2004 年 6 月 20 日 星期日 【晴】

中箭良久
仍不能自已
不堪高明地跟自己做了外科手術
結果？
箭桿是拔走了
可箭鏃還是深深的藏在體內

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
四點先訓

一起身望鐘
實在唔敢信自己
太懶啦
居然係晏晝三點
訓左十一個鐘.............

開始懷疑自己係唔係人...

on9 撞見仲響杭州既 Vanessa
同佢搭左好耐訕
佢上次作完篇 compo 之後就無野做
搞到佢成日都話悶
佢其實可以問人畀野佢做既
不過佢又點會咁勤力呀~~~~

同佢玩 MSN 遊戲佢又 hang 機
所以都係同佢吹水居多
有時佢仲話："你快 D 講野啦, 你唔吹水我都好悶架...."

趁機叫佢幫我買書
horhor
問佢會唔會食轉莊飯
佢話果日應該得閒
好呀
可以順手送手信畀我呀！！
^ ^

同佢傾杭州既野食
佢話平時 11:30 就食晏, 17:?? 就食晚飯
咁早！？
對於佢點解可以咁早食晚飯, 而到睇波時候又唔使食野感到極之不可思議~~~

大家知唔知杭州盛產乜呢？
知？叻喎！
唔知？唔緊要！
杭州就當然係出產 "美女" 既勝地
我當然叫佢映多幾幅當地美女既相黎睇啦
點知佢話：
"我無帶 USB 呀！又估唔到個個都帶 notebook, 所以都無帶電腦去, 宜家都驚唔夠 memory 呀~~"

太笨啦！
咁我咪唔可以一睹杭州美女既風采咯
忍唔住話佢 stupid
佢居然喊
仲話唔幫我買書
@ _ @
惟有話係我笨啦......
好彩佢兩樣都係講笑O者
^ o ^

同佢傾到五點幾佢放工先傾完
傾左成個幾兩個鐘
佢咁既工作態度都唔畀人炒
真係奇蹟.....

望到卡卡 xanga 好似唔係好滿意佢宜家既生活
同佢閒聊
佢宜家既生活, 不外是睇書, ICQ, 游水, 練琴
日日如是, 其實都幾悶
尤其佢個人咁活躍
叫佢日日做埋 D 差唔多既活動
連我都覺得慘

佢做左個心理測驗
基本上佢都算係一個正常既人黎既 (起碼正常過我...)
不過就自戀左少少
大家不妨玩下呀~~~
http://www.4degreez.com/misc/personality_disorder_test.mv

得閒去下海洋公園
都係唔錯既選擇
不過遲 D 迪士尼開左
海洋公園都係得執笠架咯......

聽日端午節
但係走去 Times 聽表演
我諗阿屈生都唔會介意少一個半個人紀念佢既

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
有關 Reunion 果晚都仲係有一件事漏左：
響海旁一行六人響道吹水
笨神大談有 D 笨人搞七點幾既活動, 居然響六點左右先打畀佢 confirm 時間
正當佢談到興起既時候
我無啦啦加把口：
"再過份 D 都見過啦！
上次有 "D" 人約左我食飯, 居然一點十先打畀我 confirm 時間...."
(詳情請參照 9 / 6 既日記)

咁多人面前串得佢咁應
真係有 D 唔好意思
sorry~~~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
上帝見你口渴，創造水；
見你餓，創造米；
見你沒有可愛的朋友，創造我；
祂見這世界上沒有蠢豬，順便也創造你。

>>June 21, 2004 at 7:11:41 PM GMT+8

2004 年 6 月 19 日 星期六 【晴】

三日之內第二次通頂
有 D 過份
不過今日唔係我想架~~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
今日係父親節
晨早老媽子就同我講左今日會飲早茶
咁晏先返到屋企
沖完涼之後都無奢望過訓到覺
上網睇文
咁就通左頂咯....

六點三叫醒家姐
同佢講："起身啦！六點三啦！"
佢以為我講笑
當佢望到個鐘既時候忍唔住發出一聲慘叫.....

未夠七點已經置身於一間酒樓
飲到九點返屋企
當然係由我畀錢啦

返到屋企忍唔住訓
訓到十二點開始醒
個頭唔係好痛
但係 D 酒氣就係咁湧上黎
唔係掛！
尋日飲左杯 "荔枝" 味思樂冰咋喎~~~~
@_@

打畀小談
之前佢話今日陪佢睇表演架嘛
點知原來佢記錯日子
係廿二先 arm
好彩
如果唔係我真係驚會聽聽下企係 Times 訓著左......

今日上左阿婆屋企食飯
未訓醒既我無啦啦變到勁乖仔
阿媽叫我幫手做乜就做
擺到明仲未醉醒啦...........

