2003 年 5 月 5 日 星期一 【晴】

早兩日呢度個 server down 左
我要今日早上先可以 upload 番早兩日的日記。
希望唔會有下次啦


今日談談我喜歡興不喜歡的食物。
基於家教既問題，基本上我係乜都食既。
仲要係唔會浪費食物，例如我去食店叫一碟飯，
無論碟飯幾多幾少，我都會食晒，除非碟飯變壞了。


所以和我一齊吃飯會見到一些有趣的現象：

如果係隻抽式（每人各自叫自己食既野）
你地會見到我唔係食好多，
例如麥記一個豬柳蛋漢堡加一杯細朱古力奶昔已經可以係我既晚餐；

但係如果係圍抽式（叫完 share 食）
你地會見到我食好多，
通常會做「清道夫」包底食晒所有食物，
所以食量有可能比隻抽式多成倍。


講回食物，雖然我說我乜都食，
酸既、甜既、苦既、鹹既我都會食，
唯獨是辣既食物，我好怕食。
因為我本身體質是多汗，
食辣野既時候就會全身出汗，大汗淋離。
所以食辣野就唔好預我，少少辣都唔得


另外，我好怕 d 水汪汪的食物，
例如椰菜，生菜呢 d 會自己出水既食物。
我平時返工帶飯盒，一打開個飯盒，成盒都係水
我望見就即刻無晒胃口。

如果食蔬菜，我比較喜歡 d 爽身既，有莖既菜。
例如菜心，白菜仔、西芹、甘筍、西蘭花等等。
莧菜、九王、通菜、芥籣等等都可以接受。


唔知我算唔算隨便得黎又食得挑剔呢？

>>May 6, 2003 at 9:39:39 AM GMT+8

2003 年 5 月 4 日 星期日 【雨】

天氣開始熱了，每次跑完步，總會汗流浹背。
上星期五做 Gym 又跑耐左，
今次跑左 45 分鐘，比上次又多左 3 分鐘。
距離係 3.66 哩，即係 5.89 公里。
計番時速為 7.85 公里，比上次慢左少少。


今次跑時，一路都保持住 5 哩（ 8 公里）每小時的速度。
跑到 20 分鐘，我仲開始加速 tim。
但係跑到 30 分鐘，開持好辛苦，
我只是頂硬上跑埋個 15 分鐘。


其實話就話跑左四十五分鐘，其實最尾個五分鐘係 Cool Down。
所以真係訓練的時間係只有 40 分鐘，
但是我 keep 既 record 係全部 45 分鐘。
扣番 5 分鐘 Cool Down 所跑既距離，
大既我 40 分鐘內跑了 3.41 哩（5.49 公里）
計番時速為 8.23 公里，都係未如理想。
不過這只是大約數字，下次練跑我試下唔 keep Cool Down 既 record。
咁應該會準些少。


2003 年 2 月舉行的香港國際馬拉松賽事，
十公里組別冠軍，來自台灣的選手翁竹毅，只是以卅三分十九秒完成。
我用了一個小時也未能完成十公里。
當然，我的目標不是去到一個發夢咁既數字。
現階段的目標，是在六月尾能夠在 50 分鐘內跑完 10 公里，
大約是每小時 12 公里，希望這個目標不是太遠。


為了鼓勵自己，和杜絕「d 汗貼係個身上面影響表現」這個藉口，
我今日去了運動用品公司，買了兩件衫和一條褲，
三件都係特別為跑步而設計的，
既輕身，而且又排汗特快，其中一件衫還有 防 UV 保護。


