2007 年 11 月 7 日 星期三 【晴】

今日放工又開會，６點半去到８點
主題都係圍繞我地三個坐出去ｓｅｒｖｉｃｅ　ｃｅｎｔｅｒ收機的人
又係阿ｂｅｎ出黎訓話，唉，比佢噴到一面屁

其實主要係某位同事犯錯，導致到我都受到牽連
搞到睇住我地三個ｏ既阿ｂｅｎ比上面ｄ人照肺，然後將個茅頭指返去我地
但係其實呢個位置真係唔易做，要做ｃｓ，又要整機
老實講，我地犯錯ｏ既機會當然比坐ｏｆｆｉｃｅ的人多啦
將呢個責任比三個新人去負有ｄ唔係咁妥當
不過點都好啦，逗得人地份糧就預左呢ｄ事

到最後足足比人訓話左成個鐘先走得

>>November 11, 2007 at 4:42:51 PM GMT+8

2007 年 11 月 6 日 星期二 【晴】

不知不覺又過左兩個星期
又係時候寫篇日記，寫呀寫
先發現原來自己冇咩事值得去記低

唯一值得記低就係牙痛
我已經分唔到係牙痛定係牙肉痛
就係知道右邊牙ｏ既盡頭好痛，好熱，有ｄ腫
而家食野都係用左邊ｄ牙去食，但係咁樣唔係辦法

做野果陣痛，食飯果陣又痛，就連訓覺得痛
好辛苦，天呀，你可憐下我呢個孤兒仔啦
而且唔知係咪牙痛ｏ既關係，個人好燥
小小野就覺得好煩，然後發脾氣，冇心機

哎呀，已經幾日都係咁喇，到底要幾時先好得返？

>>November 6, 2007 at 4:16:19 PM GMT+8

2007 年 10 月 27 日 星期六 【晴】

今日又要返學練波，不過好可惜，我又再度唔知醒
遲左成個鐘先返到學校，真係唔好意思

但係返到去都唔係好多人到，加埋ＫＣＭ甲組都唔夠１０個
所以都係簡單射下波，玩下，傾下計
返左工之後時間少左好多，都唔知聯賽開始左之後有冇時間打
就算有時間打，都擔心自己冇左個鬥心同體力

最後打到１點幾先走，打左兩個幾鐘
感覺自己比之前冇咩進步

>>October 28, 2007 at 4:03:46 PM GMT+8

2007 年 10 月 26 日 星期五 【晴】

今日星期六，放一點半，又同Ｄ同事去左打波
都係去返愛秩序灣果個靚場，真係一個好靚Ｏ既場

我地今次比上次多左人打，夠人自己鬥波
打左４，５場，今日手風一般，冇咩衝勁，同Ｄ同事又唔夾

之後有班人黎左跟隊，應該係呢度打開Ｏ既人
初頭睇冇咩野，唔係話好勁，但係就搵個肥佬屈我地機
１０球有８球都係，如果佢地鍾意打呢Ｄ籃球我又冇咩所謂
最好就１０球波屈晒佢，快Ｄ打完到下隊
佢地又唔係，見我地就追平就係咁屈
淨係咁樣都冇咩問題，鬼叫自己唔夠佢大隻
但係最冇品就係有Ｄ五五波佢地都要拗，拗到贏為止

有一球我地有人ＨＯＬＤＩＮＧ，我地本來話冇，佢地就話有
咁ＯＫ，於是就比佢地開波，點知佢又唔高興
仲要問佢場邊Ｄ朋友，「拿，你地都睇到架啦」
我頂，你不如過黎問我啦，做埋Ｄ小動作，一球半球咪豪比你囉
仲有Ｄ出界波都係，我之後都唔出聲比佢地開算喇。。

到最後我地都輸左三場，無奈ＩＮＧ
我憎恨我自己打波贏唔到佢。。。

>>October 28, 2007 at 4:22:03 PM GMT+8

2007 年 10 月 24 日 星期三 【晴】

朋友ＩＶＡＮ生日，出左去同佢慶祝
出席Ｏ既人有我，ＩＶＡＮ，ＩＶＡＮ老婆，ＰＡＴ，阿誠

我地去左荃灣小肥羊打邊爐，叫左麻辣鍋
果Ｄ麻辣真係勁到暈，食左一啖即係成條脷麻痺左。。。
食呀食，傾呀傾，又重題不少往事
ＩＶＡＮ宜家好啦，有好路數，仲要結埋婚，生活都幾美滿
其實睇佢個樣都知佢好掂好ＨＡＰＰＹ啦