尋日勁悶熱
今日仲係入夏以來天文台首次發出酷熱天氣警告既日子
市區最高溫度為 33 ℃
新界更錄得 34 ℃ 高溫
熱死人啦
好彩
凌晨時份既大雨倒舒緩了翳焗的感覺

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
尋日醉醉地又呆呆地
所以日記寫得唔清唔楚
今日補記番

1. 　尋日 Belinda 無落 Bar, 得六個人去, 計有關生, 火星人, 我, 阿大, Summer 同笨神
2. 　尋日收到阿大計好既錢, D 錢係之前我地自己用響 Choir 度既錢, 終於有得拎番
　　雖然有 D 尷尬, 但係都係照收
3. 　尋日飲野又令到關生忍唔住講佢既感情生活
　　完全唔使我地使用任何手段, 佢絕對好樂意同我地分享......
4. 　尋日行過既尖咀街道好骯髒, 成日都見到 "強仔"
　　嚇到不嬲怕 "強仔" 既笨神不時高聲尖叫
　　佢 D 尖叫聲仲嚇親平時唔多同我地一齊 hae 既 Summer~~~
5. 　Choir Reunion 既紀念品, 雖然唔多實用 (有乜紀念品係會實用架....)
　　但係好感動
6. 　還番人地個 "私生子" 畀笨神
　　佢黎既時候畀人用個 MUJI 膠袋袋住, 還番畀佢既時候都係用同一個 MUJI 膠袋
　　惟一既分別, 就係還畀佢既時候, 個膠袋多左 D 歲月既滄桑 (即係皺..... ^ ^ " )
7. 　六個人響 Bar 飲左七杯野, 笨神一個人造就左兩杯野
8. 　買野飲去海旁吹風, 除左關生買左兩枝有極少酒精成份既 Jolly Sandy , 同火星人既 ICE 之外
　　其餘既人都好健康咁飲非酒精飲品
9. 　關生未去到海旁就隊左佢果兩支野, 擺到明有心事啦
　　問佢又唔答, 跟住又會打畀人話佢唔開心
　　.........
10. 好難得尋日 Summer 會同我一齊玩
　　不過佢尋日朝早晨早就要返工
　　所以一邊飲野一邊就疲態畢露......

今日笨神都要教琴
佢尋日飲左我一個 double 既野
雖然佢酒量好我好多
但係都忍唔住諗佢今日會唔會好似上次咁對佢學生*

* 佢上次就驚世駭俗咯
簡直係鋼琴教師界既典範
話說某次佢牛飲完翌日, 佢學生上佢屋企學琴
個學生無乜點練過琴 (佢一路烚眼訓上堂一路聽都聽得出, 好明顯個學生都無練琴得好過份)
於是佢就同個學生講：
"你都無練過琴, 姐姐又唔係好舒服, 你都係返屋企練琴, 下星期再彈過我聽啦......"

聽完呢句對話之後, 我地成班人就立即為佢學生作左以下既對白：
學生：(無奈地說) Miss 呀 Miss, 好似呢個月你都唔舒服左四次啦喎..............

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
D' où venons nous?
Que sommes nous?
Où allons nous?

我們從何處來？
我們是甚麼？
我們往何處去？

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
相見亦無事
不來常思君

>>June 20, 2004 at 4:38:34 PM GMT+8

2004 年 6 月 18 日 星期五 【晴】

隔左咁多日
終於有藉口出街
其實自己出街都好自由
基本上已經係可以任何時間出街, 去邊, 幾點返都無人理 (又或者係無得理)
居然自己放棄咁好既權利
日日自閉住自己
實在有 D 浪費

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
十二點畀個失魂電話嘈醒
老媽子打番屋企搵家姊
朦朦朧朧既我無帶眼鏡通屋搵都唔見佢
淨係見到個電腦無熄
好驚
唔通佢響屋企, 但係見佢唔到？！

收線之後訓唔著
On9 加 check e-mail
咁 arm 撞到卡卡
佢話佢日日都 08:30 起身
實在太健康啦~~~~~

撞到佢當然同佢閒 hae 下啦
唏噓左一輪失眠
問佢有乜活動
佢話去游水, 不過唔同個妹去 (初中生未考完試嘛)
吹到佢食晏就無傾

死守住部電腦唔走
好難得同朱哥哥 chat
因為佢 send 唔到一套 video 去佢香港屋企
佢想我幫佢 receive 住先
可惜 "唏噓寬頻" 既接收能力同 56K 無分別
結果佢都係叫左另一個朋友幫佢

無聊地同老拎 hae
佢有 "嬲" 我玩 MSN 遊戲
但係個 MSN 唔知係咪 short short 地
同唔到佢玩

見到花姐 ON 9
由於唔記得今日係星期六 (銀行早收)
以為佢一路返工一路吞泡

約佢飲野都約左佢成個幾兩個月
最後佢都只係話要七月先得閒

返 poly
今日 reunion 唔係好多人
如果 Belinda 都唔到
9th 就只係得我同笨神兩個出席
8th 仲少, 得 MicMic 一個代表
仲少過老鬼

氣氛算係 OK 既
一開頭好鬼無聊
玩左遊戲大家都總有得笑
整體都算唔錯既
係人數少 D O者
舊年我地 reunion 無蝕錢架
不過今年就蝕死佢地咯~~~~

阿大, 火星人同 Summer 響尾聲既食野時段先到
預左四十幾人黎, 結果得廿幾個人到
野食變得好夠, 仲食唔晒添 (同我地 O'nit 一樣....)

