2004 年 4 月 13 日 星期二 【晴】

昨日同阿痕、Brian講起我地呢一年大學，學左D乜……點知大家越講越灰，發現我地今年真係學倒的，幾乎同地理科無關，

原因係：地理系D教授好多一係就語言根底差、（嚴重）缺乏表達能力，教學生聽課聽得一頭霧水；一係就毫無教學熱誠，只係為左錢；一係就講一大埋廢話（雖然可能好熱心），或者離題萬丈；扮高深，淺字唔用，用深字，迷糊學生……

我發現自己呢年真係學倒的，係中英課、哲學課、自選的課外書、莊務；除左carto外，今年地理班教授一D都無令我進步。

原本打算在浸會讀碩士（可以的話），但係而家睇來……除非係研究性碩士課程，否則就算有得讀，都唔會讀……免得浪費生命…

今日上網睇討論區，先知李天命曾經公開批評過中大哲學系一D教授，話佢地語言表達能力差……

好灰，連哲學呢門最講求文字準確的學系，都係咁……

我不其然沉思，在社會科學、哲學等系內的所謂博士、教授……有多少是真才實料的？



「市民亂拋垃圾要破財罰款，學者製造垃圾可領取撥款。」

>>April 14, 2004 at 10:55:18 AM GMT+8

2004 年 4 月 8 日 星期四 【晴】

今日又開聯地會。原本打算翻學校print文件，點知今日公眾假期，舊校所以電腦室都唔開。咁我咪打算遲D先print囉，又唔係好急。點知班衰仔最近玩我玩上癡，動議要我翻HALL print（因為我講過hall會有得print），點知竟然全體和議！我即刻問班女仔：「喂～妳地知唔知咩事ga～咪因為我係阿佳就一齊和議玩我喎～～」哈～佢地真係唔係太知發生咩事，總之目標都係要我行親死。

無法啦，局住要翻HALL print。去到HALL一樓，D人話我知個printer print唔倒野…「下？！」咁我唯有問人借筆人手抄一份啦……好慘，次次寫左一陣，借筆比我的人就話要走……卒之先後問左三個人借左三支筆，但係最後都係未抄好就被人拎翻支筆走。呢個事候，個PRINTER竟然無事……原來係D人唔識用，個printer根本無事……

今次我地搞的checkpoint game有四十八人報名，大家知道左都好開心。

開完會，班衰仔都係例行工事地迫我請所有人食飯，而我又係行貨地一貫回應：「未癲啦唔該」。

散會之後，去左保安室叫人開soc房門，拎翻聯地D banner、工作證，星期日要用。

然後我坐巴士返華富村。唔係掛？！BU返華富村，只係35分鍾？！平時成個半鍾ga喎！peak hour的效應真係唔講得笑。

返到華富，去食LUNCH，買左本電腦雜誌。呢幾日唔知做乜好想睇翻D電腦書。我都成年無買電腦雜誌lu，同以前高峰期一個星期睇六、七本（包括GAME書）真係天淵之別。

睇完本雜誌，我先知我竟然睇左近個半鍾！唔係掛？！哇，原來本書成150幾頁，重要頁頁滿，而且內容好專業，教左我一D電學知識（比埋英文term添），重教埋我音速係乜，平流層點樣有助超音速飛行……乜而家一本12蚊的電腦雜誌，咁鬼PRO……同我以前睇果D好唔同……我決定以後期期買！

下午五點，我張新書桌終於送左來，好開心呀＞。＜！！

>>April 9, 2004 at 1:10:22 PM GMT+8

2004 年 4 月 3 日 星期六 【晴】

今日又要翻BU開聯地D會，真係拜山都唔得閒（雖然我一向都唔拜山）。見倒個會都好多人出席，我只有大嘆：「你班不考子丫…」

開左三粒鍾，又定左今個星期五開多次，我真係「開心死」。星期二「Hey！Man」（曦紋英文名？）又要開會…呵呵呵…

我翻左hall訓左一陣，然後又翻屋企，坐左粒幾鍾車，翻到華富村已經五點幾？下？我呢日咁就無左？

翻到家，上左新聞組，發現有昨日ue listening的答案。我對左兩次……what the hell！！！得67％？咁我重c唔c倒呢份paper？！

事緣我平時無練過past paper，只係練聽無練寫。昨日一開考，因為唔習慣寫得咁快，一開波就寫唔切，個心一慌，就聽唔清，咁就無左六、七分（呢六、七分明明好死易拎，只係寫人名，寫身高、體重、佢個女幾大之類…）。雖然後來我冷靜下來，狀態回勇，瘋狂追分，但都係得67％（61／91）……

