2007 年 9 月 20 日 星期四 【晴】

今晚去左文娛打波，都有好多人打
但係因為返工太疲倦ｏ既關係，個人唔想點郁．．．

平時返工星期一永遠都係最精神，當一日一日咁過，就會越黎越唔夠精神
直到星期五，成個人就會陷入一個半昏迷狀態．．．
所以黎到夜晚打波已經好難得．．．
好彩今日都唔係好激烈，而且手風都唔錯
最後打到熄燈先走．．．

宜家ｏ既人生慢慢變得平淡，每日返工等放工，放工等放假，放假等放大假．．．
每日放工就食飯，沖涼，上陣網，訓覺，第二日再返工
星期五打波，星期六晚出街食飯，星期日練手球．．．．
其實我唔會滿意咁ｏ既生活，我需要火花～～

>>September 22, 2007 at 3:47:41 PM GMT+8

2007 年 9 月 15 日 星期六 【晴】

今日返左ＫＣＭ練手球
好準時咁到左，但係到左之後得魚腩一個

我地換左衫射左陣波先有人到，但係最後都只係得６個人．．．
所以都只係射下波，玩下假動作
到最後打３打３，打到４點幾先走．．．

連續打左兩日波，消耗左唔少體力，但係點解我仲係咁肥！！！？？？
點解呀！！！！！

>>September 22, 2007 at 3:36:55 PM GMT+8

2007 年 9 月 14 日 星期五 【晴】

今日放左工又同ｄ同事去左打波
我地食完野之後就近近地留返ｏ係筲箕灣打
去左愛秩序灣果面個球場打

其實個場好靚好新，係個公園入面，又近廁所同飲水機，環境又正
咩都好，就係ｄ人怪怪地，冇人鬥波，淨係射波
之後我地聊鬥波，點知又冇人肯同我地打
到射左好耐波先有人黎打．．．

今日表演唔錯，因為ｄ同事仲未睇穿我ｄ路數
起初係咁入波，到後來比佢地睇通晒，搞到我係咁失誤
不過都算打得夠爽，爽到最後仲抽筋．．．

其實ｄ同事都算唔錯，所以雖然辛苦，但係越黎越有信心做落去

>>September 16, 2007 at 1:54:47 PM GMT+8

2007 年 9 月 6 日 星期四 【晴】

近來都係返工放工，每日都做住幾乎一樣ｏ既事
其實都冇咩值得去記．．．

夜晚打波，我發現左一樣野，就係我已經冇晒自信．．
前果幾次打波都以為自己係攰，所以冇咩作為
但係我今日係一ｄ都唔攰，但係依然不濟
唔敢射波，防守又冇侵略性，完全唔係昔日ｏ既我

比起以前又好勝又對自己有信心ｏ既我，今日ｏ既我已經冇晒鬥志
可能因為返工成日做錯事，做漏野，仲要成日比人鬧
我ｏ既挫敗感已經完全覆蓋晒我ｏ既自己信
每日我都會檢討一下自己做ｏ既野，又諗下自己講ｏ既野
有時會諗如果自己換個方法做會唔會好ｄ呢？
好煩．．．的確好煩．．．．
到底咁樣係正常人生必經ｏ既階段定係我意志唔夠呢？

沮喪中．．．．

>>September 11, 2007 at 5:11:58 PM GMT+8

2007 年 8 月 24 日 星期五 【晴】

今日又係每年一次ｏ既ｃａｍｐ
地點係貝奧，但係因為大家都忙ｏ既關係
所以只可以玩２日１夜．．．

１點鐘放工，搞埋ｄ手尾就差唔多２點幾先走得
不過原來阿朗又係去貝奧ｃａｍｐ，希望唔好撞到佢啦

我先坐地鐵去東涌，再坐ｄ村巴去到貝奧，到站ｏ既時候已經係５點
出席ｏ既人有我，ｋａｉ豪，ｋ樂，ｒｏｃｋｙ，叉燒，昆，朱，左輪，ｉｄｙ
之後去左沙灘搵佢地，我火速換左條褲就衝落水玩
其實我中五暑假去ｃａｍｐ都係黎過呢度，我個印象就係有好多牛同ｄ沙好黑
今次亦都一樣，不過ｄ沙黑得黎好乾淨，好ｅｎｊｏｙ踩上去果種感覺

我落水浸左陣，一身疲勞盡消，真係唔想上水．．
而其他人竟然ｏ係沙灘上面摸蜆，仲摸到好興奮，所以我都摸埋一份
果度真係好多蜆，挖兩下就有一隻，結果我地捉左差唔多成百隻

我地玩到天黑先走，臨走之前我地幾個男仔再游出去「享受」多一陣
果陣感覺真係正～
歸去途中，見到個好靚ｏ既足球埸同籃球場，忍唔住又玩多左一陣
踢波又踢到一身汗．．．．

返到去發現我地間屋真係好靚，又夠大，好有「家」ｏ既感覺
去咁多次ｃａｍｐ，住宿最好可能就係今次
一邊打牌，一邊沖涼，玩夠洗夠ｏ既時候就開始打邊爐
今次有好多新奇ｏ既野食，好好味．．．
一邊食一邊傾計，不亦樂乎～