關生響文化中心聽完表演先到
大家好邪惡地叫佢過黎 poly
然後商量好唔好買野去海傍飲野 (要佢行多轉, 呵呵~~)
最後都係去左亞士厘道飲野

飲完野又去海傍坐
坐到三點先走
其間當然係不斷地言不及義啦
笨神仲不斷地唱佢自己國 (笨神國) 既國歌
真係好有氣勢..............

由文化中心行返紅隧等巴士
返到屋企成四點
沖左個涼, 打完日記
咁就五點
又一日無訓咯

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
智力問題：

一人拿一張百元鈔票到商店買了25元的東西
店主由於手頭沒有零錢，便拿這張百元鈔票到隔壁的小攤販那裡換了100元零錢
並找了那人75元零錢
那人拿著25元的東西和75元零錢走了
過了一會兒，隔壁小攤販找到店主，說剛才店主拿來換零錢的百元鈔票是假鈔
店主仔細一看，果然是假鈔。店主只好又拿了一張真的百元鈔票給小攤販。

問：在整個過程中，店主一共虧了多少錢財？

條問題成日都有人答錯
其實只要有少少 account 常識
甚至只係有些少智慧都識答
如果咁都答錯
唔緊要
你只需要承認你係笨神國既子民
受到笨神無私既眷顧就得架啦

如欲提供答案者, 歡迎留言
答中而又被抽中之幸運觀眾可獲紀念品乙份

>>June 19, 2004 at 9:07:29 PM GMT+8

2004 年 6 月 17 日 星期四 【晴】

失眠
有時是控制不了
有時卻是自招的

人畢竟不是鐵鑄的
只要睡不著一兩天
最終都會睡得著

呵欠~~~~
回復有睡意既日子
畢竟係一件好事

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
通左一晚頂
完全唔明點解
點解我會頂得順？
因乜要通？
hae 通....

hae 得好緊要
當係慶祝前幾日收到既壞消息？
無期待過當然唔應該會失望
但為何現在的心情依舊沉重？

成晚同 "魚肉小談" 玩 MSN 遊戲
仲畀佢順利屈左去 Time Square 睇表演
希望個表演唔好咁悶啦

呆坐於電腦前, 直至天色大明
沒有睡
出灣仔搞 passport

再一次證明自己生個腦出黎唔知做乜
去到先記得自己 passport 無過期
係回鄉證過期
唉~~~~
@_@

無直接返屋企
反而去左圖書館睇書
以為自己可以支持得住
但係.....
響圖書館一路睇書一路訓
結果都係返屋企先訓

買飛睇 HKCO
好耐無睇過表演咯
下半樂季惟一令我有興趣去睇既節目
何解？
有阮睇嘛

大昏迷
今日 Poly 既中樂排練就咁無左咯
Sorry

笨神今日居然響凌晨之前 on9
好少可
同佢八左一陣聽日 choir Reunion

聽日關生要表演, Vanessa 響杭州, 阿大又唔去 (即係火星人都唔慌會出現....)
其他人唔知會唔去
死啦
聽日第 9 屆唔係淨係得我同笨神出席掛......

舊年蟄伏到 7 月先回復正常
好似係梁正傑畢業音樂會先重出江湖
今年早 D
聽日去 choir reunion
會唔會係我大學生涯既最後一次大學活動呢？

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
失眠

失眠是很痛苦的
明明心靈上很疲倦, 但身體又睡不著
在床上輾轉反側
起身又不是, 繼續睡又沒有結果
時常失眠更難受

失眠時大家會做什麼？
起床煮麵？睇電視？執屋？還是看書？
我較喜歡看文章
失眠的限制太大了
例如電視沒有什麼好看, 朋友大都睡覺了
所以失眠大都只有一個人承受，就算要找人分享，也要待天光才行。

失眠就如失戀
平時每天睡覺, 你不會想到失眠會降臨
但失眠便是突然其來, 你越緊張, 你便越易失眠
失眠不單控制不到, 也只有一個人去承受及處理
雖然朋友可以幫忙, 但最後也要靠自己
當你失戀時, 你會找一些寄託
正如失眠時你也會找一些寄託去打發時間
我們是等待時間過去的
時間過去了, 我們才能重眠
幸運的可能只需數小時, 不幸運可能數天也持續失眠

