2003 年 7 月 13 日 星期日 【晴】

昨日起身發高燒，走左去睇醫生。
個醫生我都有成十年冇找過佢，
上一次去睇佢係九三年既事。


入到佢間房，
嘩！乜老左咁多呀！
傾左一陣，檢查完之後，
姑娘同我打左支針，好痛喔 ><


之後係等拿藥期間，
醫生走出黎同我地傾計，
呵呵呵，好彩叫埋阿媽黎，
完全唔駛我出聲，
但要扮好留心咁聽（唔制呀！電視做緊卡通片 ><）


根住拿藥，要成三百蚊（好貴！）
梗係啦，今次除了睇黃蜂針患之外，
仲順手睇埋其他野，
個 d 藥係貴 d 既，
無法啦，始終都要治一治既……


返到屋企食完藥，又疲倦又眼訓，
咁就開始左斷斷續續既睡眠之旅……

>>July 16, 2003 at 3:51:05 AM GMT+8

2003 年 7 月 12 日 星期六 【晴】

講番昨晚就真係腥風血雨，
驚天地，泣鬼神（有冇咁誇張？）


話說星期六晚，
我去左青衣參加黃昏定向賽。
賽事中心六時開放，
我五時半已經到達。
咁早去做乜？
試相機 lor。


六時過後，參賽者陸陸續續抵達。
我也開始換衫熱身。


六時半，賽事展開。
今次採用 mass start，即係全部人同時間出發。
而又因為係短途賽，所以我用比平時快既速度前進。


誰料一號 point 就脫腳，
因為今次張圖既比例唔同平時，
距離感相差很多，
我早了一個山窩找 point，浪費唔少時間。


加上中段犯了不少錯誤，
換圖時（由於賽區細，所以要換圖再出發）
我應該係最後一個。


換圖後我再次發力，
連追兩人，之後一段長命斜，又謝過。


去到六號控制點，
本有機會再過一個，點知落落下山……
左腳有 d 痛，
跟住右邊膞頭有 d 痛，
跟住頭頂有 d 痛。
心知不妙，我遇伏受襲了！
我慘叫一聲，趕緊揮動雙臂，
離開事發現場，
打埋其他 points 之後返終點。


返到終點檢查傷口，冇針留係到，
好彩係黃蜂而唔係蜜蜂，
以前都畀黃蜂針過，應該有抗體，冇事掛。


晚飯時公佈成績，
16 個人報名，我排第八，
但是事實上，
有兩個中途棄權，
一個超時，
一個打錯 point 被取消資格，
四個冇黎……

即係話，我係有成功中排包尾……… ><

>>July 16, 2003 at 3:34:47 AM GMT+8

2003 年 7 月 11 日 星期五 【晴】

經過正反兩方一年內激烈既辯論（又黎性格分裂喇……）
我終於係二零零三年七月十一日晚上七時正，
買左我第一部數碼相機，亦係我既第一部相機。


話說我今日放工就坐車出旺角，
打算買完相機去 join 我班大同睇旅行既資料。
約左七點等，但係我七點仲試緊機……
D 同學打電話黎，我覆佢時話：
「買緊相機，五分鐘後到。」
點知佢話：「我唔係催你，只係想話畀你知唔駛咁趕，我地個個都遲到……」


因為佢呢個電話，攪到我未試完部機就畀錢，
今日放工番屋企再試……


等齊人之後，我地上左銀行中心睇資料，
咦，你又買相機又去旅行咁有錢呀？
唔好唔會，我唔係同佢地去旅行架，
咁你上去做咩？
呵呵呵，醉翁之意不在酒，
我只不過做定資料搜集之嘛。
係呀，我洗錢好麻煩架，起碼預早半年做定財政預算。
仲要未到最到最後鐘， d 錢未離手，都唔可以肯定會洗呢筆錢。
唔知呢 d 叫唔叫優柔寡斷呢？

2003 年 7 月 10 日 星期四 【晴】

昨日屯門公路發生嚴重交通意外，
有架巴士係高架公路衝左落黎。


一如以往，
事後總會有人馬後炮話一早應該點點點，
一早應該加個防撞欄，
邊個邊個要負責云云……


我覺得係人既問題，
係心態既問題，
d 人，尤其係香港既司機，
唔知乜野叫禮讓，
切線轉彎唔打燈。
「我要切線，你就要收油畀我切」

甚至畀油加速切人線，
點解唔可以等隔離線冇車先切過去？
真係好趕時間咩？

2003 年 7 月 9 日 星期三 【晴】

原本星期三晚我要練跑，
但係昨晚我冇。
原因唔係因為我偷懶，
而係有個野外定向班我要幫手教。


我曾經係呢度講過，
我其中一個志願係做教師，
但係經過昨晚教完之後，
我覺得自己好失敗。
完完全全做唔到應有既職能，
帶唔到上堂氣氛，
教唔到應該教既野，
學員學唔到應該學既野………

