2007 年 4 月 16 日 星期一 【晴】

今日又有測驗，係ｅｄｄｉｅ果科．．．
嘩，ｄ筆記超多，印得又唔好，ｄ字又細，溫得好辛苦

返到去第一堂就測，雖然遲左少少，但係都冇咩問題，時間夠用
不過始終冇聽書就係冇聽書，有ｄ野根本未見過．．．
唔好講話識唔識，連佢想問咩都唔知．．．
ｅｄｄｉｅ果科就係咁，範圍太廣闊喇，成個撒哈拉沙漠咁
最後交卷果陣見到個個都幾版紙，我先兩被版唔夠．．．

到宜家測左３科，呢科應該最差．．．＝．＝
ｎｍ－－－４８％
ｏｏ－－－應該合格
ｂｎ－－－難以想像．．．．

>>April 23, 2007 at 4:05:48 PM GMT+8

2007 年 4 月 15 日 星期日 【晴】

最近有除左返學放學訓覺之外，終於有ｄ唔同喇．．．
就係幫小朋友補習，嘿嘿．．．係咪難以置信呢？我都唔敢相信呀．．．

一個星期補四日，通常都係一至四，四點到六點，有時五點到七點
岩岩好影響唔到返學同夜晚去玩ｏ既時間，而且又近，真係幾好

至於個小朋友就係小三，第一日上去果陣好乖，郁都唔敢郁．．．
佢屋企通常都得佢一個，起初以為佢係好內向果ｄ小朋友
但係一同佢熟左之後就唔同晒，成日坐唔定，叫佢做野又唔聽
最初ｄ功課佢係自己認真做過然後我幫佢改．．．
到宜家佢成日都亂咁做，等我睇到死死下
不過點都好啦，我都鍾意ｏ呢份工作，希望我會繼續做好ｄ

>>April 23, 2007 at 3:59:14 PM GMT+8

2007 年 4 月 12 日 星期四 【晴】

時間真係過得好快，原來又個幾星期冇打日記
不過都冇咩值得好記，每日都係過住差唔多ｏ既生活

夜晚去左打波，唔係去青衣，而係去左葵芳文娛
都係同大贊佢地打．．．
我地成晚都係打同一個場，都係同果班人打
感覺唔好，其實唔鍾意同果班人打，可能係我見識少
但係我真係唔鍾意ｄ人打波係搵人發洩
我明白每個人生活上都遇到唔少唔如意ｏ既地方
得到適當ｏ既宣洩絕對係一件好事，但係我唔認同要宣洩ｏ係人地身上
我只係黎打波，純粹娛樂．．．

雖然唔關我事，但係我睇到ｏ既一切都令我覺得好嘔心
小小事借題發揮，以為自己ｏ係度真係大晒咁
佢地最多只能夠ｏ係呢度惡，去到其他場一定變返縮頭烏龜
難怪佢地只係會黎呢度打波．．．見到呢ｄ人真係反胃

至於打波方面，今日狀態ｏｋ，不過仲係有待改善
最後打到熄燈先走，好攰．．．

我ｏ既文娛呀！我年少時充滿心跳回憶ｏ既文娛究竟去左邊呀？？

>>May 2, 2007 at 8:45:09 PM GMT+8

2007 年 4 月 11 日 星期三 【晴】

弊！！！！！
今日返學要交ａｓｓｉｇｎｍｅｎｔ，仲有一個測驗
我已經冇返星期三，ｍｉｓｓ左份功課，所以大鑊喇！！！

起身即刻做ａｓｓｉｇｎｍｅｎｔ，阿ｓｉｒ話過上堂交
我唯有一邊做一邊坐小巴，上到課室又做，馬馬虎虎做完算了．．．
中午食飯果陣食唔落，個人又眼訓又生「飛滋」
食飯好似受苦咁，估唔到上一次大陸冇左半條命．．．

食完飯之後又溫書，溫下晝個測驗，時間完全唔夠，加上個人又攰到郁唔到
測驗果陣都只係憑直覺去做，希望合格啦．．．

>>May 2, 2007 at 8:46:12 PM GMT+8

2007 年 4 月 10 日 星期二 【晴】

今朝訓到正酣ｏ既時候比人叫醒左
因為我同媽咪要坐早車返深圳，老豆就留多幾日
所以食左粥之後又要上路了．．．

坐９點鐘車，不過早上比較多車，係多單車，所以架車走得好慢
而且開始曬，根本訓唔到，只係眼光光睇風景
中途放左食午餐，竟然係免費？？世界上真係有免費午餐．．．
之後繼續坐車，到５點半返到深圳
然後轉的士去皇崗，再坐直通車返荃灣，再坐地鐵返葵芳
幾經辛苦終於返到屋企．．．