雖然睡覺是人生的本能及需要
但有時也是不能強求的
要失眠便讓它失眠好了
開開心心地面對吧

>>June 18, 2004 at 3:19:57 PM GMT+8

2004 年 6 月 16 日 星期三 【晴】

日夜顛倒的人生
現在辦公時間為：1330 - 0400

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
今朝九點幾都有醒過
都好想起身
不過最後起身時間都係下午一時三十分

拜託大家千祈唔好響 1330 或之前搵我
事關我未起身
亦起唔到身
就算起左身, 都可能係夢遊

尋日打畀阿一媽媽
伯母不但好精明咁知道要幫佢個仔交 music camp 既支票
仲精明到順手指點埋我要親自交去 MO
真係精明得厲害

on 9 見到 Vanessa
佢仲響杭州
宜家響上面既雜誌社做打雜
校對, 寫野......乜都要做
仲要無人工收, 得津貼
不過津貼要佢返落黎先有得攞

唔係好識簡體寫
但係要上去做雜誌
~_~"
佢做果本野叫 "度假旅遊"
近期佢仲好似寫左一篇講香港自由行既添
不過佢話炒既居多喎
熱切期待佢本雜誌被人告抄襲
^ o ^

由於 Vanessa 既 ICQ 成日都無啦啦會同人斷絕聯絡
所以畀佢迫左用 MSN
無乜熟人用 MSN
所以都好少開
chat chat 下就要出門口
有 D 唔捨得同佢講 BB 添
難得同佢講野而無乜吹水嘛~~~

今日任務如下：
1. 交 music camp fee
2. 還左本還左期既 GPS
3. 入錢落支票戶口 (唔夠錢畀嘛)

去旺角 centre 交
阿熙仲記得我個名
@_@
實在太奇怪啦
點解好似個個 MO 既工作人員都認得我個樣同記得我個名既？？

去完入錢就去睇 CD
瘋狂收購左幾隻 CD
忍唔住手買左隻中國廣播民族樂團既 New Era
想買好耐, 但係都係忍手 (貴呀嘛...)
卒之今日都係買左

去榆林打書釘
睇睇下書醒起要去還書
好彩旺角有公共圖書館
唔係六點半我都唔知點樣飛返彩虹還書咯

去完還書再回歸榆林
一口氣睇左一套系列
睇完都九點咯....

返到屋企
今日既晚餐係 "傻"
食 "傻" 食到個人都傻左

是晚係咁同談記燒賣玩 MSN 遊戲
敬請各方有 MSN 既好友留低佢既 MSN 畀小弟
好讓我用唔到 ICQ 收發郵件時可以轉用 MSN

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
我要退出 不甘清靜
要瀟洒 要解脫 不夠清醒

我想笑 結果擠出這苦笑
那麼牽強 不如罷了

>>June 17, 2004 at 6:37:43 PM GMT+8

2004 年 6 月 15 日 星期二 【晴】

看文天行 xanga, 絕對係一件賞心樂事
行文流暢, 言而有物
幽默的過癮, 傷春悲秋也不流俗
可惜產量較少
不如本人空閒
如斯空閒每日一記

相較本人的日記, 相信他也可對我說：
「米粒之珠, 也放光華」(姑且套用梁羽生經常用既術語, 次次放暗器都會畀人咁話.....)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
廣告時間

談記燒賣：

太古談記
正宗靚燒賣
全港只得一家
"賣" 身肥美, 童叟無欺
益街坊價每位 $ 5 蚊 15 粒

呆下呆下
笨下笨下
遲早做左笨國既子民.....

尋日無乜人同我吹水
所以三點左右就訓
今朝都曾經試過響張床掙扎要早 D 起身
可惜最後都係畀周公捉到
一點幾先醒

打機
搵工
填 form
.......
咁就一日

畀老拎煩左咁多日
今日終於捨得打去阿一屋企
伯母接電話
似乎一切都在伯母控制之內喎
之但係乜原來阿一報左兩個團咩？！
無所謂啦
佢都淨係入到青年中樂團之嘛

放狗果然係一個好藉口
得閒都學下先
不過如果有人見到我呢個藉口
又深知公屋唔畀養狗既道理
走去告我咁咪弊.............

