2003 年 8 月 2 日 星期六 【晴】

昨日講到，我被人放左兩次飛機，
所以今日我要一個人逛書展 ><


其實一個人去有一個人既好，
起碼唔會意見分歧，
一個想去東，一個想去西…
（當然，性格分裂者如小弟之流就另計）


又例如睇戲咁，
唔同人有唔同既口味，
我喜歡睇既，
人地未必喜歡睇；
反之，人地喜歡睇既，
我亦未必喜歡睇，

我好怕要人地就我，
所以遇到一 d 比較另類一 d 既戲，
例如早排既「給他們一個機會」，
我就會選擇自己一個去睇。


講番書展，
十時鐘開場，
我十時左右就到了會展，
因為唔想和人迫。

因為之前 SARS 既關係，
今年係入口處安裝了紅外線體溫探測器。

跟住大隊入場，
係咁上呀上呀，
點知大隊行錯路，
上高左一層，
小弟立刻脫離大隊修正路線，
一入場就係兒童天地和賣文具既 Hall 5，
狂風掃落葉咁行完幾乎冇人既 Hall 5 之後，
立即過橋去 Hall 2，
去到 YES Sation 買寫真集，
點知都係黎遲一步，
簽名會既籌已經派晒。

之後去左掃貨，
總共買左七百幾蚊（早幾日又話要節衣縮食既？）


返到屋企，發覺舊年書展買既那套小說，
仲未開始睇……（d 書買黎擺？）

>>August 5, 2003 at 4:33:17 AM GMT+8

2003 年 8 月 1 日 星期五 【晴】

因為要變魔術，
OT 左幾晚，
（詳見七月十九日的日記）


難得到了星期六，
當然夠鐘就走啦！
點可以唔去鬆弛一下，
做 d 自己想做既野。


預本約了人踢波，
我乜都帶晒，係唔記得帶褲……
唔過咁樣係難唔到我既，
十蚊買條咪得 lor。


係三十幾度既大熱天時下踢波，
真係好鬼死辛苦，
我亦再一次體會到，
我體能係嚴重不足既。


本來我約了大同 A 君黃昏去書展，
點知突然收到佢電話說唔想去，
想改星期日。

哦，ok 啦改星期日 lor。
點知，夜晚佢又話星期日未買飛，
又唔想去喇 wor，
就係咁，我十個鐘之內被同一個人放兩次飛機 ><

>>August 4, 2003 at 7:43:37 AM GMT+8

2003 年 7 月 31 日 星期四 【晴】

對打工者黎講，
每個月最開心既，
應該係出糧。


「出糧」，除了係有筆錢落袋之外，
亦都係對你過往一個月既工作畀出一個正面既肯定。
尤其係那些底薪加佣金的，
基於多勞多得既大原則下，
你收佣金愈多，
即係表示你上個月愈勤力。


我習慣了每了月既一號都會 check 晒所有資產既價值，
好似銀行儲蓄戶口、
強制性公積金、
保險呀等等，
做個 EXCEL record save 番低。


亦都會比較番同預算有冇出入，
會唔會洗多左呀咁。
當然，今個月洗多左，下個月就要省多 d 。


望住個 EXCEL file，
見到銀行儲蓄戶口個 value 係咁跌，
我就知道：


我下個月又要節衣縮食喇！

>>August 4, 2003 at 4:55:33 AM GMT+8

2003 年 7 月 30 日 星期三 【晴】

我那個拿 First Hon 畢業既女，
因為要繼續係中大讀 Master，
所以今日係佢係公司既 last day。

係昨晚我地成 team 人，
一齊去左九龍塘又一城既 Amaronis 食晚飯。

Amaronis 係一間意大利餐廳，
今餐係大老細出錢請，
我地梗係唔客氣啦。

先黎 Appetizers 我地點了 Zuppa di Mussels，
貝殼類既海產真係好美味。


主菜方面，我們要左
1. Ricotta Cheese Ravioli,
2. Classic Pizza,
3. Roast Chicken, Peppers and Onions
4. 唔知牛定豬（係呀！雞、牛、豬我都係唔識分既……）
5. Broccoli