然後睡覺．．．ｚｚｚｚｚｚｚｚｚｚ

>>April 13, 2007 at 5:26:25 PM GMT+8

2007 年 4 月 9 日 星期一 【晴】

半夜返到祖屋之後原來係唔比訓架！！！
要守夜直到天光．．．天呀，我坐車黎果陣已經冇訓，宜家又冇得訓．．．
到最後我都係坐ｄ矮椅釣魚．．．

不過果度超多蚊，由於我天生麗質，ｄ血太靚喇
所以ｄ蚊係咁針我，針到我塊面成個豬頭咁
最利害ｏ既係個身都有，我著晒衫都飛到入黎，ｄ蚊實在強
但係好彩我生左個好痛ｏ既「飛滋」，分散左我ｄ注意力，所以唔係好痕

釣左２，３個鐘魚，出面ｏ既天空終於由無盡ｏ既黑暗到魚肚白色
我諗ｏ係香港一定見唔到呢個情境，我都唔識點樣去形容，就係鍾意呢種感覺
一個字－－「正」！！！！

天光之後又做返琴日ｏ既事，中午出殯，要運爺爺ｏ既遺體去火化
我唔洗去，留左ｏ係祖屋休息，但係太多蚊，個蚊帳又爛，根本訓唔到
所以出左去地堂曬太陽，今日多左好多小朋友黎玩
個個都好鬼得意，佢ｄ應該都係我ｄ遠房弟妹，有同我相似ｏ既基因果然唔同ｄ
佢地起初見到我呢個陌生有ｄ尷尬，我問佢地野佢地就走開，比糖佢地食佢地又唔要
正當我唔理佢地ｏ既時候佢地又過黎我面前玩
雖然我唔知佢地玩咩，但係我望住佢地ｏ既時候，佢地都會對我笑
實在太得意喇！！！

到中午食飯果陣ｄ小朋友都有一齊食，雖然都係琴日ｄ野
但係ｄ小朋友拎住碗飯都食得好開心，好似食大餐咁
坐ｏ係佢地隔離，我實在有ｄ無地自容，大家都係姓林，都係有住同一種血統ｏ既人
但係當我ｏ係香港嫌ｄ伙食唔好ｏ既時候，佢地卻係食一碗白飯都咁開心
睇黎我真係要好好反思一下．．．．

直到我走ｏ既時候，都係我問佢地野，佢地就走，依然係冇要我ｏ既糖．．．
但係我落山果陣佢地卻有遠遠咁跟出黎睇．．．
睇黎佢地ｏ既情感都好內歛，不過好有溫馨ｏ既感覺

順帶一提，我ｏ係祖屋見過人湯豬，情況好恐怖
隻豬比人捉住ｏ既時候好似知道自己會死，係咁叫，叫到好大聲
之後捉住隻豬果個人將隻豬反轉，拎住把刀果個輕輕ｏ係隻豬喉嚨「吉」一下
跟住超多血ｏ係果個傷口噴出黎，隻豬越掙扎，ｄ血噴得越勁
到最後隻豬好似抽筋左一陣就唔郁喇．．．
真係好可怕，對我黎講太震撼喇，佢係我見過最大ｏ既動物由生存到掙扎到死亡
如果有得選擇，我寧願冇睇過，之後湯ｏ既過情我亦唔想多講．．．

到左下晝５點，終於出返信宜市區
同好多位舅父，姨媽一齊去左酒樓食左一餐飯
ｄ野食又平又好食，真係令人流連忘返．．．

走果陣行左陣夜市，見到好多新奇野，不過冇咩時間買
又睇左ｄ女仔，佢地同香港ｄ女仔個樣冇咩分別
但係本質就差好遠，佢地出街都係著學校套運動衫，幾乎個個都係
完全無爭艷鬥麗，同ｄ「港女」完全唔同，反而有另一種自然美
佢地又會出街買菜，踩單車周圍去，實在幾好

食過飯之後就返二叔屋企沖涼，之後訓覺
經過兩日冇好好訓過之後我幾乎一跌落張床就失去知覺．．．

>>April 13, 2007 at 5:14:30 PM GMT+8

2007 年 4 月 8 日 星期日 【晴】

花左都幾耐ｏ既時間終於去到祖屋，果度依然冇變
好鍾意佢果種，灰色泥磚，黑色瓦片ｏ既感覺
天光果刻望出去好點朦朧，若隱若現，好有意境

而且果度ｄ田插左央，一大片青綠色，好靚
因為以前都係聖誕返去，田上面都冇咩好睇
今日好唔同，原來隔離果戶拎埋我地塊田去種
天光果陣睇到一片綠色，個人好舒服，好寫意
終於我有ｄ明白點解爺爺要特登搬返黎住．．．

大家去到祖屋之後就佈置下，又請左ｄ幫工黎幫手
望見爺爺副棺木，有一種失落ｏ既感覺
我對爺爺ｏ既印象唔係好深刻，只係覺得佢好仁慈，記得佢請過我食雪條
無論點都好啦，希望佢ｏ係另一個世界開開心心．．．