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
姑且將文天行之 xanga 貼出
以供各觀眾觀賞：

嗯，讀過中化既人一定知道中國人關聯感應同將唔同學科炒埋一碟
(其實唔係炒埋而係根本就唔會分科)既特質。
雖然好多人都話文革之後中國文化所剩無幾，
不過係近排一D新聞中可見呢種文化特質係死唔去既~

近期發現內地有毒食品一覽
食品 附註 發現來源
． 毒竹筍 以硫磺處理，含有大量二氧化硫 四川彭州
． 毒粉絲 以化肥漂白及含有大量二氧化硫 ，食用可致癌 山東龍口，曾發現香港市面有出售
． 毒泡菜 以工業鹽及色素醃， 並在泡菜上噴灑含劇毒的農用殺蟲劑 四川，直銷廣州、深圳
． 劣質奶粉 含有大量 麥牙糊精、庶精和糖精， 蛋白質、脂肪、鈣、磷、鋅含量均遠低於標準，嬰兒食用後嚴重營養不良甚至致命 初發現於安徽阜陽等地區，奶粉流通全國
． 皮革糖果 用日韓流入的皮革廢料提煉而成 重慶銅梁懸
． 毛髮鼓油 以來源不明的人體毛髮混合色素及鹽而成 湖北武漢
． 紅心雞蛋 在雞飼料裏加了一種人工色素「加麗素紅」染紅， 雞吃後產下紅心蛋 湖南、天津，後流入銷廣州
． 特製燒羊肉鴿肉 以雙氧水漂白的鼠肉製成 江蘇、廣州
． 死豬肉水較、死豬肉鬆 以死豬肉及未清洗白菜做材料，偶有發現混入煙灰等雜物 天津
． 死豬金華火腿 以死豬肉製作，並以致癌殺蟲劑殺蛆 淅江金華市
． 漂白牙菜 以工業用漂白水漂白芽菜 北京
． 漂白魚翅 以工業用雙氧水漂白魚翅 廣東佛山
． 漂白白果 以工業用雙氧水漂白白果 廣東江門
． 糞水臭豆腐 用糞水炮製名乎其實的臭豆腐 廣東、深圳
． 防腐牛肚 以防死屍腐壞的福爾馬森水浸製 廣東、深圳、湖北、武漢
． 舊餡料月餅 以去年雪藏或食餘的月餅材料再製新月餅 江蘇、南京
． 毒大米 以黃霉素翻新漂白舊米，食用後會致癌
(資料來源：明報、蘋果日報、星島日報)

拿，你睇中國人幾鍾意用工業用既材料黎做食品...
咁就體現左中國文化入面萬物皆源於天既精神
所以工業用定係人用都不過係西方科學強行分割人同自然既產物~~~

至於用農用殺蟲水更係合理不過
中國自古以農立國，可以用係農作物上豈有唔可以用係其它食物之上之理 (都係食物者?)

頭髮豉油就係一個關聯感應既好例子，佢既推論大概係咁既:
1. 豉油係黑色既
2. 頭髮亦係黑色既
結論: 頭髮可以整豉油
嗯.....

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
有時候事情是可以向好的一方想的：

得不到不一定比得到差
傷心過才會成長
看錯了人才會累積經驗
一方面的失意可令你專注在另一方面上
孤身隻影可令人學會自處
陰沉成就了深度
缺乏認同才有上進心
沒有稱讚便不會自滿
換言之，再灰也是好的

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
只有不可改變的才是最令人傷心的
不過即使如此
有很多不如意事很容易便可以用認命般的方式接受
而慢慢的壓在心底的深處了

>>June 17, 2004 at 7:20:43 PM GMT+8

2004 年 6 月 14 日 星期一 【晴】

是日對世界依舊無甚貢獻
仲要浪費地球資源

是日金句：有朋自遠方來, 不亦樂乎

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
尋日同小談閒 hae
無啦啦吹開考唔考 AMusTCL (大概係聖三一既八級再上一級)
睇完聖三一既卷
發現連 D 八級既都唔見得點做
小談仲記得多過我
有 D 唔明點解皇家八級會考得高過佢添.....

本來會早 D 訓
幫大玉搞到遲左訓
佢申請左演藝既課程 (唔係音樂, 關於服裝既), 但係到宜家都未通知佢面試
幫佢睇左封信有冇問題, 應佢要求搞左兩個信封
搞到無時間睇小說

五點半訓
一點幾起身
早過尋日架

打機
打左一陣
上網搵左一陣工
見到一個好奇怪既現象
沙田某中學請 TA (teacher assisstant), 月薪一萬多 D
天水圍某中學又係請 TA, 居然月薪只係九千多
相差成千蚊
職位一樣, 去既地方遠左
有乜理由人工仲低左架~~~~

有份工既入職要求係要有無線電操作經驗
於是同家姐諗左個片段：

題目：無線電.......