2003 年 7 月 8 日 星期二 【晴】

話說中大訊息工程系係 ACM Local 比賽連贏兩屆，
由組織鬆散到現在漸見規模。

帶隊的 Prof. Ng 就約左新舊 Member 一齊去慶祝。
我言個前隊長當然係座上客啦。


我地去左尖沙咀一間意大利餐廳用晚餐。
其實我唔係第一次去 Fat Angelo's （餐廳名）
半年前都和同事去過……


席間，當然會談談大家既近況啦！
Prof. Ng 問左我一個問題：
「你覺得你個屆有沒人找到一份好工？」


我就答佢有人找到份十四個月糧，
一年加兩次人工……


Prof. Ng 持不同意見，
佢話：「剛畢業，一份穩定既工並不是一份好工，
你應該去闖下，試下唔同既 field，睇下邊個 field 識合你。
做份有得學野既工，而唔係一 d 入職前已經要你識晒，入到去做 one man bank既工。」


佢呢番話畀左好大衝擊我，
好有思想空間，
究竟，我係呢一刻，追求既係咩？應該追求既又係咩？

係穩定既工作，穩定既生活，結婚生仔做過平常人？
定係追求多姿多采既生活？


我相信每個人最想追求既野唔同，
甚至係每一個階段都可能有唔同既目標。


但願當我走到人生的盡頭時，
回望過去，我能夠覺得「無悔」。
而係身邊，仲可以有一個能夠同我同甘共苦，
分享生命中每一點每一滴的老伴………

>>July 9, 2003 at 8:35:51 AM GMT+8

2003 年 7 月 7 日 星期一 【晴】

不經不覺，undergrade 畢業都半年有多，
master 第一個 sem 都完左成兩月。
現在每日都係返朝九晚六，
放左工有時去學日文，
有時去練吓跑，
已經唔係好記得讀書既生活係點。


唔怪得之以前聽 d 師兄講，
趁仲讀緊書，有得玩好玩多 d。

現在 d friend 叫我去玩，去踢波，
我都唔係點有心機想去。
不如返屋企休息吓好過啦！


但係返到屋企，
唔知點解，就算冇野做都唔係訓。
係都要過左一點先想訓，
第二朝又要七點起身。
明知會唔夠訓，但係又唔知點好。


近日知道有人一個星期要考三科試，
日成都要溫書，
買左哈利波特都冇時間睇，
好慘咁。


我又會諗，呢種時常要考試既生活好似距離我愈來愈遠，
我愈來愈唔能夠理解呢種生活。
九月開學時，我會唔會唔慣架？

>>July 8, 2003 at 9:06:38 AM GMT+8

2003 年 7 月 6 日 星期日 【晴】

昨晚去了睇 "Rock On 2003"
rock on 係咩黎呢？

其實 rock on 今年攪到第七屆，
每年都有好多既 band （大部份都係本地 band）表演
今年一共有二十四隊 band（其中兩隊黎自日本）
分兩日，每日各五個鐘。


咦，乜炒炒竟然好 band sound。
係咪估唔到呢？
仲有好多你地估唔到既，
慢慢發掘啦！


講番個 show，隊隊都有唔同風格，
好正，好 high！


今年另一個特別既地方，
係由往年既高山劇場，
改做今年係九展。
仲要係全場企位，
所以觀眾特別投入。


個 show 十二點先完，
攪到我差點冇車返屋企。
係回家家既途中，聽收音機聽到一個令人振奮既消息。
返到屋企等埋政府出聲明先訓。

結果係………

今朝返工遲到了半個鐘 ><

>>July 7, 2003 at 4:51:13 AM GMT+8

2003 年 7 月 5 日 星期六 【晴】

今朝一早去左沙田彭福公園，
參加某定向會攪既技術訓練。


話說約左人九點三係火炭火車站等，
難得我準時，
點知有人九點先起身，
遲左半個鐘有多！


半個鐘咁長，可以做 d 乜？
好彩我買定左份報紙，
我可以睇吓報紙，
加埋講吓電話，打發了等既時間。


講番訓練既成績。
二千四百七十五米既長度，
我用了十九分三十二秒。
好慢，亦犯了唔少錯誤。
但總算「比上不足，比下有餘」


人追求既不正正就是「比上不足，比下有餘」嗎？

>>July 7, 2003 at 4:34:10 AM GMT+8

2003 年 7 月 4 日 星期五 【晴】

宏觀 d 睇
人生其實係經歷一個一個既階段，
通過一個又一個既 check point
這個 check point，可能係上個階段既終點
可能同時係下一個階段既起點。


今個階段得到既經驗，
可能係以後某一個階段用得著。


今日，終於同它結束了半年有多既關係，
曾經放左好多心機落去
奈何，天下無不散之筵席，
最終，今日執埋 d 手尾之後都要同它講 bye bye


個心很平靜，
唔知係咪因為已經麻木了呢？
定還是知道有另一個它等緊我呢？


「終點同時是起點。」

>>July 7, 2003 at 4:22:37 AM GMT+8