|
2005 年 7 月 20 日 星期三 【晴】
前晚行雷閃電搞到連電都停埋
冇咩野做打電話比乖乖女傾下計
一邊傾一邊係咁出汗 , 熱到傻呀
傾左一粒鐘之後都訓 lu
不過周身汗費事整污糟張床所以訓地下
尋日朝早係咁比人嘈醒 , 已經訓得唔多好架啦 , 仲要咁
之後好眼訓咁起身沖個涼 , 跟住睇兩班乒乓波做助教
傻下傻話咁快又一日
尋日有返電真好 , 有覺好訓喇
訓醒睇陣 tv 就出去食野 , 然後又做助教 , 睇班小網
諗住搵乖乖女陪睇 War Of The World , 最後大家都係冇去睇
返屋企想打炸彈人 , 點知冇晒點數 , 唯有玩住彩虹冒險先
夜晚等小晴電話 , 睇日去街
夜深就等霞 online , 約佢去街
===================================================================================
部 DVD 機勁乞人憎
睇唔到數碼暴龍 , 勁唔開心
===================================================================================
今個星期五六日節目行程真豐富
>>July 22, 2005 at 5:21:21 AM GMT+8
2005 年 7 月 18 日 星期一 【晴】
朝早七點幾比細佬鬧鐘嘈醒左
條友仔一野拍熄左又訓過
而我竟然在半醒半睡既狀態之下叫佢起身唔好又訓著
( 因為我都同佢一樣醒一醒之後就快訓著返 )
自己都好莫名其妙 , 我諗都係驚佢考分班試遲到啦
之後訓著返 , 訓到十一點幾至起身
起身小個解刷完牙之後 , 當然又係炸彈人時間啦
又係輸少贏多 , 玩到冇乜癮
四點返到教會練一練星期日一首歌個 intro ( 我諗架 ~ )
練到四點半維奶走人 , 之後都係睇 Armie 教 Tony 少睇譜
五點散 band , 最後都冇練到我想嘗試既鼓法 , 好唔開心
跟住一直在教會打發時間 , 六點打波 , 叫埋阿秋
都唔知今日做乜 , 勁炒 , 已經去到唔係差 , 而係超差既程度
後尾對面場有條友撩我地鬥波 , 細佬同秋奇準 , 我就奇唔準
秋唔跑得我就打內線 , 有幾球打得唔錯 , 但係都係唔入 .............
雖然係咁 , 有球走籃同有球邊走勾手入波 , 我自己都幾中意
最後打到撩我地鬥波條友冇晒心情打 , 八點半走人
返屋企食左一大碗炒飯竟然仲未夠飽 , 而家仲有點餓 tim ...........
想打比 Daisy 傾下計 , 不過已經十一點幾 lu , 遲 d 再搵過佢啦 !
===================================================================================
好失望 , 同 Kitty , Lea 既飯局取消左 ................
我知凌欣都唔開心既 , 咪成日覺得自己做得唔好啦 !!
>>July 19, 2005 at 4:27:08 PM GMT+8
2005 年 7 月 17 日 星期日 【晴】
起身打機出去食野
一餐之內粥粉面飯有齊晒
返屋企又打機 , 勁無聊
基本上三局制入面未輸過三局
而且仲要成日一次過贏晒三局
冇乜好對手 , 就算一打三隨便玩都贏 , 真無癮
跟住出上水 , 落車冇幾耐撞見玲
真係開心 , lunch 之前至諗起佢尼
佢係唯一一個最似鄔幸兒既女仔
不過比鄔幸兒活潑得多
同佢傾左兩句之後行左一陣
跟住同 AirHole 食野 , 之後維奶 join 埋
食完去北區大會堂睇一個由基新 , 粉官等
八間學校聯合舉辦既歌唱比賽
十元一張門票 , 不過我唔洗比
因為 AirHole 係做評判 ~ 我跟住佢尾入去就係
而維奶讀粉官所以去 , 之後 Tony 少都尼埋
成個比賽我地三條友勁講笑 , 笑鬼死
有一個讀馬錦明叫簡采恩既參賽者勁正
當然我係指佢真係好索啦 , 而且都唱得兩咀 ( 點左佢相 lu , 呵呵 )
完左去 M 記飲野 , 同埋傾下大家夾 band 既事
聽日就練星期日婚禮 d 歌 , 我已經諗好左一個好正既 intro 喇
之後大家再睇下時間夾下其他歌啦 , 仲有我 d 歌 ~
>>July 18, 2005 at 4:25:19 PM GMT+8
2005 年 7 月 16 日 星期六 【晴】
立志而堅定
要學識面對自己同放低過去
保持現階段大家既感情 , 穩步上揚
>>July 17, 2005 at 4:49:04 PM GMT+8
2005 年 7 月 15 日 星期五 【晴】
真係開心 , 又見到小霞 lu
原先諗住睇 War Of The World
點知得場五點半 , 就轉睇 Madagascar
都係一套我諗住睇既戲 , 幾好睇 , 笑鬼死
睇完見霞 "支力" , 佢又冇咩要睇咁
唯有又到曲終人散既時候
===================================================================================
聽乖乖女講啦
唔放棄住
嘗試左先算啦
===================================================================================
相見歡 , 離別苦 , 就中更有痴兒女
情感與理性相爭
>>July 16, 2005 at 11:28:16 AM GMT+8
2005 年 7 月 14 日 星期四 【晴】
十二點幾見到小霞 online
約完時間地點傾到兩點幾
雖然好眼訓 , 但係無心睡眠
打機打到四點幾 , 之後睇 I"s 睇到五點幾至訓
以為最早都會訓到十二點幾至醒
不過十點幾已經醒左 lu , 跟住起身 , 睇下 One Piece
再出去一家飲茶 , 食到好飽呀 ~
返到屋企訓左半個鐘 , 又玩下炸彈人
六點出去粉嶺遊樂場同細佬打波
今日打得幾開心 , d 人幾好玩
三輸三贏 , 話就話三對三 , 但係細佬個朋友有等於無
實際上係兩個對人地三個 , 得分主要靠細佬同我
最慘係防守 , 就主要靠我一個 .................
