2004 年 1 月 28 日 星期三 【晴】

今日開學lu～～本來一點半要上電腦堂，但係我趕唔切翻來（因為無趕過……），所以走左堂。

於是三點半先至上堂（英文），見翻大家好開心。然後緊隨其後，係兩堂中文。今日堂中文好正，何SIR真係好似面包超人，講野又好笑，又有教學熱誠，強呀！我拎左本《香港別字追蹤》比佢簽名，開心死＞＜

之後去左圖書館借書睇。

今日知衰。因為成個假期浸淫於李天命的思方學，思考變得較為銳利，而且養成一個習慣（甚至接近「條件反射」），就係一見到或聽到一D犯上邏輯謬誤的句子或用字，又或者一些含混不清的觀點，個腦就係即時進行釐清、分析、推演、反駁、破立……

雖然時刻保持思考銳利係好事，但係有D過左火。就係同學仔只係想吹下水，講下閒計，唔係想作學術討論，而我就去係咁反駁……真係唔要得。（其實我知咁係唔好，但控制唔倒）

我以後都係唔好多嘴啦…

自我享受思考的樂趣，以及用心體會「思人所不思」的超然感覺算啦。

－－－
To Opal：係喎，我竟然咁都諗唔倒，哈哈！

>>January 29, 2004 at 1:47:27 PM GMT+8

2004 年 1 月 26 日 星期一 【晴】

今日都過得好充實，全日睇書，痛快。

>>January 27, 2004 at 5:47:44 PM GMT+8

2004 年 1 月 25 日 星期日 【晴】

今日好累呀～～

朝早八點起身，趕翻BU，開聯地個會，開完會又要整聯地個banner，整到近下午四點鍾先搞店。阿Roy整banner整到發皮四…一點鍾就走左人，話有野做……問佢有咩做又唔答（不過我都相信佢係有緊要野做）。其實好多人都好早走左，因為佢地約左人或者有要事在身，只要有合理的理由，我地都唔介意少緊D人手。

幾經辛苦，終於完工，個banner好靚！大家散水後，我將個banner放翻係hall度。當時已經四點半，我即刻訓翻幾個字，因為六點半就要去到灣仔。

五點鍾訓醒（當然仍然好眼訓啦），那那林趕去會合。我先去銅鑼灣，又買左隻李天命《邏輯與詩之間》講座CD。唔好以為我係盲目當李天命係偶象，我從來都唔會崇拜偶象（本性係咁，所以好難要我信奉宗教）。我咁鐘意李天命D野，係因為佢的確令我的思考能力倍增，而且佢的人生哲學我好認同，教我更懂得生活（或生存）。

去到灣仔，同周sir，文聰，龜龜，阿馬，卓明會合，然後一齊去意粉屋開餐。我地係咁吹水，由7點吹到10點，意粉屋真係多得我地唔少，哈哈！周sir好豪，唔單止一人兩封利是（多謝周太），佢重比錢埋單，五百幾蚊呀陰公＞。＜

－－－
「俊佳的思寫」：「好玩角度」的人生哲學

之前Alex同我傾電話，我地係咁討論我地身邊的怪人奇人。然後佢講左一句，非常有意思：「如果單重好玩的角度想，呢個世界真係乜人都有，點奇點怪都有。」

我最近經常想起呢句說話，我覺得呢個其實係一個好妙的生活態度（或稱人生哲學）。我地身邊總有好多人與自己唔同，有D好寸但無自信，有D虛榮心好重但又往往得不到虛榮心，有D好有自信但又無真材實料，有D友善得來好假，有D人為錢而做野，有D人成日千方百計要追討好上級……（只係隨手寫的例子，絕無影射）

所以，有時我地會好難接受呢D人，或者唔多想見倒佢地。我素來採呢種態度。

不過，「好玩角度」的人生哲學似乎可以幫倒我。我先唔好理上述各類人的缺點，或討厭之處……先放底自己的感覺；然後用好玩的角度睇下呢D人，我地（至少我會）就會有一種想笑的感覺，「呢個世界真係乜人都有啊」～～～強調只從好玩的角度，而唔將感受、價值觀投射入去……即係好似我地睇緊一套叫「地球人野生生態紀錄片之千奇百怪篇」，我地會覺得好好玩。