仲有一支紅酒（人地都唔飲酒既……）


不得不提既仲有甜品，
Chocolate Mousse with Fresh Fruit
同埋 Tiramisu，


樣樣食物都好好味 ^_^
尤其係朱古力 Mousse 同埋餛飩！
不過價錢就真係有 d 貴，
六個人去，食左千五蚊，
好彩唔駛我畀錢，
呵呵呵呵


今日下午，我又屈左個同事請食 tea，
夜晚又去左食越南野，
仲有曲奇妙趣朱古力脆皮甜筒，
真係有口福！


>>August 4, 2003 at 4:23:08 AM GMT+8

2003 年 7 月 29 日 星期二 【晴】

不拖手　或者都可堪稱熱戀
一拖手　比咳嗽更短
太快了　我未快樂過已失戀

想不起　被愛是如何溫暖
想不通　未夠資格使你心軟
但也知道心會這麼酸


點解冇啦啦唱容祖兒既習慣失戀呢？
唔駛緊張，我唔係失戀（邊有咁易？呵呵呵）

係有人最近「習慣失憶」而已。


跟據小弟明查暗訪，
終於有結論了。


人腦和電腦顯然大不相同，但是拿電腦來作類比，卻能幫助我們了解記憶。

人類的心智就像桌上型電腦一樣，有兩種不同形態的記憶：
「運作記憶」(working memory)處理目前的資訊，
而「長期記憶」則處理長時間累積的資訊。


其實人類大部份感知到的訊息，都只是暫時盤旋在運作記憶中，
就好像電腦中的隨機儲存記憶體(RAM)一樣，沒有多久，存下來的訊息就會消逝無蹤。


而長期記憶就比較像電腦的硬碟機了，會把過去的經驗實際儲存在大腦皮質中。
所謂「皮質」，也就是大腦的外層，裡面有100億個盤根錯節的神經細胞，
細胞彼此之間藉著傳導化學物質和電脈衝溝通訊息。
每一次我們對外界刺激有所知覺的時候（無論是景象、聲音、或想法），就會啟動了某一組神經元。
事後這組神經元不見得都會回復到初始狀態，反而可能強化了彼此之間的聯繫，而更緊密地糾結在一起。
一旦發生這種狀況，任何啟動了這個網路系統的外界刺激都會喚回最初的知覺，也就是對這件事有了記憶。


假如我們一直不用這些神經元，這個網路很快就會瓦解。
但是假如你反覆啟動這組神經元，那麼它們的連結形態就會愈來愈深植於腦部組織中。


究竟要儲存或拋掉某些資訊，卻不是出自我們有意識的判斷，
而是由人腦中一個細小的構造－－海馬體（hippocampus）來處理。


海馬體似乎會根據兩個問題來作判斷：
1. 大腦接收到的訊息有沒有情感上的意義？
2. 大腦接收的訊息和我們已知的事物有沒有關聯？


無論年歲多大，記憶力好壞其實因人而異，
有些老人家的記憶力甚至比大學生還敏銳。
但這並不表示我們的記憶力始終都不變。
科學家已經找出幾種阻礙腦部運作的因素。


其中一個原因就係壓力問題。
長期壓力過大除了會令我們睡不著覺、
注意力不集中，還會直接影響到腦中的化學作用。
承受壓力的經驗就像喝咖啡一樣，會暫時激發腦力，
令身體分泌腎上腺素和類皮質糖荷爾蒙，進而促進血液循環，
釋放出以葡萄糖形式儲存在我們細胞組織中的能量。
我們藉著這些對壓力的反應，來適應周遭世界，
但是假如長期處在這種備戰狀態中，就會有害健康。
30分鐘後，壓力荷爾蒙就會破壞運送葡萄糖到海馬體的分子，腦中的能量變得很低。
長期下來，壓力荷爾蒙可能會切斷神經元之間的聯繫，而且令海馬體愈縮愈小。