２００３年做００３０識Ｏ既人就只有ＩＶＡＮ同阿誠仲有聯絡
佢地都有唔錯Ｏ既發展，做緊Ｏ既野都好岩自己
至於我就比佢地遲起步，咩都岩岩開始，其實好有壓力

諗返起之前，其實果個暑假都發生好多事
雖然做００３０只不過係一個月多Ｄ，但係都好似好耐，發生左好多事咁。。。
果陣識ＩＶＡＮ真係日日同佢唔妥，幾乎打架果Ｄ
但係之後發覺其實我同佢都係一樣，一樣有地方會好乞人憎
到最後我地都係做左好朋友，係好傾得計果種
因為我明白到我自己亦係好乞人憎。。。

打完邊爐之後，ＡＬＡＮ出黎搵我地，又係００３０時代一隻ＦＩＴ馬
所以我地又去左飲野，又講左好耐
到最後３點幾先走。。。。好眼訓。。。

>>October 28, 2007 at 4:43:05 PM GMT+8

2007 年 10 月 18 日 星期四 【晴】

今日終於又放假了，下一次再放假就要到聖誕
唉。。。諗起就冇晒心機。。。

最近兩個星期都係過緊一樣ｏ既日子
每日都係收機，比機，少人上黎ｏ既時候就係整機
都係依然經常犯錯，一ｄ改善都冇
我仲以為自己做得耐會少ｄ犯錯，點知都係一樣
有時候仲係一ｄ好低級ｏ既錯誤，自己失望，上面ｏ既人都更失望

不知不覺過左三個月，同以前ｏ既ｐａｒｔ　ｔｉｍｅ，暑期工比較
呢份工更輕鬆，但係我就冇以前返工咁開心。。。
到底仲爭ｄ咩呢？

>>October 19, 2007 at 3:48:07 PM GMT+8

2007 年 10 月 5 日 星期五 【晴】

今日夜晚出左去太子飲野，慶祝ｅｌｉｓｅ生日
出席ｏ既人有我，肥濃，阿ｐａｔ，銳，ｅｌｉｓｅ，人地個妹，人地個妹個男朋友
本來係約大概９點，但係到１１點幾先人齊。。。

果間野好似叫雙子座，唔知有冇記錯。。。
然後大家飲下，食下，玩下
唔到兩杯我又開始頂唔住，好彩有人幫我飲
我發現我真係唔適合呢ｄ場合，最後都係坐埋一邊聽人唱歌算了
玩呀玩，玩到都唔知幾點先走。。。

我淨係記得同阿ｐａｔ，銳一架的士
到葵芳之後渾渾噩噩咁行返屋企，然後沖完涼就訓了。。

>>October 19, 2007 at 3:35:08 PM GMT+8

2007 年 9 月 29 日 星期六 【晴】

今日又係星期日，係連續三日假期ｏ既第二日
咁好日子，於是去左睇戲同踩單車

上晝９點去左睇色戒，約左９點鐘，早知約咁早就唔話去睇啦
搞到我咁早起身，成個人冇咩精神，ｚｚｚｚ
出席ｏ既人有我，ｋ樂，圈，ｒｏｃｋｙ，昆，朱，大佬
成套戲有劇情，有佈局，有動作，唔錯唔錯
睇完之後一齊去左食大家樂，食飽之後就出發去大圍

ｋａｉ豪，左輪，ｉｄｙ，ｂｕｂｕ加入我地踩單車ｏ既行列
接住就係租單車出發，終點係大尾篤
踩呀踩，種感覺好熟悉，好懷念，好掛住以前可以無憂無慮咁踩
又好掛住年輕ｏ既感覺。。。。

幾經辛苦，終於去到大尾篤，欣賞左陣風景同玩左陣ｕｎｏ就去左交車ｌｕ
好彩唔洗踩返去，如果唔係半夜都未到。。。

之後坐小巴出大埔，再轉火車去旺角，之後一齊去左梨和園食韓燒
果度ｄ野食又多又好味，而且一去到就有位，所以激發起我ｏ既食欲
係咁食，係咁食，成左兩個鐘咩都飽晒。。。
到最後玩飽食醉歸家休息

