2007 年 7 月 11 日 星期三 【晴】

今日夜晚去左睇哈利波特－－鳳凰會的密令
出席ｏ既人有我，傻威，ｋ樂，ｒｏｃｋｙ，大佬

可惜套戲真係好一般，冇咩高潮，又冇勁ｏ既特技
劇情又一般，冇第一，二套咁吸引
即使係咁，都期待之後ｏ既哈利波特，希望仲有啦．．．

>>July 12, 2007 at 5:45:21 PM GMT+8

2007 年 7 月 9 日 星期一 【晴】

夜晚又係去左青衣游水
出席ｏ既人有我，左輪，ｒｏｃｋｙ，占士，大佬

唔知點解今日特別多人，ｄ水又唔乾淨，又冇滑梯玩
所以都冇咩心情游，求其游幾下就走
之後去左麥當勞，有占士ｏ係度有６折
咁我當然唔同佢客氣啦，食左個餐．．．
但係麥當勞真係越黎越貴，我就黎負擔唔起．．．
最後食完野就走ｌｕ．．．

>>July 12, 2007 at 5:41:21 PM GMT+8

2007 年 7 月 8 日 星期日 【晴】

今日又去左兩個地方ｉｎｔｅｒｖｉｅｗ
雖然已經有一份工比ｏｆｆｅｒ我，但係我都係想搵再好ｄ
容許自己任性一下啦！！！

上午去左筲箕灣見工，搵左好耐先搵到
去到人地公司果陣出左一身大汗，真係狼狽．．．
不過我覺得果度幾好，無論係份工ｏ既性質同環境都唔錯
好期待呢份工有回音．．．

之後返左屋企，到５點半又出左去上環見另一份
呢一份難道好似比較高，而且係要周圍走果種
我諗唔係咁岩我．．．．

雖然搵左半個月都仲未搵到工，但係見工個過程學到唔少野

>>July 12, 2007 at 5:36:40 PM GMT+8

2007 年 7 月 6 日 星期五 【晴】

今日同小學同學入左梅窩玩，即係我地ｏ既老地方
佢地諗住玩過夜，但係我仲未好返晒，所以都係唔過夜比較好

出席ｏ既人有我，牛，君，雞，鳳，肥華，絲襪女
我地一開始搭地鐵去中環再坐船，中途見到新ｏ既天星碼頭
但係個新碼頭好似怪怪地．．．．
我地選擇坐慢船入去，但係真係非常慢，又搖得利害
再加上我感冒未好，種感覺真係好辛苦．．．

花左５０分鐘，終於到達梅窩
然後我地分開兩批人，一批食野，一批搵渡假屋
而我就係食野果批，哇哈哈！！！

到後來搵左一間屋，但係個冷氣唔凍就換左第二間
我地安頓好之後就踩下單車，同埋買野預備ｂｂｑ
玩好野食之後就起爐，整野食，然後就開始食
食食下隔離ｂｂｑ果班人非常好人，我估佢地係泰國人
佢地本來自己帶左ｄ野黎食，我地個個望到都話好正
之後佢地分左ｄ酸辣鳳爪同沙律比我地試，的確唔錯～～

ｂ到咁上下，大約９點啦，我就要趕船出去
所以只好依依不捨咁離開，即使我真係好想過夜．．．
我出去果陣都係坐慢船，因為個人好返好多，所以冇咩頭暈
反而覺得好舒服，特別係望出個海，吹海風果陣

因為我坐窗隔離，望到好多野，好有意境
望到海上面有ｄ野閃下閃下，睇真ｄ先發現係ｄ魚跳黎跳去，真係好靚
仲有，最初望上個天係好黑，可以見到唔少星星
但係越近中環ｏ既時候就越光，離遠望到中環係染到個天橙橙地色
呢個ｖｉｅｗ市區一定睇唔到．．．

到最後返到中環就火速轉地鐵返屋企訓覺．．．

>>July 12, 2007 at 5:30:01 PM GMT+8

2007 年 7 月 4 日 星期三 【晴】

今日抱恙中．．．．
發燒，頭痛，喉嚨痛，四肢酸痛
估唔到自己牛高馬大都咁易病，比人知道一定笑到我面都黃

成日留左ｏ係屋企，幾乎都係訓ｏ係張床上面
而且口啖啖，食咩都冇味，好辛苦
好唔鍾意呢種感覺．．．

>>July 6, 2007 at 10:41:49 AM GMT+8

2007 年 7 月 3 日 星期二 【晴】

今日夜晚又去左游水
又係去青衣泳池游
出席ｏ既人有我，ｒｏｃｋｙ，左輪，大佬

我地８點幾先入去游，游呀游，又玩下滑梯
之後又去返大池游，到最後竟然又落雨
游呀游，游呀游，游到１０點先上水
沖涼換衫ｏ既時候我已經覺得自己有ｄ唔妥

之後一齊去左青衣城麥當勞食雪糕
ｏ係果個時間，我已經ｆｅｅｌ到自己會病了
到返到屋企真係開始有ｄ發燒同頭痛．．．．

>>July 6, 2007 at 10:38:40 AM GMT+8

2007 年 7 月 2 日 星期一 【晴】

今日又去左ＩＮＴＥＲＶＩＥＷ，同上次ｉｎ好唔同
呢一次果個人一睇就知唔易相處，傾左幾句之後更加證實左我個諗法冇錯

佢一開始就係咁ｐｒｏｖｅ我讀ｏ既野唔適合佢要ｏ既ｐｏｓｔ
又問ｄ好難ｏ既問題，當我答ｏ既時候就直接話我錯
我本來仲以為佢係想ｒｅｊｅｃｔ我，但係原來佢係想壓我價
我頂．．．我本來要求ｏ既人工已經唔高，佢仲想壓榨我