「好玩角度」可以幫我地超脫個人的感受，利用幽默化解厭惡之感。

>>January 27, 2004 at 11:33:32 AM GMT+8

2004 年 1 月 23 日 星期五 【晴】

懶懶閒地度過，很舒服。

打機，睇電視，講電話，睇漫畫，睇書，聽講座（CD），聽收音機。

一日做過曬。

有時要過一過無建設性但充實的生活。

約左周SIR（樹仁歷史老師）星期一去食飯，到時文聰、龜龜、阿馬、卓明都會出浦頭。大家都好期待周SIR封大利是，呵呵呵～～～

>>January 24, 2004 at 1:54:03 PM GMT+8

2004 年 1 月 21 日 星期三 【晴】

昨晚十二點左右，剛剛年初一，窗外對面的南丫島竟然放煙花，重要放左好多個，我個瀑布灣竟變成維港？

昨晚用了差不多兩個半鐘，同阿Gene討論「真理是否存在」。就我所知，跟據哲學對真理一詞的定義，呢條問題非常簡單，真理是存在的；但阿Gene，可能有她自己一套對真理的定義（雖然不清晰，但至少不是同於哲學的定義），所以討論最終沒有共識，不過我談得很痛快。

由理性談到感性、創意、浪漫，我同Gene又大談「宇宙根源」，不過今次不用理性去討論，只係天馬行空的「創作」一翻。

三點幾鐘，大家都去訓覺啦。而我重未想訓，要聽聽李天命《紛亂中的寧定》。

今日起身已經係十二點幾，食過阿媽整的年糕、羅蔔糕後，為左令初一「見紅」，我大玩GTA Vice City，在game中不斷虐殺平民百姓＠＠

玩左兩個鐘，跟住又睇書，思考。

今年父母的利是，首次是十元一封，往年起麻三百。係我自己要求的，因為佢地供我讀大學，已經用左唔少錢啦＠＠

晚上看新聞，看到許願樹著火。心中忽發奇想：

意外係由香火所生－＞某人將許願樹當做神靈－＞某人用火燒著了神靈－＞更慘的是，神靈（許願樹）死不去－＞神靈會向某人報仇

夜晚開ICQ，有個性工作者用ICQ找我，以下係對話紀錄：

--------------------------------------
ICQ History Log For:
236992264 英英
Started on Thu Jan 22 22:10:08 2004
--------------------------------------
英英 2004/1/2 PM 09:56 hi 佳 = 美好：）

佳 = 2004/1/2 PM 09:57 YES？

英英 2004/1/2 PM 09:57 你入去 http://www.161easy.com
睇下我Ｄ相喇，搵番我個名呀:)

佳 = 2004/1/2 PM 10:05 乜而家性工作做到咁專業？用埋ICQ推銷？

英英 2004/1/2 PM 10:05 服務性行業:)

佳 = 2004/1/2 PM 10:07 點解妳會選擇從事這一個行業？

英英 2004/1/2 PM 10:07 唔知呢:)

>>January 22, 2004 at 2:11:33 PM GMT+8

2004 年 1 月 20 日 星期二 【晴】

今日年三十，BU大部份的office員工都唔使翻工，圖書館重關門大吉添，我地呢D學生就重要翻學。

昨晚開完會，翻hall睇「兩本」Opal借比我的《神之左手、惡魔之右手》漫畫，作者某圖一雄真係好想象力！！睇完就去訓覺。

今日訓到十一點幾，起身刷牙，沖涼。沖沖下先知昨日唔記得沖涼，所以特別起勁咁沖呀沖。沖完都已經十二點啦。即刻衝去hall can食飯，因為十二點半上英文堂。

去上堂途中，見倒Vincent同Kerry手著勾手咁行。我最後都遲左五分鐘，不過Vincent起麻遲十分鐘，哈哈。

今日Mr.Chicken Wing講，報紙話有個博士跳樓身亡，原來係佢以前的同事，都係BU語言中心的講師。雖然我聽完，表面上只有一點悲色，但心靈上的震憾也算大。

－－－－
「俊佳的思寫」：第一目標與施比受更有福

呢件事，印證左我最近覺悟的一個大道理：每個人最迫切要做的，是要建立自己一套的人生觀，這套人生觀是要令心靈健康、富足，而這套人生觀必定是以情為第一相標。

為甚麼知識越多的人，金錢越多的人，自殺的機會較大？因為他們把知識或金錢，設定為人生的第一目標。追求金錢為人生第一目標的人，心靈往往較脆弱，這大家聽得多了。那我說的，追求知識為第一目標的人，心靈較脆弱又是甚麼意思？這是我最近剛領悟的，由自己身上領悟到。