今日開心程度：＊＊＊＊／５

>>October 9, 2007 at 3:59:24 PM GMT+8

2007 年 9 月 28 日 星期五 【晴】

今日又到星期六，又係最輕鬆ｏ既一日
之前出左ｅ－ｍａｉｌ話今日會一齊去食海鮮，ｆａｒｅｗｅｌｌ一個女同事
我仲以為我呢ｄ小職員唔會有得去，點知佢地有預埋我。。。

雖然真係唔多想去，但係最後都係答應左
由於食海鮮果度訂左６點半ｏ既枱，所以我地要先各自搵地方去
而我就跟大隊去左唱ｋ。。。

去左觀塘裕民坊果間ｎｅｗａｙ，唱「下午茶ｋ」
有下午茶食，又有ｋ唱，不過我冇咩唱歌，都係聽下同事唱
話咁快又唱到６點幾，之後ｒｉｎｇｏ同阿朗開車黎接我地
原來我地要去ｏ既地方叫「布袋澳」，都係第一次聽香港有呢個地方
入到去都成７點幾，果度除左食海鮮就係賣ｄ蝦乾，咸魚，好特別
我地訂左發記海鮮酒家ｏ既位，但係間野只不過係一間村屋
不過好就好在我地坐上層，得我地２圍，想點玩點食都得
坐低之後ｄ大ｏ既落晒去選海鮮，我地就留ｏ係上面玩

好快就有野食喇，我地食ｏ既全部都係海鮮，仲有一碟菜
有蝦，有青口，有魚，有螺，有鮑魚仔，有蜆，同海鮮湯
味道非常好，食到幾乎停唔到，搞到大家仲要爭食。。。

食到大概１０點先走，坐阿朗車返葵芳
沿途佢又亂ｃｕｔ線又行錯路，好辛苦先返到去。。。

>>October 1, 2007 at 3:44:27 PM GMT+8

2007 年 9 月 21 日 星期五 【晴】

今日１點放工，例牌１點半先做完野
之後仲要留ｏ係公司開會，一開就兩個鐘．．．

其實開會主題都係圍繞我地果幾個新人
因為之前有人投訴過我地態度差，或者幫唔到佢地
我諗態度差應該唔會有我份，我已經儘量表現得好平和，連少許多餘ｏ既表情都冇
但係有陣時真係未必幫到個客，有一次比錯意見比個客，搞ｒｏｕｎｄ左佢個ｗｉｎｄｏｗ
有一次又換左零件比個客但係部機返到去用仲係唔得．．．

所以係咁比人插我地果幾個新人呢幾樣野
但係其實我係最遲入黎果個，我基本上學左兩日就要整機同出去收機
都係邊做邊學，但係有ｄ樣我真係一直都唔知，唔係我唔去做，而係根本冇人同我講過
到最後我就唔知情ｏ既情況下重覆一個錯誤好多次，係最近先有人同我講返．．

雖然係咁，我都覺得呢份工唔錯，同事幾好，整機又係我興趣
最麻煩就係應付ｄ客，頭個幾星期真係好唔慣，冇啦啦比人鬧，又唔係我錯
特別係如果整機要收費，果果客都變晒樣．．．
到宜家時間耐左已經開始麻木，我做野ｏ既時候會收起所有感覺
已經唔會因為有人鬧我，串我，窒我而憤怒或者唔高興，有人發晒脾氣ｏ既就當耳邊風．．．
同時亦收起左好多唔應該收起ｏ既情感，包括好多ｏ既熱心
有時候本來可以教到個客多ｄ我都未必刻意去教
我諗個環境已經訓練到我工作時候冇咩情感，究竟係好事定係壞事呢？？

不過無論點都好啦，我都應該會ｏ係呢度做至少１年，即係到下一年７月
然後再考慮呢入工到底岩唔岩我，或者會唔會轉第二份工好ｄ
我會好好咁等呢一年過去，咁我就會真正清楚我自己ｏ既工作能力同取向
呢一年我係唔會白白浪費．．．

>>September 22, 2007 at 7:01:21 PM GMT+8