2016 年 12 月 16 日 星期五 【乍雨乍晴】

12月韓國之旅第二天


酒店的免費早擱鷁M簡單, 但係恰到好處。
由於未去過韓國的Sing冇來, 好多景點我同Cherry 都去過,
就唔一定會再去, 例如首爾塔。
所以, 今次決定去晒四宮一廟, 我地買左套票, 可以去晒呢5個地方。

先到景福宮及國立美術館, 最後到達光化門, 已經行到2點幾,
第一次到景福宮, 係幾好睇。
光化門一帶, 叫總統下台的聲音如火如荼, 不過就好和平,
反對派的青年人, 好有心用英文講解給我聽現時情況。
有秩序及有團結, 是他們給我的整體感覺。
米菲就在光化門下, 舉起他們的牌, 喊了一句梁振英下台。

由於我們接著要到昌慶宮, 所以就必需從反對派那裡,
穿過警察隊伍, 再穿過支持派, 才可到達昌慶宮。
警察問我們點解要由這邊行到另一邊,
因為他們的工作就是要分開支持及反對政府兩邊的人,
中間是用長長的警察巴士及警員分開他們兩邊的人,
情況突然變得好緊張。
但他們一道我們是要去景點, 就好樂意互送我們過去,
第一次感受到俾防暴警察護送的感覺。
他們很重視遊客, 所以好樂意咁做。

其實到了另一邊支持派, 入了他們範圍後,
又變得平靜了, 原來主要都是中間分隔他們兩派的area比較緊張。
支持總統的, 好明顯, 大部份都係中老年人。
這已經是到達了仁寺洞, 因為已經3點幾, 不得不先吃午飯,
我地食燒鰻魚, 呢間店好出名, 下午4點先開門, 我們剛好,
我地叫左兩條, 一條醬燒, 一條鹽燒,
包上那個什麼葉及唐生菜, 真係好好食, 有4種食法, 有圖教你點食,
兩個人食兩條, 真係啖啖肉, 再加杯可樂, 好滿足, 人生真好玩。
Cherry介紹這店真係好正, 位置是鍾路區樂園洞。

食飽就行昌德宮, 又係好大, 我地時間關係, 又冇預約,
所以冇入秘苑。其實只是昌德宮, 都行左好耐啦!
接著再去昌慶宮, 昌慶宮就冇行咁耐了。

下一站就係行鍾路及仁寺洞一帶, 其實這一帶我幾like,
在街頭食左朱古力草莓香蕉pancake, 味道普通。
反而後來食個糖餅幾好食, 夠地道平民食物。

人人商場是每次必來的吧! 雖然我冇買野, 但行下都幾好。

接著行清溪川清溪廣場一帶, 因為韓國仔告訴我們,
Christmas期間, 這裡燈飾很美, 我們一路沿著清溪川行, 整條清溪都佈滿燈飾, 好美。
行完清溪廣場, 一時間我地都唔知食乜好,
就入KFC, 呢度有個set, 炸雞併Taco併葡tart併薯條和汽水, 好抵食。

今日去左好多地方, 真係玩到好盡。

>>April 9, 2017 at 4:37:05 PM GMT+8

2016 年 12 月 15 日 星期四 【乍雨乍晴】

12月韓國之旅第一天


還記得第一次去韓國, 就是去公幹, 那時仲未流行韓風,
加上是被派去一個叫Kimpo的地方, 主要是看他們的農場, 污水處理及肥料廠。
那時覺得那地方很悶, 食物又唔好。
後來, 在2013年和Mandy即慶報即團出發去首爾。
雖然跟團好多限制, 還記得那個領隊都唔好,
但其實我唔係咁介意, 這次旅程讓米菲一次過濃縮地去晒首爾大部份景點及主題樂園,
印象不錯。

今次係過了3年後, 米菲重遊首爾了。
事緣後米菲參加抽獎, 點知從報紙得獎名單中見到自己個名,
中左兩張首爾來回機票及一個Rimowa行李箱。
朋友話呢個行李箱好貴, 但我就唔係咁認識。

最先是約melody去, 不過她唔得。
其實當時已是7月尾, 將機票限定年尾前要出發。
時間真係唔多, 半年唔夠, 好在Sing同Cherry都有興趣一同去,
咁我地就買多張機票, 三個人一同出發。
米菲一向喜歡同人分享快樂, 所以就送左來回機票俾Cherry,
然後, 我地都繼續分享快樂,
我同Cherry分別送酒店房費一晚俾Sing, 所以就算Sing冇免費機票,
都有兩晚免費酒店住。
我地都好嘆, 三個人租三間房, 感覺自由好多呢!
但呢四日三夜之旅, 並唔係咁順利,
出發前, Sing竟然大感冒, 我地已經打算行程hea D,
讓Sing 可以照樣出發, 並建議他第一天就算留在酒店休息都好,
咁樣都有3日玩, 但他決定放棄, 話唔去,
我其實冇乜唔開心, 只係覺得他浪費左機票錢,
好在我地酒店退到一間房, 如果唔係浪費左我地一番心意請他免費住2晚。

15號放工後, 夜晚11點到達機場,
在機場食完宵夜後, 就乘韓亞的飛機出發了。
話時話, Cherry都幾吃得, 竟然宵夜可以食粥加炒面, 再加杯紅豆冰,
上到飛機, 又再食飛機嚏C