「工欲善其事，必先利其器」
希望有了新裝備之後，
不單止身理上幫我（幫助排汗）
心理上也能幫我。（唔可以浪費左 d 新衫新褲！）
請代禱。


>>May 6, 2003 at 2:12:16 AM GMT+8

2003 年 5 月 3 日 星期六 【雨】

今日下午去了九龍公園幫手教公園定向研習班。
我負責在公園實習的帶其中一組。


實習前後都有在課室上的課節。
古人說：「溫故知新」
雖然 d 內容我聽過很多次，
但都坐定定虛心受教，看看有沒有住一步的得益。


今天最後一個課節，係教「如何教一個課節」
講者是一位資歷很深很深的領袖。


他說老師分四種，節錄如下：
（原文是英文，我消化了後用自己文字寫出來，測試自己明白了多少）

第一種老師告訴學員知識。
例如老師告訴我們如何騎單車，如何起步，如何……

但這樣是不夠的，一個好老師教授學員知識。
「告訴」和「教授」的分別是，前者是純單向資料傳遞。
而後者隨了資料傳遞外，更進一步令聽既人由唔懂得變成懂得。

這樣還是不夠的，一個偉大的老師是可以親身示範，
這階段已由紙上談兵去到實戰，親身示範應該如何如何。

做到一個偉大的老師，是否己經是最高境界呢？
不是，再進一步，一個完美的老師更可以激發學員超越自己，青出於藍。



我成日都教班，不論是教野外定向還是寫程式。
但撫心自問，
我並不是一個完美的老師，
我也不是一個偉大的老師，
我更不是一個好老師，
我甚至不能算是一個老師。


畀我教過既人都知，
基本上唔係一個老師在教他們，
而是一部按了 Fast Forward 既播音機在廣播。
我想信，十個學生有九個半上完課之後，
不要說學懂，甚至連知道知識都未算。


現在回想，幸好當初沒有選教師做我職業，而誤人子弟。


「路，還有很長遠……」

>>May 6, 2003 at 1:57:49 AM GMT+8

2003 年 5 月 2 日 星期五 【雨】

今晚去左睇 Beyond 演唱會
返左黎幾個鐘，都仲係好 high


好耐冇試過紅館坐啡閘位了。
香港體育館四面閘分別係紅黃藍綠四隻色，
而啡閘位就係體育館中間既位，
理論上係最近表演者的。


對上一次，要數到李克勤同香港管弦槳團那個演唱會。
今次坐第七行，係我咁多次坐係度睇既表現最前既。
當然，我都試過再前 d，例如上年係九龍灣展貿中心睇恭碩良，
不設坐位，我企第一排。


再前 d 都有，中二個年既一個報道會，
我甚至企係台上表演，呵呵呵（Joey：炒炒淨係識搵 d 咸豐年既威水史黎講）


講返今晚個演唱會既表現者，就係成立二十周年的 Beyond。
Beyond 我個輩，甚至再早一輩的人，唔多唔少都受過 Beyond 既影響。
我以前學結他，或多或少都因為 Beyond。


由於係 Live Band Show，仲要係一隊 Rock Band。所以 d 音響比一般既演唱會更勁！
d 低音勁到，每一個音都好似打入你個心咁。


演唱會期間， d 觀眾（包括我）好多時都會情不自禁企起身黎，
個身隨著拍子而動，甚至大聲叫囂。


到 encore 部份，大部份觀眾（當煞包括我）更企上張椅子上。
仲要 d 保安唔阻止你，真係又 high 又投入。
今次真係破天荒，可能冇下次。
（你試下係其他演唱會企係身，睇下有咩後果？）


上次睇完阿 Paul（Beyond 成員之一） 既演唱會之後，
已經好想睇 Beyond 03' 演唱會。
今晚個演唱會過之後，下一個期待既 Band Show，
就係七八月舉行 "Rock On 2003"
「Are you ready to Rock?」

>>May 3, 2003 at 7:32:23 PM GMT+8

2003 年 5 月 1 日 星期四 【晴】

又到 weekend ，本來打算休息吓，
點知眼尾望望個 To-Do-List，
多野做到冇停手……

不如讓大家看看我今期既 To-Do-List：

ID	Task	Due Date
1	EESM 536 (Digital Communication) Project topic decision	07-May-2003
2	Java Part-time 工作計劃	07-May-2003
3	Java Programming	未知
4	EESM 536 (Digital Communication) Assignment 3	09-May-2003
5	EESM 515 (IP Networks) Assignment 6	09-May-2003
6	日文工作紙五	15-May-2003
7	日文作文（自我介紹）	15-May-2003
8	EESM 536 (Digital Communication) Project	22-May-2003

係咪好多野做呢？
希望全部都可以如期執行啦，請代禱。


近排發覺手提電話計劃的通話時間唔多夠用，有轉台的打算。
唔知大家用緊邊個台呢？
邊個台的覆蓋、接收比較好呢？
又邊個台抵用 d 呢？
麻煩各位告知小弟，謝謝。

2003 年 4 月 30 日 星期三 【雨】

好疲倦呀！
現在時間是十一時半，小弟剛剛由大嶼山返到屋企。

我唔係去完宿營回來呀！
而係上了香港第二高峰鳳凰山山頂(海拔 935 米)睇日出。


昨晚行程是首先在晚上九時四十五分，到戲院看 X-Men 2。
老實說，看完有些失望。特持和化妝都很出色，但故事內容比上集略遜一籌。


看完電影己是零時，趕忙乘地下鐵路入東涌。
我比預定集合時間（零時四十五分）早了數分鐘到達，
奈何我的同事們遲了足足三十分鐘。
幸好還趕上了尾班巴士。


同車還有另一幫人，看他們的行裝，應該都是上鳳凰山。
果然，當巴士沿東涌路駛至伯公坳時，他們便下了車。
巴士司機察覺到我們沒有下車的意欲，十分好人地問我們是否上山看日出，
是的話就應該在伯公坳下車。
但因為我預算過若由伯公坳上山，三時半左右便會到達山頂了，
所以另有出發地點。我們婉拒了他的好意。


