC防守力冠絕球壇，三球在手最終都竟然晚節不保
不得不佩服賓尼迪斯，換入夏文就足以將比賽形勢180度逆轉
謝拉特推返上前場，利物浦o既4-5-1陣式發揮佢最大o既威力
o個邊廂，派路一到下半場突然影都唔見，加卡又俾夏文凍結

除o左舒夫真高o既頭搥之外，比賽後段悶戰一場，似等12碼
o的球員開始冇力，結果如佢o地所願，最殘忍o既決勝負方式
好明顯AC球員俾人後上追到連信心都冇埋，完全唔值得捧盃
最有把握o既派路、舒夫真高都宴客，AC仲唔乖乖將獎盃送上？

AC反勝為敗咎由自取，而利物浦就憑一股鬥志，再度稱霸歐洲
人腳，利物浦談唔上班霸，但係三番四次擊退強敵，以弱勝強
利物浦等o左21年，終於史上第五次奪標，史上第三隊五度封王
繼皇馬同AC後，利物浦都可以將冠軍獎盃永久擺o係晏菲路球場
謝拉特幫利物浦一搔21年之癢，唔知下年又會唔會一搔40年之癢？

真係好邪，相隔24年o既六星連珠重現，將利物浦帶返歐洲頂峰
點都好，繼99年o既曼聯之後，再由英超球隊高舉獎盃，恭喜
我依家反面關心下季歐聯有冇衛冕球隊？冇位再放多隊入去喇喎

P.S.點解街外人收風收得咁快？又係邊個將風聲泄漏出去？

>>May 26, 2005 at 4:53:49 PM GMT+8

2005 年 5 月 24 日 星期二 【晴】

伯父、伯娘今晚就搭夜機返澳洲，臨走出o黎食餐飯
旺角花園街o既素菜館，未係好肚餓已經坐低開飯
唔好以為齋菜一定健康，素菜通常都比葷菜落多油

食完仲有大把時間，返上酒店坐陣先，20:00先出發去機場
去親酒店，通常都會打開酒店餐牌，睇下有乜Room Service
芸芸酒店服務中，送餐最唔抵，尤其酒店o係乜都有o既旺角
$128美式早餐，港式茶餐廳配搭，行多兩步$20有找都得啦

Re Mina : 答案其實好簡單，此Mina不同彼Mina

P.S.期待今晚o既王者之戰，左右做人難，兩隊都想支持……

>>May 25, 2005 at 2:16:08 PM GMT+8

2005 年 5 月 23 日 星期一 【晴】

最關鍵o既大戰，最有機會搶分o既中化oral今日終於殺到
小睡片刻，務求以最巔峰o既狀態出戰，將所有對手擊倒
有的是時間，25分鐘路程，由屋企慢慢行去土皇帝中學

第一組考，唔使坐咁耐，戰意早就推至最旺盛o既境界
排第五，裝到考o既好似係漫畫題，怯o左一怯，怯乜鬼？
背景係滂沱大雨，有個男仔拎住足球，對住個天大喊一場
另一個女仔就拎住水壺，對住o的o岩o岩發芽o既盆栽笑
開正自己o個瓣，冇o野驚，淡淡定定，用到一秒都冇淨

小組討論：有怎樣的讀者，就有怎樣的傳媒，你同意嗎？
又係平時我最擅長o個類型，以一股志在必得o既心態準備
我同意，四正一反，反對o個位自設陷阱俾自己踩返落去
不斷以問題挑戰唯一反對者，佢連招架都招架得好狼狽
想問埋最後一個問題添，不過俾人完全霸o左最後一分鐘

事前一直都擔心中化oral會臨場失準，好彩最後安然渡過
真係信心爆棚喎，至少發揮正常水平，希望唔係過度自滿
17:05入去報到，18:25已經可以o係土皇帝中學行返出o黎

好早到就入荃灣，做o左電燈膽添，霸住人o地行三聯刨書
買一送一，同Billy各自都揀o左本《一個紅衛兵的自白》
仲想買《中國農民調查》同另一本o架，可惜錢根開始短缺