人物：經理 (年齡性別不拘)
　　　面試者 (年齡性別不拘, 五十來歲的阿伯及說話帶外省口音為佳)
　　　臨記數名 (公司職員)
地點：公司會議室
道具：白紙一張 (作履歷表用), 手機多部

　經理：(低頭望著手中的履歷表) 先生, 我地呢份工作係需要有無線電操作經驗既
　　　　但係你既履歷表好似無包括過呢點喎...
面試者：(烚熟狗頭狀) 騎騎 (笑聲).....有！當然有經驗啦！
　　　　我睇左幾十年無線電............視, 開台睇到家陣架啦！點會唔熟 o者？！
　經理：(流汗中) 唔好意思呀先生, 我地唔係講緊無線電視, 係話無線電呀！
面試者：(搔頭無奈狀) 騎騎....... 乜無線電視同無線電唔同架咩？
　　　　(轉有信心狀) 不過唔緊要, 關於無線電既知識我都總算係有 d 既........
　經理：(誘導狀) 係？！唔知係關於邊方面既呢？
面試者：(自信狀) 無呀！我以前都係做開呢行架嘛！我以前係旺角擺檔架！
　經理：(一邊聽阿伯說話, 一邊點頭狀) 唔唔...... (忽地一怔) o下？！擺檔？！
面試者：係呀！我以前擺檔收無線電...........話架嘛！近排就最興果部 "Sori Eric 神" 架啦......
　　　　(經理從椅上掉到地上, 面試者望著經理, 從椅子站起)
　　　　(慌張狀) 經理, 你無 "樹" 呀嘛！ (開門向房外的職員喊道)
　　　　大家快 D 入黎睇下經理呀！佢好似嘔白泡呀...............
　　　　
好無聊
但係今日既精神狀態就係諗到咁多.....

同無聊既老拎 chat chat 下
佢同我講阿一同肥仔 on 9
阿一好快就 off 左, 仲無理我添
肥仔就同我講左兩句 (真係得兩句, 一句係鬧我既.....)

打打下機
有人打黎
居然係汪汪
意想不到既係佢搵我表演
仲要係同 Mathew 夾 "異想天開"
實應承佢既
橫掂咁悶
不過無練阮咁耐, 玩唔玩到架？？

打打下機又有電話
以為係汪汪
點知居然係麥觀
稀客
真係稀客
朱老師走之後就無見過佢
花姐都仲話偶而會見到
佢就真係無見好耐
忍唔住同佢吹水
吹到差 D 飯都唔使食

食完飯繼續上網
阿一響意大利既威尼斯上網
未食意大利粉, 但係飲左意大利咖啡
總算證實左意大利係有意大利咖啡
唔似得揚州無揚州炒飯, 星加坡無星州炒米咁

同阿一吹左幾樣野：
1. 無手信..... > . <
2. Music Camp 有乜人入到
3. 趙海珠 (呢個 topic 今日都算幾 heat, 同麥觀又有講, 同佢又有吹)
4. 放 (呢個唔關佢事, 純粹係我問題 o者....唉.....................)
5. GPA
6. 撞到佢爸爸
.................

聽日究竟有乜搞呢？
好似都係時候練下琴啦~~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
欺騙人的最高境界是欺騙別人的感情
因為, 只有感情才可以叫人痛苦一生

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
拋出一片石, 得不到半點漣漪
不拋石, 倒自怨大海不波？
可笑
可憐

>>June 15, 2004 at 6:27:44 PM GMT+8

2004 年 6 月 13 日 星期日 【晴】

有意義既一日
日日其實都可以好有意義
只係有時無好好利用

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
起身既時候有 D 奇怪
平時起身都仲有 D 眼訓既感覺
今日完全無
仲隱約聽到廳中的收音機傳來的聲音
怎麼是午間節目？
抬頭向鐘一望
兩點三.......

尋日太早醒
所以今日補番？！

望向廳中的老媽子同家姐怡然燒炭
完全無野好講
好彩佢地開大個窗燒炭
唔係我死左都唔知發生乜事
> . <

打左陣機就出旺角
今日既任務係去民政處還番個工作證
其實應該要還好耐
但係從來都無人叫我還
搞到我以為唔使還添

還完就去圖書館 hae
狂摷左一輪 CD
都係搵唔到 Pour le Piano
最後搵左兩隻 Debussy , 再加一隻貝多芬 Piano Sonatas
咁就無位咯
早知就還多 D 之前借落既書啦

見到一本好有用既書
書名係 "唱歌的門徑"
香港上每書局出版社出版
係一本舊書
講既係一 D 好基本既唱歌技巧
對於初學聲樂, 又或者係未正式受過聲樂訓練既人來說
呢本書絕對可以滿足佢地既基本知識
可惜無位借
唔係一定借去影左佢

圖書館關門就走
行左一陣旺電
無乜野要添置
歸家

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
When players make their decisions based on the best return both of himself and the others
they can achieve－－John Nash, Game Theory

決策者如何因應對手選擇
訂定對自己最有利的策略
－－博弈論, 約翰拿殊

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
世界上許多許多事
在開始做的時候都是無法預知確切結果
問題是決定這樣做的人
必須對自己能做到這件事有信心

