2003 年 9 月 11 日 星期四 【晴】

早幾日講過危險小巴事件，
今日講既都係同坐小巴有關。


話說前排返工放工我都係坐小巴，
但係有個現象好奇怪，
就係除非坐滿乘客，
否則我旁邊個位都係冇人既。


我想左好耐都唔知點解。
假設係有幾個，
不過係我未有結論之前，
發生危險小巴事件，
攪到我近排都唔係咁敢坐小巴。


其實坐小巴都有技巧的，
坐單丁位，冇錯你係有私人空間，
不過個位比較細。

坐雙連位呢，
空間比較多左，
但係 d 空間係共用既，
所以冇左私人空間。
遇上 d 「不受歡迎人士」
例如有 d 人睇報紙隻手肘會伸過黎，
霸佔我已經唔算多既空間，
有話者講電話講到大大聲，
以聲音霸佔我既空間等等。


但係如果坐位坐得好，
兼有晒天時地利人和既話，
絕對係可以既有私人空間，
也有廣闊寬敞既空間‧
呢個位就係前面數落黎第二排，
近窗那個位。
大家可以試下，
大前提係我既假設沒有錯。

>>September 11, 2003 at 5:09:28 AM GMT+8

2003 年 9 月 10 日 星期三 【晴】

幾個月之前SARS 襲港。
係 2003年 6月23日格林威治時間 7時，
香港從世界衛生組織的
嚴重急性呼吸道症候群（SARS）病例集中區名單除名。


但係昨天晚上，
我才真真正正感受到，
SARS 已經離開香港。


因為 SARS 既原故，
停了冇開工。
就算過了 6月23日，
好耐都冇人黎我屋企開工。
昨晚上完堂返到屋企，
係門口發覺點解好似多左對鞋既？
呢對男裝鞋肯定唔係我既，
亦都唔似係爸爸既。
但係得兩個男性係呢呢度住，
咁即係有客啦，
夜晚十一點幾都未走，
應該唔會有好多選擇，
此時都心知不妙。


果然一開門已經 feel 到煙霧瀰漫，
望過去飯桌那邊，
見到有人很努力工作。
為保身體健康，
我當然立即逃入睡房啦。
待他們收工過後，
現場還境安全（呢句係急救班學番黎）
才出來。


可憐我夜晚一點先有晚飯吃，
可預料係之後幾個月，
我都係要過非人生活。

「我要我空間！」

>>September 11, 2003 at 4:40:19 AM GMT+8

2003 年 9 月 9 日 星期二 【晴】

上個星期二因為颱風既關係，
冇得上日文課，
今個星期風和日麗，
終於可以開學喇！


係屋企食飽飯之後，
我八點正就去到日經。
個度人山人海，
點解咁多人既？
我記得上兩個星期考試都只係得六個同學仔，
入到課室有晒十六個同學既？
原來，多左班剛剛讀完暑期班既同學仔。
另外有一個係幾個月前讀完初班，停左幾個月。
同埋一個新同學。


讀得暑期班，
多數都係在學人士，
因為暑期班係密集課程，
一個星期上兩三堂，
每堂兩個鐘。
即係話用兩個月既時間，
上我用左半年既堂
在職人士係冇咁既時間既。


而班暑期班既同學仔，
有讀緊大學既，也有讀緊中學既。
（點解我知佢讀緊中學？因為佢著住校服裙 lor ^_^）
人多左，係熱鬧左，不過講多左好多廢話，

好似老師一入課室，
暑期班既同學係咁叫佢介紹自己，
擾攘左半個鐘。

又好似老師講例文既，
講開枇杷既日文係咩，
咁我地唔知枇杷係咩，
老師找左幅圖指畀我地睇，多口講左句枇杷好味。
咁暑期班同學又係度爭論納豆好唔好味……
總之我唔係咁鍾意呢批新同學啦，
阻慢晒 d 進度……

而且，因為人多了（多了三倍）
老師照顧每一個學生既時間少左（得番三份一）
以前頌讀課文，
因為人少少，
好快就輪番我，
但而家，一堂都唔佑講唔講到兩次……


另外，亦都派了考試卷，
我有 86.5 分，
老師畀我既意見係：
「文化完全冇問題，詞彙完全唔及格」
所以黎緊既日子，
我要努力 d 背詞彙喇。
^_^

>>September 10, 2003 at 4:36:53 AM GMT+8

2003 年 9 月 8 日 星期一 【晴】

昨日放工坐小巴，
個司機幾衰呀！
話說小巴都上到差不多滿，
你知啦，有成十幾個人頭係度，
唔係咁易睇到仲有冇位，
仲有幾多位咁架嘛。

咁剛剛有兩位女土黎到，
因為唔知夠唔夠兩個位，
其中一個就企上左一級「裝」吓，
咁而係呢個時候，
又有一單身男士黎到。


個司機就好唔好老脾咁話：
「借借啦，阻住晒。得一個位咋！」
學劉德華係廣告入面話齋：
「今時今日咁既服務態度係唔夠架。」
點解個司機唔可以禮貌 d 咁講。
例如：「唔好意思，得番一個位。麻煩你等下班車丫。」
順耳幾多？


