2004 年 6 月 13 日 星期日 【晴】

……

>>June 14, 2004 at 5:38:20 PM GMT+8

2004 年 6 月 13 日 星期日 【晴】

今日又過得好開心。

跑步終於可以跑多兩個圈，心肺功能又強左，YEAH～～～

因為卓明入左CAMP，唔可以幫佢慶祝生日，嘿嘿，妳份禮物遲D先比妳啦～～～

今日又係Tracy生日，於是成班友去左人地屋企玩；頂！今晚玩親啤都輸，勁比人串。

－－－－－－
Opal：一定奉陪，但我保證好快比妳隊林～～本來我翻返屋企重想搵妳吹水GA，但係妳已訓左；同妳傾到一半斷左，有D意油未盡添～～

>>June 13, 2004 at 4:44:22 PM GMT+8

2004 年 6 月 11 日 星期五 【晴】

痛快的走堂！

估唔倒放假我都走堂。本來今日有普通話堂，點知我遲大到，就去到一半落車，見趕唔切，改道向灣仔前進。可能走堂走慣左，我由落車到轉目的地的心理過程亳無起伏，幾乎完全出於下意識。如果我能夠多點這樣的灑脫就好了。

去左灣仔，大舉掃貨，買左：

他與她的事情，第十八期
死亡筆記，第一期
魔法老師，第五期
一堆好用軟件

極痛快！走到累，約文聰出來食飯，食之前又去旺角行左一陣，然後一齊坐車去彩虹的大排檔食晚飯。

我地今晚專食高FAT食物（可謂近一個月食得最放），墨魚、鵝腸、豬大腸、豬紅……又叫左兩大支藍妹……

我一向好少飲酒，今次算係飲得多，食完飯有少少腳步浮浮了……

我地兩兄弟食完又去左遊樂場吹水同玩……可能真係有D醉，我地都玩得好放，講野好大聲，我又唔知點解係咁爆粗口…我地重走去玩（fool）野狗，狩獵小強，用英文暗寸飛仔（要講d佢地聽唔明的英文）……總之好開心啦。

人生難得一知己。


「從來不信梅花譜
信手拈來自有神」

我要追求這種心境，
對，我要笑傲江湖。

－－－－－－
大石：我都唔知今日開放日，但我睇過個網頁，學校真係變左好多……

Opal：得啦得啦，實借比妳～～要知道我沒有討價的餘地……我張學生證係妳手上…

>>June 13, 2004 at 4:36:07 AM GMT+8

2004 年 6 月 10 日 星期四 【晴】

一早起身翻浸會開聯地的活動小組的會議……不過今次個會無主席，無外內副，無秘書……所有中四、中六的幹事都要考校內試，唔開得會，得翻兩個無試考的幹事開會：一個係我，一個係我好拍檔應屆會考生異形。

兩個人傾左兩粒幾鍾，個SUMMER CAMP總算出倒個概念，骨架……呼……

然後同佢行左一陣又一城，我就翻返浸會果頭。去六合食左個正正下午荼（兩點鍾就有得食，正），一碗水餃河，加一碗冰冷椰汁西米露……都只係21蚊，食過翻尋味。

跟住上何老師的粵音糾正班……何老師為左要我地認清K音尾與T音尾的分別，用「察」字做例，話如果「察」唔發K音尾而發T音尾的話，就會係粗口。而且即刻親口展示T音尾的特別版「察」字……（︿︿）

－－－
Tracy：無錯！聽者有份！︿︿

Queen：係呀…識倒妳真係好神奇，又好幸運！我能與妳這位哲道行者成為好朋友……真是幸運得很！

>>June 11, 2004 at 12:50:09 PM GMT+8

2004 年 6 月 8 日 星期二 【晴】

Opal：誤會誤會～～其實我乜都未諗通（你見我寫左首無題悲詩或「詩」就知啦），不過我已經好端端煩左兩日，知道再諗落去一定會發癲，所以今日決定退一步海闊天空（真係走左去海邊，睇「海闊天空」），話鬼之佢…頂…

嘿嘿，水果類原因……都係隱晦D好，因為水果主人，其實妳都識，而且佢間中會睇我的日記，費鬼事講到咁白，摶佢睇唔明……不過呢D水果煩惱，老早不是問題了︿︿

－－－－－－
卓明：OK！咁妳生日果日嘗面食餐飯嗎？禮物方面，到時妳咪知囉～～～^o^

>>June 9, 2004 at 2:33:41 PM GMT+8

2004 年 6 月 6 日 星期日 【晴】

別人，以狂妄掩飾自卑；
自己，由狂妄變回自卑。

今天，我發覺我再看不到別人的缺點；我只看到自己的。


真相座落彼岸的中央，
中央圍著黯然的愁傷；
愁傷連接起伏的陰影，
陰影撫弄某人的斷腸。

>>June 7, 2004 at 6:09:18 PM GMT+8

2004 年 6 月 5 日 星期六 【晴】

今日同大家去赤柱BBQ，不過千言萬語不及數張相片，請自己去相簿睇。：）

http://community.webshots.com/user/leung_guy


個EVENT前半部，我心情極低落，但完全唔知點解，呢種事以前都已經試過幾次，我實在好替自己呢種不受控的不穩定心理狀態而擔心（搞到今日Brian以為我想跳海，嘿嘿，傻啦，我成世人從來無想過自殺，我最怕死，除非死得有價值，例如為母親，為愛人而死）；