>>June 14, 2004 at 6:03:23 PM GMT+8

2004 年 6 月 12 日 星期六 【晴】

再次上到網
無乜興奮既感覺
或者上到網可能未必係一件好事
至少
有得上網會令我 hae 得更 hae, 頹得更頹

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
尋晚明珠台重播 "Forest Gump"
場景好感人
果時戲又睇過, 書又睇過
感人既地方以前早就感受過
但對齣戲既某 D 情節有新既體會
以前唔係好明點解阿甘要無啦啦跑步
依家先明白唔係所有野都有得解釋
如果所有事都有得解釋
點解我會 hae 左咁多年？

其實 "Forest Gump" 既作者曾經出過 "阿甘正傳續集"
我買左本書睇
講既野都係關於阿甘既糊塗事
點解唔拍續集？
可能係續集寫既深度唔夠掛.... (搗蛋依舊, 其實第一集同第二集差唔多)

九點半唔夠就醒
實在前所未有
點解咁早醒？
如果你無啦啦畀人成張被拎走左, 我相信你都會醒.....
全無人性
人地發緊好夢架嘛 > . <

醒左都係打機
聽到收音機引述政府官員叫 D 人唔好咁遲先申請護照同辦簽證
係噃
仲未搞添
@ _ @

上唔到網既原因原來係因為 "唏噓寬頻" upgrade 既時候整鬆左條線
搞完就上得番網
"唏噓寬頻" 搞到我尋日要唏噓地睇我唏噓既 result
真係唏噓

花姐朋友話上北京
佢就問我有乜琴書好買
同佢講左好耐
最後結論係：佢買 D 乜買多套畀我

問卡卡有冇興趣買琴書
佢即刻話好
研究左好耐
發現原來宜家都好似有好多本中阮既專集出左
之但係本本 D 歌都係差唔多

阮既書包括：
1. 阮曲集 1 & 2 (綠色封皮, 學阮必買, 果時花姐借畀我影)
2. 阮曲集 1 & 2 ($ 120 兩本版, 我得影印本)
3. 林吉良阮撥彈法
4. 林吉良阮曲選 (以上兩本都係朱哥哥買完賣畀我既)
5. 阮技藝 (紫色封面既)
6. 劉星果本 (唔記得叫乜名, 紅色封面)
7. 阮柳琴演奏基礎教程 (魏育茹既, 未見過)
8. 阮名師指點 (汪崇國, 有 VCD, 好高級架, 不過都係未見過)
9. "中阮 (大阮) 曲譜" (人民音樂出版社, 唔知入面有乜歌)
........

嘻嘻想學樂理
佢搵左要收錢既小談
搶佢飯碗
嘻嘻聽到我都要收佢錢
最後話自學喎

都係勸佢搵小談算數

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
三段文字
三種唔同風格
究竟邊種好 D？

個人認為都係原文好 D

(原文)
Why do we mess up exams?

A year has 365 days for you to study.
After taking away 52 Sundays, there are only 313 days left.
There are 50 days in the summer that is way too hot to work so there are only 263 days left.
We sleep 8 hours a day, in a year, that counts up to 122 days so now we're left with 141 days.
If we fooled around for only 1 hour a day, 15 days are gone, so we are left with 126 days.
We spend 2 hours eating each day, 30 days are used in this way in the year, and we are left with 96 days in our year.
We spend 1 hour a day speaking to friends and family, that takes away 15 days more and we are left with 81 days.
Exams and tests take up at least 35 days in your year, hence you are only left with 46 days.
Taking off approximately 40 days of holidays, you are only left with 6 days.
Say you are sick for a minimum of 3 days, you're left with 3 days in the year to study!
Let's say you only go out for 2 days! You are left with 1 day!
But that 1 day is your birthday... so...
Good luck to everyone on your exams.

(白話文譯本, 老拎作品)
我們為甚麼總是考試失敗？

一年有365日讀書的時間。
減去了52個周日，餘下313日。
夏天有50日因為天氣太熱而無法工作，因此只餘下263日。
我們每天睡8小時，一年共有122日的睡眠時間，所以我們只餘下141天。
假設我們每天只閒息一小時，一年也就沒了15天，便剩下126日。
每天我們花二小時在吃飯上，一年用了30天，現在我們只餘下96天。
我們每天再花上一小時在與親友聊天，便用了15天，就餘下81天。
考試和測驗一年總共起碼花上了35天的時間，因此又只剩46天。
再減去大約40天的假期，你只餘下6天。
要是你每年至少病3天，你這一年就只剩下3天的讀書時間！
再假設你會上街兩日，那你就只餘下一天了！
但這一天是你的生日......所以......
祝各位考試成功。