16號早上6點幾到達首爾仁川機場, 搭鐵路到達東大門的酒店,
老板娘很好, 知道我地要放低行理, 早上9點就願意先俾一間房我地放東西,
真係醒, 反正有房, 就這樣方便我地, 可以梳洗一下。
Cherry 有朋友嫁左俾韓國人, 所以今日就同韓國夫婦一齊玩。

今日天氣好冷, 得負9度, 也是今次旅程最冷的一天。
一出街就凍到震, 就算足夠衫, 都感受到那陣寒風吹埋來。
韓國仔真係好客, 他請我地食午飯, 好地道的湯面。
由於Cherry見番好友好多野傾, 咁我就同韓國仔全程傾計,
他英文幾好, 所以我地溝通冇問題。
從他口中認識近年日本韓國的關係, 以及近來中國和韓國的情況,
原來年尾時, 已發展到, 所有旅遊店, 大陸客近乎消失,
我們在明洞行街, 路上機乎冇遊客, 好靜。
作為香港人, 唔見內地遊客, 12月能輕鬆遊首爾當然好啦,
但也可想像到零售業的打擊幾大, 因為真係靜得太可怕了。

在明洞, 我們在街上吃雪糕, 很久冇在咁凍的街上食雪糕,
一路食一路流鼻水, 個玫瑰花雪糕好食,
花瓣中心是草莓味, 圍上白色花瓣是香草味, 葉是綠茶味。

行完明洞, 和他們道別後, 我地就去南大門,
米菲即時買對當地手套, 自己帶去的唔夠暖呢!
在南大門買左包粟子, 不過唔算好食。

我地去左BEANSBINS COFFEE, 嘆杯咖啡和pancake,
跟住去左附近一個宮, 都唔知叫乜宮, 因為唔係四宮一廟裡的。

下一站樂天, 我地買左好多零食及手信, 最後多到要打的回酒店。
當然, 亦因為我地太累, 始終第一天係零晨機, 其實冇認真睡過。

晚飯在酒店附近找到間店食韓國烤肉, 由於屬於東大門範圍,
所以一D都唔平, 不過我們點的韓牛,
如果店主俾其他地方的牛扒我地燒, 其實我地分唔到。
米菲好喜歡烤肉, 又喜歡食牛肉, 所以什麼牛我都咁喜歡燒。

食飽就去東大門購物, 好好消化一下,
夜宵係韓國草莓,
今晚要好好睡。

>>April 9, 2017 at 4:33:10 PM GMT+8

2016 年 9 月 13 日 星期二 【晴】

9月東京之旅第七天
米菲在上野和秋葉原


今日訓到夠先起身, 食完breakfast就check out 埋, 先到上野恩賜公園。
很喜歡這個公園的環境, 地方大, 人少, 兩旁樹木真係好美。
上次來這裡去過國立西洋美術館和科學館, 今次來最主要去動物園。
上野動物園, 熊貓係主題, 一入動物園就會見到兩隻熊貓像,
像下面寫住UENO ZOO
今天是星期三, 整個動物園人唔多, 好好行。
熊貓主題館叫Giant Panda House, Ri Ri是男的, 今年11歳, 應該是6歳才由中國來到日本。另一隻, 冇留意乜名, 今日兩隻熊貓都好活躍, 出來見大家, 好開心呀!
如果你話在日本, 香港及中國見到有冇分別, 答案係在日本個館衛生D, 入面乾淨D.
而兩隻熊貓都有保安員在館外監測, 人多時, 保安員會叫睇完的人繼續向前行, 讓更多人可以睇到熊貓。
在中國長隆動物園, 米菲就見過內地遊客用腳踢熊貓BB的籠, 因為當時BB訓左, 那些內地遊客就想踢醒他們, 真係好嚇人
其他鳥類、老虎、猩猩、猿猴等等冇特別, 不過個籠有D角度就可以較近距離見到他們。
較為特別係貓頭鷹、狸貓、蝙蝠和北極熊。
蝙蝠要進入個黑暗的館, 入到去燈光好暗, 見到牠們飛來飛去, 狸貓就搵唔到。
北極熊起初訓左, 點知米菲回頭時, 他走來走去, 好睇喎。
上野動物園兩隻大像也靚, 環境打理得很好。
紀念品店的熊貓主題tee, 印住save the panda, 件衫都幾靚架。
離開動物園時, 遇上兩隻熊貓的用膳時間, 兩隻熊貓坐著在吃東西, 感覺好愉快。
離開動物園時, 經過東照宮, 冇入去, 因睇完熊貓食野, 米菲都好想食野。
回到上野的肉之大山, 回味上次那份牛扒定食, 好味呀!
阿美橫丁區有間美式雜貨店叫Garakuta Boeki, 入面貨品種類多, 好有特式,
有D 袋好靚, 米菲買左件tee, 好like, 係這店自己出品的。是會再來的小店。
接著去二木之菓子, 這間店買零食手信是最好的, 不賣大牌子, 但都是日本貨, 比平時買的平一半。
米菲就第一次來, 所以冇買來做手信, 想自己先試過這裡零食得唔得先,
結果, D零食和大牌子沒有很大分別, 有D仲好好食。
二木之菓子好大間, 成間超市咁大, 好多野賣, 你可以當759咁行。
相對, 在附近的志村商店, 就細好多。
店主推介1000yen 一個朱古力福袋。由於店鋪面積有限, 貨品種類很少。