當巴士駛到}瞻s道和深屈道交屆時，我們便下了車。
我們的路線就是沿昂坪道上經寶蓮寺 -> 鳳凰觀日牌坊 -> 天梯 -> 山頂。


由於隊伍中有女仕，也有少行山的人，
所以我們的前進速度頗慢。用了三小時，大約五時才到達山頂（正常應該不需兩小時）


山頂真的很大風和很凍，幸好我們帶了足夠的禦寒衣物。
但我見到有人只得短袖上衣和短褲，真可憐。


根據天文台的資料，日出時間大約時五時五十二分。
可惜，因晨早多霧，看不到日出，唯有寄望下次機會。


六時十五分，我們決定落山到伯公坳。
由於又是以緩慢的速度前進，用了兩個半鐘頭才到伯公坳。
乘巴士回東涌，到茶樓飲茶後各自回家。

2003 年 4 月 29 日 星期二 【晴】


呵呵呵, 今日炒炒同Joey 都放棄發言權利
由我...............路人甲出o黎講野
(大家請拍手熱烈歡迎....)

拿拿拿, 大家唔好以為路人甲又係炒炒o既另一個分身呀
係貨真價實有個咁o既人架
嗯嗯, 我係一個好可愛o既小姐o黎架.............呵呵呵呵呵(開始癲左)

咳咳, 正經o的先........
今日呢....講咩好呢.....hmm...........不如講下朋友眼中o既炒炒啦

佢呢.....經過我地一班朋友o既長期研究......係咩結果都冇o既
(車........你唔好浪費我地o既時間好冇)
拿, 大家俾o的耐性, 點解我地會一o的結果都冇?
咪由於佢把口囉, 實到死
問咩都唔講, 你知啦, 班舊同學聚會, 大家最鍾意講o既,
除左做邊行之外, 就係有冇男/女朋友啦
咁大家凡親問佢呢個問題, 佢一係就帶大家遊花園, 一係就話無可奉告


咁一人退一步喇
問..."你有冇暗戀人呀?"
呢個問題問足幾年都係冇答案, 其實我覺得佢好有潛質做間諜架
即使俾敵人捉左, 佢都只會帶人遊花園, 遊到頭昏依然咩都問唔到, 幾好........
hmm........得閒要請教下呢方面先

不過咁, 無論佢班大同或者中同, 男定女
大家對佢都有一個共通o既評語.................佢好好人.....
嗯嗯, 咁又係o既, 佢份人又肯幫人, 又冇脾氣
如果你可以挑起佢脾氣, 令佢發嬲, 拜託盡快通知我
呢o的難得一見o既鏡頭真係要錄低佢...
唔知可以賣到幾多錢呢...........呵呵呵

係喇, 炒炒叫我向大家報告佢做gym o既最新進度喎, 佢話
"昨日做 gym
跑 5.7936384 km 用左 42 min, 跑快左又長距離左"
嗯嗯, 大家俾o的鼓勵過佢, 拍下手啦

>>April 30, 2003 at 3:29:33 AM GMT+8

2003 年 4 月 28 日 星期一 【晴】


炒炒持續不振，所以今天仍然是我 Joey 的時間。
今次和大家談談炒炒的感情世界。請大家鼓掌。



話說炒炒是一個內向的人。
正確點說，炒炒是一個內向中不失外向，外向中又保持內向的人。
（ 即是甚麼？即是他是典型雙子座性格）

他給人的第一印象，多數都是文靜形。
但係熟識他的人都知道，他是很頑皮的。
喜歡作弄人，喜歡奚落人。
據聞炒炒口中的最佳新人時常被炒炒奚落而多次想揮袖而去。
在會議中，通常炒炒都不發一言，縱然他可能有意見。
但有時他又會據理力爭，發言滔滔不絕。
使會議所需時間比正常多了數倍也未有定論。
若你碰上他多發言的時候，那你多數都是時運低了。


但另一方面，他又喜愛幻想，是不切實際的幻想。
打個比方，他兒時每看卡通片，尤其是正義超人大戰侵略者，
在他的腦海中總有第二個故事。而主角，嘿嘿，當然是自以為自己是正義化身的炒炒啦！