最後我話會考慮一下，然後就大佢，話我有其他ｏｆｆｅｒ
之後佢就講好多野打擊我，又話係因為最近接左個ｐｒｏｊｅｃｔ要開一個ｔｅａｍ先考慮我

唉．．．唔通呢個社會就係咁，充滿住咁多ｏ既矛盾？？
係咪要去到邊度都要同人角力呢？？

>>July 6, 2007 at 10:29:03 AM GMT+8

2007 年 7 月 1 日 星期日 【晴】

今日去左石澳玩，好耐冇去過沙灘玩
亦好耐未試過咁舒服，可惜最後落左雨
係今日最大ｏ既遺憾．．．．

今日出席ｏ既人有我，ｋａｉ豪，ｒｏｃｋｙ，左輪，大佬，朱，ｉｄｙ，傻威，圈，ｂｕｂｕ
係一個幾完整ｏ既陣容
我地本來約左１１點ｏ係荔景等，但係１１點１０分我同ｋａｉ豪到荔景ｏ既時候竟然一個人都冇
到後來其他人先陸續出現．．．．
人齊之後我地先坐地鐵去筲箕灣，再坐小巴去石澳

去到果陣天氣超好，太陽又靚，正係游水ｏ既好時機
大家換完衫之後就火速出去游水，話咁快又到左浮台
但係個個浮台都好多人，冇咩意境．．．

游左一陣之後又返左上沙灘晒太陽同鋤ｄ，但係就突然間落雨
本來冇咩野，係好遠有舊黑雲，之後聽到雷聲，再過一陣ｄ雨就好猛烈咁落
搞到我地要好快咁執野去有瓦摭頭ｏ既地方
然後大家又要輪住沖身同換衫，真係非常狼狽

大家都換好衫之後就傾好出旺角「大口狗」食飯
結果我地又坐一程小巴，一程地鐵去旺角食飯
果度ｄ野食唔錯，都幾好味，係個份量少左ｄ，ｏ係咁叫都係黎咁少
最後食左好耐先覺得ｏｋ飽．．．

大家食飽之後就返屋企ｌｕ，我返到之後一跌落張床已經訓著左

>>July 6, 2007 at 9:37:03 AM GMT+8

2007 年 6 月 23 日 星期六 【晴】

今朝去左游早水，但係琴晚訓得唔好
１點去訓，訓酊４點都未訓著，可能係琴日玩得太利害了
之後拖住一個疲倦ｏ既身軀出發去青衣泳池

我大約９點９去到泳池，但係都遲晒到了
出席ｏ既人有我，圈，ｒｏｃｋｙ
最初天氣唔錯，太陽又夠晒，係游水ｏ既好時機
但係游游下竟然落雨，越落越大，不過ｄ雨點打落去個身種感覺幾好
之後又有玩左個滑梯，唔錯唔錯．．．
游呀游，游到１１點半就走ｌｕ

換好衫之後去左青衣城食大家樂
好難搵位，有ｄ阿伯淨係坐ｏ係度睇報紙．．．＝．＝
搵左一陣先搵到位，我叫左個咖哩牛腩飯，幾好味
食飽左之後就返屋企再訓過．．．

>>June 24, 2007 at 7:23:06 PM GMT+8

2007 年 6 月 22 日 星期五 【晴】

今日要去見工，又係見上次果ｄ技術員
不過今次係去間學校見工，叫聖文德書院
我最初睇地圖見到３間聖文德，好彩得一間係中學，所以都好快搵到位置

去到淨係覺得好熱，成身濕晒．．．
我諗個第一印象應該唔係幾好，不過表現唔錯
佢問ｄ問題都答得ｏｋ，而且佢地都話好樂意請岩岩畢業ｏ既人
所以我諗應該冇咩問題，但係始終都又係要等ｓｅｃｏｎｄ　ｉｎ．．．

見完之後去左紅磡搵阿昆佢地，因為要入ｐｏｌｙ個ｈａｌｌ玩！！
我地先去左食漢堡包，然後等齊人就入去了
出席ｏ既人有我，ｒｏｃｋｙ，圈，ｋａｉ豪，昆，朱，大佬
我地先去左朱間房參觀，唔錯唔錯，好寬敞，好開陽
之後我地去左玩足球機，嘿嘿嘿．．．
好耐冇玩過足球機了，種感覺好正，好刺激！！

玩完足球機之後去左另一間ｒｏｏｍ玩氣墊機同鋤ｄ
而隔離間房仲有ＰＳ２同按摩椅，我地都玩左陣
最後玩到肚餓，我地一齊出左去打邊爐
果間野ｄ野食唔錯，服務都幾好，又唔係貴，所以我地都好滿意
我地一邊食一邊玩數同學遊戲，發現原來我地忘記左好多同學．．．
最後玩下食下，１１點先走．．．

今日好盡興．．．

>>June 24, 2007 at 7:45:26 PM GMT+8