越諗越嬲…同阿媽訴苦，我話：「呢次我吐血啦！」

點知佢當真…

媽：「你係咪熱氣呀？」


我估我今次成績：

oral －＞c
作文－＞d
ge－＞d
ps－＞c
listening－＞d

都無機c倒ga啦……算啦……連moses咁勁上年都c唔倒，我都係唔好咁天真啦～～


不過呢al真係幾有趣，遇到好多朋友

飲姐啦、tracy啦、annie啦、馮sir啦、校長夫人啦……呵呵，聖心慘變漢華大本營？

－－－
「俊佳的寫思」：二諦義第三層真諦

自己的英文一向都極之差劣，因為從少到大最討厭的便是英文。所以囉，會考竟然給我騙了一個e（10），真是感謝上倉。素來以升上預科為讀書目標的我，在真的上了預科後，又想嘗嘗當大學生的滋味，雖然這是我從少到大都未想過的事（band5人豈會想過升大學？）

迫於形勢，我硬著頭皮學起英文來。最後嘛，又給我混了一個e，給我升上了大學。

不如何時開始，對英文產生了一種執著。就象一個生來是窮人，非常渴望錢一樣；我則希望自己英文變好。

這種執著有時會過了火，把我燒傷。

剛才，我忽然領悟了那當時讀中哲史時所不明白的道理，是佛家的二諦義第三層真諦，非「非有」，非「非無」。

其實它的意思是，不要執著，但又不要執著「不要執著」。

是一種中道觀。

我心領神會後，終於開懷舒暢了。

>>April 4, 2004 at 3:17:03 PM GMT+8

2004 年 3 月 27 日 星期六 【晴】

今日聯地步行籌款，我同阿ROY、Brian朝早八點鍾就去到灣仔地站，然後一齊去環境資源中心幫手搬水。

我地去到，D人都未來。然後有兩個差人埋來問我野（因為我地備左案），問我係咪呢次活動的搞手，我話都算係啦。然後問我拎資料，抄我身份証，佢地做野真係好認真。

八點四十五分左右，幹事們基本上到齊，大家分工搬水，搬桌搬椅。然後班中學生都陸續來到。

我、中大的eric、Roy、Brian四人要lead一隊四十四人的隊伍，佢地都係元郎商會中學，有中一、中三同中六。哈，咁多人來，真係比面！：）

點下名、派下水、影下相，差唔多出發啦！我無數過幾多人，但一定超過一百個參考者，好開心＞。＜！阿mi的hku地理學會竟然全莊員出陣，強！

帶隊原來都有d難度，要控制佢地唔好太快，又唔好太慢，真係唔易。班FORM ONE同FORM THREE仔行得鬼咁快，叫佢行慢D都唔得。

有一個奇怪現象，我素來唔多有耐性應付D細頭，但唔知點解今日（竟然＠＠）好受歡，有一堆商會中學的人一見倒我，就係度喊「佳」！「佳」！「佳」左我百幾次。班女仔重搞笑，同我改名，「阿雞」、「阿雞」係咁叫我，又話我好面善，又話見過我，又問我眼析毛點先可以咁長，重有竟然（！）話我「男生女相」……唔好玩啦……

今日亦遇到OPAL個朋友，HKU的阿晶，哈哈，佢好得意～～

12點45分左右，終於行完啦。我地成功由灣仔行去香港仔。之後班莊員話去食PIZZA，我、ERIC（中大）、ROY、BRIAN幾個窮鬼就去香港仔一間叫香港風情的餐廳食飯。雖然都要30蚊一個人，但真係超好食！！

然後BRIAN去左我屋企（華富村）坐，吹下水～～～四點幾佢就走啦。我送左佢上車之後，一訓就訓到7點食飯。

食完飯，心血來潮睇浪客劍心漫畫。然後開始寫埋電腦科第二個網頁，YEAH，兩個鍾寫好～～以後唔使煩啦～～

今日係阿Gene生日，祝佢生日快樂！︿︿

－－－
To Queen：係呀，我懶左食日記。雖然仍然間唔中有D新的IDEA，但係無動力寫出來。

To 卡耳：多謝！但請問你係…？

>>March 28, 2004 at 5:07:46 PM GMT+8

2004 年 3 月 24 日 星期三 【晴】

好慘，成個星期無得係hall上網，被舍堂主任block我account……頂！

因為今日考UE oral，昨晚有d緊張，四點am先訓得著。

今日上完global tutor（話時話…都三個星期無上過啦），然後翻HALL訓左陣，又去上電腦LECTURE，不過懶得聽條友吹水，我自己同班friends吹唔好？