抄了咁大段文字過來，
結論就係：

大人你壓力過大了！


註
參考資料：http://www.commonhealth.com.tw/Med/issue002/memory1.htm


>>July 30, 2003 at 3:27:16 AM GMT+8

2003 年 7 月 28 日 星期一 【晴】

大人今日收到月餅，
仲好似好開心 tim，
攪到我都有 d 開心 ^_^。
不過有人（眾數，要加 s）唔敢食……
呵呵，我都唔知點解，唔通驚有毒？


今日身子狀況比昨天好，
但係都唔係咁舒服，
所以，決定今晚唔去做 Gym （我真係唔係懶喔！）


大人要考 Final 喇，
畀心機 d 呀！

>>July 29, 2003 at 9:36:39 AM GMT+8

2003 年 7 月 27 日 星期日 【晴】

唔知係唔係昨日比賽太劇烈，
攪到嚴重缺水。
今朝大大話話飲左廿杯水，
都仲係覺得好口渴，
覺得唔係咁舒服，
但係又講唔出點樣唔舒服。


今晚仲要上堂，功課又未做，身子又咁差……

2003 年 7 月 26 日 星期六 【晴】

「出師未捷身先死， 長使英雄淚滿襟」
話說今日有場野外定向比賽，
採自我接力，

先跑十五個 points 既奪分式，
換圖再玩十四個 points 既越野式。


開頭都跑得幾順，
打到第十二、三個 point 既時候發現，
打漏左個，
嗱嗱聲去補番，
之後換圖再出。


總共用左三十六分鐘完成賽事，
全場第五個返終點。
返到終點，全身繼續流汗，
係浩熱天氣下等左三個鐘，
大會都未出成績，
之後有個工作人員同我講，
你打漏左個 point wor。
唔係掛，我掛住補番呢個 point，
竟然漏左那個………


就係咁，我被人取消資格………


攪笑既係，
我竟然唔識返屋企？！
找左成個鐘先找到巴士站……

>>July 28, 2003 at 3:45:22 AM GMT+8

2003 年 7 月 25 日 星期五 【晴】

（因技術性問題，本日日記於七月二十九日上載。請見諒。）

船長大人話好耐冇食過月餅，
今年好想食。
大人出到聲，我呢 d 做細既又點敢唔做丫。

剛好阿包將會飛去鹽湖城讀書，
咁好機會，梗係拜託佢做一做信差，
運 d 月餅過去啦。


本來約左佢星期日交收既，
阿包今朝問我改今日下午得唔得，
（唔通佢星期日約左 S 字頭？）
鬼叫我求人咩，唔得都要得啦。


放左工，食都未食就坐巴士入沙田。
（事後，我發覺呢個係錯誤既決定）
坐車既時候，我發覺，
d 路盲連屋企後面條街係咩都唔知，
真係擔心佢會迷路………


去到沙田新城市廣場，
首先去東海堂買月餅先，
跟住見時間尚早（約左三點）
打個電話畀阿包話佢知我到左，
之後周圍逛逛先。


逛了 HMV 、
逛了 Swarovski、
逛了買物王、
逛了科技展、
逛了約干時裝店、
逛了機鋪，
大大話話逛了兩粒幾鐘，逛到四點幾，
點解阿包仲未到既？
佢住得咁近，照計應該到左架 wor。
打多次電話畀佢，佢真係到左！
但係，點解佢唔打畀我呢？

（事後估計，佢係………冇我電話既………）


結果，我四點幾五點先食「午餐」！

>>July 29, 2003 at 9:46:49 AM GMT+8

2003 年 7 月 24 日 星期四 【雨】

昨晚約左班紐卡素球迷，
一齊去左 K 房睇紐卡素對伯明翰既賽事。
係險象環生既情況之下，
好彩都險勝二比一。


睇完波返到屋企都成十一點幾，
因為圖書館係公眾假期唔開，
有人冇得上網，
所以我就打電話過去騷擾下佢。


傾完電話都成十二點幾，
梗係睇埋套電視刻先啦，
又順手打陣機同睇陣小說。
（有幾順手呀？）


成兩點幾先訓，
結果就係………今朝唔知醒。


一睜開眼都已經八點四個字，
梳洗完就即刻換衫出門口，
早餐都食唔切。


去到小巴站，
唔係咁大整蠱呀？
十幾廿個人排緊隊但係一架小巴望吓都冇？
結果我當機立斷改做坐地鐵。

亦因為咁，我發現坐地鐵快過坐小巴。
看來都係時候檢討吓用咩交通工具返工。