雖然有幾場輸左 , 不過都拎到七八分 ( 打十分 )
最正係 last 一場 , 雖然係輸 , 不過打到好 high
入左兩球三分之後條友就繄睇住我
之後我三分線拉後步半 , 佢就放鬆左 , 不過我照射照入
跟住佢就睇返緊 d , 我就再拉後 , 再入 , 佢就真係要睇緊我喇
再之後打到八比六 , 我直頭三分線同中場線中間射 , 可惜有點點猶豫
要計既話應該就係 1 % 既猶豫 , 令我射偏左少少
而拉返個距離 , 去到籃圈彈返出尼 , 如果係三分線上射 , 就可以中邊入
真係失望 , 竟然唔入 , 不過場波我真係打到乜都唔理 , 見籃圈就射
總之今日真係打得好爽好爽啦
打完波食完野返屋企 , 沖個涼早 d 訓 , 聽朝十點半起身
>>July 15, 2005 at 2:36:18 PM GMT+8
2005 年 7 月 13 日 星期三 【晴】
朝早七點幾自動醒左
覺肚餓去買野食
一路食一路溫下書
溫到八點幾覺眼訓
諗住訓到九點半再溫過
點知順手整熄左響鬧再訓著左
訓到十點至醒 , 拿拿臨起身就落去
真係感謝主 , 皆因十點四就開考
開行 turbo 十一點就做完
返房拎野走人 , 火車站見到個女仔樣靚身材正
返屋企坐左陣同細佬出美孚打保齡球
見到黃日華同吳家樂
跟住食野 , 之後返屋企
打比小霞唔通 , 唯有聽日再搵佢啦
>>July 14, 2005 at 3:53:15 PM GMT+8
2005 年 7 月 12 日 星期二 【晴】
睇崇基崇德 03 , 都係嗰句 :
聽唱得嘅人唱歌要响現場聽至聽到種震撼
之後睇下聽日要考嘅醫學倫理學
然後睇 Magic Knights
跟住睇 One Piece
突然好想聽 Cardcaptor Sakura 兩首原主題曲
點知搵來搵去都唔見 , 好彩最後都搵到 , 嚇死我
又諗下星期日唱咩歌好
見到至尊寶 online 又 offline , 真失望
話咁快又一日
===================================================================================
哇哇哇 , 竟然比我夢見心目中理想第一呀
太開心喇 , 唱返段四年前寫嘅歌仔先
歌詞入面仲要有佢個名架 ! ( mkc 以外嘅人唔會知架喇 )
灰雲中 我的心沒有光彩 我欠了金邊還沒給的愛
在最後 是否我遺憾 我笑我哭我瘋我承受不了
縱深愛 不敢問妳愛不愛 我不要等待害怕最後被取代
我明白 就算我不是妳最後的幸運兒
我再灰暗妳若輝煌就滿足
===================================================================================
One Piece 最正嘅地方係偉大航道入面好多嘢可以唔合常理
一隻游自由式嘅青蛙 .............. 吹漲 ...........................
===================================================================================
其實自己好清楚自己所想嘅係點
而且都唔想好似同一個人
或者都係會 ..........................
===================================================================================
勁中意 TOUCH 第一部入面一段男主角嘅開場白 :
經過成長的洗禮 , 我們發現三人之中有一個是女生
>>July 13, 2005 at 4:12:30 PM GMT+8
2005 年 7 月 11 日 星期一 【晴】
今日 ......................