City對面o既翠湖，17:30後自助火鍋，每位$48，算過得去
係就冷清o的，得七個：Billy + 嫂 + 挺 + 小妹 + 肥 + 蝦 + 我
呢個小妹，先將阿嫂錯認為Mina，之後又以為Polly都在場
我o個o的非火鍋配料無人問津，早知真係唔拎好過拎……

主打係肥肥肥牛、牛牛牛柏葉、通通通菜，仲有啤啤啤酒
邊睇電視邊食邊搞笑，其實都唔係食得好多，至少未頂胃
左計右計，其實出得o黎自助火鍋，酒樓都至少收每人$70

食完，時間「尚早」，由唔知邊個動議，全體衝上金星打機
主打當然係睇今晚主角Billy大展身手，打鼓跳舞瓣瓣都好掂
平時少打機就當然雞手鴨腳，好多人都好似我咁冇打機天份
玩到23:00左右就散場，應該冷冷清清o既地鐵突然傳來嘈音

Re Mina :
有心唔怕遲o既，總之你肯努力，冇話遲唔遲，總有機會
其實讀政治學唔一定只可以從政，從政亦唔一定要讀政治學
始終香港一切以商業利益掛帥，商學院自然發展得最成熟
倫敦o既政治及經濟學院全球知名，讀master以o個間為首選

>>May 24, 2005 at 5:51:09 PM GMT+8

2005 年 5 月 22 日 星期日 【酷熱】

為聽日o既oral作最後準備，o係大河道麥記操o左成朝
六個人圍一張檯，對住今年o的題目發呆，無從入手

大腦o既轉數未返哂o黎，思路仍然未夠清晰，仲係好慢
俾人一句嚇過o黎，已經唔識點樣招架，更加唔好講還擊
希望聽日o既對手有一定實力，但係又唔好太強，要過關

晏晝係戲肉，成村人殺上聰屋企，目的當然係為o左打機
原來我最早到，邊食邊等其他人到，之後跟埋聰出荃豐
撞o岩呢段時間，肥鵬一行人殺到，坐o係lobby慢慢等啦

Richard & 佢o既PS 2未到，陳年WE 6頂檔，碧咸仲o係曼聯
已經唔記得點打，好難控制，依家已經都係打慣o左WE 8 LE
救星終於到喇，Richard趕到，得佢部機先讀到我o既WE 8 LE

一直輪流打，打到19:45左右先捨得走，簡直打到天昏地暗
好多人都用特別o既戰術、排陣，佢o地唔用，我都冇諗過
周展程o既阿根廷，J辛尼迪打防中，前面排三矮仔陣屈速
聰o既拜仁用雙進攻中場 + 單箭頭，攻勢多但係唔別威脅
肥鵬o既國米一開波就用兩個大前鋒，最後覺悟，馬田斯

鬥咁多場，最精彩o既要數巴西(Richard)決戰阿根廷(周展程)
巴西打到上半場中段，就以迅雷不及掩耳盜鈴之勢先入兩球
阿根廷隨即換入基斯普，以全攻型o既三箭頭企圖大舉反撲
結果，阿根廷成功o係下半場中段，令賽事重新回到起點

正當戰況膠著之際，阿祖安奴o既入球令巴西重奪領先優勢
但係轉頭冇耐，比列迪o係龍門口擺烏龍，阿根廷再度扳平
得勢不饒人，J辛尼迪離門30碼射出世界波，阿根廷反超前
滿以為賽事會以4比3落幕，加卡完場前o既入楔替巴西追平
呢場睇到／打到熱血沸騰o既壓軸大戰，最終以4比4結束

Re Mina :
唔係話你話，o個句只係我語帶諷刺o既控訴，控訴重商主義
AO只係負責執行政策o既小官，制訂政策係司局線官員o既事
我唔記得實質數字，不過AO入職起薪點相當和味，坐底幾萬
近年來陸續有浸大畢業生都成功考入AO行列，打破兩大壟斷
會考成績差，的確會影響你入中大o既機會，因為佢計CE分
不過其實只要你o係AL努力o的，邊間大學都好，總會出頭天