佈置得差唔多之後陸續有人黎上香，我同阿叔阿嬸，堂兄堂姐都要披塊白紗跪ｏ係個大堂
ｄ人上完香先可以坐，不過只可以坐矮椅子，出到地堂先可以坐高椅子
不過地堂有人做緊ｄ儀式，由朝做到晚，又打鑼打鼓咁，我都唔多想出去
結果成日都留ｏ係祖屋過，三餐都係食同一ｄ野，而且又要招呼ｄ親朋戚友
冇人ｏ既時候又要上返ｄ香，終於捱到夜晚冇咩人黎．．．

但係就要做其他儀式，要堂大佬搬個神主牌周圍去做儀式
我負責ｏ係旁邊擔摭，全程冇得休息．．．
去左好幾處地方，好辛苦，又落雨，又要跪，所以成條褲都係泥巴
做晒儀式之後就返到去祖屋．．．

>>April 13, 2007 at 5:18:26 PM GMT+8

2007 年 4 月 7 日 星期六 【晴】

因為復活節假期前爺爺過左身，所以要趕返去辦喪事．．
簡單執左幾件行理就同阿爸阿媽返大陸
冇辦法，阿爸話我係長子，所以家姐同細佬可以唔返，我就一定要返

我地坐車上皇崗，然後坐的士去福田車站
去到都只係５點幾，搵到去信宜ｏ既車之後就上車ｈｅａ
又冇野做，司機又話７點先開車，所以非常悶
其實深圳同香港ｄ樓冇咩分別，不過ｄ交通就差好遠
人同車都亂咁黎，我ｏ係車上面已經見到好幾次幾乎撞車．．．

幾經辛苦等到７點，仲諗住個司機會開車，點知佢只係周圍去兜客
架車唔滿佢都唔開車，結果仲要加多個位比人坐．．．
終於８點幾先出發，我一直都係坐，唔敢訓

架車ｏ既路線係走深圳－＞東莞－＞廣州－＞佛山－＞肇慶－＞雲浮－＞羅定－＞信宜
足足坐左９個鐘先到，架車越行，路邊ｄ樓越矮
到信宜ｏ既時候只係得返ｄ２，３層高ｏ既房子
睇黎同２年半前返去冇咩大改變．．．

特別ｏ既係車上面有電視睇，仲要有李連杰果套霍元甲！！！
不過除左霍元甲之外就係ｄ大陸歌，同電影．．．
１２點果陣又有放食宵夜，有間路邊店＄１兩個包，＄２三個粟米餅
又平又好食～

最後５點幾去到目的地，去左二叔屋企沖涼
然後就出發去祖屋預備．．．

>>April 13, 2007 at 7:41:33 AM GMT+8

2007 年 3 月 30 日 星期五 【晴】

夜晚又去左打牌，都係ｏ係葵芳打
出席ｏ既人有我，肥濃，ｐａｔ，峰仔，家偉，ｍｉｕ，婷婷
佢地一直都係兩個夾份打，得我一個獨立出擊

又係玩跑馬仔，我一坐低就連續三盤自摸
但係之後無以為繼，第一ｒｏｕｎｄ輸＄４０
之後執位黎過，第二ｒｏｕｎｄ贏返＄６５
形勢柳暗花明，峰迴路轉．．．
不過到左第三ｒｏｕｎｄ我已經體力超支，冇晒精神
２次漏左槓，又打錯牌，輸到一頭煙
簡直係比人強姦，佢地仲要有人換，變左輪姦
果度又要烏煙瘴氣，所以亦係迷姦
種種不利ｏ既條件形成到我冇得唔輸
好彩臨尾都追返唔少，只係輸＄５５
不過總計今日都係輸錢．．．＝口＝．．．

>>April 5, 2007 at 8:04:33 AM GMT+8

2007 年 3 月 29 日 星期四 【晴】

今日係星期五，宜家ｄ堂搞搞下搞到得返２個鐘ｏ既堂
完全係鼓勵同學唔返星期五．．．

但係我今日都有返，因為同ｄ同學約好左打波
係少數同ｄ同學ｏ係課室外ｏ既交流
本來以為有好多人，但係最後得我，阿ｌｏ同ｐａｔｒｉｃｋ
我地去左美景打，ｄ人唔係好勁，係有一隊成日贏我地
果隊有個奇人，老遠射都入，佢ｄ隊友都係全部做單擋比佢射
可惜，我今日冇咩狀態，如果唔係我入樽都似！！！

最後打到５點幾，打到好攰，買完野飲就返屋企
因為冇帶衫黎換，所以坐到架小巴臭晒．．．

>>April 13, 2007 at 6:59:27 AM GMT+8