上機時, 米菲再去秋葉原。反正一個站就到, 行吓都開心。
5點回到成田機場check-in, 再食拉麵先上機。
7:15PM準時起飛, 今次攞行理冇等咁耐。

今次係第二次去東京, 因為認路好左, 輕鬆好多。
相信不久又會再回東京玩, 因為東京仲有地方想去, 不過下年就先重遊大阪。

>>February 19, 2017 at 9:35:44 AM GMT+8

2016 年 9 月 12 日 星期一 【雨】

9月東京之旅第六天
米菲在東京車站和新宿


早在出發到東京前, 天氣預報我的旅程約有一半時間都會下雨,
心裡有點不爽。
“你所煩惱的事, 有九成都不會發生”, 是一本日本銷量40萬本以上的書。
書名中晒, 結果旅程要到了第六天才下雨。
一早安排了下雨做什麼, 今天係去東京駅。
從上野坐JR山手線直達東京駅。東京駅可以好多時間流連在室內, 落雨都冇咁煩。
東京駅本身就係一個景點, 要影晒全個東京駅, 就要走去對面 KITTE.
KITTE最低層是郵局, 上面是商場。只有日本, 才會把郵局也美化成一個帶有藝術色彩的商場, 個商場設計好特別, 好靚。
上去6/F KITTE Garden, 可以影過對面東京駅, 這樣才能影到整個或大部份東京駅, 是室外的, 是天台花園那種。
在微雨下, 加上有風, 影相係幾麻煩。避雨安排的活動, 也要成受少少雨, 但在這裡看到好靚的東京駅成個building, 同時睇到火車。
睇完風景, 落兩層左右, 可以免費參觀東京大學總合研究博物館, 好睇架。
到最後, 米菲才真正到地面的郵局, 買了兩套Miffy郵票和一套叮噹郵票。
三套都是平成28年(2016年)推出的, 大開心。在香港買貴4倍都見個。
這裡買郵票是半自助的, 好似香港飲茶一樣, 拿著點心紙, 劃上喜歡的。
當你劃完後, 再到前面拿籌, 就係酒樓等位咁, 叫到你no.就埋去俾錢,
他們會即時執好你買的郵票, 今日人唔算多, 全過程花了15分鐘左右啦!

買完郵品, 過返去東京駅。 東京駅好靚, 建築物本身係可以承受某程度的地震, 建築物最大搖動可達30CM.
米菲先到東京駅一番街睇睇手信, 睇到開心, 包裝好靚。睇到喜歡的就回頭返來買, 反正今日行程輕鬆。
行吓行吓又肚餓, 點解o既? 因為見到Tokyo Ramen Street.
越去得多日本, 就越來越鍾意拉麵, 而在東京拉麵街最吸引的地方, 就係呢八間拉麵店, 係比較少見的單位, 當然, 可能只係米菲見識少,
呢度唔係平時常見的一風堂和一蘭, 係其他少見到的名字, 部份還是全日文名, 其中, 用上漢字的, 只有三間, 分別是六厘舎、俺式純和斑鳩. 米菲選了試斑鳩, 這店是買食卷的,
買了卷就坐低等位, 約5至10分鐘左右, 就有人帶米菲入去, 交了食卷, 10分鐘內就送上拉麵。米菲都唔記得自己叫左邊款, 總知部機寫住人氣no.1的, 我就食, 好味呀!
裡面有肥肥的叉燒, 溫泉蛋, 及紫菜, 材料都係常見的, 但個拉麵和湯本身好香, 斑鳩, 得喎。不過下次來, 我都係會試第二間, 唔係點食晒八間店喎。
食飽, 就進入Tokyo Character Street, 喜歡動漫及充滿童心的我, 當然好開心。妖怪手錶專門店, 好好笑, 那隻什麼地縛貓的東西, 好妖。
從七月開始, 寵物小精靈就大熱, 全城來到捉精靈。所以在這專門店, 也相對較多人流, 有東京駅限定的比卡超公仔, 做型係比卡超扮演車長。
米菲買了好幾個這個造型的文件夾, 送俾喜歡捉精靈的同事。同事組織了一個捉精靈組, 四出捉精靈, 好快我地已經捉左好多種類。
miffy専門店, 這裡當然唔少得。
呢度仲有集央社、TOMICA、NHK、Jackie、Snoopy、姆名、龍貓、Kitty、,輕鬆熊等等。
離開一番街, 可以去埋附近的大丸東京店, 那裡的菓子手信部好吸引, 喜歡Kit Kat 仲可以去埋裡面的Kit Kat Chocolatory, 不過要買特別味道的Kit Kat, 都幾貴。
米菲冇買Kit Kat, 不過就離開了東京車站, 去了100%Chocolate Café, 呢度除了堂食, 仲有零售, 就係可以買56種口味的chocolate.
店員告訴我, Black Pepper, Ginger, Wasanbon, Meiji Sweet呢期都大熱,
米菲就除了Ginger, 其餘三款推介都要, 再加上一塊Strawberry,
唔要禮盒包裝, 較環保, 獨立4塊價錢是880yen.
本來諗住買完就走, 點知這個下午, 剛巧有一table, 米菲就坐下來, 嘆杯本店的朱古力凍飲,
朱古力一早塗在玻璃杯裡, 把可可和奶及冰倒進杯中, 一邊飲, 一邊弄出杯中的朱古力來食, 或者想味濃一點, 可以攪進杯中, 好飲喎.
喜歡朱古力的米菲, 會再來。 從東京車站來這cafe, 路程10分鐘, 不過就未別找到正確出口。米菲就找野一段時間, 先找到這裡。