今日最大的得著是，是最後我終於突然覺悟真相，心情低落的真相。（泛指過往同樣事件）

不過真相是甚麼我當然不會在此說，但我痛快地認清，自己其實是一個充滿心靈缺撼的人。在某些方面（不便明言），我連一般人都不如。

而呢個真相，幾乎係我呢本日記，過去所寫下一些「突然的失落／反省」類的總原因。（To Opal：甚至呢，之前向妳私下透露過的「那個水果類原因」，其實原來都不是最深層的，最根底的原因）

因此，我相信，我終於真正找出自己問題的（終極）根源了。

（暫無信心解決，但至少有了方向）

（別以為我現在很傷心，其實我鬆了口大氣，哈哈）

（OK，自我挖掘完畢，悶親大家了，SORRY︿︿）


翻到屋企，樹仁同學卓明無啦啦打比我，同佢吹左一晚水（話題與上無關），痛快。

－－－
Opal：好野，咁都比妳發現，送妳痕身銀行一間！

>>June 6, 2004 at 6:28:15 PM GMT+8

2004 年 6 月 3 日 星期四 【晴】

今日上第一堂粵語發音糾正課程，一入到課室，看到一個熟悉的背影……原來是何老師：O

佢見倒我，叫我幫手download 解碼器，因為佢昨晚capture果段片轉左做Divx格式。好在我都不負所望，完成任務︿︿

哈哈，原來我地香港人有咁多字係讀錯而唔知！

晚上同阿恒吹水吹左幾粒鍾，真係深得我心，可以話，BU內思想和性格與我最接近者，非阿恒莫屬！

>>June 4, 2004 at 5:57:22 PM GMT+8

2004 年 6 月 2 日 星期三 【晴】

http://community.webshots.com/user/leung_guy

網上相簿。

中五以來的點滴。

>>June 2, 2004 at 4:56:53 PM GMT+8

2004 年 5 月 29 日 星期六 【晴】

回顧三天（因為之前個IE有問題，寫唔倒日記）


五月廿八日：我們的《明日之後》、漢記墨魚團


呢日，阿添、Brian、Gene、Viola、珊、Poly、我等八個地理人，一齊去尖嘴食飯加睇《明日之後》……嘿嘿，我覺得呢套戲太太提升我地地理人的地位！︿︿

睇完之後，我地去左行星光大道，不過無乜特別；最後行埋HMV，咁大家就散水啦。

我之後一個人去左商務睇書，等到六點半我就行去Star Ferry，因為我約左班舊同學去西貢釣墨魚。點知突然狂風雨，行雷閃電，海生白霧，百鳥亂飛……唔係嘛？個VIEW咁鬼似《明日之後》？

不過墨魚團似然繼續。好開心見翻好多舊同學，不過部份生疏左。因為剛剛行雷的關係，當晚只係全隊只係釣倒一集墨魚……於是同D同學怒吹水，真係好開心！哈哈，墨魚團變左遊船河～～


五月廿九日：普通話初級速成班


終於上第一堂，再次確認自己D普通話程度……廢！

不過好開心，我又找到一面值得我全力跨越的高牆，唔使日日都係學英文咁悶。


五月三十日：聯地小組又開會


我地的效率真係好高……傾summer camp活動傾左個半鍾就傾完，重比左7個IDEAS……證明迫D幹事在屋企諗好先翻來開會係有用！

另外，因為班死仔六月要考試，打死都唔肯出來開會，於是我被佢地授權「玩獨栽」…我從未試個當呢類超級PIC，一個人要負責活動流程、分工、物資預備、營前會預備、營火會安排（重未諗倒玩乜）……不過「獨栽」有一樣好，開少好多會，有時可能重有效率，唔使乜都傾一餐……當然，除非獨栽者是天才級領袖，否則咁做非常冒險……所以今次聯地非常冒險！！

我覺得開會唔應該乜都要傾一餐；我認為較有成效的方法可能（可能）是：

一、開會確定活動目標（會桌實不應是長方桌！否則會有部份幹事會被嚴重忽略！最好是圓桌或正方桌）

二、儘快完成分工，定左該活動總指揮部（不應多於一人），及各部份的PIC，例如遊戲部、宣傳部等等…

三、「權力下放」，各分部自行決定手法（即「目標一致，手法隨意」，而唔係乜都要開大會傾一餐）

四、總指揮負責一切協調工作，「主動」跟進各分部的工作進度；總指揮緊密監察各分部之方案的可行性，但又不可過份干預

五、再開多一次大會，各分部報告進度；各小組的方案（假設可行）若已進入完成階段，幹事不應再當完美主義者，互相吹毛求疪

六、……

（以上只係「我認為」的思想，且未經嚴格的思想整理；我也無義務要確保呢個方案一定要正確）

－－－－－
死MO競：

（只係好玩而回應，不是為了挑戰你；請唔好見怪）

其實我唔係太明白你的意思，「偽藝術是不可以扮」？唔明喎～～如果你係話「藝術是不可以扮的，因為咁會沒有了藝術的本質」，又係有D奇怪……藝術當然可以扮啦，扮完又當然沒有藝術的本質啦，否則又怎稱為「偽（假）藝術」？

我扮狗，當然沒有狗的本質，否則怎算是裝假狗？：）

我對藝術絕對是不甚了了，在此戲言數句，無需理會。

至於你將自己視為一件藝術（或藝術品）……嘿嘿，我不便多言︿︿


Viola：唔使客氣！

>>May 30, 2004 at 10:31:07 AM GMT+8