三個字可以總括 : 痴咗線
坐响電腦面前做無聊嘢 x 個鐘
完全冇心情溫書 , 都唔知係咩之前溫得過咗火
===================================================================================
都唔明啲人嘅 , 用埋啲爛鬼廢油
搞到空氣又臭又污濁
係慳又點丫 , 傷引擎 , 保養又係一筆數目
比你慳得尼保養都不如買過部新
===================================================================================
突然諗返以前同維奶話喊就喊嘅日子
( 雖然而家都仲係差唔多 , 當然嗰時真係經歷好多事 )
有人話喊係一種懦弱表現 .......... 乜係咩 ?
好多人為咗面子 , 為咗扮堅強 , 就算想喊都死忍
咁點呀 ? 唔開心而死忍住唔喊又代表啲咩呢 ?
如果有人話我因為喊所以懦弱 , 而佢係唔會咁嘅話
唔好意思 , 似乎係有人更懦弱連喊都唔敢
除咗夭折嘅人 , 會唔會有人一世都未喊過丫 ?
喊係人其中一種心性感情表達 , 所以死忍喊實際上係埋沒人性
相對起嗰啲埋沒人性虛偽 , 咁假嘅人
更會顯得我同維奶有情感 , 大情大聖
而最重要係面對到自己嘅感受 , 真我
===================================================================================
成日要名要利 , 衝衝衝從未識死
再不分戰場屋企愛人知己 , 我想勝利
行或企如戰地 , 很想死而未敢死
是我想得太盡要爭氣
"戰爭" 嘅 last 一段 , 曲詞都好正
加埋胡蓓蔚把靚聲同唱功仲正
如果胡蓓蔚出道時可以遇到好歌而唔係唱埋啲三流歌
以佢嘅級數一早紅咗啦 , 就好似 Janice 唱到 "大哥" 咁
===================================================================================
星期二 !!
仲有四日 !!
>>July 12, 2005 at 4:05:27 PM GMT+8
2005 年 7 月 10 日 星期日 【晴】
尋日溫到頭昏腦漲 , 諗住好快瞓得著啦
點知一上床竟然眼光光 , 唔係呀化 ?
起身繼續溫書 ? 仲溫得入腦嘅就唔會瞓啦
梗係一次過長時間地溫得太多嘅原固
情況就好似電腦開得太耐而搞到當機熄唔到
最後好好好 ..... 好不容易終於瞓得著 , 但係瞓下醒下咁啦
朝早八點考系解 , 用咗四十分鐘
再用咗十分鐘諗第一條 mc
唔識做又大把時間就慢慢諗啦
之後就諗下留唔留低好 , 同學仔話考完呢科開班會喎
呆下呆下過多四分鐘 , 心諗 : 唔掂喎 , 有排至考完架喎
跟住都係走人 lu
十分非常興幸係長問答識晒 , 總算叫我背得咁鬼辛苦有返回報
仲有好開心冇出到咩鬼房水 , 因為完全冇溫過呢一樣嘢
其實想溫嘅 , 不過忘記係乜 , 又唔知竟然响人邊處
而最大問題係我响本書入面搵來搵去都搵唔到 , 所以 ..........
返到宿舍聽咗陣歌 , 當然又係小弟勁迷嘅 Janice 啦
聽完出咗去買睇 : Touch , Initial D 同 Magic Knights
睇返魔法騎士 .......... 咦 ? 咪係 "風火海" !!
即刻諗返小弟心目中三大填詞人之一嘅林振強先生
當年為組合 "風火海" 所填嘅一首 "愛情風火海" 嘅副歌
"風那般情意奔放 , 火那般難擋 , 像海那般一發怎去擋"
又發現咗獅堂光同龍嘯海理論上係永遠唔可以同一時間攻擊同一目標
皆因一個用水一個用火 , 水火不容喳聲冇咗
睇咗六集就想睇 Initial D , 點知讀唔到碟 , 死鬼爛臭讀碟器
冇所謂 , 我睇 TOUCH , 一睇就睇咗成日 ...........
===================================================================================
女歌手 --
中意而又唱得嘅有四個 J : Joey , Jade , Jolin , Janice
中意但係唔唱得嘅有兩個 G : Gillian , GiGi
超勁爆唔中意又超勁爆唔唱得嘅有兩個 K : Kelly , Karen ( 姓莫 )
===================================================================================
她與她相似得太可怕
叫我有點難以招架
突然看清後是迷迷茫茫
>>July 11, 2005 at 4:13:03 PM GMT+8
|
人氣: 36610
Design & Scripting by ShowHappy.Net
|
前晚行雷閃電搞到連電都停埋
立志而堅定
今日 ......................
尋日溫到頭昏腦漲 , 諗住好快瞓得著啦
可否告訴教會的地址?
<br>