微雨沒有停, 米菲出發到新宿。這是今年第二次到新宿, 主要為了去紀伊國屋書店, Shinjuku Piccadilly(電影院)和元祖迴轉壽司。
紀伊國屋書店, 閒逛好選擇, 不過書泉及秋葉原的書店, 仍是我的首選。
Shinjuku Piccadilly的電影單張真係好靚, 而且種類多, 又免費, 所以來這裡逛逛。
在Sanrio店買了隻布甸狗給媽媽, 是Halloween特別版。
自從小狗MOMO離開後, 布甸狗就成了替代品。
行完街, 就去食迴轉壽司。新宿呢便好難認路, 找不到上次食那間元祖迴轉壽司。但米菲真係好想回味一番, 於是看見一個中年男人, 就問他, 點知, 他說了相反路, 花了時間。
再問一個年青人, 他很健談, 還帶路。
元祖壽司真係好鮮味, 怪之得咁多人, 不過同場加映鬧劇。
這下午, 外面下著雨, 店中真係乜人都有, 米菲隔離是日本人, 再遠一點是來自歐美的, 米菲另一邊是一對中國情侶, 只有米菲來自香港。
這時, 兩個香港家庭約8人左右, 走進店中, 日本侍應安排他們坐下,
由於他們咁多人, 好難安排坐在一起, 反正有位, 咪安排他們坐,
點知那個男的, 用廣東話大閙話都唔識變通, 叫其他人(即米菲和其他食客)移埋一邊, 咪有位攞。
相信日本迴轉壽司店, 還不需要做到咁, 叫食客移位來做多少少生意。
中間的大師傅冇理個男人, 繼續開開心心做壽司, 侍應也不知他們說什麼,
不過見他們堅持要一齊坐, 就冇理他們, 後來個男人再大駡, 剩係你地有壽司食嗎?就拉家人和朋友離開,
米菲好想同他們講, "呢間店D壽司真係好食架, 出面又落雨......”, 不過算吧, 這種人真失禮晒香港人。
新宿的元祖迴轉壽司, 真係好得, 是長長魚生飯細那種, 所以會食好多, 價錢合理。
今晚夜宵, 是上野Anderson面包, 好滿足。

>>March 12, 2017 at 3:02:42 PM GMT+8

2016 年 9 月 11 日 星期日 【晴】

9月東京之旅第五天
米菲在原宿和涉谷


今日訓到十點先到Doutor食breakfast,
上野坐JR山手線直達原宿駅。
原宿真係好多潮野睇, 特別係行到裏原宿, 都係特色的street brand, 而且相比起在香港買便宜得多。
如果要行晒整個原宿的五大潮流點, 就分別要到竹下通、裏原宿、表參道、明治通及原宿遊步道。
如果喜歡潮流衣著, 行原宿都可行一日。米菲希望下午可以去埋涉谷, 所以要好好安排。
地理上, 如果在原宿駅, 從竹下通出口起步, 就可以行晒竹下通, 就會接上裏原宿,
而圍住裏原宿區的三條大街,下面條長長大街係明治通, 上面條步行街就係原宿遊步道, 右邊的長長大街就係表參道。

米菲從竹下通出口起步, 都已經11點幾, 今日真係好hea.
旅游書話竹下通似女人街貨式, 米菲又唔係咁覺, 除了進入Daiso買平野,
基本上其他店都係食野為主, 而且都係流行小食。
米菲逛完Daiso 108yen店 (因為100yen加8%稅), 見到Cold Stone呢期推出左好靚生果雪條, 賣相比香港見到的更加靚, 事實上, 雪櫃裡的雪條, 靚到好似假咁一樣。
米菲冇食呀, 因為前面就係Harajuku Café Crepe Angel Hearts,
Crepe係法文, 意思相信係英文的pancake, 有見過店鋪叫可麗餅, 不知台灣叫QQ餅是否同一樣東西, 這裡也被稱為原宿系crepe, 而法式或原宿系crepe, 都是甜食的,
在Angel Hearts見到, 有50, 60款, 花多眼亂, 可能今天是星期一, 人不多, 可以慢慢睇。
在選擇時, 認識了一對外國夫婦, 他們也和米菲一樣, 唔知想試邊款口味。
他們來自法國, 是法國公司派他到日本工作。他很健談, 他說早幾年被派去韓國, 今次就派來日本。
他認為在工作中, 日本人的英文相對較好, 而且他喜歡日本多D. 米菲也介紹了自己來自香港及工作行業。
說回crepe, 大致可以選多cream或少cream的款式為方向, 另一方向係是否有雪糕在頂部。
人氣no.1, 被稱為Crepe of The Most Popular是Banana Chocolate Whipped Cream Crepe, 事實上, 香蕉同pancake真係好夾。
由於米菲想食用草莓做材料及有雪糕的款式,
選了no.63 White Peach & Strawberry Crepe, 裡面係草莓和cream,
上面係一球peach及一球草莓雪糕, 好滿足。
店門口有座椅, 可以慢慢食。
走進Calbee Plus, 買左手信, 好多期間限定薯片。
在WEGO買到件古著shirt, 好like.
走進Line Friends Store拍照, 這裡除了有大大隻Brown可以合照,
仲可以去Brown’s room, 睇坉茤衎Y點, 不過又唔覺得好特別,
部份line的精品都幾靚, 不過米菲都係留番D quota買其他野吧!