又例如睇足球小將，佢又會幻想自己使出衝力射球（那時還沒有滑翔衝力射球）

在中三時，他的班主任更稱他做問題少年。


結合上述兩項特點。
他在感情上時常會會錯意。
他時常會想：
「究竟她是否喜歡我呢？」
「究竟她是否對我有意思呢？」

但是佢又因害羞而唔敢對人說清楚，
所以事情通常一拖再拖。
那答案是甚麼？炒炒不知，但我估多數都是自作多情去做夢。


依我看，炒炒找到人喜歡他的機會都是微乎其微了。


現在，請大家一起為可憐炒炒默哀一分鐘。


禮成！


>>April 29, 2003 at 5:01:17 AM GMT+8

2003 年 4 月 27 日 星期日 【晴】


因為炒炒今天很懶惰，沒有想寫甚麼題目。
加上有人誤會了「炒炒是完美主義者」的言論。
所以今天又是小女子 Joey 說壞話的時間。


首先，炒炒絕對是口是心非，說一套，做一套的人。
所以不要輕易相信炒炒的說話。
他媽媽曾經為些下了一個簡明而到到題的結論：
「信佢多過一成都死…」

例如他說：「做得不錯，效果很好。」
心中是說：「完全不及格，由頭做過吧！」

又例如他說：「友誼第一，比賽第二。今次志在參與。」
心中是說：「不成功，便成仁。我要贏！」


中學時的公民教育主任教的是：
「律己嚴，待人寬。」
炒炒的是：「律人嚴，待己寬。」
對別人要求的是完美，對自己的要求則是得過且過。
典型的南轅北轍。


炒炒有一個朋友，說買電腦說了兩年才買。
買年前說要辭職轉工，到今天仍然在該公司做。
炒炒因此時常責備他。但其實，炒炒也是這樣的一個人。
他有時可以很果斷，下主意下得很快。
但一涉及錢銀的事，他就變得很優柔寡斷。

例如他買電腦零件，行了電腦商場整整一個多月，才買了他想買的。
Printer，Scanner 他年多前已說了要換。
到今天，仍然在用舊的那些。
每次到電腦商場，他總會看看同一個型號，但始終沒有買。
在炒炒的待買清單中，還有：
數碼相機、PS2、GameBoy Advance、足球鞋、手提電話……
大家拭目以待看他何時才買上述的物品。


經過小女子多年的研究，終於有了初步的結論。
其實做成以上情況的原因是：炒炒是守財奴！
所以涉及錢銀的事，他都會變得很優柔寡斷。
正在看這篇文章的你又有甚麼看法呢？
歡迎討論指教一番。

2003 年 4 月 26 日 星期六 【晴】


呵呵呵呵呵呵

Joey：咩事咁開心呢？


記唔記得小弟在四月十九日的日記說過會考 SUN CERTIFIED PROGRAMMER FOR JAVA 2 PLATFORM 1.4？
我今天已經赴考了。
成績如何？當然及格啦！
及格分數是 52 分，我的得分是 72 分。
以下是細分：

Section Analysis	Score%
Declarations and Access Control	75%
Flow Control, Assertions, and Exception Handling	66%
Garbage Collection	33%
Language Fundamentals	70%
OPerators and Assignments	87%
Overloading, Overriding, Runtime Type and Object Orientation	66%
Threads	50%
Fundamentals Classes in the java.lang package	100%
The Collection Framework	100%

雖然及格，但分數並不理想
（又係 Joey 爆炓時間，其實炒炒患有嚴重完美主義病！
唔好睇佢平時好似咩都唔認真，其實佢對自己要求好高。事事都要做到最好。
但是，他好像沒試過成功，呵呵 ）


不知是否失去的東西會更覺得珍惜呢？
我的 MSc in Telecommunication 都還沒有讀完，
又有第二個課程想讀（又是我上司介紹）
今次是香港城市大學的 MSc in Engineering Management
（Joey：你是否打算在香港每間大學都修讀課程？）


隨了 Degree Courses 之外，IVE(青衣) 都有幾個暑假舉辦 Game Programming Courses，我都有興趣！
（Joey：慘了，炒炒真的讀上腦…有沒有辦法醫？ ）


考了 Java 的專業資格以後，現在的目標，
是準備 IP Network 的 final exam、
Digital Communication 的 Assignment 3、
Digital Communication 的 Report、
日文課的作文和
日文課的期考。
當然還有公司手頭上的 Project 啦！
請為小弟各項計劃的工作代禱。