咁都未算過份，
最過份係佢揸緊車既時候聽電話。
大家都應該知，
法例規定，行車時，司機聽電話一定要用 handfree。
我咁勞氣，個司機當然係冇用啦。
佢仲要攪到全車人生活安全都受到威脅。
點解咁講呢？
大家可以想像吓：
架小巴係一架棍波車。
電話響既時候，
左手拿起電話，右手仍然控制:挼L。
而係呢個時候，
佢將電話由左手交去右手，
然後用右手講電話，左手控制波棍轉波。
即係話，呢段時間係冇手控制:挼L既，
你話幾危險呢……
好彩冇發生交通意外。

我已經認住個司機，
我唔會再坐佢車！

>>September 10, 2003 at 3:46:17 AM GMT+8

2003 年 9 月 7 日 星期日 【酷熱】

日記是甚麼？
日記是應用文的一種。它的格式是先記下具體日
期、星期和天氣 ( 如「晴」、 「陰」 、 「雨」)，
然後是記當天發生的事情。但日記不是流水帳，要選
擇一天中最有意義或生動有趣的事，自已感受最深的
東西記下來。把事情和感受結合起來寫，既能真實地
反映事情本來的面目，又能反映自已真實的思想感情
。因此，日記應當是個人生活足跡和心路歷程的忠實
記錄。

http://smw.hkcampus.net/image/P4chdairy.ppt


然而，翻看自己既「日記」，
其實都不知道是否還能稱為「日記」。
因為很多都沒有記事，
只有寄情。
似乎唔符合日記的格式要求。
日記是應用文的一種，
而應用文有很嚴格的格式規格。
（又想起了傷心事，我篇會議記錄呀！ ><）


又或者，應該稱為心情隨筆才對。


講回日記，
我記得細細個求學階段時，
老師教我們是不應該看別人的日記的。

但唔知點解，
中學時期，
老師要求我們每星期交週記一篇，
公然睇我地既秘密！


網上日記既出現，
使得本來應該秘密既野，
變得公開化。
但係，呢 d 係有意公開既「秘密」，
究竟係真的心底話，
還是經過化妝，修飾既門面說話，
我想，只有寫的人才知曉。

>>September 9, 2003 at 4:34:39 AM GMT+8

2003 年 9 月 6 日 星期六 【晴】

昨天我沒有返公司，
不是我懶喔，
而是我上了深圳參觀第五屆中國國際光電博覽會。
和上年一樣，地點是中國國際高新技術成果交易會議展覽中心。
今次既展覽很大形，大過香港書展 N 咁多倍，
場館面積為五萬多平方米，
主辦當局聲稱是全球最大的光電博覽會。


朝早約了同事九點正在上水火車站等，
不過我好冇時間觀念，
我到達既時間同九點正足足相差了半個小時。
唔好誤會，我不是遲到，我是早到了半個小時！


去到展覽館，我地就兵分三路各自參觀同搜集資料。
參觀過程暫且按下不表，
因為都無關痛癢。
值得一提既係見到既展品。
係光電博覽會中，見到光電產品很正常，
見到光電產品需用到的電子零件也很正常，
有望遠鏡賣也說得過去。
但有兩樣展品，我真的想不通。
第一樣係按摩器，
他們會叫經過的人試試按摩器。
第二樣係攪拌機和菜刀？！
仲要有人示範！


逛到點零兩點，
整個展覽場館大約逛完，
大陸既同事就帶了我地去吃午餐，
午餐係長沙河粉。
我叫了一碗牛肉河，
另外，還有豆腐和豬手是 share 的。

係那兒叫野食，
首先你要買飛，
然後售票員會畀個有號碼既牌你，
當食物預備好既時候，
傳菜員有會叫號碼，
係你既話，你就要示意，
傳菜員就會將食物送上。
d 食物很美味，
不過……全部都係辣的，
食得我幾辛苦呀。


食完飯，我 d 同事就返香港，
我就逛逛書城先，
我們本來打算坐公車去，
等呀等，都係未有對的車。
到車黎既時候，
冇停站既？
原來唔停呢個站，
咁結果我地都係打的……


去到書城，人山人海，
逛了整個下午，
結果花了三百元，
買了十一本書，
當中包括了電腦、日文和體育。
回到家中已經七點，
不自覺睡著，
醒來時己是夜晚十點幾了……
跟住先食晚飯。


>>September 8, 2003 at 4:41:21 AM GMT+8

2003 年 9 月 5 日 星期五 【酷熱】

唔同既人面對壓力，
會表現出唔同既意識形態。


有 d 人會好似彈簧咁，
壓力愈大，反彈力愈大，
工作效率愈高。
但係彈簧都有佢既極限，
如果壓力太大，
彈簧一樣會斷。


有 d 人剛剛相反，
好似一隻鴕鳥。
當有壓力來到既時候，
只係識逃避。
將問題放在一二邊，
好像看不到問題，
其實問題還未解決，
壓力始終存在。


有 d 人好似羽毛一樣，
隨風飄浮，
沒有自己立場，
風吹往那兒，
它就飄到那兒。
風是沒有定定向的，
這一刻是吹東南風，
下一刻可能己經是西北風。
羽毛有時飄往東，
有時飄往西，
立場把持不住，
結果事倍功半，
甚至一事冇成。