>>May 23, 2005 at 4:24:44 PM GMT+8

2005 年 5 月 21 日 星期六 【酷熱】

伯父、伯娘o係澳洲返o黎幾日，約哂上博文堂哥屋企
搭67X途中，後排o既一班青年突然發狂尖叫，全車鄙視
o係博文屋企坐o左陣，之後走轉青松觀，再返去涼冷氣

應該好返哂喇，唔使再戒口，照計食乜都得，唔再怕肚屙
不過小心使得萬年船，飲完汽水最好唔好又食雪糕，忍口

Re Mina :
唔敢講，我估是但A到一科，而其他科cred哂，入就唔難
香港功利主義o者，不過未到荒謬到只有讀商科先有工做
唔係話讀過公共行政先得，不過讀o左之後做AO會易上手
政府工要求高o架，AO其實政府內，最精英雲集o既地方
個系你有興趣，就有心機讀，有心機讀o既話，差極有限

>>May 22, 2005 at 3:58:06 PM GMT+8

2005 年 5 月 20 日 星期五 【晴】

唔係o尋日o係政政有人提起，都唔知今日有HKU SocSc
既然唔打算讀／冇能力讀，去唔去都冇所謂，不過照去
費事左轉右轉，搭970X直到門口，全程47分鐘就去到

港大係迷宮，九曲十三彎，好難先搵到搞talk o既大樓
PPA talk仲未開始，落canteen齋住，坐到夠鐘，越坐越累
心諗：都話o左唔會讀，又拎o左章程，聽talk係咪多餘？
不過身體又好似唔係負荷唔o黎，走人，返荃灣join義工

到達綠楊YMCA之時，撞正briefing時間，大部分人到o左
今日暑期活動報名之日，需大量義工負責各種不同崗位
我o個個post已經唔算繁忙，只係要兼顧o既事項比較多
大部分時間都好得閒，比起服務大使要周圍走，差得遠

個flow去緊o個陣發現漏洞，好彩及時修正，否則大頭佛
其實一切正常，因為人溉未到最高峰，未使一個鐘55人
有事，18:00就由人接手，避過直至21:00最繁忙o既時段
都唔覺好辛苦，成個晏晝都算頂得住，有o野做唔覺累

Re小某：你提議得o個度，即係熟熟地o個度，冇意見

Re Mina :
如果佢o地係讀文學院，就算想修politics都唔修得多學分
記憶中佢o地最初係想入社會科學院唔掂，先轉去文學院
政治學本身冷唔冷我唔知，不過政治及公共行政一定好熱
好多人入o黎主修公共行政，畢業後o係政府做AO(政務官)
如果收生入學成績，肯定係港大 --> 中大 --> 浸大 --> 嶺南
但係如果講定位、專長、研究焦點，我的確比較鍾意中大

Re大蘋果：我冇裝now所以睇唔到=.="

>>May 21, 2005 at 5:25:54 PM GMT+8

2005 年 5 月 19 日 星期四 【乍寒還暖】

o尋晚睇最後一集《英超樂與怒》，笑到……肚痛，冇肚屙
爸爸曾經批評呢個節目無聊，搵o的英超趣事講下笑下o者
一直都懷疑o的歌係咪全部都由歌神改歌詞，短時間改咁多

仲有少少屙，都決定趕去CU政政o既又一次Admission Talk
天雨路滑，o係火車站行去都特別覺得辛苦，好似o的老人
o個段video已經唔知播過幾多次，不過的確加o左o的新內容

坐得高，聽唔清楚，花好大篇幅講批判思維，累到冇留心聽
其實齋講呢個talk其實冇乜好聽，到o左後期已經聽到釣哂魚
好戲在後頭，政政o既同學帶隊實地參觀同政政有關o既設施