進入裏原宿, 緣著原宿遊步道走著, 米菲逛逛吓就到了Nicolas Charles食店, 係一間兔子泡芙專門店。
米菲試了薰衣草宇治抺茶泡芙, 外型好靚, 不過味到令米菲失望。
食唔出薰衣草味, 而且因為太甜, 連抺茶味都被甜味遮了, 建議食其他味道。
在裏原宿的Beams, 本身有點期待買到靚衫, 但款式不合心水, 有部份更和自己衣櫃裡的款式差不多, 畢竟, 近呢兩年都在日本的Beams買衣服。
走進X Large, 這間是日本旗艦店, 就有收穫了, 買到件好like的短shirt. 香港還未冷, 仲有排可以著短袖。
走到裏原宿未段, 有Onitsuka Tiger, 本身想買對Tiger, 不過睇唔到合適的。

進入表參道, 最想去Omotesando Hills商場的Medicom Toy Plus睇睇,
Medicom toy出品的Bearbrick, 已經cross 左好多卡通、電影及品牌,

米菲主要collect 400%的Bearbrick, 當然係選擇性咁買, 唔會盲目追。
今次發現Omotesando Hills 的Medicom Toy Plus, 都是展覽為主, 因為最靚的款式, 係講緊70萬yen, 即5萬幾, 上面相信係鑲上真鑽石, 所以係睇展覽,
唔係Shop.
另外在原宿及涉谷好似仲有Medicom Toy, 不過唔識去。
如果未天黑, 走上表參道的行人天橋, 望著兩邊的街景, 會覺得很美, 兩旁都有樹木, 即使是這種馬路景色, 點解咁美, 個城市街道好乾淨。

從表參道走, 經過Kiddy Land, 買左點手信, 再向前走, 就係明治神宮前駅。
在這裡, 沿著明治通走, 可以行到涉谷。
沿途仲可以經過Asoko(本土雜貨), Design Tshirts Store graniph, 及世界2番燒。
經過了Beams Shibuya, 沒有什麼吸引我, 可能因為之前去過銀座及原宿的Beams, 所以不花時間再睇了。
世界2番燒, 就是稱為世界第二最好味的雪糕菠蘿包店, 其實是雪糕蜜瓜包。
可能流行了一段日子, 加上食晚飯時段, 唔係好多人, 米菲好快就買到雪糕蜜瓜包食。雖然冇想像中咁好食, 但都值得一試。

進入了涉谷, 時間是晚了一點, 經過Rakuten Café (樂天市場主題咖啡店),
見到他們的pasta set, 好吸引。有機會要來這裡一試。
參觀完涉谷的Mandarake及Bookoff, 就直接去109 MEN’S 個building.
在3/F, Vanquish呢個品牌幾吸引, 買左件shirts, 好like,
仲有一件好like, 不過太修身了, 著到個肚......所以只買了一件.
在涉谷駅前和秋田犬八千個像打完招呼後, 去左對面涉谷西村買水果,
好想知點解犵水果咁出名, 全部都係高級水果, 不過個鋪頭在大街地面,
可想而知一定係賣貴左, 不過米菲既然來到, 就買pack草莓食, 是長野的。
今天花太多時間在原宿, 所以在涉谷相對時間就唔夠,
不過, 涉谷都係Hi-Brand, 其實唔係咁大興趣行。
除非將來有其他景點在涉谷, 否則未必再來, 寧願再發掘更多新地方去。
或者經過這裡, 然後上代官山。因為今次旅程冇時間去代官山。

涉谷坐山手線直達上野,
都成十點, 好多食店都關了, 米菲只好在上野站對面的東京牛(日文字)食晚飯,
食左碗赤牛井, 係辣牛肉飯加蛋, 熱騰騰, 好香肉味, 不過由於我唔識叫大碗,
個menu全日文, 我只看到東京牛井, 辛味, 溫玉, 生玉子, 大根, 除了這些字, 其他都唔明, 所以就點赤牛井算。
雖然好味, 但好細碗, 我食唔飽。好在間店在酒店附近, 米菲就再到便利店買炸雞, 加裡盒草莓, 也十分滿足了, 人生真好玩。

>>March 12, 2017 at 2:58:44 PM GMT+8

2016 年 9 月 10 日 星期六 【晴】

9月東京之旅第四天
米菲在秋葉原


上野乘山手線一個站就到達秋葉原, 好方便。步行去也是一個好選擇, 因為原途亦可以去到一些玩具店。
米菲選擇搭JR, 今天整天都係安排休閒咁逛秋葉原,
在秋葉原睇動漫及周邊產品係好愉快, 有時也會意外見到的動漫展覽,
試過隨便跟著年青人, 走上二, 三樓, 竟然發現平價的樓上玩具店,
好多驚喜。
上次四月來時, 星期日變為步行大道, 冇車行, 今次也安排了星期日來,
但係有車行, 可能唔同月份唔同, 有或者步行實施已結束吧!
午飯去番日式炸豬扒食堂, 今次食炸豬扒加上兩隻炸蝦定食, 好得。
今日平價買到好多心愛玩具,
有初音的figma, 高虹的figure, 仲有楠田亞衣奈的第一本寫真。
回程時, 經過PABLO mini, 4月來時試過原味, 抺茶, 朱古力,
今次有推出期間限定, 分別係Mango, 及Mont Blanc,
米菲兩種都買晒, 再加上次未試的草莓味。