(廣東譯本, 我自己譯既)
點解考親試都炒？？？

一年有365日畀你努力讀書。
扣左52個星期日，得返313日。
有50日因為夏天熱得滯，做唔到野，剩返263日。
每日訓8個鐘，計落就有122日的用左黎訓，剩返141日。
如果每日 hae 一個鐘，一年就無左15日，剩返126日。
每日食野要用兩粒鐘 (唔理食乜)，一年就要用30日，剩返96日。
每日用一個鐘同親友閒聊就無左15日，剩返81日。
一年既考試同測驗至少都用左35日，剩返46日。
扣返40日假，剩返6日。
一年至少都會病兩三日架, 如果每年病3日，讀書既時間就剩返3日！
假設你出左兩日街，咁你就剩返1日！
但係呢日係你生日......所以......
祝君好運咯~~~~

>>June 13, 2004 at 4:36:44 PM GMT+8

2004 年 6 月 11 日 星期五 【晴】

無得上網第五日
究竟上網係唔係必須呢？
如果係, 點解我呢幾日又可以渡過？
如果唔係, 點解我又會咁唔捨得？

是習慣, 也是牽掛

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
牽腸掛腸地掛住睇 result
搞到我尋日早訓左 (兩點就訓啦)
今朝早醒左 (十一點幾就醒)
今日老豆放假
唔打機
聽音樂

民政處 Gary 打黎
叫我還番個工作證畀佢
以我間房既「徙置」情況
真係有 D 驚搵唔返個證
好彩
無驚無險

都係上唔到網
返 poly
去 CC check
check 左幾個唔同 account 既 e-mail
一口氣 post 番呢三日既日記
搞到好似好忙, 忙到無時間 check result
最後都係要人嗌住先肯去睇 result

記得以前屋企無網上既日子都係去阿一屋企搞上網野
好似大學選科 last day, AL 放 result 咁
如果佢響香港, 我相信佢都會叫我去佢屋企睇既

結果如何？
人生不如意事十常八九
習慣了面對失望
早有了一套不寄以厚望的能力
也好
倒教我可了無牽掛地面對社會的挑戰
看來
也是時候積極尋找工作了

響 CC 繼續 hae
不斷咁搵 D 有趣既網上文章
copy 完就 save 落磁碟
無得上網
惟有如此
沒有了精神的寄託, 如何能渡過漫漫長夜？

睇睇下殺出個老拎
不斷咁同我糾纏
係都要我幫佢打電話畀阿一父母
要我叫佢地幫佢個仔睇下佢入唔入到 music camp
同埋幫佢交錢
在於人道立場當然係義不容辭啦
不過在於玩野既立場
當然係玩完老拎先做野啦

同卡卡 chat
佢話自己考試考得唔好
但係居然可以係 3rd in class, 9th in form
咁都話自己差
真係無野好講
雖然唔係會考成績
但係無疑係一支強心針呀
祝佢會考成功！

尋日我先畀何生 in 完
卡卡今日考內部評核試又係畀何生考
唔講真係唔記得會考 + AL 既學生係會延遲到六月先考試既
第一次考 MO 既試
難免有 D 緊張既
仲要係對著何生添

一至七級既內部試我都係畀何生考
佢以前個樣真係好嚴肅、好鬼得人驚
點知同佢熟左之後先發現佢超好人
次次佢 in 親我, 我都會同佢講笑
單係好似尋日咁就係好例子啦

講番卡卡考試
考「龍燈」無理由有問題呀
隻歌好易架o者
點知佢個琴入到考試房先唔 arm 音
仲要唔 arm 到佢聽得出 (佢成日都強調自己聽音差, 不過我唔多覺)
據佢口述, 好似走左半度有多
好嚴重喎~~~
較音又較得耐
結果畀何生怒「啤」

少少事o者
如果卡卡知道我畀何生 in 既時候我既表現有幾 hae
佢就唔會覺得自己玩得差架啦
btw, 佢話驚唔過八十分喎
以何生對我既「鬆手度」黎睇, 佢絕對唔會低過八十分
最多都係唔過九十

睇老拎 diary
發現何生上堂既時候老拎無啦啦成為話題
呵呵~~
佢徒弟個女朋友喎
佢梗係關心啦！

同卡卡打左一舖多 D 桌球佢就 off 9
隔左一陣同黃蜂 chat
佢真係入唔到 music camp
太可惜啦
少左佢, 實在少左好多野玩

陳沛倫 on9
解決左老拎既問題, 亦都解決左我既問題
yeah~~
不過聽到關於佢不幸既消息
都「燉」佢有 D 難過
唔開心一陣好啦
記住要一齊過一個瘋狂既 music camp！！

離開 CC
過完馬路先醒起未拎返 save 左野既磁碟
又要折返 CC
唉…
無記性

四點先訓

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
別以為揮手能終結所有的心事
其實這只不過又是一場心力交瘁的開始

>>June 13, 2004 at 11:49:51 AM GMT+8