據我所知CU校巴要錢，而且全熱狗，但係竟然有免費冷氣巴
政政o既大本營o係聯合書院，上兩次Open Day都冇時間上o黎
電腦室 + Lecture Room + 教職員office + 系會室 + 胡忠圖書館
統計所得，政政只有一項數據比中文大學o既平均數差，競猜

10月o既Open Day之後考慮自薦，後來打退堂鼓，無疾而終
今日呢個Year 1又話可以薦，就算冇正式紀錄o既record都得
佢叫我點都試下自薦，博interview說服蔡子強，唔係冇機會
唔明個個第一眼見到我，就算未同我一齊讀過書，都話我掂

聽政政學生大談政政o既生活，佢o地對蔡子強o既評價麻麻
e.g.小器(有門路知道邊個講佢壞話) + 教書(佢自己o個o的書)
點都好，本來已經徹底幻滅o既政政希望，又露出一絲曙光

等校巴返落火車站，再次忍受誤點之苦，足足等o左30分鐘
據悉學生會 + 各宿生會多次反映有關問題，又礙於資源問題
睇怕要穿梭中大而又唔遲到，一係練金剛腿，一係準備單車
o係大學車站見到……夏其龍；到o左九龍塘轉車……羅沃啟

只對出去一朝o者，已經冇哂力，為免夜長夢多，睇醫生
醫生要我戒口，戒生冷o野，亦唔好食最鍾意o既西瓜、橙
咁大整蠱？媽媽放工o個陣托住大大個西瓜返o黎，誘惑……

Re小某：平時已經唔多健康，多小病，好少試過病咁耐……
Re pang & 路人甲：我今朝都諗到呢個答案喇，唔該哂
Re Leo : 你拎返上年YC場刊出o黎慢慢搵，搵唔到再call我

>>May 20, 2005 at 3:42:39 PM GMT+8

2005 年 5 月 18 日 星期三 【晴】

病o左兩日，先發燒後肚瀉，最後都去唔到練oral
我諗我應該有o的病向淺中醫，搞成咁都唔睇醫生
依家總算好返好多，不過仍然未回復正常食量

上年就話唔肯定o者，今年我記得，Billy生日嘛！
生日快樂，正日出唔到o黎o者，遲o的補返數！

麻煩各位幫幫手：SMR係邊個歐洲國家o既簡稱？
已經肯定唔係塞黑，或者呢度可以幫大家諗諗～
http://www.uefa.com/competitions/UCL/news/Kind=1/newsId=268457.html

Re REAL : 依家舒服o左好多，多謝關心^^

Re挺：呢個我答你唔到

Re Mina :
大概係HRM有大搞作，先會請人跟進，上年搵Alien最合適
Kit姐姐話礙於budget問題，唔會有太多NGO請得起暑期工

>>May 19, 2005 at 3:02:58 PM GMT+8

2005 年 5 月 17 日 星期二 【綿綿細雨】

足足訓o左10個鐘，燒就一早退o左，不過仍然唔多妥
下瀉，冇上吐，仍然冇胃口，連一包即食米粉都食唔哂
已經冇o尋日咁唔頹，不過出得多汗，要狂飲水，仲好殘

正當Y. C. 2005籌備得如火如荼之際，好應該重溫上年o既片段
要數最經典一幕，相信係呢個：www.hkssu.org/alien/billy.mpg
另一幕最精彩o既鏡頭應該係Leo對Kitty主席o既不信任動議

Re Mina :
打o左，Kit姐姐話暑期工只係project-based，唔係年年請
佢話會幫我打聽其他NGO請唔請人，不過唔好咁大期望

Re好兄弟：到時見～
我o個日中化oral所以應該要遲o的先到

Re聰：
如果學加度素，我會好似落場五分鐘後o既青仔囉XDDDD
好，如果真係約到時間，又約得齊人，一齊出o黎踢過囉

Re Leo :
今次由你in charge咩？我o係呢度通知你，我o個日會到
我o地好似已經比上年遲o左開始，今年仲趕得切？

>>May 18, 2005 at 3:08:13 PM GMT+8