第一、一個人以追求知識為第一目標，就容易忽視親情、友情、愛情，忽略了有這些，人就會變得空虛孤莫。有人可能會反駁，「我是以知識為我的第一目標，但我有朋友，有女朋友，有家人呀，怎會空虛？」當然我沒有說你沒有，但當你只會日日夜夜埋頭於「冰冷的」書本中及實驗設備中，你身邊的好朋友、親人、愛人怎樣愛你，關心你也沒用，因為你視知識才是第一目標，你不會感受到或記著他人予你的「恩情」，你會身在福中不知福。

當你「不知幸福」，那和「沒有幸福」，在心靈上，又有多大分別？

第二、一個人視「情」為第二或第三或第四……他拖恩、分享、用情的機會就會減少，當一個人只會「接受」他人的恩情（而且，如上逑，又經常忘恩），而不會「拖恩」他人，這個人在心靈上是與人分離的，是孤獨的，即使他身邊的人如何熱情的擁向他……「拖比受更有福」是真的，這句話的相反，我想就是「受而不拖，不福」。

以前聽到一句話，「我給妳的越多，我得到的越多」，好像很肉麻，但其實不假（如果說的人真的如此想）。

有些偉人，把情給予全個民族；我不是偉人，我把情給予每個我珍借的人。

我的新人生觀是以情為第一目標，成就第二，知識第三，金錢第四。

－－－
To Opal、阿珊：古人憑毅力把鐵柱磨成針，我們只要有毅力，都可把sand變成clay，嘿嘿！！
－－－
追加兩句：D人諗乜ga，而家明明未過年，係咁拍門「財神到」，係都聽日先來丫！

重有大家要搞清楚，人地叫財神到，唔係指有個財神去到你門口，而係有人當你係財神，所以走到你身邊，問你拎錢，所以如果你比錢唔係為左扮財神，咁可以袋翻埋D錢啦：）

>>January 21, 2004 at 1:57:41 PM GMT+8

2004 年 1 月 18 日 星期日 【晴】

今日係第二學期第一次走堂，走左朝早9點半的PE，因為唔願起身，咁又少左個quota。好慘，今個sem除左PE，無乜堂值得走。以前誠誠、同Owen呢兩科我幾乎必走（有時都會走RP），因為反正對我來講，聽唔聽都無分別，後來呢兩科的成績證明我無走錯堂。

不過今個學期，好似個個講師都講得好，無廢話，所以無得走lu……係好事。

今日電腦又上HTML。雖然我以前無刻意記過D碼，但係話曬都用過frontpage整個超過十個的網站，而且重改cgi內的html碼，所以暫時HTML的課題難唔倒我，我只需要記翻D碼點打就ok。不過我相信即使未寫過網頁的同學，都唔會感到有咩難度，話曬佢地咁叻。

上完堂即刻走去深水步同阿mi（聯地主席，香港大學學生）會合。因為我地要去睇料整BANNER。

搞完，翻hall，打左半個鐘機，跟住一路聽李天命《天下大勢，宇宙公民》，一路閉目養神。聽完，七點半去CC print Notes，然後買飯。遇到逸軒，一齊食飯。食完去左佢個新房參觀。

－－－
「俊佳的寫思」：新的態度－－－回應讚與評

若別人讚美我，若我自信當之無愧，便絕不造作否認，反之亦然。
若別人過分讚美我，超我個的本質，會失真，便不是誠了，那時我立即收斂否認，反之亦然。
若別人批評我，若言過其實，那麼既不是我的真實，那就不關我的事，我沒點不會理由，或放在心裡；若言中其實，那麼最易處理，就是改正（當然我的樣貌例外︿︿）。