兩點半拔足起程往試場－－－福建中學（小西灣），位於港島柴灣。坐MTR去到柴灣，一個人楂住張地圖去搵，行左好耐，終於搵倒啦，時間係3點半。

我急尿到飛起，想入去間學校解決…頂…間學校要4點半先比考生入場……我係佢門口用英文講左幾句粗口之後，立即去搵廁所 to answer my biological alarm。

終於比我搵倒間老MC，借倒廁飛。左右無事，買左杯新地，一邊食，一邊做下熱身（自己同自己玩PRESENT）。

4點20分，夠鍾起行。4點35分到達，但無見WAITING ROOM個STAFF。

坐翻中學課室的椅子上，感覺好特別，哈哈～～

等。等。等。6點45分（頂…）終於都叫我去PREPARING ROOM…我係5點組的最後一批考生。

哇，全女班？三個考生，兩個考官都係女的？

PART ONE 題目係太空人？第一段話有個家長同個細路見倒個CHINESE hero？下？佢個名叫Coloniel Yang Liwei？邊個黎ga？！

終於比我見倒個KEY WORD－－spaceman，原來係楊利偉！（我初初連楊利偉個中文名都醒唔起…）

我個PRESENT係咁，等我默翻出來啦（又顯我天賦「經驗記憶能力）：

Good afternoon everyone. Today I'd like share with you an interesing article which is about spacemen.

A few months ago, our chinese spaceman Mr.Yang Liwei had finished the mission to the space , become the pioneer of chinese spaceman （而家睇翻，呢句好怪）. This marked that China can keep pace with other nations scientifically.

But while we trace back to the histroy of development of space technology. Mr.Yang, of course, is not the first human-being who can go to the space. In 1969, the American Mr.Armstrong had become the first human to get to the noon..noo..sorry...moon! （兩個考官係度笑啦）He is an amazing man. His moon walk ranked number 3.

Now one may ask why spacemen such Mr.Yang and Mr.Armstrong are so popualr? I think it is because spacemen can explore the new world, enrich our human's knowledge and most importantly, this signs that human-being is incredible creature.（係呀，我知個structure有問題）

Tha..That's（佢地又笑我啦） all of my presentation. Thank you.

Discussion個題目係定義一下何為GREAT PERSON，個GREAT字點解……哇…語理分析？！

不過我只係記係自己講過乜，但唔記人地講過乜啦（班女仔好煩，D例子大部份都係歌星，我又知係乜，得kelly chan一個例子我識），所以唔講啦。


至於個成績預計係點？唔理啦，通常越諗會越驚，總之自己個表現絕對稱唔上完美，不過點都應該好過上年掛？

－－－
To Fai：咁得閒多D來啦～～：）

>>March 26, 2004 at 8:17:10 AM GMT+8

2004 年 3 月 19 日 星期五 【晴】

潛水左一排，無寫日記，因為病左、忙左同懶左。

昨日新莊ＥＧＭ，無想像中咁有挑戰性，重以為Ｄ問題好尖銳添，不過咁係好事丫，證明我地Ｄ同學唔會為插而插，而係議事論事。今日遇倒阿楊，佢地前幾日歷史學會ＥＧＭ，被人ＣＯＮ到飛起，佢話佢地的內鬥情況好激烈，好心淡，重話被人ＣＯＮ左四百幾條問題……陰公……特別係jot minute果個……

中文篇論說文功課，我寫語理分析，最後寫左三千七百幾字（為左要人明白，用左好多詳細實例和方法展示），其實係我估有辨法成撮成三千字，不過唔夠時間撮，因為我昨晚先做完，今日將篇文抄翻落原稿紙，抄左成兩粒鍾……

今日我個新同房終於搬入來啦，佢係BBA Year3，個人都幾NICE（好在…）。

晚上睇左古天樂套三級片《豪情》，哈哈，見倒古天樂同陳亦迅勁講淫野，爆粗口（真係最粗口果ｄ），好得意。

>>March 19, 2004 at 5:19:26 PM GMT+8

2004 年 3 月 8 日 星期一 【晴】

因為要幫地理學會影彩印，而島仔間仆街「聯合」影印店話要收我兩蚊一張（重話原價三蚊），於是去灣仔影，人地9毫子一張，質素重好高添。

今日照舊走Pro.Li堂，四點半同去阿恒去灣仔。本來打算買衫著，但係原來我已經無乜錢（因為最近無補習），乜都無買；阿恒又無買野……最後乜都無買過……真係正如阿恒話齍：「真係行街」。