放回戰利品到酒店, 到附近的麵屋武蔵開�, 點了豬骨拉麵,
湯是分開上的, 是沾麵食法, 不得了, 今天吃到碗好食拉麵,
主要係天時, 地利, 人和都配合,
入夜天氣微冷, 雖然係小店但巧合有個位, 斜對面還坐著一位日本美女,
全程陪著我食, 可能係某家大小姐,
她食拉麵時, 每一兩口就用紙巾印口唇, 好優雅, 咁當然她天生麗質,
如果換上一個大媽, 食一兩啖就印口唇, 我跟本唔會望......仲會加個妖字。
講番碗拉麵先, 好香濃的豬油味, 冇錯, 眼看都睇到個湯好肥,
麵質適中, 豬骨也很肥美, 好得。
今晚宵夜係三件PABLO tart, 吃得有點過飽了。

>>February 19, 2017 at 9:01:00 AM GMT+8

2016 年 9 月 9 日 星期五 【晴】

9月東京之旅第三天
米菲在吉祥寺和中野


今日行程係早上先到吉祥寺, 下午到中野.
從上野坐JR山手線到新宿, 轉中央線(快速)到吉祥寺, 只有快速列車停吉祥寺。
星期六的吉祥寺, 也不算多人, 可能就係咁, 聽閒吉祥寺係東京人最想居住的地方。
米菲第一個想去的地方, 係食吉祥寺名物, 食SATOU的元祖丸, 元祖炸肉餅,
排隊只係十幾人, 比想像中大排長籠情況好得多, 可能早吧!
剛巧電視台訪問排隊的人, 他用日文問我, 都唔知他講乜,
我話我來自香港, 他說Hong Kong呢......
跟住又唔知講乜, 我估計他是說香港遊客都來日本食呢個炸牛肉餅,
220 yen一個, 到底有幾咁好味.....
外皮食到炸物的脆, 裡面有松阪牛肉的香, 再加流進口裡的肉汁, 真係要講, 好好食呀!
再來這裡, 一定會再食這個。
SATOU在銀座和築地也有分店, 吉祥寺應該係本店。
對住SATOU行前少少, 就係Coppice商場,
問口就有間Moomin stand, 可以飲番杯菓汁。
期間限定係青森蘋果提子味, 冇試,
米菲選了本店的人氣NO.1, 係草莓藍莓紅苺味, 近乎奶式的飲品,
好香菓味, 唔算好好飲, 一試無妨。

今日Coppice商場門口有節慶演出, 廟車被一班小朋友拉著走, 50、60個小朋友都有, 場面好熱鬧。
Coppice除了有服, 仲有Kiddy Land, Hello Kitty, Snoopy, Rilakkuma, 最重要係有Miffy Shop. 有好多限定品, 最終, 買番琴晚見到的Miffy cushion.
走回去車站的路, 會經過Okashino Machioka, 係一間廉價菓子雜貨店, 主要為了買手信俾melody,
她好喜歡食啫喱糖, 而呢間又平又好食, 兩款我都買晒。

行完吉祥寺駅前三大商店街, Sun Road, Cherry Nerd, 口琴橫丁,
這裡其實仲有個公園, 及Original Pancake House想去, 不過實在食唔落pancake了, 又想留番時間去其他地方。

從吉祥寺乘JR中央線(快速)到中野, 12分鐘就到。
中野站北口一出, 就見到Nakano Sun Mall, 行完呢條長長商店街,
就會自動行到Nakano Broadway, 呢個時候,
唔好入Nakano Broadway住, 望著Nakano Broadway門口, 轉右小路行一段路,
就可以食到鰻魚飯, 米菲起初唔識路, 行左好多錯路,
呢間店杜如風都介紹過, 真係抵食又好食,
店名係名代宇奈, 後面係日文字, 橙色招牌, 有新橋兩個字在招牌上, 地址係中野區5-52
店裡細分可有六種選擇, 最平500yen巳經有一碗鰻魚飯,
500, 800, 1000, 1300, 1500, 2000yen六種, 選了1500yen的重特上,
三大段燒鰻魚, 配上盒飯, 好抵, 最重要, 係即燒, 好得, 必定再來的店。

走進Nakano Broadway, 主要係去玩具店, 呢度好多懷舊玩具店, 新野亦唔少,
動漫產品, 唱片, 書店, 食店都有, 有少少隔局似信和, 不過當然多好多,
隨時找到好野。如果想找冷門玩具, 尋覓多時都冇, 可以到這裡一試, 有機會找到。
米菲亦找到心頭好, 價錢不貴。
Mandarake呢度有好幾間, 分為專賣唔同種類玩具, CD, 及書等等。

晚飯時段, 呢度因為有間名物店叫靜岡丸子, 出名賣一種叫薯蘋汁飯,
好似係將淮山磨成汁, 再伴飯, 不過米菲真係唔識欣賞,
可能我唔喜歡那種味, 覺得好難食, 呢次係米菲近年去日本覺得最難食的,
不過見到小店個廚咁用心整, 米菲盡量食。
他說老板現在年紀大, 不會親自來鋪頭, 這種薯蘋汁飯相信是很懷舊的食物了。