食飽之後繼續打牌，打夠之後又鋤ｄ，跟住一齊關門傾往事
聽到唔少野，個個都有ｄ野講，就只係得我同以前一樣
到底我呢幾年係咪白過左呢？我自己都唔知．．．

傾完之後就訓覺ｌｕ．．．．

ｚｚｚｚｚｚｚｚｚｚｚｚｚｚｚ．．．．．

到左第二日，大家起身之後都１０點幾，之後打邊爐食返琴晚食淨ｄ野
一樣好味，特別係個烏冬，我到而家都仲懷念緊果種味道．．．
食完之後就再出發去沙灘玩．．．

去沙灘ｏ既途中見到好多牛，我數過有９隻，有ｄ仲走到好近食草
呢個境況想比錢去睇都未必睇到
我地去到沙灘之後開始放生ｄ蜆同玩「水籃球」
玩呀玩，玩到４，５點先走．．．

終於要依依不捨離開呢個咁好玩ｏ既貝奧，非常期待下一次去ｃａｍｐ
之後我地大伙兒去左東涌ｏ既東薈城ｏｕｔｌｅｔ行
行呀行，行完又行，我淨係得個睇字，暫時冇錢買

行完之後決定返葵芳食米線，就係以前麵館附近果間
但係ｄ味同麵館一樣，又係好懷念ｏ既一種味道．．．
食飽之後各自回家休息．．．

今次ｏ既ｃａｍｐ我比９分！！！！

>>September 2, 2007 at 12:15:25 PM GMT+8

2007 年 8 月 23 日 星期四 【晴】

今日夜晚又去左打波，上個星期冇打到
諗住今次一定要早ｄ去，但係都遲左．．．．

打之前已經覺得好眼訓，打左一陣先發覺自己真係狀態奇差
ｏ係場上簡直就係一件垃圾，就連跑兩步走位ｏ既節奏都冇
宜家又肥左，搞到個身體好似唔屬於自己咁
真係越黎越討厭自己了！！！！

>>August 24, 2007 at 4:18:37 PM GMT+8

2007 年 8 月 22 日 星期三 【晴】

夜晚去左游水，９點幾先去到
雖然游得果半個鐘，但係趁宜家仲係８蚊游多ｄ都好

但係個人真係好攰，其實唔係返工攰
而係成日搭車，同唔夠訓，令到成個人冇晒精力
我最初以為自己會習慣，然後會好轉
但係我發覺情況係越黎越差，究竟我仲可以捱到幾時呢？
就連我自己都唔知．．．．

游完之後例牌去麥當勞食雪糕，好攰．．．真係好攰．．．

>>August 24, 2007 at 4:23:34 PM GMT+8

2007 年 8 月 17 日 星期五 【晴】

今日星期六，放左工之後同ｄ同事去左打波
但係就去左東啟德，即係新莆崗果頭

第一次去果度打，塊地好滑，比室內場仲要滑
但係估唔到ｄ同事都幾勁，加上我狀態唔好，所以完全比下去
不過真係好耐冇ｏ係有太陽ｏ既時間打波，幾乎中暑了
我地由３點打到差唔多７點，最後我沖涼坐紅ｖａｎ返屋企
一上車就係咁閃電，又落好大雨，好彩我上左車，如果唔係一定濕晒

>>August 24, 2007 at 4:14:04 PM GMT+8

2007 年 8 月 16 日 星期四 【晴】

返工已經返左一個月，好多野已經習慣左
但係都係成日寫左野，做錯野

宜家出去收機比機ｏ既時間多，整機ｏ既時間少
不過整機都有ｄ陰影，之前試過整花一個新ｌｃｄ，又整爛過ｈａｒｄ　ｄｉｓｋ
總知就係成日唔小心啦，我討厭我自己ｏ既粗心大意！！！

夜晚打波，去左文娛，同大贊佢地打左一陣
之後去左大場搵返左輪佢地，但係就冇打到
之後同阿圈，ｒｏｃｋｙ去左食雲桂米線，ｄ味好似以前果間麵館
簡直係一模一樣，真係幾好味
食完之後就走ｌｕ，返到屋企沖完涼頭都未乾就去左訓覺

宜家返工ｏ既日子星期一就好精神，但係就會一日比一日攰
到星期五簡直不似人形，每次都係要星期日訓返１０幾個鐘先追返之前唔夠訓果ｄ時間
生活就好似返工等放工，放工等放假．．．．．

>>August 24, 2007 at 4:06:25 PM GMT+8

2007 年 8 月 11 日 星期六 【晴】

今日夜晚去左唱ｋ，葵芳果間ｎｅｗａｙ
呵呵，好耐冇唱過ｋ，終於有得再唱

出席ｏ既人有我，左輪，ｉｄｙ，ｒｏｃｋｙ，ｋ樂，傻威，ｋａｉ豪，昆，朱，圈
我地有人關照，所以有間大房，仲有自助餐食，唔錯唔錯
之後又有蛋糕食，有香檳飲
仲有收到一對鞋同一件岩我ｓｔｙｌｅ的恤衫
兩樣都非常岩我心水，呵呵，多謝各位～～
最後玩到１１點先走．．

>>August 24, 2007 at 3:56:06 PM GMT+8