>>January 19, 2004 at 1:52:46 PM GMT+8

2004 年 1 月 17 日 星期六 【晴】

唔好以為我懶，呢幾日無寫日記。其實，係因為前日login唔倒，昨日寫完傳送失敗，但又唔想打多一次，所以無寫到。

交待翻下：前日打電話比樹仁的周sir，互相問下近況，吹左成粒鐘，最後周sir話約我過年出來食飯，太好啦︿︿

昨日無所事事，由朝訓到晚。唔知點解，係屋企個人會變得好無動力，乜都唔想做，同係hall的生活完全相反。我係屋企懶成咁，咁都過倒會考同AL果關（雖然話唔係十分好），重升倒大學，真係神奇；不過有樣可以肯定，如果我而家無hall住，我怕唔好話要一級甲等榮譽畢業（只係一個目標，一個態度；達到的機會好微），我怕連畢業都成問題……

講翻今日，今日超忙。昨晚聽李天命《存在與反思》聽到兩點（對人生又多一層深刻的睇法），然後八點起身，十點到達BU，因為今日聯地開會。係聯地開會好開心，好快就開完三粒鐘。

一點鐘散會，那那林翻hall訓翻一陣。兩點鐘坐地鐵去杏花村補習。補到五點半，走時下雨，問maggie借左把遮……紫色的＠＠……我開住把紫色的遮周圍行，好驚人地以為我係gay……去彩虹同Alex食晚飯，勁吹水，吹到八點幾鐘走人。九點幾翻到hall，執房。

－－－
「俊佳的寫思」：我的三個莊與專業精神

不能否應，我在聯地和漢記大專同學會的歸屬感遠大於地知泉。不過只能怪我不夠理性和專業，不能怪我其它，因為始終情感上，我不是經營地知泉的主要份子，我只係末期才加入的；我咁講有D唔負責任，我亦知咁係錯，我實在太唔專業。

不過我的日記係寫真不寫錯，所以我不否認我缺乏歸屬感，所以做野好拿西，而係聯地、漢記我就好賣力，而且越辛苦越開心，所以成績廣受同伴稱讚，有了成就感，自然有了歸屬感。

有人以為我因為聯地個職位（副主席）較大，所以偏心聯地，甚實不然，呢個完全與職位無關；我係漢華大專同學會只係個小小的宣傳幹事，但我樂意賣命。歸根究低，呢個係歸屬感的問題。

我估，即使阿珊、Opal係地知泉的歸屬感都唔會大，始終大家都修係末期加入。不過佢地在地知泉做野好過我（至少無我咁拿西），呢D就叫專業精神，我差太遠，我也不否認。

無論如何，我唔希望自己係一個唔負責任的人，我要在地知泉的生命結束前，為它做翻一D野，回饋佢對我栽培。我對母親欠缺親情係一回事，我要孝敬母親又係另一回事。

>>January 18, 2004 at 2:37:31 PM GMT+8

2004 年 1 月 14 日 星期三 【晴】

昨日因為手機無電，而又無帶火牛，逼住要住屋企。途中買左李天命的《存在與反思》的演講CD，反而唔會買《思方學八講》，因為太貴（有八隻CD），而且大部份，例如語理分析、四不架構，九一主義（只是一種生活態度，我覺得幾適合我），我都已經學識，只有數理邏輯和科學法度唔係太明。

今日由屋企翻BU。我坐72號城巴去銅鑼灣，去到香港仔，遇到阿堅（樹仁同學）。佢成熟左好多，而家係一間幼稚園做文書工作。我地都好幾年無見面啦，雖然我之前做左D事對佢唔住（我到而家都好後悔），但今日見翻，大家都好好傾。由香港仔傾到去銅鑼灣：）

轉地鐵去九龍塘。十點半鐘上Prof.Li（李思名教授）的Tutor，佢真係好正！我tutor班，有地理、中研同埋GIS的人。幾有趣。

跟住翻HALL放低d野，同埋拎教科書。見倒同房逸軒，不過佢今日會搬上18樓與同班同學一齊住，祝佢住得開心啦；而我就暫時維持一人住一間房的狀態：感覺好正，哈哈！

跟住去上電腦堂。原來漢記的理科班同學吳麗娟都要上呢堂IT，等我遲D打電話問候下佢先。今日教HTML，雖然我無真係學過，不過用frontpage整網頁都整過十幾個，又試過改cgi的HTML碼，所以今日好易上手，無乜難度。

然後係英文堂，Chicken Wing同樣搞笑；最後係中文堂，雖然曹老師去左中大，但係接替佢的何成邦老師一樣咁正。原來佢就係《香港別字追蹤》的作者。而且佢個人好有幽默感，勁正呀！