回程時在上野Anderson 面包店買左個熊貓面包做宵夜, 好滿足。

>>February 19, 2017 at 8:55:44 AM GMT+8

2016 年 9 月 8 日 星期四 【晴】

9月東京之旅第二天
米菲在淺草和銀座


今日行程係去旅遊熱點淺草, 下午去銀座。
在Doutor食早�, 試他們的三文治配咖啡早�, 份量剛好。
上野坐銀座線直達淺草。
先到淺草文化觀光局, 主要係上去屋頂,
因為要從這個角度, 先可以影晒成個淺草雷門一帶的風景,
另一個方向就可以影到東京晴空塔。
從觀光局落番地面, 經過雷門, 進入仲見世通,
好多傳統小食及手信,
米菲先在喜久屋買個大福餅, 是新口味,
不過其實即是綠茶草餅, 入面紅豆容, 不過就大大個, 一試無妨.
淺草仲見世通, 特產應該係人形燒, 因為有好多間店賣,
米菲試了三鳩堂的人形燒, 剛剛整好, 好食。
這裡有間店, 是三家小店相連,
分別是賣米粉小食、手巾、同埋雨傘,
這種米粉小食, 唔知中文點叫, 是近乎桃哈多這類小食, 不妨一試。
米菲一連買左兩把waterfront雨傘, 在日本好抵買。

淺草因為係著名的遊客區, 呢度D警員好親民,
米菲就同兩位女警影相, 真係好親切, 如果她們拉米菲, 一定唔會反抗! 呵呵呵!
淺草九重呢間店, 係出名賣炸饅頭, 買左抹茶味, 味道和口感都唔好, 真係浪費米菲肚皮的空間。不過這店的抹茶雪條幾好食。
不經不覺, 今日食左好多小食都選抹茶味。
仲見世通去到最尾, 其實這裡有間店叫Japanese Maccha Sweets,
顧名思義, 入面小食甜點全部係抹茶味, 有蛋糕、餅、巧克力、雪糕和抹茶飲品等等。下次再來, 都想試下。

行完仲見世通, 就會自然到達淺草寺,
米菲影左好多相片, 今天係晴天, 氣溫適中好舒服, 影相又美......
附近的九重塔維修, 冇得上去, 真可惜。
從九重塔旁邊出口, 可以走到西參道, 這裡除左商店街, 有大熱的雪糕波蘿包賣,
不過應該唔係自稱世界第二最好味的那間。米菲太飽了, 沒有試。
西參道有間想去的懷舊玩具店, 休息, 又唔寫幾時開門。
走出西參道, 附近有個叫淺草花遊樂場, 望落去好似舊荔園咁想下大,
即管入去行吓, 是要入場費的。
裡面有個鬼洞, 真係有少少似荔園個鬼洞, 米菲在好驚情況下, 都買左票入去,
在排隊途中, 才發現卡車係獨立的, 即是話米菲要一個人一卡車入去, 大鑊,
另一邊出口, 有個臉青青的年青人坐著卡車出來, 我用英文問他入面點樣,
他說completely dark, wah wah......跟住我聽唔到他講什麼......
終於排到我, 當我卡車撞開入口那道門時, 我突然感覺前所未有的驚慌,
入面係100%黑, 心想, 如果突然有野衝出來, 真係大鑊,
最後, 米菲選擇全程合上眼睛, 耳朵一段一段鬼叫聲, 不時有風出埋來,
好在路程好短, 好快就捱完, 早知......唔玩。
接著玩左個過山車, 只係有兩次短短急跌, 唔驚嚇的, 主要係輕鬆睇下風景,
由於米菲的極限係海洋公園的灰熊山谷過山車, 所以我可以玩的機動遊戲其實唔係咁多。再坐上了一架飛船, 遊覽全院一周。
走出樂園, 附近有個江戶下町傳統工藝館,
裡面介紹江戶年代傳統工藝技術, 並展出工藝作品,
喜歡手作的, 可以來參觀, 大部份工具, 以前係人手制作的,
現在大部份, 都係機器制作, 所以呢道D展品, 都係大師傅人手做出來。

從大街方向走, 有間甘栗店, 今期這裡用了中國最靚的栗子, 運來日本,
再細緻地炒出來, 米菲是很喜歡栗子的, 所以就試,
好食, 售價當然貴過中國。喜歡栗子就買來食啦!
再向前走, 會經過六文錢, 六文錢是專食文字燒,
但文字燒係多人一起食, 先有樂趣。
而米菲的午飯, 一早就計劃好來大黑家, 問題係有冇位。
大黑家和三定, 都是專門食天婦羅的, 進入大黑家, 由於米菲一個人,
加上下午1點幾, 就即刻有位坐。
大大碗天婦羅飯, 大大隻蝦, 一大堆炸物, 好滿足, 好味呀!

食飽就周圍行多陣, 遇上個西班牙女人, 她說和服好靚, 附近有冇得租,
真係考起我, 剛巧有兩個著住和服的日本妹經過, 我就問她們,
她們話套衫係自己, 都唔知邊度可以租,
最後都係幫唔到個西班牙女人, 不過米菲就變成可以同呢兩位日本妹拍照,
其中一個都幾靚。

經過犬印鞄製作所, 又休息, 仲想入去睇下。
Bandai的日本總部是在淺草, 作為一個玩具迷, 米菲當然去參觀一下。
門口有好多公仔, 可以和他們拍照, 好耐無見過’他媽的哥治”了,
Bandai門口竟然放一隻, 咁又係, 當年真係好流行, 也令Bandai收入豐厚。
進入二樓, 要登記名字, 這刻竟然只得米菲參觀,
二樓有工作人員正在開會, 由於係open office, 米菲參觀就等於在他們身邊經過, 所以米菲都要輕步咁行, 怕影響到人地開會。
展品唔算多, 不過都係好懷舊的玩具, 例如早期的美少女戰士公仔,
總部鈄對面, 仲有一個Bandai辦公室, 不過冇提前預約, 就唔可以進入。