有 d 人好似河中的一葉輕舟，
隨水流而動。
表面上好似同鴕鳥、羽一樣，
沒有將問題解決。
和風中羽毛不一樣，
如果能你掌舵使輕舟順流而去，
必能事半功倍。
其實隨遇而安有時反能將難題迎刃而解。
硬來不成，為何不試試軟功呢？


面對難題、困難的時候，
你是上面幾種的其中一種，
還是表現出其他特性呢？
我但願我是河中的一葉輕舟，
可惜……


好似寫得比昨日深了，
其實我都係不知不覺築起了牆保護自己……

>>September 5, 2003 at 3:24:44 PM GMT+8

2003 年 9 月 4 日 星期四 【晴】

昨日篇日記竟然被人話深，
今日唯有寫得淺白少少。


踏入九月，又係開學既日子。
今個學期三科 8 個 credit。
逢星期三、四返學。


星期三那科係 Telecommunication Regulations, Markets, and Services。
睇過名都知係 d Bussiness 野，
吹水科一個，亦都係我最驚既類型。
有 Mid-term Exam，有 Final Exam，
有 Eassy ，有 Presentation。
由過 Prof. 既名估佢係國語人，
但英文講得好清楚，
都幾容易就可以聽晒佢講既野。
（上個學期有個捲舌人呀陰公 ><）
上堂唔悶，起碼我冇訓著。


星期四那科係 Introduction to Telecommunication Networks。
雖然話就話講 Telecommunication，
但個 Prof 就講到明會 mainly focus on Telephony。
六份 Assignments，
有 Mid-term Exam，有 Final Exam。
d Exams 既形式會係多項選擇題同埋短答題，
簡直係我呢 d 懶人既恩物！
個 Prof. 係廣東話人，會失驚冇神講廣東話。
例如：「One of the examples is semaphore. Anyone here is boy scout?
Who knows what is 旗號？ I was boy scout before and......」
得罪講句，佢講書真係幾悶…


最後一科係歷時三個學期既 Final Project。
今個學期係 Definition Phase，
下個學期係 Execution Phase，
最後一個學期係 Deliverable Phase。


今個學期就係要想 Topic 啦，
找 Prof. 做 Advisor 啦，
定 Milestones 啦，
寫 Project Proposal等。
題目我未想，但係希望可以做到 Multi-media 既野啦。
請代禱。

2003 年 9 月 3 日 星期三 【酷熱】

要做一件事，唔難。
要做一件事而又成功，比較難。
要做一件事而又漂亮地成功，難上加難。


要說一段話，唔難。
要說一段話去說服人，比較難。
要說一段話去說服人而不令人反感，難上加難。


有點敬佩古時的諫官，
諫官的職責是給皇帝提意見，規勸皇帝改正過失。
但是皇帝手持大權，
一個看你不順眼，
就可賜你一死。
諫官一要有勇氣，
二要有過人的觀察力，
三要有說話的藝術。


對我而言，
說話是一門很深很深的藝術。

直腸直肚地說出來，
可能對方聽不入耳，
甚至得到反效果。

婉轉地說出來，
又可能對方聽唔明﹐
結果說了等於沒說，
收不了效用。

不說出來呢？
又過不到自己的良心。


究竟應該諫還是不諫？
若諫，應該怎樣說？
若不諫，又應該怎樣做？

滿腦子充滿問號，
滿腦子充滿矛盾。

>>September 4, 2003 at 3:46:29 AM GMT+8

2003 年 9 月 2 日 星期二 【驟雨】

尋日打風呀，
其實十二點幾已經收到風話會掛八號風球，
但係公司話事人話要掛左先走得，
咁我唯有好無奈咁食午餐同繼續開工。


下午當我剛剛進入狀態，
要 Debug 既時候，
佢就已經掛左八號，
咁即係玩我…… ><


Anyway，我就執野走啦，
因為貪方便，見冇乜風，
就冇拿把長傘，
（我仲有把縮骨傘！）


見落雨，咁就唔等巴士啦，
坐小巴快 d 返屋企。
點知佢地無良到加價，
加左三蚊，加到十蚊！
哼！哼！哼！哼！


返到屋企都三點左右，
我做左一樣冇做好耐既野，
就係午睡喇。
唔好睇小午睡，
佢好重要架，
正所謂：「午後睡一睡，好過做元帥」
（你作架？原版好似唔係咁架 wor）
對我呢 d 人黎講，
午睡可以補充體力。
（懶就懶啦！）


希望杜鵑姐姐
（個風球既名）
快 d 走，
咁我聽日就可以繼續返工同返學。

>>September 2, 2003 at 4:29:54 PM GMT+8