補充曬命資料一則和破產宣言：

上星期日同阿恒去左旺角，終於去左想去好耐的「田園書店」，正！
果度D書比商務平好多！

我買左：
李天命《存在主義概論》，原價67，特價54！
Anthony Robbins《喚醒心中的巨人》，原價127，特價89！

然後又係SIM CITY買左李天命所不屑的，但黃霑好buy的作者Edward De Bono的著作《Six Thinking Hats》簡體中文版，只售35蚊，印製極之精美（英文版賣成200蚊左右）！

最後！用72蚊買倒想睇好耐的《廢柴同盟》（全四集）！哈哈哈！！哈……


然後又買左SUIT……然後要幫地理學會印野（出住70蚊左右）……再加上兩個星期無補習……聯地開會的車費……


！！！現在正式宣佈，我已經陷入財政危機！！！

>>March 9, 2004 at 5:40:09 PM GMT+8

2004 年 3 月 4 日 星期四 【晴】

今朝PE堂玩健身舞，個個跳到出曬汗，不過好有趣。

電腦堂上到十一點，我同阿恒、馬煇就提早走人，去食LUNCH，食完上第一次的YY LAB。好耐無係LAB 見Johnson，佢再次肯定YY的風格，如果考試寫得太多，YY會夠膽死唔睇，比幾分就算！哈哈！話就話為左precise and concise，其實計我話，係yy懶就真，不過我鍾意！因為我最討厭繁鎖，主張「簡單就是美」～～

上完yy，Brain同阿Roy去左我個HALL度hea，阿Roy就勁睇我D漫畫，Brain就狂抄我D功課，而我就聽音樂，眠左陣～～～

上carto，極不順利，先係LOGIN唔倒，然後HANG機，根住重要成日做錯野，最後重要由頭做過，正呀……

臨落堂，Opal無啦啦走埋來，同個一個女仔講「呢個就係阿佳啦」，然後又同我講「呢個係真cream」……我呆左幾秒……what？！我幾時識一個女人叫cream呀？我又幾時識左個「假cream」而我唔知？

原來係Queen！哇！妳竟然來左BU，好高興見倒妳！＞。＜

放學又去PAGEONE睇書，終於買左安東尼本《激發心靈潛力》，想睇好耐啦！

>>March 5, 2004 at 5:57:12 PM GMT+8

2004 年 3 月 3 日 星期三 【晴】

十二點起身去買飯食，食完就去灣仔印poster（9毫子一張彩色影印，扺！），重比我買倒漫畫笑傲江湖最新一期（下期大結局啦）。

三點翻返BU上英文堂，無乜特別。中文堂講邏輯語句，簡直開正我果犯啦～～不過當然無分析哲學咁深入和有系統啦。

何老師個名原來咁有趣。「何以成邦？」

昨日拎倒上學期「思考」課程的證書，好開心！張證書除左有六位講者的名之外，竟然重有策劃者李天命的名（雖然不是親筆簽名）係度，重有浸大校長吳清輝個親筆簽名……估唔到張證書整到咁勁，人地唔知道，重以為係d好正式的思考課程，呵呵！！

>>March 4, 2004 at 10:35:26 AM GMT+8

2004 年 3 月 1 日 星期一 【晴】

好耐無寫日記，因為前幾日去左江門，加上近來好忙，一翻到hall就想訓覺。

今日拎左我之前做的性格測驗的結果。好的部份唔講啦，壞的有三：

一、我「不守規則」的性格，無論與本港還是美國大學生相比，都達到分數的極限……勁……我真係一個無規律的人！

二、我的情緒穩定度極高，即指我好少（甚至絕不）被小事困擾；這是好事，但又衍生出問題：導師說我「不知人間疾苦」，因為在別人眼中痛苦的事，在我眼中可能根不當一回事，好處是情緒穩定，壞處是缺乏「同理心」，「不會明白」他人有何困苦，會被人誤以為麻目不仁，有損有際關係；（其實呢個性格完全係我「中四、五黑暗時期」被迫養成的）

三、雖然我覺得自己都有D自大，但測驗結果話我知，我常常低估自己……唔係掛？（可能係…我的自信有時都幾詭弱）

－－－
To Lam Queen：被妳一講，我最近經過書店也看了一會《存在主義概論》，原來都係正野！值得「參考」！

>>March 2, 2004 at 4:18:42 PM GMT+8