係時候出發到銀座了, 淺草去銀座好方便, 坐JR銀座線直達。
先去教文館和聖書館, 是在同一個building, 係銀座文化地標,
4樓有精品店及café, 7樓係藏品館。
這裡有基督教古蹟文物睇,
有死海古卷, 雖然見到係複製版, 都好值得睇。
可以見到日本最古老的聖經, 展出係約翰福音同羅馬書,
教文館今日有個藝術展覽, 一個好出名的日本藝術家,
他的畫好靚, 米菲並沒有買票入場, 只係去左他的紀念品店,
相信他的作品, 已變成明信片, 畫風好特別, 用上好多色彩,
米菲忍唔住買左幾張明信片。

在銀座的Beams有收鑊, 真開心。一件好靚剪裁的牛仔衫, 好細緻。
附近係日本基督教團銀座教會, 米菲就順便參觀他們的教堂, 係開放俾人入去祈禱的。
這教會隨左在星期日有崇拜和晚堂崇拜, 星期一至六, 都有午間崇拜,
讓工作的人也可抽時間參加, 這教會在銀座大街, 對面就係OIOI同Tokyu Plaza,
真不簡單。教會的大鐘, 也是一件文物, 是1878年英國鑄造的, 介紹都寫上日文, 所以不明白描述。

離開教堂後, 到不二家買左個Puff食, 味道好一般。
銀座的Uniqlo, 好似係全日本最大的, 所以就睇睇, 一向冇買他們的產品, 但間唔中會行下,
銀座的有8層高, 好大, 款式比平時多, 多左cross-over的tee, 幾靚,
米菲買左件夾棉背心, 好合身, 價錢又合理。
在銀座四丁目交差點打完咭, 接著去左參觀Shiseido Gallery, 不過都冇乜野睇。在Shiseido Parlour Shop買了手信, 包裝真係好靚, 不過如果Cheese Cake那款手信, 就太貴了。

終於來到博品館, 呢度好多玩具賣, 仲有一個section 係Miffy.
見到個新出的米菲cushion好like, 暫時唔買住, 如果旅程中再遇上, 就買吧!
俾D空間自己, 費事乜都喜歡就買。
其中一層有搖控車玩, 入完錢, 有一條很長8條綫的賽道, 米菲選了架紫色車,
賽左10分鐘左右, 米菲成績唔差架, 有第二名......因為當時得二個人參賽, 嘻嘻。
再走一段路, 呢度有條食街, 好似籣桂坊咁, 不過今晚呢度一帶,
大家出來食飯既人, 都著得好靚, 可能係因為星期五,
大家放工都出來玩, 今晚係在日本見得最多靚人的一晚。
出名壽司店梅丘壽司之美登利, 排晒長龍等位, 米菲放棄左。
米菲只好坐JR回上野食迴轉壽司, 這店叫富士山迴轉壽司,
主要係價廉和近米菲的酒店, 味道好一般。
今晚宵夜係栗子和銀座city bakery 的面包。

>>February 19, 2017 at 8:34:37 AM GMT+8

2016 年 9 月 7 日 星期三 【晴】

9月東京之旅第一天
米菲在上野


4月去完東京, 真係覺得好好玩, 所以9月再來。
之前因為有少少怕幅射, 打消了去東京的念頭,
但大阪已經去過好多次, 所以都係決定再去多次東京。
機票比上次貴, 因為米菲冇在訂機票時, 同一時間買寄存行理費,
HK Express係後來補買, 會貴好多, 所以今次來回要$1900,
以廉航來說, 算貴了。
酒店住番4百一晚的Hotel Marutani Annex(丸谷)
成個旅程, 機票加酒店7日6夜, 4千幾蚊。

2 PM準時起飛, 出發到東京成田機場, 預計要4個半小時。
7點半到達成田, 攞完行理出埋關, 搭8:15pm Skyliner, 40分鐘就直逹京成上野站。
因為住番上次間酒店Hotel Marutani Annex (丸谷), 所以唔洗找, 好快就安頓好。
個房比上次同類型房間細少少, 不過房間整潔, 寧靜。

在酒店附近食天婦羅定食, 呢間野已經第三次來食,
成為我的上野飯堂, 特別係夜左食飯時, 呢間仲營業, 方便又好食。
今次個set叫上天井, 係天婦羅飯, 再跟個小型蕎麥麵, 好like.
在店附近有間店賣燒餅, 叫神田達磨, 用個磨字, 唔係摩字,
買左2份神田達磨餅食, 入面係豆沙, 熱辣辣, 不過不失。
還有好吸引的軟雪糕賣, 不過米菲食唔落了。
宵夜係卡B薯片加可樂。

>>February 19, 2017 at 8:07:19 AM GMT+8

2016 年 8 月 12 日 星期五 【陰】

澳門之旅


好耐冇去過澳門了
今日同sing及學生去澳門玩, 即日來回,
好快就去左好多名勝, 在威尼斯食左個中午自助�,
以超值150入場來說, 好抵食

冇入Casino, 但我們玩得太盡,
從9點半玩到晚上10點, 仲攪到錯過左回程10點的船, 真失敗,
要再買多張10:30PM船票走, 米菲同sing俾埋學生的票, 所以就將旅遊成本雙陪了
哈哈哈, 有船票順利回程, 就算了吧, 那天真係好多人呢!

>>August 22, 2016 at 5:00:17 PM GMT+8