上完中文已經下午六點半啦。我同阿珊係舊CAN坐左半粒鐘，然後去soc房開（地理學會）例會。一開就開左四個鐘，不過個會好多笑聲：P

翻到HALL……張Key Card開唔倒門？！有無搞錯？！去搵人幫手，又話收左工。於是唯有經鄰房入翻自己個房（因為兩房相連）。

極速沖涼，十二點幾，Opal同阿珊來我間房，針下招莊的問題。針針下變左吹水，但好開心好開心。吹到三點幾鐘，佢地先翻房訓，而我就係度打日記。

死啦…聽日九點半上堂呀…點死…

-------
To Natalie：認輸‧不服輸。以妳的聰明才智，只要肯認輸一次，吸取經驗，妳一定會變得好厲害！……不過，關於妳打算將果D工作推落我身上，我當然係答：「采妳都傻～～」，不過如果要我助妳一臂之力（只是一臂，不是二臂、三腎之力），歡迎搵我幫手︿︿

>>January 17, 2004 at 6:25:42 AM GMT+8

2004 年 1 月 12 日 星期一 【晴】

昨晚，Natalie無啦啦ICQ過來，問我「係咪有野隱暪佢」，我睇到一頭霧水，原來係問我係咪同某某有甚麼甚麼的……笑死我！哈哈哈哈！

昨晚溫完書後（兩粒鐘左右罷），打機打到一點半鐘（同房的軒哥日日有好野益我，又有game，又有music），準備訓覺，點知訓唔著，又起翻身上網。比我搵倒李天命一個講座的網上視像版，即刻看過究竟……正！一睇就睇左兩個鐘，睇完好精神，好開心，搞到四點先去訓覺。

報應到。今日上八點半堂，七點半鐘勉強地起身，去沖涼refresh下。頭兩堂係Cartography（繪圖學），由Dr.Zhou教。佢D美式英文好正，好好聽，係我咁多個教過我的教授中（除左隻Mr.Chicken Wing之外），英文傳意最好的一個。我首次聽書唔分心超過三次。不過呢科可能係呢個sem最難的一科。

上完兩堂，又即刻上YY的Earth System II。今堂無乜特別，不過YY好照顧我地，肯講翻一D中文term比我地知，正！

跟住五堂天地堂，不過我一D都唔天地。我要幫聯地book LT3房搞講座，於是借左地理學會的「帥印」，給印好好玩，好有權力feel。但過程極辛若。先去OEE1301->ITSC->OEE1301->RRS->OEW701->SA...聽日重要去拎翻張允許書。更慘係，3月27日個會考講座book唔倒LT3，要book甚它場，又要煩一輪。全程好在有BRIAN陪我，真係唔話得，忍唔住請佢飲野。

跟住去左圖書館，途中竟然見倒林曉峰係偉衡運動中心果邊的馬路旁，扮財神，拍廣告。佢D演汥真係好好。其它學生見倒佢都為好驚喜，不過奇怪的係，無人（包括我同brian）停低睇佢。趕時間？還是我地自己本身自卑？（「人人都唔睇，自己係度睇，咪好cheap？」的心態）

借左幾本書……頂唔順，要翻hall翻一陣。翻得40分鐘，又要上堂。今次係李思名教授的經濟全球化。（李思名教授有份寫我地AL用果本《地理景觀》）李教授雖然係前Department Head，但係好好人，好nice，英文又聽得舒服。（講起來，上個sem的三個地理教授的英文太過奇特，我聽得好辛苦）

上完堂，翻hall中途，遇倒阿珊，同埋Carman( Leung)。我地一齊去睇textbook，貴到驚！於是我地試下行翻去圖書館，睇下有無得借來印，點知版本太舊，印左無用。睇來，真係要比錢買啦＞＜

翻到hall，打比Alex，然後用三線打去「粉嶺」。「肥婆」接電話……（喬志、天哥，有興趣可以問翻我地發生乜事）

好眼訓，但因為聽日十二點先上堂，唔想訓住。上網又比我搵倒李天命《思考與智慧》的錄音，個半鐘，正正！

我決定！買李天命的《思方學八講》CD。

補充：我今日報左人文素質教育的「創意思維」，我相信會好正；因為我上學期也參加了「思考」課程。

To 添爺：衷心多謝你首聖詩：）

>>January 13, 2004 at 6:34:50 PM GMT+8